مەتتا كىتابى 24:1—51
-
مەسىھنىڭ ھازىر بولۇشىنىڭ ئالامىتى (1–51)
-
ئۇرۇشلار، ئاچارچىلىقلار ۋە يەر تەۋرەشلەر (7)
-
خۇش خەۋەرنىڭ پۈتۈن دۇنيادا ۋەز قىلىنىشى (14)
-
دەھشەتلىك چوڭ بالايىئاپەت (21، 22)
-
ئىنسانئوغلىنىڭ ئالامىتى (30)
-
ئەنجۈر دەرىخى (32–34)
-
نۇھ پەيغەمبەرنىڭ زامانى (37–39)
-
داۋاملىق ھوشيار تۇرۇش (42–44)
-
سادىق قۇل ۋە رەزىل قۇل (45–51)
-
24 ئەيسا ئىبادەتخانىدىن چىقىپ كېتىۋاتقاندا، شاگىرتلىرى ئۇنىڭغا ئىبادەتخانا بىنالىرىنى كۆرسىتىش ئۈچۈن ئۇنىڭ يېنىغا كەلدى.
2 ئەيسا ئۇلارغا: «مانا بۇلارنىڭ ھەممىسىنى كۆرۈۋاتامسىلەر؟ سىلەرگە ھەقنى ئېيتىپ قويايكى، بۇ يەردە تاش ئۈستىدە قويۇلغان تاش قالمايدۇ، ھەممىسى ۋەيران قىلىنىدۇ»،— دېدى.
3 ئەيسا زەيتۇن تېغىدا ئولتۇرغاندا، شاگىرتلىرى ئاستىغىنا يېنىغا كېلىپ: «بىزگە ئېيتىپ بېرىڭا، بۇ ئىشلار قاچان يۈز بېرىدۇ ۋە سىزنىڭ ھازىر بولۇشىڭىزنى* ۋە زامان* ئاخىرىنىڭ كېلىشىنى بىلدۈرىدىغان قانداق ئالامەتلەر بولىدۇ؟»،— دەپ سورىدى.
4 ئەيسا ئۇلارغا مۇنداق جاۋاب بەردى: «ھوشيار بولۇڭلار، ھېچكىم سىلەرنى ئازدۇرۇپ كەتمىسۇن،
5 چۈنكى، نۇرغۇن كىشىلەر مېنىڭ ئىسىمىم بىلەن كېلىپ، ‹مەن مەسىھ› دەپ كۆپ كىشىلەرنى ئازدۇرىدۇ.
6 سىلەر يىراق-يېقىن جايلاردا يۈز بەرگەن ئۇرۇشلارنىڭ خەۋەرلىرىنى ئاڭلايسىلەر. بۇنىڭدىن ئالاقزادە بولۇپ كەتمەڭلار. چۈنكى، بۇلار چوقۇم يۈز بېرىشى كېرەك. ئەمما بۇ تېخى ئاخىرى ئەمەس.
7 بىر مىللەت يەنە بىر مىللەتكە، بىر دۆلەت يەنە بىر دۆلەتكە قارشى ئۇرۇش قىلىدۇ، جاي-جايلاردا ئاچارچىلىق ۋە يەر تەۋرەشلەر يۈز بېرىدۇ.
8 لېكىن، بۇلارنىڭ ھەممىسى تولغاق ئازابىنىڭ باشلىنىشىدۇر.
9 شۇ چاغدا، كىشىلەر سىلەرگە زىيانكەشلىك قىلىشىدۇ ۋە سىلەرنى ئۆلتۈرىدۇ. مېنىڭ ئىسىمىم ئۈچۈن پۈتكۈل خەلقلەر سىلەردىن نەپرەتلىنىدۇ.
10 يەنە شۇ ۋاقىتتا كۆپلىگەن كىشىلەر ئىماندىن ۋاز كېچىدۇ، بىر-بىرىگە ساتقۇنلۇق قىلىدۇ ۋە بىر-بىرىگە ئۆچمەنلىك قىلىدۇ.
11 كۆپلىگەن ساختا پەيغەمبەرلەر پەيدا بولۇپ، نۇرغۇن كىشىلەرنى ئازدۇرىدۇ؛
12 قانۇنسىزلىق كۆپىيىپ كەتكەنلىكتىن، كۆپىنچە ئىنسانلاردا سۆيگۈ-مۇھەببەت سوۋۇپ كېتىدۇ.
13 لېكىن، ئاخىرغىچە بەرداشلىق بەرگەنلەر قۇتقۇزۇلىدۇ.
14 بۇ پادىشاھلىق خۇش خەۋىرى دۇنيانىڭ ھەرقايسى جايلىرىدا بارچە مىللەتلەرگە يەتكۈزۈلۈش ئۈچۈن ۋەز قىلىنىدۇ، ئەنە شۇ چاغدا ئاخىرى كېلىدۇ.
15 شۇڭلاشقا، سىلەر دانىيال پەيغەمبەر تىلغا ئالغان ۋەيرانچىلىق ئېلىپ كېلىدىغان يىرگىنىچلىك نەرسىنىڭ مۇقەددەس جايدا تۇرغانلىقىنى كۆرگىنىڭلاردا (ئوقۇرمەنلەر بۇ سۆزنىڭ مەنىسىنى چۈشەنسۇن)،
16 يەھۇدىيەدە بولغانلار تاغلارغا قاچسۇن.
17 ئۆگزىدە بولغان كىشى ئۆيىدىن بىر نەرسە ئېلىش ئۈچۈن پەسكە چۈشمىسۇن.
18 ئېتىزدىكى كىشى چاپىنىنى ئېلىشقا قايتمىسۇن.
19 شۇ كۈنلەردە ھامىلدار بولغان ۋە بالا ئېمىتىۋاتقان ئاياللارنىڭ ھالىغا ۋاي!
20 قاچىدىغان ۋاقتىڭلار قىش كۈنلىرى ياكى دەم ئېلىش كۈنىگە توغرا كېلىپ قالماسلىقى ئۈچۈن دۇئا قىلىڭلار
21 چۈنكى، ئۇ چاغدا دۇنيا يارىتىلغاندىن بۇيان تا بۈگۈنگىچە ھېچقاچان بولۇپ باقمىغان ۋە بۇنىڭدىن كېيىنمۇ بولمايدىغان دەھشەتلىك چوڭ بالايىئاپەت بولىدۇ.
22 ئەگەر شۇ كۈنلەر قىسقارتىلمىسا، ھېچبىر ئىنسان قۇتۇلالماس ئىدى، لېكىن تاللانغانلار ئۈچۈن شۇ كۈنلەر قىسقارتىلىدۇ.
23 ئەگەر شۇ چاغدا بىرى سىلەرگە: ‹مانا قاراڭلار، مەسىھ بۇ يەردە› ياكى ‹مەسىھ ئۇ يەردە› دېسە، ئىشەنمەڭلار.
24 چۈنكى، ساختا مەسىھلەر ۋە ساختا پەيغەمبەرلەر پەيدا بولىدۇ ۋە مۇمكىن بولسا، ھەتتا تاللانغانلارنى ئازدۇرۇش ئۈچۈن ئاجايىپ ئالامەتلەر ۋە مۆجىزىلەرنى كۆرسىتىشىدۇ.
25 ئېسىڭلاردا بولسۇنكى، مەن سىلەرنى ئالدىن-ئالا ئاگاھلاندۇرۇپ قويدۇم.
26 شۇنىڭ ئۈچۈن، كىمدۇ-بىرى: ‹قاراڭلار، مەسىھ چۆل-باياۋاندا› دېسە، ئۇ يەرگە بارماڭلار، يەنە: ‹قاراڭلار، مەسىھ ئۆينىڭ ئىچىدە› دېسە، ئۇنىڭغا ئىشەنمەڭلار.
27 چۈنكى، چاقماق خۇددى شەرىقتە يالت-يۇلت قىلىپ چېقىپ، غەربنى ھەم يورۇتقاندەك، ئىنسانئوغلىنىڭ ھازىر بولۇشىمۇ شۇنداق بولىدۇ.
28 جەسەت قەيەردە بولسا، بۈركۈتلەر شۇ يەرگە توپلىشىدۇ.
29 ئۇ بالايىئاپەتلىك كۈنلەر ئۆتۈپ كەتكەندىن كېيىن، دەرھال قۇياش قارىيىپ، ئاي نۇرىنى چاچماس بولىدۇ. يۇلتۇزلار ئاسماندىن چۈشىدۇ ۋە ئاسمان جىسىملىرى تەۋرىنىپ كېتىدۇ.
30 ئۇ چاغدا ئاسماندا ئىنسانئوغلىنىڭ ئالامىتى كۆرۈنىدۇ، شۇنىڭ بىلەن يەر يۈزىدىكى بارچە مىللەتلەر دەرد-پەرياد ئېيتىپ، مەيدىلىرىگە ئۇرۇشىدۇ. ئۇلار ئىنسان ئوغلىنىڭ كۆكتىكى بۇلۇتلار ئۈستىدە كۈچ-قۇدرەت ۋە ئۇلۇغ شان-شەرەپ بىلەن كېلىۋاتقانلىقىنى كۆرىدۇ.
31 ئۇ جاراڭلىق بىر كاناي ئاۋازى بىلەن ئۆز پەرىشتىلىرىنى ئەۋەتىدۇ ۋە پەرىشتىلەر تاللانغانلارنى ئاسماننىڭ بىر چېتىدىن يەنە بىر چېتىگىچە، دۇنيانىڭ تۆت بۇلۇڭ-پۇشقىقىدىن يىغىپ بىر يەرگە جەم قىلىدۇ.
32 ئەمدى ئەنجۈر دەرىخىدىن مۇنداق مىسالنى ئۆگىنىڭلار: ئۇنىڭ شاخلىرى كۆكىرىپ، بىخ چىقىرىپ، يوپۇرماقلار ئۆسۈشكە باشلىغاندا، يازنىڭ يېقىنلاشقانلىقىنى بىلىسىلەر.
33 خۇددى شۇنىڭدەك، سىلەر بۇلارنىڭ ھەممىسىنى كۆرگەندە، ئىنسان ئوغلىنىڭ ئىشىك ئالدىغا كېلىپ قالغانلىقىنى بىلىڭلار.
34 سىلەرگە ھەقنى ئېيتىپ قويايكى، بۇ بىر ئەۋلاد كىشىلەر يوقالماستا، شۇ ئىشلارنىڭ ھەممىسى يۈز بېرىدۇ.
35 ئاسمان-زېمىن يوقىلىدۇ، بىراق مېنىڭ سۆزلىرىم ھەرگىز يوقالمايدۇ.
36 شۇ كۈننى ۋە سائەتنى ھېچكىم، نە ئاسماندىكى پەرىشتىلەر، نە ئوغۇل بىلمەيدۇ، لېكىن ئۇنى پەقەت ئاتا بىلىدۇ.
37 نۇھنىڭ كۈنلىرى قانداق بولغان بولسا، ئىنسانئوغلىنىڭ ھازىر بولۇشىمۇ* شۇنداق بولىدۇ.
38 نۇھ توپان سۈيى كېلىشتىن ئىلگىرى كېمىگە كىرگەن كۈنگىچە، شۇ زاماننىڭ كىشىلىرى يەپ-ئىچىپ، ئۆيلىنىپ، تۇرمۇشقا چىقىپ يۈرگەنىدى.
39 توپان كېلىپ، ئۇلارنىڭ ھەممىسىنى غەرق قىلغۇچە، ئۇلار پەرۋا قىلماي يۈرگەن، كېلەچەكتە ئىنسانئوغلىنىڭ ھازىر بولۇشىمۇ شۇنداق بولىدۇ.
40 شۇ چاغدا، ئېتىزدىكى ئىككى كىشىنىڭ بىرى ئېلىپ كېتىلىدۇ، يەنە بىرى قالدۇرۇلىدۇ.
41 قول تۈگمىنى بىلەن ئۇن تارتىۋاتقان ئىككى ئايالنىڭ بىرى ئېلىپ كېتىلىدۇ، يەنە بىرى قالدۇرۇلىدۇ.
42 شۇنىڭ ئۈچۈن، ھوشيار تۇرۇڭلار، چۈنكى ھەزرىتىڭلارنىڭ قايسى كۈنى قايتىپ كېلىدىغانلىقىنى بىلمەيسىلەر.
43 لېكىن شۇنى بىلىپ قويۇڭلاركى، ئەگەر ئۆي ئىگىسى ئوغرىنىڭ كېچىسى قايسى ۋاقىتتا كېلىدىغانلىقىنى بىلسە، ئۇ ئويغاق تۇرۇپ، ئوغرىنىڭ ئۆينى بۇزۇپ كىرىشىگە يول قويمايدۇ.
44 شۇنىڭ ئۈچۈن، سىلەرمۇ تەييار بولۇپ تۇرۇڭلار، چۈنكى ئىنسانئوغلى سىلەر ئويلىمىغان ۋاقىت-سائەتتە كېلىدۇ.
45 خوجايىن ئۆز ئۆيىدىكىلەرنىڭ ئوزۇق-تۈلۈكىنى ۋاقتى-ۋاقتىدا ئۇلارغا بېرىشكە تەيىنلىگەن سادىق ۋە ئەقىل-پاراسەتلىك قۇل كىم؟
46 خوجايىنى كەلگەندە، ئۇ قۇلنىڭ تاپشۇرۇلغان ئىشنى قىلىۋاتقانلىقىنى كۆرسە، بۇ شۇ قۇلنىڭ بەختىدۇر.
47 سىلەرگە ھەقنى ئېيتسام، خوجايىن ئۇنى بارلىق مال-مۈلكىنى باشقۇرۇشقا قويىدۇ.
48 بىراق، ئاشۇ قۇل كۆڭلىدە يامان نىيەتتە بولۇپ، ‹خوجايىنىم كېچىپ قايتىپ كېلىدۇ› دەپ،
49 باشقا قۇللارنى ئۇرۇپ-سوقۇپ، ھاراقكەشلەر بىلەن بىللە يەپ-ئىچىپ يۈرسە،
50 ئۇ قۇل كۈتمىگەن كۈندە،ئۆزى ئويلاپ باقمىغان ۋاقىت-سائەتتە خوجايىنى كېلىپ،
51 شۇ قۇلنى قاتتىق جازالاپ، ساختىپەزلەر بىلەن ئوخشاش جايغا تاشلايدۇ. نەتىجىدە، ئۇ قۇل شۇ يەردە يىغلاپ، چىشلىرىنى غۇچۇرلىتىدۇ.
