Тарихнамә 2-язма 30:1—27
30 Хизқия пүткүл Исраил һәм Йәһуда йеригә әлчиләрни әвәтип вә Әпрайим һәм Манассә қәбилилиригә хәтләрни йезип, уларни Исраилниң Худаси Йәһваниң алдиға, Йерусалимдики Йәһваниң ибадәтханисиға келип, Өтүп кетиш (Песах) мәйримини нишанлашқа чақирди.
2 Падиша бәглири һәм Йерусалимдики барлиқ жиғин билән Песахни иккинчи айда өткүзүш һәққидә мәслиһәтләшти.
3 Сәвәви, ушбу вақитта уни өткүзүшкә имканийәт йүз бәрмәтти, чүнки роһанийлар йетәрлик санда пакланмиған еди һәм хәлиқ Йерусалим шәһиридә жиғилмиған еди.
4 Падиша вә жиғинниң көзқаришида бу иш адил көрүнәтти.
5 Шуңа пүткүл Исраил зиминида, Бәәршәбадин Данғичә, һәммиси Йерусалим шәһиригә Исраил Пәрвәрдигари Йәһваниң мәзкүр байримини өткүзүшкә җакалашни бәлгүлиди, чүнки уни, йезилғинидәк, аз қетим өткүзгән еди.
6 Шуниң билән пүткүл Исраил вә Йәһуда йәрлиригә падиша һәм униң бәглиридин хәвәрчиләр хәтләр билән әвәтилип: «Исраилниң пәрзәнтлири, Ибраимниң, Исһақниң вә Исраилниң Пәрвәрдигари Йәһваға бурулуңлар вә Уму Ассур шаһлиридин силәрдә аман қалған қалдуққа бурулиду.
7 Атилириңларниң Рәбби Йәһваниң алдида қанунсиз иш тутқан атилириңлар билән бурадәрлириңлардәк болмаңлар! Шуңлашқа У, өзәңлар көрүватқандәк, уларни вәйранчилиққа беривәтти.
8 Атилириңлардәк қаттиқ гәдәнлик болмаңлар, Йәһваға қолуңларни берип, У мәңгүгә муқәддәслигән Униң муқәддәс панаһиға келиңлар. Худайиңлар Йәһваға ибадәт қилиңлар вә У силәрдин қәһриниң лавулдиған отини нери қилиду.
9 Силәр Йәһваға мураҗиәт қилсаңлар, шунда әсиргә елинған бурадәрлириңлар билән балилириңлар өз дүшмәнлириниң шәпқитигә еришип, өз йеригә қайтип келәләйду, чүнки Йәһва бәрикәтлик һәм рәһимлик Атидур вә силәр Униңға хизмәт қилсаңлар, йүзини силәрдин буримайду»,— дәп ейтилди.
10 Шундақ қилип, әлчиләр шәһәрдин шәһәргә, Әпрайим вә Манассә, һәтта Зәбулун йеригичә барди. Амма уларниң үстидин күлүшүп, мәсхирә қилди.
11 Һалбуки, Ашер, Манассә вә Зәбулун қәбилилиридин бирмунчилири мөмүнлишип, Йерусалимға кәлди.
12 Йәһудида болса Худаниң қоли болуп, уларға Йәһваниң сөзи түпәйли падишаниң вә бәгләрниң пәрманини орунлашқа бирпүтүн жүрәк берилди.
13 Шуниң билән Йерусалимда иккинчи айда петир нанлар байримини өткүзүш үчүн, нурғунлиған хәлиқ жиғилди. Ушбу жиғилиш бәк көпсанлиқ болди.
14 Улар Йерусалимда болған ят қурбангаһларни вә исриқ қилинған барлиқ җайларни елип ташлиди, уларни Кедрон өстиңигә ташлиди.
15 Улар Песах мәйримигә қурбанлиқларни иккинчи айниң 14-күни боғузлиди. Роһанийлар билән ләвийләр номус қилип, өзлирини паклиди вә Йәһваниң өйидә көйдүрмиләрни әкәлди.
16 Улар һәққаний Худаниң адими Мусаниң қануни вә тохтами бойичә өз җайлирида турди. Роһанийлар ләвийләрниң қолидин қурбанлиқ қанни сәпти.
17 Жиғилишта көплигән тазиланмиған кишиләр болғанлиқтин, ләвийләр һәрқандақ напакниң орниға Йәһваға беғишлаш қурбанлиқлирини Песах үчүн боғузлаш вәзиписини өзлиригә алди.
18 Хәлиқтин нурғунлири, көпинчә Әпрайим, Манассә, Иссакар вә Зәбулун қәбилилиридин лайиқ тазиланмиған еди. Лекин уларму, гәрчә тәләпләргә лайиқ болмисиму, Песах қурбанлиғини йеди. Сәвәви, Хизқия улар үчүн дуа қилип, мундақ деди: «Бәрикәтлик Йәһва Өзи
19 һәрқандақ кишиниң гуналирини япқай, чүнки улар йетәрлик дәриҗидә пакланмиған болсиму, бирақ әҗдатлириниң Рәбби Йәһваға келишкә жүригини тәйярлиди».
20 Йәһва Хизқияни аңлап, хәлиқни айиди.
21 Йерусалимда болған Исраил оғуллири бүйүк шатлиқ билән петир нанлар мәйримини йәттә күн нишанлиди. Ләвийләр һәм роһанийлар һәр күни Йәһвани махташ үчүн ясалған саз әсваплирида Йәһвани мәдһийилиди.
22 Хизқия болса, силиқ сөзләр билән Йәһвани махташ әҗайип сәнъәттә маһир ләвийләрни илһамландурди. Барлиғи мәйрәмлик нәрсиләрни атилириниң Худаси Йәһваға шүкүр қурбанлиқлирини әкәлгәч, йәттә күн йәп-ичип, мәдһийилиди.
23 Һәммә жиғин йәнә йәттә күн мәйрәмләшкә келишип, ушбу күнләрни шат-хорамда өткүзди.
24 Йәһуданиң падишаси Хизқия жиғилғанлар үчүн 1000 буқа вә 7000 ушшақ мал бәрди, бәгләр болса жиғилғанлар ейһтияҗи үчүн 1000 буқа һәм 10 000 ушшақ мал сәрип қилди. Роһанийлардин нурғунлири мошу вақитта муқәддәсләнди.
25 Жиғилған һәммәйлән: йәһудийлар, роһанийлар, ләвийләр вә Исраил йеридин кәлгән барлиқ хәлиқ, Исраилдин Йәһудаға өтүп җайлашқан мусапирлар, хошаллиқта мәйрәмлиди.
26 Шуниң билән Йерусалимда бүйүк шатлиқ йүз бәрди, чүнки пүткүл Исраилниң падишаси Давутниң оғли Сулайманниң күнлиридин кейин мошундақ байрам Йерусалимда болмиған еди.
27 Роһанийлар билән ләвийләр туруп, хәлиқни бәрикәтлиди. Уларниң авази аңлинип, дуаси Униң асмандики муқәддәс маканиға йәтти.
