مەتتا كىتابى 17:1—27
17 ئالتە كۈندىن كېيىن، ئەيسا پەقەت پېترۇس، ياقۇپ ۋە ياقۇپنىڭ ئىنىسى يۇھاننانى ئېلىپ، ئېگىز بىر تاققا چىقتى.
2 ئۇلارنىڭ ئالدىدا ئەيسانىڭ قىياپىتى ئۆزگىرىپ، ئۇنىڭ يۈزى قۇياشتەك پارلىدى ۋە كىيىملىرى نۇردەك ئاپپاق يورۇدى.
3 تۇيۇقسىز، مۇسا ۋە ئىلياس پەيغەمبەرلەر ئۇلارنىڭ ئالدىدا پەيدا بولۇپ، ئەيسا بىلەن سۆزلەشتى.
4 شۇنىڭ بىلەن، پېترۇس ئەيساغا: «ئەي ھەزرىتىم، بۇ يەردە بولغىنىمىز نېمە دېگەن ياخشى! خالىسىڭىز، بىرىنى سىزگە، بىرىنى مۇساغا، يەنە بىرىنى ئىلياسقا ئاتاپ، بۇ يەرگە ئۈچ چېدىر تىكەي»،— دېدى.
5 پېترۇس تېخى سۆزلەۋاتقاندا، ئۇلارنى قويۇق بۇلۇت قاپلىدى. بۇلۇت ئىچىدىن: «بۇ مېنىڭ سۆيۈملۈك ئوغلۇم، مەن ئۇنىڭدىن خۇرسەنمەن. ئۇنىڭ سۆزىگە قۇلاق سېلىڭلار»،— دېگەن ئاۋاز ئاڭلاندى.
6 شاگىرتلار بۇنى ئاڭلاپ، ئىنتايىن قورقۇشۇپ يەرگە دۈم يىقىلدى.
7 شۇنىڭ بىلەن، ئەيسا ئۇلارنىڭ يېنىغا كېلىپ، ئۇلارغا قولىنى تەگكۈزۈپ: «ئورنىڭلاردىن تۇرۇڭلار، قورقماڭلار!»،— دېدى.
8 ئۇلار بېشىنى كۆتۈرۈپ قارىۋىدى، ئەيسادىن باشقا ھېچكىمنى كۆرمىدى.
9 ئۇلار تاغدىن چۈشۈۋاتقاندا، ئەيسا ئۇلارغا: «ئىنسانئوغلى ئۆلۈمدىن تىرىلدۈرۈلمىگۈچە، كۆرگەنلىرىڭلارنى ھېچكىمگە ئېيتماڭلار»،— دەپ بۇيرۇق قىلدى.
10 بىراق، شاگىرتلار ئەيسادىن: «نېمە ئۈچۈن تەۋرات ئۇستازلىرى ئاۋۋال ئىلياس پەيغەمبەر كېلىشى كېرەك دەيدۇ؟»،— دەپ سورىدى.
11 ئەيسا جاۋاب بېرىپ مۇنداق دېدى: «شۇنداق، ئىلياس ئاۋۋال كېلىپ، ھەممە نەرسىنى ئەسلىگە كەلتۈرىدۇ.
12 ئەمما سىلەرگە ئېيتىپ قويايكى، ئىلياس پەيغەمبەر ئاللىقاچان كەلدى، لېكىن كىشىلەر ئۇنى تونۇمىدى ۋە ئۇنىڭغا نېمە قىلىشنى خالىسا، شۇنى قىلدى. خۇددى شۇنىڭدەك، ئىنسانئوغلىمۇ ئۇلارنىڭ قولىدا ئازاب-ئوقۇبەت چېكىدۇ».
13 شۇ چاغدا، شاگىرتلار ئەيسانىڭ ئادەملەرنى سۇغا چۆمۈلدۈرۈپ يۈرگەن يەھيا پەيغەمبەر ھەققىدە سۆز قىلغانلىقىنى چۈشەندى.
14 ئۇلار خالايىق توپلاشقان يەرگە كەلگەندە، بىر كىشى ئەيسانىڭ ئالدىغا كېلىپ تىزلىنىپ، مۇنداق دېدى:
15 «ھەزرىتىم، ئوغلۇمغا رەھىم-شەپقەت قىلغايسىز، چۈنكى ئۇنىڭ تۇتقاقلىق كېسىلى بار. ئۇ ئىنتايىن قىينىلىپ كەتتى. دائىم ئوتقا ۋە سۇغا چۈشۈپ كېتىدۇ.
16 مەن ئۇنى شاگىرتلىرىڭىزنىڭ ئالدىغا ئېلىپ كەلدىم، بىراق ئۇلار ئۇنى ساقايتالمىدى».
17 ئەيسا ئۇنىڭغا جاۋابەن: «ئەي ئىشەنچى ئاجىز ئەۋلاد! قاچانغىچە مەن سىلەر بىلەن بىللە بولۇشۇم كېرەك؟ قاچانغىچە چىداپ تۇرۇشۇم كېرەك؟ بالىنى ئالدىمغا ئېلىپ كېلىڭلار»،— دېدى.
18 ئەيسا جىنغا بۇيرۇق قىلدى، جىن بالىدىن چىقىپ كەتتى. بالىمۇ شۇ ھامان ساقايدى.
19 ئاندىن، شاگىرتلار ئەيسانىڭ ئالدىغا كېلىپ: «نېمە ئۈچۈن بىز جىننى قوغلاپ چىقىرالمىدۇق؟»،— دەپ سورىدى.
20 ئۇ شاگىرتلىرىغا: «ئىشەنچىڭلار ئاجىز بولغانلىقى ئۈچۈن. سىلەرگە ھەقنى ئېيتىپ قويايكى، ئەگەر سىلەردە قىچا ئۇرۇقىدەك كىچىككىنە ئىمان بولسا، بۇ تاغقا: ‹بۇ يەردىن ئۇ يەرگە كۆچكىن› دېسەڭلار، ئۇ كۆچىدۇ ۋە قولۇڭلاردىن كەلمەيدىغان ھېچقانداق ئىش بولمايدۇ»،— دېدى.
21 — —
22 شاگىرتلار جەلىلىيىدە جەم بولغاندا، ئەيسا ئۇلارغا: «ئىنسانئوغلىغا ساتقۇنلۇق قىلىنىپ، ئۇ ئادەملەرنىڭ قولىغا تۇتۇپ بېرىلىدۇ
23 ۋە ئۇلار ئۇنى ئۆلتۈرىدۇ. ئۈچىنچى كۈنى ئۇ تىرىلىدۇ»،— دېدى. بۇنى ئاڭلاپ، شاگىرتلار غەم-قايغۇغا پاتتى.
24 ئۇلار كەپەرناھۇمغا كەلگەندىن كېيىن، ئىككى دراخما* باجنى يىغقۇچىلار پېترۇسنىڭ ئالدىغا كېلىپ: «ئۇستازىڭلار ئىككى دراخما باجنى تاپشۇرامدۇ؟»،— دەپ سورىدى.
25 پېترۇس: «تاپشۇرىدۇ»،— دېدى. ئۇ ئۆيگە كىرگەندە، ئەيسا ئاۋۋال ئۇنىڭدىن: «سىمۇن، سېنىڭچە بۇ دۇنيادىكى پادىشاھلار كىملەردىن باج ئالىدۇ؟ ئۆز ئوغۇللىرىدىنمۇ ياكى باشقىلاردىنمۇ؟»،— دەپ سورىدى.
26 پېترۇس: «باشقىلاردىن»،— دېدى. ئەيسا ئۇنىڭغا: «دېمەك، ئوغۇللار باج تاپشۇرمايدۇ.
27 بىراق، باجگىرلارنىڭ چىشىغا تەگمەيلى*، سەن دېڭىزغا بېرىپ، قارماقنى تاشلا، بىرىنچى بولۇپ تۇتقان بېلىقنىڭ ئاغزىنى ئاچساڭ، بىر كۈمۈش تەڭگە* چىقىدۇ، ئۇنى ئېلىپ ئىككىمىز ئۈچۈن ئۇلارغا بەرگىن»،— دېدى.
بەت ئاستى قۇشۇمچە ئىزاھاتلىرى
^ سۆزمۇ-سۆز: «باجگىرلارغا پۇتلىكاشاڭ بولمايلى».
^ سۆزمۇ-سۆز: «سىتاتىر»؛ تېترا دراخما دەپمۇ ئاتالغان.
