ھەقىقەتنى ئۆگىتىڭلار
«ئەي يەھۋا، … سۆزۈڭنىڭ ئۇل ئاساسى ھەقىقەت».—زەبۇر 119:159، 160.
ناخشىلار: 34، 145
1، 2. (1) ئەيسانىڭ ھاياتىدا نېمىنى ئەڭ مۇھىم ئورۇنغا قويغان ۋە نېمە ئۈچۈن؟ (2) خۇدا بىلەن خىزمەتداش بولۇش ئۈچۈن نېمە قىلىشىمىز كېرەك؟
ئەيسا مەسىھ ئاۋۋال ياغاچچى، كېيىن ئۇستاز بولغان (ماركۇس 6:3؛ يۇھاننا 13:13). ئۇ ھەر ئىككى ئىشنى ماھىرلىق بىلەن قىلغان. ياغاچچى سۈپىتىدە ئۇ ياغاچتىن ھەر تۈرلۈك پايدىلىق بۇيۇملارنى قىلىشنى ئۆگەنگەن. ئۇستاز سۈپىتىدە بولسا، ئۇ يازمىلارنى پىششىق بىلگەن، شۇڭا ئادەملەرنىڭ خۇدا سۆزىدىكى ھەقىقەتنى چۈشىنىشىگە ياردەم بەرگەن (مەتتا 7:28؛ لۇقا 24:32، 45). ئەيسا 30 ياشقا كىرگەندە، ياغاچچىلىق ئىشىنى تاشلاپ، ئۇستاز بولۇشنى ياھاتىدىكى ئەڭ مۇھىم ئورۇنغا قويغان. ئۇ ئېيتقاندەك، ئۇنىڭ يەرگە كېلىش سەۋەبلىرىنىڭ بىرى — خۇدا پادىشاھلىقى ھەققىدە خۇش خەۋەرنى جاكارلاش ئىدى (مەتتا 20:28؛ لۇقا 3:23؛ 4:43). ئەيسا ۋەز ئىشىنى ھاياتىدا بىرىنچى ئورۇنغا قويغان ۋە باشقىلارنىڭمۇ شۇنداق قىلىشىنى خالىغان.—مەتتا 9:35—38.
2 كۆپىنچىمىز ياغاچچى ئەمەس، لېكىن ھەممىمىز ئادەملەرگە خۇش خەۋەرنى يەتكۈزىمىز. بۇ ئىش بەكمۇ مۇھىمكى، خۇدانىڭ ئۆزى بۇ ئىشقا قاتنىشىدۇ. مۇقەددەس كىتابتا يېزىلغان: «بىز خۇدانىڭ خىزمەتداشلىرىمىز» (1-كورىنتلىقلار 3:9؛ 2-كورىنتلىقلار 6:4). بىز زەبۇر يازغۇچىسىنىڭ مۇنۇ سۆزلىرىگە قوشۇلىمىز: «سۆزۈڭنىڭ ئۇل ئاساسى ھەقىقەت» (زەبۇر 119:159، 160). شۇ سەۋەبتىن، بىز ۋەز قىلغاندا «ھەقىقەت سۆزىنى توغرا ئۇسۇلدا» يەتكۈزۈشنى خالايمىز (2-تىموتىي 2:15-نى ئوقۇڭ). شۇڭا، مۇقەددەس كىتابنى ئىشلىتىش ماھارىتىمىزنى ئۆستۈرۈشكە تىرىشىمىز. مۇقەددەس كىتاب — يەھۋا خۇدا، ئەيسا مەسىھ ۋە پادىشاھلىق ھەققىدە تەلىم بېرىشنىڭ ئاساسىي قورالى. ۋەز قىلىش ئىشىنى ياخشى ئورۇنداش ئۈچۈن يەھۋانىڭ تەشكىلاتى بىزنى باشقىمۇ ئۈنۈملۈك قوراللار بىلەن تەمىنلەيدۇ. ئۇلارنىڭ ھەممىسى تەلىم بېرىش قوراللىرىغا كىرىدۇ.
3. ۋەز خىزمەتتە دىققىتمىزنى نېمىگە قارىتىشىمىز كېرەك ۋە ئەلچىلەر 13:48-ئايەتكە ماس بىرىنچى نۆۋەتتە كىملەرنى ئىزدىشىمىز كېرەك؟
3 بەلكىم، سىز بۇ قوراللار نېمە ئۈچۈن «ۋەز قىلىش قوراللىرى» ئەمەس، «تەلىم بېرىش قوراللىرى» دەپ ئاتىلىدىغانلىقىغا ھەيران بولىدىغانسىز. سەۋەبى، «ۋەز قىلىش» خۇش خەۋەرنى جاكارلاشنى بىلدۈرىدۇ. «تەلىم بېرىش» بولسا، شۇ خەۋەرنى چۈشەندۈرۈشنى بىلدۈرىدۇ. ئادەم ئاڭلىغان خەۋەرنى چۈشەنسە، بۇ ئۇنى بىلىمىگە ماس ھەرىكەت قىلىشقا دەۋەت قىلىدۇ. بۇ دۇنيانىڭ ئاخىرى يېقىنلىشىۋاتىدۇ، شۇڭا ئاز قالغان ۋاقىتنى ئادەملەر بىلەن مۇقەددەس كىتابنى تەتقىق قىلىپ، ھەقىقەتنى ئۆگىتىشكە سەرپ قىلىشىمىز لازىم. بۇنىڭ ئۈچۈن، بىز مەڭگۈ ھاياتنى قوبۇل قىلىشقا مايىل ئادەملەرنى قىزغىنلىق بىلەن ئىزدەپ، ئۇلارغا خۇدانىڭ خىزمەتچىسى بولۇشقا ياردەم بېرىشىمىز كېرەك.—ئەلچىلەر 13:44—48-نى ئوقۇڭ.
4. مەڭگۈ ھاياتنى قوبۇل قىلىشقا مايىل ئادەملەرنى قانداق تاپالايمىز؟
4 بىز مەڭگۈ ھاياتنى قوبۇل قىلىشقا مايىل ئادەملەرنى قانداق تاپالايمىز؟ بىرىنچى ئەسىردىكى ئېتىقادچىلار مۇنداق كىشىلەرنى پەقەت ۋەز قىلىش ئارقىلىق تاپالىغان. ئەيسا شاگىرتلىرىغا: «قايسى شەھەر ياكى يېزىغا كىرسەڭلار، بۇ خەۋەرگە لايىق كىشىنى ئىزدەپ تېپىڭلار ۋە كەتكۈچە ئۇنىڭكىدە تۇرۇڭلار»،— دەپ ئېيتقان (مەتتا 10:11). بۈگۈنكى كۈندە بىزمۇ شۇنداق قىلىشىمىز كېرەك. ئەلۋەتتە، ئەگەر ئادەم سەمىمىي بولمىسا، خۇدا ھەققىدە بىلىشنى تامامەن خالىمىسا ياكى تەكەببۇر بولسا، ئۇنىڭ خۇش خەۋەرگە قۇلاق سېلىشىنى ئۈمىد بىلەن كۈتمەيمىز. بىز سەمىمىي، كەمتەر ۋە ھەقىقەتنى بىلىشنى خالايدىغان ئادەملەرنى ئىزدەيمىز. ۋەز ئىشىنى ئەيسانىڭ ياغاچچىلىق ئىشى بىلەن سېلىشتۇرۇشقا بولىدۇ. ئەيسا ئۆي جاھازلىرى، ئىشىك، بويۇنتۇرۇق ياكى باشقا بۇيۇمنى ياساشتىن بۇرۇن، ياخشى ياغاچنى تېپىشى كېرەك ئىدى. كېيىن، ئۇ كېرەكلىك ئەسۋابلارنى ۋە قابىلىيىتىنى ئىشلىتىپ، يۇقىرىدا تىلغا ئالغان نەرسىلەرنى ياسالىغان. دەل شۇنداق، بىزمۇ ئاۋۋال سەمىمىي ئادەملەرنى تېپىپ، ئاندىن ئۇلارغا شاگىرت بولۇشقا ياردەم بېرىش ئۈچۈن، قوراللىرىمىز ۋە قابىلىيەتلىرىمىزنى ئىشلىتىشىمىز لازىم.—مەتتا 28:19، 20.
5. تەلىم بېرىش قوراللىرىمىز ھەققىدە نېمە بىلىشىمىز كېرەك؟ مىسال كەلتۈرۈڭ (ماقالىنىڭ بېشىدىكى رەسىملەرگە قاراڭ)
5 ھەربىر قورال-سايماننىڭ ئۆزىنىڭ ئىشلىتىش ئورنى بار. مەسىلەن، ئەيسا ئىشلەتكەن ئەسۋابلارنى ئالايلى a (ئىزاھاتقا قاراڭ). ئۇنىڭغا ياغاچنى ئۆلچەش، بەلگىلەش، كېسىش، تېشىش، سىلىقلاش ھەم ياغاچلارنى ئۆزئارا بىرىكتۈرۈش ئۈچۈن ھەرخىل ئەسۋابلار كېرەك بولغان. شۇنىڭغا ئوخشاش، ھەربىر تەلىم بېرىش قورالىنىڭ ئۆز ئىشلىتىلىش ئورنى بار. كېلىڭلار، شۇ قوراللارنى ئىشلىتىش ئۇسۇللىرىنى كۆرۈپ چىقايلى.
كىملىكىمىزنى كۆرسىتىدىغان قوراللار
6، 7. (1) ئالاقىلىشىش كارتىلىرى قايسى مەقسەتتە چىقىرىلغان؟ (2) تەكلىپنامىلەرنى نېمە ئۈچۈن ئىشلىتىمىز؟
6 ئالاقىلىشىش كارتىلىرى. بۇ قوراللار كىچىك بولسىمۇ، ناھايىتى ئۈنۈملۈك. ئادەملەر ئۇلاردىن بىزنىڭ كىم ئىكەنلىكىمىزنى بىلەلەيدۇ ۋە دىققىتىنى تېزلا jw.org تور بېكىتىگە قارىتالايدۇ. بۇ توربەتتە ئادەملەر بىز ھەققىدە كۆپرەك بىلىپ، ھەتتا مۇقەددەس كىتاب ئۆگىنىشنى ئىلتىماس قىلالايدۇ. ھازىرغىچە jw.org تور بېكىتى ئارقىلىق 400000دىن كۆپرەك ئادەم مۇقەددەس كىتابنى ئۆگىنىشنى ئىلتىماس قىلغان ۋە شۇ ئىلتىماسنى كۈندە نەچچە يۈزلىگەن ئادەملەر تولدۇرىدۇ. ئالاقىلىشىش كارتىسىدىن بىرنەچچىنى يېنىڭىزغا سېلىۋېلىپ، ئادەملەر بىلەن سۆزلەشكەندە، شۇلارنى ئىشلىتىپ گۇۋاھلىق بەرسىڭىز بولىدۇ.
7 تەكلىپنامە. جامائەت يىغىلىشلىرىغا چاقىرىش تەكلىپنامىسىدە مۇنداق يېزىلغان: «بىز سىزنى يەھۋا گۇۋاھچىلىرى بىلەن مۇقەددەس كىتابنى تەتقىق قىلىشقا تەكلىپ قىلىمىز». بۇ تەكلىپنامىدە، «ئاممىۋىي يىغىلىشلىرىمىزغا» قاتنىشىشقا تەكىلىپ قىلىنغان ياكى «ئايرىم ئۆزى بىلەن شەخسەن» ئۆگىنىشكە بولىدىغانلىقى يېزىلغان. ئۇنىڭدا، كىم ئىكەنلىكىمىزنى كۆرسىتىلگەن، «ئۆزىنىڭ خۇداغا بولغان مۇھتاجلىقىنى تونۇپ يەتكەنلەر» بىلەن مۇقەددەس كىتابنى ئۆگىنىشكە چاقىرىق قىلغان (مەتتا 5:3). بىر كىشى مۇقەددەس كىتابنى ئۆگەنسۇن ياكى ئۆگەنمىسۇن، ئۇ ئوخشاشلا جامائەت يىغىلىشلىرىغا قاتنىشالايدۇ. ئۇ يىغىلىشقا كەلگەندە، مۇقەددەس كىتاب ھەققىدە كۆپ بىلىم ئېلىشقا بولىدىغانلىقىنى كۆرىدۇ b (ئىزاھاتقا قاراڭ).
8. بىر قېتىم بولسىمۇ يىغىلىشقا قاتنىشىش ئادەملەرگە قانداق زور تەسىر قىلىشى مۇمكىن؟ مىسال كەلتۈرۈڭ.
8 ئادەملەرنى جامائەت يىغىلىشلىرىغا بىر قېتىم بولسىمۇ، تەكلىپ قىلىشىمىز كېرەك. نېمە ئۈچۈن؟ چۈنكى يىغىلىشقا كەلگەندە، ئۇلار بىزنىڭ يالغان دىنلاردىن پەرق قىلىدىغانلىقىمىزنى، يەنى خۇدانى تونۇپ بىلىشكە ياردەم بېرىدىغانلىقىمىزنى كۆرىدۇ (يەشايا 65:13). مەسىلەن، قوشما شتاتلاردا ياشايدىغان رېي ۋە لىندا ئىسىملىك بىر ئەر-ئايال بۇ پەرقنى بىرنەچچە يىل بۇرۇن ئۆز كۆزى بىلەن كۆرگەن. ئۇلار خۇداغا ئىشەنگەن ۋە ئۇنى ياخشىراق بىلىشنى خالىغان. شۇڭا، ئۇلار ئۆز شەھىرىدىكى ھەممە چېركاۋلارغا بېرىپ كۆرۈشنى قارار قىلغان. ئۇلار بىرەر چېركاۋنىڭ ئەزاسى بولۇشتىن بۇرۇن ئىككى نەرسىگە دىققەت قىلماقچى بولغان. بىرىنچىدىن، ئۇلار چېركاۋدا بىلىم ئېلىشى لازىم. ئىككىنچىدىن، چېركاۋ ئەزالىرىنىڭ كىيىمى خۇداغا خىزمەت قىلىدىغان كىشىلەرگە خاس بولۇشى كېرەك. ھەممە چېركاۋلارنى تەكشۈرۈپ چىقىش ئۈچۈن بىرنەچچە يىل كەتكەن، چۈنكى شۇ شەھەردە چېركاۋلار بەك كۆپ ئىدى. ئەمما، ئۇلار ئىزدىگىنىنى تاپالمىغان ئىدى. سەۋەبى ئۇلار ھېچنەرسە ئۆگىنەلمىگەن ۋە چېركاۋنىڭ ئەزالىرى ئەدەبسىز كىيىنگەن. ئۇلار ئۆز تىزىملىكىدىكى ئەڭ ئاخىرىقى چېركاۋلارغا بېرىپ بولغاندىن كېيىن، لىندا ئىشىغا كەتكەن ۋە رېي ئۆيگە قايتىپ ماڭغان. رېي يولدا كېلىۋېتىپ، يەھۋا گۇۋاھچىلىرىنىڭ يىغىلىش زالىنى كۆرۈپ: «بۇ يەرنىمۇ كۆرۈپ چىقاي»،— دەپ ئويلىغانىدى. ئىچىگە كىرگەندە، ئۇ دەل ئىزدىگىنىنى تاپقان! ئۇ يەردىكىلەرنىڭ ھەممىسى ئۇنىڭغا مېھرىبانلىق بىلەن، دوستانە مۇئامىلە قىلغان. ئۇنىڭدىن باشقا، ئۇلار پاكىز ۋە چىرايلىق كىيىنگەن. رېي بىرىنچى قاتارغا ئولتۇرغان ۋە ئۆگەنگەنلىرىنى ئىنتايىن ياقتۇرغان! بۇ ۋەزىيەت ئەلچى پاۋلۇسنىڭ سۆزلىرىنى ئېسىمىزگە سالىدۇ. يىغىلىشقا بىرىنچى قېتىم كەلگەن ئادەم: « خۇدا ھەقىقەتەن سىلەرنىڭ ئاراڭلاردا»— دېيىشى مۇمكىن (1-كورىنتلىقلار 14:23—25). شۇنىڭدىن كېيىن، رېي يىغىلىشلارغا ھەر يەكشەنبە كۈنى كېلىدىغان بولغانىدى. ئۇ يەنە باشقا يىغىلىشلارغىمۇ لىندا بىلەن كېلىشكە باشلىغان. گەرچە ئۇلارنىڭ يېشى 70تىن ئاشقان بولسىمۇ، ئۇلار مۇقەددەس كىتابنى ئۆگىنىپ، چۆمۈلدۈرۈلۈش مۇراسىمىدىن ئۆتكەن.
سۆھبەت باشلاشقا ياردەم بېرىدىغان قوراللار
9، 10. (1) ۋاراقچىلارنى ئىشلىتىش نېمە ئۈچۈن ئاسان؟ (2) «خۇدا پادىشاھلىقى دېگەن نېمە؟» ناملىق ۋاراقچىنى قانداق ئىشلىتىشكە بولىدۇ؟
9 ۋاراقچىلار. تەلىم بېرىش قوراللىرىنىڭ ئارىسىدا سەككىز ۋاراقچە بار. ئۇلارنى ئىشلىتىپ، سۆھبەت باشلاش ئاسان. دەسلەپكى ۋاراقچىلار 2013-يىلى نەشىر قىلىنىپ، تەخمىنەن بەش مىليارد ۋاراقچە بېسىپ تارقىتىلغان. بۇ ۋاراقچىلارنىڭ ھەممىسى ئوخشاش، شۇڭا بىرىنى ئىشلىتىشنى ئۆگىنىۋالسىڭىز، باشقىلارنىمۇ ئىشلىتەلەيسىز. ئادەملەر بىلەن سۆھبەتنى باشلاش ئۈچۈن ۋاراقچىنى قانداق ئىشلەتسىڭىز بولىدۇ؟
10 بەلكىم، سىز «خۇدا پادىشاھلىقى دېگەن نېمە؟» دېگەن ۋاراقچىنى ئىشلەتمەكچى بولدىڭىز دەيلى. بىر كىشىگە مۇقاۋىدىكى سوئالنى كۆرسىتىپ، ئۈچ جاۋابنىڭ بىرىنى تاللاشقا پۇرسەت بېرىڭ. ئۇنىڭ توغرا ياكى ناتوغرا جاۋاب بەرگەنلىكىنى ئېيتىشنىڭ ئورنىغا، ۋاراقچىنىڭ ئىچىدىكى «مۇقەددەس كىتاب مۇنداق دەيدۇ» دېگەن يەرگە دىققىتىنى قارىتىپ، دانىيال 2:44 ۋە 7:14-نى ئوقۇپ بېرىڭ. سۆھبەتنىڭ ئاخىرىدا ۋاراقچىنىڭ ئاخىرقى بېتىدىكى «ئويلاپ كۆرۈڭ» دېگەن رامكىدىكى «خۇدا پادىشاھلىقىنىڭ باشقۇرۇشى ئاستىدا قانداق تۇرمۇش كەچۈرەرمىز؟» دېگەن سوئالنى سوراڭ. بۇ سوئالغا كېيىنكى قېتىم كەلگەندە جاۋاب بەرسىڭىز بولىدۇ. شۇ كىشىگە قايتا يولۇققاندا «خۇش خەۋەر» كىتابچىسىدىكى 7-دەرسنى كۆرسەتسىڭىز بولىدۇ. بۇ كىتابچە تەتقىق قىلىش دەرسىنى باشلاشقا ياردەم بېرىدىغان قوراللارنىڭ بىرى.
مۇقەددەس كىتابقا قىزىقىش ئويغىتىدىغان قوراللار
11. ژۇرناللىرىمىز قانداق مەقسەتتە لاھىيىلەنگەن ۋە ئۇلار ھەققىدە نېمىنى بىلىۋېلىشىمىز لازىم؟
11 ژۇرناللار. «كۈزىتىش مۇنارى» ۋە «ئويغىنىش!» ژۇرناللىرى دۇنيادا ئەڭ كەڭ تارقالغان ۋە ئەڭ كۆپ تىلغا تەرجىمە قىلىنغان. ئۇلارنى ھەر تۈرلۈك دۆلەتلەردىكى كىشىلەر ئوقۇغاچقا، ژۇرنالنىڭ مۇقاۋىسىدىكى تېمىلار ھەممىسىنىڭ قىزىقىشىنى قوزغاش ئۈچۈن لاھىيىلەنگەن. بىز مۇشۇ ژۇرناللارنى ئىشلىتىپ، ئادەملەرنىڭ ھاياتىدا نېمە ئەڭ مۇھىم ئورۇندا ئىكەنلىكىنى چۈشىنىشىگە ياردەم بېرىشىمىز كېرەك. بۇنىڭ ئۈچۈن، ئاۋۋال قايسى ژۇرنالنىڭ قانداق ئادەملەر ئۈچۈن يېزىلغانلىقىنى بىلىۋېلىشىمىز لازىم.
12. «ئويغىنىش!» ژۇرنىلى كىم ئۈچۈن نەشىر قىلىنغان ۋە ئۇنىڭ مەقسىتى نېمە؟
12 «ئويغىنىش!» ژۇرنىلى مۇقەددەس كىتاب ھەققىدە ئاز بىلىدىغان ياكى ھېچنېمە بىلمەيدىغان ئادەملەر ئۈچۈن نەشىر قىلىنغان. مۇنداق ئادەملەر مۇقەددەس كىتاب تەلىملىرىنى تامامەن بىلمەسلىكى، دىنغا ئىشەنمەسلىكى ياكى مۇقەددەس كىتابنىڭ ھاياتى ئۈچۈن پايدىسى يوق دەپ ئويلىشى مۇمكىن. بۇ ژۇرنالنىڭ ئەڭ مۇھىم مەقسىتى — ئادەملەرنى خۇدانىڭ بار ئىكەنلىكىگە ئىشەندۈرۈش (رىملىقلار 1:20؛ ئىبرانىيلار 11:6). بۇنىڭدىن تاشقىرى، بۇ ژۇرنال ئوقۇرمەنلەرگە مۇقەددەس كىتاب «خۇدانىڭ سۆزى» ئىكەنلىكىگە ئىشەنچىنى مۇستەھكەملەشكە ياردەم بېرىدۇ (1-سالونىكالىقلار 2:13). مەسىلەن، 2018-يىلىنىڭ «ئويغىنىش!» ژۇرناللىرىدا (باشقا تىلدا) مۇنداق ئۈچ ماۋزۇ بار: «بەخت-سائادەتنىڭ ئاچقۇچى»، «بەختلىك ئائىلە قۇرۇشنىڭ 12 سىرى» ۋە «دەردكە دەرمان بولۇش».
13. (1) «كۈزىتىش مۇنارى» ئاممىۋىي نەشرى كىم ئۈچۈن يېزىلغان؟ (2) بۇ قورالنى ئىشلەتكەندە، قانداق قىزىقارلىق ۋەقەلەرنى باشتىن ئۆتكۈزدىڭىز؟
13 «كۈزىتىش مۇنارى» ئاممىۋىي نەشرى خۇداغا ۋە مۇقەددەس كىتابقا ھۆرمەت بىلەن قارايدىغان ئادەملەرگە مۇقەددەس كىتابتىكى تەلىملەرنى چۈشەندۈرۈش مەقسىتىدە نەشىر قىلىنغان. شۇنداق كىشىلەر مۇقەددەس كىتابنىڭ بەزى تەلىملىرىنى بىلسىمۇ، بىراق ئۇلارنى ئېنىق چۈشەنمەسلىكى مۇمكىن (رىملىقلار 10:2؛ 1-تىموتىي 2:3، 4). 2018-يىلى نەشىر قىلىنغان ژۇرناللار بۇ ئۈچ سوئالغا جاۋاب بېرىدۇ: «مۇقەددەس كىتابنىڭ بۈگۈنكى كۈندە ئەھمىيىتى بارمۇ؟»، «كېلەچىكىمىز قانداق بولىدۇ؟» ۋە «خۇدا بىزگە كۆڭۈل بۆلەمدۇ؟»
ئىش-ھەرىكەتكە دەۋەت قىلىدىغان قوراللار
14. (1) تەلىم بېرىش قوراللىرىغا كىرىدىغان فىلىملەر نېمە ئۈچۈن چىقىرىلغان؟ (2) بۇ فىلىملەرنى كۆرسەتكەندە، قانداق قىزىقارلىق ۋەقەلەرنى باشتىن كەچۈردىڭىز؟
14 فىلىملەر. ئەيسانىڭ كۈنلىرىدە ياغاچچىلار پەقەت قول بىلەن ئىشلەيدىغان ئەسۋابلارنى ئىشلەتكەن. ئەمما، بۈگۈنكى كۈندە ياغاچچىلار ئېلېكتر كۈچى بىلەن ئىشلەيدىغان قورال-سايمانلارنى، مەسىلەن، توك ھەرە، ئۈشكە، رەندە ۋە باشقىلارنى ئىشلىتىدۇ. بۈگۈنكى كۈندە بېسىپ چىقىرىلغان ماتېرىياللاردىن باشقا، ئادەملەرگە ۋەز قىلىش ئۈچۈن ئاجايىپ فىلىملىرىمىز ھەم بار. ئۇلارنىڭ تۆتى تەلىم بېرىش قوراللىرىغا كىرىدۇ: «نېمە ئۈچۈن مۇقەددەس كىتاب ئۆگىنىش كېرەك؟»، «مۇقەددەس كىتاب تەتقىق ئۆگىنىشى قانداق ئۆتكۈزىلىدۇ؟»، «نېمە ئۈچۈن ئىبادەت يىغىلىشلىرىغا قاتنىشىمىز؟» ۋە «يەھۋا گۇۋاھچىلىرى دېگەن كىملەر؟» بەزى فىلىملەرنى دەسلەپكى يولۇقۇشتا، باشقىلىرىنى بولسا، قايتا يولۇقۇشتا ئىشلىتىشكە بولىدۇ. بۇ فىلىملەر تەلىم بېرىشتە ئىشلىتىلىدىغان ئاجايىپ قوراللار، سەۋەبى ئۇلار ئادەملەرنى مۇقەددەس كىتابنى ئۆگىنىشكە ۋە يىغىلىشلىرىمىزغا كېلىشكە دەۋەت قىلىدۇ.
15. ئادەمگە ئۆز ئانا تىلىدىكى فىلىم قانداق تەسىر قىلىشى مۇمكىن؟ مىساللارنى كەلتۈرۈڭ.
15 مەسىلەن، بىر قېرىندىشىمىز ماكرونېزىيىدىن كۆچۈپ كەلگەن ئايالغا ئۇنىڭ ئانا تىلى بولغان ياپ تىلىدا «نېمە ئۈچۈن مۇقەددەس كىتاب ئۆگىنىش كېرەك؟» ناملىق فىلىمنى كۆرسەتكەن. فىلىم باشلانغاندا، ھېلىقى ئايال: «بۇ مېنىڭ ئانا تىلىمغۇ! ئىشەنمەيۋاتىمەن، بۇ كىشى مېنىڭ تىلىمدا سۆزلەۋاتىدۇ. تەلەپپۇزىغا قارىغاندا، ئۇ بىزنىڭ ئارالدىن چىققان»،— دېگەن. كېيىن، ئۇ jw.org تور بېكىتىدىن ئانا تىلىدىكى ھەممە نەشىرلەرنى ئوقۇپ، فىلىملەرنى كۆرۈپ چىقىدىغانلىقىنى ئېيتقان (ئەلچىلەر 2:8، 11-نى سېلىشتۇرۇڭ). باشقا بىر مىسال ئامېرىكىدىكى قېرىندىشىمىز باشقا قۇرۇقلۇقتا ياشايدىغان جىيەنىگە دەل شۇ فىلىمنىڭ ئۇلانمىسىنى ئەۋەتكەن. ئۇ فىلىمنى كۆرۈپ، مۇنداق دەپ يازغان: «بۇ دۇنيا شەيتاننىڭ ھۆكۈمرانلىقى ئاستىدا بولۇۋاتقانلىقىنى كۆرگىنىم قەلبىمگە قاتتىق تەسىر قىلدى. شۇڭا، مەن مۇقەددەس كىتابنى ئۆگىنىشنى سورىدىم». بۇ ۋەقە ئالاھىدە قىزىقارلىق، چۈنكى قېرىندىشىمىزنىڭ جىيەنى پائالىيىتىمىز چەكلەنگەن دۆلەتتە ياشايدۇ.
ھەقىقەتنى ئۆگىتىدىغان قوراللار
16. مۇشۇ كىتابچىلارنىڭ مەقسىتىنى چۈشەندۈرۈپ بېرىڭ: (1) «خۇدانىڭ سۆزىگە قۇلاق سېلىپ مەڭگۈ ياشاڭ!» (2) «خۇدادىن كەلگەن خۇش خەۋەر!» (3) «بۈگۈنكى كۈندە يەھۋانىڭ ئىرادىسىنى كىم ئورۇنلاۋاتىدۇ؟»
16 كىتابچىلار. ياخشى ئوقۇيالمايدىغان ياكى ئانا تىلىدا ماتېرىياللار يوق دېيەرلىك ئادەملەرگە ھەقىقەتنى قانداق يەتكۈزەلەيمىز؟ بىز «خۇدانىڭ سۆزىگە قۇلاق سېلىپ مەڭگۈ ياشاڭ!» دېگەن كىتابچىنى ئىشلىتەلەيمىز. «خۇدادىن كەلگەن خۇش خەۋەر!» — ئادەملەر بىلەن مۇقەددەس كىتابنى ئۆگىنىشنى باشلاش ئۈچۈن ئاجايىپ قورال. ئادەمگە كىتابچىنىڭ ئاخىرقى بېتىدىكى ئون تۆت ساۋاقنى كۆرسىتىپ، ئۇلارنىڭ قايسىسى كۆپرەك قىزىقتۇرىدىغانلىقىنى سورىسىڭىز بولىدۇ. كېيىن ئۇ تاللىغان ساۋاقنى ئېچىپ، ئۇنىڭ بىلەن ئۆگىنىشنى باشلىيالايسىز. بۇنى قايتا يولۇقۇشتا ئىشلىتىپ كۆردىڭىزمۇ؟ بىزنىڭ تەلىم بېرىش قوراللىرىمىزنىڭ ئىچىگە «بۈگۈنكى كۈندە يەھۋانىڭ ئىرادىسىنى كىم ئورۇنلاۋاتىدۇ؟» دېگەن كىتابچە كىرىدۇ. بۇ كىتابچىنىڭ مەقسىتى — ئادەملەرگە تەشكىلاتىمىزنى تونۇشتۇرۇش. ئۇنى تەتقىق دەرسىدە ئىشلىتىشنى ئۆگىنىش ئۈچۈن، 2017-يىلنىڭ «مەسىھىي ھاياتىمىز ۋە خىزمىتىمىزنىڭ» مارت ئېيىدىكى سانىغا قاراڭ.
17. (1) بۇ ئىككى كىتابنى تەتقىق قىلىشتىكى مەقسەت نېمە؟ (2) ئادەم چۆمۈلدۈرۈلۈش مۇراسىمىدىن ئۆتكەن بولسىمۇ، نېمە قىلىش كېرەك ۋە نېمە ئۈچۈن؟
17 كىتابلار. كىتابچىنى تەتقىق قىلىشنى باشلىغاندىن كېيىن، خالىغان ۋاقىتتا «مۇقەددەس كىتابتا زادى نېمە ھەقىقەت بار؟» دېگەن كىتابنى ئۆگىنىشنى باشلىسىڭىز بولىدۇ. بۇ قورال ئادەمگە مۇقەددەس كىتابنىڭ ئاساسىي تەلىملىرىنى ياخشىراق چۈشىنىشكە ياردەم بېرىدۇ. ئەگەر ئۆگەنگۈچى روھىي جەھەتتىن ئۆسۈشكە باشلىسا، بۇ كىتابنى تۈگەتكەندىن كېيىن، «خۇدانىڭ مېھىر-مۇھەببىتى ئىچىدە ياشاڭلار» دېگەن كىتابنى باشلىسىڭىز بولىدۇ. بۇ كىتابتىن ئۆگەنگۈچى مۇقەددەس كىتاب پرىنسىپلىرىنى ئۆز كۈندىلىك تۇرمۇشىدا ئىشلىتىشنى ئۆگىنىدۇ. ئېسىڭىزدە بولسۇن، ئادەم چۈمۈلدۈرۈلۈش مۇراسىمىدىن ئۆتكەن بولسىمۇ، بۇ ئىككى كىتابنى ئاخىرىغىچە تەتقىق قىلىشى كېرەك. شۇنداق قىلىش ئۆگەنگۈچىنىڭ يەھۋاغا بولغان ئىمان-ئېتىقادىنى مۇستەھكەملىشىگە ۋە ئۇنىڭغا سادىق بولۇپ قېلىشىغا ياردەم بېرىدۇ.—كولوسىلىقلار 2:6، 7-نى ئوقۇڭ.
18. (1) 1-تىموتىي 4:16-ئايەتكە ئاساسلانغاندا، ھەقىقەتنى ئۆگىتىش ئۈچۈن نېمە قىلىشىمىز كېرەك ۋە بۇنىڭ نەتىجىسى قانداق بولۇشى مۇمكىن؟ (2) تەلىم بېرىش قوراللىرىنى ئىشلەتكەندە، مەقسىتىمىز قانداق بولۇشى كېرەك؟
18 يەھۋا گۇۋاھچىلىرى سۈپىتىدە، بىز ئادەملەرنى مەڭگۈ ھاياتقا يېتەكلەيدىغان «خۇش خەۋەرنىڭ ھەقىقەت سۆزلىرىنى» ئۆگىتىشىمىز كېرەك (كولوسىلىقلار 1:5؛ 1-تىموتىي 4:16-نى ئوقۇڭ). بۇنى قىلىشقا ياردەم بېرىدىغان تەلىم بېرىش قوراللىرىمىز بار (« تەلىم بېرىش قوراللىرى» ناملىق رامكىغا قاراڭ). بۇ قوراللارنى ماھىرلىق بىلەن ئىشلىتەيلى. ھەربىرىمىز قايسى ۋاقىتتا، قايسى قورالنى ئىشلىتىشنى ئۆزىمىز قارار قىلالايمىز. لېكىن، مەقسىتىمىز — «مەڭگۈلۈك ھاياتقا يېتەكلەيدىغان ھەقىقەتنى قوبۇل قىلىشقا مايىل» سەمىمىي ۋە كەمتەر ئادەملەرگە ئەيسانىڭ شاگىرتى بولۇشقا ياردەم بېرىش.—ئەلچىلەر 13:48؛ مەتتا 28:19، 20.
a «كۈزىتىش مۇنارى» 2010-يىل، 1-ئاۋغۇست سانىدىكى «ياغاچچى» ناملىق ماقالە ۋە «ياغاچچىنىڭ ئەسۋابلىرى» دېگەن رامكىغا قاراڭ.
b ئالاقىلىشىش كارتىلىرىنى ۋە تەكلىپنامىلەرنى ئىشلىتىشكە مۇناسىۋەتلىك يەرلىك قانۇنلارنى نەزەردە تۇتۇڭ. بۇ ھەققىدە ئاقساقاللاردىن سورىسىڭىز بولىدۇ.
