Әзәкиял 48:1—35
48 «Мана, шималдин башлап қәбилиләрниң несивилири: Данниң несиви Хетлонға апиридиған Хаматниң киришини бойлайдиған йолдин, Дәмәшқниң шималий чегарисидин Гасар-Енанғичә вә Хаматниң кешидики йәргичә созулиду. Ушбу дияр шәрқий чегаридин ғәрбий чегариғичә бариду.
2 Ашерниң несиви Данниң йери билән чегарилишип, шәрқий чәкләрдин ғәрбий чәкләргичә җайлишиду.
3 Нәпталимниң несиви Ашерниң дияри билән чегарилишип, шәриқтин ғәрбий чегариғичә ятиду.
4 Манассәниң несиви Нәпталим йери билән чегарилишип, шәриқтин ғәрип чекигичә бариду.
5 Әпрайимниң несиви Манассәниң йери билән чегаридаш болуп, шәриқтин ғәрбий чәккичә созулиду.
6 Рувимниң несиви Әпрайим дияри билән чегарилишип, шәриқтин ғәрбий чегариғичә ятиду.
7 Йәһуданиң йери Рувимниң зимини билән чегаридаш болуп, шәриқтин ғәрбий чегариғичә болиду.
8 Йәһуданиң зимини билән силәр һәдийә сүпитидә бөлүшкә тегиш өлчүк йәр чегаридаштур. У шәрқий чегаридин тартип, ғәрбий чегариғичә болиду. Униң кәңлиги 25 000 җәйнәк болуп, узунлиғи қәбилиләргә тәәллуқ хошна несипларниң узунлиғиға мувапиқ болуши керәк. Униң оттурисида ибадәтхана туриду.
9 Йәһва үчүн силәр бөлүдиған һәдийә узунлиғиға 25 000 җәйнәк, кәңлигигә 10 000 җәйнәк болиду.
10 Бу роһанийлар үчүн муқәддәс соғидур. Униң шималий тәрипиниң узунлиғи 25 000 җәйнәк, ғәрбий тәрипиниң — 10 000 җәйнәк, шәрқий тәрипиниң — 10 000 җәйнәк вә җәнубий тәрипиниң — 25 000 җәйнәк. Мәзкүр җайниң оттурисида Йәһва Худаниң ибадәтханиси туриду.
11 У Садок оғуллириниң санидин болған муқәддәсләнгән роһанийларға беғишланған. Улар өз вәзипилирини Мениң алдимда орунлап, исраиллиқлар билән ләвийләр Мәндин чекинип, қалдурған вақитта Маңа садиқ қалғанлардур.
12 Уларниң ләвийләр егиликлири билән чегаридаш соға қилинған йәрдә өлчүк зимини болиду. У — бүйүк муқәддәсликтур.
13 Роһанийларниң егиликлири йенида ләвийләргә мәнсүп өлчүк йәр болиду. Униң узунлиғи 25 000 җәйнәк вә кәңлиги 10 000 җәйнәк. (Пүткүл ушбу йәрниң узунлиғи 25 000 җәйнәк, кәңлиги 10 000 җәйнәк болиду.)
14 Уларға мәзкүр әң есил йәрниң һечбир қисмини башқиларға йә сетиши, йә алмаштуруши яки бериши мәнъий қилиниду, сәвәви, бу йәр Йәһва үчүн муқәддәстур.
15 Қалған йәр, униң кәңлиги 5 000 җәйнәк, узунлиғи 25 000 җәйнәк, у чегарини бойлап созулған, шәһәрниң, өйләрниң һәммә турғунлириға һәм яйлақлар үчүн бәлгүләнгән. Шәһәр ушбу өлчүк йәрниң нәқ оттурисида җайлишиду.
16 Мана, шәһәрниң өлчәмлири: униң шималий тәрипиниң узунлиғи 4 500 җәйнәк, җәнубий тәрипиниң — 4 500 җәйнәк, шәрқий тәрипиниң — 4 500 җәйнәк вә ғәрбий тәрипиниң — 4 500 җәйнәк.
17 Шәһәргә мәнсүп отлақ униңдин шималға қарап 250 җәйнәккә җәнупқа — 250 җәйнәккә, шәриқкә — 250 җәйнәккә вә ғәрипкә қарап 250 җәйнәк арилиғиға созулиду.
18 Қалған өлчүк йәрләрниң һәрқайсиниң узунлиғи, улар муқәддәс һәдийәни бойлап, шәриқкә вә ғәрипкә қарап ятиду, 10 000 җәйнәк болиду. Пүткүл ушбу йәрниң узунлиғи муқәддәс һәдийәниң узунлиғиға мас келиду. Мәзкүр йәрниң һосули шәһәргә ғәмхорлуқ қиливатқанларниң тамиғиға ишлитилиду.
19 У йәрдә шәһәргә хизмәт етиватқан Исраилниң барлиқ қәбилилиридин кишиләр ишләйду.
20 Пүтүн һәдийә төртчаслиқ, квадрат шәклидә болуп, униң һәр тәрипи 25 000 җәйнәктин ибарәт еди. Силәр мошу йәрни муқәддәс һәдийә һәм шәһәрниң егилиги үчүн бөлүшиңлар лазим.
21 Муқәддәс һәдийәниң һәм шәһәр егилигиниң иккила тәрипидә ятқан йәр бәгкә мәнсүп болиду. Бу йәр һәдийәниң шәрқий һәм ғәрбий чегарилириға яндап ятиду, уларниң узунлиғи 25 000 җәйнәктин ибарәт вә хошна қәбилиләрниң несиплирини бойлап созулиду. Бу бәгниң несивидур. Униң оттурида муқәддәс һәдийә вә ибадәтхана болиду.
22 Ләвийләрниң егиликлири вә шәһәрниң егиликлири бәгниң йери ичидә болуши лазим. Бәгниң йери Йәһуда несивиниң һәм Бениамин несивиниң арилиғида орунлишиду.
23 Башқа қәбилиләргә кәлсәк, Бениамин несиви шәрқий чегаридин ғәрбий чегариғичә болиду.
24 Шимонниң несиви Бениамин йери билән чегарилишип, шәриқтин ғәрип чегарисиғичә созулиду.
25 Иссакарниң несиви Шимон йери билән чегаридаш болуп, шәриқтин ғәрипқичә ятиду.
26 Зәбулунниң несиви Иссакар йери билән чегарилишип, шәриқтин ғәрип чекигичә болиду.
27 Гадниң несиви Зәбулун йеригә чегаридаш болуп, шәриқтин ғәрипқичә ятиду.
28 Җәнубий чегара, йәни Гадниң чегариси, Тамардин башлап Мериба-Кадәшниң сулириғичә меңип, андин Мисир чегарисидики сайдин өтүп, Оттурайәр деңизиға чиқиду.
29 Мана, мошу йәрни силәр Исраил қәбилилири арисида бөлүп, уларға мираслиққа беришиңлар керәк. Ушбу йәрләр уларниң несиплири болиду»,— демәктә Әң Алий Һөкүмран Йәһва.
30 «Мана, шәһәрдин чиқишлар. Шималий тәрәпниң узунлиғи 4 500 җәйнәк болиду.
31 Шәһәр дәрвазилири Исраил қәбилилириниң намлири билән атилиду. Шималда үч дәрваза болиду: Рувимниң дәрвазилири, Йәһуданиң дәрвазилири вә Ләвийниң дәрвазилири.
32 Шәрқий тәрәпниң узунлиғи 4 500 җәйнәк болиду. У йәрдиму үч дәрваза туриду: Йүсүпниң дәрвазилири, Бениаминниң дәрвазилири вә Данниң дәрвазилири.
33 Җәнубий тәрәпниң узунлиғи 4 500 җәйнәк болиду. У йәрдиму үч дәрваза болиду: Шимонниң дәрвазилири, Исакарниң дәрвазилири вә Зәбулунниң дәрвазилири.
34 Ғәрбий тәрәпниң узунлиғи 4 500 җәйнәк болиду. У йәрдиму үч дәрваза: Гадниң дәрвазилири, Ашерниң дәрвазилири вә Нәпталимниң дәрвазилири.
35 Барлиқ тәрәпләрниң умумий узунлиғи 18 000 җәйнәктин ибарәт болиду. Шу күндин башлап, шәһәр “Йәһва ушбу йәрдә”, дегән нам билән яшайду».
