ھەقىقەتنى سۆزلەڭلار
«بىر-بىرىڭلارغا راست گەپ قىلىڭلار».—زەكەرىيا 8:16.
ناخشىلار: 34، 18
1، 2. شەيتان ئىنسانىيەتكە زىيانكەشلىك قىلىش ئۈچۈن نېمىنى ئىشلەتكەن؟
ئادەملەر ئويلاپ چىقارغان تېلېفون، ماشىنا، لامپۇچكا ۋە توڭلاتقۇغا ئوخشاش نەرسىلەر تۇرمۇشىمىزنى ياخشىلايدۇ. بىراق، يەنە باشقا تاپانچا، مىنا، ئاتوم بومبىسى ۋە تاماكا دېگەنگە ئوخشاش نەرسىلەر تۇرمۇشىمىزغا خەۋپ-خەتەر تۇغدۇرىدۇ. ئەمما، بۇلارنىڭ ھەممىسىدىن بۇرۇن پەيدا بولغان، ئىنسانىيەتكە چوڭ زىيان كەلتۈرىدىغان بىر نەرسە بار. ئۇ بولسىمۇ يالغانچىلىق! يالغانچىلىق — بىرسىنى ھىيلىگەرلىك بىلەن ئالداش مەقسىتىدە ئېيتىلغان ھەقىقەتكە زىت سۆزلەر. يالغاننى ئەڭ بىرىنچى بولۇپ ئىبلىس ئېيتقان. ئەيسا مەسىھ ئۇنى «يالغانچىلىقنىڭ ئاتىسىدۇر» دېگەن (يۇھاننا 8:44-نى ئوقۇڭ). ئىبلىس دەسلەپكى يالغاننى قاچان ئېيتقان؟
2 شەيتان بىرىنچى يالغاننى نەچچە مىڭ يىللار ئىلگىرى ئېرەم بېغىدا ئېيتقان. ئادەم-ئاتا بىلەن ھاۋا-ئانا، يەھۋا خۇدا ئۇلار ئۈچۈن ياراتقان ئاجايىپ جەننەتتىكى ھاياتتىدىن ھۇزۇرلانغان. خۇدا ئۇلارغا «ياخشى بىلەن ياماننى بىلدۈرىدىغان دەرەخنىڭ مېۋىسىدىن» يېمەسلىكنى بۇيرىغان، ئەگەر يېسە ئۇلار ئۆلىدىغانلىقىنى ئېيتقان. شەيتان بۇنى بىلىپ تۇرۇپ، ھاۋا-ئانىغا: «سىلەر ھەرگىز ئۆلمەيسىلەر»،— دەپ ئېيتقان. بۇ تۇنجى يالغان سۆز بولغان. شەيتان يەنە: «سىلەر ئۇ دەرەخنىڭ مېۋىسىدىن يېگەن كۈندە كۆزۈڭلار ئېچىلىدۇ، ياخشى بىلەن ياماننى بىلىپ، خۇدادەك بولىسىلەر»،— دەپ ئېيتقان.—يارىتىلىش 2:15—17؛ 3:1—5.
3. شەيتاننىڭ يالغان سۆزلىرى نېمە ئۈچۈن قەستەن بولغان ۋە بۇ قانداق ئاقىۋەتنى ئېلىپ كەلگەن؟
3 شەيتان قەستەن يالغان سۆزلىگەن. چۈنكى ھاۋا-ئانا شۇ يالغان سۆزلەرگە ئىشىنىپ، مېۋىنى يېگىنىدە، ئۇنىڭ ئۆلۈپ كېتىدىغانلىقىنى ئىبلىس ياخشى بىلگەن. شەيتاننىڭ نىيىتى ئەمەلگە ئاشتى. ھاۋا-ئانىمۇ، كېيىن ئادەم-ئاتىمۇ خۇدانىڭ بۇيرۇغىغا قۇلاق سالماي، ئاخىرىدا ئۆلۈپ كەتكەن (يارىتىلىش 3:6؛ 5:5). خۇدانىڭ ئىرادىسى بويىچە، ئادەملەر مەڭگۈ ياشاش كېرەك ئىدى. ئەمما، ئادەم-ئاتا گۇناھ قىلغاچقا، «ئۆلۈم ھەممە ئىنسانلار ئارىسىغا تارقالدى». ئەمەلىيەتتە، «ئۆلۈم ھەتتا ئادەم-ئاتىنىڭ گۇناھىغا ئوخشاش بىر گۇناھ ئۆتكۈزمىگەنلەرنڭ ئۈستىگە خۇددى پادىشاھ ئوخشاش ھۆكۈمرانلىق قىلدى» (رىملىقلار 5:12، 14). شۇ سەۋەبتىن، ھازىر بىز مۇكەممەل ئەمەس ۋە مەڭگۈ ياشىمايمىز. ئەكسىچە، «ئۆمرىمىز 70 يىلچە بولار، كۈچ ماغدۇرى بارلار 80 ياشقا ئۇلىشار» ۋە ھاياتىمىز قايغۇ-ھەسرەتكە تولغان (زەبۇر 90:10). بۇنىڭ ھەممىسى شەيتاننىڭ يالغان سۆزلىرى پەيدا قىلغان ئاقىۋەت!
4. (1) قانداق سوئاللارنىڭ جاۋابىنى بىلىشىمىز كېرەك؟ (2) زەبۇر 15:2،1-ئايەتلەرگە ئاساسلانغاندا، كىملەر يەھۋانىڭ دوستلىرى بولالايدۇ؟
4 يۇھاننا 8:44-ئايەتتە، ھەزرىتى ئەيسا شەيتان ھەققىدە: «ئۇ ھەقىقەتتە چىڭ تۇرمىغان، چۈنكى ئۇنىڭدا ھەقىقەت يوق»،— دېگەن. شەيتان ئۆزگەرمىگەن. ئۇ مۇشۇ كۈنگىچە «پۈتۈن دۇنيانى» ئازدۇرىۋاتىدۇ (ۋەھىيلەر 12:9). لېكىن، بىز شەيتانغا ئالدىنىپ قېلىشنى خالىمايمىز. شۇڭا، تۆۋەندىكى ئۈچ سوئالنىڭ جاۋابىنى بىلىشىمىز كېرەك: بۈگۈنكى كۈندە شەيتان ئادەملەرنى قانداق ئالدايدۇ؟ ئادەملەر نېمە ئۈچۈن يالغان سۆزلەيدۇ؟ ئادەم-ئاتا بىلەن ھاۋا-ئانىغا ئوخشاش خۇدا بىلەن بولغان دوستلۇقتىن ئايرىلىپ قالماسلىق ئۈچۈن، قانداق قىلىپ ھەردائىم ھەقىقەتنى سۆزلەلەيمىز؟—زەبۇر 15:2،1-نى ئوقۇڭ.
شەيتان ئىنسانلارنى قانداق ئالدىماقتا؟
5. شەيتان بۈگۈنكى كۈندە ئادەملەرنى قانداق ئالدايدۇ؟
5 شەيتانغا ئالدىنىپ قالماسلىق بىزنىڭ قولىمىزدىن كېلىدۇ. ئەلچى پاۋلۇس: «بىز ئۇنىڭ ھىيىلە-مىكىرلىردىن بىخەۋەر ئەمەسمىز»،— دەپ ئېيتقان (2-كورىنتلىقلار 2:11). پۈتكۈل دۇنيا، جۈملىدىن يالغان دىنلار، پارىخور ھۆكۈمەتلەر ۋە ئاچكۆز تىجارەتچىلەر، شەيتاننىڭ قولى ئاستىدا ئىكەنلىكىنى بىلىمىز (1-يۇھاننا 5:19). شۇڭا، شەيتان ۋە ئۇنىڭ جىنلىرى ھوقۇققا ئىگە ئادەملەرنى يالغان ئېيتىشقا دەۋەت قىلىدىغانلىقىغا ھەيران بولمايمىز (1-تىموتىي 4:1، 2). مەسىلەن، بەزى تىجارەتچىلەر زىيانلىق مەھسۇلاتلارنى سېتىش ياكى كۆپ پۇل تېپىش ئۈچۈن يالغان ئېلانلارنى بېرىدۇ.
6، 7. (1) دىنىي رەھبەرلەرنىڭ يالغان تەلىماتلارنى تارقىتىۋاتقانلىقى نېمە ئۈچۈن يىرگىنىچلىك؟ (2) سىز دىن رەھبەرلىرىدىن قانداق يالغانلارنى ئاڭلىغان؟
6 دىنىي رەھبەرلەرنىڭ يالغان تەلىماتلارنى تارقىتىۋاتقانلىقى نېمە ئۈچۈن بەك يىرگىنىچلىك؟ چۈنكى بەزى ئادەملەر ئۇلارنىڭ يالغان تەلىماتلىرىغا ئىشەنسە ۋە خۇدا ئۆچ كۆرىدىغان ئىشلارنى قىلسا، مەڭگۈ ھاياتتىن ئايرىلىپ قېلىشى مۇمكىن (ھوشىيا 4:9). ئەيسا ئۆز زامانىدىكى دىنىي رەھبەرلەرنىڭ ئادەملەرنى ئالدىغانلىقىنى بىلگەن. ئۇ باتۇرلۇق بىلەن مۇنداق دېگەن: «ئەي تەۋرات ئۇستازلىرى ۋە پەرىسىيلەر، سىلەر ساختىپەزلەرنىڭ ھالىڭلارغا ۋاي! چۈنكى سىلەر بىر كىشىنى دىنىڭلارغا كىرگۈزۈش ئۈچۈن، دەريا-دېڭىزلاردىن ئۆتۈپ، يەر-جاھاننى كېزىپ چىقىسىلەر. ئۇ كىشى دىنىڭلارغا كىرسە، سىلەر ئۇنى ئۆزۈڭلاردىن ئىككى ھەسسە ئارتۇق گۇناھكار قىلىپ، ئۇنى گەھانناغا تاشلىنىشقا لايىق بىرى قىلىپ يېتىشتۈرىسىلەر». بۇ سۆزلەر مەڭگۈ يوق قىلىنىشنى بىلدۈرىدۇ (مەتتا 23:15). ئەيسا ساختا دىن رەھبەرلىرىنى ئۆزلىرىنىڭ ئاتىسىغا، يەنى «قاتىل» بولغان شەيتانغا ئوخشايدىغانلىقىنى ئېيتقان.—يۇھاننا 8:44.
7 ھازىرمۇ دىنىي رەھبەرلەر ناھايىتى كۆپ. ئۇلار پاستېر، پوپ، روھانىي، دىنىي ئۆلىما ياكى ئۇستاز ۋە باشقا نام-ئۇنۋانلار بىلەن ئاتىلىدۇ. ئۇلار پەرىسىيلەرگە ئوخشاش خۇدانىڭ سۆزىدىكى ھەقىقەتنى ئۆگەتمەي، «خۇدا توغرىسىدىكى ھەقىقەتنى يالغانچىلىققا» ئالماشتۇرغان (رىملىقلار 1:18، 25). ئۇلار دوزاخ ئوتى ۋە ئۆلمەس روھ بار ھەمدە خۇدا ئوخشاش جىنىستىكى كىشىلەرنىڭ مۇھەببەتلىشىشى ۋە توي قىلىشىنى قوبۇل قىلىدۇ دەپ ئۆگىتىدۇ. بۇ ئۇلارنىڭ يالغان تەلىملىرىنىڭ بىرنەچچىسلا خالاس.
8. يېقىندا سىياسىي رەھبەرلەر قانداق يالغاننى ئېيتىدۇ؟
8 سىياسىيونلارمۇ ئادەملەرنى ئالدايدۇ. ئەڭ چوڭ يالغاننىڭ بىرى — ئۇلار يېقىندا دۇنيادا «تىنچلىق ۋە بىخەتەرلىك» ئورنىتىمىز دەپ ئېيتىدۇ. لېكىن، «ھالاكەت ئۇلارنىڭ ئۈستىگە تۇيۇقسىز كېلىدۇ». شۇڭا، سىياسىي رەھبەرلەرنىڭ دۇنيانىڭ ئىشلىرى بارغانسېرى ياخشىلىنىۋاتقانلىقىنى جاكارلاپ ئېيتقان سۆزلىرىگە ئىشەنمەسلىكىمىز كېرەك. بىز «يەھۋانىڭ كۈنى خۇددى كېچىدىكى ئوغرىدەك» كېلىدىغانلىقىنى ياخشى بىلىمىز.—1-سالونىكالىقلار 5:1—4.
ئادەملەر نېمە ئۈچۈن يالغان سۆزلەيدۇ؟
9، 10. (1) ئادەملەر نېمە سەۋەبتىن يالغان سۆزلەيدۇ ۋە بۇنىڭ ئاقىۋىتى قانداق؟ (2) يەھۋا ھەققىدە نېمىنى ئۇنتۇماسلىقىمىز كېرەك؟
9 بۈگۈن پەقەت ھوقۇقى بار ئادەملەرلا ئەمەس، ھەممىسى يالغان ئېيتىدۇ. بىر ژۇرنالدىكى «بىز نېمە ئۈچۈن يالغان ئېيتىمىز؟» ناملىق ماقالىدە: «يالغانچىلىق ئادەملەرنىڭ يۈرىكىگە سىڭىپ كەتكەن ئالاھىدىلىككە ئايلىنىپ كەتكەن»،— دەپ يېزىلغان («National Geographic»). باشقا سۆز بىلەن ئېيتقاندا، ئادەملەر ئالداشنى تەبىئىي ۋە نورمال نەرسە دەپ ھېسابلايدۇ. ئادەملەر ئۆزلىرىنى قوغداش ئۈچۈن، مەسىلەن ئۆتكۈزگەن خاتالىقىنى ياكى جىنايىتىنى يوشۇرۇش ئۈچۈن ئالدايدۇ. يەنە ئۇلار باشقىلارنىڭ پۇللىرىنى تارتىۋېلىش ئۈچۈن ياكى ئۆزلىرىگە پايدا تېپىش ئۈچۈنمۇ ئالدايدۇ. يۇقىرىدا تىلغا ئېلىنغان ماقالىدە، بەزى ئادەملەر ناتونۇش كىشىلەرگە، ئۆز خىزمەتداشلىرى، دوستلىرى ۋە ھەتتا يېقىن كىشىلىرىگە خىجىل بولماي يالغان ئېيتىدىغانلىقى يېزىلغان.
ئادەملەر باشقىلارنى ئالدىيالايدۇ، ئەمما ئۇلارنىڭ يەھۋانى ئالدىيالمايدىغانلىقىنى ئۇنتۇماڭ
10 يالغان ئېيتىشنىڭ ئاقىۋىتى قانداق بولىدۇ؟ ئادەملەر بىر-بىرىگە ئىشەنمەيدۇ ۋە ئۇلارنىڭ مۇناسىۋىتى بۇزۇلىدۇ. مەسىلەن، يولدىشى ئايالىنىڭ ۋاپاسىزلىق قىلىپ، بۇنى يوشۇرۇش ئۈچۈن ئۇنىڭغا يالغان ئېيتقانلىقىنى بىلگەندە، ئۇنىڭ كۆڭلى قانچىلىك ئاغرىيدىغانلىقىنى تەسەۋۋۇر قىلىڭ. ياكى بولمىسا، ئەر كىشى باشقىلارنىڭ ئالدىدا كۆيۈمچان ۋە ھېسداش بولۇپ كۆرۈنۈپ، ئەمما ئۆيىدە ئايالى بىلەن بالىلىرىنى خورلىسا، بۇ قانچىلىك ئېچىنىشلىق ئەھۋال ئىكەنلىكىنى كۆز ئالدىڭىزغا كەلتۈرۈڭ. شۇنداق ئادەملەر باشقىلارنى ئالدىيالايدۇ، ئەمما ئۇلارنىڭ يەھۋانى ئالدالمايدىغانلىقىنى ئۇنتۇماڭ. مۇقەددەس كىتابتا: «خۇدانىڭ كۆز ئالدىدا ھەممە نەرسە ئوچۇق-ئاشكارىدۇر»، دەپ يېزىلغان.—ئىبرانىيلار 4:13.
11. ھانانىيا بىلەن سەپىرەنىڭ مىسالىدىن قانداق ساۋاق ئالىمىز؟ (ماقالىنىڭ بېشىدىكى رەسىمگە قاراڭ)
11 مۇقەددەس كىتابتا تىلغا ئېلىنغان ھانانىيا بىلەن سەپىرەنىڭ مىسالىنى كۆرۈپ چىقايلى. بۇ ئەر-ئايال شەيتاننىڭ تەسىرىگە بېرىلىپ، خۇدانى ئالدىماقچى بولغان. ئۇلار مەسلىھەتلىشىپ، ئەلچىلەرنى ئالداشقا ھەرىكەت قىلغان. ھانانىيا بىلەن سەپىرە مال-دۇنياسىنى سېتىپ، پۇلنىڭ ھەممىسىنى بەردۇق، دەپ ئەلچىلەرنى ئالدىغان. ئۇلار جامائەتتىكىلەرنىڭ ئالدىدا ئۆزلىرىنى ياخشى كۆرسەتكۈسى كەلگەنلىكتىن شۇنداق قىلغان. لېكىن، يەھۋا ئۇلارنىڭ يالغان ئېيتىۋاتقانلىقىنى بىلىپ، ئۇلارنى جازالىغان.—ئەلچىلەر 5:1—10.
12. توۋا قىلمايدىغان يالغانچىلارغا نېمە بولىدۇ ۋە نېمە ئۈچۈن؟
12 يەھۋا خۇدا يالغان سۆزلەيدىغان ئادەملەرگە قانداق قارايدۇ؟ قەستەن يالغان سۆزلەيدىغان ۋە توۋا قىلمايدىغان كىشىلەر شەيتان بىلەن بىرگە سىمۋوللۇق «كۆيۈۋاتقان ئوت ۋە گۈڭگۈرت كۆلگە تاشلىنىدۇ». باشقا سۆز بىلەن ئېيتقاندا، ئۇلار مەڭگۈگە ھالاك قىلىنىدۇ (ۋەھىيلەر 20:10؛ 21:8؛ زەبۇر 5:6). سەۋەبى، يەھۋا خۇدانىڭ نەزىردە شۇنداق يالغانچىلار بىلەن يىرگىنىچلىك ئىشلارنى قىلىدىغان ئادەملەر ئوخشاش.—ۋەھىيلەر 22:15.
13. يەھۋا ھەققىدە نېمىنى بىلىمىز ۋە بۇ بىزنى نېمىگە دەۋەت قىلىدۇ؟
13 بىز شۇنى بىلىمىزكى، يەھۋا «خۇدا يالغان ئېيتالمايدۇ» ۋە ئۇ «يالغان ئېيتىدىغان ئىنسان ئەمەس» (سانلار 23:19؛ ئىبرانىيلار 6:18). يەھۋا «يالغانچى تىل»دىن نەپرەتلىنىدۇ (پەندى-نەسىھەت 6:16، 17). ئەگەر بىز ئۇنىڭ يۈرىكىنى خۇشال قىلىشنى خالىساق، ھەقىقەتنى سۆزلەيمىز. شۇڭا، بىز بىر-بىرىمىزگە يالغان سۆزلىمەيمىز.—كولوسىلىقلار 3:9.
بىز «راست گەپ» قىلىمىز
14. (1) ھەقىقىي مەسىھ ئەگەشكۈچىلىرى ساختا دىندىكى ئادەملەردىن قانداق پەرقلىنىدۇ؟ (2) لۇقا 6:45-ئايەتتىكى پرىنسىپنى چۈشەندۈرۈپ بېرىڭ.
14 ھەقىقىي مەسىھ ئەگەشكۈچىلىرى ساختا دىندىكى ئادەملەردىن قانداق پەرقلىنىدۇ؟ بىز «راست گەپ» قىلىمىز (زەكەرىيا 8:16، 17-نى ئوقۇڭ). ئەلچى پاۋلۇس: «ئۆزىمىزنىڭ خۇدانىڭ خىزمەتچىلىرى ئىكەنىنى كۆرسىتىمىز. … ھەقىقەت سۆزىدە»،— دېگەن (2-كورىنتلىقلار 6:4، 7). ئەيسا مەسىھ مۇنداق دېگەن: «كۆڭۈلدە نېمە بولسا، ئېغىزدىن شۇ چىقىدۇ» (لۇقا 6:45). دېمەك، راستچىل ئادەم دائىم ھەقىقەتنى سۆزلەيدۇ. شۇنداق ئادەم ناتونۇش كىشىلەرگە، خىزمەتداشلىرىغا، دوستلىرىغا ۋە يېقىنلىرىغا ھېچقاچان يالغان ئېيتمايدۇ. ھەممە ئىشلاردا راست گەپ قىلىشقا تىرىشىۋاتقانلىقىمىزنى كۆرسىتىدىغان بىرنەچچە ۋەزىيەتنى كۆرۈپ چىقايلى.
بۇ قېرىنداشنى راستچىل دېيىشكە بولامدۇ؟ (15، 16-ئابزاسلارغا قاراڭ)
15. (1) ئىككى يۈزلىمىلىك ھەرىكەت قىلىش نېمە ئۈچۈن ناتوغرا؟ (2) ياشلارغا تەڭداشتۇشلىرىنىڭ بېسىمىغا قارشى تۇرۇشقا نېمە ياردەم بېرىدۇ؟ (ئىزاھاتقا قاراڭ)
15 ياشلار تەڭتۇشلىرىنىڭ ئۇلارنى قوبۇل قىلىشىنى خالايدۇ. شۇڭا، ئۇلار ھەتتا ئىككى يۈزلىمىلىك ھەرىكەت قىلىشى مۇمكىن. ئۇلار ئائىلىسى ۋە ئېتىقادداشلىرى بىلەن بولغاندا، ئەخلاقىي جەھەتتىن پاك كۆرۈنىدۇ. ئەمما ئۇلار ئىجتىمائىي ئالاقە ۋاسىتىلىرىنى ئىشلەتكەندە ياكى يەھۋاغا خىزمەت قىلمايدىغان ئادەملەر بىلەن بولغاندا، تامامەن باشقىچە ھەرىكەت قىلىدۇ. مەسىلەن، ئۇلار ئېغىزىنى يامان قىلىشى، ئەدەبسىز كىيىنىشى، مەزمۇنى ئەخلاقسىز ناخشىلارنى تىڭشىشى، مەس بولغىچە ھاراق ئىچىشى، زەھەر چېكىشى، يوشۇرۇن مۇھەببەتلىشىشى ياكى باشقا ئەسكى ئىشلارنى قىلىشى مۇمكىن. شۇنداق ياشلار ئاتا-ئانىسىنى، ئېتىقادداشلىرىنى ۋە يەھۋانى ئالدايدۇ (زەبۇر 26:4، 5). بىراق، يەھۋا ئۇنى پەقەت ئېغىزىدىلا مەدھىيىلەپ، ئۇ ئۆچ كۆرىدىغان ئىشلارنى قىلىدىغان ئادەملەرنى كۆرىدۇ (ماركۇس 7:6). شۇ سەۋەبتىن: «كۆڭلۈڭدە گۇناھكارلارغا ھەسەت قىلمىغىن، بىراق ھەردائىم يەھۋادىن ئەيمىنىپ قورققىن»،— دېگەن سۆزلەرگە قۇلاق سېلىشىمىز نەقەدەر ياخشى.—پەندى-نەسىھەت 23:17. a (ئىزاھاتقا قاراڭ).
16. تولۇق ۋاقىتلىق خىزمەت قىلىش ئۈچۈن ئىلتىماس خېتىدە بېرىلگەن سوئاللارغا قانداق جاۋاب بېرىشىمىز كېرەك؟
16 ئەگەر سىز پىدائىي ۋەز ئېيتقۇچى ياكى مەخسۇس تولۇق ۋاقىتلىق خىزمەتنى، مەسىلەن بەيتەل خىزمىتىنى، باشلىماقچى بولسىڭىز، ئىلتىماس خېتىنى تولدۇرۇشىڭىز كېرەك. بۇ خەتتىكى سوئاللارغا ھېچنەرسىنى يوشۇرماي، راست جاۋاب بېرىشىڭىز ناھايىتى مۇھىم. شۇ يەردە سالامەتلىكىڭىز، تاللايدىغان ئويۇن-تاماشىڭىز ۋە ئەخلاقىي ئۆلچەملىرىڭىز ھەققىدە سوئاللار بار (ئىبرانىيلار 13:18). ئەگەر سىز يەھۋا ئۆچ كۆرىدىغان بىر نەرسىنى قىلىپ قويسىڭىز ۋە ھازىر سىزنى ۋىجدانىڭىز ئازابلىسىىچۇ؟ ئاقساقاللار بىلەن بۇ توغرىسىدا سۆزلەشمىگەن بولسىڭىز، ئۇلارغا بېرىپ ياردەم سوراڭ. شۇ چاغدا سىز يەھۋاغا پاك ۋىجدان بىلەن خىزمەت قىلالايسىز.—رىملىقلار 9:1؛ گالاتىيالىقلار 6:1.
17. بىزنى سوراق قىلغاندا قېرىنداشلىرىمىز ھەققىدە سورىسا، بىز نېمىنى ئەستە تۇتۇشىمىز لازىم؟
17 ئەگەر سىز ياشايدىغان يەردە پائالىيەتلىرىمىز مەنئىي قىلىنغان بولسا ۋە سىزنى سوراققا تارتسا، سىز قېرىنداشلار ھەققىدە بىلىدىغان ھەممە نەرسىنى ئېيتىپ بېرەمسىز؟ ئەيسا ئۇنى رىم ھۆكۈمرانى سوراققا تارتقاندا، قانداق ھەرىكەت قىلغان؟ ئۇ مۇقەددەس كىتابتىكى «سۈكۈتتە تۇرۇشنىڭ ئۆز ۋاقتى بار، سۆزلەشنىڭ ئۆز ۋاقتى بار» دېگەن پرىنسىپنى ئىشلىتىپ، بەزىدە ھەتتا ئۈن چىقارمىغان! (ۋەز 3:1، 7؛ مەتتا 27:11—14). بىز ئوخشاش ۋەزىيەتتە بولساق، قېرىنداشلىرىمىزنى خەۋپ-خەتەرگە ئۇچراتماسلىق ئۈچۈن پەم-پاراسەتلىك ۋە ئېھتىياتچان بولۇشىمىز لازىم.—پەندى-نەسىھەت 10:19؛ 11:12.
قايسى چاغدا ئۈن چىقماي، قايسى چاغدا ھەقىقەتنى ئېيتىش كېرەكلىكىنى قانداق قارار قىلالايسىز؟ (17، 18-ئابزاسلارغا قاراڭ)
18. ئاقساقاللار بىزدىن قېرىنداشلىرىمىز ھەققىدە سورىسا، نېمە قىلىشىمىز كېرەك؟
18 سىز جامائەتتىكى بىر قېرىنداش ئېغىر گۇناھ قىلغانلىقى ھەققىدە بىلىسىز دەيلى. ئاقساقاللارنىڭ ۋەزىپىسى — جامائەتنى ئەخلاقىي جەھەتتىن پاك ساقلاش، شۇڭا ئۇلار سىزدىن نېمە بىلىدىغانلىقىڭىز توغرىسىدا سورىشى مۇمكىن. ئەگەر گۇناھ قىلغان كىشى يېقىن دوستىڭىز ياكى تۇققىنىڭىز بولسا، نېمە قىلىسىز؟ مۇقەددەس كىتابتا: «ساداقەتمەنلىكىنى نامايان قىلغان كىشى راست گەپ قىلار»،— دەپ يېزىلغان (پەندى-نەسىھەت 12:17؛ 21:28). شۇڭا، سىز ئاقساقاللاردىن ھېچنەرسىنى يوشۇرماي، ھەممىنى تولۇق ئېيتىپ بېرىشىڭىز لازىم. شۇ ئادەمگە يەھۋا بىلەن بولغان مۇناسىۋىتىنى قايتا تىكلەشكە ياردەم بېرىش ئۈچۈن، ئاقساقاللارنىڭ ھەممە نەرسىنى بىلىش ھوقۇقى بار.—ياقۇپ 5:14، 15.
19. كېيىنكى ماقالىدە نېمىنى مۇھاكىمە قىلىمىز؟
19 داۋۇت يەھۋاغا: «سەن سەمىمىي ئادەمنىڭ راستچىللىقىدىن مەمنۇن بولىسەن»،— دەپ دۇئا قىلغان (زەبۇر 51:6). داۋۇت قەلبىمىزدە نېمە بار ئىكەنلىكىنىڭ مۇھىملىقىنى چۈشەنگەن. ھەقىقىي مەسىھ ئەگەشكۈچىلىرى ھېچقاچان بىر-بىرىگە يالغان سۆزلىمەيدۇ. ساختا دىندىكىلەردىن پەرق قىلىدىغانلىقىمىزنى كۆرسىتىشنىڭ يەنە بىر ئۇسۇلى — خۇدا سۆزىدىكى ھەقىقەتنى ئۆگىتىش. كېيىنكى ماقالىدە، بۇنى ۋەز خىزمىتىدە قانداق قىلالايدىغانلىقىمىزنى مۇھاكىمە قىلىمىز.
a تۆۋەندىكى مەلۇمات مەنبەلىرىگە قاراڭ: «ياشلارنى قىزىقتۇرىدىغان 10 سوئال» ناملىق كىتابچىنىڭ «تەڭتۇشلارنىڭ بېسىمىغا قانداق قارشى تۇرالايمەن» دېگەن 6-سوئالى ۋە «ياشلارنىڭ سوئاللىرى. ئەمەلىي مەسلىھەتلەر» (ئىنگىلىزچە) كىتابىنىڭ 2-تومى، 16-بابى.
