Әзәкиял 41:1—26
41 У мени ибадәтханиға әкелип, униң ян тирәклирини өлчиди. Бир тирәк бир тәрәптин, йәнә бири — башқа тәрәптин болған еди. Һәрбир тирәкниң қелинлиғи 6 җәйнәктин ибарәт.
2 Киришниң кәңлиги 10 җәйнәк, униң ян турған тамлириниң узунлиғи 5 җәйнәк болғанди. У киши ибадәтханиниң муқәддәс җайини өлчиведи, узунлиғи 40 җәйнәк вә кәңлиги 20 җәйнәк чиқти.
3 У ичигә, йәни әң муқәддәс җайға кирди вә киришниң ян тирәклирини өлчиди: улар қелинлиғида 2 җәйнәктин ибарәт еди. Кириш кәңлиги 6 җәйнәк, кириштин ян турған тамларниң узунлиғи 7 җәйнәктин ибарәт болди.
4 Андин у муқәддәс җайниң кәйнидә орунлашқан бөлмини өлчиди вә униң узунлиғи 20 җәйнәк вә кәнлиги 20 җәйнәк чиқти. У маңа: «Бу әң муқәддәс җайдур»,— деди.
5 У киши һәрәмниң темини өлчиведи, у қелинлиғида 6 җәйнәк болди. Һәрәмниң өп-чөрисидики ян бөлмиләрниң кәңлиги 4 җәйнәктин еди.
6 Биқинидики бөлмиләр 3 қәвәткә җайлишип, бири-бирсиниң үстидә болғанди. Һәрбир қәвәттә 30дин бөлмә бар еди. Ибадәтханиниң әтрапидики тамда тәкчиләр болған еди, уларда ушбу бөлмиләр үчүн едән хизмитини атқурған таянчлар болатти, бирақ улар ибадәтханиниң темиға кирип турматти.
7 Һәрәмниң иккила тәрипидә айналма пәләмпәйләр болған еди, һәрқайси тәрәптә бирдин. Улар жуқарқи бөлмиләргә көтирилгәч, барғансери кәңийәтти. Қәвәт қанчә егиз болса, бөлмиләрму шунчә кәң болатти. Төвәнки қәвәттин оттуранчи қәвәтниң пәләмпийидин айнилип, жуқарқи қәвәткә чиқса болатти.
8 Мән шуни көрдүмки, ибадәт өйи егиз мәйданда туратти — у һәммә тәрәптин һәрәм тамлиридин хелила чиқип туратти. Ян бөлмиләр һулиниң егизлиги – йәрдин жуқарқи булуңғичә – 1 таяқ яки 6 җәйнәктин ибарәт еди.
9 Ян бөлмиләрниң ташқи теминиң қелинлиғи 5 җәйнәк. Ян бөлмиләр һәрәмниң бир қисми еди, уларниң ташқи теми билән мәйданниң чети арилиғида бир бош җай барди.
10 Һәрәмниң иккила тәрипидә ашханилар орунлашқанди. Уларниң һәм һәрәмниң арилиғидики һойлиниң бош өлчүк җайиниң кәңлиги 20 җәйнәк еди.
11 Ян бөлмиләргә мәйданниң бош йеридин 2 кириш арқилиқ барса болатти, уларниң бири шимал тәрәптә, иккинчиси җәнуп тәрәптә еди. Бош җайниң кәңлиги 5 җәйнәк еди.
12 Ғәриптә бир бена туратти, униңға кириш һойлиниң бош өлчүк йери тәрипидин еди. Униң кәңлиги 70 җәйнәк, узунлиғи 90 җәйнәк болғанди. Мәзкүр бенаниң тамлириниң қелинлиғи 5 җәйнәк еди.
13 Ушбу киши ибадәтханини өлчиведи, мана, униң узунлиғи 100 җәйнәкни тәшкил қилди. Һойлиниң бош өлчүк җайиниң, бена өзиниң һәм униң тамлириниң умумий узунлиғи шуниңдәкла 100 җәйнәк еди.
14 Шәриқкә қариған һәрәмниң алдиңқи қисминиң умумий кәңлиги униң һәммә тәрәплиридә болған бош өлчүк җай билән биллә 100 җәйнәкни көрситәтти.
15 У һойлиниң бош өлчүк җайиниң кәйнидики қисмиға кириши болған бенаниң узунлиғини өлчиди. Узунлуқ һойлиниң икки тәрипидики айванлири билән 100 җәйнәкни тәшкил қилди.
Униңдин ташқири, у киши муқәддәс җайни, әң муқәддәс җайни вә һойлиға қаритилған дәһлизни өлчәп чиқти,
16 шундақла босуғиларни, тарийидиған деризиләрни вә үч ханиларда болған пешайванларни. Босуғиларниң қешида, едәндин тартип деризиләргичә, яғачтин қапланма болған еди, шундақла деризиләрниң айнилимилири яғач билән қапланған еди.
17 У кириш үстидики тамниң қисмини, һәрәмниң ичкирини вә ташқи тәрәптики барлиқ тамларни өлчәп чиқти.
18 Тамларда оюлған хурабинлар вә пальмилар, икки хурабин айрилиғида бирдин пальмидин вә һәрбир хурабинниң иккидин йүзи болған еди.
19 Бир тәрәптин пальмиға адәмниң үзи қаратти, йәнә бир тәрәптин — ширниң үзи. Мошундақ тәсвирләр пүткүл ибадәтханида болған еди.
20 Оюлуп ясалған хурабинлар вә пальма дәрәқлири ибадәтханиниң тамлирида едәндин киришниң үсти вә әң жуқуриғичә болған еди.
21 Һәрәмниң ишиклириниң ян яғачлири төртчаслиқ яки квадрат шәклидә еди. Әң муқәддәс җайниң алдида
22 яғач қурбангаһқа охшайдиған бир нәрсә бар еди. Униң егизлиги 3 җәйнәк вә узунлиғи 2 җәйнәк болуп, булуң тирәклири барди. Униң һули һәм тамлири яғачтин ясалған еди. У киши маңа: «Бу Йәһваниң алдида туридиған үстәлдур»,— деди.
23 Муқәддәс җайниң вә әң муқәддәс җайниң 2дин ишиги бар еди.
24 Ишикләр иккиқанатлиқ болуп, иккилиси қатлинатти, һәрқайсиниң 2 қанити болатти.
25 Ибадәтханиниң ишиклиридә тамлардикигә қияс қилинған оюлған хурабинлар һәм пальмилар тәсвирләнгән еди. Дәһлизниң алди қисмида тешидин яғачлиқ карниз болди.
26 Дәһлизниң иккила тәрипидә, һәрәмниң ян бөлмилиридә вә карнизларниң давамида тарийидиған деризиләр һәм пальма дәриғиниң тәсвирлири болғанди.
