مەتتا كىتابى 10:1—42
10 شۇنىڭ بىلەن، ئەيسا 12 شاگىرتىنى چاقىرىپ، ئۇلارغا جىنلارنى قوغلاش ۋە ھەرخىل ئاغرىق-سىلاقلارنى ساقايتىش ھوقۇقىنى بەردى.
2 بۇ 12 ئەلچىنىڭ ئىسىملىرى مۇنداق: پېترۇس دەپمۇ ئاتالغان سىمۇن ۋە ئۇنىڭ ئىنىسى ئەندەر، زەبەدىينىڭ ئوغۇللىرى ياقۇپ ۋە ئىنىسى يۇھاننا.
3 فىلىپ ۋە بارتولوماي، توماس ۋە باجگىر مەتتا، ھالپاينىڭ ئوغلى ياقۇپ ۋە تاداي،
4 قانانلىق سىمۇن ۋە كېيىنرەك ئەيساغا ساتقۇنلۇق قىلغان يەھۇدا ئىشقارىيوت.
5 ئەيسا بۇ 12 كىشىنى ئەۋەتىپ، ئۇلارغا مۇنداق يول-يورۇقلارنى بەردى: «يەھۇدىي ئەمەسلەرنىڭ يۇرتلىرىغا بارماڭلار، سامارىيىلىكلەرنىڭ شەھەرلىرىگىمۇ كىرمەڭلار.
6 ئەكسىچە، ئىسرائىللار ئارىسىدىكى ئاداشقان قوي پادىلىرىغا بېرىڭلار.
7 بارغىنىڭلاردا: ‹خۇدانىڭ پادىشاھلىقى* يېقىنلاشتى›،— دەپ ۋەز قىلىڭلار.
8 كېسەللەرنى ساقايتىڭلار، ئۆلۈكلەرنى تىرىلدۈرۈڭلار، ماخاۋ كېسەللىرىنى ساقايتىڭلار، جىنلارنى قوغلاپ چىقىرىڭلار. ھەقسىز ئالدىڭلار، ھەقسىز بېرىڭلار.
9 بەل بېغىڭلارغا ئالتۇن، كۈمۈش ۋە مىس پۇللارنى ئېلىپ يۈرمەڭلار.
10 سەپىرىڭلاردا نە خۇرجۇن، نە ئىككى ئىچ كىيىم، نە ئاياق، نە ھاسا تاياق ئېلىۋالماڭلار. چۈنكى، ئىشچى قورسىقىنى تويغۇزۇشقا ھەقلىقتۇر.
11 قايسى شەھەر ياكى يېزىغا كىرسەڭلار، بۇ خەۋەرگە لايىق كىشىنى ئىزدەپ تېپىڭلار ۋە ئۇ يەردىن كەتكۈچە، شۇ كىشىنىڭ ئۆيىدە تۇرۇڭلار.
12 بىر ئۆيگە كىرگىنىڭلاردا، شۇ ئۆيدىكى كىشىلەرگە سالام بېرىپ، ئامان-ئېسەنلىك تىلەڭلار.
13 ئەگەر ئۇ ئۆيدىكى كىشىلەر سىلەرنى قوبۇل قىلسا، تىلىگەن ئامان-ئېسەنلىكىڭلار ئۇلارغا يار بولسۇن. ئەگەر قوبۇل قىلمىسا، تىلىگەن ئامان-ئېسەنلىك ئۆزۈڭلارغا قايتسۇن.
14 قەيەردىدۇ بىرى سىلەرنى قوبۇل قىلمىسا ياكى سۆزلىرىڭلارنى ئاڭلىمىسا، شۇ ئۆيدىن ياكى شەھەردىن چىقىپ كېتىۋاتقاندا، ئايىغىڭلاردىكى توپا-چاڭنى قېقىۋېتىڭلار.
15 سىلەرگە ھەقنى ئېيتسام، ھۆكۈم كۈنى بۇ شەھەرنىڭ جازاسىغا قارىغاندا سودوم ۋە گومورا يۇرتلىرىنىڭ جازاسى يېنىكرەك بولىدۇ.
16 مانا، مەن ئەمدى سىلەرنى خۇددى قويلارنى بۆرىلەرنىڭ ئارىسىغا ئەۋەتكەندەك ئەۋەتىۋاتىمەن. شۇڭا، سىلەر يىلانلاردەك سەزگۈر ۋە كەپتەرلەردەك ساددا بولۇڭلار.
17 ئادەملەردىن ئېھتىيات قىلىڭلار، چۈنكى ئۇلار سىلەرنى سوتقا تاپشۇرۇپ بېرىدۇ ۋە سىناگوگلىرىدا قامچىلايدۇ.
18 ماڭا ئەگەشكىنىڭلار ئۈچۈن سىلەر ئەمەلدارلار ۋە پادىشاھلارنىڭ ئالدىغا ئېلىپ بېرىلىسىلەر. شۇنىڭ بىلەن، ئۇلارغا ۋە باشقا خەلقلەرگە گۇۋاھلىق بېرىسىلەر.
19 بىراق، سىلەرنى ئۇلارنىڭ قولىغا تاپشۇرغاندا، نېمە دېيىش ۋە قانداق دېيىش ھەققىدە غەم-ئەندىشە قىلماڭلار. چۈنكى، شۇ پەيتتە نېمە دېيىش كېرەكلىكى سىلەرگە بىلدۈرۈلىدۇ.
20 يەنى سىلەر ئۆزۈڭلار سۆزلىمەيسىلەر، بەلكى ئاتاڭلارنىڭ مۇقەددەس روھىنىڭ ياردىمىدە سۆزلەيسىلەر.
21 ئۇنىڭدىن باشقا، قېرىنداش قېرىندىشىنى، ئاتا ئۆز بالىسىنى ئۆلۈمگە تۇتۇپ بېرىدۇ، بالىلارمۇ ئاتا-ئانىسىغا قارشى چىقىپ، ئۇلارنى ئۆلتۈرىدۇ.
22 مېنىڭ ئىسىمىم ئۈچۈن پۈتۈن ئىنسانلار سىلەرنى ئۆچ كۆرىدۇ، لېكىن كىمكى ئاخىرغىچە بەرداشلىق بەرسە قۇتقۇزۇلىدۇ.
23 ئۇلار سىلەرگە بىر شەھەردە زىيانكەشلىك قىلسا، يەنە بىر شەھەرگە قېچىپ بېرىڭلار. سىلەرگە ھەقنى ئېيتسام، ئىنسانئوغلى قايتىپ كەلگۈچە، سىلەر ئىسرائىلنىڭ پۈتۈن شەھەر، يېزا-قىشلاقلىرىنى ئارىلاپ چىقىپ بولالمايسىلەر.
24 شاگىرت ئۇستازىدىن، قۇل خوجايىنىدىن ئۈستۈن تۇرمايدۇ.
25 شاگىرت ئۇستازىدەك ۋە قۇل خوجايىنىدەك بولسا، قانائەت تاپىدۇ. ئەگەر كىشىلەر ئۆي ئىگىسىنى بەئەلزىبۇل* دەپ ئاتىسا، شۇ ئۆيدىكى كىشىلەرنى ھەم شۇنداق ئاتىشى شەك-شۈبھىسىزدۇر.
26 ئەمما، سىلەر ئۇلاردىن قورقماڭلار، چۈنكى ئاشكارا بولمايدىغان ھېچنەرسە، ئېچىلمايدىغان سىر يوقتۇر.
27 سىلەرگە قاراڭغۇلۇقتا ئېيتقان سۆزلىرىمنى سىلەر يورۇقلۇقتا ئېيتىڭلار ۋە قۇلاقلىرىڭلارغا پىچىرلاپ ئېيتىلغان سۆزلەرنى ئۆگزىگە چىقىپ جاكارلاڭلار.
28 تەننى ئۆلتۈرسىمۇ، جاننى ئۆلتۈرەلمەيدىغانلاردىن قورقماڭلار. ئەكسىچە، ھەم تەننى، ھەم جاننى گەھەننادا ھالاك قىلىشقا قادىر بولغۇچىدىن قورقۇڭلار.
29 ئىككى قۇشقاچنى بىر تەڭگىگە* سېتىۋالغىلى بولىدۇ، شۇنداق ئەمەسمۇ؟ بىراق ئاسماندىكى ئاتاڭلاردىن بىخەۋەر ئۇلارنىڭ ھېچبىرى يەرگە چۈشۈپ كەتمەيدۇ.
30 سىلەرگە كەلسەك، ھەتتا سىلەرنىڭ بېشىڭلاردىكى چېچىڭلارنىڭمۇ ھېسابى بار.
31 شۇنداق ئىكەن، قورقماڭلار. چۈنكى، سىلەر نۇرغۇنلىغان قۇشقاچلاردىن قەدىرلىكسىلەر.
32 كىمكى ئادەملەرنىڭ ئالدىدا مېنى ئېتىراپ قىلسا، مەنمۇ شۇ كىشىنى ئاسماندىكى ئاتامنىڭ ئالدىدا ئېتىراپ قىلىمەن.
33 لېكىن، كىمكى مېنى ئىنسانلارنىڭ ئالدىدا رەت قىلسا، مەنمۇ ئۇ كىشىنى ئاسماندىكى ئاتامنىڭ ئالدىدا رەت قىلىمەن.
34 مېنى يەر يۈزىگە تىنچلىق ئېلىپ كەلدى دەپ ئويلىماڭلار. مەن تىنچلىق ئەمەس، بەلكى قىلىچ ئېلىپ كەلدىم.
35 چۈنكى، مەن ئوغۇلنى ئۆز ئاتىسىغا، قىزنى ئۆز ئانىسىغا ۋە كېلىننى ئۆز قېيىنانىسىغا قارشى چىقىرىپ، ئارىغا بۆلگۈنچىلىك سالغىلى كەلدىم.
36 دېمەك، ئادەمنىڭ دۈشمەنلىرى ئۆز ئائىلىسىدىكى كىشىلەر بولىدۇ.
37 كىمكى ئاتىسى ياكى ئانىسىنى مېنىڭدىنمۇ ئارتۇقراق سۆيسە، مېنىڭ شاگىرتىم بولۇشقا لايىق ئەمەس. كىمكى ئوغلى ياكى قىزىنى مېنىڭدىنمۇ ئارتۇقراق سۆيسە، مېنىڭ شاگىرتىم بولۇشقا لايىق ئەمەس.
38 كىمكى ئۆزىنىڭ ئازاب تۈۋرۈكىنى كۆتۈرۈپ، مېنىڭ ئارقامدىن ئەگەشمىسە، شاگىرتىم بولۇشقا لايىق ئەمەس.
39 كىمكى ئۆز جېنىنى ئايىسا، ئۇنىڭدىن مەھرۇم بولىدۇ. كىمكى مەن ئۈچۈن ئۆز جېنىدىن ئايرىلسا، ئۇنىڭغا ئېرىشىدۇ.
40 كىمكى سىلەرنى قوبۇل قىلسا، مېنى قوبۇل قىلىدۇ. كىمكى مېنى قوبۇل قىلسا، مېنى ئەۋەتكۈچىنى ھەم قوبۇل قىلىدۇ.
41 كىمكى بىر پەيغەمبەرنى پەيغەمبەر بولغىنى ئۈچۈن قوبۇل قىلسا، ئۇ پەيغەمبەرگە تېگىشلىك مۇكاپاتقا ئېرىشىدۇ. كىمكى ھەققانىي كىشىنى ھەققانىي بولغىنى ئۈچۈن قوبۇل قىلسا، ئۇ ھەققانىي كىشىگە تېگىشلىك مۇكاپاتقا ئېرىشىدۇ.
42 سىلەرگە ھەقنى ئېيتىپ قويايكى، كىمكى بۇ ئاددىي كىشىلەردىن بىرىگە مېنىڭ شاگىرتىم بولغىنى ئۈچۈن بىر پىيالە سوغۇق سۇ بەرسە، بۇ كىشى ئۆز مۇكاپاتىغا ئېرىشمەي قالمايدۇ».
