نۇھنىڭ خوتۇنى ۋە سام، ھام، ياپەت ئىسىملىك ئۈچ ئوغلى بار ئىدى. ئۈچ ئوغۇلنىڭمۇ خوتۇنلىرى بار ئىدى. شۇڭا، نۇھنىڭ ئائىلىسىدىكىلەر جەمئىي سەككىز جان ئىدى.

مانا ئەمدى، خۇدا نۇھ پەيغەمبەرنى غەلىتە بىر ئىشنى قىلىشقا بۇيرۇدى. يەنى، ئۇ نۇھقا غايەت زور بىر كېمە ياشاشنى ئېيتتى. بۇ كېمە بەكمۇ چوڭ بولۇپ، ئۇنىڭ شەكلى خۇددى بىر چوڭ ۋە ئۇزۇن ساندۇققا ئوخشاش ئىدى. خۇدا نۇھقا:‏ «كېمىنى ئۈچ قەۋەت قىلغىن، ئىچىدە ئۆيلەر بولسۇن»، دەپ ئېيتتى. بەزى ئۆيلەر نۇھ ۋە ئۇنىڭ ئائىلىسىدىكىلەر ئۈچۈن، يەنە بەزىلىرى جان-‏جانىۋارلار ئۈچۈن، باشقىلىرى بولسا كېمىدىكى كىشىلەرنىڭ ۋە جان-‏جانىۋارلارنىڭ يەيدىغان يېمەك-‏ئىچمەكلىرىنى ساقلاش ئۈچۈن ئىدى.

خۇدا يەنە نۇھ پەيغەمبەرگە كېمىنىڭ ئىچىگە سۇ كىرمەيدىغان قىلىپ ياساشنى بۇيرۇدى. ئۇ:‏ «مەن يەر يۈزىنى توپان سۈيىگە غەرق قىلىپ، يەر يۈزىدىكى بارچە نەرسىلەرنى يوق قىلىمەن. بارلىق كېمە سىرتىدىكىلەر ئۆلىدۇ»، دېدى.

نۇھ ۋە ئۇنىڭ ئوغۇللىرى يەھۋانىڭ سۆزىگە قۇلاق سېلىپ، كېمە ياساشنى باشلىدى. ئەمما، باشقا كىشىلەر ئۇلارنى زاڭلىق قىلىپ كۈلۈپ، داۋاملىق يامان ئىشلارنى قىلىۋەردى. چۈنكى، يەھۋانىڭ قىلماقچى بولغان ئىشى توغرىسىدا نۇھنىڭ ئېيتقان سۆزلىرىگە ھېچكىم ئىشەنمىگەنىدى.

كېمە بەكمۇ چوڭ بولغاچ، ئۇنى ياساسقا كۆپ ۋاقىت كېتەتتى. نۇرغۇن يىللاردىن كېيىن، ئەڭ ئاخىرى كېمە ياسىلىپ بولدى. شۇنىڭ بىلەن، خۇدا نۇھنى جان-‏جانىۋارلارنى كېمىگە چىقىرىشنى بۇيرۇدى. خۇدا بەزى ھايۋانلارنى بىر ئەركەك، بىر چىشى، بىر جۈپ قىلىپ ئېلىپ چىقىشنى، ئەمما باشقا بەزى تۈردىكى ھايۋانلاردىن يەتتىنى ئېلىپ چىقىشنى ئېيتتى. ئۇ يەنە نۇھقا ھەرخىل تۈردىكى ئۇچار قۇشلارنى ئېلىپ چىقىشىنى بۇيرۇغان ئىدى. نۇھ پەيغەمبەر ھەممىنى دەل خۇدا بۇيرۇغاندەك قىلدى.

ئەڭ ئاخىرى، نۇھ ۋە ئۇنىڭ ئائىلىسىدىكىلەر كېمىگە چىقتى. شۇنىڭ بىلەن، خۇدا كېمە ئىشىكىنى يېپىۋەتتى. نۇھ ۋە ئۇنىڭ ئائىلىسىدىكىلەر، كېمە ئىچىدە توپان سۈيىنىڭ كېلىشىنى كۈتۈپ تۇردى. ئۇلار بىلەن بىرگە كېمە ئىچىدە ساقلاپ تۇرىۋاتىمەن، دەپ خىيال قىلىپ بېقىڭە! پەرۋەردىگار ئېيتقان توپان سۈيى راستىنلا كېلەرمۇ؟

يارىتىلىش 6:‏9-‏22؛ 7:‏1-‏9.