يولباشچىمىز مەسىھكە ئىشەنچ قىلايلى
«پەقەت بىرلا رەھبىرىڭلار بار، يەنى ئۇ مەسىھ».—مەتتا 23:10.
ناخشىلار: 14، 30
1، 2. مۇسا ئۆلگەندىن كېيىن يەشۇئاغا قانداق ۋەزىپە تاپشۇرۇلغان؟
يەھۋا خۇدا يەشۇئاغا مۇنداق دېگەن: «مېنىڭ خىزمەتچىم مۇسا ئالەمدىن ئۆتتى. ئەمدى سەن ۋە پۈتۈن خەلق تۇرۇڭلار، ئىئوردان دەرياسىدىن ئۆتۈپ، مەن ئىسرائىل خەلقىگە بېرىدىغان زېمىنغا كىرىڭلار» (يەشۇئا 1:1، 2). تەخمىنەن 40 يىل مۇسانىڭ ياردەمچىسى بولغان يەشۇئا ئۈچۈن بۇ ناھايىتى چوڭ ئۆزگىرىش ئىدى!
2 بۇنىڭدىن ئاۋۋال، مۇسا نۇرغۇن يىللار ئىسرائىل خەلقىنى يېتەكلىگەن، ئەمدى بۇ ۋەزىپىنى يەشۇئا ئورۇنلايدۇ. يەشۇئا خەلق ئۇنى يولباشچى سۈپىتىدە قوبۇل قىلىشى ھەققىدە ئەنسىرىگەن بولۇشى مۇمكىن (تەكرار قانۇن 34:8، 10—12). بىر كىتابتا، يەشۇئا 1:1، 2 ھەققىدە مۇنداق سۆزلەر يېزىلغان: «مەيلى ئۆتمۈشتە بولسۇن ياكى بۈگۈنكى كۈندە بولسۇن، بىر رەھبەرنىڭ ئورنىغا باشقىسى ئالمىشىدىغان پەيت جەمئىيەت مۇقۇملىقى ئۈچۈن ئەڭ قىيىن ۋە خەتەرلىك ۋاقىت».
3، 4. يەھۋا يەشۇئانى ئىشەنچىسى ئۈچۈن قانداق بەرىكەتلىگەن ۋە بىز ئۆزىمىزگە قانداق سوئال قويساق بولىدۇ؟
3 يەشۇئا قاتتىق ئەنسىرىگەن، ئەمما ئۇ يەھۋاغا ئىشىنىپ، دەرھال ئۇنىڭ بۇيرۇقلىرىغا قۇلاق سالغان (يەشۇئا 1:9—11). خۇدا يەشۇئانى ئىشەنچى ئۈچۈن بەرىكەتلەپ، ئۇنى ۋە ئىسرائىللىقلارنى يېتەكلەش ئۈچۈن ئۆز پەرىشتىسىنى ئەۋەتكەن. بۇ پەرىشتە سۆز، يەنى خۇدانىڭ تۇنجى ئوغلى بولغان بولۇشى مۇمكىن.—چىقىش 23:20—23؛ يۇھاننا 1:1.
4 يەشۇئانىڭ يېڭى يولباشچى بولۇشى ئىسرائىل خەلقى ئۈچۈن چوڭ ئۆزگىرىش ئىدى، ئەمما يەھۋا ئۇلارغا بۇ ئۆزگىرىشنى قوبۇل قىلىشقا ياردەم بەرگەن. بۈگۈنكى كۈندىمۇ تەشكىلاتتا چوڭ ئۆزگىرىشلەر يۈز بېرىۋاتىدۇ. شۇڭا بىز: «خۇدانىڭ تەشكىلاتى داۋاملىق ئالغا بېسىۋاتقان ۋاقىتتا، رەھبىرىمىز ئەيسا مەسىھكە ئىشىنىشنىڭ قانداق ئاساسى بار؟»— دەپ ئويلىنىشىمىز مۇمكىن (مەتتا 23:10-نى ئوقۇڭ). بۇ سوئالنىڭ جاۋابىنى تېپىش ئۈچۈن يەھۋا قەدىمدە ئۆزگىرىشلەر ۋاقتىدا ئۆز خەلقىنى قانداق يېتەكلىگەنلىكىنى كۆرۈپ چىقايلى.
خۇدا خەلقىنى قانان زېمىنغا ئېلىپ كىرىش
5. ئېرىخا شەھىرىنىڭ ئەتراپىدا يەشۇئا بىلەن قانداق ئالاھىدە ۋەقە يۈز بەرگەن؟ (ماقالىنىڭ بېشىدىكى رەسىمگە قاراڭ)
5 ئىسرائىللار ئىئوردان دەرياسىدىن ئۆتكەندىن كېيىن كۆپ ۋاقىت ئۆتمەي، يەشۇئا بىر ئىشقا دۇچ كەلگەن. ئۇ ئېرىخا شەھىرىنىڭ ئەتراپىدا قولىدا قىلىچ تۇتقان بىر كىشىنى ئۇچراتقانىدى. يەشۇئا ئۇنىڭدىن: «سەن بىز تەرەپنىڭ ئادىمىمۇ ياكى دۈشمەن تەرەپنىڭ ئادىمىمۇ؟»— دەپ سورىغان. ئۇ كىشى ئۆزىنىڭ «يەھۋانىڭ قوشۇنىنىڭ سەركەردىسى»، يەنى خۇدا خەلقىنى ھىمايە قىلىشقا تەييار بولغان پەرىشتە ئىكەنلىكىنى ئېيتقاندا، يەشۇئا ھەيران قالغان (يەشۇئا 5:13—15-نى ئوقۇڭ). مۇقەددەس كىتابنىڭ باشقا ئايەتلىرىدە، يەشۇئا بىلەن يەھۋانىڭ ئۆزى بىۋاستە سۆزلەشكەنلىكى يېزىلغان بولسىمۇ، يەھۋا ئۇنىڭ بىلەن، شەك-سۈبھىسىزكى ئىلگىرىكىدەكلا پەرىشتىلەرنىڭ ۋاسىتىسى بىلەن پاراڭلاشقان.—چىقىش 3:2—4؛ يەشۇئا 4:1، 15؛ 5:2، 9؛ ئەلچىلەر 7:38؛ گالاتىيالىقلار 3:19.
6—8. (1) ئىنسان كۆز قارىشى بويىچە، يەھۋانىڭ بەزى كۆرسەتمىلىرى نېمە ئۈچۈن غەلىتە بولۇپ كۆرۈنگەن بولۇشى مۇمكىن؟ (2) كۆرسەتمىلەرنىڭ توغرا ۋە ئۆز ۋاقتىدا بېرىلگەنلىكىنى نەدىن بىلىمىز؟ (ئىزاھاتقا ھەم قاراڭ)
6 پەرىشتە يەشۇئاغا ئېرىخانى بېسىۋېلىش ئۈچۈن نېمە قىلىش كېرەكلىكىنى ئېيتقان. پەرىشتىنىڭ بەرگەن بەزى كۆرسەتمىلىرى غەلىتە بولۇپ كۆرۈنگەن بولۇشى مۇمكىن. مەسىلەن، پەرىشتە يەشۇئاغا ھەممە ئەسكەرلەرنى خەتنە قىلىش كېرەكلىكىنى ئېيتقان. بىراق، ئۇلار شۇنداق قىلسا، بىرنەچچە كۈن ئىچىدە جەڭ قىلالمايتتى. شۇ چاغ ئۇلارنى خەتنە قىلىشنىڭ مۇۋاپىق ۋاقتى بولغانمۇ؟—يارىتىلىش 34:24، 25؛ يەشۇئا 5:2، 8.
7 بەلكىم، شۇ ۋاقىتتا ئەسكەرلەر: «ئەگەر دۈشمەنلەر بىزگە ھۇجۇم قىلسا، ئائىلىمىزنى قانداق قوغدايمىز؟»— دەپ ئەنسىرىگەن. بىراق، كېيىن كۈتۈلمىگەن ۋەقە يۈز بەرگەن! ئېرىخا شەھىرىدىكى كىشىلەر ئىسرائىللارغا ھۇجۇم قىلىشنىڭ ئورنىغا، ئۇلاردىن قورقۇشقا باشلىغان ئىدى. مۇقەددەس كىتابتا: «:ئىسرائىللاردىن قورققاچ، ئېرىخا شەھىرىنىڭ دەرۋازىلىرى چىڭ تاقىلىپ، ھېچكىم شەھەرگە كىرىپ چىقالمايتتى. ئىسرائىللاردىن قورققاچ، ئېرىخا شەھىرىنىڭ دەرۋازىلىرى چىڭ تاقىلىپ، ھېچكىم شەھەرگە كىرىپ چىقالمايتتى»،— دەپ يېزىلغان (يەشۇئا 6:1). بۇ خەۋەر ئىسرائىللىقلارنىڭ يەھۋانىڭ كۆرسەتمىلىرىگە بولغان ئىمان-ئېتىقادىنى تېخىمۇ كۈچەيتكەن.
8 پەرىشتە ئىسرائىللىقلارغا ئېرىخاغا ھۇجۇم قىلماسلىقنى بۇيرىغان. بۇنىڭ ئورنىغا، ئۇلار شەھەرنى ئالتە كۈن، كۈنىگە بىر قېتىم ۋە يەتتىنچى كۈنى يەتتە قېتىم ئايلىنىپ چىقىشى كېرەك ئىدى. بەلكىم، ئەسكەرلەر: «ۋاقتىمىز بىلەن كۈچىمىزنى ئىسراپ قىلىشنىڭ نېمە كېرىكى بار!؟»— دەپ ئويلىغاندۇ. بىراق، ئىسرائىلنىڭ كۆزگە كۆرۈنمەس رەھبىرى نېمە قىلىۋاتقانلىقىنى ياخشى بىلەتتى. بۇ كۆرسەتمىلەرگە ئەمەل قىلىش ئىسرائىللارنىڭ ئېتىقادىنى مۇستەھكەملەپ، ئۇلار ئېرىخا شەھىرىنى جەڭ قىلمايلا بېسىۋالغان.—يەشۇئا 6:2—5؛ ئىبرانىيلار 11:30. a (ئىزاھاتقا قاراڭ).
9. نېمە ئۈچۈن خۇدانىڭ تەشكىلاتىدىن ئالغان ھەربىر كۆرسەتمىگە ئەمەل قىلىشىمىز كېرەك؟ مىسال كەلتۈرۈڭ.
9 بۇ ۋەقەدىن نېمىنى ئۆگىنەلەيمىز؟ بەزىدە يەھۋانىڭ تەشكىلاتى بەزى يېڭى ئۆزگىرىشلەرنى قىلىشنىڭ سەۋەبلىرىنى دەرھاللا چۈشەنمەسلىكىمىز مۇمكىن. مەسىلەن، بىزنىڭ شەخسىي تەتقىق، ۋەز خىزمىتى ۋە جامائەت يىغىلىشلىرىدا ئېلېكترونلۇق قۇرۇلمىلارنى ئىشلىتىش ھەققىدە سوئالىمىز پەيدا بولغان، بىراق كېيىن بۇنىڭ پايدىسىنى كۆرۈپ، ھازىر ئۇلارنى دائىم ئىشلىتىمىز. مۇنداق ئۆزگىرىشلەرنىڭ پايدىسىنى كۆرگەندە، ئېتىقادىمىز مۇستەھكەملىنىپ، قېرىنداشلار بىلەن تېخىمۇ ئىناق بولىمىز.
ئەيسا دەسلەپكى شاگىرتلىرىنى قانداق يېتەكلىگەن؟
10. خەتنە قىلىش مەسىلىسىنى يېتەكچىلىك كېڭەشنىڭ ھەل قىلىشىنى ئەمەلىيەتتە كىم باشقۇرغان؟
10 يات خەلقتىن چىققان كورنىلىي ئىسىملىك خەتنە قىلىنمىغان كىشى مەسىھ ئەگەشكۈچىسى بولۇپ 13 يىل ئۆتكەندىن كىيىن، بەزى يەھۇدىي مەسىھىيلەر تېخىچە خەتنە قىلىنىش كېرەك دەپ ئېيتقان (ئەلچىلەر 15:1، 2). ئانتاكيادىكى قېرىنداشلارنىڭ ئارىسىدا بۇ مەسىلە ھەققىدە تالاش-تارتىش بولغان. شۇڭا بۇ مەسىلىنى ھەل قىلىش ئۈچۈن ئاقساقاللار پاۋلۇسنى يېرۇسالىمدىكى يېتەكچىلىك كېڭەشكە ئەۋەتكەن. بىراق، ئەمەلىيەتتە ئۇنى كىم ئەۋەتكەن؟ پاۋلۇس مۇنداق چۈشەندۈرگەن: «ئۇ يەرگە بېرىشىمنىڭ سەۋەبى، مەن ۋەھىي كۆرگەن ئىدىم». ئېنىقكى، يېتەكچى كېڭەشنىڭ بۇ مەسىلىنى ھەل قىلىشىنى مەسىھنىڭ ئۆزى باشقۇرغان.—گالاتىيالىقلار 2:1—3.
دەسلەپكى مەسىھىيلەرنىڭ جامائىتىنى مەسىھ باشقۇرغان (10، 11-ئابزاسلارغا قاراڭ)
11. (1) بەزى يەھۇدىي مەسىھىيلەر خەتنە قىلىش مەسىلىسىگە قانداق كۆز قاراشتا بولغان؟ (2) پاۋلۇس يېرۇسالىمدىكى ئاقساقاللارنى كەمتەرلىك بىلەن قوللىغانلىقىنى قانداق كۆرسەتكەن؟ (ئىزاھاتقا ھەم قاراڭ)
11 مەسىھنىڭ يولباشچىلىقى ئاستىدا، يېتەكچى كېڭەش يەھۇدىي ئەمەس مەسىھىيلەرنىڭ خەتنە قىلىنىشى شەرت ئەمەسلىكىنى ئېنىق كۆرسەتكەن (ئەلچىلەر 15:19، 20). بۇنىڭغا قارىماستىن، نەچچە يىلدىن كېيىن كۆپلىگەن يەھۇدىي مەسىھ ئەگەشكۈچىلىرى تېخىچە ئوغۇللىرىنى خەتنە قىلىشنى داۋاملاشتۇرغان. كېيىن يېرۇسالىمدىكى ئاقساقاللار پاۋلۇس تەۋرات قانۇنىنى ھۆرمەتلىمەيدۇ، دېگەن سۆز-چۆچەكنى ئاڭلىغان. شۇڭا ئاقساقاللار پاۋلۇسنىڭ تەۋرات قانۇنىنى ھۆرمەتلەيدىغانلىقىنى كۆرسىتىش ئۈچۈن بىر ئىش قىلىشنى سورىغان b (ئىزاھاتقا قاراڭ.) (ئەلچىلەر 21:20—26). پاۋلۇسىنىڭ قانۇننى ھۆرمەت قىلىدىغانلىقىنى ئادەملەرگە كۆرسىىتىش ئۈچۈن ئۆزى بىلەن تۆت كىشىنى ئېلىپ، مەركىزىي ئىبادەتخانىدا تازىلىنىش مۇراسىمىدىن ئۆتۈشى كېرەك ئىدى. ئۇ: «بۇنىڭ نېمە كېرىكى بار؟ نېمە ئۈچۈن بۇنى قىلىشىمنى تەلەپ قىلىۋاتىسىلەر؟ ئەگەر يەھۇدىي ئېتىقادچىلار خەتنە قىلىش مەسىلىسىنى چۈشەنمىسە، مېنىڭ نېمە گۇناھىم بار؟»— دەپ ئېيتالايتتى. لېكىن، پاۋلۇس ئاقساقاللارنىڭ ھەممە جامائەتلەردە ئىناقلىقنى ساقلاش ئارزۇسىنى چۈشىنىپ، ئۇلارنىڭ كۆرسەتمىسىگە كەمتەرلىك بىلەن قۇلاق سالغان. بىز: «مۇسانىڭ قانۇنى ئەيسا ئۆلگەندە كۈچىدىن قالغان ئەمەسمۇ؟ ئۇنداقتا، ئەيسا نېمە ئۈچۈن خەتنە قىلىش مەسىلىسىنىڭ شۇنچە ئۇزۇن داۋاملىشىشىغا يول قويغان؟»— دەپ ئويلىنىشىمىز مۇمكىن.—كولوسىلىقلار 2:13، 14.
12. ئەيسا نېمە ئۈچۈن خەتنە قىلىش مەسىلىسىنىڭ شۇنچە ئۇزۇن داۋاملىشىشىغا يول قويغان بولۇشى مۇمكىن؟
12 يېڭى چۈشەنچىنى قوبۇل قىلىش ئۈچۈن بىراز ۋاقىت كېتىشى مۇمكىن. بەزى يەھۇدىي مەسىھىيلەرگىمۇ ئۇلار ئەمدى تەۋرات قانۇنىغا بويسۇنمايدىغانلىقىنى چۈشىنىش ئۈچۈن ۋاقىت كېرەك ئىدى (يۇھاننا 16:12). ئۇلار خەتنە قىلىش خۇدا بىلەن بولغان ئالاھىدە مۇناسىۋەتنىڭ بەلگۈسى بولغانلىقىغا ئۆگىنىپ قالغان (يارىتىلىش 17:9—12). باشقا يەھۇدىي مەسىھىيلەر بولسا، يەھۇدىيلاردىن پەرقلەنسە، قارشىلىققا دۇچ كېلىشتىن قورققان (گالاتىيالىقلار 6:12). ئەمما، ۋاقىت ئۆتۈپ بۇ ئېتىقادچىلار پاۋلۇسنىڭ خەتلىرى ئارقىلىق مەسىھتىن كۆپرەك يول-يورۇق ئالغان.—رىملىقلار 2:28، 29؛ گالاتىيالىقلار 3:23—25.
مەسىھ ھازىرمۇ جامائەتنى يېتەكلىمەكتە
13. ئەيسا مەسىھنىڭ يولباشچىلىقىنى قوللاشقا بىزگە نېمە ياردەم بېرىدۇ؟
13 مەسىھ — ھازىرغىچە مەسىھىي جامائەتنىڭ بېشى. شۇڭا، ئەگەر تەشكىلاتتا سىز چۈشەنمەيدىغان قانداقتۇ بىر ئۆزگۈرۈش يۈز بەرسە، مەسىھنىڭ قەدىمدە خۇدا خەلقىنى قانداق يېتەكلىگەنلىكى ھەققىدە مۇلاھىزە قىلىڭ. مەسىھ يەشۇئانىڭ زامانىدىمۇ، ئەلچىلەرنىڭ كۈنلىرىدىمۇ، خۇدا خەلقىگە ھەردائىم توغرا يولباشچىلىق بەرگەن. شۇنىڭ ئارقىسىدا ئۇلار ھىمايە ئاستىدا بولغان ھەم ئۇلارنىڭ ئېتىقادى بىلەن ئىناقلىقى كۈچەيگەن.—ئىبرانىيلار 13:8.
14—16. «سادىق قۇلنىڭ» يولباشچىلىقى مەسىھنىڭ ئېتىقادىمىزنى مەھكەم ساقلاشقا ياردەم بېرىشنى خالايدىغانلىقىنى قانداق ئىسپاتلايدۇ؟
14 بۈگۈنكى كۈندە «سادىق ۋە ئەقىل-پاراسەتلىك قۇل» بىزگە كېرەكلىك يولباشچىلىقنى دەل ئۆز ۋاقتىدا بېرىدۇ (مەتتا 24:45). بۇ ئەيسانىڭ بىزگە غەمخورلۇق قىلىدىغانلىقىنى ئىسپاتلايدۇ. تۆت پەرزەنتنىڭ ئاتىسى مارك مۇنداق دەيدۇ: «شەيتان ئائىلىلەرگە ھۇجۇم قىلىش ئارقىلىق جامائەتلەرنى ئاجىزلاشتۇرماقچى. ھازىر ئائىلىۋى ئىبادەتنى ھەر ھەپتە ئۆتكۈزۈش كۆرسەتمىسى بېرىلگەنلىكتىن، ھەر ئائىلە بېشى ئۆيىدىكىلىرىنى قوغداشنىڭ مۇھىملىقىنى چۈشىنىدۇ».
15 ئەيسانىڭ بىزنى قانداق يېتەكلەۋاتقانلىقىنى كۆرگەندە، ئۇنىڭ ئېتىقادىمىزنى مەھكەم ساقلاشقا ياردەم بېرىشنى خالايدىغانلىقىنى چۈشىنىمىز. مەسىلەن، پاترىك ئىسىملىك ئاقساقال مۇنداق دەيدۇ: «دەسلەپتە بەزىلىرىگە دەم ئېلىش كۈنلىرى كىچىك گۇرۇپپىلاردا ئۆتكۈزۈلىدىغان ۋەز خىزمەت يىغىلىشلىرىنى ياقتۇرمىغان». بىراق، ئۇنىڭ ئېيتىشىچە، بۇ ئۆزگۈرۈش ئەيسانىڭ جامائەتتىكى قېرىنداشلارنىڭ ھەربىرىگە غەمخورلۇق قىلىدىغانلىقىنى كۆرسىتىدۇ. مەسىلەن، بەزى خىجىلچان ياكى ۋەز خىزمىتىگە كۆپ چىقمايدىغان قېرىنداشلار ئۆزلىرىنى كېرەكلىك ھېس قىلىدۇ. بۇ ئۆزگۈرۈش ئۇلارنىڭ ئېتىقادىنى مۇستەھكەملىگەن.
16 مەسىھ بىزنىڭ ۋەز خىزمىتىگە، يەنى ھازىر يەر يۈزىدىكى ئەڭ مۇھىم ئىشقا، كۆڭۈل بۆلۈشكە ياردەم بېرىدۇ (ماركۇس 13:10-نى ئوقۇڭ). يېڭىدىن تەيىنلەنگەن ئاندىرې ئىسىملىك ئاقساقال يەھۋانىڭ تەشكىلاتى بېرىدىغان ھەرقانداق يېڭى كۆرسەتمىگە ئەمەل قىلىشقا تىرىشىدۇ. ئۇ مۇنداق دەيدۇ: «بەيتەلدە خىزمەت قىلىدىغان قېرىنداشلارنىڭ سانى قىسقارتىلىشى ۋاقىتنىڭ ئاز قالغانلىقىنى ھەم ۋەز قىلىش خىزمىتىگە بار كۈچىمىز بىلەن قاتنىشىشىمىز كېرەكلىكىنى ئېسىمىزگە سالىدۇ».
مەسىھنىڭ يولباشچىلىقىنى قانداق قوللىيالايمىز؟
17، 18. نېمە ئۈچۈن ئۆزگۈرۈشلەرنىڭ پايدىسى ھەققىدە ئويلىنىشىمىز كېرەك؟
17 پادىشاھىمىز ئەيسا مەسىھنىڭ يولباشچىلىقى بىزگە ھازىرمۇ، كېلەچەكتىمۇ پايدا ئەكېلىدۇ. پات-ئارىدا بولغان ئۆزگۈرۈشلەردىن قانداق پايدا ئالغانلىقىڭىز ھەققىدە ئويلىنىپ كۆرۈڭ. جامائەتتىكى ياكى ۋەز خىزمەتتىكى ئۆزگۈرۈشلەر ئائىلىڭىزگە قانداق ياردەم بەرگەنلىكىنى ئائىلىۋى ئىبادەتتە مۇھاكىمە قىلسىڭىز بولىدۇ.
سىز ئائىلىڭىزگە ۋە باشقىلارغا تەشكىلاتتىكى ئۆزگۈرۈشلەرگە كۆنۈشكە ياردەم بېرەمسىز؟ (17، 18-ئابزاسلارغا قاراڭ)
18 ئەگەر يەھۋانىڭ تەشكىلاتى بېرىدىغان كۆرسەتمىلەرگە قۇلاق سېلىشنىڭ پايدىلىق ئىكەنلىكىنى ئەستە تۇتساق، ئۇلارغا بويسۇنۇش ئاسانراق بولىدۇ ۋە بىز ئۆزىمىزنى بەختلىك ھېس قىلىمىز. مەسىلەن، بىز بۇرۇنقىدەك كۆپ ماتېرىياللارنى بېسىپ چىقارمىغانلىقتىن، كۆپ پۇلنى تېجەيمىز. شۇنداقلا بىز يېڭى تېخنىكىنى ئىشلىتىش ئارقىلىق كۆپرەك ئادەملەرگە خۇش خەۋەرنى يەتكۈزەلەيمىز. سىز ئېلېكترونلۇق ماتېرىياللار بىلەن ئاۋازلىق ئوقۇشلۇق ۋە فىلىملەرنى كۆپرەك ئىشلىتىشكە تىرىشامسىز؟ بۇ مەسىھنى قوللاشنىڭ بىر ئۇسۇلى، چۈنكى ئۇ تەشكىلاتنىڭ ئىقتىسادىنى دانالىق بىلەن ئىشلىتىشىمىزنى خالايدۇ.
19. بىز مەسىھنىڭ يولباشچىلىقىنى نېمە ئۈچۈن قوللىشىمىز كېرەك؟
19 بىز مەسىھنىڭ يولباشچىلىقىنى قوللىغاندا، قېرىنداشلارغا ئېتىقادىنى ۋە ئۆز-ئارا ئىناقلىقىنى مۇستەھكەملەشكە ياردەم بېرىمىز. ئاندىرې بەيتەللەردە يېقىندا يۈز بەرگەن ئۆزگۈرۈشلەر ھەققىدە مۇنداق دېگەن: «بەيتەلدە بۇرۇن خىزمەت قىلغان قېرىنداشلارنىڭ ئىجابىي كۆز قارىشى ماڭا قاتتىق تەسىر قىلغان. ئۇلارنى تېخىمۇ ھۆرمەتلەيدىغان بولۇپ، مەسىھنىڭ يولباشچىلىقىغا بولغان ئېتىقادىم مۇستەھكەملەنگەن. بۇ قېرىنداشلار تاپشۇرۇلغان ھەرقانداق ۋەزىپىنى خۇشاللىق بىلەن ئورۇنداپ، يەھۋانىڭ ئەرشتىكى ھارۋىسى بىلەن تەڭ ماڭىدۇ».
يولباشچىمىزغا تايىنىپ، ئىشەنچ باغلايلى
20، 21. (1) نېمە ئۈچۈن بىز يولباشچىمىز مەسىھكە ئىشەنچ باغلىيالايمىز؟ (2) كېيىنكى ماقالىدە نېمىنى مۇھاكىمە قىلىمىز؟
20 پات-ئارىدا بىزنىڭ رەھبىرىمىز ياكى يولباشچىمىز ئەيسا مەسىھ «تولۇق غەلبە قازىنىپ»، «كىشىنى ئەيمەندۈرىدىغان ئاجايىپ ئىشلارنى» قىلىدۇ (ۋەھىيلەر 6:2؛ زەبۇر 45:4). ئۇ ھازىرمۇ بىزنى يېڭى دۇنيادىكى ھاياتقا تەييارلاۋاتىدۇ. شۇ چاغدا بىز تىرىلگەن ئادەملەرگە تەلىم بېرىپ، يەرنى جەننەتكە ئايلاندۇرۇشقا ياردەم بېرىمىز.
21 ئەگەر يولباشچىمىز ۋە پادىشاھىمىز مەسىھكە تايانساق، ئۆزگۈرىدىغان ۋەزىيەتلەرگە قارىماستىن، ئۇ بىزنى يېڭى دۇنياغا يېتەكلەيدۇ (زەبۇر 46:1—3-نى ئوقۇڭ). ئۆزگۈرۈشلەرگە، بولۇپمۇ ئۇلار تۇيۇقسىز يۈز بەرسە ياكى بىۋاسىتە بىزگە تەسىر قىلسا، قوبۇل قىلىش قىيىن بولۇشى مۇمكىن. شۇنداق ئۆزگۈرۈشكە دۇچ كەلگەندە، بىز قانداق قىلىپ تىنچ-خاتىرجەملىكنى ۋە يەھۋاغا بولغان مەھكەم ئېتىقادنى ساقلىيالايمىز؟ بۇنى بىز كېيىنكى ماقالىدە مۇھاكىمە قىلىمىز.
a ئارخېئولوگلار ئېرىخا شەھىرىنىڭ خارابىلىرى ئاستىدىن كۆپ ئاشلىق ساقلانغان جاينى تاپقان. بۇندىن كۆرۈۋېلىشقا بولىدۇكى، شەھەر قىسقا ۋاقىت قورشاۋغا ئېلىنغان، شۇ سەۋەب شەھەردىكى ئوزۇق-تۆلۈكلەر تۈگەپ كەتمىگەن. گەرچە ئىسرائىللارنىڭ ئېرىخادىكى ئاشلىقلارنى ئولجا ئېلىشىغا رۇخسەت قىلىنمىغان بولسىمۇ، بۇ پەسىل ھوسۇل يىغىش ۋاقتى بولۇپ، ئېتىزلاردا ئاشلىقلار مول بولغاچقا، بۇ ئىسرائىللىقلارنىڭ شەھەرنى بېسىۋېلىشى ئۈچۈن ياخشى پۇرسەت بولغان ئىدى.—يەشۇئا 5:10—12.
b «كۈزىتىش مۇنارى» 2003-يىل، 1-مارت سانىنىڭ 24-بېتىدىكى «پاۋلۇس سىناقنى كەمتەرلىك بىلەن قوبۇل قىلغان» ناملىق رامكىغا قاراڭ.
