مەتتا كىتابى 21:1—46
-
ئەيسانىڭ يېرۇسالېمغا شان-شەرەپ بىلەن كىرىشى (1–11)
-
ئەيسانىڭ ئىبادەتخانىنى تازىلىشى (12–17)
-
ئەنجۈر دەرىخىنىڭ لەنەتكە ئۇچرىشى (18–22)
-
ئەيسانىڭ ھوقۇقىدىن گۇمانلىنىش (23–27)
-
ئىككى ئوغۇل توغرۇلۇق تەمسىل (28–32)
-
رەزىل ئىجارىكەشلەر توغرۇلۇق تەمسىل (33–46)
-
بۇرجەك تاشنى رەت قىلىش (42)
-
21 ئۇلار يېرۇسالېمغا يېقىنلىشىپ، زەيتۇن تېغىدىكى بەيتپاجىغا كەلگەندە، ئەيسا ئىككى شاگىرتىنى ئەۋەتىپ،
2 ئۇلارغا مۇنداق دېدى: «سىلەر ئالدىمىزدا كۆرۈنۈپ تۇرغان يېزىغا بېرىڭلار، شۇ يەردە باغلاقلىق بىر ئېشەك بىلەن ئۇنىڭ يېنىدىكى تەخەينى كۆرىسىلەر. ئۇلارنى يېشىپ، ئالدىمغا يېتىلەپ كېلىڭلار.
3 ئەگەر بىرى سىلەرگە بىر نېمە دېسە: ‹ئۇستازىمىزنىڭ بۇلارغا ئېھتىياجى چۈشتى› دەڭلار. شۇندا ئۇ دەرھال ئۇلارنى تۇتۇپ قالماي، قويۇپ بېرىدۇ».
4 ئەمەلىيەتتە، بۇ ۋەقە پەيغەمبەر ئارقىلىق ئېيتىلغان مۇنۇ سۆزلەرنى ئەمەلگە ئاشۇردى:
5 «سىئون قىزىغا مۇنداق دەڭلار: ‹مانا، پادىشاھىڭلار مۇلايىملىق بىلەن ئېشەككە، يەنى يۈك توشۇيدىغان جانىۋارنىڭ بالىسىغا مىنىپ يېنىڭلارغا كېلىۋاتىدۇ›».
6 شاگىرتلار بېرىپ، ئەيسانىڭ بۇيرۇغىنىدەك قىلدى.
7 ئۇلار ئېشەك بىلەن تەخەينى يېتىلەپ كېلىپ، ئۇلارنىڭ ئۈستىگە ئۆز كىيىملىرىنى سالدى ۋە ئەيسا تەخەيگە مىندى.
8 نۇرغۇن كىشىلەر كىيىملىرىنى يولغا پايانداز قىلىپ سالدى، بەزىلىرى دەرەخ شاخلىرىنى كېسىپ يولغا يايدى.
9 ئۇنىڭ ئالدىدا ماڭغان ۋە كەينىدىن ئەگەشكەن خالايىق: «ئەي خۇدا، داۋۇتنىڭ ئەۋلادىنى قۇتقۇزغايسەن! يەھۋانىڭ ئىسىمى بىلەن كەلگەن كىشىگە مۇبارەك بولسۇن! ئاسماندىكى خۇدا، ئۇنى قۇتقۇزغايسەن!»،— دەپ ۋارقىراشتى.
10 ئەيسا يېرۇسالېمغا كىرگەندە، پۈتۈن شەھەر خەلقى تەۋرىنىپ كەتتى. كىشىلەر: «بۇ كىمدۇ؟»،— دەپ سورىشاتتى.
11 خالايىق: «بۇ جەلىلىيەنىڭ ناسىرە شەھىرىدىن بولغان ئەيسا پەيغەمبەر»،— دەپ جاۋاب بېرىشەتتى.
12 ئەيسا ئىبادەتخانىغا كىرىپ، شۇ يەردە ئېلىم-سېتىم قىلىۋاتقانلارنىڭ ھەممىسىنى قوغلاپ چىقاردى. ئۇ پۇل تېگىشىدىغانلارنىڭ ئۈستەللىرىنى ۋە كەپتەر ساتقۇچىلارنىڭ ئورۇندۇقلىرىنى ئۆرۈپ تاشلىۋەتتى.
13 ئۇلارغا: «مۇقەددەس يازمىلاردا: ‹مېنىڭ ئۆيۈم دۇئا-تىلاۋەتخانا دەپ ئاتىلىدۇ› دېگەن سۆزلەر يېزىلغان. لېكىن، سىلەر ئۇنى بۇلاڭچىلارنىڭ ئۇۋىسىغا ئايلاندۇرۇۋاتىسىلەر»،— دېدى.
14 ئىبادەتخانىدا قارىغۇ ۋە توكۇرلار ئەيسانىڭ ئالدىغا كەلدى ۋە ئۇ ئۇلارنى ساقايتتى.
15 ئالىي روھانىيلار ۋە تەۋرات ئۇستازلىرى ئۇنىڭ قىلغان مۆجىزىلىرىنى كۆرۈپ ۋە ئىبادەتخانىدا بالىلارنىڭ: «ئەي خۇدا، داۋۇتنىڭ ئەۋلادىنى قۇتقۇزغايسەن!»،— دەپ ۋارقىرىشىۋاتقانلىقىنى ئاڭلاپ غەزەپلەندى.
16 ئۇلار ئەيساغا: «بۇ بالىلارنىڭ نېمە دەۋاتقانلىقىنى ئاڭلاۋاتامسەن؟»،— دېدى. ئەيسا ئۇلارغا: «ئاڭلاۋاتىمەن، سىلەر مۇقەددەس يازمىلاردىن ‹كىچىك بالىلار ۋە بوۋاقلارنىڭ ئېغىزىدىن ئۆزۈڭگە مەدھىيىلەر ئوقۇتتۇڭ› دېگەن سۆزلەرنى ئوقۇمىغانمۇ؟»،— دېدى.
17 ئاندىن كېيىن، ئەيسا ئۇلاردىن ئايرىلىپ، شەھەردىن چىقىپ بەيتانىياغا باردى ۋە كېچىنى شۇ يەردە ئۆتكۈزدى.
18 ئەتىسى ئەتىگەندە ئەيسا شەھەرگە قايتىپ كېلىۋاتقاندا، قورسىقى ئاچتى.
19 ئۇ يول بويىدىكى بىر تۈپ ئەنجۈر دەرىخىنى كۆرۈپ، ئۇنىڭ يېنىغا باردى. دەرەختە يوپۇرماقتىن باشقا ھېچ نەرسىنى تاپالماي، دەرەخكە قاراپ: «بۇنىڭدىن كېيىن مەڭگۈ مېۋە بەرمىگەيسەن»،— دېدى. ئەنجۈر دەرىخى شۇئان قۇرۇپ كەتتى.
20 بۇنى كۆرگەن شاگىرتلار ھاڭ-تاڭ بولۇپ: «ئەنجۈر دەرىخى قانداقلارچە تېزلا قۇرۇپ كەتتى؟»،— دەپ سوراشتى.
21 ئەيسا ئۇلارغا مۇنداق جاۋاب قايتۇردى: «سىلەرگە ھەقنى ئېيتىپ قويايكى، ئەگەر ئىشەنچىڭلار بولسا ۋە گۇمان قىلمىساڭلار، مەن ئەنجۈر دەرىخىگە قىلغاننى سىلەرمۇ قىلىپلا قالماي، ھەتتا بۇ تاغقا: ‹قوزغال، دېڭىزغا تاشلان!› دېسەڭلار، دېگىنىڭلاردەك بولىدۇ.
22 ئىشەنچ بىلەن دۇئا قىلىڭلار، تىلىگەنلىرىڭلارنىڭ ھەممىسىگە ئېرىشىسىلەر».
23 ئەيسا ئىبادەتخانىغا كىرىپ، كىشىلەرگە تەلىم بېرىۋاتاتتى. ئالىي روھانىيلار ۋە خەلق ئاقساقاللىرى ئۇنىڭ ئالدىغا كېلىپ: «سەن بۇ ئىشلارنى قايسى ھوقۇققا تايىنىپ قىلىۋاتىسەن؟ ساڭا بۇ ھوقۇقنى كىم بەردى؟»،— دەپ سوراشتى.
24 ئەيسا جاۋاب بېرىپ مۇنداق دېدى: «مەنمۇ سىلەردىن بىر ئىشنى سوراپ باقاي، ئەگەر ماڭا ئېيتىپ بەرسەڭلار، مەنمۇ بۇ ئىشلارنى قايسى ھوقۇققا تايىنىپ قىلىدىغانلىقىمنى ئېيتىپ بېرىمەن.
25 يەھيا پەيغەمبەرگە چۆمۈلدۈرۈش ھوقۇقىنى كىم بەرگەن؟ ئاسماندىكى خۇدامۇ ياكى ئىنسانلارمۇ؟» ئۇلار ئۆزئارا مەسلىھەتلىشىپ: «ئەگەر خۇدا بەرگەن دېسەك، ئۇ بىزگە: ‹ئۇنداقتا، سىلەر نېمە ئۈچۈن ئۇنىڭغا ئىشەنمىدىڭلار؟›،— دەيدۇ.
26 بىراق، ‹ئىنسانلار بەرگەن› دېسەك، بىز خەلقتىن قورقىمىز، چۈنكى ئۇلار يەھيانى پەيغەمبەر دەپ قارايدۇ»،— دېيىشتى.
27 بۇنىڭ بىلەن، ئۇلار ئەيساغا: «بىلمەيمىز»،— دەپ جاۋاب بېرىشتى. ئەيسامۇ ئۇلارغا: «ئۇنداقتا، مەنمۇ بۇ ئىشلارنى قايسى ھوقۇققا تايىنىپ قىلىۋاتقانلىقىمنى ئېيتمايمەن»،— دېدى.
28 «سىلەر بۇنىڭغا قانداق قارايسىلەر؟ بىر ئادەمنىڭ ئىككى ئوغلى بار ئىكەن. ئۇ بىرىنچىسىگە: ‹ئوغلۇم، بۈگۈن سەن ئۈزۈمزارلىققا بېرىپ ئىشلىگىن›،— دەپتۇ.
29 بۇ ئوغۇل: ‹بارمايمەن›،— دەپ جاۋاب بېرىپتۇ. لېكىن، ئۇ كېيىنرەك پۇشايمان قىپتۇ ۋە بېرىپتۇ.
30 ئۇ ئادەم ئىككىنچى ئوغلىغىمۇ شۇنداق دەپتۇ، بۇ ئوغلى: ‹ماقۇل دادا، مەن باراي›،— دەپتۇيۇ، لېكىن بارماپتۇ.
31 بۇ ئىككىسىدىن قايسىسى ئاتىسىنىڭ ئىرادىسى بويىچە ئىش قىلدى؟». ئۇلار: «بىرىنچى ئوغلى»،— دەپ جاۋاب بەردى. ئەيسا ئۇلارغا: «سىلەرگە ھەقنى ئېيتىپ قويايكى، باجگىرلار ۋە پاھىشىلەر خۇدا پادىشاھلىقىغا سىلەردىن ئاۋۋال كىرىدۇ.
32 چۈنكى، يەھيا كېلىپ، سىلەرگە ھەققانىيەت يولىنى كۆرسەتكەن بولسىمۇ، سىلەر ئۇنىڭغا ئىشەنمىدىڭلار. لېكىن، باجگىرلار بىلەن پاھىشىلەر ئۇنىڭغا ئىشەندى. ھەتتا سىلەر بۇنى كۆرۈپ تۇرۇپمۇ توۋا قىلمىدىڭلار ۋە ئۇنىڭغا ئىشەنمىدىڭلار»،— دېدى.
33 «يەنە بىر تەمسىلنى ئاڭلاڭلار: بىر يەر ئىگىسى بار ئىكەن. ئۇ ئۈزۈمزارلىق بەرپا قىلىپ، ئەتراپىنى قورشاپتۇ. ئۈزۈمزارلىققا شاراب كۆلچىكى قازدۇرۇپتۇ ۋە بىر مۇنار ياسىتىپتۇ. كېيىن، ئاشۇ ئۈزۈمزارلىقنى باغۋەنلەرگە ئىجارىگە بېرىپ، ئۆزى يىراق بىر يۇرتقا كېتىپتۇ.
34 ھوسۇل يىغىش پەيتى كەلگەندە، مېۋىلەرنى ئۈزۈپ كېلىش ئۈچۈن ئۆز قۇللىرىنى ئىجارىكەشلەرنىڭ ئالدىغا ئەۋەتىپتۇ.
35 لېكىن، ئىجارىكەشلەر ئۇنىڭ قۇللىرىنى تۇتۇۋېلىپ، بىرىنى ئۇرۇپ-سوقۇپتۇ، بىرىنى ئۆلتۈرۈۋېتىپتۇ، يەنە بىرىنى چالما-كېسەك قىلىپتۇ.
36 ئۈزۈمزارلىقنىڭ ئىگىسى بۇ قېتىم ئىلگىرىكىگە قارىغاندا تېخىمۇ كۆپرەك قۇللىرىنى ئەۋەتىپتۇ، بىراق ئىجارىكەشلەر ئۇلارغىمۇ شۇنداق مۇئامىلە قىلىپتۇ.
37 ئاخىرىدا، ئۇ: ‹ئۇلار ئوغلۇمنى ھۆرمەت قىلار› دەپ، ئۆز ئوغلىنى ئىجارىكەشلەرنىڭ ئالدىغا ئەۋەتىپتۇ.
38 لېكىن، ئۇنىڭ ئوغلىنى كۆرگەن ئىجارىكەشلەر ئۆزئارا مەسلىھەتلىشىپ: ‹بۇ مىراسخور؛ كېلىڭلار، ئۇنى ئۆلتۈرۈۋېتىپ، مىراسىنى ئېلىۋالايلى›،— دېيىشىپتۇ.
39 ئۇلار ئۇنى تۇتۇپ، ئۈزۈمزارلىقنىڭ سىرتىغا سۆرەپ چىقىپ، ئۆلتۈرۈۋېتىپتۇ.
40 بۇنداق ئەھۋالدا ئۈزۈمزارلىقنىڭ ئىگىسى كەلگەندە، ئۇ ئىجارىكەشلەرنى نېمە قىلىدۇ؟»
41 ئۇلار ئەيساغا: «بۇ ئىجارىكەشلەر رەزىل بولغاچقا، ئۇلار پۈتۈنلەي يوقىتىلىدۇ ۋە ئۈزۈمزارلىقنى ئۆز ۋاقتىدا مېۋىلىرىنى تاپشۇرىدىغان باشقا كىشىلەرگە ئىجارىگە بېرىدۇ»،— دەپ جاۋاب بېرىشتى.
42 ئەيسا ئۇلارغا مۇنداق دېدى: «مۇقەددەس يازمىلاردىكى مۇنۇ سۆزلەرنى ئوقۇمىغانمۇ؟ ‹قۇرۇلۇشچىلار تاشلاۋەتكەن تاش قۇرۇلۇشنىڭ بۇرجەك تېشى بولۇپ قالدى. بۇ بىزنىڭ كۆزىمىزدە ھەقىقەتەن ئاجايىپ بىر مۆجىزىدۇر. بۇنى قىلغان يەھۋادۇر›.
43 شۇنىڭ ئۈچۈن، سىلەرگە ئېيتىپ قويايكى، خۇدا پادىشاھلىقى سىلەردىن تارتىۋېلىنىپ، مېۋە بېرىدىغان باشقا خەلققە بېرىلىدۇ.
44 بۇنىڭدىن باشقا، بۇ تاشنىڭ ئۈستىگە يىقىلغان كىشى پارچە-پارچە بولۇپ كېتىدۇ. تاش كىمنىڭ ئۈستىگە چۈشسە، ئۇنى ئېزىپ تاشلايدۇ».
45 ئالىي روھانىيلار ۋە پەرىسىيلەر تەمسىللەرنى ئاڭلاپ، ئەيسانىڭ ئۆزلىرى توغرۇلۇق ئېيتقانلىقىنى چۈشەندى.
46 گەرچە ئۇلار ئەيسانى تۇتۇشنى ئويلىغان بولسىمۇ، ئۇلار خەلقتىن قورقاتتى، چۈنكى خەلق ئەيسانى پەيغەمبەر دەپ قارايتتى.
