Тарихнамә 2-язма 28:1—27
28 Ахаз һөкүмранлиқни башлиғанда 20 яшта еди вә Йерусалимда 16 жил падиша болуп, Йәһваниң алдида атиси Давуттәк һәққаний иш қилмиди.
2 У Исраил падишалириниң излири билән меңип, һәтта Баалларниң қуйма тәсвирлирини ясиди.
3 У Еном оғуллириниң вадисида ис чиқирип, Йәһва Исраил оғуллириниң алдидин қоғлавәткән хәлиқләрниң жиркиничлик ишлирини дорап, өз оғуллирини отта көйдүрди.
4 Шундақла қурбанлиқларни вә ис чиқиришларни егизликләрдә, дөңләрдә вә һәрқандақ йоған дәрәқниң астида қилди.
5 Шуниң билән Пәрвәрдигар Йәһва уни сирияликларниң шаһиниң қолиға беривәтти, улар уни мәғлубийәткә учритип, көплигән кишилирини әсиргә елип, Дәмәшқкә әкәтти. Ахаз униң үстидин ғалип қазанған Исраил падишасиниң қолиға тапшурулди.
6 Ремалияниң оғли Пеқаһ йәһудийлардин бир күндә 120 000 қәйсәр адәмни улар атилириниң Худайи Йәһвани ташлиғини үчүн уҗуқтурди.
7 Әпрайимлиқлардин болған Зихрий батур падиша оғли Маасеяни, сарийини башқурғучи Азрикамни вә падишадин кейинки турған Әлқанани өлтүривәтти.
8 Андин ташқири, Исраил оғуллири өз бурадәрлиридин тутқунға 20 000 аял, оғул-қизни елип, нурғунлиған олҗини тартивелип, уни Самарийәгә әвәтти.
9 Шу җайда Йәһваниң пәйғәмбири болди, униң исми Одид. У Самарийәгә маңған қошунниң алдиға чиқип: «Мана, әҗдатлириниң Худайи Йәһва аччиғида йәһудийларни силәрниң қолуңларға селип бәрди. Лекин силәр нәпритиңларда уларни шунчилик савидиңларки, һәтта бу асманға йәтти.
10 Әнди силәр йәһудийлар билән йерусалимлиқларни өзәңларға қул қилмақчи. Өзәңларда болса, Илаһиңлар Йәһва алдида әйип йоқму?
11 Демәк, маңа қулақ селип, бурадәрлириңларниң арисидин тутқунға алғанлириңларни қайтуруветиңлар, чүнки Йәһваниң ғәзивиниң оти силәргиму янмақта»,— дәп агаһландурди.
12 Ушбу чағда Әпрайим оғуллиридин башчиларниң бәзилири: Йехананиң оғли Азария, Мешелемотниң оғли Бәрәкия, Шаллумниң оғли Хизқия вә Хадлайниң оғли Амаса уруштин қайтқанларниң алдида туруп,
13 уларға: «Бу йәргә тутқунларни әкирмәңлар, чүнки Йәһваниң алдидики әйиплиримиздин ташқири, силәр бизниң гуналиримизни техиму көптүрүшкә нийәт қиливатисиләр. Биздики әйип зор сәвәвидин, Исраилниң үстидә дәрғәзәп өрти туташмақта!»— дәп тосиди.
14 Шуниң билән қуралланған әскәрләр тутқунларни вә олҗини сәркиләр һәм пүткүл жиғилишниң алдида қалдурди.
15 Шу чағда исимлири аталған әрләр туруп, тутқунларни вә барлиқ ялиңачларни олҗидин кийдүрди, уларға аяқ кийимләрни берип, қосақлирини тойдурди. Андин уларни майлап, арисида аҗизларни ешәкләргә миндүрүп, уларни пальмилар шәһири Йерихаға бурадәрлиригә әвәтивәтти. Өзлири болса Самарийәгә қайтип кәлди.
16 Мәзкүр вақитта Ахаз падиша Ассурниң шаһлиридин өзигә ярдәм сорап, әлчи әвәтти.
17 Едумлуқлар келип, Йәһудияда нурғунлирини қирип, әсиргә елип кәтти.
18 Филистийәликләр Йәһудияниң түзләң вә җәнуп шәһәрлиридә тарилип, Бәйт-Шәмәш, Айялон, Гедерот, Сохо вә униңға қарашлиқ йәрләрни, Тимна вә униңға қарашлиқ йәрләрни, Гимзо вә униңға қарашлиқ йәрләрни бесивелип, шу җайларда орунлашти.
19 Шундақ қилип, Йәһва Йәһудияни падишаси Ахаз үчүн пәсәйтти, чүнки у Йәһудани бузуп, Йәһваниң алдида қанунсиз ишларни қилған еди.
20 Шу вақитта униңға Ассурниң шаһи Тиглат-Палассар кәлди, лекин у ярдәм қилишниң орниға, униңға еғирчилиқ туғдурди.
21 Сәвәви, Ахаз Йәһва ибадәтханисидин, падиша өйидин һәм бәгләрдин ғәзниләрни елип, Ассур шаһиға бәрди, амма бу униңға ярдәм болмиди.
22 Һәтта ушбу өзи үчүн тар вақитта у бәрибир Йәһваниң алдида Қанунға қарши паалийәт жүргүзди.
23 Ахаз өзини һәйран қалдуридиған Дәмәшқ худалириға қурбанлиқларни һәдийә қилип: «Сирия шаһлириниң илаһлири уларға ярдәм қилмақта, мәнму уларға қурбанлиқ тәғдим қилай, улар маңиму ярдәмлишиду»,— дәтти. Амма улар униң вә пүткүл Исраилниң жиқилишиниң сәвәпкарлири болди.
24 Шундақларчә Ахаз һәқ Худа өйиниң қачилирини оғрилап, һәққаний Тәңри ибадәтханисиниң затлирини бузуп, һәтта Йәһваниң муқәддәс җайиниң ишиклирини тақавәтти. У өзигә Иерусалимниң һәр булуңида қурбанлиқ супилирини қилғузди.
25 Йәһудияниң барлиқ шәһәрлиридә башқа бутларға ис чиқириш үчүн егизликләрни салди, шундақ қилип, у әҗдатлириниң Рәбби Йәһвани териктүрәтти.
26 Униң башқа ишлири вә жүрүш-туруши, дәсләпкиләрдин ахирқилириғичә, Йәһуда вә Исраил падишалириниң китаплирида ипадиләнди.
27 Ахаз өлүп атилириға қошулғанда, уни Йерусалим шәһиридә дәпин қилди, бирақ Исраил падишалириниң қәбирлиригә уни қоймиди. Униң орниға падиша болуп оғли Хизқия олтарди.
