مەتتا كىتابى 2:1—23
2 ھىرود* پادىشاھنىڭ كۈنلىرىدە يەھۇدىيە ئۆلكىسىنىڭ بەيتلەھەم دېگەن يېزىسىدا ئەيسا تۇغۇلدى. شۇ چاغدا، شەرقتىن يېرۇسالېمغا مۇنەججىملەر* كېلىپ:
2 يەھۇدىيلارنىڭ يېڭى تۇغۇلغان پادىشاھى قەيەردە؟ بىز شەرقتە ئۇنىڭ يۇلتۇزىنى كۆرۈپ، ئۇنىڭغا ھۆرمەت-ئېھتىرام بىلدۈرۈشكە* كەلدۇق»،— دېيىشتى.
3 بۇنى ئاڭلاپ، پادىشاھ ھىرود ۋە پۈتكۈل يېرۇسالېم خەلقى ئالاقزادە بولۇپ كەتتى.
4 ھىرود بارلىق ئالىي روھانىيلار ۋە تەۋرات ئۇستازلىرىنى يىغىپ، ئۇلاردىن مەسىھ* قەيەردە تۇغۇلىدىغانلىقىنى سورىدى.
5 ئۇلار ئۇنىڭغا: «يەھۇدىيەدىكى بەيتلەھەمدە، چۈنكى بۇ توغرىسىدا پەيغەمبەر مۇنداق دەپ يازغان:
6 ‹ئەي، يەھۇدا زېمىنىدىكى بەيتلەھەم، سەن يەھۇدا ھۆكۈمرانلىرىنىڭ نەزىرىدە ئەسلا كىچىك شەھەر ئەمەسسەن، چۈنكى سەندىن بىر ھۆكۈمران چىقىدۇ، ئۇ خەلقىم ئىسرائىلنىڭ پادىچىسى بولىدۇ›»،— دېدى.
7 شۇنىڭ بىلەن، ھىرود مۇنەججىملەرنى مەخپىي چاقىرتىپ، ئۇلاردىن يۇلتۇزنىڭ قاچان پەيدا بولغانلىقىنى سوراپ، ئېنىق ۋاقتىنى بىلىۋالدى.
8 ئاندىن، ئۇلارنى بەيتلەھەمگە ئەۋەتىپ، شۇنداق دېدى: «سىلەر بېرىڭلار، كۆڭۈل قويۇپ بالىنى ئىزدەڭلار. تاپقان ھامان ماڭا خەۋەر قىلىڭلار، مەنمۇ بېرىپ ئۇنىڭغا ھۆرمەت-ئېھتىرام بىلدۈرەي».
9 ئۇلار پادىشاھنىڭ سۆزلىرىنى ئاڭلىغاندىن كېيىن يولغا چىقىشتى. شەرقتە كۆرۈنگەن ئاشۇ يۇلتۇز ئۇلارنىڭ ئالدىدا مېڭىپ، بالا تۇرغان جاينىڭ ئۈستىگە كېلىپ توختىدى.
10 ئۇلار ئاشۇ يۇلتۇزنىڭ توختىغانلىقىنى كۆرۈپ، ئىنتايىن خۇشال بولۇشتى.
11 مۇنەججىملەر ئۆيگە كىرىپ، بالا بىلەن ئانىسى مەريەمنى كۆرۈپ، يەرگە تىزلىنىپ بالىغا ھۆرمەت-ئېھتىرام* بىلدۈرۈشتى. ئاندىن، ئۇلار خەزىنە ساندۇقچىلىرىنى ئېچىپ، ئۇنىڭغا ئالتۇن، مەستىكى*، مۇرمەككى* قاتارلىق سوۋغىلارنى تەغدىم قىلدى.
12 ئەمما، خۇدا ئۇلارنى چۈشىدە ھىرود پادىشاھنىڭ ئالدىغا بارماسلىققا ئاگاھلاندۇرغاچقا، ئۇلار باشقا يول بىلەن ئۆز يۇرتىغا قايتىپ كېتىشتى.
13 مۇنەججىملەر كەتكەندىن كېيىن، يەھۋانىڭ بىر پەرىشتىسى يۈسۈپنىڭ چۈشىدە كۆرۈنۈپ: «ئورنۇڭدىن تۇر! بالىنى ۋە ئانىسىنى ئېلىپ مىسىرغا قاچقىن. مەن ساڭا خەۋەر بەرگۈچە شۇ يەردە تۇرغىن. چۈنكى، ھىرود بالىنى ئىزدەپ تېپىپ ئۆلتۈرمەكچى»،— دېدى.
14 شۇنىڭ بىلەن، يۈسۈپ ئورنىدىن تۇرۇپ، ئانا-بالا ئىككىسىنى ئېلىپ، شۇ كېچىدىلا مىسىرغا قاراپ يولغا چىقتى.
15 ئۇلار ھىرود ئۆلگۈچە شۇ يەردە تۇردى. بۇنىڭ بىلەن، يەھۋانىڭ ئۆز پەيغەمبىرى ئارقىلىق ئالدىن ئېيتقان «مەن ئوغلۇمنى مىسىردىن چاقىردىم» دېگەن سۆزى ئەمەلگە ئاشۇرۇلدى.
16 ھىرود ئۆزىنىڭ مۇنەججىملەر تەرىپىدىن ئالدانغانلىقىنى بىلىپ، قاتتىق غەزەپلەندى. ئۇ مۇنەججىملەرنىڭ ئېيتقانلىرى بويىچە بوۋاقنىڭ يېشىنى ھېسابلاپ چىقىپ، بەيتلەھەم ۋە ئۇنىڭ ئەتراپىدىكى ئىككى ياش ۋە ئۇنىڭدىن تۆۋەن ياشتىكى ئوغۇل بالىلارنىڭ ھەممىسىنى ئۆلتۈرۈش ھەققىدە بۇيرۇق چۈشۈردى.
17 بۇنىڭ بىلەن، يەرەمىيا پەيغەمبەر ئارقىلىق ئېيتىلغان مۇنۇ سۆزلەر ئەمەلگە ئاشۇرۇلدى:
18 «راما شەھىرىدە يىغا-زار، نالە-پەرياد ئاۋازى ئاڭلاندى، راھىلە بالىلىرى ئۈچۈن قان يىغلىدى. ئۇ ھېچكىمنىڭ تەسەللىسىگە قۇلاق سالمىدى، چۈنكى ئۇنىڭ بالىلىرى يوق ئەمدى».
19 ھىرود ئۆلگەندىن كېيىن، مىسىردا يەھۋانىڭ بىر پەرىشتىسى يۈسۈپنىڭ چۈشىدە كۆرۈنۈپ:
20 «ئورنۇڭدىن تۇر! بالا بىلەن ئانىسىنى ئېلىپ ئىسرائىل يۇرتىغا قايتقىن. چۈنكى، بالىنىڭ جېنىنى ئالماقچى بولغانلار ئۆلدى»،— دېدى.
21 بۇنىڭ بىلەن، يۈسۈپ ئورنىدىن تۇرۇپ، بالا بىلەن ئانىسىنى ئېلىپ ئىسرائىل يۇرتىغا قايتتى.
22 بىراق، يۈسۈپ ھىرودنىڭ ئوغلى ئارخېلائۇسنىڭ يەھۇدىيە ئۆلكىسىدە ھۆكۈمرانلىق قىلىۋاتقانلىقىنى ئاڭلاپ، قايتىشتىن قورقتى. ئۇ يەنە چۈشىدە خۇدادىن كەلگەن ئاگاھلاندۇرۇش بويىچە جەلىلىيە ئۆلكىسىگە كېتىپ قالدى.
23 ئۇ ناسىرە دېگەن شەھەرگە بېرىپ، شۇ يەرگە جايلاشتى. بۇنىڭ بىلەن، پەيغەمبەرلەرنىڭ «ئۇ ناسىرەلىك دەپ ئاتىلىدۇ» دېگەن سۆزلىرى ئەمەلگە ئاشۇرۇلدى.
