بۇ رەسىمدە، ئەلچى پاۋلۇس بىلەن بىللە تۇرغان بۇ ياش يىگىت، تىموتىي. ئۇ ئائىلىسىدىكىلەر بىلەن بىللە لىسترا شەھىرىدە تۇراتتى. ئۇنىڭ ئاپىسىنىڭ ئىسمى ئەۋنىكى، ۋە مومىسىنىڭ بولسا لوئى ئىدى.

بۇ پاۋلۇسنىڭ لىستراغا ئۈچىنچى قېتىم كېلىشى ئىدى. ئېھتىمال بىر يىل ياكى ئۇنىڭدىن بۇرۇن، پاۋلۇس بىلەن بارنابا بۇ يەرگە خۇش خەۋەر يەتكۈزۈشكە تۇنجى قېتىم كەلگەنىدى. بۇ قېتىم پاۋلۇس دوستى سىلاس بىلەن بىرگە بۇ يەرگە قايتا كەلدى.

پاۋلۇسنىڭ تىموتىيغا نېمە دەۋاتقانلىقىنى بىلەمسىز؟ ئۇ تىموتىيدىن:‏ «سەن بىزنىڭ ياردەمچىمىز بولۇپ، يىراقلاردىكى خەلقلەرگە خۇش خەۋەر يەتكۈزۈش ئۈچۈن سىلاس بىلەن ماڭا قوشۇلۇشنى خالامسەن؟» دەپ سوراۋاتىدۇ.

تىموتىي:‏ «ماقۇل، بېرىشنى خالايمەن»، دېدى. شۇنىڭ بىلەن، ئۇزۇن ئۆتمەي تىموتىي ئائىلىسىدىن ئايرىلىپ، پاۋلۇس ۋە سىلاس بىلەن سەپەرگە چىقتى. بىراق، ئۇلارنىڭ سەپىرى توغرىسىدا ئۆگىنىشتىن ئاۋۋال، پاۋلۇسقا نېمە ئىش بولغان، كۆرۈپ باقايلى. پاۋلۇس دەمەشققە سەپەر قىلىپ ماڭغاندا، ئەيسا مەسىھ ئۇنىڭغا كۆرۈنگەن، شۇ ۋاقىتتىن تاكى ھازىرغىچە 17 يىل ئۆتۈپ كەتكەنىدى.

ئېسىڭىزدە بارمۇ، پاۋلۇس ئەيسانىڭ ئەگەشكۈچىلىرىگە زىيانكەشلىك قىلىش ئۈچۈن دەمەشققە ماڭغانىدى. مانا ئەمدى ئۇ ئۆزى ئەيسانىڭ شاگىرتى بولدى! كېيىن، بەزى دۈشمەنلەر پاۋلۇسنىڭ ئەيسا ھەققىدە بەرگەن تەلىملىرىنى ئۆچ كۆرگەچ، پاۋلۇسنى ئۆلتۈرمەكچى بولۇشتى. لېكىن، شاگىرتلار پاۋلۇسنىڭ قېچىپ كېتىشىگە ياردەم بەردى. ئۇلار پاۋلۇسنى بىر سېۋەتكە سېلىپ، شەھەر سېپىل تېمىنىڭ سىرتىغا چۈشۈرۈپ قويدى.

ئاندىن كېيىن، پاۋلۇس ئانتاكياغا بېرىپ خۇش خەۋەر يەتكۈزدى. بۇ تۇنجى بولۇپ ئەيسانىڭ ئەگەشكۈچىلىرى «مەسىھ مۇرىتلىرى»، دەپ ئاتالغان جاي ئىدى. ئارقىدىن، پاۋلۇس بىلەن بارنابا ئانتاكيادىن باشقا يىراق جايلاردىكى دۆلەتلەرگە خۇش خەۋەر يەتكۈزۈشكە ئەۋەتىلدى. ئۇلار بارغان شەھەرلەرنىڭ ئارىسىدىكى بىرى، تىموتىينىڭ يۇرتى لىسترا ئىدى.

بىر يىلچە ۋاقىت ئۆتۈپ كەتتى. ھازىر پاۋلۇس ئىككىنچى قېتىملىق خۇش خەۋەر يەتكۈزۈش سەپىرىدە قايتا لىستراغا كەلدى. تىموتىي پاۋلۇس ۋە سىلاس بىلەن بىرگە ماڭدى، ئۇلارنىڭ قەيەرگە بارىدىغانلىقىنى بىلەمسىز؟ بۇ خەرىتىگە قاراڭ، بىرلىكتە بىرنەچچە جاي بىلەن تونۇشۇپ باقايلى.

ئاۋۋال، ئۇلار يېقىن قوشنا شەھەر كونياغا، كېيىن ئىككىنچى بىر ئانتاكيا ئاتالغان شەھەرگە باردى. ئاندىن كېيىن، ئۇلار تروئاسقا بېرىپ، ئاندىن فىلىپى، سالونىكا ۋە بېرىياغا باردى. خەرىتىدىن ئافىنانى كۆردىڭىزمۇ؟ پاۋلۇس ئۇ يەردە خۇش خەۋەر تارقاتتى. شۇنىڭدىن كېيىن، ئۇلار كورىنت شەھىرىدە بىر يېرىم يىل تۇرۇپ، خۇش خەۋەر ئېيتتى. ئەڭ ئاخىرىدا، ئۇلار ئەفەس شەھىرىدە ئازراقلا توختاپ، ئاندىن كېمە ئارقىلىق قەيسەرىيەگە قايتىپ كەلدى. ئۇ يەردىن قايتا ئانتاكياغا باردى. پاۋلۇس ئۇ جايدا تۇرۇپ قالدى.

تىموتىي نەچچە مىڭ چاقىرىم سەپەر قىلىپ، پاۋلۇسقا ياردەملىشىپ «خۇش خەۋەر» تارقاتتى ۋە نۇرغۇن ئېتىقادچىلار جامائەتچىلىكىنى قۇردى. سىز چوڭ بولغاندا، تىموتىيغا ئوخشاش خۇدانىڭ ساداقەتمەن خىزمەتچىسى بولامسىز؟

ئەلچىلەر 9:‏19-‏30؛ 11:‏19-‏26؛ 13-‏بابتىن 17-‏بابغىچە؛ 18:‏1-‏22.

1.‏ رىم؛‏ 2.‏ مالتا؛‏ 3.‏ بېرىيا؛‏ 4.‏ سالونىكا؛‏ 5.‏ كورىنت؛‏ 6.‏ فىلىپى؛‏ 7.‏ ئافىنا؛‏ 8.‏ كرىت؛‏ 9.‏ تروئاس؛‏ 10.‏ ئەفەس؛‏ 11.‏ مىلېت؛‏ 12.‏ كولوسى؛‏ 13.‏ ئانتاكيا؛‏ 14.‏ كونيا؛‏ 15.‏ لىسترا؛‏ 16.‏ سىپرۇس؛‏ 17.‏ ئانتاكيا؛‏ 18.‏ قەيسەرىيە؛‏ 19.‏ جاففا؛‏ 20.‏ دەمەشق؛‏ 21.‏ يېرۇسالېم؛‏ 22.‏ چوڭ دېڭىز (ئوتتۇرا دېڭىز)