26-تەتقىق ماقالىسى
49-ناخشا يەھۋا بىزنىڭ پاناھگاھىمىز
يەھۋا قورام تېشىڭىز بولسۇن!
«خۇدايىمزدەك مەزمۇت قورام تاش يوقتۇر».—1-سام. 2:2.
مەركىزى ئىدىيە
نېمە ئۈچۈن يەھۋا قورام تاش دەپ ئاتالغانلىقىنى ۋە ئۇنىڭ قورام تاش كەبى ئېسىل پەزىلەتلىرىنى قانداق ئۈلگە قىلالايدىغانلىقىمىزنى ئۆگىنىش.
1. زەبۇر 18:46-ئايەتتە يېزىلغاندەك، داۋۇت پادىشاھ يەھۋا خۇدانى نېمىگە ئوخشاتقان؟
بۇ دۇنيادا بەزىدە تۇيۇقسىز دۇچ كەلگەن قىيىنچىلىقلار تۇرمۇشىمىزنى ئاستىن-ئۈستىن قىلىپ، ھاياتىمىزنى پۈتۈنلەي ئۆزگەرتىۋېتەلەيدۇ. ئەمما، بىز يەھۋا خۇدادىن ياردەم سورىيالايمىز ۋە بۇنىڭ ئۈچۈن ئۇنىڭغا ئىنتايىن مىننەتدارمىز! ئالدىنقى ماقالىدە، يەھۋانىڭ «تىرىك خۇدا» ئىكەنلىكىنى ۋە ئۇ بىزگە ياردەم قىلىشقا ھەردائىم تەييار تۇرىدىغانلىقىنى ئۆگەندۇق. يەھۋانىڭ ياردىمىگە ئېرىشكەندە، بىزمۇ ئىشەنچ بىلەن داۋۇتقا ئوخشاش مۇنداق دەيمىز: «يەھۋا تىرىك خۇدا!» (زەبۇر 18:46-نى ئوقۇڭ) داۋۇت پادىشاھ بۇ سۆزلەرنى قىلىپ، ئارقىدىنلا يەھۋانى «قورام تېشىم» دەپ ئاتىغان. داۋۇت نېمە ئۈچۈن تىرىك خۇدا يەھۋانى جانسىز تاشقا ئوخشاتقان؟
2. پادىشاھ داۋۇت يەھۋانى «قورام تېشىم» دەپ ئاتىغان، بىز بۇ سۆزلەردىن نېمىلەرنى ئۆگىنىمىز؟
2 بۇ ماقالىدە، يەھۋا نېمە ئۈچۈن قورام تاش دەپ ئاتالغان ۋە بۇ ئوخشىتىشتىن خۇدا ھەققىدە نېمىلەرنى ئۆگىنەلەيدىغانلىقىمىزنى كۆرۈپ چىقىمىز. ئۇنىڭدىن باشقا، يەھۋا خۇدانى بىزنىڭ قورام تېشىمىز دەپ ئىشەنچ باغلاش ئۈچۈن نېمە قىلالايدىغانلىقىمىزنى ئۆگىنەلەيمىز. ئاخىرىدا، يەھۋانىڭ قۇرام تاش كەبى پەزىلەتلىرىنى قانداق ئۈلگە قىلالايدىغانلىقىمىزنى مۇھاكىمە قىلىمىز.
نېمە ئۈچۈن يەھۋا قورام تاش دەپ ئاتالغان؟
3. نېمە ئۈچۈن مۇقەددەس كىتابتا دائىم «قورام تاش» دېگەن سۆز ئىشلىتىلگەن؟ (مۇقاۋىدىكى رەسىمگە قاراڭ)
3 مۇقەددەس كىتابتا يەھۋا «قۇرام تاش» دەپ تەسۋىرلەنگەن. بۇ ئوخشىتىش ئۇنىڭ ئېسىل پەزىلەتلىرىنى چۈشىنىشىمىزگە ياردەم بېرىدۇ. يەھۋانىڭ گۈزەل پەزىلەتلىرىنى مەدھىيىلىگەندە، ئۇنىڭ خىزمەتچىلىرى نۇرغۇن قېتىم ئۇنى «قورام تاش» دەپ تەسۋىرلىگەن. تەكرار قانۇن 32:4-ئايەتتە، بىرىنچى قېتىم «قورام تاش» دەپ تەسۋىرلەنگەن. ئۇنىڭدىن باشقا، ھاننا ئىسىملىك ئايال دۇئادا مۇنداق دېگەن: «خۇدايىمىزدەك مەزمۇت قورام تاش يوقتۇر» (1-سام. 2:2). ھاباققۇق پەيغەمبەر يەھۋانى «قورام تېشىم» دەپ ئاتىغان (ھاباق. 1:12). زەبۇر 73-بابنىڭ يازغۇچىسى خۇدانى «قەلبىمدىكى قۇرام تېشىم» دېگەن (زەبۇر 73:26). ھەتتا يەھۋا ئۆز-ئۆزىنى قورام تاش دەپ ئاتىغان (يەشايا 44:8). ئۇنداقتا، ھازىر يەھۋانىڭ قورام تاش كەبى قايسى ئۈچ پەزىلىتى بارلىقى ۋە ئۇنى «قورام تېشىمىز» دەپ ئىشەنچ باغلاش ئۈچۈن نېمە قىلالايدىغانلىقىمىزنى كۆرۈپ چىقايلى.—تەكرار. قا 32:31.
خۇدانىڭ خىزمەتچىلىرى يەھۋانى بىخەتەر قورام تاش دەپ قارايدۇ (3-ئابزاسقا قاراڭ)
4. يەھۋا پاناھگاھتۇر دېگەن ئىبارە نېمىنى بىلدۈرىدۇ؟ (زەبۇر 94:22)
4 يەھۋا پاناھگاھتۇر. خەتەرلىك بوران-چاپقۇندا يوغان قورام تاش بىر كىشى ئۈچۈن پاناھلىنىدىغان جاي بولغاندەك، ھاياتىمىزدا قىيىنچىلىقلار دۇچ كەلگەن چاغلاردا يەھۋا خۇدامۇ بىز ئۈچۈن پاناھگاھ بولىدۇ (زەبۇر 94:22-نى ئوقۇڭ). ئۇ بىزنىڭ ئۆزى بىلەن بولغان دوستلۇقىمىزنى قوغدايدۇ ۋە ھېچقانداق نەرسىنىڭ بىزگە مەڭگۈ زىيان يەتكۈزۈشىگە يول قويمايدۇ. يەنە شۇنداق ۋەدە قىلىدۇكى، كېلەچەكتە ئۇ بىزنى غەم-تەشۋىشلەر ۋە ئازاب-ئوقۇبەتلەرگە سېلىۋاتقان بارچە يامانلىقلارنى يىلتىزىدىن قومۇرۇپ تاشلايدۇ.—ھەزەك. 34:25، 26.
5. يەھۋا قورام تېشىمىز بولۇشى ئۈچۈن نېمە قىلالايمىز؟
5 يەھۋانى قورام تاش كەبى پاناھگاھىمىز قىلىشنىڭ بىر يولى — ئۇنىڭغا دۇئا قىلىش. دۇئا قىلغاندىن كېيىن، يەھۋا بىزگە قەلبىمىزنى ۋە ئوي-پىكرىمىزنى قوغدايدىغان تىنچلىقنى بېرىدۇ (فىلىپى. 4:6، 7). ھازىر ئارتيوم ئىسىملىك بۇرادەرنىڭ مىسالىنى كۆرۈپ چىقايلى. ئۇ ئىمان-ئېتىقادى سەۋەبلىك تۈرمىگە تاشلانغان. تۈرمىدە بىر رەھىمسىز سوراقچى نۇرغۇن قېتىم ئۇنى سوراققا تارتىپ، بوزەك قىلىپ خورلىغان ۋە قورقۇتۇپ بېسىم قىلغان. ئارتيوم مۇنداق دەيدۇ: «سوراقچى ھەر قېتىم سوراققا تارتقاندا، ئېغىر بېسىم ھېس قىلاتتىم، … ھەردائىم يەھۋاغا دۇئا قىلىپ، ئۇنىڭدىن كۆڭلۈمگە تىنچ-خاتىرجەملىك ۋە دانالىقنى بېرىشنى سورايتتىم. سوراقچىنىڭ زىيانكەشلىككە قارىماي، تىنچ-خاتىرجەملىكنى ساقلاپ قالاتتىم. يەھۋانىڭ ياردىمى بىلەن، ئۆزۈمنى مەزمۇت قورام تاش ئارقىسىدا تۇرغاندەك ھېس قىلدىم».
6. نېمە ئۈچۈن بىز دائىم يەھۋاغا ئىشەنچ باغلىيالايمىز؟ (يەشايا 26:3، 4)
6 يەھۋا ئىشەنچىلىكتۇر. مەزمۇت قورام تاشقا ئوخشاش يەھۋا ھەردائىم بىزگە ياردەم بېرىشكە تەييار. بىز ئۇنىڭغا ئىشەنچ باغلىيالايمىز، چۈنكى يەھۋا «مەڭگۈلۈك قورام تاشتۇر» (يەشايا 26:3، 4-نى ئوقۇڭ). ئۇ مەڭگۈ مەۋجۇت ۋە ئۆز ۋەدىلىرىنى ئەمەلگە ئاشۇرۇپ كەلمەكتە. ئۇ دۇئالىرىمىزغا قۇلاق سېلىپ، مۇھتاجلىقتا قالغان چاغلىرىمىزدا بىزنى قوللاپ-قۇۋۋەتلەيدۇ. بىزمۇ يەھۋاغا تايىنالايمىز، چۈنكى ئۇ ئۆزىگە خىزمەت قىلغۇچىلارغا سادىقتۇر (2-سام. 22:26). ئۇ ھەرگىزمۇ قىلغان ئىشلىرىمىزنى ئۇنتۇمايدۇ ۋە دائىم بىزنى مۇكاپاتلايدۇ.—ئىبرانىي. 6:10؛ 11:6.
7. يەھۋاغا ئىشەنچ باغلىساق، بىز نېمىلەرنى ھېس قىلىمىز؟ (رەسىمگە ھەم قاراڭ).
7 يەھۋا قورام تېشىمىز بولۇشى ئۈچۈن ئۇنىڭغا پۈتۈنلەي ئىشەنچ باغلىشىمىز كېرەك. ھەتتا قىيىن ۋەزىيەتلەردە ئۇنىڭغا بويسۇنساق، چوقۇم پايدىسىنى كۆرەلەيمىز (يەشايا 48:17، 18). ھەر قېتىم يەھۋا بىزگە ياردەم بەرگەندىن كېيىن، ئۇنىڭغا بولغان ئىشەنچىمىز بارغانسېرى كۈچىيىدۇ. شۇنىڭ بىلەن، مەيلى قىيىنچىلىقلارغا دۇچ كېلەيلى، ئۇلارغا بەرداشلىق بېرەلىشىمىزگە ياردەم بېرىش يالغۇز يەھۋانىڭ قولىدىن كېلىدىغانلىقىغا ئىشەنچىمىز كامىل بولىدۇ. ئادەتتە بىزگە ياردەم بېرەلەيدىغان ھېچكىم بولمىغان ۋەزىيەتلەردە، بىز ھەردائىم يەھۋاغا تايىنالايدىغانلىقىمىزنى ھېس قىلىپ يېتىمىز. ۋېلادىمىر ئىسىملىك بۇرادەر مۇنداق دەيدۇ: «مەن تۈرمىدە ياتقاندا، يەھۋا بىلەن ئىنتايىن يېقىن مۇناسىۋەتتە بولغانلىقىمنى ھېس قىلدىم. شۇ چاغدا مەن يالغۇز بولغاچ، ھېچنېمە قىلالمىدىم، شۇڭا كۆپرەك يەھۋاغا تايىنىشنى ئۆگەندىم».
ئەگەر يەھۋا خۇداغا پۈتۈن ۋۇجۇدىمىز بىلەن ئىشەنچ باغلىساق، ئۇ بىز ئۈچۈن قورام تاش بولىدۇ (7-ئابزاسقا قاراڭ)
8. (1) نېمە ئۈچۈن يەھۋا ھېچقاچان ئۆزگەرمەيدۇ دەيمىز؟ (2) يەھۋا قورام تېشىمىز بولسا، بىز ئۈچۈن قانداق پايدىسى بار؟ (زەبۇر 62:6، 7)
8 يەھۋا ئۆزگەرمەس خۇدادۇر. يوغان قورام تاش ئىنتايىن مەزمۇت، يەھۋا خۇددى شۇنداق قورام تاشتەك قەتئىي تەۋرەنمەس. ئۇنىڭ پەزىلەتلىرى باشتىن-ئاخىرى بىردەك ۋە ئىرادىسى قەتئىي ئۆزگەرمەس (مالاك. 3:6). ئادەم-ئاتا بىلەن ھاۋا-ئانا ئېرەم بېغىدا يەھۋاغا قارشى ئىسىيان كۆتەرگەن بولسىمۇ، ئۇنىڭ ئىنسانىيەت ئۈچۈن قىلغان ئىرادىسى ئۆزگەرمىگەن. ئەلچى پاۋلۇس يازغاندەك، خۇدا «ئۆز-ئۆزىنى ئىنكار قىلالمايدۇ» (2-تىموت. 2:13). دېمەك، قانداق ئىشلار يۈز بېرىشى ياكى باشقىلار نېمە قىلىشىدىن قەتئىينەزەر، يەھۋا ئۆزىنىڭ ئىش قىلىش ئۇسۇلىنى ئۆزگەرتمەيدۇ ۋە ئۆز ئىرادىسى ۋە ئۆلچەم-قائىدىلىرىدىن ۋاز كەچمەيدۇ. چۈنكى، يەھۋا مەزمۇت تەۋرەنمەس بولغاچ، بىز ئۇنىڭغا ئىشەنچ باغلىيالايمىزكى، قىيىنچىلىقلاردا ئۇ چوقۇم بىزگە ياردەم قولىنى سۇنىدۇ ۋە كېلەچەكتە ئىنسانىيەت ئۈچۈن قىلغان ئىرادىسىنى پۈتۈنلەي ئەمەلگە ئاشۇرىدۇ.—زەبۇر 62:6، 7-نى ئوقۇڭ.
9. تاتيانا ئىسىملىك قېرىنداشنىڭ مىسالىدىن نېمىنى ئۆگىنەلەيمىز؟
9 ئەگەر يەھۋانىڭ پەزىلەتلىرى، ئۇنىڭ يەرشارى ۋە ئىنسانىيەت ئۈچۈن قىلغان ئىرادىسى ھەققىدە چوڭقۇر ئويلانساق، بۇ خۇداغا ۋە ئۇنىڭ قورام تېشىمىز بولىدىغانلىقىغا ئىشىنىشىمىزگە ياردەم بېرىدۇ. شۇنداق قىلساق، قىيىن ۋەزىيەتلەردە تىنچ-خاتىرجەملىكنى ۋە ساداقەتمەنلىكنى ساقلاپ قالالايمىز (زەبۇر 16:8). تاتيانا ئىسىملىك قېرىنداشنىڭ ئۈلگىسىنى كۆرۈپ باقايلى. ئۇ ئىمان-ئېتىقادى سەۋەبلىك، ئۆيىدە نەزەربەند ئاستىدا بولغانىدى. ئۇ مۇنداق دېگەن: «مەن تىكەندەك يالغۇز بولۇپ قالدىم، دەسلەپتە ئىنتايىن قىيىن ھېس قىلىپ، دائىم ئۈمىدسىزلەندىم». لېكىن، ئۇ دۇچ كەلگەن سىناقلار بىلەن يەھۋا خۇدا ۋە ئۇنىڭ ئىرادىسى ئارىسىدا باغلىنىش بارلىقىنى ۋە ساداقەتمەنلىكنىڭ ساقلاپ قېلىشنىڭ نېمە ئۈچۈن مۇھىملىقىنى كۆرۈپ يەتكەن. نەتىجىدە، ئۇ قايتا كۈچ-قۇۋۋەتكە ئېرىشىپ، ئىشەنچىسى كۈچلەنگەن ۋە داۋاملىق قىيىنچىلىقلارغا بەرداشلىق بەرگەن. ئۇ يەنە مۇنداق دېگەن: «نېمە ئۈچۈن شۇنداق ئىشلار يۈز بېرىپ، بۇ ۋەزىيەتكە چۈشۈپ قالغانلىقىمنى چۈشىنىش يەھۋانى سۆيىدىغانلىقىم ۋە ئۇنىڭ كۆڭلىنى خۇرسەن قىلىۋاتقىنىمنى ئېسىمگە سالدى. بۇ ئۆزۈمنى يالغۇز ھېس قىلماسلىققا ياردەم بەردى».
10. يەھۋا ھازىرنىڭ ئۆزىدە قورام تېشىمىز بولۇشى ئۈچۈن نېمە قىلالايمىز؟
10 پات يېقىندا، بېشىمىزغا ناھايىتى ئېغىر قىيىنچىلىقلار كېلىدۇ. شۇ چاغدا، ھەرقانداق ۋاقىتقا قارىغاندا تېخىمۇ بەك يەھۋاغا تايىنىشىمىز كېرەك. شۇڭا، كېلەچەكتىكى سىناقلارغا بەرداشلىق بېرەلىشىمىز ئۈچۈن، ھازىرنىڭ ئۆزىدە يەھۋانىڭ ھەرقانداق ۋەزىيەتتە سادىق بولۇپ قېلىشىمىزغا ياردەم بېرىش ئۈچۈن بىزنى ئېھتىياجلىق نەرسىلەر بىلەن تەمىنلەيدىغانلىقىغا بولغان ئىشەنچىمىزنى كۈچەيتىشىمىز كېرەك. بۇنى قانداق قىلالايمىز؟ مۇقەددەس كىتابتا تىلغا ئېلىنغان خۇدانىڭ سادىق خىزمەتچىلىرى ۋە بۈگۈنكى كۈندىكى يەھۋا گۇۋاھچىلىرى ھەققىدە ئوقۇپ چىقىڭ. يەھۋا ئۇلارغا قورام تاش كەبى ئېسىل پەزىلەتلىرىنى قانداق كۆرسەتكەنلىكى ھەققىدە چوڭقۇر ئويلىنىڭ. شۇنداق قىلىپ، يەھۋانىڭ قورام تېشىڭىز بولۇشىغا يول قويىسىز.
يەھۋانىڭ قورام تاش كەبى پەزىلەتلىرىنى ئۈلگە قىلىڭ
11. نېمە ئۈچۈن قورام تېشىمىز يەھۋانى ئېسىل پەزىلەتلىرىدىن ئۈلگە ئېلىشنى خالايمىز؟ (« ياش بۇرادەرلەر ئۈچۈن بىر مەقسەت» دېگەن رامكىغا ھەم قاراڭ)
11 بىز قايسى پەزىلەتلىرى ئۈچۈن يەھۋا قورام تاش دەپ ئاتالغانلىقىنى كۆرۈپ چىقتۇق. ھازىر يەھۋانىڭ قورام تاشقا وشاش پەزىلەتلىرىنى قانداق ۈلگە قىلالايدىغانلىغڭمڭزنڭ كۆرۈپ چىقىمىز. بىز تىرىشىپ ئاشۇ پەزىلەتلەرنى يېتىلدۈرسەك، قېرىنداشلىرىمىز ئۈچۈن قورام تاش بولۇپ، ئۇلارنىڭ ئىمان-ئېتىقادىنى مۇستەھكەملەشكە ياردەم بېرەلەيمىز. مەسىلەن، ھەزرىتى ئەيسا سىمۇننى كىفاس (گرېكچە «پېترۇس») دەپ ئاتىغان. بۇ ئىسىم «بىر تال قورام تاش» دېگەننى بىلدۈرىدۇ (يۇھاننا 1:42). پېترۇسنىڭ ئىسىمى ئۇنىڭ جامائەتتە تەسەللىينىڭ مەنبەسى بولۇپ، قېرىنداشلارنىڭ ئىمانىنى كۈچەيتىدىغانلىقىنى كۆرسىتىدۇ. ئۇنىڭدىن باشقا، مۇقەددەس كىتاب جامائەت ئاقساقاللىرىنى «چوڭ قورام تاشنىڭ سايىسىگە ئوخشاش» دەيدۇ. دېمەك، ئاقساقاللار جامائەتنىڭ ئەزالىرىنى قوغدايدىغان كىشىلەردۇر (يەشايا 32:2). ئەگەر، پۈتۈن ئېتىقادچىلار يەھۋانىڭ قورام تاش كەبى پەزىلەتلىرىنى ئۈلگە قىلسا، جامائەت بەرىكەت تېپىپ گۈللىنىدۇ.—ئەفەس. 5:1.
12. باشقىلارغا پاناھگاھ بولۇش ئۈچۈن نېمىلەرنى قىلساق بولىدۇ؟
12 باشقىلار ئۈچۈن پاناھگاھ بولۇڭ. «ئاخىرقى زاماندا» دۇنيانىڭ ۋەزىيىتى كۈندىن-كۈنگە يامانلىشىدۇ (2-تىموت. 3:1). شۇڭا، ئېتىقادچى قېرىنداشلىرىمىزغا ئەمەلىي ياردەم بېرىش ئۈچۈن نۇرغۇن پۇرسەتلەر بولىدۇ. مەسىلەن، تەبىئىي ئاپەتلەر، ئىچكى سىياسىي توقۇنۇشلار ياكى ئۇرۇشلار تۈپەيلى، ئېتىقادداشلار پاناھلىنىدىغان تۇرالغۇ جايغا مۇھتاج بولغاندا، ئۇلارنى پاناھگاھ جاي بىلەن تەمىنلەشكە توغرا كېلىدۇ. ئۇنىڭدىن باشقا، ئۇلارغا تەسەللى ۋە ئىلھام-مەدەت بېرىپ، مېھىر-مۇھەببەت كۆرسىتەلەيمىز. بۇنداق قىلىشنىڭ بىر يولى — ئىبادەت يىغىلىشلىرىغا كەلگەنلەرنى قىزغىن قارشى ئېلىش ۋە جامائىتىمىزدە ئىللىق كەيپىياتنىڭ ھۆكۈم سۈرۈشىگە ئۆز ھەسسىمىزنى قوشۇش. ھازىر بىز رەھىمسىز، بىر-بىرىگە سوغۇق مۇئامىلە قىلىدىغان، تۈرلۈك قىيىنچىلىقلارغا تولغان دۇنيادا ياشاۋاتىمىز. شۇڭلاشقا، جامائەت يىغىلىشلىرىغا كەلگەن قېرىنداشلىرىمىزغا ئۇلارنى سۆيىدىغانلىقىمىزنى ھېس قىلدۇرۇپ، ئۇلار ئۆزلىرىنى تىنچ-خاتىرجەم ۋە بىخەتەر ھېس قىلىشىغا قولىمىزدىن كېلىشىچە ياردەم بېرىشنى خالايمىز.
13. ئاقساقاللار باشقىلار ئۈچۈن قانداق پاناھگاھ بولالايدۇ؟ (رەسىمگە ھەم قاراڭ)
13 ئېتىقادداشلارنىڭ بېشىغا بوران-چاپقۇنلارغا ئوخشاش ئېغىر كۈنلەر چۈشكەندە، جامائەتتىكى ئاقساقاللار ئۇلارغا ئىلھام-مەدەت بېرىدۇ. ئاقساقاللار تەبىئىي ئاپەتلەرگە ئۇچرىغان ياكى تىببىي ياردەمگە مۇھتاج بولغان ئېتىقادداشلىرىمىزغا دەرھال ياردەم قولىنى سۇنۇشقا تىرىشىدۇ. ئاقساقاللار مۇقەددەس كىتابقا ئاساسەن ئۇلارغا ئىلھام-مەدەت ۋە كۆرسەتمىلەرنى بېرىدۇ. ياردەمگە مۇھتاج ئېتىقادداشلار ئاقساقالنىڭ مېھرىبان، باشقىلارنىڭ سۆزلىرىنى قۇلاق سېلىپ تىڭشايدىغان ۋە ئۇلارنىڭ ھېس-تۇيغۇلىرىنى چۈشىنىشكە تىرىشىدىغان كىشى ئىكەنلىكىنى بىلسە، ئۇنىڭدىن ئەركىن-ئازادە ياردەم سورايدۇ. ئاقساقاللارنىڭ شۇنداق ئېسىل پەزىلەتلىرى قېرىنداشلارنىڭ ئۆزلىرىنى سۆيۈلگەندەك ھېس قىلىشقا ياردەم بېرىدۇ. ئۇنىڭدىن باشقا، شۇنداق پەزىلەتلەرنى كۆرسىتىدىغان ئاقساقاللار مۇقەددەس كىتابقا ئاساسەن ھەرقانداق مەسلىھەتلەرنى بەرسە، قېرىنداشلار ئاسانراق قوبۇل قىلىدۇ.—1-سالونىكا. 2:7، 8، 11.
ئېتىقادداشلارنىڭ بېشىغا بوران-چاپقۇنلارغا ئوخشاش قىيىنچىلىقلار چۈشكەندە، ئاقساقاللار ئۇلار ئۈچۈن پاناھگاھ بولىدۇ (13-ئابزاسقا قاراڭ) a
14. ئىشەنچىلىك ئادەم ئىكەنلىكىمىزنى قانداق كۆرسىتەلەيمىز؟
14 ئىشەنچىلىك بولۇڭ. بىز باشقىلار قىيىنچىلىقلارغا دۇچ كەلگەن چاغلاردا، بىزگە ئىشەنچ قىلىپ، ئۆزلىرىنىڭ ياردەمگە مۇھتاج بولغانلىقىنى ئېيتىشىنى خالايمىز (پەند. نە 17:17). باشقىلارنىڭ ئالدىدا ئىشەنچىلىك ئادەم دېگەن نامغا قانداق ئېرىشەلەيمىز؟ ھەر كۈنى پۈتۈن كۈچىمىز بىلەن يەھۋانى ئۈلگە قىلساق، شۇنداق نامغا ئېرىشەلەيمىز. مەسىلەن، ئۆز ۋەدىلىرىمىزدە چىڭ تۇرۇش ۋە ۋاقىتقا ئەمەل قىلىش ئارقىلىق ئىشەنچىلىك ئادەم بولالايمىز (مەتتا 5:37). بىز يەنە ياردەمگە مۇھتاج بولغانلارغا ياردەم قولىمىزنى سۇنالايمىز. بۇنىڭدىن باشقا، ئەگەر جامائەتتە بىزگە بىر ۋەزىپە تاپشۇرۇلغان بولسا، ئۇنى يول-يورۇق بويىچە ئورۇنلىساق، ئىشەنچىلىك بولالايمىز.
15. ئاقساقاللار ئىشەنچىلىك بولسا، جامائەت ئۈچۈن قانداق پايدىسى بار؟
15 ئىشەنچىلىك ئاقساقاللار جامائەت ئۈچۈن چوڭ بىر بەرىكەت. نېمە ئۈچۈن شۇنداق دەيمىز؟ چۈنكى، ئېتىقادداشلار ھەرقانداق ۋاقىتتا گۇرۇپپىغا مەسئۇل ئاقساقال ياكى باشقا ئاقساقاللار بىلەن ئالاقە قىلالىسا، ئۇلارنىڭ كۆڭلى تىنچ-خاتىرجەملىكنى ھېس قىلىدۇ. ئېتىقادداشلار ئاقساقاللارنىڭ ياردەم بېرىشكە تەييار تۇرغانلىقىنى بىلسە، ئۆزلىرىنى سۆيۈلگەندەك ھېس قىلىدۇ. يەنە شۇنىڭدەك، ئاقساقاللار ئۆز ئوي-پىكرىگە ئەمەس، مۇقەددەس كىتاب ياكى ئەقىل-پاراسەتلىك قۇل تەمىنلىگەن نەشىرى ماتېرىياللارغا ئاساسلىنىپ مەسلىھەت بەرسە، ئېتىقادداشلار ئۇلارغا تېخىمۇ ئىشىنىدۇ. ئۇنىڭدىن باشقا، ئاقساقاللار مەخپىيەتلىكنى ساقلىسا ۋە ئۆز ۋەدىلىرىنى ئورۇنلىسا، قېرىنداشلارنىڭ ئۇلارغا بولغان ئىشەنچىسى تېخىمۇ ئاشىدۇ.
16. ھەقىقەتتە چىڭ تۇرۇشنىڭ ئۆزىڭىز ۋە باشقىلار ئۈچۈن قانداق پايدىسى بار؟
16 ھەقىقەتتە تەۋرەنمەي چىڭ تۇرۇڭ. ئەگەر ھاياتىمىزنىڭ ھەممە ساھەلىرىدە يەھۋاغا بويسۇنساق ۋە مۇقەددەس كىتابقا ئاساسلىنىپ قارارلارنى چىقارساق، بىز باشقىلارغا ياخشى ئۈلگە كۆرسىتىمىز. مۇقەددەس يازمىلارنى تەتقىق قىلىپ، ئىمان-ئېتىقادتا ئۆسكەنسېرى، ھەقىقەتتە تەۋرەنمەي تېخىمۇ چىڭ تۇرىمىز. خۇدانىڭ ئوي-پىكرىگە ماس كەلمەيدىغان ساختا تەلىملەر ۋە كۆز قاراشلارنى تونۇپ يېتىپ، ئۇلارنىڭ تەسىرىگە ئۇچرىمايمىز (ئەفەس. 4:14؛ ياقۇپ 1:6–8). شۇم خەۋەرلەرنى ئاڭلىغىنىمىزدا، يەھۋا ۋە ئۇنىڭ ۋەدىلىرىگە بولغان ئىشەنچىمىز تىنچ-خاتىرجەملىكنى ساقلىشىمىزغا ياردەم بېرىدۇ (زەبۇر 112:7، 8). ئۇنىڭدىن باشقا، سىناقلارغا دۇچ كەلگەن قېرىنداشلارغىمۇ ياردەم بېرەلەيمىز.—1-سالونىكا. 3:2، 3.
17. ئاقساقاللار جامائەتنىڭ ئىمان-ئېتىقادتا مەھكەم تۇرۇشىغا قانداق ياردەم بېرىدۇ؟
17 ئاقساقاللار ھەر ئىشتا چەك-چېگرانى بىلىدىغان، ساغلام ئوي-پىكىرلىك، تەرتىپلىك ۋە غەرەز ئۇقىدىغان بولۇشى لازىم. خۇدانىڭ سۆزىدە چىڭ تۇرىدىغان ئاقساقاللار جامائەتتىكىلەرنىڭ تىنچ-خاتىرجەملىكنى ساقلىشىغا ۋە يەھۋاغا بولغان ئىشەنچىسىنى كۈچەيتىشىگە ياردەم بېرىدۇ (تىتۇس 1:9؛ 1-تىموت. 3:1–3). ئۇلار ئۆز ئۈلگىسى ۋە پادىچىلىق خىزمىتى ئارقىلىق ۋەز ئېيتقۇچىلارنىڭ ئىبادەت يىغىلىشلىرىغا دائىم قاتنىشىشىغا، ۋەز قىلىشىغا ۋە مۇقەددەس كىتابنى تەتقىق قىلىشىغا ياردەم بېرىدۇ. ئۇنىڭدىن باشقا، ئېتىقادداشلار غەم-تەشۋىشكە سالىدىغان قىيىنچىلىقلارغا دۇچ كەلگەندە، ئاقساقاللار ئۇلارنىڭ دىققىتىنى يەھۋاغا ۋە ئۇنىڭ ۋەدىلىرىگە قارىتىشقا ئىلھاملاندۇرىدۇ.
18. نېمە ئۈچۈن يەھۋانى مەدھىيىلەپ، داۋاملىق ئۇنىڭغا يېقىنلىشىشنى خالايمىز؟ (« يەھۋاغا يېقىنلىشىشنىڭ بىر يولى» دېگەن رامكىغا ھەم قاراڭ)
18 يەھۋانىڭ ئاجايىپ پەزىلەتلىرىنى كۆرۈپ چىققاندىن كېيىن، بىزمۇ پادىشاھ داۋۇتقا ئوخشاش ئېيتماي تۇرالمايمىز: « قورام تېشىم يەھۋاغا مەدھىيە ئوقۇلسۇن» (زەبۇر 144:1). بىز ھەردائىم يەھۋاغا ئىشەنچ باغلاپ، ئۆمۈر بويى ئۇنىڭغا تايىنىپ ياشىيالايمىز. ھەتتا قېرىغان چاغلىرىمىزدا ھەم ئۇنىڭغا يېقىنلىشىشىمىزغا داۋاملىق ياردەم بېرىدىغانلىقىغا ئىشەنچ قىلىپ، يەھۋانى «ئۇ مېنىڭ قورام تېشىم» دەپ ئېيتالايمىز.—زەبۇر 92:14، 15.
22-ناخشا يەھۋا مېنىڭ پادىچىمدۇر
a سۈرەت. يىغىلىش زالىدا بىر قېرىنداش ئىككى ئاقساقالنىڭ ئالدىغا ئەركىن-ئازادە كېلىۋاتىدۇ.
