داۋۇت يېرۇسالېمدا ھۆكۈمرانلىق قىلىشقا باشلىغاندىن كېيىن، يەھۋا داۋۇت پادىشاھنىڭ قوشۇنىنى نۇرغۇن جەڭلەردە دۈشمەنلىرى ئۈستىدىن غەلبىگە ئېرىشتۈردى. ئاللا يەھۋا ئىسرائىللارنى قانان زېمىنىغا ئېرىشتۈرۈشنى ۋەدە قىلغانىدى. مانا ھازىر يەھۋانىڭ ياردىمىدە، ۋەدە قىلىنغان بارلىق زېمىن ئاخىرى ئۇلارنىڭ بولدى.

داۋۇت دانا ھۆكۈمران بولۇپ، يەھۋانى سۆيەتتى. شۇڭا، ئۇ يېرۇسالېمنى ئىگەللەپ، ئۇزۇن ئۆتمەي، يەھۋانىڭ ئەھدە ساندۇقىنى ئۇ يەرگە يۆتكەپ كەلدى. ئۇ ھەمدە ئەھدە ساندۇقىنى قويۇش ئۈچۈن ئىبادەتخانا سېلىشنى ئارزۇ قىلدى.

كېيىنكى كۈنلەردە، داۋۇت پادىشاھ ئېغىر بىر گۇناھ قىلدى. ئۇ باشقىلارغا تەئەللۇق نەرسىلەرنى ئېلىشنىڭ خاتا ئىكەنلىكىنى بىلەتتى. شۇنداقتىمۇ، بىر كۈنى كەچتە، داۋۇت ئۆز ئوردىسىنىڭ ئۆگزىسىدە تۇرغاندا، پەسكە قارىدى ۋە ناھايىتى چىرايلىق بىر ئايالنى كۆرۈپ قالدى. ئۇ ئايالنىڭ ئىسمى بەتشەبا بولۇپ، ئۇنىڭ ئېرىنىڭ ئىسمى ئۇرىيا ئىدى. ئۇرىيا داۋۇتنىڭ قوشۇنىدا ئەسكەر ئىدى.

داۋۇت بەتشەباغا ئېرىشىشنى بەكمۇ ئارزۇ قىلغانىدى. شۇڭا، ئادەم ئەۋەتىپ، ئۇنى ئۆز ئۆيىگە ئېلىپ كەلدى. ئۇنىڭ ئېرى جەڭگە كەتكەن ئىدى. داۋۇت بەتشەبا بىلەن بىللە ياتتى. كېيىن، بەتشەبا ھامىلدار بولۇپ قالغانلىقىنى بىلدى. داۋۇت پادىشاھ بەك ئەنسىرىدى. شۇڭا، ئۇ ئۆز قوشۇنىنىڭ سەركەردىسى يوئابقا، ئۇرىيانى ئالدىنقى سەپكە جەڭ مەيدانىغا ئەۋەتىڭلار، جەڭدە ئۆلسۇن، دەپ بىرى ئارقىلىق گەپ ئەۋەتتى. ئۇرىيا ئۆلگەندىن كېيىن، داۋۇت بەتشەبانى خوتۇنلۇققا ئالدى.

يەھۋا داۋۇتنىڭ بۇ ئىشى ئۈچۈن قاتتىق ئاچچىقلاندى. شۇڭا، ئۇ خىزمەتچىسى ناتاننى داۋۇتنىڭ گۇناھىنى كۆرسىتىپ بېرىشكە ئەۋەتتى. قاراڭ، ناتان پەيغەمبەر داۋۇت پادىشاھقا سۆزلەۋاتىدۇ. داۋۇت ئۆزىنىڭ قىلغان گۇناھلىرى ئۈچۈن پۇشايمان قىلدى. شۇڭا، يەھۋا ئۇنى ئۆلۈمگە ھۆكۈم قىلمىدى. بىراق، يەھۋا:‏ «سەن شۇنداق رەزىل ئىشلارنى قىلغانلىقىڭ ئۈچۈن، سېنىڭ ئۆيۈڭگە كۆپ بالاقازالار كېلىدۇ»، دېدى. داۋۇتنىڭ ئۆيىگە زادى قانداق بالاقازالار كەلگەندۇ، ھە!؟

ئاۋۋال، بەتشەبا تۇغقان ئوغۇل ئۆلۈپ كەتتى. ئاندىن كېيىن، داۋۇتنىڭ تۇنجى ئوغلى ئامنون سىڭلىسى تامار يالغۇز قالغاندا، مەجبۇرىي ئۇنىڭ نومۇسىغا تەگدى. داۋۇتنىڭ ئوغلى ئابسالوم بۇنىڭ ئۈچۈن قاتتىق ئاچچىقلىنىپ، ئامنوننى ئۆلتۈرۈۋەتتى. كېيىن، ئابسالوم خەلقنىڭ قارشى ئېلىشىغا ئېرىشتى. شۇڭا، ئۇ ئۆزىنى پادىشاھ دەپ ئاتىدى. ئاخىرىدا، ئابسالوم ئۆلتۈرۈلۈپ، داۋۇت ئابسالوم ئۈستىدىن غەلبە قىلدى. ھەقىقەتەن، داۋۇت پادىشاھ نۇرغۇن ئاۋارىچىلىققا يولۇقتى.

ئاشۇ بارلىق ئىشلار يۈز بېرىۋاتقان مەزگىلدە، بەتشەبا بىر ئوغۇل تۇغقان بولۇپ، ئىسمى سۇلايمان ئىدى. داۋۇت قېرىپ، كېسەلچان بولۇپ قالغاندا، ئۇنىڭ ئوغلى ئادونىياھ پادىشاھلىق تەختىدە ئولتۇرۇشقا ئورۇندى. شۇنىڭ بىلەن، داۋۇت پادىشاھ سادوق ئىسىملىك روھانىينى، سۇلايماننىڭ بېشىغا ياغ قۇيۇپ، ئۇنىڭ پادىشاھ بولىدىغانلىقىنى جاكارلاشقا ئەۋەتتى. شۇنىڭدىن كېيىن، ئۇزۇن ئۆتمەي داۋۇت 70 يېشىدا ئۆلۈپ كەتتى. ئۇ 40 يىل ھۆكۈمرانلىق قىلغانىدى. مانا ئەمدى، سۇلايمان ئىسرائىلغا پادىشاھ بولدى.

2-‏سامۇئىل 11:‏1-‏27؛ 12:‏1-‏18؛ 1-‏پادىشاھلار 1:‏1-‏48.