Яритилиш 16:1—16
16 Ибрамниң аяли Сараһ униңға бала туғуп бәрмиди. Униң болса Һәҗәр исимлик мисирлиқ бир чакари бар еди.
2 Сараһ Ибрамға: «Сениңдин өтүнүмән... Йәһва маңа туғушқа бала бәрмиди. өтүнүмән, мениң чакарим билән биргә ятқина. Бәлким, у арқилиқ мениң балилирим болуп қалар»,— деди. Ибрам Сараһниң сөзини тиңшиди.
3 Шуңа униң аяли Сараһ өз чакари мисирлиқ Һәҗәрни өз ери Ибрамға тоқаллиққа бәрди. Шу вақитта Ибрам Қанан зиминида он жил яшиған еди.
4 Ибрам Һәҗәрниң қешиға кирди вә у һамилдар болди. Һамилдар болғинини билгинидә, у ханим ғоҗайинини көзгә илмас болуп қалди.
5 Шу чағда Сараһ Ибрамға: «Маңа қилиниватқан яманлиқ үчүн җавапкәрлик сениң үстүңдә. Мән өз чакаримни қойнуңға селип бәрдим, әнди у өзиниң һамилдар екәнлигини көргәндә, мени көзигә илмайдиған болди. Йәһва иккимиз арисида һөкүм қилсун»,— деди.
6 Ибрам Сараһқа: «Мана, сениң чакариң өз қолуңда. Немини лайиқ көрсәң, шуни униңға қилғин»,— деди. Шу чағда Сараһ Һәҗәрни пәсләштүрүшкә башлиди вә у униңдин қечип кәтти.
7 Бираз вақиттин кейин Йәһваниң пәриштиси уни чөлдики бир булақ, йәни Шур йолиниң бойидики булақниң йенидин тепип:
8 «Һәй Һәҗәр, Сараһниң чакари, нәдин кәлдиң һәм нәгә кетиватисән?»— дәп сориди. У җававән: «Мән ханимим Сараһтин қечип маңдим»,— деди.
9 Йәһваниң пәриштиси униңға: «Өз ханимиңға қайтип, униңға бойсунғин»,— деди.
10 Андин Йәһваниң пәриштиси униңға: «Мән сениң әвладиңни саниғусиз көп қилимән»,— деди.
11 Шуниңдин кейин Йәһваниң пәриштиси қошумчә: «Сән һамилдарсән вә оғул туғисән, уни Исмаил дәп атайсән, чүнки Йәһва сениң дәрдиңни аңлиди.
12 У оғул явайи ешәккә охшайдиған болиду. Униң қоли һәммисигә қарши болиду вә һәммисиниң қоли униңға қарши болиду. У барлиқ қериндашлириниң йенида чедирларда яшайдиған болиду»,— деди.
13 Шунда Һәҗәр өзи билән сөзлигән Йәһвани «Сән көрүдиған Худа» дәп атиди, чүнки у: «Һәқиқәтәнла, мән мени бу йәрдә Көргүчини көрдимму?»— деди.
14 Шуңлашқа шу қудуқ Беир-Лахай-Рой дәп аталди. У Қәдәш билән Бәрәдниң арисида бар.
15 Һәҗәр Ибрамға оғул туғуп бәрди вә Ибрам у туққан оғулға Исмаил дәп исим қойди.
16 Һәҗәр Ибрамға Исмаилни туғуп бәргәндә, Ибрам 86 яшта еди.
