Қанун шәрһи 9:1—29
9 Қени, Исраил, тиңшиғин, сән әнди Йордандин өтүп, сениңдин күчлүгирәк һәм көпсанлиқ хәлиқләрни мирасқа елишқа маңдиң. Уларниң асманғичә көтирилгән сепиллири билән йоған шәһәрлири бар.
2 Бу хәлиқ бүйүк һәм егизбойлуқ, улар сән аңлиған Енакниң оғуллиридур. Ким уларға қарши туралайду?
3 Шуни ениқ билгинки, Йәһва Худайиң сениң алдиңда ялмап жутидиған оттур. У уларни қирип, У уларни сениң алдиңда пәсләштүрүп беқиндуриду. Сән уларни қоғлап чиқип, Йәһва ейтқинидәк, чапсан қириветисән.
4 Йәһва Пәрвәрдигариң уларни йүзүңдин қоғлиғанда, жүригиңдә мениң һәққанийлиғим үчүн Йәһва мошу мунбәт йәрни варислиққа елишқа мени елип кәлди, дәп ойлап қалмиғин. Сәвәви бу хәлиқләрниң рәзиллиги үчүн Йәһва уларни йоқитиватиду.
5 Яқ, сениң һәққанийлиғиң вә жүригиңниң һәқлиғи үчүн сән бу йәрни мирасқа еливатқиниң йоқ, бәлки ушбу хәлиқләрниң рәзиллиги вә қанунсизлиғи үчүн Йәһва Худа уларни йүзүңдин қоғлап һәм Йәһва атилириң Ибраһим, Исһақ вә Яқупқа қәсәм билән бәргән сөзини орунлаш үчүн, сән бу йәргә кириватисән.
6 Шуңа әнди билгинки, сениң адиллиғиң үчүн Худайиң Йәһва саңа бу йәрни мирасқа бериватқини йоқ, чүнки сән қаттиқгәдәнлик хәлиқтур.
7 Әстә сақлиғин, унтума, қанчә қетим сән чөлдә Тәңриң Йәһвани териктүргән? Мисир йеридин чиққандин башлап мошу йәргә кәлгичә, силәр Йәһваға қарши болуп кәлдиңлар.
8 Хориб теғидиму силәр Йәһвани териктүрдиңлар вә Йәһваниң силәргә ғәзиви қайнап қириветишни халиған еди.
9 Мән таққа чиқип, таш тахтайчилирини, Йәһва силәр билән түзгән келишимниң тахтайчилирини, елип чүшүшкә тағда 40 күн һәм 40 түн болуп, нан йемәй һәм су ичмәй,
10 Йәһва маңа Худа бармиғи билән йезилған таш тахтайчилирини бәргән еди. Уларда Йәһва Өзи силәргә жиғилиш күни от арисидин тағда ейтқан барлиқ сөзлири пүтүлгән еди.
11 40 күн һәм 40 түн түгигәндә, Йәһва маңа келишимниң икки таш тахтайчисини бәрди.
12 Шу чағда маңа Йәһва: “Тур, чапсанирақ бу йәрдин чүш, чүнки сениң Мисирдин ачиққан хәлқиң бузулуп кәтти. Қандақ чапсан улар Мән бәргән вәсийәт йолидин чиқип кетип, өзлиригә қуйма бутни ясиди!”— деди.
13 Маңа йәнә Йәһва: “Мән саңа нәччә қетим әскәрткәндәк, бу хәлиқ қаттиқгәдән хәлиқ екән.
14 Мени тосимиғин, Мән уларни асман астидин қирип ташлап, һәтта наминиму қалғузмай, сениңдин күчлигирәк һәм улардинму көпирәк хәлиқни төрәймән”,― деди.
15 Мән қайтип, тағдин чүштим. Тағ болса отта көйүп туратти, икки қолумда келишимниң икки тахтайчиси бар еди.
16 Силәрниң Йәһва Рәббиңларға қарши гуна қилғанлиғиңларни көрүп, өзәңларға қуйма мозайни ясап, Йәһва силәргә вәсийәт қилған йолдин чапсанла чиқип кәткәнлигиңларни көрүп,
17 мән қоллиримдики икки таш тахтайчини елип, көз алдиңларда йәргә ташлап чеқивәттим.
18 Йәһва алдида иккинчи рәт жиқилип, мән авалқидәк 40 күн һәм 40 түн нан йемәй һәм су ичмәй, силәрниң һәммә гуналириңлар үчүн ялвурдум. Чүнки силәр Йәһваниң көзидә зулум ясап һәм Уни териктүрүп, гуна өткүздиңлар.
19 Мән Йәһваниң силәргә болған ғәзәп-нәпритидин интайин қорққандим, чүнки У силәрни уҗуқтурғуси кәлди. Амма Йәһва мени бу қетимму тиңшиди.
20 Һарунғиму Йәһва қаттиқ ғәзәпләнди һәм униму һалак қилғуси кәлди. Амма мән шу чағда Һарун үчүнму илтиҗа қилдим.
21 Силәрниң гунайиңлар – мозайни мән елип, отта көйдүрүвәттим. Уни чеқип, топа шәклигичә угутуп, тағдин еқиватқан суға ташлап, еқитивәттим.
22 Андин ташқири силәр Йәһва Худани Таберада, Массада вә Қиброт-Таавада териктүрдиңлар.
23 Шундақла Йәһва силәрни Кадеш-Барнидин әвәтип: “Бериңлар, Мән силәргә мирасқа беридиған йәрни елиңлар,”— дегәндә, силәр Худайиңлар Йәһваниң әмригә қарши чиқип, Униңға ишәнмәй, авазини тиңшимидиңлар.
24 Мән силәрни билгән күндин башлап, силәр Йәһваға беқинмидиңлар.
25 Мән Йәһваниң алдида дүм йетип, 40 күн һәм 40 түн давамида Униңға ялвурдим, чүнки Йәһва силәрни қиривәтмәкчи болған еди.
26 Шу чағда мән мундақ дәп, Йәһваға ялвурдим: “Йәһва Рәб Егәм, худаларниң Падишаси, Өз хәлқиңни вә мирасиңни һалак қилмиғина. Сән уни күч-қудритиңниң бүйүклиги билән Мисирдин қаттиқ ирадәң вә көтирилгән қолуң арқилиқ қутулдурғандиң.
27 Есиңға Сән Өзәң билән қәсәм ичип, вәдә бәргән қуллириң Ибраһим, Исһақ һәм Яқупни кәлтургинә. Бу хәлиқниң берәһимлигигә вә униң рәзиллиги билән гуналириға диққитиңни бөлмигинә,
28 чүнки Сән бизни ачиққан йәрдикиләр: “Йәһва уларни вәдә қилған йәргә әкирәлмәйдиғанлиғи үчүн вә уларни өч көргәнлиги үчүн, чөл-баяванда өлтүрүветишкә чиқарған екән,”— демәслиги үчүндур.
29 Улар болса, Мисир йеридин Сениң бүйүк күчүң билән ачиққан Сениң хәлқиңғу һәм мирасиңғу”.
