23-تەتقىق ماقالىسى
ئېھتىيات قىلىڭلاركى، ھېچكىم سىلەرنى ئەسىرلىككە ئېلىۋالمىسۇن!
«ئېھتىيات قىلىڭلاركى، ھېچكىم سىلەرنى بىمەنە پەلسەپە ۋە بىھۇدە قۇرۇق گەپ-سۆزلەر بىلەن ئازدۇرۇپ، ئەسىرلىككە ئېلىۋالمىسۇن. ئۇلارنىڭ ھەممىسى ئىنسانلارنىڭ ئۆرپ-ئادەتلىرى».—كولوسى. 2:8.
37-ناخشا مۇقەددەس كىتاب — خۇدانىڭ ئىلھامى بىلەن يېزىلغان
بۇ ماقالىدە a
1. كولوسىلىقلار 2:4، 8-ئايەتكە ئاساسەن، شەيتان قانداق قىلىپ ئوي-پىكىرىمىزنى ئۆزىگە بېقىندۇرۇشقا تىرىشىدۇ؟
شەيتان بىزنىڭ يەھۋاغا قارشى ئىش قىلىشىمىزنى خالايدۇ. مەقسىتىگە قول يەتكۈزۈش ئۈچۈن، ئۇ بىزنىڭ ئوي-پىكىرىمىزگە تەسىر قىلىپ، ئۆزىگە بېقىندۇرۇشقا تىرىشىدۇ. شەيتان بىزنىڭ ھەۋەسلىرىمىزنى پايدىلىنىپ، ئۇنىڭغا ئەگىشىشىمىز ئۈچۈن بىزنى ئالداشقا ئۇرۇنىدۇ.—كولوسىلىقلار 2:4، 8-نى ئوقۇڭ.
2، 3. (1) كولوسىلىقلار 2:8-ئايەتتە يېزىلغان ئاگاھلاندۇرۇشقا نېمە ئۈچۈن قولاق سېلىشىمىز كېرەك؟ (2) بۇ ماقالىدە نېمىنى كۆرۈپ چىقىمىز؟
2 بىزمۇ شەيتاننىڭ تۇزىقىغا چۈشۈپ قېلىشىمىز مۇمكىنمۇ؟ ئەلۋەتتە، مۇمكىن! كولوسىلىقلار 2:8-ئايەتتە پاۋلۇس خۇداغا ئىشەنمەيدىغان كىشىلەرنى ئەمەس، مۇقەددەس روھ بىلەن مايلانغان مەسىھىيلەرنى ئاگاھلاندۇرغان (كولوسى. 1:2، 5). بىرىنچى ئەسىردىكى مەسىھىيلەر خەۋپ-خەتەر ئاستىدا بولغان، بىز ئۇلاردىنمۇ زور خەۋپ-خەتەر ئاستىدا (1-كورىنت. 10:12). نېمە سەۋەبتىن؟ چۈنكى، شەيتان ئاسماندىن يەرگە تاشلىنىپ، خۇدانىڭ سادىق خىزمەتچىلىرىنى ئازدۇرۇش ئۈچۈن بار كۈچى بىلەن ھەرىكەت قىلىۋاتىدۇ (ۋەھىي. 12:9، 12، 17). شۇنىڭ بىلەن، بىز «رەزىل ئادەملەر ۋە ئالدامچىلار … بارغانسېرى تېخىمۇ يامانلىشىپ» كېتىۋاتقان ۋاقىتتا ياشاۋاتىمىز.—2-تىموت. 3:1، 13.
3 كېلىڭلار، ئوي-پىكىرىمىزگە تەسىر قىلىش ئۈچۈن، شەيتاننىڭ «بىھۇدە قۇرۇپ گەپ-سۆزلەر» قانداق قوللىنىدىغانلىقىنى كۆرەيلى. ئۇنىڭ ئۈچ ھىيلە-مىكىرىنى بىلىۋالايلى (ئەفەس. 6:11). كېلەركى ماقالىدە، بىزنىڭ ئوي-پىكىرىمىزگە يامان تەسىر قىلىدىغان نەرسىلەرگە قانداق قارشى تۇرالايدىغانلىقىمىزنى كۆرۈپ چىقىمىز. ئاۋۋال شەيتان ۋەدە قىلىنغان زېمىنغا كىرگەن ئىسرائىللارنى ئازدۇرغانلىقىدىن قانداق ساۋاق ئالىدىغانلىقىمىزنى كۆرەيلى.
شەيتان بۇتلارغا سەجدە قىلىشقا ئازدۇرغان
4—6. تەكرار قانۇن 11:10—15-ئايەتكە ئاساسەن، ئىسرائىللار ۋەدە قىلىنغان زېمىنغا كىرگەندە، دېھقانچىلىقنىڭ قانداق يېڭى ئۇسۇللىرىنى ئۆگىنىشى كېرەك ئىدى؟
4 شەيتان ئىسرائىللارنى بۇتلارغا سەجدە قىلىشقا ئازدۇرۇشنىڭ ئامالىنى تاپقان. قانداق قىلىپ؟ ئۇ خەلقنىڭ يېمەك-ئىچمەككە موھتاج ئىكەنلىكىنى بىلگەن. شۇنىڭدىن پايدىلىنىپ، شەيتان ئىسرائىللارنى ئۆز دېگىنىنى قىلدۇرماقچى بولغان. ئىسرائىل خەلقى ۋەدە قىلغان زېمىنغا كىرگەندە، دېھقانچىلىق قىلىپ، ھوسۇل ئېلىشنىڭ يېڭى ئۇسۇللىرىنى ئۆگىنىشى كېرەك ئىدى. مىسىردا ئىسرائىللىقلار ئېتىزلارنى نىل دەرىياسىنىڭ سۈيى بىلەن سۇغارغان. بىراق، ۋەدە قىلىنغان زېمىندا چوڭ دەريالار بولمىغانلىقتىن، خەلقنىڭ يامغۇر سۈيى ۋە شەبنەم چۈشكەن ۋاقىتتىن پايدىلىنىشىغا توغرا كەلگەن (تەكرار قانۇن 11:10—15-نى ئوقۇڭ؛ يەشايا 18:4، 5). دېمەك، ئىسرائىللار دېھقانچىلىق قىلىشنىڭ يېڭى ئۇسۇللىرىنى ئۆگىنىشى كېرەك ئىدى. بۇ ئاسان بولمىغان، چۈنكى دېھقانچىلىق بىلەن شۇغۇللانغانلارنىڭ تەڭدىن تولىسى چۆل-باياۋاندا ئۆلۈپ كەتكەن.
شەيتان قانداق قىلىپ ئىسرائىللارنىڭ ئوي-پىكىرىنى ئۆزگەرتەلىگەن؟ (4—6-ئابزاسلارغا قاراڭ) b
5 يەھۋا ئۆز خەلقىگە ئۇلارنىڭ ۋەزىيىتىنىڭ ئۆزگەرگەنلىكىنى چۈشەندۈرگەن. ئاندىن كېيىن، ئۇ ئىسرائىللارنى: «قەلبىڭلارنىڭ ئازدۇرۇلۇپ كەتمىسۇن، ھەق يولدىن چەتنەپ، باشقا ئىلاھلارغا ئىبادەت قىلىپ، ئۇلارغا سەجدە قىلىشتىن ئېھتىيات قىلىڭلار»،— دەپ ئاگاھلاندۇرغانىدى. قارىماققا، بۇ ئاگاھلاندۇرۇش بىلەن دېھقانچىلىقنىڭ ھېچ مۇناسىۋىتى يوقتەك كۆرۈنگەن (تەكرار. قا 11:16، 17). يەھۋا دېھقانچىلىقنىڭ يېڭى ئۇسۇللىرىنى چۈشەندۈرگەندە، نېمە ئۈچۈن يالغان ئىلاھلارغا سەجدە قىلىش ھەققىدە ئاگاھلاندۇرغان؟
6 يەھۋا ئىسرائىللارنىڭ يەر تېرىش ئۇسۇللىرىنى بۇتلارغا سەجدە قىلغان خەلقلەردىن ئۆگىنىشكە ئازدۇرۇلىدىغانلىقىنى بىلگەن. ئەلۋەتتە، شۇ خەلقلەر دېھقانچىلىققا ماھىر بولغان ۋە ئىسرائىللار ئۇلاردىن كۆپ نەرسىلەرنى ئۆگىنەلەيتتى. لېكىن، بۇ خەتەرلىك بولغان، چۈنكى قانانلىقلار بائالغا سەجدە قىلغان ۋە بۇ ئۇلارنىڭ ئوي-پىكىرىگە تەسىر قىلغان. ئۇلارنىڭ ئويىچە، بائال ئاسماننىڭ ئېگىسى بولغان ۋە يامغۇر ياغدۇرالىغان. يەھۋا ئىسرائىللارنىڭ شۇنداق يالغانلارغا ئالدىنىپ قېلىشىنى خالىمىغان. ئەمما، ئىسرائىل خەلقى قايتا-قايتا بائالغا سەجدە قىلىشقا ئۇرۇنغان (سانلار 25:3، 5؛ ھاكىم. 2:13؛ 1-پادىشاھ. 18:18). ئەمدى شەيتاننىڭ ئىسرائىللارنى ئۆز تۇزىقىغا قانداق چۈشەرگەنلىكىگە دىققەت ئاغدۇرايلى.
شەيتاننىڭ ئۈچ تۇزىقى
7. ئىسرائىللار ۋەدە قىلىنغان زېمىنغا كىرگەندە، ئۇلارنىڭ ئىمان-ئېتىقادى قانداق سىنالغانىدى؟
7 شەيتاننىڭ بىرىنچى تۇزىقى — ئىسرائىللارنىڭ تەبىئىي ئارزۇ-ئىستەكلىرىنى قوللىنىش ئىدى. ئۇلار يەرنى سۇغىرىش ئۈچۈن يامغۇرنىڭ يېغىشىنى خالىغان. بىراق، ۋەدە قىلىنغان زېمىندا ئاپرېلدىن سېنتەبىرگىچە يامغۇر بەك ئاز ياغاتتى. ھوسۇلنىڭ مول بولۇشى ئادەتتە ئۆكتەبىر ئېيىدا يېغىشقا باشلىغان يامغۇرغا باغلىق بولغان. شەيتان ئىسرائىللارنى ئالداپ، گۈللەپ راۋاجلىنىش ئۈچۈن ئۇلار يالغان ئىلاھلارغا سەجدە قىلغان قوشنا خەلقلەرنىڭ ئۆرپ-ئادەتلىرىنى قوبۇل قىلىشى كېرەكلىكىگە ئىشەندۈرگەن. شۇ خەلقلەر ئۆز ئىلاھلىرىنىڭ يەرگە يامغۇر ياغدۇرۇشى ئۈچۈن بەلگۈلۈك دىنىي مۇراسىملارنى ئۆتكۈزۈشى كېرەك، دەپ ئىشەنگەن. يەھۋاغا بولغان ئىمان-ئېتىقادى ئاجىز ئىسرائىللارمۇ شۇنىڭغا ئىشەنگەن ۋە ئۇزان ۋاقىتقا سوزۇلغان قۇرغاقچىلىقتىن قورققان، شۇڭا، ئۇلار بائالغا ئاتاپ دىنىي مۇراسىملارنى ئۆتكۈزگەن.
8. شەيتاننى ئىككىنچى تۇزىقى قانداق؟ چۈشەندۈرۈپ بېرىڭ.
8 شەيتاننىڭ ئىككىنچى تۇزىقى — ئىسرائىللارنى ئەخلاقسىز ھەۋەسلەرگە بېرىلىشكە دەۋەت قىلىش. قوشنا خەلقلەر ئىلاھلىرىغا ئىبادەت قىلغاندا، يىرگىنىچلىك جىنسىي ئەخلاقسىزلىق قىلغان. مەسىلەن، ئەرلەر بىلەن ئاياللار ئىبادەتخانىلاردا بۇزۇقچىلىق قىلغان. بۇ خەلقلەر ئوخشاش جىنىسلىق ئادەملەرنىڭ جىنسىي مۇناسىۋەتتە بولۇشىغا ۋە جىنسىي ئەخلاقسىزلىقنىڭ باشقا تۈرلىرىگە كۆز يۇمۇپلا قالماي، ھەتتا ئۇلارنى ئادەتتىكى نەرسە دەپ قارىغان (تەكرار. قا 23:17، 18؛ 1-پادىشاھ. 14:24). شۇنداق ئىشلارنى قىلسا، ئىلاھلار ئۇلارنى بەرىكەتلەپ، يەر مول ھوسۇل بېرىدۇ، دەپ ئىشەنگەن. ئىسرائىللار قوشنا خەلقلەرنىڭ ئەخلاقسىز ئىشلىرىغا ئېزىقىپ، يالغان ئىلاھلارغا سەجدە قىلىشقا باشلىغان. بىراق، ئۇلار ئەمەلىيەتتە شەيتاننىڭ تۇزىقىغا چۈشۈپ قالغان.
9. ھوشىيا 2:16، 17-ئايەتلەرگە ئاساسەن، شەيتان ئىسرائىللارغا يەھۋانىڭ كۆز قارىشىنى ئۇنتۇلدۇرۇش ئۈچۈن قانداق ھەرىكەت قىلغان؟
9 شەيتاننىڭ ئۈچىنچى تۇزىقى قانداق بولغان؟ ئۇ ئىسرائىللارغا يەھۋانىڭ كۆز قارىشىنى ئۇنتۇلدۇرۇشقا تىرىشقان. يەھۋا يەرەمىيا پەيغەمبەرنىڭ زامانىدا ئېيتقاندەك، ساختا پەيغەمبەرلەر ئىسرائىللارنى «بائال سەۋەبلىك» يەھۋانىڭ ئىسىمىنى ئۇنتۇلدۇرغان (يەرەم. 23:27). خۇدانىڭ خەلقى يەھۋانىڭ ئىسىمىنى قوللىنىشتىن قېلىپ، ئۇنىڭ ئورنىغا «ئىگەم» ياكى «خوجايىن» دېگەننى بىلدۈرىدىغان بائالنىڭ نامىنى قوللانغان. شۇ سەۋەبتىن، ئىسرائىللار يەھۋا بىلەن بائالنىڭ ئارىسىدىكى پەرقنى ئېنىق كۆرمىگەن ۋە ھەقىقىي ئىبادەت بىلەن يالغان ئىبادەتنى ئاسانلا ئارىلاشتۇرالىغان.—ھوشىيا 2:16، 17-نى ۋە ئىزاھاتنى ئوقۇڭ.
شەيتان بۈگۈنكى كۈندە قانداق تۇزاقلارنى قۇرىدۇ؟
10. بۈگۈنكى كۈندە شەيتان قانداق تۇزاقلارنى قۇرىدۇ؟
10 شەيتان بۈگۈنمۇ ئوخشاش تۇزاقلارنى قۇرىدۇ. ئۇ ئادەملەرنى ئالداپ، ئۇلارنىڭ تەبىئىي ئارزۇ-ئىستەكلىرىدىن پايدىلىنىدۇ، ئەخلاقسىز ئارزۇ-ھەۋەسلەرگە بېرىلىشكە دەۋەت قىلىدۇ ۋە ئۇلارغا يەھۋانىڭ كۆز قارىشىنى ئۇنتۇلدۇرۇش ئۈچۈن تىرىشىدۇ. ئاۋۋال بۇ ئاخىرقى تۇزىقىنى كۆرۈپ باقايلى.
11. شەيتان قانداق قىلىپ ئادەملەرگە يەھۋانىڭ كۆز قارىشىنى ئۇنتۇلدۇرغان؟
11 شەيتان ئادەملەرگە يەھۋانىڭ كۆز قارىشىنى ئۇنتۇلدۇرۇش ئۈچۈن تىرىشىدۇ. ئەلچىلەرنىڭ ئۆلۈمىدىن كېيىن، ئۆزلىرىنى ئەيسانىڭ ئەگەشكۈچىلىرى، دەپ ئاتىۋالغان كىشىلەر ساختا تەلىماتلارنى تارقىتىشقا باشلىغان (ئەلچى. 20:29، 30؛ 2-سالونىكا. 2:3). بۇ ھەقىقەتتىن چەتنەپ كەتكەنلەر بىردىن-بىر ھەق خۇدانىڭ قانداق شەخس ئىكەنلىكىنى يوشۇرماقچى بولغان. مەسىلەن، ئۇلار مۇقەددەس كىتابنى كۆچۈرۈپ يازغاندا، خۇدا ئىسىمىنىڭ ئورنىغا «رەب» دېگەندەك نام-ئۇنۋانلارنى ئىشلەتكەن. خۇدانىڭ ئىسىمى «رەب» دېگەن ناملار بىلەن ئالماشتۇرۇلغانلىقتىن، مۇقەددەس كىتابنى ئوقۇغان ئادەملەر ئۈچۈن يەھۋانىڭ ۋە يازمىلاردا تىلغا ئېلىنغان باشقا «ئىلاھلارنىڭ» ئارىسىدىكى پەرقنى كۆرۈش قىيىن بولغان (1-كورىنت. 8:5). «رەب» دېگەن نام-ئۇنۋان يەھۋاغىمۇ، ئەيساغىمۇ قارىتا ئىشلىتىلگەن. شۇڭا، ئادەملەرنىڭ ئۇلار دەرىجىسى ئوخشىمايدىغان ئايرىم ئىككى شەخس ئىكەنلىكىنى چۈشىنىشى بەك قىيىن بولغان (يۇھاننا 17:3). شۇنداق قىلىپ ئۈچ بىرلىك توغرۇلۇق تەلىمات پەيدا بولغان. لېكىن، بۇ تەلىمات خۇدانىڭ سۆزىگە زىت. نەتىجىدە، نۇرغۇن ئادەملەر خۇدا سىرلىق بىر شەخس ۋە ئۇنى تونۇپ يېتىش مۇمكىن ئەمەس دەپ ئويلايدۇ. بىراق، بۇ قىپقىزىل يالغانچىلىق!—ئەلچى. 17:27.
شەيتان ئەخلاقسىز ھەۋەسلەرگە بېرىلىشكە دەۋەت قىلىش ئۈچۈن يالغان دىندىن قانداق پايدىلانغان؟ (12-ئابزاسقا قاراڭ) c
12. يالغان دىن نېمىنى كەڭ تارقىتىدۇ؟ رىملىقلار 1:28—31-ئايەتلەردە چۈشەندۈرۈلگەندەك، بۇنىڭ نەتىجىسى قانداق؟
12 شەيتان ئەخلاقسىز ئارزۇ-ھەۋەسلەرگە بېرىلىشكە دەۋەت قىلىدۇ. قەدىمقى ئىسرائىلدا جىنسىي ئەخلاقسىزلىقنى كەڭ تارقىتىش ئۈچۈن شەيتان يالغان دىندىن پايدىلانغان. بۈگۈنكى كۈندىمۇ ئۇ خۇددى شۇنداق ھەرىكەت قىلىدۇ. يالغان دىندىكىلەر جىنسىي ئەخلاقسىزلىققا كۆز يۇمۇپ، ھەتتا ئۇنى ئادەتتىكى نەرسە دەپ ھېسابلايدۇ. نەتىجىدە، خۇداغا خىزمەت قىلىمەن دەپ ئېيتىدىغان ئادەملەر ئۇنىڭ ئېنىق ئەخلاق ئۆلچەملىرىنى رەت قىلغان. بۇنىڭ ئاقىۋىتى قانداق بولغانلىقىنى ئەلچى پاۋلۇس رىملىقلارغا يازغان خېتىدە چۈشەندۈرگەن (رىملىقلار 1:28—31-نى ئوقۇڭ). نېمە «قىلماسلىقى كېرەك ئىشلارنى» ئۆز ئىچىگە ئالىدۇ؟ ئۇلار جىنسىي ئەخلاقسىزلىقنىڭ ھەممە تۈرلىرى، مەسىلەن ئوخشاش جىنىسلىقلارنىڭ مۇھەببەتلىشىشىنى ئۆز ئىچىگە ئالىدۇ (رىملىقلار 1:24—27، 32؛ ۋەھىي. 2:20). بىز خۇدانىڭ خىزمەتچىلىرى بولغاچ، مۇقەددەس كىتابنىڭ ئېنىق تەلىماتلىرىغا ماس ياشىشىمىز بەك مۇھىم!
13. شەيتان ئادەملەرنى ئالداش ئۈچۈن يەنە قانداق ئۇسۇلنى قوللىنىدۇ؟
13 شەيتان ئادەملەرنىڭ تەبىئىي ئارزۇ- ئىستەكلىرىدىن پايدىلىنىدۇ. ئۆزىمىزنى ۋە ئائىلىمىزنى بېقىش ئۈچۈن ئەمگەك قىلىش — تەبىئىي ئىش (1-تىموت. 5:8). ئادەتتە جان بېقىش ئۈچۈن بىز مەكتەپتە تىرىشچانلىق بىلەن ئوقۇيمىز. بىراق، بىز پەخەس بولۇشىمىز كېرەك. بەزى دۆلەتلەردە بىلىم بېرىش پروگراممىسىغا كەسىپنى ئىگىلەشتىن باشقا، پەلسەپىنى ئۆگىنىشمۇ كىرىدۇ. ئوقۇغۇچىلار مۇقەددەس كىتابقا ۋە خۇدانىڭ بار ئىكەنلىكىگە گۇمانىي كۆز قاراش بىلەن قاراشقا دەۋەت قىلىنىدۇ. ئۇنىڭدىن باشقا، مۇئەللىملەر تەدرىجىي تەرەقىيات نەزەرىيىسىنى ئۆگىتىپ، ئوقۇغۇچىلارنى ھاياتلىق تەدرىجىي تەرەققىيات نەتىجىسىدە پەيدا بولغان، دەپ ئىشەندۈرىدۇ (رىملىقلار 1:21—23). شۇنداق تەلىماتلار «خۇدانىڭ دانالىقى» بىلەن زىتتۇر.— «چۈنكى، بۇ دۇنيا ئۆز دانالىقى ئارقىلىق خۇدانى تونۇمىدى. ئەمما، خۇدانىڭ دانالىقى بولسا ۋەز قىلىنىۋاتقان ۋە ئەخمىقانىلىك دەپ قارالغان خەۋەر ئارقىلىق ئۆزىگە ئىشەنگۈچىلەرنى قۇتقۇزۇشتۇر. بۇ دۇنيانىڭ دانالىقى خۇدانىڭ كۆزىدە نادانلىقتۇر، چۈنكى مۇقەددەس يازمىلاردا شۇنداق يېزىلغان: »ئۇ دانىشمەنلەرنى ئۆزلىرىنىڭ ھىيلە-مىكىرلىرى بىلەن تۇزاققا چۈشۈرىدۇ«. يەنە شۇنداق دەپمۇ يېزىلغان: «يەھۋا دانالارنىڭ ئوي-پىكىرىنىڭ بىھۇدە خىيال ئىكەنلىكىنى بىلىدۇ».—1-كورىنت. 1:19–21؛ 3:18–20.
14. بۇ دۇنيانىڭ پەلسەپەسى نېمىگە دەۋەت قىلىدۇ؟
14 بۇ دۇنيانىڭ پەلسەپەسى يەھۋانىڭ ئادىل ئۆلچەملىرىگە سەل قاراشقا، ھەتتا ئۇنىڭغا قارشى تۇرۇشقا دەۋەت قىلىدۇ. يەنە ھاياتىدا مۇقەددەس روھنىڭ مېۋىسىنى كۆرسىتىشنىڭ ئورنىغا، «تەننىڭ ئىشلىرى»نى قىلىشقا ئۈندەيدۇ (گالاتىيا. 5:19—23). نەتىجىدە، ئادەملەر تەكەببۇر، مەنمەنچى ۋە پەقەت «ئۆزىنىلا سۆيىدىغان» بولىدۇ (2-تىموت. 3:2—4). بۇ يامان ئىللەتلەر خۇدانىڭ خىزمەتچىلىرى كۆرسىتىشى كېرەك بولغان كەمتەرلىك ۋە مۇلايىملىق كەبى خىسلەتلەرگە تامامەن قارشىدۇر (2-سام. 22:28). بەك ئەپسۇس، ئالىي مەكتەپكە چۈشكەن بەزى ئېتىقادداشلار ئۆز كۆز قارىشىنى خۇدانىڭ ئەمەس، بۇ دۇنيانىڭ شەكىللەندۈرۈشىگە يول قويغان. بۇنىڭ بىر مىسالىنى كۆرۈپ چىقايلى.
بۇ دۇنيانىڭ پەلسەپەسى ئوي-پىكىرىمىزنى قانداق چىرمىۋېلىشى مۇمكىن؟ (14—16-ئابزاسلارغا قاراڭ) d
15، 16. بىر ياش قېرىندىشىمىزنىڭ مىسالىدىن نېمىنى ئۆگەندىڭىز؟
15 15 يىلدىن ئوشۇق تولۇق ۋاقىتلىق خىزمەت قىلغان بىر قېرىندىشىمىز مۇنداق دەيدۇ: «چۆمۈلدۈرۈلۈشتىن ئۆتكەن گۇۋاھچى بولغانلىقتىن، مەن ئالىي بىلىمگە ئىنتىلىشنىڭ خەۋپ-خەتەرلىرى توغرۇلۇق پات-پات ئوقاتتىم ۋە ئاڭلاتتىم. بىراق، شۇنداق ئاگاھلاندۇرۇشلارنى ئىناۋەتكە ئالمايتتىم. بۇ مەسلىھەتلەر ماڭا ماس كەلمەيدۇ دەپ ئويلايتىم». بۇ ياش قېرىنداش قانداق قىيىنچىلىقلارغا دۇچ كەلدى؟ ئۇ مۇنداق چۈشەندۈرىدۇ: «ئوقۇشۇم بىلەن بەنت بولۇپ كېتىپ، ھەتتا يەھۋاغا بۇرۇنقىدەك ئىچ-باغرىمنى تۆكۈپ دۇئا قىلىشقا ۋاقىت چىقىرالماي قالاتتىم. باشقىلار بىلەن مۇقەددەس كىتاب توغرۇلۇق سۆزلىشىشكە ۋە جامائەت يىغىلىشلىرىغا ياخشى تەييارلىق قىلىشقىمۇ كۈچۈم بولمايتتى. بەختكە يارىشا، مەن ئالىي بىلىم ئېلىش، يەھۋا خۇدا بىلەن بولغان مۇناسىۋىتىمگە يامان تەسىر قىلىۋاتقانلىقىنى چۈشەندىم. شۇڭا، مەن ئالىي مەكتەپنى تاشلاشنى قارار قىلدىم».
16 ئالىي بىلىم ئېلىش قېرىندىشىمىزنىڭ ئوي-پىكىرىگە قانداق تەسىر قىلغان؟ بۇ سوئالغا ئۆزى مۇنداق جاۋاب بېرىدۇ: «ئۇيات بولسىمۇ، ئىقرار قىلىشىم كېرەككى، مەن باشقىلارنىڭ، بولۇپمۇ قېرىنداشلارنىڭ خاتالىقلىرىنى ئىزدەشكە باشلىدىم. ئېتىقادداشلاردىن قولىدىن كەلمەيدىغان نەرسىلەرنى كۈتتۈم ۋە ئۇلاردىن يىراقلىشىپ كەتتىم. ئوي-پىكىرىمنى ئۆزگەرتىش ئۈچۈن بىراز ۋاقىت كەتتى. بۇنىڭدىن شۇنى ئۆگەندىمكى، ئاسماندىكى ئاتىمىز تەشكىلاتى ئارقىلىق بېرىدىغان ئاگاھلاندۇرۇشلارغا سەل قاراشنىڭ ئاقىۋىتى بەك ئېغىر بولىدىكەن. يەھۋا خۇدا مېنى ئۆزۈمدىنمۇ ياخشىراق بىلىدۇ. ئۇنىڭغا قۇلاق سالىمەن!»
17. (1) سىز نېمە قىلىشقا بەل باغلىشىڭىز كېرەك؟ (2) كېيىنكى ماقالىدىن نېمىنى بىلىۋالىمىز؟
17 شەيتان دۇنياسىنىڭ «پەلسەپە ھەم يالغان گەپلىرىگە» ئالدىنىپ قالماسلىققا بەل باغلاڭ! شەيتاننىڭ تۇزاقلىرىغا چۈشۈپ قېلىشتىن پەخەس بولۇڭ (1-كورىنت. 3:18؛ 2-كورىنت. 2:11). ئۇنىڭ سىزگە يەھۋانىڭ كۆز قارىشىنى ئۇنتۇلدۇرۇشىغا يول بەرمەڭ. ھەرۋاقىت يەھۋانىڭ يۇقىرى ئەخلاق ئۆلچەملىرىگە ماس ياشاڭ. يەھۋانىڭ نەسىھەتلىرىگە سەل قارىماڭ. بىراق، سىز مۇشۇ دۇنيانىڭ كۆز قارىشىنى قوبۇل قىلغانلىقىڭىزنى چۈشەنسىڭىز، نېمە قىلسىڭىز بولىدۇ؟ كېيىنكى ماقالىدىن خۇدانىڭ سۆزى بىزگە «مەزمۇت قورغانلارنى غۇلىتىشقا» ياكى قېنىمىزغا سىڭىپ كەتكەن ئوي-خىياللار ۋە ئادەتلەردىن ئايرىلىشقا قانداق ياردەم بېرىدىغانلىقىنى بىلىۋالىمىز — «بىز تۈرلۈك بىمەنە سەپسەتىلەرنى ۋە خۇدانى تونۇشقا توسقۇنلۇق قىلىدىغان بارچە تەكەببۇر كۆز قاراشلارنى ئاغدۇرۇپ تاشلاۋاتىمىز. ھەرقانداق ئوي-پىكىرنى ئەسىرگە ئېلىپ، ئۇنى مەسىھكە بويسۇندۇرۇۋاتىمىز».—2-كورىنت. 10:4، 5.
11-ناخشا يەھۋانىڭ كۆڭلىنى خۇش قىلايلى
a شەيتان ئادەملەرنى ئازدۇرۇشقا ماھىر. كۆپ ئادەملەر نېمە قىلىمەن دېسەم، ئۆز ئىختىيارىم دەيدۇ. لېكىن، ئەمەلىيەتتە ئۇلار شەيتاننىڭ تۇزىقىغا چۈشكەن. بۇ ماقالىدە، بىز شەيتاننىڭ ئادەملەرنى ئالداش ئۈچۈن قوللىنىدىغان بەزى ئۇسۇللىرىنى كۆرۈپ چىقىمىز.
b سۈرەتتە: ئىسرائىللار قانانلىقلار بىلەن ئارىلىشىپ، بائالغا سەجدە قىلىشقا ۋە جىنسىي ئەخلاقسىزلىق قىلىشقا ئېزىقتۇرۇلغان.
c سۈرەتتە: چېركاۋ ئەزالىرى ئوخشاش جىنىسلىقلارنىڭ مۇھەببەتلىشىشىنى قوللايدىغانلىقىنى كۆرسىتىدىغان ئېلان.
d سۈرەتتە: ياش قېرىنداش ئالىي مەكتەپتە ئوقۇۋاتىدۇ. پروفېسسور سىنىپقا ئىلىم-پەن ۋە تېخنىكا ئادەملەرنىڭ ھەممە قىيىنچىلىقلىرىنى ھەل قىلالايدۇ، دەپ ئېيتىۋاتىدۇ. ئوقۇغۇچىلارنىڭ ھەممىسى ئۇنى قىزىقىپ تىڭشاۋاتىدۇ. كېيىنرەك، قېرىندىشىمىز جامائەت يىغىلىشىدا بېرىلىۋاتقان تەلىمگە قىزىقماي، ھەتتا ئېتىقادداشلارنىڭ خاتالىقلىرىنى ئىزدەيدۇ.
