Қанун шәрһи 14:1—29
14 Силәр, Йәһва Худайиңларниң оғуллири,өлгәнләргә жиғлиғанда тениңларни кәсмәңлар вә қашлириңларни қирип алмаңлар.
2 Сәвәви, сән Тәңриң Йәһваниң муқәддәс хәлқи вә сени Йәһва йәрдики барлиқ хәлиқләрниң арисидин Униң шәхсий хәлқи болушиң үчүн таллавалған еди.
3 Напак нәрсидин һечнемә йемигин.
4 Мана, силәргә йейишкә болудиған нәрсиләр:буқа, қой,өшкә,
5 буға, кейик, сайғақ, явайи текә, бөкән, архар вә явайи қочқар.
6 Һәрқандақ ача туяқлиқ җаниварни вә униң туяқлирида чоңқур бөлүнүш бар вә көшәйдиған һайванни истимал қилишқа болиду.
7 Көшәйдиған һәм чоңқур ача туяқлири бар җаниварлардин пәқәт монуларни йемәңлар: төгини, тошқанни, тағлиқ даманни. Һәтта улар көшисиму, уларниң туяқлири бөлүнмигән, силәр үчүн улар напактур.
8 Шундақла чошқиму һарам, чүнки униң туяқлири бөлүнгән болсиму, у көшимәйду.Силәр үчүн булар һарам, уларниң гөшиниму йемәңлар вә җәсәтлиригиму тәгмәңлар.
9 Суда үзидиған җаниварлардин монуларни йәңлар:уларда қанатлири вә қасриғи болуши лазим.
10 Амма қанити вә қасриғи йоқ җаниварни йегүчи болмаңлар, силәр үчүн улар һарамдур.
11 Һәрқандақ пак қушни йәңлар.
12 Бирақ уларниң арисидин монуларни истимал қилишқа болмайду:бүркүт, тазқарға, белиқчи бүркүт,
13 са, лачин вә шунқар униң һәрхил түрлири билән,
14 қарға униң түрлири билән,
15 төгиқуш, үкә, шуғила вә лачинниң һәрқандақ түрини,
16 мөшүкяпилақ, қулақлиқ үкә, аққуш,
17 бирқазан, қумай, қашқалдақ,
18 ләйләк, қотан һәрхил түрлири билән, һөпүп вә шәпирәң.
19 Шуниңдәк барлиқ қанатлиқ төртпутлуқ һашарәтләр силәр үчүн напак, уларни истимал қилиш мәнъий қилиниду.
20 Һәрқандақ таза қушни йәңлар.
21 Җаниварларниң һечбир өлүк җәсидини йемәңлар: сениң шәһириңдә яшаватқан мусапирға уни беривәт яки чәтәлликкә уни сетивәт. Сән Йәһва Худайиңниң муқәддәс, Униң үчүн бөлүнгән хәлқи болғанлиқтин, ундақ гөшни йемә.
Шундақла оғлақни анисиниң сүтидә пишәрмә.
22 Һәр жили етизиңдин келидиған мәһсулатниң онлуғини бөлүп әкәлгин.
23 Мошу нәрсиләрни, Рәббиң Йәһва Өз исми шу йәрдә болуши үчүн таллиған җайда, Униң алдида йегин. Шу җайға нениң, шаравиң, зәйтун мейиң онлуқлирини вә қара һәм ушшақ мелиңниң тунҗилирини әкәлгин, чүнки сән буларни қилғач, Пәрвәрдигариң Йәһвадин пүтүн өмрүңдә әтийәт қилишқа үгинишиң лазим.
24 Әгәр сениң үчүн бу йол узақ көрүнүп, әкәлдиғанлириң еғир болса, чүнки Худайиң Йәһва Өз исмини орунлаштурған йәр жирақ болса, унда Худайиң Йәһва сени бәрикәтлиши үчүн,
25 бу онинчи қисимларни күмүчкә сетип, шу пулни қолуңда тутуп, Худайиң Йәһва таллиған җайға кәлгин.
26 Шу пулуңға җениң халиған барлиқ нәрсини: буқиларни, қойларни , шарапни вә күчлүк ичимликләрни елип, Рәббиң Йәһва алдида хошаллиқта өзәң вә өйдикилириң йәп-ичсун.
27 Маканлириңда яшаватқан ләвийниму унтумиғин, чүнки униң сениң билән несиви һәм қисми йоқ.
28 Үч жил өткәндин кейин жиғилған һосулни шәһириңдә топлиғин.
29 Шу чағда ләвий, униң силәр билән биллә несиви болмиған сәвәптин, шәһәрлириңларда яшаватқан мусапир, житим вә тул аял келип, жиққан-тәргиниңдин тойғичә йесун. Шундақ иш қилсаң, Яратқучиң Йәһва сени барлиқ ишлириңда бәрикәтләйду.
