24-تەتقىق ماقالىسى
16-ناخشا قېچىپ بار خۇدانىڭ پادىشاھلىقىفا!
مەڭگۈ يەھۋانىڭ مېھمىنى بولۇڭ!
«ئەي يەھۋا، كىم چېدىرىڭدا مېھمان بولالار؟».—زەبۇر 15:1.
مەركىزى ئىدىيە
داۋاملىق يەھۋانىڭ دوستى بولۇش ئۈچۈن نېمە قىلىش كېرەكلىكىنى ۋە يەھۋا بىزدىن ئۆز دوستلىرىغا قانداق مۇئامىلە قىلىشىمىزنى كۈتىدىغانلىقىنى كۆرۈپ چىقىمىز.
1. زەبۇر 15:1–5-ئايەتلەرنىڭ بىز ئۈچۈن قانداق پايدىسى بار؟
ئالدىنقى ماقالىدە ئۆزىنى يەھۋاغا بېغىشلىغان كىشىلەرنىڭ ياراتقۇچىسى بىلەن يېقىن دوستلۇق مۇناسىۋەتنى كۈچەيتسە، ئۇنىڭ چېدىرىدا مېھمان بولالايدىغانلىقىنى ئۆگەنگەنىدۇق. ئۇنداقتا، ئېنىقراق ئېيتساق، ئۇنىڭ مېھمىنى بولۇش ئۈچۈن نېمىلەرنى قىلىشىمىز كېرەك؟ زەبۇر 15-باب بۇ سوئالغا جاۋاب بېرىدۇ (زەبۇر 15:1–5-نى ئوقۇڭ). بۇ بابتىن خۇدا بىلەن تېخىمۇ يېقىن دوست بولۇش ئۈچۈن نېمىلەرنى قىلىشىمىز كېرەكلىكىنى ئۆگىنەلەيمىز.
2. داۋۇت پادىشاھ يەھۋانىڭ چېدىرىنى تىلغا ئالغاندا، نېمە توغرىسىدا ئويلىغان بولۇشى مۇمكىن؟
2 زەبۇر 15-باب مۇنداق سۆزلەر بىلەن باشلىنىدۇ: «ئەي يەھۋا، كىم چېدىرىڭدا مېھمان بولالار؟ كىم مۇقەددەس تېغىڭدا ماكانلىشالار؟» (زەبۇر 15:1) بۇ سۆزلەرنى يازغان داۋۇت پادىشاھ يەھۋانىڭ ‹چېدىرىنى› تىلغا ئالغاندا، ئېھتىمال بىر مەزگىل گىبېئون شەھىرىگە جايلاشقان «مۇقەددەس چېدىر» ھەققىدە ئويلىغان. ياكى بولمىسا، داۋۇت يەھۋانىڭ ‹مۇقەددەس تېغىنى› تىلغا ئالغاندا، بەلكىم يېرۇسالىمدىكى سىئون تېغى ئۈستىدىكى چېدىر توغرىسىدا ئويلىغان. ئىبادەتخانا سېلىنغىچە، داۋۇت پادىشاھ گىبېئون شەھىرىنىڭ بىرنەچچە كىلومېتىر جەنۇبىغا جايلاشقان سىئون تېغىدا مۇقەددەس چېدىرنى تىكلەپ، ئىچىگە ئەھدە ساندۇقىنى قويغانىدىئ.—2-سام. 6:17.
3. نېمە ئۈچۈن زەبۇر 15-بابنى چۈشىنىش بەك مۇھىم؟ (رەسىمگە ھەم قاراڭ)
3 ئەلۋەتتە، ئىسرائىللارنىڭ كۆپىنچىسى ھېچقاچان چېدىردا خىزمەت قىلالمىغان. پەقەت بەك ئاز ساندىكى كىشىلەر ئەھدە ساندۇقى قويۇلغان چېدىرغا كىرەلەيتتى. بىراق، يەھۋانىڭ ھەممە سادىق خىزمەتچىلىرى ئۇنىڭ بىلەن دوست بولۇپ ۋە شۇ دوستلۇقنى ساقلاپ، ئۇنىڭ سىمۋوللۇق چېدىرىدا مېھمان بولالىغان. شەك-شۈبھىسىزكى، بۇنى ھەممىمىز بەك خالايمىز. يەھۋا بىلەن بولغان دوستلۇقنى ساقلاپ قېلىشىمىز ئۈچۈن، داۋۇت زەبۇر 15-بابتا تىلغا ئالغان بەزى ئېسىل پەزىلەتلەرنى يېتىلدۈرۈشىمىز ۋە كۆرسىتىشىمىز لازىم.
داۋۇت پادىشاھنىڭ كۈنلىرىدە ياشىغان ئىسرائىللار يەھۋانىڭ چېدىرىدا مېھمان بولۇشنى ئاسانلا تەسەۋۋۇر قىلالىغان (3-ئابزاسقا قاراڭ)
نۇقسانسىز ياشاش ۋە توغرا ئىش قىلىش
4. نېمىشقا يەھۋانىڭ دوستى بولۇش ئۈچۈن سۇغا چۆمۈلدۈرۈلۈش يېتەرلىك ئەمەس؟ (يەشايا 48:1)
4 زەبۇر 15:2-ئايەتتە خۇدانىڭ دوستىنى مۇنداق تەسۋىرلىگەن: «نۇقسانسىز ياشايدىغان ۋە توغرا ئىش قىلىدىغان … ئىنسان». چوقۇم بۇنى داۋاملىق قىلىشىمىز كېرەك. بىراق، راستىنلا نۇقسانسىز ۋە توغرا ئىش قىلىپ ياشاش مۇمكىنمۇ؟ ھەئە، مۇمكىن. گەرچە ھېچبىرىمىز مۇكەممەل ئادەم بولمىساقمۇ، خۇداغا بويسۇنۇش ئۈچۈن بار كۈچىمىزنى چىقارساق، ئۇنىڭ كۆز ئالدىدا نۇقسانسىز ھېسابلىنىمىز. ئەگەر ھاياتىمىزنى خۇداغا بېغىشلاپ سۇغا چۆمۈلدۈرۈلسەك، بىز خۇدانىڭ دوستى بولۇش ئۈچۈن بىرىنچى قەدەمنى تاشلىغان بولىمىز. مەسىلەن، قەدىمدە بىر كىشى ئىسرائىل خەلقىگە تەۋە بولسا، بۇ ئۇنىڭ خۇدانىڭ دوستى بولغانلىقىنى بىلدۈرمىگەنىدى. ئۇلارنىڭ بەزىلىرىنىڭ دۇئالىرى سەمىمىي بولمىغان (يەشايا 48:1-نى ئوقۇڭ). چىن يۈرەكتىن يەھۋانىڭ مېھمىنى بولۇشنى خالىغان ئىسرائىللار يەھۋانىڭ ئۆلچەم-تەلەپلىرىنى ئۆگىنىپ، ئۇلارغا ماس ھايات كەچۈرۈشى كېرەك ئىدى. خۇددى شۇنىڭغا ئوخشاش. بۈگۈنكى كۈندە يەھۋانىڭ دوستى بولۇش ئۈچۈن بىز پەقەت سۇغا چۆمۈلدۈرۈلۈشتىن ئۆتۈپ يەھۋا گۇۋاھچىلىرى دەپ ئاتىلىپ قالماي، داۋاملىق توغرا ئىشلارنى قىلىشىمىز كېرەك. بۇنى قانداق قىلالايمىز؟
5. ھاياتىمىزنىڭ ھەرقايسى ساھەلىرىدە خۇداغا بويسۇنۇش نېمىلەرنى ئۆز ئىچىگە ئالىدۇ؟
5 يەھۋانىڭ كۆز ئالدىدا نۇقسانسىز ياشاش ۋە توغرا ئىشنى قىلىش پەقەت دائىم ئىبادەت يىغىلىشلىرىغا بېرىپ قويۇشلا ئەمەس، يەنە كۆپرەك ئىشلارنى ئۆز ئىچىگە ئالىدۇ (1-سام. 15:22). بىز ھاياتىمىزنىڭ ھەرقايسى ساھەلىرىدە، ھەتتا باشقىلار بىزنى كۆرمىسىمۇ، پۈتۈن كۈچىمىز بىلەن خۇداغا بويسۇنۇشىمىز كېرەك (پەند. نە 3:6؛ ۋەز 12:13، 14). ھەتتا ئانچە مۇھىم ئەمەستەك كۆرۈنگەن ئىشلاردىمۇ بىز يەھۋا خۇداغا بويسۇنۇش ئۈچۈن تىرىشىشىمىز لازىم. ئەگەر شۇنداق قىلساق، بىز ھەقىقەتەن يەھۋانى سۆيىدىغانلىقىمىزنى كۆرسىتىمىز ۋە ئۇنىڭ بىزگە بولغان سۆيگۈ-مۇھەببىتى تېخىمۇ كۈچىيىدۇ.—يۇھاننا 14:23؛ 1-يۇھاننا 5:3.
6. ئىبرانىيلار 6:10–12-ئايەتلەرگە ئاساسلانغاندا، قايسى ئىش ئۆتمۈشتە قىلغان ئىشلىرىمىزدىن مۇھىمراق؟
6 يەھۋا ئۆتمۈشتە ئۇنىڭ ئۈچۈن قىلغان ئىشلىرىمىزنى بەك قەدىرلەيدۇ. لېكىن، يەھۋانىڭ چېدىرىدا داۋاملىق ئۇنىڭ مېھمىنى بولۇپ قېلىش ئۈچۈن پەقەت ئۆتمۈشتە قىلغان توغرا ئىشلىرىمىز يېتەرلىك ئەمەس. ئىبرانىيلار 6:10–12 (ئوقۇڭ) ئايەتلەر بۇنى ئېنىق چۈشەندۈرۈپ بېرىدۇ. يەھۋا ئۆتمۈشتە قىلغان توغرا ئىشلىرىمىزنى ھەرگىزمۇ ئۇنتۇمايدۇ. بىراق، ئۇ بىزنىڭ پۈتۈن ۋۇجۇدىمىز بىلەن ئاخىرغىچە ئۇنىڭغا خىزمەت قىلىشىمىزنى خالايدۇ. ياخشىلىق قىلىشتىن «بوشىشىپ قالمىساق»، مەڭگۈ يەھۋانىڭ دوستى بولالايمىز.—گالاتىيا. 6:9.
چىن قەلبتىن ھەقىقەتنى سۆزلەش
7. چىن قەلبتىن ھەقىقەتنى سۆزلەش نېمىنى ئۆز ئىچىگە ئالىدۇ؟
7 كىشى يەھۋانىڭ چېدىرىدا ئۇنىڭ مېھمىنى بولۇشنى خالىسا، چىن قەلبىدىن ھەقىقەتنى سۆزلىشى كېرەك (زەبۇر 15:2). بۇ پەقەت يالغان ئېيتماسلىقنى ئۆز ئىچىگە ئالمايدۇ. يەھۋا بىزنىڭ ھەممە گەپ-سۆزلىرىمىز ۋە ئىش-ھەرىكەتلىرىمىزدە راستچىل بولۇشىمىزنى خالايدۇ (ئىبرانىي. 13:18). بۇ بەك مۇھىم، چۈنكى يەھۋا «قۇۋ-مەككار ئادەمدىن يىرگىنەر، لېكىن ھەققانىي كىشىنى يېقىن دوست تۇتار».—پەند. نە 3:32.
8. بىز قانداق ئىش-ھەرىكەتلەردىن يىراق تۇرىشىمىز كېرەك؟
8 «چىن قەلبىدىن ھەقىقەتنى سۆزلەيدىغان» كىشىلەر باشقىلارنىڭ كۆز ئالدىدا خۇداغا بويسۇنۇپ، يالغۇز قالغاندا يوشۇرۇنچە خۇدانىڭ قانۇنلىرىنى بۇزمايدۇ (يەشايا 29:13). ئۇلار ساختىپەزلىك قىلمايدۇ. ساختىپەز ئادەم يەھۋانىڭ بەزى قانۇنلىرىنى ئەقىلگە مۇۋاپىق ئەمەس دەپ گۇمانلىنىشقا باشلىشى مۇمكىن (ياقۇپ 1:5–8). ئۇ ئانچە مۇھىم ئەمەستەك كۆرۈنگەن بەزى ئىشلاردا يەھۋاغا بويسۇنماسلىقى مۇمكىن. كېيىن، ئىتائەتسىزلىكىنىڭ ھېچقانداق ئاقىۋەتلىرىنى كۆرمىسە، بەزى تېخىمۇ يامان ئىشلارنى قىلىشقا باشلىشى مۇمكىن. ئاقىۋەتتە بۇنداق كىشىنىڭ ئىبادىتىنى يەھۋا قوبۇل قىلمايدۇ (ۋەز 8:11). لېكىن، بىز ھەممە ئىشلاردا راستچىل بولۇشىمىزنى خالايمىز.
9. ھەزرىتى ئەيسانىڭ تۇنجى قېتىم ناتانيەلنى كۆرگەندە قىلغان سۆزلىرىدىن نېمىلەرنى ئۆگىنەلەيمىز؟ (رەسىمگە ھەم قاراڭ)
9 ھەزرىتى ئەيسا تۇنجى قېتىم ناتانيەل بىلەن كۆرۈشكەن چاغدىكى سۆھبىتىدىن سەمىمىي بولۇشنىڭ مۇھىملىقىنى چۈشىنىپ يېتەلەيمىز. فىلىپ دوستى ناتانيەلنى ئەيسانىڭ ئالدىغا باشلاپ كەلگەندە، ئاجايىپ بىر ۋەقە يۈز بەرگەن. گەرچە ھەزرىتى ئەيسا ناتانيەلنى ھېچقاچان كۆرمىگەن بولسىمۇ، ئەيسا: «مانا بۇ، كۆڭلىدە قىلچە ھىيلە-مىكىرى يوق ھەقىقىي بىر ئىسرائىل!»،— دېگەنىدى (يۇھاننا 1:47). ئەلۋەتتە، ئەيسا ئۆز شاگىرتلىرىنى سەمىمىي كىشىلەر دەپ قارىغان. بىراق، ئۇ ناتانيەلنىڭ ئالاھىدە سەمىمىيلىكىنى كۆرگەن. گەرچە ناتانيەل بىزگە ئوخشاش نامۇكەممەل بولغان بولسىمۇ، ئۇ ساختىپەز بولمىغان. ئەكسىنچە، ھەممە ئىشلاردا راستچىل بولغان. ھەزرىتى ئەيسا ناتانيەلنىڭ سەمىمىيلىكىدىن مەمنۇن بولۇپ، ئۇنى ماختىغان. شەك-شۈبھىسىزكى، ھەممىمىز ئەيسا مەسىھنىڭ بىزگە ھەم شۇنداق سۆزلەرنى قىلىشىنى خالايمىز.
فىلىپ كۆڭلىدە قىلچە ھىيلە-مىكىرى يوق ناتانيەلنى ھەزرىتى ئەيسانىڭ ئالدىغا ئېلىپ كەلدى. بىز ھەققىدە ئوخشاشلا دېيىشكە بولامدۇ؟ (9-ئابزاسقا قاراڭ)
10. نېمە ئۈچۈن تىلىمىزنى تىزگىنلەشنى بىلىشىمىز كېرەك؟ (ياقۇپ 1:26)
10 زەبۇر 15-بابتىكى تەلەپلەرنىڭ كۆپىنچىسى بىزنىڭ باشقىلارغا قانداق مۇئامىلە قىلىشىمىزغا باغلىنىشلىق. زەبۇر 15:3-ئايەتتە يەھۋانىڭ چېدىرىدا مېھمان بولغان كىشى ھەققىدە مۇنداق يېزىلغان: «ئۇنىڭ تىلى تۆھمەت قىلماس، ئۇ قوشنىسىغا ھېچقانداق يامانلىق قىلماس، ئۇ دوستلىرىنى ھاقارەت قىلماس». ئەگەر تىلىمىزنى تىزگىنلىمىسەك، باشقىلارغا زىيان يەتكۈزۈپ، يەھۋانىڭ چېدىرىدا مېھمان بولۇش ھوقۇقىدىن شان-شەرىپىدىن ئايرىلىپ قېلشىمىز مۇمكىن.—ياقۇپ 1:26-نى ئوقۇڭ.
11. تۆھمەت دېگەن نېمە ۋە تۆھمەت قىلغان كىشى توۋا قىلمىسا، ئاقىۋىتى قانداق بولىدۇ؟
11 زەبۇر يازغۇچىسى تۆھمەت دېگەن سۆزگە ئالاھىدە دىققەت قىلغان. تۆھمەت دېگەن نېمە؟ ئادەتتە تۆھمەت ئادەمنىڭ نام-ئابرويىغا داغ تەگكۈزىدىغان كۇپۇرلۇق سۆزلەردۇر. ئەگەر بىرسى باشقىلارغا تۆھمەت قىلىپ، قىلغانلىرىغا توۋا قىلمىسا، ئۇ يەھۋا گۇۋاھچىلىرىنىڭ جامائىتىدىن چىقىرىلىدۇ.—يەرەم. 17:10.
12، 13. قايسى ۋەزىيەتلەردە ئويلىماي دوستلىرىمىزنىڭ نام-ئابرويىغا داغ تەگكۈزىشىمىز مۇمكىن؟ (رەسىمگە ھەم قاراڭ)
12 زەبۇر 15:3-ئايەت، يەھۋانىڭ مېھمانلىرى ئۆز قوشنىلىرىغا يامانلىق قىلمايدىغانلىقى ۋە ئۆز دوستلىرىنىڭ نام-ئابرويىغا داغ تەگكۈزمەيدىغانلىقىنى ئېسىمىزگە سالىدۇ. دوستلىرىمىزنىڭ نام-ئابرويىغا قانداق داغ تەگكۈزىشىمىز مۇمكىن؟
13 ئەگەر بىرى ھەققىدە سەلبىي گەپ-سۆزلەرنى تارقاتساق، مەقسەتسىز ھالدا ئۇنىڭ نام-ئابرويىغا داغ تەگكۈزىشىمىز مۇمكىن. ئۈچ ۋەزىيەت توغرىسىدا ئويلاپ بېقىڭ: (1) بىر قېرىنداش پىدائىي ۋەز ئېيتىش خىزمىتىنى توختاتتى. (2) بىر جۈپ ئەر-ئايال بەيتەلدە خىزمەت قىلىشتىن توختاپ قالدى. (3) بىر بۇرادەر ئەمدى ئاقساقال ياكى خىزمەت ياردەمچىسى بولۇپ خىزمەت قىلىشتىن توختىدى. شۇنىڭ بىلەن، بىز ئۇلارنىڭ ۋەزىيىتى ئۆزگەرگەنلىكىنىڭ سەۋەبلىرىنى ۋە شۇلارغا بولغان ئۆز كۆز قارىشىمىزنى باشقىلارغا ئېيتىپ بېرىش توغرىمۇ؟ ئەمەلىيەتتە، ئۇلارنىڭ ۋەزىيىتى ئۆزگەرگەنلىكىنىڭ نۇرغۇن سەۋەبلىرىنى بىلمەيمىز. بۇنىڭدىن تاشقىرى، يەھۋانىڭ چېدىرىدا مېھمان بولغان كىشى «قوشنىسىغا ھېچقانداق يامانلىق قىلماس ۋە ئۇ دوستلىرىنى ھاقارەت قىلماس».
باشقىلار ھەققىدە سەلبى گەپ-سۆزلەرنى تارقىتىش ئاسانلا تۆھمەتكە ئايلىنىپ كېتىشى مۇمكىن (12، 13-ئابزاسلارغا قاراڭ)
يەھۋادىن ئەيمىنىدىغانلارنى ھۆرمەتلەش
14. يەھۋانىڭ مېھمانلىرى رەزىل كىشىلەرنى قانداق رەت قىلىدىغانلىقىنى چۈشەندۈرۈپ بېرىڭ.
14 زەبۇر 15:4-ئايەت يەھۋانىڭ دوستى رەزىل كىشىنى رەت قىلىدىغانلىقىنى ئېيتىدۇ. ئۇنداقتا، بىرىنىڭ رەزىل ياكى ئەمەسلىكىنى قانداق بىلەلەيمىز؟ بىز نامۇكەممەل بولغاچ، كىم رەزىل ياكى ئەمەسلىكىنى قارار قىلىش ھوقۇقىمىز يوق. نېمە ۈچۈن؟ بەلكىم، بەزىلەر مىجەزى ئوچۇق چىقىشقاق بىرىنى ياقتۇرۇپ، ئۆزىمىزنى ئۇنىڭغا يېقىن ھېس قىلىشىمىز ياكى مىجەزى بىزگە ياقمايدىغان بىرىدىن بىزار بولۇپ، ئۇنىڭدىن ئۆزىمىزنى ئېلىپ قېچىشىمىز مۇمكىن. شۇڭلاشقا، پەقەت يەھۋانىڭ نەزىرىدە رەزىل دەپ قارالغان كىشىنى رەت قىلىشىمىز كېرەك (1-كورىنت. 5:11). رەزىل كىشىلەر — توۋا قىلماي يامان ئىشلارنى قىلىدىغان ئېتىقادىمىز ۋە كۆز قارىشىمىزنى ھۆرمەتلىمەيدىغان ياكى يەھۋا بىلەن بولغان دوستلۇق رىشتىمىزنى ئاجىزلاشتۇرۇشقا تىرىشىدىغان ئىنسانلاردۇر.—پەند. نە 13:20.
15. يەھۋادىن ئەيمىنىدىغان كىشىلەرنى ھۆرمەتلەشنىڭ قانداق يولى بار؟
15 زەبۇر 15:4-ئايەت يەھۋادىن ئەيمىنىدىغان كىشىلەرنى ھۆرمەتلىشىمىز كېرەكلىكىنى ئېيتىدۇ. شۇڭا، يەھۋانىڭ دوستلىرىغا ياخشىلىق قىلىش ۋە ھۆرمەت كۆرسىتىش ئۈچۈن پۈتۈن كۈچىمىز بىلەن تىرىشىمىز (رىملىقلار 12:10). ئۇنداقتا، بۇنى قانداق قىلالايمىز؟ زەبۇر 15:4-ئايەتنىڭ داۋامىدا بۇنىڭ بىر يولى كۆرسىتىلگەن — يەھۋانىڭ چېدىرىدا مېھمان بولغان كىشى، ھەتتا ئۆزىگە زىيانلىق بولسىمۇ، قىلغان قەسىمىنى بۇزماي ئۆز سۆزىدە تۇرىدۇ. ئەگەر ئۆز ۋەدىمىزدە چىڭ تۇرمىساق، باشقىلارنىڭ كۆڭلىنى ئاغرىتىشىمىز مۇمكىن (مەتتا 5:37). مەسىلەن، يەھۋا چېدىرىدا مېھمان بولغان ئەر-ئايالنىڭ تويدا بەرگەن قەسىمىدە چىڭ تۇرۇشىنى خالايدۇ. ئۇنىڭدىن باشقا، ئاتا-ئانىلار ئۆز بالىلىرىغا بەرگەن ۋەدىلىرىگە چىڭ تۇرۇشقا تىرىشسا، يەھۋا خۇرسەن بولىدۇ. بىز يەھۋانى ۋە قوشنىمىزنى سۆيگەچ، ۋەدىمىزدە چىڭ تۇرۇش ئۈچۈن قولىمىزدىن كېلىشىچە تىرىشىمىز.
16. يەھۋانىڭ دوستلىرىغا ھۆرمەت كۆرسىتىشنىڭ يەنە قانداق يولى بار؟
16 خۇدانىڭ دوستلىرىغا ھۆرمەت كۆرسىتىشنىڭ يەنە بىر يولى مېھماندوست ۋە قولى ئوچۇق ئادەم بولۇش (رىملىقلار 12:13). جامائەت يىغىلىشلىرى، ۋەز خىزمىتىدىن باشقا چاغلاردىمۇ ئېتىقادداشلىرىمىز بىلەن ۋاقىت ئۆتكۈزسەك، پەقەت قېرىنداشلىرىمىز بىلەنلا ئەمەس، يەھۋا بىلەنمۇ دوستلۇق رىشتىسىنى كۈچەيتەلەيمىز. ئۇنىڭدىن باشقا، مېھماندوست ۋە سېخى بولۇشتا يەھۋا خۇدانى ئۈلگە قىلغان بولىمىز.
پۇلپەرەسلىكتىن نېرى بولۇڭ
17. نېمە ئۈچۈن زەبۇر 15-بابتا پۇل توغرىسىدا يېزىلغان؟
17 مۇقەددەس كىتاب يەھۋانىڭ مېھمىنى «پۇلىنى ئۆسۈمىنى ئېلىش ئۈچۈن قەرز بەرمەس، ئۇ پارا ئېلىپ بىگۇناھقا زىيان يەتكۈزمەس»،— دەيدۇ (زەبۇر 15:5). نېمە ئۈچۈن زەبۇرنىڭ ئايەتلىرىدە پۇل توغرىسىدا يېزىلغان؟ چۈنكى، كىشى پۇلپەرەسلىككە بېرىلىپ كەتسە، ئۇ پۇلنى ئىنسانلاردىن، ھەتتا يەھۋادىن مۇھىمراق كۆرۈپ، نەتىجىدە باشقىلارغا زىيان يەتكۈزۈپ، ئۆزىنىڭ ياراتقۇچى بىلەن بولغان مۇناسىۋىتىگە زىيان يەتكۈزۈشى مۇمكىن (1-تىموت. 6:10). قەدىمقى زاماندا، بەزىلەر كەمبەغەل قېرىنداشلىرىغا پۇل قەرز بېرىپ، پۇلنىڭ ئۆسۈمىنى ئېلىپ، پايدىغا ئېرىشكەن. يەنە بەزى سوتچىلار پارا ئېلىپ، بىگۇناھ كىشىلەر ئۈستىدىن ناھەق ھۆكۈم چىقارغان. بۇنداق قىلمىشلارنى يەھۋا ئۆچ كۆرىدۇ.—ھەزەك. 22:12.
18. پۇلغا بولغان كۆز قارىشىمىزنى تەكشۈرۈشكە قانداق سوئاللار ياردەم بېرەلەيدۇ؟ (ئىبرانىي. 13:5)
18 ئۆزىمىزنىڭ پۇلغا بولغان كۆز قارىشىمىزنى ياخشىراق تەكشۈرۈپ كۆرۈش بەك مۇھىم. ئۆز-ئۆزىڭىزدىن سوراپ كۆرۈڭ: «مەن دائىم پۇل ياكى بىر نەرسىلەرنى سېتىۋېلىش توغرۇلۇق ئويلىنىمەنمۇ؟ مەن قەرز ئالسام، ماڭا قەرز بەرگەن كىشى ھازىرچە بۇ پۇلغا مۇھتاج ئەمەس دەپ، قەرز قايتۇرۇشنى ئارقىغا سوزىمەنمۇ؟ پۇلۇم بولغانلىقىدىن ئۆزۈمنى مۇھىم كىشى دەپ قارايمەنمۇ ياكى ماڭا سېخىيلىق كۆرسىتىش قىيىنمۇ؟ بەزى قېرىنداشلارنىڭ پۇلى كۆپ بولسا، ئۇلار پۇلنى يەھۋادىن كۆپرەك ياخشى كۆرىدۇ دەپ ئويلايمەنمۇ؟ مەن باي ئېتىقادداشلارنى دوست تۇتۇپ، كەمبەغەللەر بىلەن ئارىلاشماي يۈرىمەنمۇ؟» ئۆزىمىزدىن بۇنداق سوئاللارنى سوراش مۇھىم، چۈنكى بۇ زور شان-شەرىپىگە ئېرىشتۇق، يەنى يەھۋا ئۆز چېدىرىدا بىزنى مېھمان بولۇشقا تەكلىپ قىلدى. شۇڭلاشقا، پۇلپەرەسلىكنى يۈرىكىمىزدىن تۈپ يىلتىزى بىلەن قومۇرۇپ تاشلىشىمىز كېرەك. شۇ چاغدىلا، داۋاملىق يەھۋانىڭ چېدىرىدا مېھمان بولۇپ قالىمىز ۋە ياراتقۇچىمىز ھەم بىزنى ئەسلا تاشلىمايدۇ.—ئىبرانىيلار 13:5-نى ئوقۇڭ.
يەھۋا خۇدا ئۆز دوستلىرىنى سۆيىدۇ
19. يەھۋانىڭ تەلەپلىرىنىڭ ئاساسىي مەقسىتى نېمە؟
19 زەبۇر 15-باب: «بۇنداق قىلغان ئىنسان ئەسلا تەۋرەنمەس»،— دېگەن سۆزلەر بىلەن ئاياقلىشىدۇ (زەبۇر 15:5). زەبۇر يازغۇچىسى خۇدانىڭ تەلەپلىرىنىڭ ئاساسىي مەقسىتىنى ئاشكارا قىلىدۇ. يەھۋا ۇدا بىزنىڭ بەختلىك تۇرمۇش كەچۈرۈشىمىزنى خالايدۇ. يەھۋانىڭ كۆرسەتمىسى بويىچە ياشىساقلا، ئۇنىڭ ھىمايىسىگە ۋە بەرىكىتىگە ئېرىشىمىز.—يەشايا 48:17.
20. يەھۋانىڭ مېھمانلىرى قانداق كېلەچەكنى تۆت كۆزى بىلەن كۈتمەكتە؟
20 يەھۋانىڭ مېھمانلىرى ئاجايىپ كېلەچەكنى تۆت كۆزى بىلەن كۈتمەكتە. مەسىھ قىلىنغان سادىق ئېتىقادچىلار ھەزرىتى ئەيسا ئاسماندا تەييارلاپ قويغان كۆپ ماكانلارغا ئېرىشىدۇ (يۇھاننا 14:2). يەردە ياشاش ئۈمىدى بار كىشىلەر ۋەھىيلەر 21:3-ئايەتتىكى بېشارەتلىك سۆزلەرنىڭ ئەمەلگە ئېشىشىنى تەقەززالىق بىلەن كۈتمەكتە. يەھۋا مېھرىبانلىق بىلەن ھەممىمىزنى ئۆزىنىڭ دوستلىرى بولۇپ، ئۇنىڭ چېدىرىدا مەڭگۈ مېھمان بولۇشقا تەكلىپ قىلىپ كەلمەكتە. بىز بۇ شان-شەرەپ ئۈچۈن بەك مىننەتدارمىز!
4-ناخشا خۇدا ئالدىدا ياخشى نام-ئاتاق تىكلەش
