Яритилиш 46:1—34
46 Исраил униң билән болғанларниң һәммиси йолға чиқип, Бәәршебаға кәлди, у шу йәрдә атиси Исһақниң Худасиға қурванлиқларни әкәлди.
2 Кечиси Худа Исраилға вәһийдә: «Яқуп, Яқуп!»— девиди, у җавап берип: «Мана мән!»— деди.
3 Худа сөзини давамлаштуруп: «Мән һәқиқий Худа, атаңниң Рәбби болумән. Мисирға бериштин қорқма, чүнки шу йәрдә Мән сениңдин бүйүк хәлиқ бәрпа қилимән.
4 Мән Өзәм сениң билән Мисирға берип, Өзәм сени шу йәрдин чоқум елип чиқимән вә Йүсүп өз қоли билән сениң көзлириңни жумиду»,— деди.
5 Буниндин кейин Яқуп Бәәршебадин йолға чиқти вә Исраилниң оғуллири атиси Яқупни, вә шундақла өзлириниң балилири билән аяллирини, пирәвн уни елип келиш үчүн әвәткән һарвуларға олтарғузуп маңди.
6 Улар өзи билән Қанан йеридә топлиған падилирини һәм мүлкини елип кәтти. Нәтиҗидә, Яқуп өз әвлади билән Мисирға кәлди.
7 У өзи билән Мисирға оғуллирини, қизлирини, нәврилирини — барлиқ әвладини әкәлди.
8 Мана Исраил оғуллириниң, йәни Яқупниң Мисирға кәлгән оғуллириниң исимлири: Яқупниң тунҗиси — Рувим.
9 Рувимниң оғуллири: Һануқ, Паллу, Есром вә Харми.
10 Шимонниң оғуллири: Йемуил, Ямин, Оһад, Яхин, Зоһар вә қананий аялдин болған Саул.
11 Лавийниң оғуллири: Гирсон, Каав вә Мерари.
12 Йәһуданиң оғуллири: Ир, Онан, Шелаһ, Парес вә Зараһ. Лекин Ир билән Онан Қананда өлүп кәткән еди.
Паресниң оғуллири: Есром вә Хамул.
13 Иссакарниң оғуллири: Пола, Пува, Йов вә Шимрон.
14 Зәбулунниң оғуллири: Сәрәд, Елон вә Яхлейил.
15 Булар Лия Яқупқа Паддан-Аррамда туғуп бәргән оғуллири, шундақла қизи Динани туғуп бәргән еди. Һәммиси болуп униң оғул-қизлириниң җәми 33 җан еди.
16 Гадниң оғуллири: Зипион, Хагий, Шуний, Йезбон, Йерий, Ароди вә Арели.
17 Ашерниң оғуллири: Имна, Ишва, Ишви вә Берия. Уларниң сиңлиси Сера еди.
Берияниң оғуллири: Хевер вә Малхиил.
18 Бу Лабан қизи Лияға бәргән чакари Зилпаниң оғуллири. У уларни Яқупқа туғуп бәргән, җәми 16 җан еди.
19 Яқупниң аяли Раһилниң оғуллири: Йүсүп вә Бениамин.
20 Йүсүпниң Мисир зиминида туғулған оғуллири Манассә вә Әпраим. Буларни униңға Он шәһириниң каһини Потиперниң қизи Асинепа туғуп бәрди.
21 Бениаминниң оғуллири: Бела, Бехер, Ашбел, Гера, Нааман, Еһи, Рош, Мупим, Хупим вә Ард.
22 Булар Раһилниң Яқупқа туғуп бәргән оғуллири болуп, җәми 14 җан еди.
23 Данниң оғуллири: Хушим.
24 Нафталиниң оғуллири: Яхзеил, Гуний, Йезер вә Шилем.
25 Бу Лабан қизи Раһилгә бәргән чакари Валланиң оғуллири. У уларни Яқупқа туғуп бәргән, җәми йәттә җан еди.
26 Яқуп билән Мисирға кәлгән барлиқ җанлар, Яқупниң оғуллириниң аяллирини санимиғанда, униңдин төрәлгән еди. Барлиғи болуп 66 җан еди.
27 Йүсүпниң Мисирда туғулған оғуллири икки җан еди. Барлиғи болуп Яқупниң Мисирға кәлгән өйидә 70 җан бар еди.
28 Яқуп Йүсүпкә өзи һәққидә хәвәрләшкә Йәһудани Гошәнгә өзиниң алдида әвәтти. Шуниң билән, улар Гошән йеригә кәлди.
29 Шу чағда Йүсүп шаһанә һарвуни тәйяр қилишни буйруп, атиси Исраилни қарши елишқа Гошәнгә раван болди. Атисини көрүп, у бойниға есилип, уни қучақлап узақ жиғлиди.
30 Исраил Йүсүпкә: «Әнди мән сениң үзүңни көрүп, тирик екәнлигиңни билдим. Әнди өлсәмму разимән»,— деди.
31 Шунда Йүсүп акилири билән атисиниң өйдикилиригә: «Мән берип силәр тоғрилиқ пирәвнгә хәвәр қилай: “Қанандики мениң қериндашлирим һәм атамниң өйдикилири йетип кәлди.
32 Бу кишиләр падичилар болуп, чарвичилиқ билән шуғуллиниду вә өзлири билән ушшақ, қара мелини, шундақла бар нәрсисиниң һәммисини елип кәпту”.
33 Пирәвн силәрни чақиртип: “Немә билән шуғуллинисиләр?”— дәп сориса,—
34 силәр: “Силиниң чакарлири яш чеғидин башлап чарвичилиқ билән шуғуллиниду, биз әҗдатлиримиздәк мал баққучилар”, дәп җавап бериңлар. У силәрни Гошән йеригә орунлаштуруши үчүн буни дәңлар, чүнки қой баққучиларниң һәммиси Мисир үчүн жиркиничликтур»,— деди.
