Һакимлар 8:1—35
8 Әпрайимлиқлар Гидионға мундақ деди: «Немишкә сән буни қилдиң? Немишкә сән мадиамлиқлар билән урушушқа маңғанда бизни чақирмидиң?» Шуниң билән улар униң билән қаттиқ җедәлләшти.
2 У уларға җававән: «Мән силәр қиливатқан ишларни қилдимму? Үзүмни жиққан Абиезердин һосулниң қалғинини тәргән Әпрайим бәхитлигирәк әмәсму?
3 Силәрниң қолуңларға Худа мадиамлиқ бәгләр Орив билән Зивни бәрди, мән болсам ундақ ишни қилалмидимғу?»— деди. Шу чағда у мәзкүр сөзләрни ейтқанда, уларниң роһи тиничланди.
4 Гидион Йорданға кәлди һәм уни өзи вә униң билән болған 300 адәм өтти. Улар дүшмәнни қоғлиғанлиқтин һерип кәткән еди.
5 Гидион Сокхов турғунлириға: «Мениң кәйнимдин жүрүватқан хәлиқкә нан бериңлар, улар һерип кәтти. Мән болсам мадиамлиқ падишалар Зевей билән Салманни қоғлаватимән»,— деди.
6 Сокховниң бәглири: «Зевей билән Салманниң қоли сениң қолуңдиму, немишкә биз әскириңгә нан беришимиз керәк?»— дәп җавап бәрди.
7 Гидион уларға: «Шуңлашқа Йәһва Зевей билән Салманни қолумға тапшурғанда, мән силәрниң тениңларни чөлниң тикәнлик чатқаллири билән саваймән»,— дәп вәдә қилди.
8 У яқтин Гидион Пенуелға келип, униң турғунлириғиму шу сөзләрни қилди, чүнки уларму Сокховниң турғунлиридәк муамилә қилғанди.
9 У Пенуелниң турғунлириға: «Мән течлиқта қайтқинимда мошу мунарни вәйрән қилимән»,— деди.
10 Зевей билән Салман болса өз әскәрлири билән, уларниң сани 15 000 кишигә йетәтти, булар шәриқ оғуллиридин тәркип тапқан барлиқ әскириниң қалдуғи еди. Қилич тутқан 120 000 әскәр һалак болғанди.
11 Гидион Нова вә Йогбегидин шәриқ тәрәптә яшиған чедирлардикиләргә барди вә уларниң қараргаһи беғәм турғанда, уларни қиривәтти.
12 Зевей билән Салман қачти, лекин у уларни қоғлап, иккила мадиамлиқ падишаларни Зевей билән Салманни тутувалди. Пүткүл уларниң қараргаһини паракәндиликкә салди.
13 Андин кейин Йоасниң оғли Гидион уруштин, Херес дөңидин қайтип кәлди.
14 Сокховниң турғунлиридин бир яш жигитни тутқунға елип, униңдин барлиқ Сокхов бәглириниң вә ақсақаллириниң тизимини алди. Барлиғи болуп 77 адәм тизимланди.
15 Андин у Сокховниң турғунлири алдиға келип, уларға: «Мана, силәр мени туталмайсән һәм һерип кәткән кишилириңгә биз нан бәрмәймиз, дегән Зевей билән Салман мениң қолумда»,— деди.
16 Шуниң билән у шәһәрниң ақсақаллириниң барлиғини елип, уларни тикәнлик чатқаллар билән җазалиди.
17 Шундақла у Пенуел мунарисини кукум-талқан қилип, шәһәрниң турғунлирини қиривәтти.
18 Шунда Зевей билән Салмандин: «Силәр Таборда қиривәткәнләр қандақ еди?»— дәп сориди. Улар җававән: «Улар саңа охшатти. Һәрқайсиниң чирайи падиша оғуллиридәк еди»,— дейишти.
19 Гидион уларға: «Булар мениң қериндашлирим, анамниң оғуллири еди. Йәһва тириктур! Әгәр силәр уларни тирик қалдурған болсаңлар, мән силәрни өлтүрмәттим»,— деди.
20 Шуниң билән у тунҗиси Йетерға: «Тур, уларни өлтүргин!»— дәп буйриди. Амма жигит қиличини чиқармиди, чүнки яшлиғи сәвәвидин қорқанчақ еди.
21 Шу вақитта Зевей билән Салман: «Өзәң тур һәм бизни өлтүргин, чүнки өзәңгә яриша күчүң бар»,— дейишти. Гидион туруп өзи Зевей билән Салманни өлтүрди вә уларниң төгилириниң бойнидики тақинчақларни еливалди.
22 Исраиллиқлар Гидионға: «Сән бизниң егимиз бол, сән өзәң, оғлуң вә оғлуңниң оғли, чүнки сән бизни мадиамлиқларниң қолидин бошаттиң»,— деди.
23 Гидион уларға җававән: «Мәнму йә мениң оғлумму силәргә егә болмаймиз. Йәһва силәрниң Егәңлар болсун!
24 Пәқәт бирнәрсинила өтүнимән, һәрқайсиңлар олҗаңлардин маңа бирдин бурун һалқисини бериңлар»,— деди. (Сәвәви дүшмәнләрниң бурунлирида алтун һалқилар болған еди, чүнки улар исмаиллиқлар еди).
25 Улар беримиз, деди. Андин бир кийимни йәргә йейип, һәрқайси өз олҗисидин бирдин алтун һалқа ташлиди.
26 Гидион соравалған алтун һалқиларниң салмиғи 1 700 алтун шекәл еди. Униңдин ташқири олҗисида зебу-зенәтләрдин башқа Мадиам падишалириниң сөсүн рәңлик кийимлири вә төгилириниң бойнидики алтун тақинчақ-зәнҗирлири бар еди.
27 Бу нәрсиләрдин Гидион ефод ясиди вә уни өз шәһири Опрада қойди. Шуниң билән барлиқ исраиллиқлар униңға сиғинидиған болди, шундақларчә бу ефод Гидионғиму һәм барлиқ униң өйигиму тузақ болди.
28 Шундақ қилип, мадиамлиқлар Исраил оғуллири алдида баш әгди вә башқа бешини көтәрмиди. Гидионниң барлиқ күнлиридә, 40 жил давамида, йәр дәм алди.
29 Йәрубаал, Йоасниң оғли, өз өйидә яшиди.
30 Гидиондин 70 оғул чиқти, чүнки униң көплигән аяллири бар еди.
31 Шундақла униң Сихәмдә яшиған кенизиги униңға оғул туғуп бәрди. Гидион униңға Абимәләк дегән исим қойди.
32 Йоасниң оғли Гидион узақ өмүр сүрүп, вапат болди. У Опрада, Абиезерниң әвлади Йоасниң өңкүридә дәпин қилинди.
33 Гидион вапат болғандин кейин Исраил оғуллири йәнә Баалларниң кәйнидә жүрүп, өзлиригә худа қилип Баал-Беритни қойди.
34 Шундақ қилип, Исраил оғуллири өзлириниң Худаси Йәһвани унтуп қалди. Униң уларни әтрапидики дүшмәнлириниң қолидин қутқузғанлиғини әстә сақлимиди.
35 Шуниңдәкла улар Йәрубаалниң яки Гидионниң өйигә рәһим көрсәтмиди. Униң Исраилға қилған барлиқ яхшилиқлирини унтиди.
