Тарихнамә 2-язма 31:1—21
31 Ушбу мәрасим пүткәндин кейин, Йәһуда шәһәрлиридә тохтиған исраиллиқлар пүткүл Йәһудия, Бениамин, Әпрайим вә Манассә өлкилиридә ахириғичә һәйкәлләрни чеқип, Аштаротниң тәсвирлирини чепип, егизликләр һәм қурбан супилирини вәйран қилди. Андин кәлгән Исраил оғуллири өз өлкисигә, өз шәһәрлиригә қайтишти.
2 Хизқия роһанийлар һәм ләвийләр новәтлирини уларниң тохтами бойичә, өз роһанийлиқ яки ләвийлик вәзипилиридә көйдүрмиләрни, шүкүр қурбанлиқларни әкелишкә, хизмәттә мәдһийиләш вә махташ үчүн, Йәһваниң станиниң дәрвазилириға қойди.
3 Падиша көйдүрмиләргә, әтигәнлик һәм кәчлик, шәнбилик, йеңи айлиқ қурбанлиқларға вә Йәһваниң қанунида тәләп қилинидиған мәйрәмләр үчүн өз мүлкидин бир қисимни бөлди.
4 Йерусалимда яшаватқан хәлиқкә у роһанийлар билән ләвийләрниң Йәһва қанунини орунлашта мәккәм болуши үчүн, мүлкиниң бир қисмини беришни буйриди.
5 Ушбу пәрман чиққанда, Исраил оғуллири нанниң, шарапниң, зәйтун мейиниң, һәсәлниң вә йәр беридиған мәһсулатниң дәсләпки һосулидин, һәрнәрсидин онинчи қисмини әкелип тоштуривәтти.
6 Йәһуда шәһәрлиридә истиқамәт қиливатқан йәһудийлар билән исраиллиқлар шуниңдәкла қара һәм ушшақ малдин онлуқларни вә Илаһи Йәһваға беғишланған башқа ианиләрдин онинчи қисимлирини әкелип, догилавәтти.
7 Үчинчи айда уларни әкелип, йәттинчи айда онлуқларни беришни тамамлиди.
8 Хизқия билән бәгләр келип, дога-дога ианиләрни көрүп, Йәһвани махтап, Униң хәлқи Исраилни бәрикәтлиди.
9 Хизқия падиша роһанийлар вә ләвийләрдин ушбу догилар тоғрилиқ сориди.
10 Садок өйидин Азария башроһаний униңға җававән: «Йәһва өйигә һәдийәләрни әкелиштин башлап, биз тойғичә йәватимиз вә көп нәрсә ешип қеливатиду, чүнки Йәһва Өз хәлқини бәрикәтлиди. Қалғандин мана, мунчә көп нәрсә қеливатиду»,— деди.
11 Шуниң билән Хизқия Йәһваниң һәрәми йенида ханиларни тәйярлашни буйриди. Улар тәйярланди.
12 Шу йәргә пүтүнләй һесаплап, һәдийәләрни, онлуқларни вә ианиләрни әкирди. Уларда асасий назарәтчи болуп ләвий Хонания бәлгүләнди, иккинчи болуп униң бурадәри Шимей.
13 Йихиел, Азазия, Наһат, Асаил, Йеримот, Йозавад, Елиил, Исмахия, Махат вә Беная Хонания вә униң бурадәри Шимейниң қол астида ярдәмчиләр болушти. Бу әмирни Хизқия падиша вә һәқ Худа ибадәтханисидики башчи Азария чиқарди.
14 Имнаниң оғли ләвий Қоре, шәрқий тәрәптики дәрвазичи, Худаға халисанә әкелинидиған ианиләрдә Йәһваға әкелингән затларни вә беғишланған һәрхил нәрсиләрни бериш үчүн қоюлди.
15 Униңға ярдәмдә Едән, Миниамин, Йешуй, Шемая, Амария вә Шекания болди. Улар роһанийларниң шәһәрлиридә өз бурадәрлиригә новәт бойичә, чоңиғиму һәм кичигигиму, етиқати асасида иш қилатти.
16 Уларниң нәсәбнамә тизимидин ташқири, 3 яштин башлап әрҗинислиқ һәммисигә, Йәһваниң өйигә хизмәт қилиш үчүн орунлири вә новәтлири бойичә,
17 роһанийлар нәсәбнамисиға киргүзүлгәнләргә әвлатлири бойичә вә ләвийләргә 20 яштин тартип, орунлири вә новәтлири бойичә тәминат көрситилди.
18 Ушбу тизимға киргүзүлгән кичик балилири, аяллири, оғул-қизлири, барлиқ җәмийәткә хизмәт қилди. Сәвәви, улар өзлирини садақәтмәнлик билән муқәддәс хизмәткә беғишлиғанлар еди.
19 Исми аталған әрләр һәрбир шәһәрдә Һарун оғуллириға, шәһәрлириниң әтрапидики йезиларда яшаватқан роһанийларға өлчүк йәрләрни һәм шундақла ләвийләрниң тизимидики һәммисигә таритип беришкә қоюлған еди.
20 Мана немини Хизқия падиша пүткүл Йәһудияда қилди. У Худайи Йәһваниң алдида яхши, адил вә һәқиқий ишни бәҗирди.
21 Исраил Рәбби ибадәтханисида атқурулидиған хизмәткә тегиш вә Қанун һәм вәсийәтләргә тегиш қандақму ишларни қилмисун, у өз Илаһи һәққидә мулаһизә қилип, пүткүл қәлбидин һәрикәтлинип, утуққа еришәтти.
