Тарихнамә 2-язма 26:1—23
26 Пүткүл Йәһуда хәлқи Уззияни елип, уни атиси Амазияниң тәхтигә падиша қилип олтарғузди, у шу вақитта 16 яшта еди.
2 У Елотни ясап чиқти вә атиси әҗдатлириға қайтқанда, уни Йәһудиға қайтуруп бәрди.
3 Уззия һөкүмранлиқни башлиғанда 16 яшта еди вә Йерусалимда 52 жил падишалиқ қилди. Анисиниң исми Йәһолия болуп, у Йерусалимдин еди.
4 У нәқ атиси Амазиядәк Йәһваниң көз алдида һәққаний ишларни қилди.
5 У һәқ Худаниң көрүнүшлиригә майил болған Зәкәрияниң күнлиридә Худани издиди. У Йәһваға мураҗиәт қилған дәвридә, адил Худа униңға утуқ һәдийә қилатти.
6 У берип, филистиялиқлар билән урушуп, Гатниң темини, Ябнияниң сепилини вә Азотниң сепилини бузуп, Азотниң қешида, филистийәликләр йеридә, шәһәрләрни салди.
7 Һәқ Худа униңға филистийәликләр, Гир-Баалда истиқамәт қилидиған әрәпләр вә моаблиқлар билән болған урушларда ярдәмләшти.
8 Аммонлуқлар Уззияға баҗ төләтти, униң исминиң данқи һәтта Мисирғичә йәтти, чүнки у бәк күчлүк болғанди.
9 Уззия Йерусалимда Күл дәрвазилири, Вади дәрвазилири үстидин вә буҗгәктә мунарларни қуруп, уларни мустәһкәмлиди.
10 У шундақла чөлдиму мунарларни турғузуп, көплигән су қоймилирини ясиди, чүнки униңда, түзләңдә вә төвән җайларда интайин җиқ мал-варан болған еди. Униңда һәртүрлүк тағларда вә Кармилда деханлар вә бағвәнләр ишләтти, чүнки у деханчилиққа амрақ еди.
11 Уззияниң шундақла урушларға чиқидиған һәрбий күчи зор болди. Ушбу топларни падиша әмәлдарлириниң асаслиқ бириниң, Хананияниң рәһбәрлигидә, назарәтчи Маасеяниң башчилиғида вә катип Йииелниң қоли билән тизимлап, һесап билән чиқиратти.
12 Җәңгиварлиғи билән пәриқлинидиған топ башчилириниң барлиқ сани 2600 еди.
13 Уларниң қол астида падишаға дүшмәнгә қарши турушта һәрбий җасурлуқ көрситип, җәңләргә киридиған ләшкәрләр сани 307 500 еди.
14 Улар үчүн, пүткүл әскири үчүн, Уззия қалқанлар билән нәйзиләрни, дубулғилар билән савутларни, оқ-я билән сапан ташларни тәйярлиди.
15 У Йерусалимда чевәр кишиләр ойлап тапқан қуралларни ясап, уларни мунарларда, буҗгәкләрдә оқларни вә йоған ташларни етиш үчүн қойди. Униң исми аммибап болуп, жирақларға йәтти, чүнки у әҗайип өзини қоғдап, қадир-қудрәтлик болди.
16 Амма у күчләнгәндә, униң жүриги һалакәткә апиридиған тәкәббур болуп кәтти. У Тәңри Йәһваниң алдида қилмишкәр болуп, исриқ қурбангаһида хушпурақни көйдүрүш үчүн, Йәһваниң һәрәмигә кирди.
17 Униң кәйнидин чоң роһаний Азария вә қәдир-қиммити үстүн Йәһваниң 80 роһанийи алдириди.
18 Улар Уззия падишаға етираз билдүрүп: «Сизгә, Уззия, Йәһваға исриқ тәғдим қилиш болмайду! Бу Һарун оғуллириниң, исриқ чиқиришқа беғишланған роһанийларниң ишидур, муқәддәс җайдин тезирақ чиқип кетиң. Сиз қанунсизлиқ қиливатисиз вә бу һәрикитиңиз Йәһва нәзәридә һәргиз сизгә шан-шәрәп елип кәлмәйду»,— деди.
19 Уззия болса, қолида хушпурақ көйдүридиған исриқданни тутуп, җававән терикип кәтти. Амма у роһанийларға териккәндә, униң маңлийида, роһанийларниң көз алдида, Йәһваниң ибадәтханисидики хушпурақ қурбангаһиниң йенида, мохо яриси көрүнди.
20 Чоң роһаний Азария вә барлиқ башқа роһанийлар униңға қариведи: мана, униң маңлийида мохо намайән болди. Улар уни у җайдин қоғлиди, у өзиму чиқип кетишкә алдириди, чүнки уни Йәһва җазалиған еди.
21 Шуниң билән Уззия падиша өлгичә мохо кесәлгә гириптар болди. У мохо бемаридәк ағриқхана өйидә яшиди, чүнки у Йәһва өйидин мәһрум қилинғанди. Зимин хәлқи билән падиша өйини оғли Йофам башқуруп рәһбәрлик қилди.
22 Уззияниң башқа паалийәтлири, дәсләпкилири билән ахирқилири, тоғрилиқ Амозниң оғли пәйғәмбәр Йәшая язди.
23 Ахири Уззия атилиридәк вапат болди, уни падишаларниң дәпин қилинидиған даласида йәрлиди. Сәвәви, у мохо кесәлгә гириптар еди. Униң орниға падиша болуп оғли Йофам турди.
