1.‏ مۇقەددەس كىتابتا تەربىيە بېرىش قانداق تەسۋىرلەنگەن؟‏

‏«تەربىيە» ياكى «ئەدەبلەش» دېگەن سۆزنى ئاڭلىغاندا،‏ ئوي-‏خىيالىڭىزغا نېمە كېلىدۇ؟‏ بەلكىم،‏ دەرھاللا ئەدەبلەپ جازا بېرىشنى خىيالىڭىزغا كەلتۈرەرسىز،‏ لېكىن تەربىيە بېرىش كۆپرەك نەرسىنى ئۆز ئىچىگە ئالىدۇ.‏ مۇقەددەس كىتابتا،‏ تەربىيە سۆزى ئىشلىتگەندە،‏ ئۇ بىلىم،‏ دانالىق،‏ مېھىر-‏مۇھەببەت ۋە ھاياتلىق دېگەن سۆزلەر بىلەن باغلىنىشلىق بولغانىدى.‏ شۇنداقلا،‏ ئۇنىڭدا نەسىھەتنىڭ ئۆزۈمىز ئۈچۈن پايدىلىق ئىكەنلىكى يېزىلغان (‏پەندى-‏نەسىھەت 1:‏2—‏7؛‏ 4:‏11—‏13‏)‏.‏ سەۋەبى،‏ خۇدانىڭ نەسىھەت بېرىشى بىزنى ياخشى كۆرۈدىغانلىقىنى ۋە مەڭگۈ ياشىشىمىزنى خالايدىغانلىقىنى كۆرسىتىدۇ (‏ئىبرانىيلارغا 12:‏6‏)‏.‏ يەھۋا خۇدا بىزگە تەربىيە بېرىش ئۈچۈن بەزىدە ئەدەبلەپ جازالىشى مۇمكىن،‏ بىراق ھېچقاچان ۋەھشىيلىك ياكى زالىملىق بىلەن جازالىمايدۇ.‏ ئەمەلىيەتتە «ئەدەبلەش» سۆزىنىڭ ئاساسىي مەنىسى نەسىھەت بېرىش بىلەن مۇناسىۋەتلىك.‏ بۇ ئاتا-‏ئانىنىڭ سۆيۈملۈك پەرزەنتلىرىگە بېرىدىغان تەلىم-‏تەربىيەگە ئوخشايدۇ.‏

2،‏ 3.‏ تەربىيە بېرىش نېمە ئۈچۈن نەسىھەت قىلىش ۋە ئەدەبلەپ جازالاشنى ئۆز ئىچىگە ئالىدۇ؟‏ (‏ماقالىنىڭ بېشىدىكى رەسىمگە قاراڭ.‏)‏

² بىر مىسالنى قاراپ چىقايلى.‏ جون ئىسىملىك كىچىك بالا ئۆيدە توپ ئويناۋاتىدۇ.‏ ئاپىسى جونغا نەسىھەت قىلىپ:‏ «بالام،‏ ئۆيدە توپ ئويناشقا بولمايدىغانلىقىنى بىلىسەنغۇ!‏ بىر نەرسىلەرنى چېقىپ قويىسەن!‏»—‏ دەيدۇ.‏  لېكىن،‏ ئۇ ئاپىسىنىڭ سۆزىنى ئاڭلىماي داۋاملىق ئويناۋەردى.‏ بىر چاغدا توپ لوڭقىغا تەگدى ۋە ئۇ يەرگە چۈشۈپ چېقىلىپ كەتتى.‏ ئانىسى جونغا تەربىيىلەپ تۈزىتىش ئۈچۈن نېمە قىلدى؟‏ ئانىسى جونغا تەربىيە بېرىش ئۈچۈن،‏ يەنە ئۇنىڭ قىلغان ئىشىنىڭ خاتا ئىكەنلكىنى چۈشەندۈرۈپ بەردى.‏ ئۇنىڭ ئاتا-‏ئانىغا بويسۇنۇشى ئۆزىگە ياخشى ئىكەنلىكىنى ۋە ئۆيدە قائىدە-‏تۈزۈملەرنىڭ بولۇشى پايدىلىق ۋە ئورۇنلۇق ئىكەنلىكىنى چۈشىنىشىنى خالايدۇ.‏ جوننىڭ بۇنىڭدىن ساۋاق ئېلىشى ئۈچۈن،‏ ئاپىسى ئۇنى ئەدەبلەپ توپىنى ۋاقتىنچە ئويناشقا بەرمەسلىكنى قارار قىلىدۇ.‏ بۇ جونغا ئاتا-‏ئانىسىغا ئىتائەت قىلماسلىق،‏ قانداق ئاقىۋەت ئېلىپ كېلىدىغانلىقىنى ئەسلىتىشى مۇمكىن.‏

³ مەسىھ ئەگەشكۈچىلىرى سۈپىتىدە بىز خۇدا ئائىلىسىنىڭ بىر ئەزاسى (‏تىموتىيغا 1-‏خەت 3:‏15‏)‏.‏ ئاتىمىز يەھۋانىڭ نېمىنىڭ توغرا،‏ نېمىنىڭ خاتا ئىكەنلىكىنى قارار قىلىش ۋە ئۇنىڭغا بويسۇنمىساق بىزنى ئەدەبلەپ جازالاش ھوقۇقى بار.‏ ئەگەر ھەرىكىتىمىزنىڭ ئاقىۋېتى يامان بولسا،‏ يەھۋانىڭ مېھىر-‏مۇھەببەت بىلەن ئەدەبلەپ تۈزىتىشى ئۇنىڭغا ئىتائەت قىلىشنىڭ قانچىلىك مۇھىم ئىكەنلىكىنى ئەستىن چىقارماسلىققا ياردەم بېرىدۇ (‏گالاتىلىقلارغا 6:‏7‏)‏.‏ خۇدا بىزنى قاتتىق ياخشى كۆرىدۇ ۋە ئازاپ چېكىشىمىزنى خالىمايدۇ (‏پېترۇسنىڭ 1-‏خېتى 5:‏6،‏ 7‏)‏.‏

4.‏ ئا)‏ يەھۋا قانداق تەلىم بېرىشنى بەرىكەتلەيدۇ؟‏ ئە)‏ بۇ ماقالىدە بىز نېمە ھەققىدە مۇھاكىمە قىلىمىز؟‏

⁴ بىز بالىغا ياكى مۇقەددەس كىتابنى تەتقىق قىلىۋاتقان ئادەمگە خۇدا سۆزىگە ئاساسلىنىپ مەسلىھەت بەرگەندە،‏ ئۇلارغا مەسىھنىڭ ئەگەشكۈچىسى بولۇشقا ياردەم بېرىمىز.‏ بىز مۇقەددەس كىتابنى ئىشلىتىپ،‏ تەتقىق قىلغۇچىلارغا نېمىنىڭ توغرا،‏ نېمىنىڭ خاتا ئىكەنلىكىنى ئۆگىتىمىز ۋە ئەيسا «بۇيرىغان بارلىق نەرسىلەرنى» چۈشىنىشكە ۋە ئەمەلىي تۇرمۇشتا ئىشلىتىشكە ياردەملىشىمىز (‏مەتتا 28:‏19،‏ 20؛‏ تىموتىيغا 2-‏خەت 3:‏16‏)‏.‏ يەھۋا ھەم بىزنى بەرىكەتلەپ،‏ مۇقەددەس كىتاب ئۆگەنگۈچىلەرگە قانداق تەلىم بېرىش ۋە تېخىمۇ كۆپ كىشلەرنىڭ مەسىھنىڭ شاگىرتى بولۇشقا ياردەم بېرىشىمىزگە يار-‏يۆلەك بولىدۇ ‏(‏تىتقا 2:‏11—‏14نى ئوقۇڭ)‏.‏ ھازىر،‏ بۇ ماقالىدە ئۈچ مۇھىم سوئالنى مۇھاكىمە قىلايلى:‏ 1)‏ خۇدانىڭ تەربىيە بېرىشى،‏ ئۇ بىزنى ياخشى كۆرىدىغانلىقىنى قانداق ئىسپاتلايدۇ؟‏ 2)‏ خۇدا ئەدەبلەپ تۈزەتكەن ئادەملەرنىڭ مىسالىدىن قانداق ساۋاق ئالىمىز؟‏ 3)‏ بىرسىگە نەىسھەت بېرىپ تۈزەتكەندە،‏ يەھۋانى ۋە ئەيسانى قانداق ئۈلگە قىلالايمىز؟‏

5.‏ تەربىيە بېرىپ تۈزىتىش قانداق ئۇسۇلدا يەھۋانىڭ بولغان مېھىر-‏مۇھەببىتىنى ئەكىس ئەتتۈرىدۇ؟‏

⁵ يەھۋا بىزنى ياخشى كۆرگەنلىكتىن نەسىھەت بېرىپ تۈزىتىدۇ،‏ تەلىم بېرىدۇ ۋە تەربىيىلەيدۇ.‏ بىزنىڭ ئۆزى بىلەن يېقىن مۇناسىۋەتتە بولۇشىمىزنى ۋە مەڭگۈ ياشىشىمىزنى خالايدۇ (‏يوھاننانىڭ 1-‏خېتى 4:‏16‏)‏.‏ يەھۋا ھەرگىزمۇ بىزنى كەمسىتمەيدۇ ۋە خورلاپ ئۆزۈمىزنى ھېچ نېمىگە ئەرزىمەستەك ھېس قىلدۇرمايدۇ (‏پەندى-‏نەسىھەت 12:‏18‏)‏.‏ ئەمەلىيەتتە،‏ ئۇ بىزگە ئىززەت-‏ھۆرمەت بەرگەن،‏ ئۇ ئېسىل پەزىلەتلىرىمىزگە دىققەت قىلىدۇ ۋە تاللاش  ئەركىنلىكىمىزنى ھۆرمەتلەيدۇ.‏ يەھۋا سىزنى مۇقەددەس كىتاب،‏ كىتاب-‏ماتېرىياللار،‏ ئاتا-‏ئانىڭىز ۋە ئاقساقاللار ئارقىلىق تەربىيە بېرىپ تۈزەتكەندە،‏ بۇنى ئۇنىڭ مېھىر-‏مۇھەببىتىنىڭ ئىپادىسى دەپ قارامسىز؟‏ بىز ئۆزىمىزمۇ سېزىپ سەزمەي روھىي جەھەتتە يولدىن چەتنەپ كېتىۋاتقاندا،‏ ئاقساقاللار بىزگە مۇلايىملىق ۋە مېھىر-‏مۇھەببەت بىلەن نەسىھەت بېرىپ تۈزىتىش ئارقىلىق يەھۋانىڭ بىزگە بولغان مېھىر-‏مۇھەببىتىنى ئەكىس ئەتتۈرىدۇ (‏گالاتىلىقلارغا 6:‏1‏)‏.‏

6.‏ ئەدەبلەپ تۈزىتىشنىڭ نەتىجىسىدە ئادەم جامائەتتىكى ۋەزىپىلىرىدىن ئايرىلسىمۇ،‏ بۇ يەھۋانىڭ مېھىر-‏مۇھەببىتىنى قانداق ئەكىس ئەتتۈرىدۇ؟‏

⁶ بەزىدە ئەدەبلەش پەقەت نەسىھەت ياكى مەسلىھەت بېرىش بىلەنلا چەكلەنمەيدۇ.‏ ئەگەر جامائەتتە بىرى ئېغىر گۇناھ قىلغان بولسا،‏ ئۇ ئەمدى بەزى ۋەزىپىلەرنى ئۆز زىممىسىگە ئېلىش شان-‏شەرىپىدىن ئايرىلىدۇ.‏ ھەتتا،‏ بۇنداق ۋەزىيەتتە ھەم ئەدەبلەپ تۈزىتىش يەھۋانىڭ شۇ ئادەمنى ياخشى كۆرىدىغانلىقىنى ئەكىس ئەتتۈرىدۇ.‏ ۋەزىپىلەرنى زىممىسىگە ئېلىپ شان-‏شەرىپىدىن ئايرىلىش،‏ مەسىلەن ئۇ كىشىنىڭ مۇقەددەس كىتابنى تەتقىق قىلىش،‏ چوڭقۇر مۇلاھىزە قىلىش ۋە دۇئا قىلىشقا كۆپرەك ۋاقىت چىقىرىشنىڭ قانچىلىك مۇھىم ئىكەنلىكىنى تونۇپ يېتىشىگە ياردەم بېرەلەيدۇ.‏ شۇ ئارقىلىق ئۇ يەھۋا بىلەن مۇناسىۋىتىنى مۇستەھكەملىيەلەيدۇ (‏زەبۇر 19:‏7‏)‏.‏ ۋاقىت ئۆتۈپ،‏ ئۇ قايتىدىن ۋەزىپىلەرنى زېممىسىگە ئېلىشى مۇمكىن.‏ ھەتتا،‏ بىرى جامائەتتىن ھەيدەلگەن بولسىمۇ،‏ بۇ يەھۋانىڭ مېھىر-‏مۇھەببىتىنى ئەكىس ئەتتۈرىدۇ.‏ چۈنكى،‏ بۇ ئارقىلىق يەھۋا جامائەتنى يامان تەسىردىن ھىمايە قىلىدۇ (‏كورىنتلىقلارغا 1-‏خەت 5:‏6،‏ 7،‏ 11‏)‏.‏ خۇدانىڭ ئەدەبلەپ تۈزىتىشى ھەرقاچان ئادىل بولغانلىقتىن،‏ بۇ جامائەتتىن چىقىرىلغان ئادەمگە ئۆز گۇناھىنىڭ قانچىلىك ئېغىر ئىكەنلىكىنى تونۇپ يېتىشىگە ياردەپ بېرىپ،‏ ئۇنى قىلغانلىرىغا توۋا قىلىشقا دەۋەت قىلىشى مۇمكىن (‏ئەلچىلەر 3:‏19‏)‏.‏

7.‏ شەبنا دېگەن كىم ۋە ئۇ قانداق يامان ئىللەتنى يېتىلدۈرگەن؟‏

⁷ ئەدەبلەپ تۈزىتىشنىڭ مۇھىملىقىنى چۈشىنىش ئۈچۈن،‏ يەھۋا تۈزەتكەن ئىككى ئادەمنىڭ مىسالىنى قاراپ باقايلى.‏ بىرىنچىسى —‏ ھەزەقىيا پادىشاھنىڭ زامانىدا ياشىغان شەبنا ئىسىملىك ئىسرائىللىق كىشى.‏ ئىككىنچىسى —‏ بىزنىڭ كۈنىمىزدە ياشاۋاتقان گراھام بۇرادىرىمىز.‏ شەبنا ھەزەقىيا پادىشاھنىڭ سارىيىدا «ئوردىنى باشقۇرغان» ۋە  چوڭ ئابرويغا ئىگە بولغان (‏يەشايا 22:‏15‏)‏.‏ ئەمما،‏ ئۇ مەغرۇرلىنىپ،‏ ئۆزىگە شان-‏شۆھرەت ئىزدەشكە باشلىغان.‏ ئۇ ھەتتا ئۆزىگە ھەشەمەتلىك قەبرە ياسىتىپ،‏ «ھەيۋەتلىك جەڭ ھارۋۇلىرىدا» يۈرگەن (‏يەشايا 22:‏16—‏18‏)‏.‏

8.‏ يەھۋا خۇدا شەبنانى قانداق ئەدەبلەپ تۈزەتكەنىدى ۋە نەتجىدە نېمە بولدى؟‏

⁸ شەبنا داڭلىق ئادەم بولۇشقا ئىنتىلگەنلىكتىن،‏ خۇدا ئۇنى ۋەزىپىسىدىن ئېلىۋېتىپ،‏ ئېلىئاكىم دېگەن كىشىگە بەرگەن (‏يەشايا 22:‏19—‏21‏)‏.‏ بۇ ۋەقە ئاسسۇرىيە پادىشاھى سانخېرىب يېرۇسالىمغا ھۇجۇم قىلماقچى بولغاندا يۈز بەرگەن.‏ كېيىنرەك،‏ سانخېرىب ھەيۋە قىلىپ يەھۇدىيلارنىڭ روھىنى چۈشۈرۈش ۋە ھەزەقىيا پادىشاھنى باش ئېگىشكە كۆندۈرۈش ئۈچۈن،‏ ئۆزىنىڭ ئەمەلدارلىرى بىلەن قوشۇنلىرىنى ئەۋەتكەنىدى (‏پادىشاھلار 2-‏يازما 18:‏17—‏25‏)‏.‏ شۇ چاغدا،‏ ھەزەقىيا ئۇلار بىلەن سۆھپەتلىشىشكە ئېلىئاكىم بىلەن يەنە ئىككى ئادەمنى ئەۋەتتى.‏ ئۇلارنىڭ بىرى شەبنا بولغان.‏ ئەمدى ئۇ كاتىپ بولۇپ خىزمەت قىلاتتى.‏ بۇنىڭدىن كۆرۈۋېلىشقا بولىدۇكى،‏ شەبنا شۇ ئۆزى ئۆزىنىڭ ۋەزىپىسىدە بولغان ئۆزگىش ئۈچۈن خاپا بولمىغان ياكى نارازىلىق بىلدۈرمىگەن.‏ بىراق،‏ ئۇ كەمتەرلىكنى ئۆگىنىپ،‏ دەرىجىسى تۆۋەنرەك خىزمەتنى قىلىشقا تەييار بولغان.‏ شەبنانىڭ ئۈلگىسىدىن بىز ئۈچ نەرسىنى ئۆگىنەلەيمىز.‏

9—‏11.‏ ئا)‏ شەبنانىڭ ۋەقەسىدىن قانداق مۇھىم نەرسىلەرنى ئۆگىنەلەيمىز؟‏ ئە)‏ يەھۋانىڭ شەبناغا قىلغان مۇئامىسلىدىن نېمىنى ئۆگەندىڭىز؟‏

⁹ بىرىنچىدىن،‏ شەبنانىڭ ئۆز ۋەزىپىسىدىن ئايرىلغانلىقى «مەغرۇرلۇق ھالاك بولۇشتىن ئاۋۋال كېلىدىغانلىقىنى» كۆرسىتىدۇ (‏پەندى-‏نەسىھەت 16:‏18‏)‏.‏ جامائەتتە ئالاھىدە ۋەزىپىلىرىمىز بولسا،‏ باشقىلار بىزنى ھۆرمەتلەپ مۇھىم دەپ قارىسا،‏ بىز كەمتەرلىكنى ساقلايمىزمۇ؟‏ بىزدە بولغان ھەر تۈرلۈك قابىلىيەتلەر ۋە ياخشى نەرسىلەرنىڭ يەھۋا خۇدادىن كەلگەنلىكىنى ئەستە تۇتۇشىمىز كېرەك (‏كورىنتلىقلارغا 1-‏خەت 4:‏7‏)‏.‏ ئەلچى پاۋلۇس:‏ «ھەربىرىڭلارغا ئېيتىمەنكى،‏ ئۆزۈڭلار ھەققىدە ئارتۇقچە ئويلىماڭلار،‏ بەلكى.‏.‏.‏ ساغلام پىكىرلىكنى ساقلاشنى ئويلاڭلار»،‏—‏ دەپ ئاگاھلاندۇرغان (‏رىملىقلارغا 12:‏3‏)‏.‏

¹⁰ ئىككىنچىدىن،‏ يەھۋا شەبنانى قاتتىق تەنقىت قىلغان بولسىمۇ،‏ بىراق بۇ ئۇنىڭ شەبنانىڭ ئۆزگۈرىدىغانلىقىغا ئىشەنگەنلىكىنى كۆرسىتىدۇ (‏پەندى-‏نەسىھەت 3:‏11،‏ 12‏)‏.‏ بۈگۈنكى كۈندە ۋەزىپىسىدىن ئايرىلغان قېرىنداشلار بۇنىڭدىن ياخشى ساۋاق ئالالايدۇ.‏ شۇنداق ئەھۋالدا بولغانلار ئاچچىقلىنىپ،‏ رەنجىپ يۈرگەننىڭ ئورنىغا،‏ يەھۋاغا ئەڭ ياخشىسىنى بېرىشنى داۋاملاشتۇرۇپ،‏ ئەدەبلەپ تۈزىتىشنى يەھۋانىڭ ئۇلارغا كۆرسەتكەن مېھىر-‏مۇھەببىتىنىڭ ئىسپاتى ئىكەنلىكىنى تونۇپ يېتىشى كېرەك.‏ ئەرشتىكى ئاتىمىزنىڭ بىزنى تاشلىمايدىغانلىقى،‏ بولۇپمۇ كەمتەر بولساق،‏ مەڭگۈ بەرىكەتلەيدىغانلىقىنى ئەستە تۇتايلى ‏(‏پېترۇسنىڭ 1-‏خېتى 5:‏6،‏ 7نى ئوقۇڭ)‏.‏ يەھۋانىڭ قولىدا يۇمشاق سېغىز لايدەك بولساق،‏ ئۇ بىزنى تەربىيىلەپ تۈزىتىپ،‏ چىرايلىق شەكىلگە كەلتۈرىدۇ.‏

¹¹ ئۈچىنچىدىن،‏ يەھۋانىڭ شەبناغا قىلغان مۇئامىلىسىدىن ئەدەبلەپ تۈزىتىش ھوقۇقى بولغانلار ھەم ئۈلگە ئالسا بولىدۇ.‏ مەسىلەن،‏ ئېتىقادچى ئاتا-‏ئانىلار ۋە جامائەتنىڭ ئاقساقاللىرى مۇھىم نەرسىنى ئۆگىنەلەيدۇ.‏ يەھۋانىڭ تەربىيە بېرىپ تۈزىتىشى ئۇنىڭ يامانلىقنى ئۆچ كۆرىدىغانلىقى،‏ ئەمما يامانلىق قىلغان گۇناھكارغا كۆڭۈل بۆلىدىغانلىقىنى كۆرستىپ بېرىدۇ.‏ يەھۋا ئادەملەرنىك ياخشى پەزىلەتلىرىگە دىققەت قىلىدۇ.‏ شۇڭا،‏ ئاتا-‏ئانا ياكى ئاقساقال بولسىڭىز،‏ يەھۋانىڭ تەربىيە بېرىپ تۈزىتىش ئۇسۇلىنى چوقۇم ئۈلگە قىلامسىز؟‏ (‏يەھۇدا 22،‏ 23‏)‏.‏

12—‏14.‏ ئا)‏ بەزىلەر يەھۋانىڭ تەربىيە بېرىپ تۈزىتىشىگە قانداق ئىنكاس قايتۇرىدۇ؟‏ ئە)‏ خۇدا سۆزى بىر بۇرادەرنىڭ كۆزقارىشىنى تۈزىتىشىگە قانداق ياردەم بەرگەنىدى ۋە نەتىجىدە نېمە بولدى؟‏

¹² بەك ئەپسۇسكى،‏ بەزى ئادەملەر تەربىيە بېرىپ تۈزەتكەندە خاپا بولۇپ ۋە خۇدادىن يىراقلىشىپ،‏ ھەتتا جامائەتتىن كېتىدۇ (‏ئىبرانىيلارغا 3:‏12،‏ 13‏)‏.‏ بۇ ئەمدى ئۇلارغا ھېچكىم ياردەم  بېرەلمەيدىغانلىقىنى بىلدۈرەمدۇ؟‏ ئەلۋەتتە،‏ ياق!‏ مەسىلەن،‏ گراھام بۇرادەرنى ئالايلى.‏ ئۇ جامائەتتىن ھەيدىلىپ،‏ كېيىن قايتىدىن يەھۋا گۇۋاھچىسى بولىدۇ.‏ ئەمما،‏ ئۇ كېيىن ۋەز خىزمىتىگە ۋە جامائەت يىغىلىشلىرىغىمۇ قاتناشماي يۈرىدۇ.‏ بىر ئاقساقال ئۇنىڭ بىلەن دوست بولۇشقا تىرىشىدۇ.‏ ئاخىرىدا،‏ گراھام ئۆزى بىلەن مۇقەددەس كىتابنى تەتقىق قىلىشنى سورىغانىدى.‏

¹³ شۇ ئاقساقال مۇنداق دېدى:‏ «گراھام تەكەببۇر بولغان.‏ ئۇ ئۆزىنىڭ جامائەتتىن ھەيدەلىشى ئۈچۈن قارار چىقىرىشقا قاتناشقان ئاقساقاللارنى تەنقىت قىلىپ نارازىلىق بىلدۈرگەن.‏ شۇڭا،‏ بىز بىرنەچچە قېتىم تەتقىق ئېلىپ بارغاندا تەكەببۇرلۇق بىلەن ئۇنىڭ ئاقىۋەتلىرى ھەققىدە ئايەتلەرنى مۇھاكىمە قىلدۇق.‏ گراھام خۇدا سۆزىدىن ئىبارەت بۇ ئەينەكتىن ئۆزىنىڭ قىياپىتىنىڭ قانداق ئىكەنلىكىنى ئېنىق كۆرۈپ،‏ ئۆزۈنى ياقتۇرمىدى!‏ بۇ ئاجايىپ نەتىجە ئېلىپ كەلدى!‏ ئۇ تەكەببۇرلۇق دېگەن «لىمنىڭ» كۆزىنى يېپىۋالغانلىقىنى ۋە ئۆزىنىڭ كۆزقارىشىنى ئۆزگەرتىشى كېرەكلىكىنى چۈشەنگەندىن كېيىن،‏ ياخشى تەرەپكە تېزراق ئۆزگىرىشكە ھەرىكەت قىلىشقا باشلىدى.‏ ئۇ يىغىلىشلارغا مۇنتىزىم قاتنىشىپ،‏ خۇدا سۆزىنى پۇختا تەتقىق قىلىشقا باشلاپ،‏ ھەر كۈنى دۇئا قىلىشنى ئادەتكە ئايلاندۇردى.‏ شۇنىڭ بىلەن،‏ گراھام ئائىلە بېشى سۈپىتىدە روھىي ئىشلارنى قايتىدىن قولىغا ئېلىپ،‏ ئايالى بىلەن بالىلىرىغا زور خۇشاللىق ئاتا قىلدى» (‏لۇقا 6:‏41،‏ 42؛‏ ياقۇپ 1:‏23—‏25‏)‏.‏

¹⁴ بۇ ئاقساقال يەنە مۇنداق دېدى:‏ «بىر كۈنى گراھامنىڭ ئېيتقان سۆزلىرى قەلبىمگە بەك تەسىر قىلدى.‏ «ھەقىقەتنى بىلگىنىمگە كۆپ يىل بولدى،‏ ھەتتا پېدائىي ۋەز ئېيتقۇچى بولۇپمۇ خىزمەت قىلدىم.‏ بىراق،‏ پەقەت ھازىر يەھۋانى ياخشى كۆرىمەن،‏ دەپ ھەقىقىي ئېيتالايمەن»،‏—‏ دېدى ئۇ».‏ بىراز ۋاقىتتىن كېيىن،‏ گراھام جامائەتتە مىكروفوننى يەتكۈزۈش ۋەزىپىسىنى قىلىشقا تەيىنلەندى.‏ ئۇ بۇ ۋەزىپىنى خۇشاللىق بىلەن قوبۇل قىلدى.‏ ئاقساقال شۇنداق دېدى:‏ «بۇ ۋەقەدىن شۇنى چۈشەندىمكى،‏ ئادەم خۇدانىڭ ئالدىدا ئۆزىنى تۆۋەن تۇتسا،‏ تەنبىھ ۋە تۈزىتىشنى قوبۇل قىلسا،‏ مول بەرىكەتكە ئېرىشىدۇ!‏»‏

15.‏ نەسىھەت بېرىپ تۈزىتىش ئۈنۈملۈك بولۇشى ئۈچۈن نېمە قىلىشىمىز كېرەك؟‏

¹⁵ ياخشى مۇئەللىم بولۇش ئۈچۈن،‏ ئاۋۋال ياخشى ئوقۇغۇچى بولۇشىمىز كېرەك (‏تىموتىيغا 1-‏خەت 4:‏15،‏ 16‏)‏.‏ شۇنىڭغا ئوخشاش،‏ يەھۋا سىزنى باشقىلارغا نەسىھەت بېرىپ تۈزىتىش ئۈچۈن ئىشلەتسە،‏ سىز كەمتەر بولۇپ،‏ ھاياتىڭىزدا يەھۋانىڭ رەھبەرلىكىگە تايىنىشىڭىز مۇھىم.‏ كەمتەر ئىكەنلىكىڭىزنى كۆرگەندە،‏ باشقىلارنىڭ سىزنى ھۆرمەتلەپ،‏ نەسىھەتلىرىڭىزگە قۇلاق سېلىشى ئاسانراق بولىدۇ.‏ بۇ جەھەتتە بىز ئەيسانىڭ ئۈلگىسىدىن ئۆگىنەلەيمىز.‏

16.‏ ئۈنۈملۈك تەربىيە بېرىپ تۈزىتىش ۋە تەلىم بېرىش ھەققىدە ئەيسانى قانداق ئۈلگە قىلالايمىز؟‏

¹⁶ ئەيسا ھەردائىم،‏ ھەتتا بەك قىيىن چاغلاردا ھەم ئاتىسىغا بويسۇنغانىدى (‏مەتتا 26:‏39‏)‏.‏ ئۇ ئادەملەرگە ئۆز تەلىملىرى بىلەن دانالىقى يەھۋادىن كەلگەنلىكىنى ئېيتقان (‏يوھاننا 5:‏19،‏ 30‏)‏.‏ كەمتەر ۋە ئىتائەتچان بولۇش ئەيساغا باشقىلارغا ھېسداشلىق قىلىدىغان ئۇستاز بولۇشقا ياردەم بەرگەن.‏ بۇ پەزىلەتلىرى سەمىمىي ئادەملەرنى جەلىپ قىلغان ‏(‏لۇقا 4:‏22نى ئوقۇڭ)‏.‏ ئەيسانىڭ مۇلايىم سۆزلىرى چۈشكۈنلۈككە چۈشكەن،‏ ئاجىز ئادەملەرگە تەسەللىي بەرگەن (‏مەتتا 12:‏20‏)‏.‏ ئۇنىڭ ئەلچىلىرى بىر-‏بىرى بىلەن كىم ئۇلۇغراق،‏ دەپ سۆز تالاشقاندا،‏ ئەيسا سەۋر-‏تاقەت كۆرسىتىشى ئاسانغا چۈشمىگەن بولسىمۇ،‏ ئۇ ئۇلارغا مۇلايىملىق ۋە مېھىر-‏مۇھەببەت بىلەن تەربىيە بېرىپ تۈزەتكەن (‏ماركۇس 9:‏33—‏37؛‏ لۇقا 22:‏24—‏27‏)‏.‏

17.‏ جامائەتكە ياخشى يېتەكچىلىك قىلىش ئۈچۈن ئاقساقاللارغا قانداق پەزىلەتلەر كېرەك؟‏

¹⁷ ئاقساقاللار مۇقەددەس كىتاب پرىنسىپلىرىغا ئاساسلىنىپ نەسىھەت بېرىپ تۈزەتكەندە،‏ ھەرقاچان مەسىھنى ئۈلگە قىلىشى كېرەك.‏ شۇنداق قىلىپ،‏ ئۇلار خۇدا ۋە ئۇنىڭ ئوغلىنىڭ رەھبەرلىكىگە  ماس ھەرىكەت قىلىشنى خالايدىغانلىقىنى كۆرسىتىدۇ.‏ ئەلچى پېترۇس مۇنداق يازغان:‏ «سىلەرگە ئىشىنىپ تاپشۇرۇلغان خۇدانىڭ پادىسىنى مەجبۇرىي تۈردە ئەمەس،‏ بەلكى رازىمەنلىك بىلەن،‏ ھارام يول بىلەن پايدا كۆرۈش ئۈچۈن ئەمەس،‏ ئەكسىچە،‏ ئىخلاس بىلەن بېقىڭلار.‏ رەببىمىزنىڭ ئامانىتى ئۈستىدىن ھۆكۈمرانلىق قىلماستىن،‏ پادىغا ئۈلگە كۆرسىتىڭلار» (‏پېترۇسنىڭ 1-‏خېتى 5:‏2—‏4‏)‏.‏ ئاقساقاللار خۇدا بىلەن مەسىھكە خۇشاللىق بىلەن ئىتائەت قىلسا،‏ بۇ ئۇلارنىڭ ئۆزلىرىگە ۋە ئۇلار غەمخورلۇق قىلىدىغانلارغىمۇ پايدا ئېلىپ كېلىدۇ (‏يەشايا 32:‏1،‏ 2،‏ 17،‏ 18‏)‏.‏

18.‏ ئا)‏ يەھۋا ئاتا-‏ئانىلاردىن نېمىنى كۈتمەكتە؟‏ ئە)‏ يەھۋا ئاتا-‏ئانىلارغا قانداق ياردەم بېرىدۇ؟‏

¹⁸ ئائىلىدە تەربىيە بېرىپ تۈزىتىش ۋە تەلىم بېرىشتە ئوخشاش پرىنسىپنى تەدبىقلاشقا بولىدۇ.‏ يەھۋا خۇدا ئائىلە باشلىرىغا:‏ «بالىلىرىڭلارنى تېرىكتۈرمەڭلار،‏ بەلكى ئۇلارنى يەھۋا بۇيرىغاندەك تەربىيىلەڭلار ھەم نەسىھەت بېرىڭلار»،‏—‏ دېگەن (‏ئەفەسلىكلەرگە 6:‏4‏)‏.‏ تەربىيىلەش بىلەن تۈزىتىش قانچىلىك مۇھىم؟‏ پەندى-‏نەسىھەت 19:‏18دە مۇنداق يېزىلغان:‏ «ئۈمىدۋار بولۇپ پەرزەنتىڭنى جازالاپ،‏ تەربىيە بېرىپ تۇرغىن،‏ لېكىن ئۇنى ئۆلگىچە خار بولسۇن،‏ دېگۈچى بولما».‏ يەھۋا ئاتا-‏ئانىلارغا بالىغا تەربىيە بېرىپ تۈزىتىش ۋەزىپىسىنى بەرگەن.‏ ئۇلار بۇ ۋەزىپىنى ئورۇندىمىسا،‏ خۇدانىڭ ئالدىدا جاۋابكارلىققا تارتىلىدۇ!‏ (‏سامۇئىلنىڭ 1-‏يازمىسى 3:‏12—‏14‏)‏.‏ لېكىن،‏ ئاتا-‏ئانىلار دۇئا قىلىپ ياردەم سورىغاندا ۋە مۇقەددەس كىتاب بىلەن مۇقەددەس روھنىڭ يېتەكلىشىگە تايانغاندا،‏ يەھۋا ئۇلارغا كېرەكلىك دانالىق ۋە كۈچ بېرىدۇ ‏(‏ياقۇپ 1:‏5نى ئوقۇڭ)‏.‏

19،‏ 20.‏ ئا)‏ خۇدانىڭ تەنبىھ-‏تەربىيەسىنى قوبۇل قىلىپ تۈزەتسەك،‏ قانداق بەرىكەتلەرگە ئېرىشىمىز؟‏ ئە)‏ كېيىنكى ماقالىدە نېمە ھەققىدە كۆرۈپ چىقىمىز؟‏

¹⁹ ئۆزۈمىز خۇدانىڭ تەربىيە بېرىپ تۈزىتىشىنى قوبۇل قىلساق ۋە باشقىلارنى تۈزەتكەندە يەھۋا ۋە ئەيسانى ئۈلگە قىلساق مول بەرىكەتلەشلەرگە ئېرىشىمىز!‏ ئائىلىمىز بىلەن جامائىتىمىزدە تىنچ-‏خاتىرجەملىك ھۆكۈم سۈرىدۇ.‏ ھەربىر ئادەم ئۆزىنىڭ سۆيۈلىدىغانلىقى،‏ قەدىرلىنىدىغانلىقى ۋە بېخەتەر ئىكەنلىكىنى ھېس قىلىدۇ.‏ بۇ —‏ كەلگۈسىدە بولىدىغان تىنچ-‏ئامانلىق ۋە شاد-‏خوراملىق تولىدىغان ھاياتنىڭ پەقەت كىچىكىنە كارتىنىسى (‏زەبۇر 72:‏7‏)‏.‏ يەھۋانىڭ تەلىم-‏تەربىيىسى،‏ بىزنى ئەرشىتىكى ئاتىنىڭ غەمخورلۇقى ئاسىتىدا،‏ ئىناق-‏ئىتىپاق ۋە تىنچ-‏خاتىرجەم بىر ئائىلە بولۇپ مەڭگۈ ھايات كەچۈرۈشكە ئۆگىتىۋاتىدۇ ‏(‏يەشايا 11:‏9نى ئوقۇڭ)‏.‏ ئەگەر خۇدانىڭ تەنبىھ-‏تەربىيەسىگە توغرا كۆزقاراشتا بولساق،‏ نەسىھەت قىلىپ تۈزەتكەندە ئاسانراق قوبۇل قىلىمىز.‏ بۇ —‏ يەھۋانىڭ بىزگە كۆرسەتكەن چوڭقۇر مېھىر-‏مۇھەببىتىنىڭ دەلىل-‏ئىسپاتى!‏

²⁰ كېيىنكى ماقالىدە،‏ بىز ئائىلىدىكى ۋە جامائەتتىكى نەسىھەت بېرىپ تۈزىتىش ھەققىدە كۆپرەك ئۆگىنىمىز.‏ بىز ئۆزۈمىزنى قانداق تۈزىتەلەيمىز.‏ تەبىھ قوبۇل قىلىپ تۈزۈشتىنمۇ ئېغىر كېلىدىغان يامان ئاقىۋەتتىن قانداق ساقلىنالايدىغانلىقىمىز ھەققىدە كۆرۈپ چىقىمىز.‏