Әзра 5:1—17
5 Һагай пәйғәмбәр вә Иддониң оғли Зәкәрия пәйғәмбәр Исраил Тәңриниң бәшарәтлик сөзлирини Йәһудиядики Йерусалимда болған йәһудийларға йәткүзди.
2 Шуниң билән Шалтийәлниң оғли Зәрубабил вә Йосадокниң оғли Йәшуа туруп, Йерусалимдики Худаниң өйини һәм уларни қоллап-қувәтлигән пәйғәмбәрләр қурулушни башлиди.
3 Шу вақитта уларға дәрияниң бу қетидики өлкиләрниң башчилири Татнай вә Шефар-Бознай һәм уларниң сәпдашлири келип: «Ким силәргә ушбу өйни селишқа вә ушбу сепилни ясашқа рухсәт қилди?»— дәп сориди.
4 Улар қурулушқа қатнишиватқан инсанларниң исимлирини ейтишни тәләп қилди.
5 Лекин Худаниң көзи Йәһуда ақсақаллири үстидин болуп, улар шаһ Дариостин пәрман кәлгичә, ишини тохтатмиди.
6 Шу чағда дүшмәнләр бу тоғрисида хәт йезишти. Мана, ушбу өлкиләрниң һакими Татнай, Шефар-Бознай сәпдашлири билән язған хетиниң көчәрмиси.
7 Улар Дариос шаһқа әвәткән шикайитидә мундақ язди:
«Дариос шаһқа җимики бәрикәтләрни тиләймиз!
8 Шаһқа шу нәрсә мәлум болсунки, биз Йәһудия өлкисигә бүйүк Худаниң һәрәмигә бардуқ. У йонулған ташлардин қурулмақта вә яғачлардин тамлар турғузулмақта. Ушбу иш чаққан жүргүзүлүп, уларниң қолида утуқ қазанмақта.
9 Шу вақитта биз уларниң ақсақаллириға соал қоюп: “Ким силәргә мәзкүр өйни ясашқа вә мәзкүр тамларни турғузушқа рухсәт бәрди?”— дәп соридуқ.
10 Андин ташқири, биз уларни башқуруватқан адәмләрниң исим-намлирини силигә йезишқа соридуқ.
11 Амма буниңға улар мундақ җавап бәрди: “Биз асман һәм йәр Худайиниң қуллири вә буниңдин нурғунлиған жиллар авал селинған өйни қуруп-тикләватимиз. Уни ясап пүтәргән Исраилниң улуқ падишаси еди.
12 Андин бизниң атилиримиз әршниң Яратқучини рәнҗиткәндә, У уларни Бабилниң шаһи, халдиялиқ Нәбуқәднәсәрниң қолиға тапшурди. Бу өйни у вәйран қилип, хәлиқни Бабилға йәр авдурди.
13 Лекин Бабил шаһи Корәшниң биринчи жили у ушбу Худаниң өйини селишқа рухсәт бәрди.
14 Йерусалим һәрәмидин Нәбуқәднәсәр әкетип, Бабилниң һәрәмигә әкиргән Худа маканиниң алтун һәм күмүч қачилирини шаһ Корәш Бабил бутханисидин елип, өзи өлкиниң башчиси қилип тайинлиған Шешбазарға өткүзди.
15 У униңға: “Мошу қачиларни елип, уларни Йерусалимдики һәрәмгә апарғин вә Худаниң өйи өз орнида яңливаштин қурулсун!”— дегән еди.
16 Шу вақитта һелиқи Шешбазар келип, Йерусалимда Худа ибадәтханисиниң һулини қойди. Шу вақиттин башлап, у селиниватмақта вә техичила аяқлашмиди.
17 Демәк, әгәр шаһқа лайиқ болса, Бабилдики шаһниң ғәзниханисида издәп көрсила, һәқиқәтәнму шаһ Корәш тәрипидин Йерусалимда Худаниң өйини турғузуш рухсити берилгәнму. Әгәр шундақ шаһлиқ қарар тепилип қалса, униң көчәрмисини бизгә әвәтишни өтүнимиз».
