Қанун шәрһи 10:1—22
10 Мәзкүр вақитта Йәһва маңа: “Өзәңгә икки йеңи, авалқиларға охшайдиған, таш тахтайчилирини ясиғин вә Мениң қешимға таққа чиқип, яғач сандуқни ясиғин.
2 Мән тахтайчиларға авалқиларда болған сөзләрни язимән. Сән уларни сандуққа салғин,”— деди.
3 Мән акация дәриғидин сандуқни ясидим вә авалқилардәк икки таш тахтайчисини тәйярлап, таққа чиқтим. Бу икки тахтайчә қоллиримда еди.
4 Худа авалқи 10 сөзни тахтайчиларға язди. Булар силәр Йәһва Өзидин жиғин күнидә өрт арисидин тағда аңлиған сөзләр еди вә Йәһва уларни маңа бәрди.
5 Мән қайтип, тағдин чүштүм вә тахтайчиларни, Йәһва маңа буйриғандәк, сандуқ ичигә салдим.
6 Исраил оғуллири Берот-Бене-Яқандин Мозерға қарап йолға чиқти. Шу җайда Һарун өлүп дәпин қилинди вә роһанийлиқни униң оғли Елиазар өзигә қобул қилди.
7 У йәрдин Гудготқа, Гудготтин Йотаватқа, әлвәк су билән тәминләнгән йәргә маңдуқ.
8 Шу вақитта Йәһва Ләвий қәбилисини Йәһваниң келишим сандуғини көтириш үчүн вә Униң алдида хизмәттә туруш үчүн һәм Йәһваниң исми билән бәрикәтләп дуа қилиши үчүн таллавалди. Бу иш бүгүнгичә давамлишип кәлмәктә.
9 Шуңлашқа Ләвийгә бүгүнму бурадәрлири ичидә несип йоқтур. Чүнки Йәһва, Униң Худайи ейтқандәк, Өзи Йәһва униң несивидур.
10 Шундақ қилип, мән авалқидәк тағда 40 күн һәм 40 түн болдум. Мени Йәһва Худа бу қетимму тиңшиди вә сени Йәһва һалакәткә учратмиди.
11 Шунда Йәһва маңа: “Тур, бу хәлиқниң алдида маңғин. Улар берип, Мән атилириға беримән, дәп қәсәм қилған йәрни мирасқа алсун,”— деди.
12 Демәк, Исраил, сениңдин Йәһва Худайиң немини тәләп қилмақта? Пәқәт сениң Йәһва Яратқучиңдин әтийәт қилишиңни, Униң барлиқ йоллири билән меңишиңни, Уни сөйүшиңни вә Худайиң Йәһваға пүткүл жүригиң һәм пүткүл җан-дилиң билән хизмәт қилишиңни тәләп қилиду.
13 Шундақла сән Йәһваниң вәсийәтлири билән бүгүн мән саңа ейтиватқан тохтамлирини орунлишиңни У күтиду. Шу вақиттила саңа яхши болиду.
14 Мана, сениң Яратқучиң Йәһваниң асман вә асманлар асмини бардур, йәр вә униңдики барлиқ нәрсә Униңкидур.
15 Лекин пәқәт сениң атилириңнила Йәһва қобул қилди вә силәрни улардин қалған уруқтәк барлиқ хәлиқләр арисидин, сән өзәң көрүватқандәк, таллиди.
16 Демәкчи, жүригиңларниң четини кесиветиңлар һәм әнди қаттиқгәдән болмаңлар.
17 Сәвәви, сениң Пәрвәрдигариң Йәһва худаларниң Худаси, егиләрниң Егиси, Улуқ Худа, қудрәтлик һәм һәйвәтлик, У үз хәтир қилмайду вә париларни алмайду.
18 Йәһва мусапирни, житимни һәм тул аялни тоғра сотлайду вә мусапирға нан билән кийим берип, яхши көриду.
19 Силәрму мусапирни яхши көрүңлар, чүнки өзәңларму Мисир йеридә мусапир болғандиңлар.
20 Худайиң Йәһвадин қорққин вә Униңғила хизмәт қилғин, Униңға чаплашқин вә Униң исми билән қәсәм қилғин.
21 У сениң Пәхриңдур вә У сениң көзүң көргән бүйүк вә һәйвәтлик ишларни қилған Худайиңдур.
22 Сениң атилириң Мисир елигә 75 җан болуп кәлгән еди, һазир болса, Йәһва Худайиң сени әрштики юлтузлардәк көпсанлиқ қилди.
