25-تەتقىق ماقالىسى
23-ناخشا يەھۋا بىزنىڭ كۈچىمىز
يەھۋانىڭ «تىرىك خۇدا» ئىكەنلىكىنى ئۇنتۇماڭ
«يەھۋا تىرىك خۇدا!».—زەبۇر 18:46.
مەركىزى ئىدىيە
بىز ئىبادەت قىلىدىغان يەھۋا «تىرىك خۇدا!» بۇنى ئەستە تۇتۇش ئارقىلىق زور بەرىكەتلەرگە ئېرىشىمىز.
1. يەھۋا گۇۋاھچىلىرىنىڭ قىيىنچىلىقلارغا قارىماي، داۋاملىق خۇداغا ئىبادەت قىلىشىغا نېمە ياردەم بېرىدۇ؟
مۇقەددەس كىتاب بىز ياشاۋاتقان بۇ زاماندا ئىنتايىن تەس ۋاقىتلار كېلىدىغانلىقىنى ئېيتىدۇ (2-تىموت. 3:1). يەھۋا گۇۋاھچىلىرى بۇ دۇنيادا ھەربىر ئىنساننىڭ بېشىغا كېلىدىغان قىيىنچىلىقلارغا دۇچ كېلىپ قالماي، يەنە باشقا قارشىلىقلار ۋە زىيانكەشلىكلەرگە ئۇچرايدۇ. بۇنداق قىيىنچىلىقلارغا قارىماي، يەھۋاغا داۋاملىق ئىبادەت قىلالايمىز؟ بۇنىڭ مۇھىم بىر يولى، يەھۋا «تىرىك خۇدا» ئىكەنلىكىنى ھەردائىم ئەستە تۇتۇشتۇر.—يەرەم. 10:10؛ 2-تىموت. 1:12.
2. نېمە ئۈچۈن يەھۋانى تىرىك خۇدا دەيمىز؟
2 يەھۋا ھەقىقىي مەۋجۇت شەخس. ئۇ بىز دۇچ كېلىۋاتقان بارلىق قىيىنچىلىقلارنى كۆرىدۇ ۋە بىزگە ھەردائىم ياردەم قولىنى سۇنىدۇ (2-تارىخ. 16:9؛ زەبۇر 23:4). يەھۋانىڭ «تىرىك خۇدا» ئىكەنلىكىنى ئەستە تۇتساق، بارلىق قىيىنچىلىقلارغا بەرداشلىق بېرەلەيمىز. پادىشاھ داۋۇت شۇنداق قىلغانلىقى توغرىسىدىكى مىسالنى كۆرۈپ باقايلى.
3. داۋۇت پادىشاھ «يەھۋا تىرىك خۇدا!» دېگەندە، زادى نېمە دېمەكچى بولغان؟
3 داۋۇت پادىشاھ ياراتقۇچى يەھۋانى تونۇپ، ئۇنىڭغا ئىشەنچ باغلىغان. پادىشاھ سائۇل ۋە باشقىلار داۋۇتنى ئۆلتۈرۈش ئۈچۈن قوغلاپ يۈرگەندە، داۋۇت دۇئادا يەھۋادىن ياردەم سورىغان (زەبۇر 18:6). خۇدا داۋۇتنىڭ دۇئاسىغا جاۋاب بېرىپ، ئۇنى قۇتقۇزغان. شۇڭا، داۋۇت يەھۋانى مەدھىيىلەپ مۇنداق دېگەن: «يەھۋا تىرىك خۇدا!» (زەبۇر 18:46) داۋۇت پادىشاھ نېمە دېمەكچى بولغان؟ ئۇ يەھۋانىڭ ئۆز خىزمەتچىلىرىگە ھەردائىم ياردەم قىلىدىغان مەڭگۈ تىرىك خۇدا ئىكەنلىكىنى تەكىتلىگەن. دەرھەقىقەت، داۋۇت پادىشاھ ئۆزى باشتىن ئۆتكۈزگەن ئىشلاردىن يەھۋانىڭ «تىرىك خۇدا» ياكى ھەقىقىي مەۋجۇت شەخس ئىكەنلىكىنى بىلگەن ۋە ئۇ يەھۋانى مەدھىيىلەپ، ئۇنىڭغا خىزمەت قىلىشقا قەتئىي بەل باغلاشقا ياردەم بەرگەن.—زەبۇر 18:28، 29، 49.
4. يەھۋانىڭ تىرىك خۇدا ئىكەنلىكىنى ئەستە تۇتۇش بىزنى قانداق بەرىكەتلەرگە ئېرىشتۈرىدۇ؟
4 يەھۋا تىرىك خۇدادۇر. بۇنىڭغا ئىشىنىش قىزغىنلىق بىلەن خۇداغا خىزمەت قىلىشقا ياردەم بېرىدۇ. بىز دۇچ كېلىدىغان سىناقلارغا بەرداشلىق بېرەلەيمىز ۋە خۇداغا خىزمەت قىلىش ئۈچۈن بار كۈچىمىزنى چىقىرىمىز. يەنە يەھۋا خۇدانى دوست تۇتۇشقا بەل باغلايمىز.
تىرىك خۇدا سىزنى كۈچلەندۈرىدۇ
5. سىناقلارغا دۇچ كەلگەندە، خۇداغا ئىشەنچ باغلاشقا نېمە ياردەم بېرىدۇ؟ (فىلىپىلىكلەر 4:13)
5 يەھۋانىڭ «تىرىك خۇدا» ۋە بىزگە ھەردائىم ياردەم بېرىدىغانلىقىنى ئەستە تۇتساق، چوڭ-كىچىك بارلىق سىناقلارغا بەرداشلىق بېرەلەيمىز. ئۇ ھەرقانداق قىيىنچىلىقلاردا بىزگە ياردەم بېرەلەيدۇ. ئۇنىڭ قولدىن كەلمەيدىغان ئىش يوقتۇر، چۈنكى ئۇ ھەممىگە قادىر خۇدادۇر (فىلىپىلىكلەر 4:13-نى ئوقۇڭ). شۇڭلاشقا، بىز ياراتقۇچىمىزغا پۈتۈنلەي ئىشەنچ باغلىيالايمىز. يەھۋانىڭ كىچىك سىناقلاردا بىزگە ياردەم بەرگەنلىكىنى باشتىن ئۆتكۈزگەندە، چوڭ سىناقلارغا بەرداشلىق بېرىشىمىزگە ھەم ياردەم بېرىدىغانلىقىغا قەتئىي ئىشەنچ باغلىيالايمىز.
6. داۋۇت ياش چاغلىرىدا باشتىن ئۆتكۈزگەن قايسى ۋەقەلەر ئۇنىڭ خۇداغا بولغان ئىشەنچىسىنى كۈچەيتكەن؟
6 داۋۇت پادىشاھ باشتىن ئۆتكۈزگەن ئىككى ۋەقە ئۇنىڭ يەھۋاغا بولغان ئىشەنچىسىنى قانداق كۈچەيتكەنلىكىنى كۆرۈپ باقايلى. ياش داۋۇت پادىچىلىق قىلىپ يۈرگەندە، بىر قېتىم شىر، يەنە بىر قېتىم ئېيىق ئاتىسىنىڭ پادىلىرىدىن قويلىرىنى ئېلىپ كەتكەن. ھەربىر ۋەزىيەتتە داۋۇت ئۇلارنىڭ ئارقىسىدىن قوغلاپ، قويلارنى ئۇلارنىڭ ئېغىزىدىن تارتىپ قايتۇرۇپ كەلگەن. بىراق، داۋۇت بۇنى ئۆز كۈچىگە تايىنىپ قىلغانلىقىنى ئېيتمىغان. ئەكسىچە، ئۇ يەھۋانىڭ ئۆزىگە كۈچ بەرگەنلىكىنى چۈشەنگەن (1-سام. 17:34–37). داۋۇت بېشىدىن ئۆتكەن ئىشلارنى ئەستىن چىقارمىغان. ئۇ شۇلار ھەققىدە داۋاملىق چوڭقۇر ئويلىنىپ، كېلەچەكتە خۇدا چوقۇم ئۆزىگە يار-يۆلەك بولىدىغانلىقىغا ئىشەنچىسى كۈچەيگەن.
7. داۋۇت دىققىتىنى نېمىگە قاراتقان ۋە بۇ غولىياتنى يېڭىشىغا قانداق ياردەم بەرگەن؟
7 بەلكىم، داۋۇت ئىسرائىللار قوشۇنىنىڭ بارگاھىنى زىيارەت قىلغاندا، ئۇ تېخى 20 ياشلاردا بولغان. ئۇ غولىيات ئىسىملىك فىلىستىيەلىكلەرنىڭ پالۋانى ئىسرائىل قوشۇنىنى ھاقارەتلىگەچ، جەڭچىلەرنىڭ بەك قورقۇپ كەتكەنلىكىنى كۆرگەن (1-سام. 17:10، 11). ئىسرائىل جەڭچىلەر ئۆز دىققىتىنى جەڭ مەيدانىدا تۇرغان غولىياتنىڭ بوي بەستى ۋە ھاقارەتلىرىگە قاراتقاچ، ئۇلار قورقۇپ كەتكەنىدى (1-سام. 17:24، 25). ئەمما، داۋۇت مۇشۇ ۋەزىيەتكە باشقىچە قارىغان. داۋۇت غولىيات ئىسرائىل قوشۇنىنى ھاقارەتلىگەندە، داۋۇت بۇنى «تىرىك خۇدا» يەھۋانى ھاقارەتلىگەنلىك دەپ قارىغان (1-سام. 17:26). ئۇ ياراتقۇچى يەھۋا توغرۇلۇق ئويلانغان. قويلارنى بېقىپ يۈرگەندە، يەھۋا داۋۇتقا ياردەم بەرگەن. شۇڭا، داۋۇت بۇ ۋەزىيەتتە ھەم خۇدانىڭ ئۆزىگە ياردەم بېرەلەيدىغانلىقىغا ئىشەنچ قىلغان. خۇدانىڭ قوللاپ-قۇۋۋەتلىشىگە ئىشەنگەچ، داۋۇت غولىياتقا قارشى جەڭگە چىقىپ، ئۇنى يەڭگەن.—1-سام. 17:45–51.
8. يەھۋانىڭ بىزگە ياردەم بېرىدىغانلىقىغا بولغان ئىشەنچىمىزنى نېمە كۈچەيتەلەيدۇ؟ (رەسىمگە ھەم قاراڭ)
8 ئەگەر «تىرىك خۇدا» بىزگە ياردەم بېرىشكە تەييار ئىكەنلىكىنى ئېسىمىزدە تۇتساق، بىزمۇ سىناقلارغا مۇۋەپپەقىيەتلىك تاقابىل تۇرالايمىز (زەبۇر 118:6). يەھۋانىڭ ئۆتمۈشتە قىلغان ئىشلىرى ھەققىدە چوڭقۇر ئويلانساق، ئۇنىڭ بىزگە ياردەم بېرەلەيدىغانلىقىغا بولغان ئىشەنچىمىزنى كۈچەيتەلەيمىز. مۇقەددەس كىتابتىن يەھۋانىڭ ئۆز خىزمەتچىلىرىنى قانداق قۇتقۇزغانلىقىنى ئوقۇپ بېقىڭ (يەشايا 37:17، 33–37). ئۇنىڭدىن باشقا، jw.org تور بېكىتىدىكى خەۋەرلەردىن بۈگۈنكى كۈندە يەھۋانىڭ ئۆز خىزمەتچىلىرىنى قانداق قوللاپ-قۇۋۋەتلەيدىغانلىقى ھەققىدە ئوقۇپ بېقىڭ. يەھۋانىڭ ھاياتىڭىزدا شەخسەن سىزگە قانداق ياردەم بەرگەنلىكىنى ئېسىڭىزگە ئېلىڭ. ھاياتىڭىزدا خۇددى داۋۇت ئېيىق ياكى شىر بىلەن ئېلىشقاندەك كىشىنى ھاياجانلاندۇرىدىغان ئىشنى باشتىن ئۆتكۈزمىگەن بولسىڭىز، بۇ ھەرگىزمۇ يەھۋانىڭ سىزگە ياردەم بەرمىگەنلىكىنى بىلدۈرمەيدۇ. ئەمەلىيەتتە، ھاياتىڭىزدا يەھۋانىڭ سىز ئۈچۈن قىلغان ئىشلىرى نۇرغۇن. مەسىلەن، ئۇ سىزنى دوستى بولۇشقا تەكلىپ قىلدى (يۇھاننا 6:44). پەقەت ئۇنىڭ ياردىمى بىلەن، بۈگۈنكى كۈنگىچە ھەقىقەت يولىدا يۈرەلىدىڭىز. شۇڭا، يەھۋانىڭ دۇئالىرىڭىزغا قانداق جاۋاب بەرگەنلىكى ۋە ئېھتىياجلىرىڭىزنى ئۆز ۋاقىتىدا قانداق تەمىنلەپ كېلىۋاتقانلىقى ياكى قىيىنچىلىقلارغا دۇچ كەلگەندە سىزنى قانداق قوللاپ-قۇۋۋەتلىگەنلىكىنى ئېسىڭىزگە سېلىشى ئۈچۈن ياردەم سوراڭ. شۇ باشتىن ئۆتكۈزگەن ئىشلار ھەققىدە چوڭقۇر ئويلانسىڭىز، يەھۋانىڭ سىزگە داۋاملىق ياردەم بېرىدىغانلىقىغا بولغان ئىشەنچىڭىز كۈچىيىدۇ.
بىز دۇچ كەلگەن سىناقلار — كائىناتتا ئوتتۇرىغا قويۇلغان ئەڭ مۇھىم مەسىلىنىڭ بىر قىسىمى (8، 9-ئابزاسلارغا قاراڭ)
9. سىناقلارغا دۇچ كەلگىنىمىزدە، نېمىنى ئەستە تۇتۇشىمىز كېرەك؟ (پەندى-نەسىھەت 27:11)
9 يەھۋانى «تىرىك خۇدا» دەپ قاراش دۇچ كەلگەن سىناقلارغا توغرا كۆز قاراشتا بولۇشىمىزغا ياردەم بېرىدۇ. بىز سىناقلارغا دۇچ كەلگىنىمىزدە، دىققىتىمىزنى مۇھىم مەسىلىگە قاراتساق، يەھۋانى قوللاپ-قۇۋۋەتلەپ، شەيتاننىڭ گۇمانىغا جاۋاب بېرىمىز. شەيتان بىزنى قىيىنچىلىققا دۇچ كەلگەندە، چوقۇم يەھۋانى تاشلاپ كېتىدۇ دەپ جار سالغان (ئايۇپ 1:10، 11؛ پەندى-نەسىھەت 27:11-نى ئوقۇڭ). بىراق، سىناقلاردا يەھۋاغا ساداقەتمەنلىكىمىزنى ساقلاپ قالساق، بىز ياراتقۇچىمىزنى سۆيىدىغانلىقىمىزنى كۆرسىتىپ، شەيتاننىڭ بىر يالغانچى ئىكەنلىكىنى ئىسپاتلايمىز. بەلكىم، سىز ھازىر ھۆكۈمەتنىڭ قارشىلىقىغا ياكى ئىقتىسادىي قىيىنچىلىقلارغا، ئادەملەرنىڭ خۇش خەۋەرگە بولغان پەرۋاسىزلىقىغا ياكى باشقا قىيىنچىلىقلارغا دۇچ كېلىۋاتقانسىز. ئەگەر شۇنداق بولسا، ئېسىڭىزدە بولسۇنكى، دۇچ كەلگەن ۋەزىيەت خۇدانىڭ كۆڭلىنى خۇش قىلىشىڭىز ئۈچۈن پۇرسەت يارىتىپ بېرىدۇ. يەنە شۇنى ئەستىن چىقارماڭكى، خۇدا سىزنىڭ بەرداشلىق بېرەلمەيدىغان سىناقلارغا دۇچ كېلىشىڭىزگە يول قويمايدۇ (1-كورىنت. 10:13). ئۇ چوقۇم بەرداشلىق بېرەلىشىڭىز ئۈچۈن سىزگە كۈچ-قۇۋۋەت بېرىدۇ.
تىرىك خۇدا سىزنى مۇكاپاتلايدۇ
10. يەھۋا ئۆزىگە ئىبادەت قىلغۇچىلار ئۈچۈن نېمە قىلىدۇ؟
10 يەھۋا دائىم ئۆزىگە ئىبادەت قىلغۇچىلارنى مۇكاپاتلايدۇ (ئىبرانىي. 11:6). ئۇ بۈگۈنكى كۈندە كۆڭلىمىزگە تىنچ-خاتىرجەملىك بېرىپ قالماي، كېلەچەكتە بىزگە مەڭگۈلۈك ھاياتنى بېرىدۇ. بىز يەھۋاغا ئۈمىد باغلىيالايمىزكى، ئۇ بىزنى مۇكاپاتلاشقا تەشنا ۋە شۇنداق قىلىشقا قادىر. بىزنىڭ بۇنىڭغا ئىشەنچىمىز كامىل. شۇڭا، خۇدانىڭ ئۆتمۈشتە ياشىغان خىزمەتچىلىرىگە ئوخشاش، بىزمۇ پۈتۈن كۈچىمىز بىلەن قىزغىن ئۇنىڭغا ئىبادەت قىلىمىز. بىرىنچى ئەسىردە ياشىغان تىموتىيمۇ شۇنداق قىلغانىدى.—ئىبرانىي. 6:10–12.
11. جامائەتتە تىموتىينى پۈتۈن كۈچى بىلەن جاپالىق خىزمەت قىلىشقا نېمە دەۋەت قىلغان؟ (1-تىموتىي 4:10)
11 1-تىموتىي 4:10-نى ئوقۇڭ. تىموتىي خۇدانىڭ چوقۇم ئۆزىنى مۇكاپاتلايدىغانلىقىغا كۈچلۈك ئىشەنچ باغلىغان. شۇڭلاشقا، ئۇ پۈتۈن كۈچى بىلەن يەھۋا ۋە باشقىلار ئۈچۈن جاپالىق خىزمەت قىلغان. ئۇ نېمە ئىش قىلغان؟ ئەلچى پاۋلۇس ئۇنى ۋەز خىزمىتىدە ۋە جامائەتتە تەلىم بېرىش ماھارەتلىرىنى ئاشۇرۇشقا دەۋەت قىلغان. ئۇنىڭدىن باشقا، ئەلچى پاۋلۇس ئۇنى ھەم ياشلارغا، ھەم ياشانغانلارغا ياخشى ئۈلگە كۆرسىتىشكە ئۈندىگەن. يەنە بەزى قىيىن ۋەزىپىلەر تاپشۇرغان، يەنى تىموتىيغا نەسىھەت قىلىش كېرەك بولغان ئېتىقادچىلارغا ناھايىتى كەسكىن، ئەمما سۆيگۈ-مۇھەببەت بىلەن نەسىھەت بېرىشنى تاپىلىغان (1-تىموت. 4:11–16؛ 2-تىموت. 4:1–5). گەرچە باشقىلار تىموتىينىڭ ئىشلىرىنى كۆرمىگەن ياكى قەدىرلىمىگەن بولسىمۇ، ئۇ يەھۋانىڭ چوقۇم ئۆزىنى مۇكاپاتلايدىغانلىقىغا ئىشىنەلىگەن.—رىملىقلار 2:6، 7.
12. نېمە ئۈچۈن جامائەتتە ئاقساقاللار پۈتۈن كۈچى بىلەن جاپالىق خىزمەت قىلىدۇ؟ (رەسىمگە ھەم قاراڭ)
12 بۈگۈنكى كۈندە ئاقساقاللار ئۆزلىرىنىڭ ياخشى ئىشلىرىنى يەھۋا خۇدانىڭ كۆرىدىغانلىقىغا ۋە قەدىرلەيدىغانلىقىغا ئىشەنچ قىلالايدۇ. نۇرغۇن ئاقساقاللار قېرىنداشلارنى ئىلھاملاندۇرۇش، تەلىم بېرىش ۋە ۋەز قىلىشتەك ۋەزىپىلەردىن باشقا يەنە قۇرۇلۇش ئىشلىرىغا قاتنىشىدۇ ۋە تەبىئىي ئاپەتلەرگە ئۇچرىغانلارغا ياردەم بېرىدۇ. باشقا ئاقساقاللار دوختۇرخانىلار بىلەن ئالاقىلىشىش كومىتېتلىرىدا خىزمەت قىلىدۇ ياكى كېسەل ئېتىقادچىلارنى يوقلايدۇ. بۇ خىزمەتلەرنى قىلىۋاتقان ئاقساقاللار جامائەتنىڭ مەلۇم بىر ئىنسانغا ئەمەس، يەھۋا خۇداغا تەۋە ئىكەنلىكىنى بىلىدۇ. نەتىجىدە، ئۇلار پۈتۈن جېنى بىلەن ئۆز ۋەزىپىلىرىنى ئورۇنلايدۇ ۋە ئۆزلىرىنىڭ قىلغان ئىشلىرىنى ياراتقۇچى يەھۋا مۇكاپاتلايدىغانلىقىغا پۈتۈنلەي ئىشىنىدۇ.—كولوسى. 3:23، 24.
جامائەت ئۈچۈن قىلغان جاپالىق خىزمىتىڭىزنى تىرىك خۇدا چوقۇم مۇكاپاتلايدۇ (12، 13-ئابزاسلارغا قاراڭ)
13. يەھۋا ئۇنىڭغا ئىبادەت قىلىش ئۈچۈن كۆرسەتكەن تىرىشچانلىقلىرىمىزغا قانداق ھېس-تۇيغۇدا بولىدۇ؟
13 گەرچە جامائەتتە ھەممە ئادەم ئاقساقال بولالمىسىمۇ، بىراق ھەربىر كىشى قولىدىن كېلىشىچە يەھۋاغا خىزمەت قىلالايدۇ. ياراتقۇچىمىز بىزنىڭ ۇنىڭغا چىن ژۈرەكتىن ىزمەتتە قىلغان ىشلىرىمىزنى بەك قەدىرلەيدۇ. گەرچە ئۆزىمىز خالىغاندەك كۆپ ئىشلارنى قىلىش قولىمىزدىن كەلمىسىمۇ، دۇنيانىڭ ھەرقايسى جاي-جايلىرىدا ئېلىپ بېرىلىۋاتقان ۋەز خىزمىتى ئۈچۈن چىن قەلبىمىزدىن خۇشاللىق بىلەن بەرگەن ئازغىنە ئىئانە پۇلىمىزنى خۇدا ئىنتايىن قەدىرلەيدۇ. خىجىلچانلىق ھېس-تۇيغۇلىرىنى يېڭىپ، جامائەت يىغىلىشلىرىدا جاۋاب بېرىش ئۈچۈن قولىمىزنى كۆتۈرۈشكە تىرىشقانلىقىمىزنى ۋە بىزنى رەنجىتىپ قويغان قېرىنداشنى كەچۈرگەنلىكىمىزنى كۆرگەندە، خۇدا ئىنتايىن خۇشال بولىدۇ. بەلكىم، ئۆزىڭىز خالىغان كۆپ ئىشلارنى قىلىش قولىڭىزدىن كەلمەيدىغاندەك ھېس قىلىدىغانسىز، شۇنداقتىمۇ سىز قىلالايدىغان ئىشلارنى يەھۋانىڭ ناھايىتى قەدىرلەيدىغانلىقىغا ئىشىنىڭ. ئۇ سىزنى بەك ياخشى كۆرىدۇ ۋە چوقۇم مۇكاپاتلايدۇ.—لۇقا 21:1–4.
تىرىك خۇدا بىلەن بولغان دوستلۇقنى ساقلاڭ
14. يەھۋا بىلەن يېقىن دوست بولۇش ساداقەتمەنلىكىمىزنى ساقلاپ قېلىشقا قانداق ياردەم بېرىدۇ؟ (رەسىمگە ھەم قاراڭ)
14 ئەگەر يەھۋا بىلەن بولغان دوستلۇق مۇناسىۋىتىمىز مۇستەھكەم بولسا، ئۇنىڭغا ساداقەتمەنلىكىمىزنى ساقلاپ قېلىش ئاسانراق بولىدۇ. بۇنى يۈسۈپ پەيغەمبەرنىڭ ئۈلگىسىدىن كۆرەلەيمىز. ئۇ يەھۋانىڭ ئۇنىڭغا ئىنتايىن غەمخورلۇق قىلدىغانلىقىنى بىلگەن ۋە ياراتقۇچىسىنىڭ كۆڭلىنى رەنجىتىپ قويۇشنى خالىمىغان، شۇڭا، ھەرقانداق ئەخلاقسىز ئىشنى قىلىشنى قەتئىي رەت قىلغان (يارىت. 39:9). يەھۋا بىلەن يېقىن دوستلۇق مۇناسىۋەتنى تېخىمۇ مۇستەھكەملەش ئۈچۈن دۇئا قىلىش ۋە ئۇنىڭ سۆزىنى تەتقىق قىلىپ ئوقۇش ئۈچۈن ۋاقىت چىقىرىشىمىز كېرەك. شۇنداق قىلساق، ئۇنىڭ بىلەن بولغان دوستلىقىمىز بارغانسېرى كۈچىيىدۇ. يەھۋا بىلەن يېقىن دوست بولساق، يۈسۈپكە ئوخشاش بىزمۇ يەھۋانىڭ كۆڭلىنى رەنجىتىدىغان ئىشلارنى قىلىشتىن ئۆزىمىزنى ئېلىپ قاچىمىز.—ياقۇپ 4:8.
يەھۋا بىلەن بولغان دوستلۇق مۇناسىۋىتىڭىزنى كۈچەيتىش ئۇنىڭغا ساداقەتمەنلىكىڭىزنى ساقلاپ قېلىشقا ياردەم بېرىدۇ (14، 15-ئابزاسلارغا قاراڭ)
15. ئىسرائىللار چۆل-باياۋاندا يۈرگەندە، يۈز بەرگەن ئىشلاردىن قانداق ساۋاقلارنى ئالساق بولىدۇ؟ (ئىبرانىيلار 3:12)
15 يەھۋانىڭ تىرىك خۇدا ئىكەنلىكىنى ئۇنتۇغان كىشى خۇداغا ساداقەتسىزلىك قىلىشى مۇمكىن. ئىسرائىللار چۆل-باياۋاندا يۈرگەندە نېمە بولغانلىقىنى كۆرۈپ باقايلى. ئۇلار خۇدانىڭ مەۋجۇتلىقىغا ئىشەنگەن بولسىمۇ، لېكىن خۇدانىڭ ئۇلارنىڭ ئېھتىياجلىرىنى تەمىنلەپ بېرىشىدىن گۇمانلىنىشقا باشلىغان. ئۇلار ھەتتا: «يەھۋا ئارىمىزدا زادى بارمۇ-يوقمۇ؟»،— دەپ سورىغان (چىق. 17:2، 7). نەتىجىدە، ئۇلار خۇداغا قارشى ئىسىيان كۆتەرگەن. بىز ئاشۇ ئىسرائىللاردىن ساۋاق ئېلىپ، ئۇلاردەك ئىتائەتسىزلىك قىلمايلىئ.—ئىبرانىيلار 3:12-نى ئوقۇڭ.
16. نېمە ئۈچۈن ئىمان-ئېتىقادىمىز تەۋرىنىپ قېلىشى مۇمكىن؟
16 بۇ رەزىل دۇنيا يەھۋاغا ساداقەتمەنلىكىمىزنى ساقلاپ ياشىشىمىزغا كۆپ توسقۇنلۇق قىلىدۇ. نۇرغۇن كىشىلەر خۇدانىڭ مەۋجۇتلىقىنى ئېتىراپ قىلمايدۇ. ھەمىشە خۇدانىڭ ئۆلچەم-قائىدىلىرىگە سەل قارىغان كىشىلەر باياشات تۇرمۇش كەچۈرۈۋاتقاندەك كۆرىنىدۇ. بەلكىم بۇنى كۆرگىنىمىزدە، ئىمان-ئېتىقادىمىز تەۋرىنىپ قالىدۇ. گەرچە خۇدانىڭ بارلىقىغا ئىشەنسەكمۇ، ئۇنىڭ بىزگە ياردەم بېرىدىغانلىقىدىن گۇمانلىنىشقا باشلىشىمىز مۇمكىن. زەبۇر 73-بابنى يازغان كىشى دەل شۇنداق ھېس قىلغان. ئۇ ئەتراپىدىكى خۇدانىڭ قانۇنلىرىغا پەرۋا قىلماي يۈرگەنلەرنىڭ ھۇزۇر-ھالاۋەتلىك تۇرمۇش كەچۈرۈۋاتقانلىقىنى كۆرگەن. شۇڭا، ئۇ خۇداغا ئىبادەت قىلىشقا ئەرزىيدىغان-ئەرزىمەيدىغانلىقىنى سوراپ، ئۇنىڭدىن گۇمانلىنىشقا باشلىغان.—زەبۇر 73:11–13.
17. يەھۋا بىلەن تېخىمۇ يېقىن دوستلۇق مۇناسىۋەتتە بولۇشىمىزغا نېمە ياردەم بېرىدۇ؟
17 زەبۇر يازغۇچىسىنىڭ ئۆز كۆز قارىشىنى ئۆزگەرتىشكە نېمە ياردەم بەرگەن؟ ئۇ يەھۋانى ئۇنتۇپ قالغان كىشىلەرنىڭ ئاقىۋىتى ھەققىدە چوڭقۇر ئويلانغان (زەبۇر 73:18، 19، 27). ئۇ يەنە خۇداغا ئىبادەت قىلىپ، قانداق بەرىكەتلەرگە ئېرىشىدىغانلىقى ھەققىدە چوڭقۇر ئويلانغان (زەبۇر 73:24). بىزمۇ يەھۋانىڭ بىزگە بەرگەن بەرىكەتلىرى ھەققىدە ئويلانساق بولىدۇ. يەھۋاغا ئىبادەت قىلمىغان بولساق، ھاياتىمىز قانداق بولىدىغانلىقىنى تەسەۋۋۇر قىلىپ كۆرەيلى. يەھۋاغا ئىبادەت قىلىشنىڭ پايدىسىنى ئۇنتۇمىساق، بۇ ئۇنىڭغا ساداقەتمەنلىكنى ساقلاپ قېلىشىمىزغا ياردەم بېرىدۇ. ئۇنىڭدىن باشقا، بىزمۇ زەبۇر يازغۇچىسىغا ئوخشاش مۇنۇ سۆزلەرنى قىلالايمىز: «مەن ئۈچۈن خۇداغا يېقىنلىشىش ياخشىدۇر!»—زەبۇر 73:28.
18. نېمە ئۈچۈن كېلەچەككە ئىشەنچ بىلەن يۈزلىنەلەيمىز؟
18 بۇ ئاخىر زامان مەزگىلىدە، مەيلى قانداق سىناقلارغا دۇچ كېلەيلى، بىز ئۇلارغا بەرداشلىق بېرەلەيمىز. چۈنكى، بىز «تىرىك ۋە ھەق خۇدانىڭ قۇلى» (1-سالونىكا. 1:9). ئۇ بىزگە غەمخورلۇق قىلىپ ھەردائىم ياردەم قىلىشقا تەييار. ئۇ ئۆتمۈشتە ياشىغان خىزمەتچىلىرىگە غەمخورلۇق قىلغان ۋە بۈگۈنكى كۈندە ھەم داۋاملىق بىز بىلەن بىللىدۇر. پات-يېقىندا ئىلگىرىكى ھېچقاچان كۆرۈلۈپ باقمىغان دەھشەتلىك چوڭ بالايىئاپەتكە دۇچ كېلىمىز. بىراق،بىز ھەرگىزمۇ يالغۇز قالمايمىز،چۈنكى يەھۋا بىز بىلەن بىللە بولىدۇ (يەشايا 41:10). يەھۋا خۇدا بىز بىلەن بىللە بولىدۇ. شۇڭا، ھەممىمىز جاسارەتكە تولۇپ: «يەھۋا مېنىڭ ياردەمچىمدۇر، مەن قورقمايمەن»،— دەيلى.—ئىبرانىي. 13:5، 6.
152-ناخشا كۈچىمىز، ئۈمىدىمىز ۋە يار-يۆلىگىمىز
