Қанун шәрһи 19:1—21
19 Худайиң Йәһва саңа қиривәткән хәлиқләрниң йерини бәргәндә вә Худайиң Йәһва тәғдим қилған зиминни сән улардин кейин мирасқа елип, шәһәрлиридә һәм өйлиридә маканлашқанда,
2 шу чағда сән өзәңгә үч шәһәрни Худайиң Йәһва варислиққа бәргән йәрдә бөлүвал.
3 Йәһва Тәңриң несивиңгә бериватқан йәрни үч қисимға бөлүп, уларда йол тәйярлиғин. Шу җайларға һәрқандақ қатил қачиду.
4 Мана, қандақ қатил у йәргә қечип, тирик қалиду: ким өзиниң йенидики кишини қара нийәтсиз, униңға түнүгүнму һәм бүгүнму душмән болмай, өлтүрүп қойса.
5 Мәсилән, әгәр бирси йенидики киши билән җангалға отун чепишқа берип, палтини көтирип дәрәқкә урғанда, палтиниң беши чиқип кетип, йенидикигә тегип, у өлүп кәтсә, у киши мошу шәһәрләрниң биригә қечип кәтсун. У тирик қалиду.
6 Қан үчүн өч алғучи жүригиниң қизиқлиғида қатилниң кәйнидин қоғлап йетип, йолниң жирақлиғидин уни өлтүривәтмисун. Чүнки бу киши өлүмгә мәһкүм қилинмаслиғи лазим, сәвәви у өлүп кәткән кишигә дүшмән болмиған еди.
7 Шуңлашқа саңа мошу пәрманни беримән: өзәңгә үч шәһәр бөлгин.
8 Йәһва Худайиң атилириңға вәдә қилғандәк, сениң чәклириңни кәңәйтип, әҗдатлириңға қәсәм қилған пүткүл йәрни тапшурғанда,
9 әгәр сән барлиқ мошу вәсийәтләрни орунлашқа тиришсаң, бүгүн мән саңа ейтиватқан мошу сөзләргә әмәл қилған болисән. Рәббиңниң барлиқ йоллири билән меңип, Йәһвани пүткүл өмрүңдә яхши көрсәң, шу чағда йәнә үч шәһәрни қош.
10 Шу түпәйлидин саңа Пәрвәрдигариң Йәһва бәргән йериңдә әйипсизниң қени төкүлмәйду вә сениңда қан төкүш әйиви болмайду.
11 Амма, әгәр бирси йенидики кишигә душмән болуп, униңға қарши чиқип, һарам нийәт билән өлтүрсә вә панаһ шәһәрләрниң бирсигә қечип кәтсә,
12 у вақитта шәһириниң ақсақаллири уни панаһ шәһиридин әкәлгүзүп, қан үчүн өч алғучиниң қолиға тапшурсун. У өлтүрүлүши керәк.
13 Қатилни көзүң айимисун, шундақ қилип, Исраилдин бегуна адәмниң қенини жуювәт. Шу чағда саңа яхши болиду.
14 Худайиң Йәһва саңа мирасқа бәргән йәрдә атилириң өз мүлкидә қойған чегариларни йөткимә вә хошнаңниң чәк бәлгүлирини бузма.
15 Қандақту-бир қилмиш билән әйипни яки гунани қилған адәмгә қарши бир гувачиниң гуваси азлиқ қилиду. Пәқәт икки яки үч гувачиниң гувалиғида һәрқандақ ишни йәшкили болиду.
16 Әгәр зулум нийәтлик гувачи бирсигә адилсиз қарши чиқса,
17 даваси бар икки адәм Йәһваниң алдида турсун, йәни шу күнләрдә сотлаватқан роһанийлар вә сотчилар алдиға барсун.
18 Сотчилар ишни яхши тәтқиқ қилиши лазим. Әгәр гувачи ялғанчи болуп чиқса вә бурадиригә яла япқан болса,
19 ялғанчиға у бурадәригә қарши ойлиған ишни қилиңлар. Шундақ қилип, араңдики зулумни йоқатқин.
20 Башқилири болса, буни аңлап қорқиду вә келәчәктә бундақ зулумни араңда қилмайду.
21 Сениң көзүң уни айимисун: җанға җан, көзгә көз, чишқа чиш, қолға қол, путқа пут болсун.
