43-تەتقىق ماقالىسى
پەقەت يەھۋاغىلا ئۆزىڭىزنى بېغىشلاڭ
«مەن خۇدايىڭ يەھۋا، مۇتلەق ساداقەتنى تەلەپ قىلىدىغان خۇدادۇرمەن».—چىق. 20:5.
7-ناخشا يەھۋاغا ئۆزىنى بېغىشلاش
بۇ ماقالىدە a
1. نېمە ئۈچۈن پەقەت يەھۋا خۇدالا ئىبادەت قىلىشىمىزغا لايىق؟
يەھۋا خۇدا ياراتقۇچىمىز ۋە ھايات مەنبەسى بولغاچ، پەقەت ئۇ ئىبادەت قىلىشىمىزغا لايىق (ۋەھىي. 4:11). لېكىن، بىز پەخەس بولۇشىمىز كېرەك: يەھۋانى ھۆرمەتلىسەك ۋە ئۇنى ياخشى كۆرسەكمۇ، ھاياتىمىزدا باشقا نەرسىلەرنى بىرىنچى ئورۇنغا قويۇش، يەھۋاغا پۈتۈنلەي ئۆزىمىزنى بېغىشلاپ، ئۇنىڭغا مۇتلەق ۋاپادار بولۇپ قېلىشىمىزغا توسالغۇلۇق قىلالايدۇ. شۇنداق ئەھۋالغا قانداق چۈشۈپ قېلىشىمىز مۇمكىن؟ ئاۋۋال، پەقەت يەھۋاغىلا ئىبادەت قىلىش نېمىنى بىلدۈرىدىغانلىقىنى بىلىۋالايلى.
2. چىقىش 34:14-ئايەتكە ئاساسەن، بىز يەھۋا خۇداغا پۈتۈنلەي ئۆزىمىزنى بېغىشلىساق، نېمە قىلىمىز؟
2 مۇقەددەس كىتابتا يېزىلغاندەك، يەھۋاغا ئۆزىنى بېغىشلاش ئۇنى پۈتۈن ۋۇجۇدى بىلەن سۆيۈشنى بىلدۈرىدۇ. ئەگەر ئۇنىڭغا پۈتۈنلەي ئۆزىمىزنى بېغىشلىساق، بىز پەقەت يەھۋا خۇداغىلا ئىبادەت قىلىمىز. بىز يەھۋا خۇدانىڭ يۈرىكىمىزدىكى ئورنىنى ھېچكىمنىڭ ياكى ھېچنەرسىنىڭ ئېگەللىشىگە يول قويمايمىز.—چىقىش 34:14-نى ئوقۇڭ.
3. نېمە ئۈچۈن بىز يەھۋاغا ئۆزىمىزنى قارىغۇلارچە بېغىشلىمايمىز؟
3 بىز يەھۋا خۇداغا ئۆزىمىزنى قارغۇلارچە بېغىشلىمايمىز. ئۇنىڭغا بولغان ۋاپادارلىقىمىز پەقەت ھېس-تۇيغۇلارغا ئەمەس، خۇدا توغرۇلۇق ئالغان بىلىمىمىزگە ئاساسلانغان. مەسىلەن، بىزنى يەھۋا خۇدانىڭ ئېسىل پەزىلەتلىرى زوقلاندۇرىدۇ ۋە بىز ئۇنىڭ نېمىنى ياخشى كۆرىدىغانلىقىنى ۋە نېمىدىن نەپرەتلىنىدىغانلىقىنى بىلىمىز. بىز ئۇنىڭ ئىنسانىيەت ئۈچۈن قىلغان ئىرادىسىنى چۈشىنىمىز ۋە ئىرادىسىنى چىن يۈرەكتىن قوللايمىز. شۇنداقلا بىزگە ئۇنىڭ بىلەن دوست بولۇش پۇرسىتىنى بەرگەنلىكىنى بەكمۇ قەدىرلەيمىز (زەبۇر 25:14). ھەر قېتىم ياراتقۇچىمىز توغرۇلۇق يېڭى بىر نەرسىنى ئۆگىنىش بىزنى ئۇنىڭغا يېقىنلاشتۇرىدۇ.—ياقۇپ 4:8.
4. (1) شەيتان بىزنىڭ يەھۋاغا بولغان مۇھەببىتىمىزنى قانداق سوۋۇتماقچى؟ (2) بۇ ماقالىدىن نېمىنى بىلىۋالىمىز؟
4 بۇ دۇنيانى شەيتان باشقۇرىۋاتىدۇ. شۇڭا، ئۇ بۇ دۇنيانىڭ ياردىمى بىلەن تەبىئىي ئىنسانىي ئارزۇ-ئىستەكلىرىمىزنى ۋە جىسمانىي ئاجىزلىقلىرىمىزدىن پايدىلىنىدۇ (ئەفەس. 2:1—3؛ 1-يۇھاننا 5:19). شەيتاننىڭ مەقسىتى — قەلبىمىزدە بۆلۈنۈش پەيدا قىلىش، شۇنداق بولغاندا بىز پەقەت يەھۋا خۇدانىلا ئەمەس، باشقا نەرسىلەرنىمۇ ياخشى كۆرىمىز. شەيتان مەقسىتىگە يېتىش ئۈچۈن قانداق ئىككى ئۇسۇلنى قوللىنىدىغانلىقىنى بىلىۋالايلى. بىرىنچىسى، ئۇ بىزنىڭ پۇلپەرەس بولۇشىمىزنى ۋە ئىككىنچىسى، يامان ئويۇن-تاماشا تۈرلىرىنى تاللىشىمىزنى خالايدۇ.
پۇلپەرەسلىكتىن نېرى تۇرۇڭ
5. نېمە ئۈچۈن پۇلپەرەسلىكتىن نېرى تۇرىشىمىز كېرەك؟
5 يەيدىغان تاماق، كىيىدىغان كىيىم ۋە تۇرىدىغان جايغا ئىگە بولۇش — تەبىئىي ئارزۇ-ئىسەكتۇر. ئەمما، بىز پۇلپەرەس بولۇپ كېتىشتىن پەخەس بولۇشىمىز كېرەك. بۈگۈنكى كۈندە نۇرغۇنلىغان ئادەملەر «پۇلپەرەس»، ئۇلار پۇل خەجلەشنى ياخشى كۆرىدۇ (2-تىموت. 3:2). ئەيسا مەسىھ شاگىرتلىرىنى بايلىقنى ياخشى كۆرۈشتىن ئاگاھلاندۇرغان. ئەيسا مۇنداق دېگەن: «ھېچكىم ئىككى خۇجايىنغا قۇللۇق قىلالماس. ئۇ ياكى بىرىدىن نەپرەتلىنىپ، ئىككىنچىسىنى سۆيىدۇ، ياكى بىرىگە سادىق بولۇپ، ئىككىنچىسىگە سەل قارايدۇ. سىلەر ھەم خۇدانىڭ، ھەم بايلىقنىڭ قۇلى بولالمايسىلەر» (مەتتا 6:24). بىر ئادەم خۇدانىڭ خىزمەتچىسى بولۇپ تۇرۇپ، بايلىققا ئېرىشىش ئۈچۈن كۆپ كۈچى ۋە ۋاقتىنى سەرپ قىلسا، ئۇ ئىككى خۇجايىنغا خىزمەت قىلىش ئۈچۈن تىرىشقانغا ئوخشاش بولىدۇ. شۇنداق ئادەمنى يەھۋاغا پۈتۈنلەي ئۆزىنى بېغىشلىغان دەپ ئېيتالمايمىز.
… يەھۋا بىلەن ئەيسا ئۇلارغا قانداق قارىغان (6-ئابزاسقا قاراڭ)
6. ئەيسانىڭ لائودىكىيا شەھىرىدىكى جامائەتكە يازغان سۆزلىرىدىن قانداق ساۋاق ئالالايمىز؟
6 لائودىكىيا شەھىرىدىكى بەزى قېرىنداشلار: «مەن باي، باي بولدۇم ۋە ھېچنەرسىگە موھتاج ئەمەسمەن»،— دەپ ماختانغان. لېكىن، يەھۋا خۇدا ۋە ئەيسا مەسىھنىڭ كۆز ئالدىدا ئۇلار ئەسلى «ئېچىنارلىق، بىچارە، نامرات، قارىغۇ ۋە يالىڭاچ» بولغان ئىدى. ئەيسا ئۇلارنىڭ باي بولغانلىقىنى ئەمەس، بايلىقنى ياخشى كۆرگەنلىكى يەھۋا خۇدا بىلەن بولغان مۇناسىۋىتىنى ۋەيران قىلغانلىقى سەۋەبلىك، ئۇلارغا نەسىھەت بەرگەن (ۋەھىي. 3:14—17). ئەگەر يۈرىكىمىزدە بايلىقنى سۆيۈش ئارزۇسى پەيدا بولۇشقا باشلىغانلىقىنى بايقىساق، ئۇنىڭ يىلتىز تارتىشىغا يول بەرمەي، كۆز قارىشىمىزنى ئۆزگەرتىشكە دەرھال ھەرىكەت قىلىشىمىز كېرەك (1-تىموت. 6:7، 8). كۆز قارىشىمىزنى ئۆزگەرتمىسەك، قەلبىمىز بۆلۈنۈپ كېتىپ، يەھۋا خۇداغا قىلغان ئىبادىتىمىزنى، ئۇ قوبۇل قىلمايدۇ. ئۇ بىزنىڭ ئۇنى ‹پۈتۈن قەلب› بىلەن سۆيۈشىمىزنى تەلەپ قىلىدۇ (ماركۇس 12:30). پۇل قانداق قىلىپ ھاياتىمىزدا ئەڭ مۇھىم ئورۇندا بولۇپ قېلىشى مۇمكىن؟
7—9. دېيۋىد ئىسىملىك ئاقساقالنىڭ مىسالىدىن قانداق ساۋاق ئالدىڭىز؟
7 قوشما شتاتلاردا ياشايدىغان دېيۋىد ئىسىملىك تىرىشچان ئاقساقالنىڭ مىسالىنى كۆرۈپ چىقايلى. دېيۋىدنىڭ ئېيتىشىچە، ئۇ شىركىتىدە تەر تۆكۈپ ئىشلىگەن. كېيىنرەك، ئۇ شۇ شىركەتتە ياخشىراق ئورۇنغا ئېرىشىپ، كۆپرەك مائاش ئېلىشقا باشلاپ، ھەتتا ئۆز دۆلىتىدە مەشھۇر مۇتەخەسسىس نامىغا ئىگە بولغان. ئۇ مۇنداق دەيدۇ: «شۇ چاغدا مەن بۇلارنىڭ ھەممىسى يەھۋا خۇدانىڭ بەرىكىتى، دەپ ئويلىغان». لېكىن، بۇ ھەقىقەتەن شۇنداق بولغانمۇ؟
8 بارا-بارا دېيۋىد ئۇنىڭ ئىشى يەھۋا بىلەن بولغان مۇناسىۋىتىگە زىيان كەلتۈرۈۋاتقانلىقىنى بايقىغان. ئۇ: «مەن جامائەت يىغىلىشلىرىدا ۋە ھەتتا ۋەز خىزمىتىدە، ئىشتىكى قىيىنچىلىقلارنى ئويلاپ يۈرەتتىم. مەن كۆپ پۇل تاپساممۇ، ھەر كۈنى قاتتىق بېسىمغا دۇچ كېلەتتىم ۋە ئۆيدىمۇ قىيىنچىلىقلار پەيدا بولۇشقا باشلىدى»،— دېگەن.
9 دېيۋىد ھاياتىدا نېمىنى بىرىنچى ئورۇنغا قويۇشنى قارار قىلىشى كېرەكلىكىنى چۈشەنگەن ئىدى. ئۇ: «ھاياتىمدا ئۆزگىرىشلەرنى قىلىشقا قەتئىي قارار قىلدىم»،— دېگەن. دېيۋىد ئىش ۋاقتىنى ئۆزگەرتمەكچى بولۇپ، بۇنى باشلىقىغا ئېيتقان. نەتىجىدە ئۇ ئىشتىن بوشىتىلغانىدى. شۇ چاغدا دېيۋىد نېمە قىلغان؟ «ئەتىسى مەن ئۇزۇن مۇددەت ياردەمچى پىدائىي ۋەز ئېيتقۇچى بولۇپ خىزمەت قىلىش ئۈچۈن ئىلتىماس يازدىم»،— دەيدۇ ئۇ. دېيۋىد بىلەن ئۇنىڭ ئايالى جان بېقىش ئۈچۈن بېنالارنى يۇيۇپ-تازىلىغان. بىراز ۋاقىت ئۆتۈپ دېيۋىد پىدائىي ۋەز ئېيتقۇچى خىزمەت قىلىشنى باشلىغان ۋە كېيىنرەك ئايالىمۇ ئۇنىڭغا قوشۇلغان. بۇ ئەر-ئايال باشقىلار تۆۋەن كۆرۈپ قىلىشنى خالىمىغان ئىشنى قىلغان. ئۇلار ئۈچۈن ئۇ ئىش ئەڭ مۇھىم ئەمەس ئىدى. ئۇلارنىڭ تاپاۋىتى بۇرۇنقىغا قارىغاندا ئون ھەسسە ئازلاپ كەتكەن بولسىمۇ، ئۇلاردا زۆرۈر نەرسىلەرنىڭ ھەممىسى بولغان. ئۇلار يەھۋانى ھاياتىدا بىرىنچى ئورۇنغا قويۇشنى خالىغان. دېيۋىد بىلەن ئايالى يەھۋانىڭ ئۇنى بىرىنچى ئورۇنغا قويغان كىشىلەرگە غەمخورلۇق قىلىدىغانلىقىنى ئۆز بېشىدىن ئۆتكۈزگەن.—مەتتا 6:31—33.
10. قەلبىمىزنى قانداق قوغدىيالايمىز؟
10 پۇلۇمىز مەيلى كۆپ ياكى ئاز بولسۇن، بىز ئۆز قەلبىمىزنى قوغدىشىمىز كېرەك. بۇنى قانداق قىلالايمىز؟ قەلبىڭىزدە پۇلغا بولغان سۆيگۈنىڭ پەيدا بولۇشىغا يول بەرمەڭ ۋە ئىشىڭىزنى يەھۋا خۇداغا بولغان خىزمەتتىن ئۈستۈن قويماڭ. بۇ تۇزاققا چۈشۈپ قالغان-قالمىغانلىقىڭىزنى قانداق بىلەلەيسىز؟ ئۆزىڭىزدىن مۇنداق، دەپ سوراپ كۆرۈڭ: «جامائەت يىغىلىشىدا ياكى ۋەز خىزمىتىدە ئىشىم توغرۇلۇق كۆپ ئويلايمەنمۇ؟ كېلەچەكتە پۇلۇم بولماي قالسا، دەپ پات-پات ئەنسىرەيمەنمۇ؟ ئائىلەمدە قىيىنچىلىقلارنىڭ پەيدا بولۇشىغا پۇل ۋە مال-مۈلۈكلەر سەۋەب بولۇۋاتامدۇ؟ مەن يەھۋاغا كۆپرەك خىزمەت قىلىش ئۈچۈن باشقىلارنىڭ كۆز ئالدىدا تۆۋەن سانالغان ئىشنى قىلىشقا تەييارمۇ؟» (1-تىموت. 6:9—12). بۇ سوئاللار توغرۇلۇق ئويلىغاندا، يەھۋا خۇدانىڭ بىزنى ياخشى كۆرىدىغانلىقىنى ۋە ئۆز سادىق خىزمەتچىلىرىگە مۇنداق ۋەدە بەرگەنلىكىنى ئۇنتۇمايلى: «سەندىن ئەسلا ئايرىلمايمەن، سېنى ئەسلا تاشلىمايمەن». بۇنى بىلگەچكە، ئەلچى پاۋلۇس مۇنداق يازغان: «پۇلپەرەسلىكتىن خالىي ياشاڭلار».—ئىبرانىي. 13:5، 6.
ئويۇن-تاماشىنى تاللىغاندا پەخەس بولۇڭ
11. ئويۇن-تاماشىلار ئادەمگە قانداق تەسىر قىلىشى مۇمكىن؟
11 يەھۋا خۇدا خۇشال بولۇشىمىزنى خالايدۇ ۋە بىز ئويۇن-تاماشىلاردىن خۇشاللىق تاپالايمىز. خۇدا سۆزىدە: «ئىنسان ئۈچۈن يەپ-ئىچىپ، قىلغان ئەجىر-مېھنىتىدىن ھۇزۇرلىنىشتىن ئارتۇق ياخشى ئىش يوق»،— دەپ يېزىلغان (ۋەز 2:24). بىراق، بۇ دۇنيادىكى ئويۇن-تاماشىلارنىڭ تەڭدىن تولىسى بىزگە يامان تەسىر قىلىدۇ. ئۇلار تۈپەيلىدىن ئادەملەرنىڭ ئەخلاق ئۆلچەملىرى تۆۋەنلەپ، كىشىلەر مۇقەددەس كىتابتا مەنئىي قىلىنغان نەرسىلەرگە كۆز يۇمۇشقا ۋە ھەتتا شۇ ئىشلارنى ياخشى كۆرۈشكە باشلايدۇ.
سىز ئۈچۈن ئويۇن-تاماشىنى كىم تەييارلايدۇ؟ (11—14-ئابزاسلارغا قاراڭ) b
12. 1-كورىنتلىقلار 10:21، 22-ئايەتلەرگە ئاساسەن، نېمە ئۈچۈن ئويۇن-تاماشىلارنى تاللىغاندا پەخەس بولۇشىمىز كېرەك؟
12 بىز پەقەت يەھۋا خۇداغىلا پۈتۈنلەي ئۆزىمىزنى بېغىشلاشنى خالىغاچ، «ھەم يەھۋانىڭ داستىخىنىدىن، ھەم جىنلارنىڭ داستىخىنىدىن» يېيەلمەيمىز (1-كورىنتلىقلار 10:21، 22-نى ئوقۇڭ). ئادەتتە تاماقنى دوستلىرىمىز بىلەن بىللە يېيىشنى ياخشى كۆرىمىز. ئەگەر بىز تاللىغان ئويۇن-تاماشىلاردا زوراۋانلىق، جىنكەشلىك ۋە ئەخلاقسىزلىق بولسا ۋە بۇ تەن ھەۋەسلىرىمىزنى قوزغاتسا، بىز خۇددى يەھۋا خۇدانىڭ دۈشمەنلىرى تەييارلىغان تاماقنى يەپ، ئۇلار بىلەن ھەمداستىخان بولغانغا باراۋەر. نەتىجىدە، بىز ئۆزۈمىزگىمۇ ۋە يەھۋا بىلەن بولغان مۇناسىۋىتىمىزگىمۇ زىيان يەتكۈزىمىز.
13، 14. ياقۇپ 1:14، 15-ئايەتلەرگە ئاساسلانغاندا، ئويۇن-تاماشىلارنى تاللىغاندا نېمە ئۈچۈن پەخەس بولۇشىمىز كېرەك؟ مىسال كەلتۈرۈڭ.
13 ئويۇن-تاماشىلارنى تاماق بىلەن سېلىشتۇرۇشقا بولىدۇ. مەسىلەن، تاماق يېگەندە ئاغزىمىزغا نېمە سېلىشنى ئۆزۈمىز تاللايمىز. بىراق، تاماق ئاشقازىنىمىزغا چۈشكەندىن كېيىن، ھەزىم قىلىش جەريانى باشلىنىپ، ئوزۇقلۇق ماددىلار ئاخىرى تېنىمىزگە سىڭىدۇ. توغرا تاماقلىنىش — سالامەتلىكنىڭ كاپالىتى، بىراق غىزالىنىش قائىدىلىرىنى كۆزگە ئىلماسلىق ئاغرىققا سەۋەب بولۇشى مۇمكىن. بۇنىڭ نەتىجىسى تىزلا بايقالمىسىمۇ، لېكىن ۋاقىت ئۆتۈپ چوقۇم ئېنىق كۆرۈنىدۇ.
14 شۇنىڭغا ئوخشاش، ئويۇن-تاماشىلارنى تاللىغاندا بىز ئەقلىمىزگە نېمىلەرنى قۇيۇشنى ئۆزۈمىز قارار قىلىمىز. لېكىن، بىز تاللىغان ئويۇن-تاماشا ئوي-پىكىرلىرىمىز ۋە ھېس-تۇيغۇلىرىمىزغا تەسىر قىلىدۇ. ياخشى ئويۇن-تاماشا بىزگە پايدا ئەكېلىدۇ، يامان ئويۇن-تاماشا زىيان كەلتۈرىدۇ (ياقۇپ 1:14، 15-نى ئوقۇڭ). بىز يامان ئويۇن-تاماشىنىڭ سەلبىي تەسىرىنى دەرھاللا بايقىماسلىقىمىز مۇمكىن، ئەمما ۋاقىت ئۆتۈپ ئۇ كەلتۈرگەن زىيان چوقۇم ئېنىق كۆرۈنىدۇ. شۇ سەۋەبتىن، مۇقەددەس كىتاب بىزنى: «ئۆزۈڭلارنى ئالدىماڭلار: خۇدا ئۆزىنى مەسخىرە قىلىشقا يول قويمايدۇ. كىم نېمە تېرىسا، شۇنى يىغىدۇ. كىم ئۆز تېنىگە تېرىسا، تېنىدىن چىرىكلىكنى يىغىدۇ»،— دەپ ئاگاھلاندۇرماقتا (گالاتىيا. 6:7، 8). دەرھەقىقەت، يەھۋا خۇدا ئۆچ كۆرىدىغان نەرسىلەرنى ياخشى، دەپ كۆرسىتىدىغان ئويۇن-تاماشىنىڭ ھەممە تۈرلىرىنى رەت قىلىش ئىنتايىن مۇھىم!—زەبۇر 97:10.
15. يەھۋا خۇدا بىزگە قانداق سوۋغات بەردى؟
15 نۇرغۇن قېرىنداشلار JW ئىنتېرنېت تېلېۋىزىيىسىنى كۆرۈشتىن كۆپ پايدا ئالىدۇ. مېرىلىن ئىسىملىك قېرىندىشىمىز مۇنداق دېگەن: «ئىنتېرنېت تېلېۋىزىيىسى خۇشاللىقنى ساقلىشىمغا ياردەم بېرىدۇ ۋە مەن يامان بىر نەرسە چىقىپ قالامدۇ، دەپ قورقماستىن، بەلكى ھەممىنى خاتىرجەم كۆرەلەيمەن. ئۆزۈمنى يالغۇز ھېس قىلغاندا ياكى كۆڭلۈم يېرىم بولغاندا، مەن بىر نۇتۇقنى ياكى ئەتىگەنلىك ئىبادەتنى كۆرىمەن، روھۇم كۆتۈرۈلۈپ قالىدۇ. بۇ مېنى يەھۋاغا ۋە تەشكىلاتقا يېقىنلاشتۇرىدۇ. تەشكىلاتىمىزنىڭ تېلېۋىزىيىسى ھاياتىمنى پۈتۈنلەي ئۆزگەرتتى». سىز يەھۋانىڭ بۇ سوۋغىسىدىن پايدىلىنىۋاتامسىز؟ ئايلىق پروگراممىلاردىن باشقا JW ئىنتېرنېت تېلېۋىزىيىسىدە يەنە كۆپلىگەن ئاۋازلىق ئەسەرلەر ۋە فىلىملەر، شۇنداقلا ئىلھام بېرىدىغان نۇرغۇن ناخشىلار بار.
16، 17. ئويۇن-تاماشىغا چىقارغان ۋاقتىمىزغا نېمە ئۈچۈن دىققەت قىلىشىمىز كېرەك؟ بۇنى قانداق قىلالايمىز؟
16 بىز پەقەتلا قانداق ئويۇن-تاماشىنى تاللاشقا ئەمەس، يەنە ئويۇن-تاماشىغا قانچىلىك ۋاقىت چىقىرىشقا دىققەت قىلىشىمىز كېرەك. پەخەس بولمىساق، بىز يەھۋا خۇداغا خىزمەت قىلىشنىڭ ئورنىغا، ئويۇن-تاماشىغا كۆپرەك ۋاقىت سەرپ قىلىشىمىز مۇمكىن. كۆپ ئادەملەر ئۈچۈن ئويۇن-تاماشىغا كەتكەن ۋاقىتنى باشقۇرۇش بەك قىيىن. مەسىلەن، 18 ياشلىق ئابىگائىل مۇنداق دەيدۇ: «كەچتە ئۆيگە ھېرىپ-ئېچىپ كەلگەندە، تېلىۋىزورنىڭ ئالدىدا ھاردۇقۇمنى چىقىرىشنى ياخشى كۆرىمەن. بىراق، ئېھتىيات قىلمىسام، سائەتلاپ ئولتۇرۇپ قالغىنىمنى بىلمەي قالىمەن». سامۇئىل ئىسىملىك ياش بۇرادەر: «مەن توردىن قىسقا فىلىملەرنى كۆرۈشنى باشلىغاندا، ئۆزۈمنى توختىتالماي قالىمەن. بىرىنىلا كۆرىمەن، دەپ ھەش-پەش دېگىچە ئۈچ-تۆت سائەت ئۆتۈپ كەتكەنلىكىنى بايقىماي قالىمەن»،— دەيدۇ.
17 سىز ئويۇن-تاماشىلارغا چىقارغان ۋاقتىڭىزنى قانداق تىزگىنلىيەلەيسىز؟ بۇنىڭ ئۈچۈن ئاۋۋال دەم ئېلىشقا قانچە ۋاقىت بۆلىدىغانلىقىڭىزنى ئېنىقلىۋېلىڭ. بۇنى بىر ھەپتە ئىچىدە تەكشۈرۈپ كۆرەلەمسىز؟ مەسىلەن، تېلېۋىزور كۆرۈش، تورغا چىقىش ۋە يانفونىڭىزدا ئويۇن ئويناشقا قانچە ۋاقىت چىقىرىدىغانلىقىڭىزنى يېزىپ كۆرۈڭ. ئەگەر ئۆزىڭىزنىڭ بۇلارغا ھەددىدىن تاشقىرى كۆپ ۋاقىت سەرپ قىلىۋاتقانلىقىڭىزنى بايقىسىڭىز، ۋاقىت جەدۋىلى تۈزۈشكە تىرىشىڭ. بىرىنچى نۆۋەتتە، ئەڭ مۇھىم نەرسىلەر ئۈچۈن ۋاقىت بەلگىلەپ، كېيىن ئويۇن-تاماشىلارنى پىلانلاڭ. يەھۋا خۇدادىن شۇ پىلانىڭىزغا ئەمەل قىلىش ئۈچۈن ياردەم سوراڭ. شۇنداق قىلسىڭىز، شەخسىي ئۆگىنىش، ئائىلىۋى ئىبادەت، جامائەت يىغىلىشلىرى ھەم ۋەز خىزمىتى ئۈچۈن كۆپرەك ۋاقىت ۋە كۈچ چىقىرالايسىز. سىز يەھۋا خۇدانى بىرىنچى ئورۇنغا قويغاچ، ئويۇن-تاماشىغا ۋاقىت بۆلگەنلىكىڭىز ئۈچۈن ۋىجدانىڭىز سىزنى ئەيىبلىمەيدۇ.
پەقەت يەھۋا خۇداغا ۋاپادار بولۇڭ
18، 19. بىز يەھۋاغا پۈتۈنلەي ئۆزىمىزنى بېغىشلىغانلىقىمىزنى قانداق ئىسپاتلىيالايمىز؟
18 شەيتان دۇنياسىنىڭ يوق قىلىنىشى ۋە يېڭى دۇنيانىڭ كېلىشى توغرۇلۇق يازغاندىن كېيىن، ئەلچى پېترۇس: «ئەي قەدىرلىك قېرىنداشلار، سىلەر بۇ ئىشلارنى كۈتۈۋاتقان ئىكەنسىلەر، ئاخىرىدا ئۇنىڭ نەزىرىدە ئەيىبسىز، قۇسۇرسىز ۋە تىنچ-ئىناق ياشايدىغان ئادەم بولۇشۇڭلار ئۈچۈن پۈتۈن كۈچۈڭلار بىلەن تىرىشىڭلار»،— دەپ يازغان (2-پېتر. 3:14). بۇ نەسىھەتكە قۇلاق سېلىپ، بار كۈچىمىز بىلەن ئەخلاقىي ۋە روھىي جەھەتتىن پاك بولۇپ قېلىشقا تىرىشساق، يەھۋاغا پۈتۈنلەي ئۆزىمىزنى بېغىشلىغان ياكى مۇتلەق سادىق ئىكەنلىكىمىزنى كۆرسىتىمىز.
19 شەيتان ۋە ئۇنىڭ رەزىل دۇنياسى ھاياتىمىزدا بىرىنچى ئورۇنغا يەھۋا خۇدانى ئەمەس، باشقا نەرسىلەرنى قويۇشقا دەۋەت قىلىدۇ (لۇقا 4:13). لېكىن، قانداق قىيىنچىلىقلارغا دۇچ كەلمەيلى، ھېچكىمنىڭ ياكى ھېچنەرسىنىڭ يەھۋانىڭ قەلبىمىزدىكى ئورنىنى ئېگەللىشىگە يول قويمايمىز. بىز پەقەت يەھۋاغا ئۆزىمىزنى بېغىشلاشقا بەل باغلىدۇق، سەۋەبى يالغۇز ئۇ پۈتۈن ۋۇجۇدىمىز بىلەن سۆيۈشكە ۋە ئىبادەتكە لايىقتۇر!
51-ناخشا يېپىش چىڭ يەھۋاغا!
a بىز يەھۋاغا خىزمەت قىلىشنى ياخشى كۆرىمىز. بىراق، پەقەت ئۇنىڭغىلا ئۆزىمىزنى بېغىشلىدۇقمۇ؟ بۇنى بىزنىڭ ئىش-ھەرىكەتلىرىمىز ئاشكارا قىلىدۇ. كېلىڭلار، يەھۋا خۇداغا ئۆزىمىزنى قانچىلىك بېغىشلىغانلىقىمىزنى ئېنىقلاش ئۈچۈن، ھاياتىمىزنىڭ ئىككى ساھەسىنى كۆرۈپ چىقايلى.
b سۈرەتلەردە: بىز پاسكىنا ئاشخانىدا تەييارلانغان تاماقنى يېيىشنى خالىمايمىز. ئۇنداقتا، زوراۋانلىق، جىنكەشلىك ياكى ئەخلاقسىزلىق بىلەن زەھەرلەنگەن ئويۇن-تاماشىنى كۆرۈشنى خالايمىزمۇ؟
