ۋىجدانىڭىزنى خۇدانىڭ قانۇنلىرى ۋە پرىنسىپلىرىغا ماس تەربىيىلەڭ
«ئەسكەرتىشلىرىڭ توغرۇلۇق چوڭقۇر ئويلىنىمەن». —زەبۇر 119:99.
ناخشىلار: 29، 11
1. نېمە سەۋەبتىن بىز ھايۋاناتلاردىن يۇقىرى تۇرىمىز؟
يەھۋا خۇدا ئادەملەرگە ئالاھىدە بىر سوۋغات بەرگەن. بۇ — بىزنىڭ ۋىجدانىمىز. شۇڭا، بۇ ئالاھىدە قابىلىيەت تۈپەيلى، بىز ھايۋاناتلاردىن يۇقىرى تۇرىمىز. ئادەم-ئاتا بىلەن ھاۋا-ئانىنىڭ ۋىجدانى بولغانلىقىنى نەدىن بىلىمىز؟ ئۇلار خۇداغا ئىتائەتسىزلىك قىلغاندا، ئۇنىڭدىن ئۆزلىرىنى يوشۇرغان، سەۋەبى ۋىجدانى ئۇلارنى ئازابلىغان ئىدى.
2. ۋىجدانىمىزنى قايسى مەنىدە كومپاسقا ئوخشىتىشقا بولىدۇ؟ (ماقالىنىڭ بېشىدىكى رەسىمگە قاراڭ).
2 ۋىجدان — توغرا بىلەن ناتوغرىنى پەرقلەندۈرۈش قابىلىيىتى. ۋىجدانى ياخشى تەربىيىلەنمىگەن كىشىنى كومپىسى بۇزۇلغان كېمىگە ئوخشىتىشقا بولىدۇ. شامال ۋە ئوكيان ئېقىملىرى مۇنداق كېمىنى ناتوغرا يۆنىلىشكە ئېلىپ كېتىشى مۇمكىن. توغرا ئىشلەيدىغان كومپاس دېڭىزچىنىڭ توغرا يۆنىلىشتە سەپەر قىلىشىغا ياردەم بېرىدۇ. دەل شۇنىڭغا ئوخشاش، ۋىجدانىمىزنى ياخشى تەربىيىلىسەك، ئۇ بىزنى توغرا يولغا يېتەكلەيدۇ.
3. ۋىجدانىمىزنى توغرا تەربىيىلىمىسەك، نەتىجىسى قانداق بولۇشى مۇمكىن؟
3 ئەگەر ۋىجدانىمىزنى توغرا تەربىيىلىمىسەك، ئۇ بىزنى ناتوغرا ئىشنى قىلىشقا قارشى ئاگاھلاندۇرمايدۇ (1-تىموتىي 4:1، 2). ھەتتا، ۋىجدانىمىز بىزگە «ياماننى ياخشى» دەپ، بىزنى ئىشەندۈرۈشى مۇمكىن (يەشايا 5:20). ئەيسا شاگىرتلىرىغا: «شۇنداق بىر ۋاقىت كېلىدۇكى، سىلەرنى ئۆلتۈرۈۋاتقان ھەربىر كىشى خۇداغا مۇقەددەس خىزمەت قىلىۋاتىمەن دەپ ئويلايدۇ»،— دېگەن (يۇھاننا 16:2). ئىستىپان دېگەن شاگىرتنى ئۆلتۈرگەن كىشىلەرمۇ شۇنداق ئويلىغان (ئەلچىلەر 6:8، 12؛ 7:54—60). تارىخقا نەزەر تاشلىساق، كۆپلىگەن دىندار ئادەملەر خۇدا ئۈچۈن قىلىۋاتىمىز، دەپ ئادەم ئۆلتۈرۈشتەك ئېغىر جىنايەتلەرنى ئۆتكۈزگەن. ئەمما، ئۇلارنىڭ ئىشلىرى ئەمەلىيەتتە خۇدانىڭ قانۇنىغا زىت بولغانىدى (چىقىش 20:13). ئېنىقكى، ئۇلارنىڭ ۋىجدانى ئۇلارنى توغرا يولغا يېتەكلىمىگەن!
4. ۋىجدانىمىز توغرا يولغا يېتەكلىشى ئۈچۈن نېمە قىلىشىمىز كېرەك؟
4 ۋىجدانىمىز توغرا يولغا يېتەكلىشى ئۈچۈن نېمە قىلىشىمىز كېرەك؟ مۇقەددەس كىتابتىكى قانۇنلار ۋە پرىنسىپلار «تەلىم بېرىش، تەنبىھ بېرىش، تۈزىتىش، ھەققانىيلىق يولىدا تەربىيىلەش ئۈچۈن پايدىلىقتۇر» (2-تىموتىي 3:16). دېمەك، بىز مۇقەددەس كىتابنى تەتقىق قىلىشنى ئادەتكە ئايلاندۇرۇشىمىز، ئوقۇغانلىرىمىز ھەققىدە مۇلاھىزە قىلىشىمىز ۋە ئەمەلىيەتتە قوللىنىشىمىز كېرەك. شۇنداق قىلساق، يەھۋاغا ئوخشاش ئوي-پىكىر قىلىشقا ئادەتلىنەلەيمىز. شۇ چاغدا، ۋىجدانىمىز بىزگە توغرا يول كۆرسىتىدىغانلىقىغا ئىشەنچىمىز كامىل بولىدۇ. كېلىڭلار، ۋىجدانىمىزنى تەربىيىلەش ئۈچۈن يەھۋانىڭ قانۇنلىرى ۋە پرىنسىپلىرىنى قانداق قوللانساق بولىدىغانلىقىنى مۇھاكىمە قىلايلى.
ۋىجدانىمىزنى خۇدانىڭ قانۇنلىرى تەربىيىلىسۇن
5، 6. خۇدانىڭ قانۇنلىرى بىزگە قانداق ياردەم بېرىدۇ؟
5 خۇدا قانۇنلىرىنىڭ بىزگە ياردەم بېرىشىنى خالىساق، ئۇلارنى پەقەت ئوقۇپ ياكى بىلىپلا قويماي، شۇ قانۇنلارنى سۆيۈشىمىز ۋە ھۆرمەتلىشىمىز كېرەك. مۇقەددەس كىتابتا: «يامانلىقنى ئۆچ كۆرۈڭلار، ياخشىلىقنى سۆيۈڭلار»،— دەپ يېزىلغان (ئاموس 5:15). بۇنى قانداق قىلالايمىز؟ بىز يەھۋانىڭ كۆز قارىشىغا ئوخشاش كۆز قاراشنى يېتىلدۈرۈشىمىز كېرەك. بىر مىسال كەلتۈرەيلى. سىز ئۇيقۇسىزلىق كېسىلىگە گىرىپتار بولدىڭىز دەيلى. دوختۇر سىزگە پايدىلىق تائاملارنى يېيىش، كۆپرەك بەدەن چېنىقتۇرۇش ۋە تۇرمۇش ئادىتىڭىزنى ئۆزگەرتىش ھەققىدە كۆرسەتمە بېرىدۇ. ئۇنىڭ ئېيتقانلىرى بويىچە قىلىپ، پايدىسىنى كۆرگەندە، دوختۇرنىڭ بەرگەن كۆرسەتمىلىرى ھەققىدە نېمە ئويلايسىز؟
6 شۇنىڭغا ئوخشاش، ياراتقۇچىمىز بىزنى گۇناھنىڭ يامان ئاقىۋىتىدىن قوغداپ، تۇرمۇشىمىزنى تېخىمۇ ياخشىلاش ئۈچۈن قانۇنلارنى بەرگەن. مەسىلەن، خۇدا سۆزىدىن بىز يالغانچىلىق، ئالدامچىلىق، ئوغرىلىق، زىنا، زوراۋانلىق قىلماسلىقىمىز ۋە جىنلار بىلەن ئالاقىدە بولماسلىقىمىز كېرەكلىكىنى ئۆگىنىمىز (پەندى-نەسىھەت 6:16—19-نى ئوقۇڭ؛ ۋەھىيلەر 21:8). يەھۋاغا ئىتائەتچان بولۇشنىڭ قانداق ياخشى نەتىجە ئېلىپ كېلىدىغانلىقىنى كۆرگەندە، ئۇنىڭغا ۋە ئۇنىڭ قانۇنلىرىغا بولغان مېھىر-مۇھەببىتىمىز ئاشىدۇ.
7. مۇقەددەس كىتابتا يېزىلغان مىساللار بىزگە قانداق ياردەم بېرىدۇ؟
7 نېمە توغرا، نېمە ناتوغرا ئىكەنلىكىنى بىلىش ئۈچۈن خۇدا قانۇنىنى بۇزۇپ، ئازاب چېكىشىمىز شەرت ئەمەس. بىز ئۆتمۈشتە باشقىلارنىڭ ئۆتكۈزگەن خاتالىقلىرىدىن ساۋاق ئالالايمىز. بۇ مىساللار مۇقەددەس كىتابتا يېزىلغان. پەندى-نەسىھەت 1:5 -تە مۇنداق دەيدۇ: «دانا كىشى تەلىمگە قولاق سالار ۋە بىلىمىنى تېخىمۇ ئاشۇرار». بۇ بىلىم يەھۋادىن كەلگەن بولۇپ، بۇنىڭدىن ياخشىراق بىلىم يوق! مەسىلەن، داۋۇت يەھۋاغا ئىتائەتسىزلىك قىلىپ، بەتشەبا بىلەن جىنسىي ئەخلاقسىزلىق قىلغاندا، بۇنىڭ ئاقىۋىتى ئېغىر بولغان (2-سامۇئىل 12:7—14). بۇ ۋەقەنى ئوقۇغاندا، ئۆزىڭىزدىن مۇنداق سوئال سوراپ كۆرۈڭ: «داۋۇت ئۆزىنى بۇ ئېغىر ئاقىۋەتلەردىن قانداق ساقلىيالايتتى؟ مەن شۇنىڭغا ئوخشاش ۋەزىيەتتە بولسام، نېمە قىلاتتىم؟ ئەخلاقسىزلىق قىلىشقا ئازدۇرۇلسام، داۋۇتتەك ھەرىكەت قىلىمەنمۇ ياكى يۈسۈپتەكمۇ؟» (يارىتىلىش 39:11—15) گۇناھنىڭ ئاقىۋىتى قانچىلىك ئېغىر بولىدىغانلىقى ھەققىدە ئويلانساق، يامانلىققا تېخىمۇ نەپرەتلىنىدىغان بولىمىز.
8، 9. (1) ۋىجدانىمىز بىزگە نېمە قىلىشقا ياردەم بېرىدۇ؟ (2) يەھۋانىڭ پرىنسىپلىرى ھەققىدە مۇلاھىزە قىلىش ۋىجدانىمىزغا قانداق تەسىر قىلىدۇ؟
8 بىز خۇدا ئۆچ كۆرىدىغان نەرسىلەردىن نېرى تۇرىمىز. ئەگەر مۇقەددەس كىتابتا ۋەزىيىتىمىزگە ماس كېلىدىغان ئېنىق بىر قانۇن يوق بولسىچۇ؟ خۇدا بىزنىڭ نېمە قىلىشىمىزنى خالايدىغانلىقىنى نەدىن بىلىمىز؟ ئەگەر ۋىجدانىمىزنى خۇدانىڭ سۆزىگە ماس تەربىيىلىسەك، مۇنداق ۋەزىيەتتە دانا قارار چىقىرىمىز.
9 يەھۋا بىزنى ياخشى كۆرگەنلىكتىن، ۋىجدانىمىزنى تەربىيىلەش ئۈچۈن پرىنسىپلارنى بەرگەن. ئۇ: «مەن يەھۋا، سېنىڭ خۇدايىڭدۇرمەن. ساڭا پايدىلىق بولغاننى ئۆگەتكۈچىمەن. سېنى مېڭىشىڭ كېرەك بولغان يولدا يېتەكلىگۈچىمەن»،— دەيدۇ (يەشايا 48:17، 18). مۇقەددەس كىتابتىكى پرىنسىپلار ھەققىدە چوڭقۇر مۇلاھىزە قىلىپ، ئۇلارنىڭ قەلبىمىزگە تەسىر قىلىشىغا يول بەرسەك، ۋىجدانىمىزنى تەربىيىلەپ تۈزىتىمىز ۋە تېگىشلىك ئۆزگەرتىشلەرنى قىلىمىز. بۇ بىزگە دانا قارارلارنى چىقىرىشقا ياردەم بېرىدۇ.
خۇدانىڭ پرىنسىپلىرى سىزگە يول-يورۇق كۆرسەتسۇن
10. پرىنسىپ دېگىنىمىز نېمە؟ ئەيسا تەلىم بەرگەندە، پرىنسىپلارنى قانداق ئىشلەتكەن؟
10 پرىنسىپ — ئوي-پىكرىمىزگە تەسىر قىلىدىغان ۋە توغرا قارار چىقىرىشىمىزغا ياردەم بېرىدىغان ئاساسىي ھەقىقەت. يەھۋانىڭ پرىنسىپلىرىنى بىلسەك، ئۇنىڭ كۆز قارىشىنى ۋە نېمە ئۈچۈن بەزى قانۇنلارنى بەرگەنلىكىنى چۈشىنەلەيمىز. ئەيسا پرىنسىپلارنى ئىشلىتىپ، شاگىرتلىرىنىڭ ھەرقانداق ئىشقا تۇتقان مۇئامىلىسى ۋە قىلغان ئىش-ھەرىكەتلىرىنىڭ بىر ئاقىۋەتنى كەلتۈرۈپ چىقىرىدىغانلىقىنى ئۆگەتكەن. مەسىلەن، ئەيسا غەزەپنىڭ زوراۋانلىققا ۋە ئەخلاقسىز ئوي-پىكىرلەرنىڭ زىناغا باشلايدىغانلىقىنى ئېيتقانىدى (مەتتا 5:21، 22، 27، 28). ئەگەر يەھۋانىڭ پرىنسىپلىرىنىڭ بىزنى يېتەكلىشىگە يول بەرسەك، بىز ۋىجدانىمىزنى ياخشى تەربىيىلەپ، خۇداغا شان-شەرەپ كەلتۈرىدىغان قارارلارنى چىقىرىمىز.—1-كورىنتلىقلار 10:31.
يېتىلگەن مەسىھىي باشقىلارنىڭ ۋىجدانىغا ھۆرمەت كۆرسىتىدۇ (11، 12-ئابزايسلارغا قاراڭ)
11. بىر ئادەمنىڭ ۋىجدانى باشقا بىرسىنىڭ ۋىجدانىدىن قانداق پەرقلىنىشى مۇمكىن؟
11 مەسىھىيلەر ۋىجدانىنى مۇقەددەس كىتابقا ماس تەربىيىلىسىمۇ، بەزى مەسىلىلەردە ھەر تۈرلۈك قارار چىقىرىشى مۇمكىن. مەسىلەن، ئىسپىرتلىق ئىچىملىك ئىچىش مەسىلىسىنى ئالايلى. مۇقەددەس كىتابتا ئىسپىرتلىق ئىچىملىك ئىچىش مەنئىي قىلىنمىغان. ئەمما، ئۇنىڭدا ھەددىدىن زىيادە كۆپ ئىچمەسلىكىمىز ياكى مەس بولماسلىقىمىز كېرەكلىكى يېزىلغان (پەندى-نەسىھەت 20:1؛ 1-تىموتىي 3:8). ئۇنداقتا، مەسىھ ئەگەشكۈچىسى ئىسپىرتلىق ئىچىملىك ئىچىش ياكى ئىچمەسلىكنى قارار قىلغاندا، «كۆپ ئىچمىسەملا بولدى، باشقىسى مۇھىم ئەمەس»، دەپ ئويلىسا توغرىمۇ؟ ياق. گەرچە ئۇنىڭ ۋىجدانى ئىسپىرتلىق ئىچىملىكنى ئىچىشكە يول قويسىمۇ، خۇدانىڭ خىزمەتچىسى باشقىلارنىڭمۇ ۋىجدانىنى نەزەردە تۇتۇشى كېرەك.
12. رىملىقلار 14:21-ئايەتتىكى سۆزلەر باشقىلارنىڭ ۋىجدانىنى ھۆرمەتلىشىمىزگە قانداق ياردەم بېرىدۇ؟
12 ئەلچى پاۋلۇس باشقىلارنىڭ ۋىجدانىنى ھۆرمەتلىشىمىز كېرەكلىكىنى كۆرسىتىپ: «قېرىندىشىڭغا پۇتلىكاشاڭ بولماسلىق ئۈچۈن، گۆش يېمەسلىك، شارابمۇ ئىچمەسلىك ياكى باشقا ئىشلارنى قىلماسلىق ئەڭ ياخشىدۇر»،— دېگەن (رىملىقلار 14:21). گەرچە ئىسپىرتلىق ئىچىملىكلەرنى ئىچىشكە ھوقۇقلۇق بولساقمۇ، شۇنداق قىلىش قېرىندىشىمىزنىڭ گۇناھ ئۆتكۈزۈشىگە سەۋەبچى بولسا، بۇ ھوقۇقىمىزدىن ۋاز كېچىشكە تەييار بولۇشىمىز لازىم. بىر قېرىندىشىمىز ھەقىقەتنى بىلمىگەندە ھاراق ئىچىشكە خۇمار بولۇپ، ھازىر تامامەن ئىچمەسلىكنى قارار قىلغان بولۇشى مۇمكىن. بىز ئۇنىڭ بۇرۇنقى ناچار ئادىتىنى قايتىلىشىغا سەۋەبچى بولۇشنى خالىمايمىز (1-كورىنتلىقلار 6:9، 10). شۇ قېرىندىشىمىز ئۆيۈمىزگە مېھمان بولۇپ كەلگەندە، ھاراق-شاراب ئىچىشنى رەت قىلسا، ئۇنى مەجبۇرلايمىزمۇ؟ ئەلۋەتتە، ياق!
13. باشقىلارنىڭ خۇش خەۋەرنى قوبۇل قىلىشىغا ياردەم بېرىش ئۈچۈن، تىموتىي ئۇلارنىڭ ۋىجدانىنى قانداق ھۆرمەتلىگەن؟
13 تىموتىي يىگىرمە ياشلارغا كىرگەندە، خەتنە قىلىش قاتتىق ئاغرىتىدىغان بولسىمۇ، ئۇ شۇنىڭغا ماقۇل بولغان. سەۋەبى، ئۇ ئۆزى ۋەز قىلماقچى بولغان يەھۇدىيلار ئۈچۈن خەتنە قىلىشنىڭ ئىنتايىن مۇھىم بىر ئىش ئىكەنلىكىنى بىلگەن ئىدى. تىموتىيمۇ پاۋلۇسقا ئوخشاش، باشقىلارنىڭ ۋىجدانىنى ھۆرمەتلىگەن (ئەلچىلەر 16:3؛ 1-كورىنتلىقلار 9:19—23). باشقىلارغا ياردەم بېرىش ئۈچۈن، سىزمۇ قۇربانلىق بېرىشكە تەييارمۇ؟
روھىي جەھەتتىن يېتىلىش
14، 15. (1) روھىي جەھەتتىن يېتىلىش ئۈچۈن نېمە قىلىشىمىز كېرەك؟ (2) يېتىلگەن مەسىھىيلەر باشقىلارغا قانداق مۇئامىلە قىلىدۇ؟
14 ھەممىمىز «مەسىھ توغرىسىدىكى باشلانغۇچ تەلىملەر بىلەن توختاپ قالماي، پىشىپ يېتىلىشكە قاراپ» ئىنتىلىشىمىز كېرەك (ئىبرانىيلار 6:1). ھەقىقەتنى بىلگىنىمىزگە ئۇزۇن يىل بولغانلىقى ئۈچۈنلا، بىز يېتىلگەن ئېتىقادچى بولۇپ قالمايمىز. روھىي جەھەتتىن يېتىلىش ئۈچۈن كۆپ كۈچ چىقىرىشىمىز كېرەك. بىز بىلىمىمىزنى ۋە چۈشەنچىمىزنى داۋاملىق ئاشۇرۇشىمىز كېرەك. بۇنىڭ ئۈچۈن، مۇقەددەس كىتابنى ھەر كۈنى ئوقۇشىمىز لازىم (زەبۇر 1:1—3). مۇقەددەس كىتابنى كۈندە ئوقۇغانسېرى، يەھۋانىڭ قانۇنلىرى بىلەن پرىنسىپلىرىنى تېخىمۇ ياخشى چۈشىنىمىز.
15 مەسىھىيلەر ئۈچۈن ئەڭ مۇھىم قانۇن — سۆيگۈ-مۇھەببەت كۆرسىتىش. ئەيسا شاگىرتلىرىغا: «ئەگەر ئاراڭلاردا سۆيگۈ-مۇھەببەت بولسا، بۇنىڭدىن ھەممىسى سىلەرنىڭ مېنىڭ شاگىرتلىرىم ئىكەنلىكىڭلارنى بىلىدۇ»،— دېگەن (يۇھاننا 13:35). مۇقەددەس كىتاب سۆيگۈ-مۇھەببەتنى «پادىشاھلىق قانۇنى» ۋە «تەۋرات قانۇنىنىڭ ئەمەلگە ئاشۇرۇلىشىدۇر» دېگەن (ياقۇپ 2:8؛ رىملىقلار 13:10). سۆيگۈ-مۇھەببەتنىڭ ناھايىتى مۇھىم ئىكەنلىكى بىزنى ھەيران قالدۇرمايدۇ، چۈنكى، مۇقەددەس كىتابتا: «خۇدا ئۆزى مۇھەببەتتۇر»،— دەپ يېزىلغان (1-يۇھاننا 4:8). خۇدا ئۈچۈن مۇھەببەت پەقەت ھېس-تۇيغۇ ئەمەس. ئۇ ئۆز سۆيگۈ-مۇھەببىتىنى ئىش-ھەرىكەتلىرى ئارقىلىق ئىسپاتلايدۇ. ئەلچى يۇھاننا مۇنداق يازغان: «خۇدا بىزگە بولغان مۇھەببىتىنى شۇنداق ئاشكارا قىلدىكى، بىزنى ھاياتلىققا ئېرىشتۈرۈش ئۈچۈن بىردىن-بىر يالغۇز ئوغلىنى بۇ دۇنياغا ئەۋەتتى» (1-يۇھاننا 4:9). بىز يەھۋاغا، ئەيساغا، قېرىنداشلارغا ۋە باشقا ئادەملەرگە مېھىر-مۇھەببەت كۆرسەتكەندە، ئۆزىمىزنىڭ يېتىلگەن مەسىھ ئەگەشكۈچىسى ئىكەنلىكىمىزنى ئىسپاتلايمىز.—مەتتا 22:37—39.
مۇقەددەس كىتاب پرىنسىپلىرى ھەققىدە مۇلاھىزە قىلساق، ۋىجدانىمىز بارا-بارا ئىشەنچىلىك كۆرسەتمىلەرنى بېرىدۇ (16-ئابزايسقا قاراڭ)
16. روھىي جەھەتتىن يېتىلگەنسېرى، نېمە ئۈچۈن پرىنسىپلارنىڭ ھاياتىمىزدا مۇھىم ئىكەنلىكىنى چۈشىنىپ يېتەلەيمىز؟
16 روھىي جەھەتتىن يېتىلگەنسېرى، بىز پرىنسىپلارنىڭ ھاياتىمىزدا بەكمۇ مۇھىم ئىكەنلىكىنى چۈشىنىپ يېتەلەيمىز. ئادەتتە قانۇنلار بەلگۈلۈك بىر ۋەزىيەتتە ئىشلىتىلىدۇ، ئەمما پرىنسىپلارنى ھەرقانداق ۋەزىيەتتە قوللىنىشقا بولىدۇ. مەسىلەن، كىچىك بالا يامان كىشىلەر بىلەن دوست بولۇشنىڭ قانچىلىك خەتەرلىك ئىكەنلىكىنى چۈشەنمەيدۇ. شۇڭا، ئاتا-ئانىسى ئۇنى قوغداش ئۈچۈن قائىدە-تۈزۈملەرنى ئورنىتىدۇ (1-كورىنتلىقلار 15:33). لېكىن بالا ئۆسۈپ-يېتىلگەنسېرى، مۇقەددەس كىتاب پرىنسىپلىرى ھەققىدە ئويلىنىشنى ئۆگىنىدۇ. بۇ پرىنسىپلار ئۇنىڭغا ياخشى دوستلارنى تاللاشقا ياردەم بېرىدۇ (1-كورىنتلىقلار 13:11؛ 14:20-نى ئوقۇڭ). مۇقەددەس كىتاب پرىنسىپلىرى ھەققىدە كۆپرەك مۇلاھىزە قىلغانسېرى، ۋىجدانىمىز بارا-بارا ئىشەنچىلىك كۆرسەتمىلەرنى بېرىدۇ. شۇ چاغدا ھەربىر ۋەزىيەتتە خۇدا قانداق ھەرىكەت قىلىشىمىزنى خالايدىغانلىقىنى ياخشى چۈشىنىمىز.
17. نېمە ئۈچۈن بىزدە دانا قارار چىقىرىشقا ياردەم بېرىدىغان كېرەكلىك قوراللارنىڭ ھەممىسى تولۇق دېيىشكە بولىدۇ؟
17 بىزدە يەھۋانى خۇرسەن قىلىدىغان قارارلارنى چىقىرىشقا ياردەم بېرىدىغان كېرەكلىك قوراللارنىڭ ھەممىسى بار. مۇقەددەس كىتابتىكى قانۇنلار بىلەن پرىنسىپلار بىزگە «ھەر تەرەپلىمە بىلىمگە ئىگە بولۇپ، ھەرقانداق ياخشى ئىشلارنى قىلىشقا تەييار» تۇرۇشقا ياردەم بېرىدۇ (2-تىموتىي 3:16، 17). مۇقەددەس كىتاب پرىنسىپلىرىدىن خۇدانىڭ ئوي-پىكىر قىلىش ئۇسۇلىنى چۈشىنەلەيمىز. بىراق، پرىنسىپلارنى تېپىش ئۈچۈن تىرىشىشىمىز كېرەك (ئەفەسلىكلەر 5:17). بىزگە ياردەم بېرىدىغان قوراللار: «كۈزىتىش مۇنارى ماتېرىياللار كۆرسەتكۈچى»، «يەھۋا گۇۋاھچىلىرىنىڭ ئىزدىنىش يول كۆرسەتكۈچى»، «كۈزىتىش مۇنارى كۇتۇپخانىسى»، «كۈزىتىش مۇنارى تور كۇتۇپخانىسى» ۋە «JW Library» پروگراممىسى. بۇ قوراللارنى ئىشلىتىپ، شەخسىي ئۆگىنىش ۋە ئائىلىۋى ئىبادەتتىن كۆپ پايدا-مەنپەئەتكە ئېرىشىمىز.
مۇقەددەس كىتابقا ماس تەربىيىلەنگەن ۋىجدان بەرىكەتلەرگە ئېرىشتۈرىدۇ
18. خۇدانىڭ قانۇنلىرى بىلەن پرىنسىپلىرىنى تۇرمۇشىمىزدا قوللانساق، نەتىجىسى قانداق بولىدۇ؟
18 يەھۋانىڭ قانۇنلىرى بىلەن پرىنسىپلىرىنى قوللانغاندا، تۇرمۇشىمىز ياخشىلىنىدۇ. زەبۇر 119:97—100-ئايەتلەردە مۇنداق يېزىلغان: «مەن قانۇنىڭنى بەكمۇ سۆيىمەن! كۈن بويى ئۇنىڭ ئۈستىدە ئويلىنىمەن. سېنىڭ بۇيرۇقۇڭ مېنى دۈشمەنلىرىمدىن داناراق قىلار، چۈنكى بويرۇقۇڭ مەڭگۈ مەن بىلەن. مەن بارلىق ئۈستازلىرىمدىن پەم-پاراسەتلىكرەكمەن. چۈنكى ئەسكەرتىشلىرىڭ توغرۇلۇق چوڭقۇر ئويلىنىمەن. مەن ياشانغان كىشىلەردىن پەم-پاراسەتلىكرەك ئىش قىلىمەن. چۈنكى بويرۇقلىرىڭغا بويسۇنىمەن». ئەگەر خۇدانىڭ قانۇنلىرى بىلەن پرىنسىپلىرى ھەققىدە مۇلاھىزە قىلىشقا ۋاقىت چىقارساق، ئەقىل ۋە دانالىق بىلەن ھەرىكەت قىلىدىغان بولىمىز. بىز يەنە ۋىجدانىمىزنى خۇدانىڭ قانۇنلىرى ھەم پرىنسىپلىرىغا ماس تەربىيىلىگەنسېرى، «مەسىھنىڭ كامىل ئۆلچىمىگە يەتكەنگە قەدەر پىشىپ» يېتىلىمىز.—ئەفەسلىكلەر 4:13.
