سەگەك تۇرۇڭلار!
مەكتەپتىكى ئوق چىقىرىش ۋەقەلىرى — مۇقەددەس كىتاب نېمە دەيدۇ؟
2022-يىلى، 24-ماي كۈنى، ئامېرىكىنىڭ تېكساس شتاتىنىڭ يۇۋالدې دېگەن كىچىك شەھەر-بازىرىدا كىشىلەرنى قورقۇتىدىغان بىر پاجىئە يۈز بەردى. «نيۇ-يورك ۋاقىت» (The New York Times) گېزىتىدا: «قوراللىق بىر كىشى روب باشلانغۇچ مەكتىپىدە 19 بالا ۋە ئىككى ئوقۇتقۇچىنى ئۆلتۈرگەن»،— دەپ يېزىلغان.
ئېچىنارلىقى، شۇنداق دەھشەتلىك ۋەقەلەر توغرۇلۇق پات-پات ئاڭلاپ تۇرۇۋاتىمىز. «بۈگۈنكى ئامېرىكا» (USA Today) گېزىتىنىڭ خەۋىرىگە قارىغاندا، پەقەت ئامېرىكىدىلا «ئۆتكەن يىلى مەكتەپلەردە 249 قېتىم ئوق چىقىرىش ۋەقەلىرى يۈز بەرگەن بولۇپ، بۇ سان 1970-يىلدىن بۇيانقى ھەرقانداق بىر يىلغا قارىغاندا ئەڭ كۆپ».
نېمە ئۈچۈن بۇنداق پاجىئەلەر يۈز بېرىۋاتىدۇ؟ بىز بۇنداق رەزىل قىلمىشلارغا قانداق تاقابىل تۇرالايمىز؟ زوراۋانلىقلار بىر كۈنى يوق بولارمۇ؟ جاۋابنى مۇقەددەس كىتابتىن ئالايلى.
دۇنيا نېمە ئۈچۈن شۇنچە كۆپ زوراۋانلىققا تولۇپ كەتتى؟
مۇقەددەس كىتابتا بىزنىڭ دەۋرىمىز «ئاخىر زامان» دەپ ئاتىلىپ، بۇ زاماندا نۇرغۇن كىشىلەر «كۆيۈمسىز» ۋە «ۋەھشىي» بولۇپ، رەھىم-شەپقەتسىز ۋە زوراۋانلىق قىلىدىغانلىقى يېزىلغان. شۇنداق ئىللەتلىك كىشىلەر «بۇرۇنقىدىنمۇ يامانلىشىپ» كېتىدۇ (2-تىموتىي 3:1–5، 13). كۆپرەك بىلىش ئۈچۈن «كىشىلەرنىڭ بۈگۈنكىدەك ئوي-پىكىر قىلىشى ۋە يۈرۈش-تۇرۇشى مۇقەددەس كىتابتا ئالدىن ئېيتىلغانمۇ» ناملىق ماقالىنى ئوقۇڭ.
نۇرغۇن ئادەملەر: «خۇدا نېمە ئۈچۈن مەكتەپلەردىكى ئوق چىقىرىشقا ئوخشاش قورقۇنچلۇق ئىشلارنىڭ يۈز بېرىشىنىڭ ئالدىنى ئالمايدۇ؟»— دەپ سورايدۇ. مۇقەددەس كىتابنىڭ بۇ سوئالغا قانداق جاۋاب بېرىدىغانلىقىنى كۆرۈش ئۈچۈن «نېمە ئۈچۈن ياخشى ئادەملەر يامان ئىشلارغا ئۇچرايدۇ؟» ناملىق ماقالىنى ئوقۇڭ.
يامانلىقلارغا قانداق تاقابىل تۇرالايمىز؟
«مۇقەددەس يازمىلاردىكى سۆزلەرنىڭ ھەممىسى بىزگە تەلىم بولسۇن دەپ بۇرۇنلا يېزىپ قالدۇرۇلغان. خۇدانىڭ ۋەدىسىگە ئېرىشكەنگە قەدەر ئۇ سۆزلەر بىزنى رىغبەتلەندۈرىدۇ ۋە سەۋر-تاقەتلىك قىلىدۇ».—رىملىقلار 15:4.
مۇقەددەس كىتاب پرىنسىپلىرى سىزنىڭ بۇ رەزىل دۇنيادىكى زوراۋان ئىشلارغا تاقابىل تۇرالىشىڭىزغا ياردەم بېرىدۇ. كۆپرەك مەلۇمات ئېلىش ئۈچۈن «زوراۋانلىق بىر كۈنى يوق بولارمۇ؟» ناملىق «ئويغىنىش!» ژۇرنالىنى ئوقۇڭ.
بالىلار ئاڭلىغان ياكى كۆرگەن قورقۇنچلۇق خەۋەرلەرگە قانداق ئىنكاس قايتۇرۇشىغا ئاتا-ئانىلارنىڭ قانداق ياردەم بېرەلەيدىغانلىقى توغرۇلۇق مەسلىھەتلەرنى «قورقۇنچلۇق خەۋەرلەر ۋە بالىلىرىڭىز» ناملىق ماقالىدىن ئوقۇڭ.
زوراۋانلىق بىر كۈنى يوق بولارمۇ؟
«ئۇ خالاس قىلار زۇلۇم ۋە زوراۋانلىقتىن ئۇلارنى».—زەبۇر 72:14.
«بۇنىڭ بىلەن ئۇلار ئۆز قىلىچلىرىنى ساپان چىشلىرى، نەيزىلىرىنى ئورغاق قىلىپ سوقۇشىدۇ؛ بىر ئەل يەنە بىر ئەلگە قىلىچ كۆتەرمەيدۇ، ئۇلار ھەم يەنە ئۇرۇش قىلىشنى ئۆگەنمەيدۇ».—مىكاھ 4:3، كالام تەرجىمىسى.
ياراتقۇچى خۇدا ئىنسانلارنىڭ قولىدىن كەلمەيدىغان ئىشلارنى قىلىشقا قادىر. ئۇنىڭ ئەرشتىكى پادىشاھلىقى بارلىق قورال-ياراقلارنى ۋە زوراۋانلىقلارنى يوق قىلىدۇ. خۇدا پادىشاھلىقى كەلگۈسىدە يەنە نېمىلەرنى قىلىدىغانلىقى ھەققىدە تېخىمۇ كۆپرەك بىلىش ئۈچۈن «پادىشاھلىقنىڭ ھۆكۈمرانلىقى ئاستىدا چەكسىز تىنچ-خاتىرجەملىك ھۆكۈم سۈرىدۇ» ناملىق ماقالىنى ئوقۇڭ.
بۇلارغىمۇ قىزىقىشىڭىز مۇمكىن
مۇقەددەس كىتابنىڭ ئاساسىي تەلىملىرى
خۇدا نېمە ئۈچۈن ئازاب-ئوقۇبەتلەرگە يول قويىدۇ؟
مۇقەددەس كىتابتا قانائەتلەندۈرىدىغان ۋە تەسەللى بېرىدىغان جاۋاپلار بار.
مۇقەددەس كىتاب تەلىملىرى
سىناپ كۆرەي
تەلىم بەرگۈچى بىلەن مۇقەددەس يازمىلاردىن ھەقسىز بىلىم ئاشۇرۇڭ
