بۇ رەسىم بىلەن ئالدىنقى بەتتىكى رەسىمنىڭ قانداق پەرقى بار؟ بۇ رەسىمدە ئادەملەر بار. ئۇلار تۇنجى ئەر بىلەن ئايال. ئۇلارنى كىم ياراتتى؟ ئاللا. ئۇنىڭ ئىسمىنى بىلەمسىز؟ ئۇنىڭ ئىسمى يەھۋا. شۇنىڭدەك، ئەرنىڭ ئىسمى ئادەم ھەمدە ئايالنىڭ ئىسمى ھاۋا، دەپ ئاتالدى.

پەرۋەردىگار يەھۋا، ئادەمنى ياراتقاندا:‏ ئۇ يەردىن تۇپراقنى ئېلىپ، ئۇنى مۇكەممەل بىر تەن، يەنى ئەر كىشىنىڭ تەن شەكلىدە ياسىدى. ئاندىن كېيىن، ئۇ ئاشۇ ئەرنىڭ بۇرنىغا پۈۋلىدى، نەتىجىدە ئادەم تىرىك جان بولدى.

ئاللا يەھۋا ئادەمگە بىر خىزمەت تاپشۇردى. ئۇ ئادەمگە پۈتكۈل جان-‏جانىۋارلارغا ئىسىم قويۇشنى بۇيرىدى. بەلكىم، ئادەم-‏ئاتا ئۇزۇن ۋاقىت قاراپ چىققاندىن كېيىن، ئۇلارنىڭ ھەممىسىگە ئەڭ ياخشى ئىسىملارنى تاللىغاندۇ. ئادەم جان-‏جانىۋارلارغا ئىسىم قويغان ۋاقتىدا، بىر نەرسىگە دىققەت قىلىشقا باشلىغان ئىدى. بىلەمسىز، ئۇ نېمىگە دىققەت قىلىشقا باشلىغان؟

بارچە جان-‏جانىۋارلارنىڭ جۈپتى بار ئىدى. دادا پىل بىلەن ئاپا پىل ۋە دادا شىر بىلەن ئاپا شىر بار بولغان. ئەمما، ئادەمنىڭ جۈپتى يوق ئىدى. شۇڭا، يەھۋا ئادەمنى قاتتىق ئۇخلىتىۋەتتى، ئاندىن ئۇنىڭ بىر تال قوۋۇرغا سۆڭىكىنى ئالدى. يەھۋا ئاشۇ قوۋۇرغىنى ئىشلىتىپ، ئادەم ئۈچۈن بىر ئايالنى ياسىدى ۋە ئۇ ئايال ئادەمنىڭ خوتۇنى بولدى.

مۇشۇ ۋاقىتتا، ئادەم-‏ئاتا قانچىلىك خۇشال بولغاندۇ! ئويلاپ بېقىڭ، ھاۋا-‏ئانا شۇنداق چىرايلىق باغقا ماكانلىشىپ، قانچىلىك شاد-‏خۇراملىققا چۆمگەندۇ، ھە! ھازىر، مانا ئۇلار پەرزەنتلىك بولۇپ، بىرلىكتە بەختلىك تۇرمۇش كەچۈرەلەيدىغان بولدى.

ئاللا، ئادەم بىلەن ھاۋانىڭ مەڭگۈ ياشىشىنى خالىغانىدى. ھەمدە ئۇ، ئۇلارنىڭ پۈتكۈل يەر شارىنى خۇددى ئاشۇ ئېرەم باغدەك چىرايلىق ھالەتكە كەلتۈرۈشىنى ئارزۇ قىلدى. ئادەم بىلەن ھاۋا شۇنداق قىلىش توغرىسىدا ئويلانغاندا، چوقۇم بەكمۇ خۇشال بولۇشقان! سىزمۇ يەر شارىنى گۈزەل باغقا ئايلاندۇرۇش ئۈچۈن ئۆز ھەسسىڭىزنى قوشۇشنى خالامسىز؟ ئەمما، ئادەم بىلەن ھاۋانىڭ شاد-‏خۇراملىقى ئۇزۇنغا بارمايلا يوق بولدى. نېمە ئۈچۈن؟ كۆرۈپ باقايلى.

زەبۇر 83:‏18؛ يارىتىلىش 1:‏26-‏31؛ 2:‏7-‏25.