مەتتا كىتابى 23:1—39
23 شۇ چاغدا، ئەيسا خالايىققا ۋە ئۆز شاگىرتلىرىغا مۇنداق دېدى:
2 «تەۋرات ئۇستازلىرى ۋە پەرىسىيلەر مۇسا پەيغەمبەرنىڭ ئورنىغا ئولتۇرۇۋالدى.
3 شۇڭا، ئۇلارنىڭ سىلەرگە ئېيتقانلىرىنىڭ ھەممىسىنى قىلىڭلار، لېكىن قىلغانلىرىنى قىلماڭلار. چۈنكى، ئۇلار ئېيتىپلا قويىدۇ، ئەمما ئۆزلىرى قىلمايدۇ.
4 ئۇلار ئېغىر يۈكلەرنى باغلاپ، ئادەملەرنىڭ يەلكىسىگە ئارتىپ قويىدۇ. لېكىن ئۇلار بۇ يۈكلەرگە قولىنىڭ ئۇچىنى تەگكۈزۈپ قويۇشنىمۇ خالىمايدۇ.
5 ئۇلار ھەممە ئىشلارنى باشقىلارغا كۆز-كۆز قىلىش ئۈچۈن قىلىدۇ. ئۇلار تۇماردەك ئېسىۋالغان ئايەت قۇتىلىرىنى چوڭراق ۋە كىيىملىرىنىڭ ئېتەكلىرىدىكى پۆپۈكلەرنى ئۇزۇنراق قىلىشىپ يۈرىدۇ.
6 ئۇلار زىياپەتلەردە تۆردە ۋە سىناگوگلاردا ئالدىنقى ئورۇنلاردا ئولتۇرۇشقا ئامراق،
7 كىشىلەرنىڭ بازار مەيدانلىرىدا سالام بېرىشىنى ۋە ئۇلارنىڭ ئۆزلىرىنى «ئۇستاز»* دەپ ئاتىشىنى ياخشى كۆرىدۇ.
8 بىراق، سىلەر «ئۇستاز» دەپ ئاتىلىشقا كۆنمەڭلار، چۈنكى سىلەرنىڭ پەقەت بىرلا ئۇستازىڭلار بار، سىلەر ھەممىڭلار بىر-بىرىڭلارغا قېرىنداش.
9 يەر يۈزىدە ھېچكىمنى «ئاتا» دەپ ئاتىماڭلار، چۈنكى سىلەرنىڭ بىرلا ئاتاڭلار بار ۋە ئۇ ئاسماندىدۇر.
10 سىلەر رەھبەر دەپ ئاتىلىشقا ھەم كۆنمەڭلار، چۈنكى سىلەرنىڭ پەقەت بىرلا رەھبىرىڭلار بار، ئۇ مەسىھ.
11 ئاراڭلاردا كىم مەرتىۋىلىك بولسا، ئۇ سىلەرنىڭ خىزمەتكارىڭلار بولسۇن.
12 كىمكى باشقىلاردىن ئۆزىنى ئۈستۈن تۇتسا، ئۇ تۆۋەن قىلىنىدۇ، كىمكى ئۆزىنى تۆۋەن تۇتسا، ئۈستۈن قىلىنىدۇ.
13 سىلەرنىڭ ھالىڭلارغا ۋاي، ئەي ساختىپەز تەۋرات ئۇستازلىرى ۋە پەرىسىيلەر! چۈنكى سىلەر ئىنسانلارنىڭ ئالدىدا خۇدا پادىشاھلىقىنىڭ* ئىشىكىنى تاقىدىڭلار، يە ئۆزۈڭلار كىرمەيسىلەر، يە كىرمەكچى بولغانلارنىڭ كىرىشىگە يول قويمايسىلەر.
14 — —
15 سىلەرنىڭ ھالىڭلارغا ۋاي، ئەي ساختىپەز تەۋرات ئۇستازلىرى ۋە پەرىسىيلەر! چۈنكى سىلەر بىر كىشىنى دىنىڭلارغا كىرگۈزۈش ئۈچۈن دېڭىزلاردىن ئۆتۈپ، قۇرۇقلۇقلارنى كېزىپ چىقىسىلەر. ئۇ دىنىڭلارغا كىرسە، سىلەر ئۇنى ئۆزۈڭلاردىن ئىككى ھەسسە ئارتۇقراق گەھەنناغا* تاشلىنىشقا لايىق بىرى قىلىپ يېتىشتۈرىسىلەر.
16 سىلەرنىڭ ھالىڭلارغا ۋاي، ئەي قارىغۇ يولباشچىلار! سىلەر: «كىمكى ئىبادەتخانىنى تىلغا ئېلىپ قەسەم قىلسا، ئۇ قەسەم ھېچنېمىگە ئەرزىمەس، لېكىن كىمكى ئىبادەتخانىدىكى ئالتۇننى تىلغا ئېلىپ قەسەم قىلسا، قەسىمىدە چىڭ تۇرۇشى شەرت»،— دەيسىلەر.
17 سىلەر ئەي ئەخمەق ۋە قارىغۇلار، قايسىسى مۇھىمراق؟ ئالتۇنمۇ ياكى ئالتۇننى مۇقەددەس قىلغان ئىبادەتخانىمۇ؟
18 سىلەر يەنە: «كىمكى قۇربانلىق سۇپىسىنى تىلغا ئېلىپ قەسەم قىلسا، بۇ ھېچنېمە ئەمەس، لېكىن كىمكى قۇربانلىق سۇپىسىدىكى ھەدىيىنى تىلغا ئېلىپ قەسەم قىلسا، قەسىمىدە چىڭ تۇرۇشى شەرت»،— دەيسىلەر.
19 ئەي قارىغۇلار، قايسىسى مۇھىمراق؟ ھەدىيەمۇ ياكى ھەدىيەنى مۇقەددەس قىلغان قۇربانلىق سۇپىسىمۇ؟
20 دېمەك، كىمكى قۇربانلىق سۇپىسىنى تىلغا ئېلىپ قەسەم قىلسا، ئۇ قۇربانلىق سۇپىسى ۋە ئۇنىڭ ئۈستىدىكى ھەممە نەرسىلەرنى تىلغا ئېلىپ قەسەم قىلغان بولىدۇ.
21 كىمكى ئىبادەتخانىنى تىلغا ئېلىپ قەسەم قىلسا، ئىبادەتخانا ۋە ئۇنىڭدا ماكانلاشقان خۇدانى تىلغا ئېلىپ قەسەم قىلغان بولىدۇ.
22 كىمكى ئاسماننى تىلغا ئېلىپ قەسەم قىلسا، ئۇ خۇدانىڭ تەختىنى ۋە شۇ تەختتە ئولتۇرغۇچىنى تىلغا ئېلىپ قەسەم قىلغان بولىدۇ.
23 سىلەرنىڭ ھالىڭلارغا ۋاي، ئەي ساختىپەز تەۋرات ئۇستازلىرى ۋە پەرىسىيلەر! سىلەر يالپۇز، قىلياش ۋە زېرىنىڭ ئوندىن بىر ئۈلۈشىنى بېرىسىلەر. ئەمما، تەۋراتتىكى تېخىمۇ مۇھىم ئىشقا، يەنى ئادالەت ۋە ساداقەتمەنلىككە سەل قارايسىلەر. ئاۋۋال تىلغا ئالغان ئىشلارنى ئەلۋەتتە قىلىشىڭلار كېرەك، بىراق كېيىنكى ئىشلارغىمۇ قەتئىي سەل قارىماسلىقىڭلار لازىم.
24 ئەي قارىغۇ يولباشچىلار! سىلەر پاشىنى سۈزۈپ ئېلىۋېتىسىلەر، بىراق تۆگىنى پۈتۈن يۇتۇۋېتىسىلەر.
25 سىلەرنىڭ ھالىڭلارغا ۋاي، ئەي ساختىپەز تەۋرات ئۇستازلىرى ۋە پەرىسىيلەر! چۈنكى سىلەر چىنە-قاچىلارنىڭ سىرتىنى يۇيۇسىلەر، ئەمما ئۇلارنىڭ ئىچى ئاچكۆزلۈك* ۋە شەخسىيەتچىلىك بىلەن تولغان.
26 ئەي قارىغۇ پەرىسىيلەر، چىنە-قاچىلارنىڭ ئىچىنى پاكىز يۇيۇڭلار، شۇ چاغدا سىرتىمۇ پاكىز بولىدۇ.
27 سىلەرنىڭ ھالىڭلارغا ۋاي، ئەي ساختىپەز تەۋرات ئۇستازلىرى ۋە پەرىسىيلەر! سىلەر سىرتىدىن چىرايلىق كۆرۈنىدىغان، ئىچى بولسا ئۆلۈكلەرنىڭ ئۇستىخانلىرى ۋە ھەرخىل ناپاكلىققا تولغان ئاقارتىپ قويۇلغان قەبرىلەرگە ئوخشايسىلەر.
28 سىلەرمۇ دەل شۇنىڭدەك ئىنسانلارغا سىرتىڭلاردىن ئادىل ئادەمدەك كۆرۈنىسىلەر، لېكىن ئىچىڭلار ساختىپەزلىك ۋە قانۇنسىزلىققا تولغاندۇر.
29 سىلەرنىڭ ھالىڭلارغا ۋاي، ئەي ساختىپەز تەۋرات ئۇستازلىرى ۋە پەرىسىيلەر! سىلەر پەيغەمبەرلەرنىڭ قەبرىلىرىنى ياساپ، ئادىل كىشىلەرنىڭ گۆرلىرىنى بېزەپ:
30 «ئەگەر بىز ئاتا-بوۋىلىرىمىزنىڭ زامانىدا ياشىغان بولساق، ھەرگىزمۇ ئۇلارنىڭ پەيغەمبەرلەرنىڭ قېنىنى تۆكۈشىگە شېرىك بولمايتتۇق»،— دەيسىلەر.
31 دېمەك، سىلەر پەيغەمبەرلەرنى ئۆلتۈرگەنلەرنىڭ ئوغۇللىرى ئىكەنلىكىڭلارغا گۇۋاھلىق بېرىۋاتىسىلەر.
32 شۇنداق ئىكەن، ئاتا-بوۋىلىرىڭلار باشلىغان ئىشنى سىلەر تاماملاڭلار.
33 سىلەر ئەي يىلانلار، زەھەرلىك يىلاننىڭ ئەۋلادلىرى، گەھەنناغا تاشلىنىش ھۆكۈمىدىن قانداقمۇ قېچىپ قۇتۇلالايسىلەر؟
34 مانا شۇنىڭ ئۈچۈن، سىلەرگە پەيغەمبەرلەر، دانىشمەنلەر ۋە تەۋرات ئۇستازلىرىنى ئەۋەتىۋاتىمەن. سىلەر ئۇلارنىڭ بەزىلىرىنى ئۆلتۈرىسىلەر، تۈۋرۈككە مىخلايسىلەر؛ يەنە بەزىلىرىنى سىناگوگلىرىڭلاردا قامچىلايسىلەر ۋە شەھەردىن-شەھەرگە قوغلاپ زىيانكەشلىك قىلىسىلەر.
35 شۇنداق قىلىپ، ئادىل كىشى بولغان ھابىلدىن مۇقەددەس جاي بىلەن قۇربانلىق سۇپىسى ئارىسىدا ئۆلتۈرۈلگەن باراكىيانىڭ ئوغلى زەكارىياغا قەدەر يەر يۈزىدىكى بارلىق ئۆلتۈرۈلگەن ئادىل ئادەملەرنىڭ قان قەرزى سىلەرنىڭ بوينىڭلاردا بولىدۇ.
36 مەن سىلەرگە ھەقنى ئېيتىپ قويايكى، مۇشۇ بارلىق ئىشلار ئۈچۈن بۇ بىر ئەۋلاد كىشىلەر ھېساب بېرىدۇ.
37 ئەي يېرۇسالېم، يېرۇسالېم، پەيغەمبەرلەرنى ئۆلتۈرگۈچى، ساڭا ئەۋەتىلگەنلەرنى چالما-كېسەك قىلغۇچى شەھەر، توخۇ ئۆز چۈجىلىرىنى قاناتلىرى ئاستىغا يىغقاندەك، مەنمۇ نەچچە قېتىم بالىلىرىڭنى يىغىشنى خالىدىم، ئەمما سىلەر خالىمىدىڭلار.
38 مانا ئەمدى بۇ ئىبادەتخانا ۋەيران قىلىنىپ، سىلەرگە خارابىسى قالىدۇ.
39 سىلەرگە ئېيتىپ قويايكى، بۇنىڭدىن كېيىن سىلەر: «يەھۋانىڭ ئىسىمى بىلەن كېلىدىغان كىشىگە مۇبارەك بولسۇن!» دەپ ئېيتمىغۇچە مېنى كۆرەلمەيسىلەر.
بەت ئاستى قۇشۇمچە ئىزاھاتلىرى
^ سۆزمۇ-سۆز: «رەببى»؛ يەھۇدىي ئۇستازلارغا ھۆرمەت كۆرسىتىش ئۈچۈن قوللانغان نام-ئۇنۋان.
^ سۆزمۇ-سۆز: «ئاسمان پادىشاھلىقىنىڭ».
^ ياكى «بۇلاڭچىلىق».
