Яритилиш 40:1—23
40 Мәлум вақиттин кейин Мисир падишасиниң шарап қуйғучиси вә навайчиси өз һөкүмрани, Мисир падишасиға, қарши гуна қилди.
2 Пирәвн өзиниң икки мәнсәпдариға, йәни шарап қуйғучиларниң башчисиға вә навайчиларниң башчисиға ғәзәпләнди.
3 Шуңлашқа у уларни пасибанлар башчисиниң өйидики зинданға тапшурди, дәл Йүсүп солақта болған зиндан өйигә.
4 Пасибанлар башчиси Йүсүпни уларниң хизмитидә болушқа қойди, улар зинданда бирмунчә вақит болди.
5 Бир күни кечиси иккилисигә — Мисир падишасиниң зиндан өйидә соланған шарап қуйғучисиға һәм навайчисиға,— чүш кирди, һәрқайсисиға өз чүши вә һәрбир чүшниң өз мәнаси бар еди.
6 Әтигәндә уларға келип, Йүсүп уларниң ғәмкин олтарғинини көрди.
7 Шу чағда у өзи билән ғоҗайининиң зинданида болған пирәвнниң мәнсәпдарлиридин: «Немишкә бүгүн чирайиңлар қайғулуқ?»— дәп сориди.
8 Улар җававән: «Бизгә чүшләр кирди, лекин тәбирчи йоқ»,— деди. Шунда Йүсүп уларға: «Чүшкә тәбир бериш Худадин әмәсму? Илтимас, өз чүшлириңларни маңа ейтип бериңлар»,— деди.
9 Шу чағда шарап қуйғучиларниң башчиси Йүсүпкә өз чүшини ейтип бәрди. У: «Мән чүшүмдә бир үзүм ғолини көрдим.
10 Униңда үч бәргә бар еди. У бих бәрди, униңда гүлләр пәйда болди вә үзүм саплири пишти.
11 Мениң қолумда болса пирәвнниң қәдиһи бар еди. Мән үзүмләрни елип, қәдәһкә сиқтим. Андин қәдәһни пирәвнниң қолиға бәрдим»,— деди.
12 Шунда Йүсүп униңға: «Мана чүшиңизниң тәбири: үч бәргә бу үч күн.
13 Үч күндин кейин пирәвн сизни азат қилип, өз орниңизға қайтуриду, сиз авал шарап қуйғучи болған вақтиңиздәк, яңливаштин пирәвнниң қолиға қәдәһни сунисиз.
14 Лекин сизниң ишлириңиз оңушлуқ болғанда, өтүнүмән, мени есиңизға елиңа һәм маңа сөйүмлүк меһриванлиқ көрситиңа: мән һәққидә пирәвнгә ейтип, мошу зиндандин чиқириңа.
15 Сәвәви мени ибранийларниң зиминидин оғрилап кәлди вә мән бу йәрдиму зиндан орисиға ташлиғидәк һечнәрсә қилмидим»,— деди.
16 Йүсүпниң чүшни яхши тәбир қилғинини көрүп, навайчиларниң башчиси униңға: «Мәнму чүш көрдүм: мениң бешимда ақ нан селинған үч севәт бар екән.
17 Үстүнки севәттә навайчи пирәвнгә пишәргән һәрхил назу-немәтләр бар еди вә қушлар бешимда турған севәттики нәрсиләрни йәватқидәк»,— деди.
18 Шунда Йүсүп җававән: «Мана чүшиңизниң тәбири: үч севәт — бу үч күн.
19 Үч күндин кейин пирәвн сизниң бешиңизни кесип, җәсидиңизни түврүккә есип қойиду һәм қушлар тениңизни чоқулайду»,— деди.
20 Үчинчи күни пирәвнниң туғулған күни еди вә у һәммә хизмәткарлири үчүн зияпәт қилип бәрди вә уларниң көзичә шарап қуйғучиларниң башчисини һәм навайчиларниң башчисини азат қилди.
21 Шарап қуйғучиларниң башчисини у өз мәнсивигә қайтурди, у яңливаштин пирәвнниң қолиға қәдәһни сунди.
22 Навайчиларниң башчисини болса, Йүсүп тәбир бәргәндәк, у есивәтти.
23 Бирақ шарап қуйғучиларниң башчиси Йүсүпни әскә алмиди, у уни унтуп қалди.
