39-تەتقىق ماقالىسى
21-ناخشا رەھىمدىل بولغان بەختلىك
بېرىشتىن كېلىدىغان شاد-خۇراملىقنىڭ تەمىنى تېتىڭ
«بەرمەك ئالماقتىنمۇ زور بەختتۇر».—ئەلچى. 20:35.
مەركىزى ئىدىيە
سېخىيلىق بىلەن باشقىلارغا بېرىشنىڭ يوللىرىنى ۋە نېمە ئۈچۈن بۇ بىزنى خۇشال قىلىدىغانلىقىنى ئۆگىنىمىز.
1، 2. نېمە ئۈچۈن يەھۋا بىزنى بېرىشتىن خۇشاللىق تاپالايدىغان قابىلىيەت بىلەن ياراتقان؟
باشقىلار بىزگە ياخشىلىق قىلسا، خۇشال بولىمىز. لېكىن، بىز باشقىلارغا ياخشىلىق قىلساق، تېخىمۇ خۇشال بولىمىز (ئەلچى. 20:35). يەھۋا ئىنسانلارنى شۇنداق ياراتقانىدى. ئۇنداقتا، بۇ بىز باشقىلاردىن سوۋغات تاپشۇرۇۋالساق، خۇشال بولمايمىز دېگەننى بىلدۈرەمدۇ؟ ئەلۋەتتە، ياق! بىراق، بىز ئالغۇچى ئەمەس، بەرگۈچى بولساق، تېخىمۇ خۇشال بولىمىز. ئەسلىدە، يەھۋا بىز ئۈچۈن پايدىلىق بولسۇن دەپ، بىزنى شۇنداق ياراتقان. نېمە ئۈچۈن بۇنداق دەيمىز؟
2 يەھۋانىڭ بىزنى شۇنداق ياراتقاچ، بىز ئۆزىمىزنىڭ خۇشاللىقىغا خۇشاللىق قوشالايمىز. شۇڭا، باشقىلارغا ياخشىلىق قىلىشنىڭ يوللىرىنى ئىزدەش ئارقىلىق بېرىشتىن كېلىدىغان شاد-خۇراملىقنىڭ تەمىنى تېتىيالايمىز. بىز ھەقىقەتەن ئاجايىپ يارىتىلغان، شۇنداق ئەمەسمۇ؟.—زەبۇر 139:14.
3. نېمە ئۈچۈن يەھۋا شاد-خۇرام خۇدا دەپ تەسۋىرلەنگەن؟
3 مۇقەددەس كىتاب بېرىش كىشىگە خۇشاللىق ئېلىپ كېلىدىغانلىقىنى ئېيتقان ئىكەن، شۇڭا يەھۋانىڭ «شاد-خۇرام خۇدا» دەپ تەرىپلىنىشى بىزنى ھەيران قالدۇرمايدۇ (1-تىموت. 1:11). ئۇ ئەڭ بىرىنچى بولۇپ باشقىلارغا بەرگەن، سېخىي-مەرد بولغان. ئەلچى پاۋلۇس ئېيتقاندەك، «بىز ئۇ ئارقىلىق ياشايمىز، ھەرىكەت قىلىمىز ۋە مەۋجۇتمىز» (ئەلچى. 17:28). ئەمەلىيەتتە، «ھەربىر ياخشى ھەدىيە ۋە ھەربىر مۇكەممەل سوۋغات» يەھۋا خۇدادىن كېلىدۇ.—ياقۇپ 1:17.
4. نېمە بىزنىڭ تېخىمۇ خۇشال بولۇشىمىزغا ياردەم بېرىدۇ؟
4 بەلكىم، ھەممىمىز بەرمەكتىن كېلىدىغان خۇشاللىققا ئېرىشىشنى خالايدىغاندىمىز. بۇنىڭ ئۈچۈن يەھۋا خۇدانى ئۈلگە قىلىپ، سېخىي بولۇشىمىز لازىم (ئەفەس. 5:1). ئۇنداقتا، قايسى يوللار بىلەن يەھۋانىڭ سېخىيلىقىنى ئۈلگە قىلالايمىز؟ باشقىلار بىزنىڭ قىلغان ياخشىلىقىمىزنى قەدىرلىمىگەندەك ھېس قىلساق، نېمە قىلساق بولىدۇ؟ بۇ ماقالىدە مۇشۇ سوئاللارغا جاۋاب تاپىمىز. بۇ ئەسكەرتىشلەر داۋاملىق سېخىي بولۇشقا ۋە تېخىمۇ خۇشاللىق تېپىشىمىزغا ياردەم بېرىدۇ.
يەھۋانىڭ سېخىيلىقىنى ئۈلگە قىلىڭ
5. يەھۋا بىزنى قانداق تەمىنلەيدۇ؟
5 يەھۋا خۇدا تۈرلۈك يوللار بىلەن سېخىيلىقنى كۆرسىتىدۇ. شۇلارنىڭ بىرقانچىسىنى كۆرۈپ چىقايلى. يەھۋا بىزنىڭ ماددىي ئېھتىياجلىرىمىزغا كۆڭۈل بۆلىدۇ. بەلكىم تۇرمۇشىمىز ئالاھىدە باياشات ئەمەس، بىراق يەھۋاغا چىن كۆڭلىمىزدىن شۈكۈر ئېيتىمىز. چۈنكى ئۇ دائىم ئېھتىياجلىرىمىزنى تەمىنلەپ بېرىدۇ. مەسىلەن، كۆپىنچىمىزنىڭ يەيدىغان تامىقى، كىيىدىغان كىيىمى، ئۇخلايدىغان يېرى بار (زەبۇر 4:8؛ مەتتا 6:31–33؛ 1-تىموت. 6:6–8). يەھۋا تۇرمۇشىمىزغا كېرەكلىك نەرسىلەرنى تەمىنلەپ بېرىدۇ. ئۇنداقتا، ئۇ بۇنى مەجبۇرىيىتىنى ئادا قىلىش ئۈچۈن قىلامدۇ؟ ياق، ئۇنداق ئەمەس. ئۇنداقتا نېمە ئۈچۈن ئۇ بۇنداق قىلىدۇ؟
6. مەتتا 6:25، 26-ئايەتلەردىن نېمىنى ئۆگىنىمىز؟
6 ئاددىي قىلىپ ئېيتقاندا، يەھۋا بىزنى سۆيگەچ، شۇنداق قىلىدۇ. مەتتا 6:25، 26-ئايەتلەردە (ئوقۇڭ) ئەيسانىڭ ئېيتقان سۆزلىرىگە قاراپ باقايلى. ئۇ شاگىرتلىرىغا خۇدا ياراتقان قۇشلارنى مىسال كەلتۈرۈپ مۇنداق دېگەن: «ئۇلار ئۇرۇق چاچمايدۇ، ھوسۇل يىغمايدۇ ۋە ئامبارلارغا توپلىمايدۇ. شۇنداق بولسىمۇ، ئاسماندىكى ئاتاڭلار ئۇلارنى تويغۇزىدۇ». ئاندىن يەنە شۇنداق سورىغان: «سىلەر شۇ قۇشلاردىن كۆپ ئەزىز ئەمەسمۇ؟». ئەيسانىڭ سۆزلىرىدىن نېمىنى ئۆگىنەلەيمىز؟ يەھۋا ئۆزىنىڭ سادىق خىزمەتچىلىرىنى ھايۋاناتلاردىن كۆپ ئەزىز كۆرىدۇ. ئەگەر يەھۋا ھايۋاناتلارغا كۆڭۈل بۆلسە، ئۇ بىزگە ھەم كۆڭۈل بۆلۈپ، ئېھتىياجلىرىمىزنى قامدايدۇ. خۇددى بىر مېھرىبان ئاتا ئائىلىسىنى تەمىنلىگەندەك، سۆيگۈ-مۇھەببەتلىك يەھۋا ئۆز ئائىلىسىگە غەمخورلۇق قىلىدۇ.—زەبۇر 145:16؛ مەتتا 32:6.
7. يەھۋانىڭ سېخىيلىقىنى ئۈلگە قىلىشنىڭ يوللىرىدىن بىرى قايسى؟ (رەسىمگە ھەم قاراڭ)
7 يەھۋاغا ئوخشاش، بىزمۇ باشقىلارنى سۆيىمىز. شۇڭا، باشقىلارغا ئېھتىياجى چۈشكەن نەرسىلەرنى بېرىشنى خالايمىز. مەسىلەن، جامائىتىڭىزدە يېمەك-ئىچمەك ياكى كىيىم-كېچەككە ئېھتىياجى بار قېرىنداشلارنى بىلەمسىز؟ يەھۋا سىز ئارقىلىق ئۇلارنىڭ ئېھتىياجىنى قامدىشى مۇمكىن. خۇدانىڭ خەلقى بالايىئاپەت مەزگىلىدە باشقىلارغا سېخىيلىق بىلەن ياردەم بەرگەن. مەسىلەن، 19-COVID تاجىسىمان ۋىرۇس ۋابا كېسلى مەزگىلىدە، ئېتىقادداشلىرىمىز مۇھتاج بولغانلارغا يېمەك-ئىچمەك، كىيىم-كېچەك ۋە باشقا زۆرۈر نەرسىلەرنى يەتكۈزۈپ تۇردى. نۇرغۇن قېرىنداشلار پۈتكۈل دۇنيانىڭ جاي-جايلىرىدىكى خىزمەتلىرىمىزنى قۇللاپ، سېخىيلىق بىلەن ئىئانىلەرنى بەردى.. شۇ ئىئانە پۇللىرى دۇنيانىڭ ھەرقايسى جايلىرىدا ئاپەتكە ئۇچرىغانلارغا ياردەم بېرىشكە ئاجايىپ مۇمكىنچىلىكلەرنى ياراتتى. ئاشۇ قېرىنداشلىرىمىزنىڭ ھەممىسى، ئىبرانىيلار 13:16-ئايەتتىكى سۆزلەرگە قۇلاق سالغان. ئايەتتە مۇنداق دەيدۇ: «ياخشىلىق قىلىشنى ۋە ئۆزۈڭلاردا بارىنى باشقىلار بىلەن ئورتاقلىشىشنى ئۇنتۇماڭلار. چۈنكى، خۇدا بۇنداق قۇربانلىقلاردىن خۇرسەن بولىدۇ».
ھەممىمىز يەھۋانىڭ سېخىيلىقىنى ئۈلگە قىلالايمىز (7-ئابزاسقا قاراڭ)
8. يەھۋا كۈچ-قۇدرىتى بىزگە قانداق ياردەم بېرىدۇ؟ (فىلىپىلىكلەر 2:13)
8 يەھۋا بىزگە كۈچ بېرىدۇ. يەھۋا كۈچ-قۇدرىتى چەكسىزدۇر ۋە ئۇ خۇشاللىق بىلەن سادىق خىزمەتچىلىرىنى كۈچلەندۈرىدۇ (فىلىپىلىكلەر 2:13-نى ئوقۇڭ). ئازدۇرۇشلارغا قارشى تۇرۇش ياكى قىيىنچىلىقلارغا بەرداشلىق بېرىش ئۈچۈن خۇدادىن كۈچ سوراپ دۇئا قىلغان چاغلىرىڭىز بولغانمۇ؟ يەنە بىر كۈننى بولسىمۇ تىنچ-ئامان ئۆتكۈزۈۋالاي، دەپ يەھۋادىن كۈچ-مەدەت سوراپ دۇئا قىلىپ باققانمۇسىز؟ يەھۋا شۇنداق دۇئالىرىڭىزغا جاۋاب بەرگەندە، سىز چوقۇم ئەلچى پاۋلۇستەك ھېس-تۇيغۇدا بولغانسىز. پاۋلۇس مۇنداق دېگەن: «ماڭا كۈچ-قۇۋۋەت بەرگۈچىنىڭ ياردىمى بىلەن ھەرقانداق ئىشنى قىلالايمەن».—فپ 4:13.
9. قايسى يوللار بىلەن كۈچىمىزنى باشقىلارغا ياردەم بېرىشتە ئىشلىتىپ، يەھۋانى ئۈلگە قىلالايمىز؟
9 بىزنىڭ يەھۋاغا ئوخشاش چەكسىز كۈچ-قۇدرىتىمىز يوق ۋە ئۆزىمىزنىڭ كۈچ-قۇۋۋىتىنى باشقىلارغا مۇنداقلا بېرەلمەيمىز. بىراق، بىز يەھۋانى ئۈلگە قىلىپ، باشقىلارغا ياردەم بېرىش ئۈچۈن سېخىيلىق بىلەن ئۆز كۈچىمىزنى چىقىرالايمىز. مەسىلەن، ياشانغان ياكى تەن-سالامەتلىكى ناچار قېرىنداشلىرىمىزنىڭ پۇت-قولى بولۇپ، نەرسە-كېرەكلەرنى سېتىۋېلىش، ئۆي ئىشلىرىنى قىلىشتەك ئىشلىرىغا ياردەم بېرەلەيمىز. ئەگەر شارائىتىمىز يار بەرسە، يىغىلىش زالىنى تازىلاش ياكى رېمونت قىلىش ئىشلىرىغا ياردەم بېرەلەيمىز. كۈچىمىزنى شۇنداق ئىشلارغا چىقارساق، ئېتىقادچى قېرىنداشلىرىمىزغا پايدىمىز تېگىدۇ.
بىز كۈچىمىزنى باشقىلارغا ياردەم بېرىش ئۈچۈن ئىشلىتەلەيمىز (9-ئابزاسقا قاراڭ)
10. گەپ-سۆزلىرىمىز بىلەن باشقىلارنى قانداق مۇستەھكەملىيەلەيمىز؟
10 شۇنى ئۇنتۇماڭكى، گەپ-سۆزلىرىمىزنىڭ ھەم كۈچى بار. چىن كۆڭلىڭىزدىن ماختىماقچى بولغان ياكى تەسەللى بېرىشنى ئويلىغان بىرەر قېرىنداش بارمۇ؟ تەشەببۇسكار بولۇپ، ئۇ قېرىنداشنى يوقلاپ كېلىڭ، تېلېفون قىلىڭ، خەت يېزىڭ ياكى قىسقا ئۇچۇر ئەۋەتىڭ. نېمە دەيمەن دەپ ئەنسىرىمەڭ. چىن يۈرەكتىن چىققان بىرنەچچە ئېغىز سۆزلىرىڭىز ئېتىقادچى قېرىنداشلىرىڭىزنىڭ يەھۋاغا سادىق قېلىشىغا ياكى قىيىن ئەھۋالدا ئۈمىدۋار بولۇشىغا ياردەم بېرىشى مۇمكىن.—پەند. نە 12:25؛ ئەفەس. 4:29.
11. يەھۋا ئۆز دانالىقىنى قانداق ئىشلىتىدۇ؟
11 يەھۋا بىزگە دانالىق بېرىدۇ. ئەيسانىڭ شاگىرتى ياقۇپ مۇنداق يازغان: «ئەگەر ئاراڭلاردا كىمدۇ بىرىدە دانالىق كەم بولسا، ھەممىسىگە سېخىيلىق بىلەن، تاپا-تەنە قىلماي بېرىدىغان خۇدادىن داۋاملىق تىلىسۇن» (ياقۇپ 1:5). مۇشۇ سۆزلەردىن كۆرگىنىمىزدەك، يەھۋا دانالىقىنى باشقىلاردىن ئايىمايدۇ، ئەكسىچە سېخىيلىق بىلەن ئورتاقلىشىدۇ. دىققەت قىلسىڭىز، يەھۋا كىشىلەرگە دانالىقنى بەرگەندە «تاپا-تەنە قىلماي» بېرىدۇ. بىز خۇدادىن يول-يورۇق سورىغىنىمىزدا، ئۇ ھەرگىز بىزنى خىجالەتتە قالدۇرمايدۇ. ئەمەلىيەتتە، ئۇ بىزنى ئۆزىدىن دانالىق سوراشقا دەۋەت قىلىدۇ.—پەند. نە 2:1–6.
12. باشقىلار بىلەن ئورتاقلىشىشنىڭ قانداق يوللىرى بار؟
12 بىزمۇ يەھۋانى ئۈلگە ئېلىپ، ئۆزىمىزدە بار بولغان دانالىقنى باشقىلار بىلەن ئورتاقلىشالايمىز (زەبۇر 32:8). بىلگەنلىرىمىزنى باشقىلار بىلەن ئورتاقلىشىشنىڭ نۇرغۇن يوللىرى بار. مەسىلەن، بىز يېقىندا ۋەز ئېيتقۇچى بولغانلارنى ئۆگىتەلەيمىز. مەسىلەن، ئاقساقاللار سەۋرچانلىق بىلەن ياردەمچى خىزمەتچىلەر ۋە چۆمۈلدۈرۈلۈشتىن ئۆتكەن بۇرادەرلەرگە جامائەتتىكى ۋەزىپىلەرنىڭ ھۆددىسىدىن چىقىشنى ئۆگىتەلەيدۇ. تەشكىلاتنىڭ بىنا قۇرۇلۇشى ياكى رېمونت ئىشلىرىنى قىلغاندا، تەجرىبىسى مول قېرىنداشلار تەجرىبىسى ئاز قېرىنداشلارنى تەربىيىلەپ يېتىشتۈرۈشكە ياردەم بېرەلەيدۇ.
13. باشقىلارغا ئۆگەتكەندە، يەھۋانىڭ دانالىق بېرىش ئۇسۇلىنى قانداق ئۈلگە قىلالايمىز؟
13 باشقىلارغا ئۆگەتكەندە، يەھۋا خۇدانى ئۈلگە قىلىشقا تىرىشىڭ. ئېسىڭىزدە بولسا، يەھۋا سېخىيلىق بىلەن بىزگە دانالىقىنى بېرىدۇ. شۇنىڭغا ئوخشاش، بىزمۇ سېخىيلىق بىلىمىمىزنى ۋە تەجرىبىلىرىمىزنى ئۆگىنىۋاتقانلار بىلەن ئورتاقلىشىشىمىز كېرەك. بىز «مەن باشقىلارغا ئۆگەتسەم، مەن قىلىۋاتقان ۋەزىپىنى كېيىن قىلىدۇ» دەپ قورقماسلىقىمىز ياكى «ئىلگىرى ماڭا ھېچكىم ئۆگەتمىگەن، شۇڭا ئۇمۇ ئۆزى ئۆگەنسۇن» دەپ ئويلىماسلىقىمىز لازىم. بۇ ناتوغرا ئوي-پىكىر. يەھۋانىڭ ھېچبىر خىزمەتچىسى ھەرگىز ئۇنداق ئوي-پىكىردە بولماسلىقى كېرەك. بىز ئېتىقادچى قېرىنداشلىرىمىزغا پەقەت بىلگەنلىرىمىزنى ئەمەس، ھەتتاكى جېنىمىزنى بېرىشكە رازىمىز (1-سالونىكا. 2:8). بىز شۇنى ئۈمىد قىلىمىزكى، «ئۇلارمۇ باشقىلارغا تەلىم بېرىشكە لاياقەتلىك بولسۇن» (2-تىموت. 2:1، 2). شۇڭا، ھەممىمىز سېخىيلىق بىلەن بىلگەنلىرىمىزنى باشقىلار بىلەن ئورتاقلىشايلى. شۇنداق قىلساق، بىز ۋە ئۇلار تېخىمۇ ئەقىلگە توشۇپ، خۇشاللىقىمىزغا خۇشاللىق قوشۇلىدۇ.
ياخشىلىقىمىز قەدىرلىمىگەندەك ھېس قىلساق
14. كۆپىنچە ئادەملەر قىلغان ياخشىلىقىمىزغا قانداق ئىنكاس قايتۇرىدۇ؟
14 ئادەتتە بىز باشقىلارغا، بولۇپمۇ ئېتىقادچى قېرىنداشلىرىمىزغا ياخشىلىق قىلغىنىمىزدا، ئۇلار دائىم ئۆزلىرىنىڭ مىننەتدارلىقىنى بىلدۈرىدۇ. ئۇلار رەھىم ئېيتىپ، كىچىككىنە بىر كارتا ياكى قەغەزگە خەت يېزىپ ياكى باشقا يوللار بىلەن رەھمەت ئېيتىشى مۇمكىن (كولوسى. 3:15). ئۇلار شۇنداق ئىنكاس قايتۇرغاندا، چوقۇم ئىنتايىن خۇشال بولىمىز.
15. ئەگەر باشقىلار مىننەتدارلىق بىلدۈرمىسە، بىز نېمىلەرنى ئەستە تۇتۇشىمىز كېرەك؟
15 لېكىن، بەزىلەر ھەردائىم رەھمەت ئېيتماسلىقى مۇمكىن. بەزىدە بىرلىرى ئۈچۈن ۋاقتىمىزنى، كۈچىمىزنى، پۇل-ماللىرىمىزنى سەرپ قىلىپ، باشقىلارغا ياخشىلىق قىلغاندىن كېيىن، بىز ياخشىلىق قىلغان كىشى قىلغانلىرىمىزنى قەدىرلىمىگەندەك ھېس قىلىشىمىز مۇمكىن. شۇنداق چاغلاردا خۇشاللىقىمىزنى يوقاتماسلىق ياكى كۆڭلىمىزنى يېرىم قىلماسلىققا نېمە ياردەم بېرىدۇ؟ بۇ ماقالىدىكى ئاساسىي تېما ئايەت ئەلچىلەر 20:35-ئايەتتىكى سۆزلەرنى ئەستىن چىقارماڭ. بىزنىڭ خۇشاللىقىمىز باشقىلارنىڭ قىلغان ياخشىلىقىمىزغا قانداق جاۋاب قايتۇرۇشىغا باغلىق ئەمەس. باشقىلار قىلغانلىرىمىزنى قەدىرلىمىگەن ھالەتتىمۇ، بىز باشقىلارغا بېرىپ خۇشاللىق تېپىش ئۆزىمىزنىڭ تاللىشى. ھازىر شۇنداق قىلىشنىڭ بىرنەچچە ئۇسۇلىنى كۆرۈپ باقايلى.
16. خۇشاللىق بىلەن باشقىلارغا ياخشىلىق قىلىشنى داۋاملاشتۇرۇشىمىزغا نېمە ياردەم بېرەلەيدۇ؟
16 دىققىتىڭىزنى يەھۋانى ئۈلگە قىلىشقا قارىتىڭ. ئىنسانلار مىننەتدار بولسۇن-بولمىسۇن، يەھۋا ئۇلارغا ياخشى نەرسىلەرنى بېرىدۇ (مەتتا 5:43–48). بىزمۇ باشقىلارنىڭ بىزگە بىرنەرسە قايتۇرۇپ بېرىشىنى كۈتمەي، داۋاملىق ياخشىلىق قىلساق، چوقۇم يەھۋانىڭ زور مۇكاپاتىغا ئېرىشىمىز (لۇقا 6:35). بۇ باشقىلارنىڭ قايتۇرۇپ بېرىشىنى كۈتمەسلىك، رەھمەت ئېيتىشىنى كۈتمەسلىكنى ئۆز ئىچىگە ئالىدۇ. مەيلى باشقىلار بىزگە رەھمەت ئېيتسۇن ياكى ئېيتمىسۇن، پەقەت بىز خۇشاللىق بىلەن بەرسەك، يەھۋا ئۆزى باشقىلارغا قىلغان ياخشىلىقىمىز ئۈچۈن بىزنى چوقۇم مۇكاپاتلايدۇ.—پەند. نە 19:17؛ 2-كورىنت. 9:7.
17. باشقىلارغا بېرىشكە قارىتا توغرا ئوي-پىكىردە بولۇشىمىزغا نېمە ياردەم بېرەلەيدۇ؟ (لۇقا 14:12–14)
17 يەھۋانى ئۈلگە قىلىشنىڭ يەنە بىر يولى — ئەيسانىڭ لۇقا 14:12-14-ئايەتلەردە (ئوقۇڭ) ئېيتقان سۆزلىرىگە ئەمەل قىلىشتۇر. ئەلۋەتتە، قىلغان ياخشىلىقىمىزنى قايتۇرالايدىغان ئادەملەرگە سېخىيلىق مېھماندوستلۇق كۆرسىتىشنىڭ ھېچقانداق يامىنى يوق. لېكىن، كۆڭلىمىزدە باشقىلارمۇ ياخشىلىقىمىزغا جاۋاب قايتۇرسىكەن دەپ ئازغىنە بولسىمۇ ئارزۇ-ئۈمىد قىلىدىغانلىقىمىزنى بايقىساقچۇ؟ ئۇنداق بولسا، ئەيسانىڭ نەسىھەت سۆزىگە قۇلاق سېلىپ، بىزگە قايتۇرۇشقا چامىسى يەتمەيدىغانلارنى مېھمانغا چاقىرساق بولىدۇ. شۇ چاغدا، بىز خۇشال بولىمىز، چۈنكى يەھۋانى ئۈلگە قىلىۋاتىمىز. باشقىلارنىڭ جاۋاب قايتۇرۇشىنى كۈتمەي، ياخشىلىق قىلىشقا ئادەتلەنسەك، باشقىلار مىننەتدارلىق بىلدۈرمىگەن ھالەتتىمۇ، بىز يەنىلا خۇشال بولىمىز.
18. بىز نېمە قىلىشتىن ساقلىنىشىمىز كېرەك ۋە نېمە ئۈچۈن؟
18 باشقىلارنى نىيىتىدىن گۇمانلىنىشتىن ساقلىنىڭ (1-كورىنت. 13:7). ئەگەر باشقىلار سىزگە رەھمەت ئېيتمىغان بولسا، مۇنداق دەپ ئويلاپ كۆرۈڭ: «ئۇ ھەقىقەتەن ياخشىلىقنى بىلمەيدىغان ئادەممۇ ياكى رەھمەت ئېيتىشنى ئۇنتۇپ قالدىمۇ؟» بەلكىم، ئۇنىڭ بىز كۈتكەندەك رەھمەت ئېيتمىغانلىقىنىڭ باشقا سەۋەبى باردۇ. بەزىلەر ئىچىدە كۆڭلىدە مىننەتدار بولغاندۇ ياكى رەھمىتىنى ئېغىزىدا ئىپادىلەشتە قىينالغاندۇ. بەلكىم، ئۇ ئۆز ۋاقتىدا باشقىلارغا ياردەم بەرگەن بىرى بولسا، ئەمما ھازىر ئۆزى ياردەمگە مۇھتاج بولغاندا، ياردەمنى قوبۇل قىلغاندىن كېيىن خىجالەت بولغاندۇ. مەيلى قانداق بولۇشىدىن قەتئىينەزەر، ئېتىقادچى قېرىنداشلىرىمىزنى چىن قەلبىمىزدىن ھەقىقىي ياخشى كۆرسەك، ئۇلارنى چۈشىنىشكە تىرىشىمىز ۋە داۋاملىق باشقىلارغا بېرىشتىن خۇشاللىق تاپىمىز.—ئەفەس. 4:2.
19، 20. بىز باشقىلارغا بەرگەندە، نېمە ئۈچۈن سەۋرچان بولۇشىمىز لازىم؟ (رەسىمگە ھەم قاراڭ)
19 سەۋرچان بولۇڭ. مەرد-سېخىي بولۇش ھەققىدە سۇلايمان پادىشاھ: «نېنىڭنى سۇ ئۈستىگە تاشلىساڭ، كۈنلەرنىڭ بىرىدە ئۇنى قايتا تاپىسەن»،— دەپ يازغان (ۋەز 11:1). بۇ ئايەتتىن كۆرگىنىمىزدەك، بەزىلەر قىلغان ياخشىلىقىمىزغا كۈنلەرنىڭ بىرىدە مىننەتدارلىقىنى بىلدۈرۈشى مۇمكىن. بۇنىڭ بىر مىسالىنى كۆرۈپ باقايلى.
20 نۇرغۇن يىللار ئىلگىرى، بىر رايونغا مەسئۇل ئاقساقالنىڭ ئايالى يېڭىلا چۆمۈلدۈرۈلۈشتىن ئۆتكەن قېرىنداشقا خەت يېزىپ، ئۇنى ساداقەتمەنلىكنى ساقلاشقا ئۈندىگەن ئىدى. تەخمىنەن سەككىز يىلدىن كېيىن، شۇ قېرىنداش مۇنداق جاۋاب خەت قايتۇرغان: «بەلكىم، سىز بىلمەيسىز، شۇنچە يىللاردىن بۇيان، سىزنىڭ يازغان سۆزلىرىڭىز ماڭا ياردەم بېرىپ كېلىۋاتىدۇ. سىزنىڭ ئىللىق سۆزلىرىڭىز ئۈچۈن، بولۇپمۇ نەقىل كەلتۈرگەن ئايەت يۈرىكىمگە قاتتىق تەسىر قىلغانىدى. ئۇنى ھەردائىم ئېسىمدە تۇتىمەن» a. ئۇ ئۆزى دۇچ كەلگەن بەزى قىيىنچىلىقلارنى ئېيتىپ بەرگەندىن كېيىن، ئۇ مۇنداق يازغان: «بەزىدە ھەممىدىن ۋاز كېچىپ، بارچە مەسئۇلىيەتلەرنى، ھەتتا يەھۋاغا خىزمەت قىلىشنى تاشلاشنى ئويلىغانىدىم. بىراق، سىز يازغان ئايەت بەل قويۋەتمەي چىڭ تۇرۇشۇمغا كۈچ-مەدەت بەردى. خېتىڭىز ۋە ئۇنىڭدا نەقىل كەلتۈرۈلگەن ئايەت سەككىز يىلدىن بۇيان ماڭا ياردەم بېرىپ كەلمەكتە». شۇنچە يىللاردىن كېيىن رايونغا مەسئۇل ئاقساقالنىڭ ئايالى خېتىگە جاۋاب قايتۇرۇپ يېزىلغان بۇ خەتنى تاپشۇرۇۋالغاندا، قانچىلىك خۇشال بولغانلىقىنى تەسەۋۋۇر قىلىپ كۆرۈڭ! چىن قەلبىمىزدىن قىلغان ياخشىلىقلارغا، بەلكىم باشقىلار كۈنلەرنىڭ بىرىدە مىننەتدارلىق بىلدۈرۈشى مۇمكىن.
باشقىلار ياخشىلىقىمىزغا كۈنلەرنىڭ بىرىدە رەھمەت ئېيتىشى مۇمكىن (20-ئابزاسقا قاراڭ) b
21. نېمە ئۈچۈن يەھۋانىڭ سېخىيلىقىنى ئۈلگە قىلىشقا بەل باغلىدىڭىز؟
21 ماقالىنىڭ بېشىدا ئېلىنغاندەك، يەھۋا بىزنى ئالاھىدە قابىلىيەت بىلەن ياراتقان. گەرچە ئېلىشنى ياخشى كۆرسەكمۇ، لېكىن بېرىش تېخىمۇ زور خۇشاللىققا ئېرىشتۈرىدۇ. ئېتىقادچى قېرىنداشلىرىمىزغا ياردەم بەرگەندە، ئۆزىمىزنى خۇشال-خۇرام ھېس قىلىمىز. ئۇلار بىزگە رەھمەت ئېيتقاندا، تېخىمۇ خۇشال بولۇپ كېتىمىز. لېكىن، باشقىلار بىزگە رەھمەت ئېيتمىغان ھالەتتىمۇ، توغرا ئىش قىلغىنىمىز ئۈچۈن، ئۆز-ئۆزىمىزدىن سۆيۈنۈپ، كۆڭلىمىز قانائەت تاپىدۇ. ئەستىن چىقارماڭكى، مەيلى سىز باشقىلارغا نېمە بېرىشىڭىزدىن قەتئىينەزەر، يەھۋا سىزگە تېخىمۇ كۆپ بېرىشكە قادىردۇر (2-تارىخ. 25:9). خۇلاسە قىلساق، ھېچقايسىمىز باشقىلارغا، يەھۋانىڭ بىزگە بەرگىنىدىن كۆپرەك بېرەلمەيمىز. بىز ئۈچۈن يەھۋانىڭ مۇكاپاتىغا ئېرىشىشتىنمۇ ئارتۇقراق كاتتا مۇكاپات يوقتۇر! شۇنداق ئىكەن، ئاسماندىكى سېخىي ئاتىمىز يەھۋانى داۋاملىق ئۈلگە قىلايلى.
25-ناخشا ھەقىقىي شاگىرت بولۇشنىڭ بەلگىسى
a خەتتە قېرىندىشىمىز 2-يۇھاننا 8-ئايەتنى كەلتۈرگەن: «بىزنىڭ سىڭدۈرگەن ئەجىر-مېھنەتلىرىمىزنى بىكار قىلماي، تولۇق مۇكاپاتقا ئېرىشەلىشىڭلار ئۈچۈن، ئۆزۈڭلارغا ئاگاھ بولۇڭلار»
b 30-بەتتىكى: بۇ سەھنىلەشتۈرۈلگەن كۆرۈنۈشتە، رايونغا مەسئۇل ئاقساقالنىڭ ئايالى سېخىيلىق كۆرسىتىپ، بىر قېرىنداشنى ئىلھام-مەدەت بەرگەن. يىللار ئۆتۈپ، شۇ قېرىنداش جاۋاب خەت يېزىپ، ئۇنىڭغا رەھمەت ئېيتقان.
