مەتتا كىتابى 18:1—35
18 شۇ چاغدا، شاگىرتلار ئەيسانىڭ يېنىغا كېلىپ: «خۇدا پادىشاھلىقىدا* كىم ئەڭ ئۇلۇغ؟»،— دەپ سورىدى.
2 ئەيسا يېنىغا بىر كىچىك بالىنى چاقىرتىپ، ئۇنى ئۇلارنىڭ ئوتتۇرىسىدا تۇرغۇزۇپ مۇنداق دېدى:
3 «سىلەرگە ھەقنى ئېيتىپ قويايكى، يامان يوللىرىڭلاردىن يېنىپ، كىچىك بالىلاردەك بولمىساڭلار، خۇدا پادىشاھلىقىغا ھەرگىزمۇ كىرەلمەيسىلەر.
4 شۇنىڭ ئۈچۈن، كىمكى ئۆزىنى كىچىك بالىلاردەك كەمتەر تۇتسا، ئۇ خۇدا پادىشاھلىقىدا ئەڭ ئۇلۇغ بولىدۇ.
5 شۇنىڭدەك، كىمكى مېنىڭ ئىسىمىم ئۈچۈن شۇنداق كىچىك بالىنى قوبۇل قىلسا، مېنى قوبۇل قىلغان بولىدۇ.
6 لېكىن، كىمكى ماڭا ئىشەنگەن بۇ كىچىكلەرنىڭ بىرىنى گۇناھقا ئازدۇرسا*، ئۇنىڭ بوينىغا تۈگمەن تېشىنى ئېسىپ، چوڭقۇر دېڭىزغا چۆكتۈرۈۋېتىلسە، بۇ ئۇنىڭ ئۈچۈن ياخشىراقتۇر.
7 ئىنسانلارنى گۇناھقا ئازدۇرغان* بۇ دۇنيا كىشىلىرىنىڭ ھالىغا ۋاي! ئەلۋەتتە، دۇنيادا گۇناھقا ئازدۇرىدىغان ئىشلار بار، ئەمما كىمكى باشقىلارنىڭ گۇناھ قىلىشىغا سەۋەبچى بولسا، شۇ كىشىنىڭ ھالىغا ۋاي!
8 ئەگەر قولۇڭ ياكى پۇتۇڭ سېنىڭ گۇناھ قىلىشىڭغا سەۋەبچى بولسا، ئۇنى كېسىپ تاشلىغىن. ئىككى قولۇڭ ياكى ئىككى پۇتۇڭ بىلەن مەڭگۈلۈك ئوتقا تاشلانغاندىن كۆرە، چولاق ياكى توكۇر بولۇپ ھاياتلىققا ئېرىشكىنىڭ ياخشىراقتۇر.
9 خۇددى شۇنىڭدەك، كۆزۈڭ سېنىڭ گۇناھ قىلىشىڭغا سەۋەبچى بولسا، ئۇنى ئويۇپ تاشلىغىن. ئىككى كۆزۈڭ بار ھالەتتە كۆيۈپ تۇرغان گەھەنناغا* تاشلانغاندىن كۆرە، بىرلا كۆزۈڭ بىلەن ھاياتقا ئېرىشكىنىڭ ياخشىراقتۇر.
10 ئېھتىيات قىلىڭلار، بۇ كىچىكلەرنىڭ ھېچبىرىگە سەل قارىماڭلار، چۈنكى سىلەرگە ئېيتىپ قويايكى، ئاسماندا ئۇلارنىڭ پەرىشتىلىرى ھەمىشە ئاسماندىكى ئاتامنىڭ يۈزىنى كۆرۈپ تۇرىدۇ.
11 — —
12 ئويلاپ كۆرۈڭلارچۇ، بىر ئادەمنىڭ 100 قويى بولسا ۋە ئۇلاردىن بىرى يولدىن ئادىشىپ قالسا، بۇ ئادەم 99 قويىنى تاغلارغا تاشلاپ قويۇپ، شۇ ئادىشىپ قالغان بىرىنى ئىزدەپ كەتمەمدۇ؟
13 سىلەرگە شۇنى ئېيتىپ قويايكى، ئەگەر شۇ كىشى ئاشۇ ئاداشقان قويىنى تېپىۋالسا، ئاداشمىغان 99 قويىغا قارىغاندا شۇ بىر قويى ئۈچۈن ئىنتايىن خۇشال بولىدۇ.
14 خۇددى شۇنىڭدەك، ئاسماندىكى ئاتاممۇ بۇ كىچىكلەرنىڭ ھېچبىرىنىڭ ھالاك بولۇشىنى خالىمايدۇ.
15 ئەگەر قېرىندىشىڭ گۇناھ قىلىپ قويسا، ئۇنىڭ بىلەن يۈزمۇ-يۈز كۆرۈشۈپ خاتالىقىنى كۆرسىتىپ بەرگىن. ئەگەر ئۇ سېنى تىڭشىسا، قېرىندىشىڭنى توغرا يولغا سالغان بولىسەن.
16 لېكىن، ئۇ تىڭشىمىسا، ئۆزۈڭ بىلەن بىر-ئىككى كىشىنى بىرگە ئېلىپ بارغىن. چۈنكى، ھەرقانداق ئىش ئىككى ياكى ئۈچ گۇۋاھچىنىڭ سۆزلىرى بىلەن تەستىقلىنىشى كېرەك.
17 ئەگەر ئۇ ئۇلارنىمۇ تىڭشىمىسا، جامائەتكە ئېيتقىن. جامائەتنىمۇ تىڭشىمىسا، ئۇ كىشى سەن ئۈچۈن ياتئەل خەلقلىرىدەك ياكى بىر باجگىردەك بولسۇن.
18 سىلەرگە ھەقنى ئېيتىمەنكى، يەر يۈزىدە نېمىنى باغلىساڭلار، ئۇ ئاسماندا ئاللىقاچان باغلىنىپ بولغان بولىدۇ ۋە يەر يۈزىدە نېمىنى يەشسەڭلار، ئۇ ئاسماندا ئاللىقاچان يېشىلىپ بولغان بولىدۇ.
19 يەنە سىلەرگە ھەقنى ئېيتىمەنكى، يەر يۈزىدە ئاراڭلاردىكى ئىككى كىشى بىر نىيەت بىر مەقسەتتە مۇھىم بىر نەرسىنى تىلەپ دۇئا قىلسا، ئاسماندىكى ئاتام ئۇلارنىڭ تىلىگەنلىرىنى ئەمەلگە ئاشۇرىدۇ.
20 چۈنكى، قەيەردە ئىككى ياكى ئۈچ كىشى مېنىڭ ئىسىمىم بىلەن جەم بولسا، مەنمۇ شۇ يەردە ئۇلارنىڭ ئارىسىدا بولىمەن».
21 شۇ چاغدا، پېترۇس ئەيسانىڭ ئالدىغا كېلىپ: «ئۇستاز، قېرىندىشىم ماڭا قارشى گۇناھ قىلسا، ئۇنى قانچە قېتىم كەچۈرۈشۈم كېرەك؟ يەتتە قېتىممۇ؟»،— دەپ سورىدى.
22 ئەيسا ئۇنىڭغا مۇنداق دېدى: «ساڭا ئېيتىپ قويايكى، يەتتە ئەمەس، 77 قېتىم.
23 شۇنىڭ ئۈچۈن، خۇدا پادىشاھلىقىنى ئۆز قۇللىرىدىن قەرزلەرنى قايتۇرۇپ ئالىدىغان بىر پادىشاھقا ئوخشىتىشقا بولىدۇ.
24 پادىشاھ قەرزلەرنى قايتۇرۇپ ئېلىشقا باشلىغاندا، ئۇنىڭ ئالدىغا 000.10 تالانت قەرز بولغان بىر كىشى كەلتۈرۈلۈپتۇ.
25 ئەمما، ئۇنىڭ قەرزىنى تۆلەشكە كۈچى يەتمىگەچكە، پادىشاھ ئۇنىڭغا ئۆزى، خوتۇنى، بالا-چاقىلىرى ۋە بارچە نەرسىلىرىنى سېتىپ، قەرزىنى قايتۇرۇشنى بۇيرۇپتۇ.
26 ئاشۇ قۇل يەرگە يىقىلىپ، پادىشاھنىڭ ئالدىدا تىزلىنىپ، ئۇنىڭغا: ‹سەۋر قىلىپ تۇرسىڭىز، مەن قەرزىمنى چوقۇم تۆلەيمەن›،— دەپ يالۋۇرۇپتۇ.
27 پادىشاھنىڭ ئاشۇ قۇلغا ئىچى ئاغرىپ، قەرزىنى كەچۈرۈم قىلىپ، ئۇنى قويۇپ بېرىپتۇ.
28 لېكىن، ئاشۇ قۇل سىرتقا چىقىپ، ئۆزىگە 100 دىنار* قەرز بولغان باشقا قۇلنى ئىزدەپ تېپىپ، ئۇنى تۇتۇۋېلىپ، بوينىنى سىقىپ: ‹قەرزىڭنى تۆلە›،— دەپتۇ.
29 شۇنىڭ بىلەن، بۇ قۇل تىزلىنىپ: ‹سەۋر قىلىپ تۇرغىن، مەن قەرزىمنى چوقۇم تۆلەيمەن›،— دەپ يالۋۇرۇپتۇ.
30 لېكىن، ئۇ ئۇنىڭ يالۋۇرۇشىغا قۇلاق سالماي: ‹قەرزنى پۈتۈنلەي قايتۇرمىغۇچە زىنداندا ياتىسەن›،— دەپ ئۇنى زىندانغا تاشلىتىپتۇ.
31 باشقا قۇللار نېمە ئىش بولغانلىقىنى كۆرۈپ، كۆڭلى قاتتىق بىئارام بولۇپ،بېرىپ پادىشاھقا بولغان ۋەقەنى ئېيتىپتۇ.
32 شۇنىڭ بىلەن، پادىشاھ ھېلىقى قۇلنى چاقىرتىپ: ‹ئەي رەزىل قۇل، سەن ماڭا يالۋۇرغاندا، پۈتۈن قەرزىڭنى كەچۈرۈم قىلدىم.
33 مەن ساڭا رەھىم-شەپقەت كۆرسەتكەندەك، سەنمۇ ئۆزۈڭگە ئوخشاش بىر قۇلغا رەھىم-شەپقەت كۆرسىتىشىڭ كېرەك ئەمەسمىدى؟›،— دەپتۇ.
34 پادىشاھ قاتتىق ئاچچىقلىنىپ، پۈتۈن قەرزىنى تۆلەپ تۈگەتمىگۈچە، ئۇنى زىندان باشقۇرغۇچىلارنىڭ قولىغا تاپشۇرۇپ بېرىپتۇ.
35 شۇنىڭغا ئوخشاش، ئەگەر قايسىڭلار قېرىندىشىڭلارنى چىن كۆڭلۈڭلاردىن كەچۈرمىسەڭلار، ئاسماندىكى ئاتاممۇ سىلەرگە شۇنداق مۇئامىلە قىلىدۇ».
بەت ئاستى قۇشۇمچە ئىزاھاتلىرى
^ سۆزمۇ-سۆز: «ئاسمان پادىشاھلىقىدا».
^ سۆزمۇ-سۆز: «بىرىگە پۇتلكاشاڭ بولسا».
^ سۆزمۇ-سۆز: «ئىنسانلارغا پۈتلىكاشاڭ تاشلار بولغان».
