Әзәкиял 39:1—29
39 Инсан оғли Гогқа қарши бәшарәт ейт: “Әң Алий Һөкүмран Йәһва мундақ дәйду: “Мән, Гог, саңа қарши чиқимән — Мешех һәм Тубалниң асаслиқ беги.
2 Мән сени йолуңдин қайрип, башқа тәрәпкә меңишқа мәҗбурлаймән. Сени шимал четидин чиқирип, Исраил тағлириға әкелимән.
3 Сол қолуңдики садақни қеқип, оң қолуңдики оқлириңни жулувалимән.
4 Сән Исраил тағлирида жиқилисән, сән өзәң, әскәрлириң һәм хәлиқлириң. Мән сени жиртқуч қушлар билән явайи һайванларға йәмгә бериветимән”.
5 “Сән путлишип, очуқ далада жиқилисән, чүнки Мән буни ейттим”,— дәйду Әң Алий Һөкүмран Йәһва.
6 “Мән өртни Магогқа вә аралларда бехәтәр яшаватқан турғунларға әвәткәндә, инсанлар Мениң Йәһва екәнлигимни тонуйду.
7 Мән Өзәмниң хасийәтлик исмимни хәлқим Исраилниң ичидә мәшһур қилимән вә башқа Мениң Муқәддәс исмимни булғашқа йол қоймаймән. Шундақ қилип, пүткүл хәлиқләр Мән Йәһва — Исраилда Муқәддәс Худа екәнлигимни билиду!”
8 “Мана, алдин ейтилған нәрсә орунланди,— дәйду Әң Алий Һөкүмран Йәһва.— Бу Мән әскәрткән дәл шу күн!
9 Шу чағда Исраил шәһәрлиридә яшиғанлар чиқип, от қалаш үчүн қурални жиғиду, чоң вә кичик қалқанларни, оқ-яларни, тоқмақлар билән нәйзиләрни. Улар йәттә жил бойи мәзкүр қуралларни от қалаш үчүн пайдилиниду.
10 Уларға даладики отунларни жиғишқа яки орманлардики дәрәқләрни чепишқа һаҗәт болмайду, сәвәви, улар ушбу қурал-ярақларни көйдүриду”.
“Улар өз булаңчилириниң мал-дуниясини тартивелип, уларни намрат қилғанлардин олҗа алиду”,— дәйду Әң Алий Һөкүмран Йәһва.
11 “Шу күни мән Гогқа Исраил йеридә дәпин қилиш җайини беримән. У орун деңиздин шәриқ тәрәптики вадида болиду, униң арқилиқ сәяһәтчиләр өтәтти, бирақ әнди өткәл болмайду. Шу йәрдә Гогни һәм униң пүткүл ләшкәрлирини дәпин қилип, уни Хамон-Гог, яки Гогниң қошунлириниң вадиси, дәп атайду.
12 Исраиллиқлар уларни йәттә ай давамида йәрләйду, шундақ қилип, бу зиминни тазилайду.
13 Шу йәрниң барлиқ кишилири уларни йәрләйду вә бу иш уларға Мән Өзәмни улуқлиған шу күни шөһрәт әкелиду”,— дәйду Әң Алий Һөкүмран Йәһва.
14 “Униңдин ташқири, йәр-зиминни айлинип чиқидиған кишиләр бәлгүлиниду. Улар йәрни пақлаш үчүн топида ятқан җәсәтләрни дәпин қилиду. Улар мәйитләрни издәш ишлирини йәттә ай жүргүзиду.
15 Шундақ кишиләр йәрни чарлиғанда қандақту-бир инсан сүйигини көрүп қалса, униң қешида бир бәлгү қойиду. Андин дәпин қилғучилар уни Хамон-Гог вадисида көмүду.
16 Шу җайда Хамона нами билән шәһәр болиду. Шундақ қилип, йәр-зимин тазилиниду”.
17 Саңа болса, инсан оғли, Әң Алий Һөкүмран Йәһва мундақ дәйду: “Барчә қушларға һәм явайи һайванларға мундақ дә: “Келиңлар, жиғилиңлар. Мениң қурбанлиғим, бүйүк қурбанлиғим, өп-чөрисидә һәммә тәрәптин топлишиңлар. Чүнки Мән силәр үчүн Исраил тағлирида интайин йоған зияпәт тәйярлаватимән. Силәр гөш йәп, қан ичисиләр.
18 Бу болса Башанниң бодалған җаниварлириниң: қойларниң, қозиларниң, текиләрниң, өшкиләрниң вә буқиларниң етини йәп, қенини ичисиләр — улар ушбу йәрниң қудрәтликлири һәм башчилири-даһилири.
19 Силәр тойғичә яғ йәп, мәс болғичә Мениң қурбанлиғимниң қениға тойисиләр”.
20 “Силәр Мениң дәстиһиним әтрапида олтирип, атлар һәм чавандазлар, күчлүк әрләр вә һәрқандақ һәрбийләргә тойисиләр”,— дәйду Әң Алий Һөкүмран Йәһва.
21 “Мән Өз шан-шөһритимни хәлиқләр арисида намайиш қилғанда, пүткүл хәлиқләр Мениң сотимни байқайду. Улар Мән қолумни уларға қойғинимни сезиду.
22 Шу күндин башлап, Исраил өйи Мән Йәһва — уларниң Яратқучиси екәнлигимни күндин-күнгә техиму яхши билиду.
23 Хәлиқләрму шуни билидуки, Исраил өйи өз әйиви үчүн тутқунға елинди вә Маңа садиқ болмиғанлиғи үчүн шу иш йүз бәрди. Шуңлашқа Мән улардин йүзүмни йошуруп, уларни дүшмәнлириниң қоллириға бериветип, улар қиличтин һалак тапти.
24 Уларниң напаклиғи вә қанунсизлиғи үчүн Мән уларға қаримидим”.
25 Шуңлашқа Әң Алий Һөкүмран Йәһва мундақ дәйду: “Әнди болса, Мән Яқупни сүргүндин қайтуруп, пүткүл Исраилға ич ағритимән вә Муқәддәс исмим һәққидә қизғинишлиқ көрситимән.
26 Вапасизлиғи түпәйли пәсийип, улар өз йеридә ховупсиз яшиғанда һәм һечким уларни қорқатмиғанда, улар қилған ишлири үчүн Мениң алдимда иза тартиду.
27 Мән уларни башқа хәлиқләр ичидин қайтуруп, дүшмәнлириниң йәрлиридин жиғимән. Шундақларчә Мән көплигән хәлиқләр көзидә Өз хәлқим үчүн қилған яхшилиғим түпәйли Өзәмниң муқәддәслигимни көрситимән”.
28 “Улар Мениң уларниң Худайи Йәһва екәнлигимни исраиллиқларни җазалап, башқа хәлиқләр арисида орунлаштурғанда һәм кейин уларниң бирсиниму унтумай әсирдин қайтурғанда, буни убдан чүшиниду.
29 Мән башқа улардин Өз йүзүмни йошурмаймән, чүнки Исраил өйигә Өз муқәддәс роһумни төкимән”,— дәйду Әң Алий Һөкүмран Йәһва».
