ھەرخىل دىنلارغا ئېتىقاد قىلىدىغان ئىخلاسمەن كىشىلەر بار.‏ خۇشخەۋەر بولسا،‏ خۇدا شۇنداق كىشىلەرگە نەزەر سالىدۇ ۋە ئۇلارغا كۆڭۈل بۆلىدۇ.‏ ئەمما ئەپسۇسلىنارلىقى،‏ دىنىي-‏ئېتىقاد نىقابى ئارقىسىدا رەزىللىكلەر كۆپىيىپ چېكىگە يەتتى (‏2-‏كورىنتلىقلار 4:‏3،‏4؛‏ 11:‏13–‏15‏)‏.‏ خەۋەرلەرگە ئاساسلانغاندا،‏ بەزى دىنلار ھەتتا تېررورلۇق،‏ ئىرقىي قىرغىنچىلىق،‏ ئۇرۇش ۋە بالىلارنى خورلاش قاتارلىق ئىشلارغا ئارىلاشقان.‏ بۇنداق ئىشلار دەرۋەقە خۇداغا ئىخلاسمەن كىشىلەرنى قايغۇغا سالماقتا!‏​‏—‏ مەتتا 24:‏3–‏5،‏11،‏12-‏ئايەتلەرنى ئوقۇڭ.‏

ساختا دىنىي-‏ئېتىقاد خۇدانى خۇرسەن قىلمايدۇ،‏ ئەمما ھەقىقىي دىنىي-‏ئېتىقاد خۇدانى ئۇلۇغلايدۇ.‏ ساختا دىن،‏ مۇقەددەس كىتابتا يوق ئىدىيەلەرنى ئۆگىتىدۇ،‏ شۇلار ياراتقۇچى خۇدا ۋە ئۆلۈم ھەققىدىكى ساختا تەلىماتلارنى ئۆز ئىچىگە ئالغان.‏ لېكىن،‏ يەھۋا ئۆزى ھەققىدە ئىنسانلارنىڭ ھەقىقەتنى بىلىشىنى خالايدۇ.‏​‏—‏ ھەزقىيال 18:‏4؛‏ 1-‏تىموتىي 2:‏3–‏5-‏ئايەتلەرنى ئوقۇڭ.‏

گەرچە بەزى دىنغا ئېتىقاد قىلغۇچىلار خۇدانى سۆيمىز،‏ دەپ جاكارلىسىمۇ،‏ ئەمەلىيەتتە شەيتاننىڭ دۇنياسىغا تەۋە بولۇپ،‏ ئۇلار خۇدانى ئالدىيالمايدۇ (‏ياقۇپ 4:‏4‏)‏.‏ مۇقەددەس كىتاب بارچە ساختا دىنلارنى «كاتتا بابىل»،‏ دەپ تىلغا ئالغان.‏ قەدىمقى بابىل يەنى بابىلون شەھىرى،‏ نۇھ پەيغەمبەرنىڭ زامانىدىكى كەلكۈن سۈيىدىن كېيىن ساختا دىن باشلانغان جاي ئىدى.‏ خۇشاللىنارلىق يېرى،‏ پات-‏ئارىدا خۇدا ئىنسانلارنى ئازدۇرۇپ،‏ زۇلۇم قىلىدىغان ساختا دىنلارنى تۇيۇقسىز ھالاك قىلىدۇ.‏​‏—‏ ۋەھىيلەر 17:‏1،‏2،‏5،‏16،‏17؛‏ 18:‏8-‏ئايەتلەرنى ئوقۇڭ.‏

كىشىنى خۇشال قىلىدىغان يەنە بىر خەۋەر،‏ يەھۋا دۇنيانىڭ ھەرقايسى جايلىرىدىكى ساختا دىنغا ئېتىقاد قىلغان ئىخلاسمەن كىشىلەرنى ئۇنتۇپ قالغىنى يوق.‏ ئۇ شۇنداق كىشىلەرگە ھەقىقەتنى ئۆگىتىش ئارقىلىق ئۇلارنى ساختا دىندىن ئېلىپ چىقماقتا.‏​‏—‏ مىخا 4:‏2،‏5-‏ئايەتلەرنى ئوقۇڭ.‏

يەھۋا ھەقىقەت ۋە ياخشىلىقنى سۆيگۈچىلەرگە غەمخورلۇق قىلىدۇ.‏ ئۇ ئۇلارنى ساختا دىندىن ئايرىلىپ چىقىشقا ئۈندەيدۇ.‏ خۇدانى سۆيگۈچىلەر ئۇنى خۇرسەن قىلىش ئۈچۈن ھەرقانداق ئۆزگەرتىشنى قىلىشقا تەيياردۇر.‏​‏—‏​ۋەھىيلەر 18:‏4-‏ئايەتنى ئوقۇڭ.‏

بىرىنچى ئەسىردە،‏ ئىخلاسمەن كىشىلەر ئەيسانىڭ ئەلچىلىرىدىن خۇشخەۋەرنى ئاڭلىغاندا،‏ ئۇلار خۇشاللىق بىلەن قوبۇل قىلغان.‏ ئۇلار يەھۋادىن تۇرمۇش كەچۈرۈشنىڭ يېڭى يولى،‏ يەنى بىر مەقسەت ۋە ئۈمىدكە تولغان بەختلىك تۇرمۇشنىڭ يولىنى ئۆگەنگەن.‏ بۈگۈنكى كۈندە بىز ئۈچۈن ئۇلار ياخشى ئۈلگە بولالايدۇ،‏ چۈنكى ئۇلار خۇشخەۋەرنى قوبۇل قىلىپ،‏ يەھۋانى ھاياتىدا بىرىنچى ئورۇنغا قويغان.‏​‏—‏ 1-‏سالونىكالىقلار 1:‏8،‏9؛‏ 2:‏13-‏ئايەتلەرنى ئوقۇڭ.‏

ساختا دىندىن ئايرىلىپ چىققانلار يەھۋانىڭ ئائىلىسىگە قوشۇلۇپ ئىبادەت قىلسا،‏ ئۇ ئۇلارنى قىزغىن قارشى ئالىدۇ.‏ ئەگەر مېھىر-‏شەپقەتلىك يەھۋانىڭ تەكلىپىنى قوبۇل قىلسىڭىز،‏ ئۇنىڭ دوستلۇقىدىن ۋە يېڭى بىر ئائىلە،‏ يەنى يەھۋاغا ئىبادەت قىلغۇچىلار چوڭ ئائىلىسىنىڭ ئىللىقلىقىدىن بەھرىمەن بولىسىز.‏ ھەمدە كەلگۈسىدە مەڭگۈلۈك ھاياتقا ئېرىشىسىز.‏​‏—‏ ماركۇس 10:‏29،‏30؛‏ 2-‏كورىنتلىقلار 6:‏17،‏18-‏ئايەتلەرنى ئوقۇڭ.‏

ساختا دىن ئۈستىگە كېلىدىغان ھالاك قىلىنىش ھۆكۈمى چوڭ بىر خۇشخەۋەر.‏ دۇنيادىكى بارلىق زۇلۇم،‏ ئېزىشلەر يوق قىلىنىدۇ.‏ ساختا دىن ھەرگىزمۇ ئىنسانلارنى قايتا ئازدۇرالمايدۇ ۋە ئۇلار ئارىسىدا بۆلگۈنچىلىك پەيدا قىلالمايدۇ.‏ بارچە ئەقىل ئىگىسى يالغۇز ھەق خۇداغا ئىبادەت قىلىپ ئىناق-‏ئىتتىپاق ياشايدۇ.‏​‏—‏​ۋەھىيلەر 18:‏20،‏21؛‏ 21:‏3،‏4-‏ئايەتلەرنى ئوقۇڭ.‏