3-قوشۇمچە مەلۇمات
«مەڭگۈ شاد-خۇرام ياشاڭ!» دېگەن كىتابنى قانداق ئىشلىتىش
بۇرادەرلەر كۆپ دۇئالارنى قىلىپ، ئەستايىدىل ئىزدىنىش ئارقىلىق «مەڭگۈ شاد-خۇرام ياشاڭ!» دېگەن كىتابقا قايسى مەلۇماتلارنى كىرگۈزۈش كېرەكلىكىنى قارار قىلغان. مۇقەددەس كىتاب تەتقىق ئۆگىنىشىدە بۇ كىتابتىن ئەڭ ياخشى ئۇسۇلدا پايدىلىنىش ئۈچۈن تۆۋەندىكى مەسلىھەتلەرنى قوللىنىڭ.
تەتقىق ئۆگىنىشىدىن ئىلگىرى
-
1. پۇختا تەييارلىق قىلىڭ. شۇنداق قىلغاندا، ئۆگەنگۈچىنىڭ ئېھتىياجى، ئەھۋالى ۋە كۆز قاراشلىرى ھەققىدە ئويلاپ بېقىڭ. ئۇنىڭ ئۈچۈن چۈشىنىش ياكى تۇرمۇشىدا ئەمەلىي ئىشلىتىش قىيىن بولىدىغان ئوي-پىكىرلەر ئۈستىدە چوڭقۇر ئويلىنىڭ. «ئىزدىنىپ كۆرۈڭ» دېگەن سەھىپىدىكى مەلۇمات ئۇنىڭغا قانداق ياردەم بېرەلەيدىغانلىقى ھەققىدە مۇلاھىزە قىلىڭ ۋە ئۆگىنىش جەريانىدا ئېھتىياج تۇغۇلسا، شۇ سەھىپىدىكى مەلۇماتلاردىن پايدىلىنىشقا تەييار بولۇڭ.
تەتقىق ئۆگىنىشى جەريانىدا
-
2. ئەگەر ئۇ كىشى قارشى بولمىسا، تەتقىق ئۆگىنىشىنى ئۆتكۈزۈشتىن بۇرۇن ۋە كېيىن دۇئا قىلىڭ.
-
3. بەك كۆپ گەپ قىلماسلىققا تىرىشىڭ. دىققىتىڭىزنى ئۆگىنىۋاتقان مەزمۇنغا قارىتىڭ ۋە كىشىنى ئۆز ئوي-پىكىرلىرىنى ئەركىن-ئازادە بايان قىلىشقا ئىلھاملاندۇرۇڭ.
-
4. كىتابنىڭ يېڭى بىر قىسىمىنى ئۆگىنىشنى باشلىغاندا، بۇ قىسىمنىڭ كىرىش سۆزىنى ئوقۇپ، بىرنەچچە دەرسنىڭ ماۋزۇسىنى تەكىتلەپ ئۆتۈڭ.
-
5. بىر قىسىم مەزمۇننى تۈگەتكەندىن كېيىن، كىشىنىڭ شۇ قىسىمدا ئۆگەنگەن ھەقىقەتلەرنى ئېسىدە ساقلىشىغا ياردەم بېرىش ئۈچۈن، «قىسىمنى تەكرارلاش» دېگەن سەھىپىنى بىرلىكتە مۇھاكىمە قىلىڭ.
-
6. سىز بىر كىشى بىلەن ھەربىر دەرسنى ئۆگەنگەندە:
-
بىرلىكتە مەزمۇننى ئوقۇپ چىقىڭلار.
-
«ئوقۇڭ» دېگەن بارلىق ئايەتلەرنى ئوقۇڭلار.
-
زۆرۈر بولسا، باشقا ئايەتلەرنى ئوقۇڭلار.
-
«كۆرۈڭ» دېگەن فىلىملەرنى كۆرۈڭلار (ئەگەر بار بولسا).
-
ئۆگىنىۋاتقان كىشىدىن ھەربىر سوئالنى سوراڭ.
-
ئۇنىڭ دىققىتىنى «چوڭقۇرراق قېزىڭ» دېگەن سەھىپىدىكى رەسىمگە قارىتىڭ ۋە بۇ رەسىم توغرۇلۇق ئوي-پىكىرلىرىنى سوراڭ.
-
«مەقسەت» دېگەن رامكىنى ئىشلىتىپ، ئۇنىڭ روھىي جەھەتتىن ئالغا ئىلگىرىلىشىنى تەكشۈرۈشىگە ياردەم بېرىڭ. ئۇنى بۇ رامكىدىكى ئۈلگىلىك مەقسەتنى ۋە باشقا مەقسەتنى ياكى ھەر ئىككى مەقسەتنى قويۇشقا دەۋەت قىلسىڭىز بولىدۇ.
-
ئۇ دەرسكە تەييارلىق قىلغاندا، «ئىزدىنىپ كۆرۈڭ» دېگەن رامكىدىكى ماقالىلەر ياكى فىلىملەردىن قايسى بىرىنى بەكرەك ياقتۇرغانلىقىنى سوراڭ.
-
ھەر قېتىم ئۆگىنىش قىلغىنىڭلاردا بىر دەرسنى تۈگىتىشكە تىرىشىڭ.
-
تەتقىق ئۆگىنىشىدىن كېيىن
-
7. ئۆگىنىش قىلىۋاتقان كىشى توغرۇلۇق داۋاملىق ئويلىنىپ كۆرۈڭ. يەھۋاغا دۇئا قىلىپ، ئۇ كىشىنىڭ ئالغا ئىلگىرىلەش ئۈچۈن كۆرسەتكەن تىرىشچانلىقىنى بەرىكەتلەشنى سوراڭ؛ داۋاملىق ياردەم بېرىشنىڭ يولىنى بىلەلىشىڭىز ئۈچۈن ئەقىل-پاراسەت تىلەڭ.
