1.‏ نېمىشقا سىز خۇدا سۆزىنىڭ تەسىرى كۈچلۈك ئىكەنلىكىگە ئىشىنىسىز؟‏ (‏ماقالىنىڭ بېشىدىكى رەسىمگە قاراڭ)‏.‏

يەھۋانىڭ خەلقى ئۇنىڭ سۆزىنىڭ،‏ يەنى ئۇ ئىنسانىيەتكە ئەۋەتكەن خەۋەرنىڭ،‏ «تىرىك ھەم ھەرىكەتلىك» ئىكەنلىكىگە ئىشىنىدۇ (‏ئىبرانىيلارغا 4:‏12‏)‏.‏ بىز مۇقەددەس كىتابنىڭ قانچىلىك تەسىرلىك ئىكەنلىكىنى ئۆزۈمىز ۋە باشقىلارنىڭ ھاياتىدىن ئۆز كۆزۈمىز بىلەن كۆردۇق.‏ يەھۋا گۇۋاھچىلىرىنىڭ بىرى بولۇشتىن ئاۋۋال،‏ قېرىنداشلارنىڭ بەزىلىرى ئوغرىلىق،‏ نەشەخورلۇق ياكى ئەخلاقسىزلىق بىلەن شۇغۇللانغان.‏ باشقىلىرى بولسا،‏ نام-‏ئاتاق ۋە بايلىققا ئىگە بولسىمۇ،‏ ھاياتىدا بىرەر نەرسىنىڭ كەملىكىنى ھېس قىلىشقان (‏ۋەز 2:‏3—‏11‏)‏.‏ بەختكە يارىشا،‏ ئۈمىدسىزلەنگەن ۋە مەنىسىز ھايات كەچۈرگەن كۆپلىگەن ئادەمنىڭ ھاياتىدا ئەمدى ئىنتىلىدىغان مەقسىتى ۋە ئۈمىدى پەيدا بولدى.‏ «كۈزىتىش مۇنارىدىكى» «مۇقەددەس كىتاب ھاياتنى ئۆزگەرتىدۇ» ناملىق سەھىپىدە شۇنداق ئادەملەرنىڭ كۆپ مىسالى كەلتۈرۈلگەن.‏ لېكىن،‏ ئادەم مەسىھ ئەگەشكۈچىسى بولغاندىن كېيىنمۇ،‏ مۇقەددەس كىتاب ياردىمى ئارقىلىق يەھۋا بىلەن بولغان مۇناسىۋىتىنى مۇستەھكەملەشنى داۋاملاشتۇرۇشى كېرەك.‏

2.‏ بىرىنچى ئەسىردە خۇدا سۆزىنىڭ كۈچى ئادەملەرگە قانداق تەسىر قىلغان؟‏

 ² ھەقىقەتنى تونۇغاندا،‏ كۆپ ئادەملەرنىڭ ھاياتىدا چوڭ ئۆزگۈرۈشلەر قىلىدىغانلىقى ھەيران قالارلىق ئەمەس.‏ بىرىنچى ئەسىردىكى مايلانغان قېرىنداشلىرىمىزمۇ مۇنداق ئۆزگىرىشلەرنى قىلغان ‏(‏كورىنتلىقلارغا 1-‏خەت 6:‏9—‏11نى ئوقۇڭ)‏.‏ خۇدا پادىشاھلىقىغا مىراسلىق قىلمايدىغانلار ھەققىدە ئېيتقاندا،‏ ئەلچى پاۋلۇس:‏ «بەزىلىرىڭلار شۇنداق بولغاندىڭلار»،‏‏—‏ دېگەن.‏ خۇدا سۆزى بىلەن مۇقەددەس روھ بۇ ئادەملەرنىڭ ئۆزگۈرۈشىگە ياردەم بەرگەن.‏ ئەمما مەسىھ ئەگەشكۈچىسى بولغاندىن كېيىنمۇ،‏ ئۇلارنىڭ بەزىلىرى يەھۋا بىلەن بولغان مۇناسىۋەتكە زىيان يەتكۈزىدىغان ئېغىر خاتالىقلارنى ئۆتكۈزگەن.‏ مەسىلەن،‏ يازمىلاردا جامائەتتىن چىقىرىلىشقا توغرا كەلگەن بىر مايلانغان بۇرادەر ھەققىدە يېزىلغان.‏ كېيىن،‏ ئۇ زۆرۈر ئۆزگۈرۈشلەرنى قىلىپ،‏ جامائەتكە قايتىپ كەلگەنىدى (‏كورىنتلىقلارغا 1-‏خەت 5:‏1—‏5؛‏ كورىنتلىقلارغا 2-‏خەت 2:‏5—‏8‏)‏.‏ قېرىنداشلىرىمىزنىڭ خۇدا سۆزىنىڭ ياردىمى بىلەن ھاياتىدا كۆپ ئۆزگۈرۈشلەرنى قىلالىغانلىقىنى بىلىش بىزنى ئىلھاملاندۇرىدۇ.‏

3.‏ بۇ ماقالىدە نېمىنى قاراپ چىقىمىز؟‏

³ خۇدا سۆزىنىڭ تەسىرى ناھايىتى كۈچلۈك.‏ يەھۋا ئۇنى بىزگە بەرگەنلىكتىن،‏ بىز ئۇنى توغرا ئىشلىتىۋاتقانلىقىمىزغا كۆز يەتكۈزۈشنى خالايمىز (‏تىموتىيغا 2-‏خەت 2:‏15‏)‏.‏ بۇ ماقالىدىن بىز 1)‏ ئۆز ھاياتىمىزدا،‏ 2)‏ ۋەز خىزمىتىمىزدە ۋە 3)‏ سەھنىدە تەلىم بەرگەندە خۇدا سۆزىنىڭ كۈچىنى قانداق ئىشلىتەلەيدىغانلىمىزنى قاراپ چىقىمىز.‏ بۇنى بىلىش بىزگە پايدىلىق تەلىم بېرىدىغان ئەرشتىكى ئاتىمىزغا بولغان مېھىر-‏مۇھەببەت ۋە مىننەتدارلىقىمىزنى ئىپادىلەشكە ياردەم بېرىدۇ (‏يەشايا 48:‏17‏)‏.‏

4.‏ ئا)‏ خۇدانىڭ سۆزى بىزگە تەسىر قىلىشنى خالىساق،‏ نېمە قىلىشىمىز كېرەك؟‏ ئە)‏ سىز مۇقەددەس كىتابنى ئوقۇش ئۈچۈن ۋاقىتىڭىزنى قانداق ئورۇنلاشتۇرۇسىز؟‏

⁴ خۇدا سۆزى بىزگە تەسىر قىلىشى ئۈچۈن ئۇنى دائىم ئوقۇشىمىز كېرەك.‏ ئۇنى ھەر كۈنى ئوقۇشقا تىرىشىشىمىز كېرەك (‏يەشۇئا 1:‏8‏)‏.‏ ئىشلىرىمىز چاچتىن تولا بولسىمۇ،‏ ھېچ نېمىگە،‏ ھەتتا ۋەزىپىلىرىمىزگىمۇ،‏ مۇقەددەس كىتابنى ئوقۇشنى توختىتىشقا يول بەرمەسلىكىمىز لازىم ‏(‏ئەفەسلىكلەرگە 5:‏15،‏ 16نى ئوقۇڭ)‏‏.‏ بەلكىم،‏ بۇنىڭغا ئەتىگەندە،‏ كۈندۈزى ياكى كەچقۇرۇن ۋاقىت تاپالايدىغاندىمىز.‏ بىز زەبۇر يازغۇچىسىنىڭ:‏ «ئاھ،‏ مېنىڭ تەۋرات-‏قانۇنىڭغا بولغان مۇھەببىتىم نەقەدەر چوڭقۇردۇر!‏ ئۇ مېنىڭ كۈن بويى سېغىنىپ ئويلايدىغىنىمدۇر»،‏—‏دېگەن سۆزلىرىگە قوشۇلىمىز (‏زەبۇر 119:‏97‏)‏.‏

5،‏ 6.‏ ئا)‏ نېمىشقا مۇلاھىزە قىلىشىمىز كېرەك؟‏ ئە)‏ مۇلاھىزە قىلىشنىڭ پايدىسىنى كۆرۈش ئۈچۈن نېمە قىلساق بولىدۇ؟‏ ب)‏ مۇقەددەس كىتابنى ئوقۇپ،‏ مۇلاھىزە قىلغانلىقىڭىز سىزگە قانداق ياردەم بېرىدۇ؟‏

⁵ ئەمما مۇقەددەس كىتابنى پەقەت ئوقۇشلا يېتەرلىك ئەمەس.‏ ئوقۇغىنىمىز ھەققىدە مۇلاھىزە قىلىش،‏ يەنى ئەستايىدىل ۋە چوڭقۇر ئويلىنىشىمىز كېرەك (‏زەبۇر 1:‏1—‏3‏)‏.‏ شۇ چاغدىلا مۇقەددەس كىتابنىڭ دانالىقىغا ماس ھايات كەچۈرەلەيمىز.‏ مۇقەددەس كىتابنىڭ باسما نۇسخىسىنى ياكى ئېلىكترونلۇق ھۆججەت شەكلىنى ئوقۇيلى،‏ خۇدا سۆزىنىڭ ياردىمىدە ئوي-‏پىكىر ۋە ئىش-‏ھەرىكىتىمىزنى ئۆزگەرتىشنى ئاساسىي مەقسەت قىلىشىمىز كېرەك.‏

 ⁶ مۇلاھىزە قىلىشىمىز پايدىلىق بولۇشى ئۈچۈن،‏ مۇقەددەس كىتابنى ئوقۇغاندا توختاپ،‏ ئۆزۈمىزدىن:‏ «بۇ ئايەتتىن يەھۋا خۇدا ھەققىدە نېمىنى بىلىۋالدىم؟‏ ئوقۇغانلىرىمنى ھاياتىمدا قانداق پايدىلىنىۋاتىمەن؟‏ قايسى تەرەپتىن يەنە ئۆزگىرىشىم كېرەك؟‏» دەپ سورىساق بولىدۇ.‏ ئوقۇغانلىرىمىز ھەققىدە مۇلاھىزە قىلساق ۋە يەھۋاغا دۇئا قىلساق،‏ بۇنىڭغا ماس ھايات كەچۈرۈش ئسىتىگىمىز تېخىمۇ ئاشىدۇ.‏ نەتىجىدە،‏ مۇقەددەس كىتابنىڭ تەسىرى كۈچلۈك ئىكەنلىكىنى ئۆز ھاياتىمىزدا ھېس قىلىپ يېتەلەيمىز (‏كورىنتلىقلارغا 2-‏خەت 10:‏4،‏ 5‏)‏.‏

7.‏ خۇدا سۆزىنى ۋەز خىزمىتىدە قانداق پايدىلىنالايمىز؟‏

⁷ ۋەز قىلغاندا ۋە تەلىم بەرگەندە خۇدا سۆزىدىن ياخشى پايدىلىنىشنى بىلىشىمىز مۇھىم.‏ بىر بۇرادەر ئېيتقاندەك،‏ «ئەگەر يەھۋانىڭ ئۆزى بىلەن ئۆيمۇ ئۆي ۋەز قىلغان بولسىڭىز،‏ پەقەت ئۆزىڭىزلا سۆزلەتتىڭىزمۇ ياكى ئۇنىڭغا سۆز بېرەتتىڭىزمۇ؟‏» ئادەمگە مۇقەددەس كىتابتىن ئوقۇپ بەرگەندە،‏ بىز يەھۋانىڭ سۆزلىشىگە پۇرسەت بېرىمىز.‏ ياخشى تاللانغان ئايەت بىزنىڭ ھەرقانداق سۆزىمىزدىنمۇ كۈچلۈك تەسىر قىلىدۇ (‏سالونىكىلىقلارغا 1-‏خەت 2:‏13‏)‏.‏ ۋەز خىزمىتىدە بولغاندا ھەربىر پۇرسەتنى چىڭ تۇتۇپ،‏ مۇقەددەس كىتابتىن ئايەتلەرنى ئوقۇپ بېرىشكە تىرىشامسىز؟‏

8.‏ ۋەز خىزمىتىدە خۇدا سۆزىدىن قانداق ئۈنۈملۈك پايدىلىنالايمىز؟‏

⁸ ئەلۋەتتە،‏ ئادەمگە بىرەر ئايەتنى ئوقۇپ بېرىشلا يېتەرلىك ئەمەس.‏ ئادەملەرنىڭ كۆپچىلىكى مۇقەددەس كىتابنى چۈشەنمەيدۇ.‏ مۇنداق ۋەزىيەت بىرىنچى ئەسىردە بولغان ۋە ھازىرمۇ ئۇچرايدۇ (‏رىملىقلارغا 10:‏2‏)‏.‏ دېمەك،‏ بىز ئادەمگە بىرەر ئايەتنى ئوقۇپ بەرسەك،‏ مەنىسىنى ئۆزى چۈشۈنۈۋالىدۇ دەپ ئويلىماسلىقىمىز كېرەك.‏ ئۇلارغا ياردەم بېرىش ئۈچۈن بىز ئايەتتىكى ئاساسىي سۆزلەرنى ياكى ئويلارنى قايتىلاپ،‏ ئۇلارنىڭ مەنىسىنى چۈشەندۈرسەك بولىدۇ.‏ شۇنداق قىلىش ئارقىلىق خۇدا سۆزى ئادەمنىڭ ئەقلى بىلەن يۈرىكىگە چوڭقۇر تەسىر قىلىدۇ ‏(‏لۇقا 24:‏32نى ئوقۇڭ)‏.‏

9.‏ مۇقەددەس كىتابقا ھۆرمەت كۆرسىتىشكە دەۋەت قىلىش ئۈچۈن سۆزنى قانداق باشلىساق بولىدۇ؟‏ مىسال كەلتۈرۈڭ.‏

⁹ بىزنىڭ ئايەتنى ئوقۇپ بېرىشتىن ئاۋۋال ئېيتقان سۆزلىرىمىز ھەم ئادەمنى مۇقەددەس كىتابقا ھۆرمەت بىلەن قاراشقا دەۋەت قىلالايدۇ.‏ مەسىلەن:‏ «ياراتقۇچىمىز بۇ مەسىلە ھەققىدە نېمە دېگەنلىكىنى كۆرۈپ باقايلى»،‏—‏دېسەك بولىدۇ.‏ ئەگەر ئەيساغا ئىشەنمەيدىغان كىشىنى ئۇچراتساق،‏ ئۇنىڭغا:‏ «مۇقەددەس يازمىلاردا نېمە ئېيتىلغانلىقىنى كۆرۈپ بېقىڭ»،‏—‏ دەپ ئېيتىشقا بولىدۇ.‏ دىنغا قىزىقمايدىغان بىرسى بىلەن سۆزلەشكەندە،‏ ئۇنىڭدىن:‏ «كونىلارنىڭ مۇنداق سۆزلىرىنى ئاڭلىغانسىزمۇ؟‏»—‏ دەپ سورىساق بولىدۇ.‏ ھەربىر ئادەمنىڭ كېلىپ چىقىشى ۋە دىنىي كۆزقاراشلىرى ئوخشاش بولمايدىغانلىقىنى ئەستە ساقلىساق،‏ كىرىش سۆزۈمىزنى يېقىملىق قىلىشقا تىرىشىمىز (‏كورىنتلىقلارغا 1-‏خەت 9:‏22،‏ 23‏)‏.‏

10.‏ ئا)‏ بىر بۇرادەر قانداق ۋەقەنى باشتىن كەچۈرگەن؟‏ ئە)‏ ۋەز قىلغاندا خۇدا سۆزىنىڭ تەسىرىنى كۆرگەنمۇسىز؟‏

¹⁰ كۆپلىگەن ۋەز ئېيتقۇچىلار خۇدا سۆزىنى ئوقۇپ بېرىش ئادەملەرگە قاتتىق تەسىر قىلىدىغانلىقىنى بايقىغان.‏ مەسىلەن،‏ بىر بۇرادەر ژۇرناللىرىمىزنى كۆپ يىل داۋامىدا ئوقۇغان بىر ياشانغان ئەر كىشىگە يولۇقۇپ تۇراتتى.‏ بىر كۈنى بۇرادەر ئۇنىڭغا «كۈزىتىش مۇنارى» نىڭ ئەڭ يېڭى سانىنى بېرىشنىڭ ئورنىغا،‏ بىر ئايەتنى ئوقۇپ بېرىشنى قارار قىلىدۇ.‏ ئۇ كورىنتلىقلارغا 2-‏خەت 1:‏3،‏ 4-‏ئايەتتىكى مونۇ سۆزلەرنى ئوقۇپ بېرىدۇ:‏ «رەھىمدىللىكنىڭ ئاتىسى ھەم ھەرقانداق تەسەللىنىڭ پەرۋەردىگارى.‏.‏.‏بىزگە ھەممە دەردلىرىمىزدە تەسەللى بېرىۋاتىدۇ».‏ بۇ سۆزلەر ھېلىقى ئەر كىشىگە بەكمۇ تەسىر قىلغاچ،‏  ئۇ شۇ ئايەتلەرنى يەنە بىر قېتىم ئوقۇپ بېرىشنى سورىغان.‏ كېيىن،‏ ئۇ ئايالى ئىككىسى تەسەللىيگە قانچىلىك مۇھتاج بولغانلىقىنى ئېيتقان.‏ بۇ ئايەت تۈپەيلىدىن ئۇ مۇقەددەس كىتاب توغرىسىدا كۆپرەك بىلگۈسى كەلگەن.‏ خۇدا سۆزىنى ۋەز خىزمىتىدە ئىشلىتىشنىڭ تەسىرى ھەقىقەتەن بەكمۇ كۈچلۈك!‏ (‏ئەلچىلەر 19:‏20‏)‏.‏

11.‏ سەھنىدە تەلىم بېرىدىغان بۇرادەرلەرنىڭ قانداق مەسئۇلىيىتى بار؟‏

¹¹ ھەممىمىز جامائەت ئۇچرىشىشلىرىغا ۋە چوڭ يىغىلىشلارغا قاتنىشىشنى ياخشى كۆرىمىز.‏ ئاساسىي مەقسىتىمىز —‏ يەھۋا خۇداغا ئىبادەت قىلىش.‏ بىز شۇ يەردە پايدىلىق تەلىم-‏تەربىيەگە ئىگە بولىمىز.‏ بۇرادەرلەر ئۈچۈن سەھنىدە تەلىم بېرىش چوڭ شان-‏شەرەپ،‏ ھەمدە شۇنى تونۇپ يېتىشى كېرەككى،‏ ئۇلارنىڭ ئېغىر مەسئۇلىيىتى ھەم بار (‏ياقۇپ 3:‏1‏)‏.‏ ئۇلارنىڭ تەلىملىرى خۇدا سۆزىگە ئاساسلىنىشى كېرەك.‏ ئەگەر سىز شۇنداق شان-‏شەرەپگە ئىگە بولسىڭىز،‏ تىڭشىغۇچىلارنىڭ يۈرىكىگە تەسىر قىلىش ئۈچۈن مۇقەددەس كىتابنىڭ كۈچىنى قانداق ئىشلىتەلەيسىز؟‏

12.‏ ناتىق ئۆز نۇتۇقىنىڭ مۇقەددەس يازمىلارغا ئاساسلانغانلىقىغا قانداق كۆز يەتكۈزەلەيدۇ؟‏

¹² ھەرقانداق نۇتۇقنىڭ ئەڭ مۇھىم قىسمى مۇقەددەس يازمىلار بولۇشى كېرەك (‏يوھاننا 7:‏16‏)‏.‏ شۇنىڭ ئۈچۈن سىز ئېيتىپ بەرگەن ۋەقەلەر،‏ مىساللار ياكى سۆزلەش ئۇسۇلىڭىز نۇتۇقتا كەلتۈرۈلگەن ئايەتلەردىن مۇھىمىراق بولۇپ قالماسلىقى كېرەك.‏ شۇنداقلا مۇقەددەس  كىتابنى ئوقۇپ بېرىش بىلەن مۇقەددەس كىتابتىن تەلىم بېرىشنىڭ پەرقى بار ئىكەنلىكىنى ئۇنتۇماڭ.‏ ئەمەلىيەتتە،‏ ناھايىتى كۆپ ئايەتلەرنى ئوقۇسىڭىز،‏ تىڭشىغۇچىلار ئۇلارنىڭ كۆپىنچىسىنى ئەستە تۇتالمايدۇ.‏ شۇ سەۋەبتىن،‏ ئوقۇماقچى بولغان ئايەتلەرنى ئەستايىدىل تاللاڭ.‏ كېيىن ئۇلارنى ئالدىرماي ئوقۇپ،‏ مەنىسىنى چۈشەندۈرۈڭ،‏ مىسال كەلتۈرۈپ ئەمەلىي تۇرمۇشتا قانداق ئىشلىتىشكە بولىدىغانلىقىنى كۆرسىتىپ بېرىڭ (‏نەھەمىيا 8:‏8‏)‏.‏ ئەگەر سىزدە نۇتۇقنىڭ تېزىسى بولسا،‏ تېزىس ۋە ئۇنىڭدىكى ئايەتلەرنى تەپسىلىي تەتقىق قىلىپ چىقىڭ.‏ ئۇنىڭدىن باشقا،‏ نۇتۇق تېزىسىدا كۆرستىلگەن مەزمۇن بىلەن نەقىل كەلتۈرۈلگەن ئايەتلەرنىڭ قانداق باغلىنىشى بارلىقىنى چۈشىنىشكە تىرىشىڭ.‏ ئاندىن،‏ كەلتۈرۈلگەن بەزى ئايەتلەرنى ئىشلىتىپ،‏ تېزىستىكى مەزمۇنلارنى يۇرۇتۇپ بېرىڭ (‏‏«ۋەز ئېتقۇچىلارنى تەربىيلەش مەكتىپى» (‏خەنزۇچە)‏ كىتابىنىڭ 21—‏23 دەرسلىرىدە ياخشى مەسلىھەتلەرنى تاپالايسىز)‏.‏ ئەڭ مۇھىمى بولسا،‏ يەھۋا خۇدادىن مۇقەددەس كىتابتىكى بىباھا ئوي-‏پىكىرلارنى يەتكۈزۈشكە ياردەم بېرىشىنى دۇئادا سوراڭ ‏(‏ئەزرا 7:‏10؛‏ پەندى-‏نەسىھەت 3:‏13،‏ 14نى ئوقۇڭ)‏.‏

13.‏ ئا)‏ بىر قېرىنداشقا ئۇچرىشىشتا ئاڭلىغان بىر ئايەت قانداق تەسىر قىلغان؟‏ ئە)‏ ئۇچرىشىشلاردا ئىشلىتىلگەن مۇقەددەس كىتابتىكى ئايەتلەر سىزگە قانداق تەسىر قىلىدۇ؟‏

¹³ ئاۋسترالىيىىدە ياشايدىغان بىر قېرىندىشىمىز كىچىك ۋاقتىدا كۆپ ئازاب چەككەن.‏ كېيىن،‏ ئۇ يەھۋانى تونۇپ،‏ ھەقىقەتنى بىلگەن بولسىمۇ،‏ يەھۋانىڭ ئۇنى ياخشى كۆرىدىغانلىقىغا پۈتۈنلەي ئىشىنىش ئۇنىڭغا يەنىلا قىيىن بولغانىدى.‏ بىر قېتىم جامائەت ئۇچرىشىشىدا ئاڭلىغان بىر ئايەت  ئۇنىڭغا قاتتىق تەسىر قىلغان.‏ ئۇ بۇ ئايەت ھەققىدە مۇلاھىزە قىلىپ،‏ ئىزدىنىش داۋامىدا مۇقەددەس كىتابتىن باشقا ئايەتلەرنىمۇ تاپقان.‏ شۇ چاغدىلا ئۇنىڭ ئوي-‏پىكىرى تۈپ يىلتىزىدىن ئۆزگەرگەن * (‏ئىزاھاتقا قاراڭ)‏.‏ ئۇچرىشىشتا ياكى چوڭ يىغىلىشتا قانداقتۇ بىر ئايەتنىڭ سىزگە كۈچلۈك تەسىر قىلغانلىقى ئېسىڭىزدىمۇ؟‏ (‏نەھەمىيا 8:‏12‏)‏.‏

14.‏ يەھۋانىڭ سۆزىگە بولغان مىننەتدارلىقىمىزنى قانداق كۆرسىتەلەيمىز؟‏

¹⁴ يەھۋاغا بىزگە سوۋغات قىلغان سۆزى،‏ يەنى مۇقەددەس كىتاب ئۈچۈن ھەقىقەتەن بەك مىننەتدارمىز!‏ ئۇ ئۇنىڭ مەڭگۈ قالىدىغانلىقىنى ۋەدە قىلغان ۋە بۇ ۋەدىسىنى ئورۇنلىغان (‏پېترۇسنىڭ 1-‏خېتى 1:‏24،‏ 25‏)‏.‏ ئۇنداقتا،‏ مۇقەددەس كىتابنى ھەر كۈنى ئوقۇپ،‏ بىلگەنلىرىمىزنى ئىشلىتىشنى ۋە باشقىلارغىمۇ ياردەم بېرىشنى خالايمىز.‏ شۇنداق قىلساق،‏ بىز پەقەت بۇ روھىي بايلىققىلا بولغان ئەمەس،‏ ئۇنىڭ مۇئەللىپى يەھۋا خۇداغا ھەم بولغان مېھىر-‏مۇھەببەت ۋە مىننەتدارلىقىمىزنى كۆرسىتەلەيمىز.‏