36-تەتقىق ماقالىسى
6-ناخشا خۇدا خىزمەتچىسىنىڭ دۇئاسى
خۇدانىڭ سۆزىنى ئەمەلىي ئىجرا قىلغۇچى بولۇڭلار
«خۇدانىڭ سۆزىنى پەقەت ئاڭلاپ قويغۇچى ئەمەس، ئەمەلىي ئىجرا قىلغۇچى بولۇڭلار».—ياقۇپ 1:22.
مەركىزى ئىدىيە
بۇ ماقالە بىزنى ھەر كۈنى خۇدا سۆزىنى ئوقۇپ قويۇش ئەمەس، بەلكى ئوقۇغانلىرىمىز توغرۇلۇق چوڭقۇر ئويلىنىپ، ئۇنى كۈندىلىك تۇرمۇشىمىزدا ئەمەلىي قوللىنىش ئىستىكىنى كۈچەيتىشىمىزگە ياردەم بېرىدۇ.
1، 2. خۇدانىڭ خىزمەتچىلىرىنىڭ ئۆزلىرىنى بەختلىك ھېس قىلىشىنىڭ مۇھىم بىر سەۋەبى نېمە؟ (ياقۇپ 1:22–25)
يەھۋا ۋە ئۇنىڭ سۆيۈملۈك ئوغلى بىزنىڭ بەختلىك بولۇشىمىزنى خالايدۇ. زەبۇر 119:2-ئايەتتە مۇنداق يېزىلغان: «نەقەدەر بەختلىكتۇر، ئۇنىڭ ئەسكەرتىشلىرىگە قولاق سالغانلار، پۈتۈن قەلبى بىلەن ئۇنى ئىزدىگەنلەر». ئەيسا مەسىھ ھەم بۇنى تەكىتلەپ، مۇنداق دېگەن: «خۇدانىڭ سۆزىنى ئاڭلاپ، ئۇنىڭغا ئەمەل قىلغانلار بەختلىكتۇر!»—لۇقا 11:28.
2 يەھۋانىڭ خىزمەتچىلىرى بەختلىك. نېمە ئۈچۈن؟ بۇنىڭ نۇرغۇن سەۋەبلىرى بار. شۇ سەۋەبلەردىن مۇھىم بىرى — بىز خۇدانىڭ سۆزىنى دائىم ئوقۇيمىز ۋە ئۆگەنگەنلىرىمىزنى تۇرمۇشىمىزدا ئەمەلىي قوللىنىشقا تىرىشىمىز.—ياقۇپ 1:22–25-نى ئوقۇڭ.
3. خۇدانىڭ سۆزىنى ئوقۇپ، ئۇنى ھاياتىمىزدا ئەمەلىي قوللانساق، قانداق پايدىسىنى كۆرىمىز؟
3 خۇدانىڭ سۆزىنى ئەمەلىي قوللىنىشنىڭ كۆپ پايدىسى بار. مەسىلەن، يەھۋانىڭ كۆڭلىنى خۇرسەن قىلالايمىز (ۋەز 12:13). مۇقەددەس كىتابتىكى پرىنسىپلارنى ھاياتىمىزدا قوللانساق، ئائىلىمىزدىكىلەر ۋە ئېتىقادداشلىرىمىز بىلەن تېخىمۇ يېقىن دوستلۇق مۇناسىۋەتنى ئورنىتالايمىز. بەلكىم، بۇنى ئۆزىڭىزمۇ كۆرۈۋاتقانسىز. ئۇنىڭدىن باشقا، خۇدانىڭ سۆزىنى ئەمەلىي قوللانساق، يەھۋاغا ئىبادەت قىلمايدىغان ئادەملەر دۇچ كېلىدىغان نۇرغۇن قىيىنچىلىقلاردىن نېرى بولىمىز. داۋۇت پادىشاھ يەھۋانىڭ قانۇنلىرى، بۇيرۇقلىرى ۋە ھۆكۈملىرى توغرۇلۇق سۆز قىلغاندىن كېيىن، مۇنداق خۇلاسە قىلغان: «ئۇلارغا ئەمەل قىلغانلار كاتتا مۇكاپاتىنى ئالار» (زەبۇر 19:7–11). بىزمۇ داۋۇتنىڭ بۇ سۆزىگە چىن كۆڭلىمىزدىن قوشۇلىمىز.
4. نېمە ئۈچۈن خۇدانى سۆزىنى ئەمەلىي ئىجرا قىلغۇچى بولۇش ھەردائىم ئاسان ئەمەس؟
4 ھەقىقەتەن خۇدانىڭ سۆزىنى ئەمەلىي ئىجرا قىلغۇچى بولۇش بىز ئۈچۈن ھەردائىم ئاسان ئەمەس. جان بېقىش ئۈچۈن جاپالىق ئىشلىشىمىز كېرەك. بىراق، يەھۋانىڭ بىزدىن نېمىنى كۈتىدىغانلىقىنى چۈشىنىش ئۈچۈن، مۇقەددەس كىتابنى ئوقۇشقا چوقۇم ۋاقىت چىقىرىشىمىز كېرەك. شۇڭلاشقا، ھازىر مۇقەددەس كىتابنى دائىم ئوقۇشقا ياردەم بېرىدىغان بەزى مەسلىھەتلەرنى كۆرۈپ چىقايلى. ئاندىن كېيىن، ئوقۇغانلىرىمىز ئۈستىدىن چوڭقۇر ئويلىنىشقا نېمە ياردەم بېرىدۇ ۋە ئۇلارنى كۈندىلىك تۇرمۇشىمىزدا ئەمەلىي قوللىنىشنىڭ قانداق يوللىرى بار دېگەنلەرنى مۇھاكىمە قىلىمىز.
خۇدا سۆزىنى ئوقۇش ئۈچۈن ۋاقىت چىقىرىڭ
5. كۆپ ۋاقتىمىزنى سەرپ قىلىدىغان قانداق مەسئۇلىيەتلىرىمىز بار؟
5 يەھۋانىڭ خىزمەتچىلىرىنىڭ كۆپىنچىسى ئىنتايىن ئالدىراش. چۈنكى، مۇقەددەس كىتابتا مۇھىم دەپ قارالغان مەسئۇلىيەتلەرنىڭ ھۆددىسىدىن چىقىشىمىز ئۈچۈن كۆپ ۋاقىت ئاجرىتىشىمىز لازىم. مەسىلەن، كۆپىنچىمىز ئۆزىمىز ۋە ئائىلىمىزنىڭ تۇرمۇشىنى قامداش ئۈچۈن ئىشلەيمىز (1-تىموت. 5:8). نۇرغۇن ئېتىقادداشلىرىمىز كېسەلچان ياكى ياشانغان ئۇرۇق-تۇغقانلىرىنىڭ ھالىدىن خەۋەر ئالىدۇ. بىز ھەممىمىز تەن ساغلاملىقىمىزغا كۆڭۈل بۆلۈش ئۈچۈن ۋاقىت چىقىرىشىمىز كېرەك. ئۇنىڭدىن باشقا، جامائەتتە ئۈستىمىزگە ئالغان كۆپلىگەن ۋەزىپىلەر بار. ئەڭ مۇھىم بىر ۋەزىپىمىز بولسا قىزغىن ۋەز خىزمىتىگە قاتنىشىش. يۇقىرىدا تىلغا ئېلىنغان شۇ مەسئۇلىيەتلەرگە قارىماي، مۇقەددەس كىتابنى ھەردائىم ئوقۇش، ئوقۇغانلىرىڭىز ئۈستىدە چوڭقۇر ئويلىنىش ۋە ئۇلارنى ئەمەلىي قوللىنىش ئۈچۈن ۋاقىت چىقىرالامسىز؟
6. ھەركۈنى مۇقەددەس كىتابنى ئوقۇش ئۈچۈن نېمە قىلسىڭىز بولىدۇ؟ (رەسىملەرگە ھەم قاراڭ).
6 خۇدانىڭ خىزمەتچىلىرى ئۈچۈن ئەڭ مۇھىم ئىشلاردىن بىرى — مۇقەددەس كىتابنى تەتقىق قىلىپ ئوقۇش. شۇڭا، بۇنى بىرىنچى ئورۇنغا قويۇش كېرەك (فىلىپى. 1:10). قانداق ئادەمنىڭ بەختلىك بولىدىغانلىقى ھەققىدە، زەبۇر 1-بابتا مۇنداق سۆزلەر يېزىلغان: «ئۇ يەھۋانىڭ قانۇنىدىن سۆيۈنۈپ، ئۇنى كېچە-كۈندۈز ئوقۇپ، چوڭقۇر ئويلىنار» (زەبۇر 1:1، 2). دېمەك، مۇقەددەس كىتابنى ئوقۇش ئۈچۈن چوقۇم ۋاقىت چىقىرىشىمىز كېرەك. مۇقەددەس كىتابنى قايسى ۋاقىتتا ئوقۇساق ياخشى؟ بۇنىڭغا ھەربىر كىشىنىڭ بېرىدىغان جاۋابى پەرقلىق. بىراق، ئەڭ مۇھىمى ئوقۇش ئۈچۈن ھەر كۈنى ۋاقىت چىقىرىش كېرەك. ۋىكتور ئىسىملىك بۇرادەر مۇنداق دەيدۇ: «مەن تاڭ سەھەردە مۇقەددەس كىتاب ئوقۇشنى ياخشى كۆرىمەن. گەرچە ئەتىگەن تۇرۇشنى ياخشى كۆرمىسەممۇ، تاڭ سەھەردە دىققىتىمنى چاچىدىغان ئىشلار ئازراق، مېڭەم سەگەك، دىققىتىمنى مەركەزلەشتۈرۈش ئاسان». بەلكىم، سىزگىمۇ تاڭ سەھەردە ئوقۇش قولايلىقتۇ. ئۆزىڭىزدىن شۇنداق سوراپ كۆرۈڭ: «قايسى ۋاقىتتا مۇقەددەس كىتابنى ئوقۇسام، مەن ئۈچۈن ئەڭ ياخشى؟»
مۇقەددەس كىتابنى ئوقۇشنىڭ ئەڭ ياخشى ۋاقتى قاچان؟ قايسى ۋاقىتتا ئوقۇشقا ئادەتلەندىڭىز؟ (6-ئابزاسقا قاراڭ)
ئوقۇغانلىرىڭىز ئۈستىدە چوڭقۇر ئويلىنىڭ
7، 8. ئوقۇغانلىرىمىزنىڭ ئەمەلىي پايدىسىنى كۆرۈشكە نېمە توسالغۇ بولۇشى مۇمكىن؟ مىسال كەلتۈرۈڭ.
7 شۇنداق بىر ھەقىقەت باركى، دائىم كۆپ ئوقۇيمىز، لېكىن ئوقۇغانلىرىمىزنى سىڭدۈرۈپ ئۈلگۈرەلمەيمىز. سىزنىڭ بىر نەرسىنى ئوقۇپ، كۆپ ئۆتمەي ئۆزىڭىزنىڭ ئوقۇغانلىرىنى ئېسىڭىزگە ئالالمىغان چاغلىرىڭىز بولغانمۇ؟ كۆپىنچىمىز دائىم شۇنداق بولغان. ئەپسۇسكى، بەزىدە مۇقەددەس كىتابنى ئوقۇغاندا ھەم شۇنداق بولۇپ قالىدۇ. بەلكىم، بىز ھەر كۈنى بىرقانچە بابنى ئوقۇش ئۈچۈن پىلان تۈزۈپ قويغاندىمىز. شۇنداق پىلان تۈزۈش ياخشى، چۈنكى بىز مەقسەتلەرنى قويۇپ، ئۇلارغا يېتىش ئۈچۈن تىرىشىشىمىز كېرەك (1-كورىنت. 9:26). مۇقەددەس كىتابنى ئوقۇش ياخشى باشلىنىشتۇر. ئەمما، ئۇنىڭ ئەمەلىي پايدىسىنى كۆرۈشنى خالىساق، پەقەت ئۇنى ئوقۇپ قويۇش كۇپايە قىلمايدۇ.
8 بىر مىسال كەلتۈرەيلى. ئۆسۈملۈكلەرنىڭ ئۆسۈشى ئۈچۈن يامغۇر سۈيى كېرەك. بىراق، قىسقا ۋاقىت ئىچىدە شارقىراپ يامغۇر ياغسا، سۇ زىيادە كۆپ بولۇپ، تۇپراققا سېڭىپ كېتەلمەي، نەتىجىدە يامغۇر سۈيىنىڭ ئۆسۈملۈكلەرنىڭ ئۆسۈشى ئۈچۈن پايدىسى بولماي قالىدۇ. ئەكسىچە، سىم-سىم يامغۇر ياغسا، يامغۇر سۈيى يەرگە سىڭىپ، ئۆسۈملۈكلەرنىڭ ئۆسۈشىگە پايدىلىق بولىدۇ. خۇددى شۇنىڭدەك، بىزمۇ مۇقەددەس كىتابنى ئالدىراپ-سالدىراپ ئوقۇساق، ئوقۇغانلىرىمىزنى ئۈستىدە ئويلىنىشقا ۋاقىت بولمايدۇ ۋە ئېسىمىزدە قالمايدۇ، ھاياتىمىزدا ھەم ئەمەلىي قوللانمايمىز.—ياقۇپ 1:24.
سۇنىڭ تۇپراققا سىڭىپ كېتىشى ئۈچۈن ۋاقىت كېرەك. شۇنىڭغا ئوخشاش، مۇقەددەس كىتابنى ئوقۇپ، ئۇنىڭدا بېرىلگەن مەسلىھەتلەرنى ئەمەلىي قوللىنىش ئۈچۈن چوڭقۇر ئويلىنىشىمىزغا ھەم ۋاقىت كېرەك (8-ئابزاسقا قاراڭ)
9. مۇقەددەس كىتابنى ئالدىراپ-سالدىراپ ئوقۇشقا ئادەتلىنىپ قالغان بولسىڭىز، نېمە قىلىشىڭىز كېرەك؟
9 مۇقەددەس كىتابنى ئالدىراپ-سالدىراپ ئوقۇغان چاغلىرىڭىز بولغانمۇ؟ ئۇنداق بولسا، چوقۇم نېمە قىلىشىڭىز كېرەك؟ ئالدىرىماي ئوقۇشقا تىرىشىڭ. ئوقۇۋاتقاندا ياكى ئوقۇپ بولغاندىن كېيىن، ئوقۇغانلىرىڭىز توغرۇلۇق ئويلىنىشقا بىراز ۋاقىت چىقىرىڭ. بۇ ئانچە قىيىن ئەمەس. چوڭقۇر ئويلىنىش ئۈچۈن مۇقەددەس كىتابنى تەتقىق قىلىپ ئۆگىنىش ۋاقىتىنى ئۇزارتسىڭىز بولىدۇ. يۇقىرىدا تىلغا ئېلىنغان ۋىكتور مۇنداق دەيدۇ: «مەن بىر قېتىمدا بەك كۆپ ئوقۇمايمەن، بەزىدە ھەتتا بىرلا بابنى ئوقۇيمەن. مۇقەددەس كىتابنى ئەتىگەنلىكى ئوقۇغاچقا، كۈن بويى ئوقۇغانلىرىم توغرۇلۇق ئويلىنىپ يۈرىمەن». مەيلى قايسى ئۇسۇلنى تاللاڭ، ئەڭ مۇھىمى مۇقەددەس كىتابنى ئوقۇۋاتقاندا چوڭقۇر ئويلىنىش ۋە ئۆگەنگەنلىرىڭىزنىڭ پايدىسىنى كۆرۈشكە ياردەم بېرىدىغان تېزلىكتە ئوقۇڭ (زەبۇر 119:97؛ « ئويلىنىپ كۆرۈش ئۈچۈن سوئاللار» دېگەن رامكىغا قاراڭ).
10. ئوقۇغانلىرىڭىزنى قانداق ئەمەلىي قوللانسىڭىز بولىدۇ، مىسال كەلتۈرۈپ چۈشەندۈرۈڭ. (1-سالونىكالىقلار 5:17، 18)
10 مۇقەددەس كىتابنى قاچان تەتقىق قىلىپ ئوقۇڭ ياكى قانچە ئۇزۇن ۋاقىت ئوقۇڭ، ئەڭ مۇھىمى، ئۆگەنگەنلىرىڭىزنى ھاياتىڭىزدا ئەمەلىي قوللىنىش ئۈچۈن نېمە قىلالايدىغانلىقىڭىز ھەققىدە ئويلىنىڭ. مۇقەددەس كىتابتىن مەلۇم بىر ئۈزۈندىنى ئوقۇغاندىن كېيىن، ئۆزىڭىزدىن شۇنداق سوراڭ: «بۇ مەلۇماتنى ھازىر ياكى كېلەچەكتە قانداق قوللانسام بولىدۇ؟». مەسىلەن، سىز 1-سالونىكالىقلار 5:17، 18-نى (ئوقۇڭ) ئوقۇدىڭىز دەيلى. بۇ ئىككى ئايەتنى ئوقۇغاندىن كېيىن، توختاپ ئۆزىڭىزنىڭ قانچە ئۇزۇن ۋاقىتتا بىر دۇئا قىلىدىغانلىقىڭىز ۋە دۇئالىرىڭىزنىڭ چىن يۈرەكتىن چىقىدىغان-چىقمايدىغانلىقىنى ئويلاپ كۆرۈڭ. ئۇنىڭدىن باشقا، نېمىلەر ئۈچۈن مىننەتدار ئىكەنلىكىڭىز توغرۇلۇق ئويلاپ باقسىڭىز بولىدۇ. ئاندىن ئېنىق ئۈچ نەرسە ئۈچۈن يەھۋاغا رەھمەت ئېيتىشنى قارار قىلىڭ. ھەتتا بىرقانچە مىنۇت بولسىمۇ، دىققىتىڭىزنى چوڭقۇر ئويلىنىشقا چىقارسىڭىز، خۇدا سۆزىنى پەقەت ئاڭلاپ قويغۇچى ئەمەس، بەلكى ئەمەلىي ئىجرا قىلغۇچى بولالايسىز. ئويلاپ كۆرۈڭ، ھەر كۈنى مۇقەددەس كىتابنى ئوقۇغاندا شۇنداق قىلسىڭىز، خۇدانىڭ سۆزىنى ئەمەلىي ئىجرا قىلغۇچى بولۇشتا داۋاملىق ئالغا ئىلگىرىلەيسىز. لېكىن، ئۆزىڭىزنى تېخىمۇ كۆپ تەرەپلەردىن ئۆزگەرتىشكە توغرا كېلىدىغانلىقىنى كۆرۈپ يەتسىڭىزچۇ؟ ئۇنداقتا، نېمە قىلسىڭىز كېرەك؟
ئەمەلىيەتتە ئۇيغۇن مەقسەتلەرنى قويۇڭ
11. نېمە ئۈچۈن بەزىدە روھىڭىز چۈشۈپ كېتىشى مۇمكىن؟ مىسال كەلتۈرۈڭ
11 مۇقەددەس كىتابنى ئوقۇپ، ئۆزىڭىزنى ئۆزگەرتىشكە تېگىشىلىك نۇرغۇن تەرەپلەرنى بايقىغىنىڭىزدا، روھىڭىز چۈشۈپ كېتىشى مۇمكىن. نېمە ئۈچۈن؟ مۇنداق بىر مەنزىرىنى كۆز ئالدىڭىزغا كەلتۈرۈڭ، بۈگۈن مۇقەددەس كىتابنى ئوقۇغاندا، ئىنسانلارغا پەرقلىق مۇئامىلە قىلماسلىق كېرەكلىكىنى ئوقۇدىڭىز دەيلى (ياقۇپ 2:1–8). شۇ چاغدا، ئۆزىڭىزنى بۇ جەھەتتە ئۆزگەرتىش كېرەكلىكىنى كۆرۈپ يېتىپ، شۇنداق قىلىشقا قەتئىي بەل باغلىدىڭىز، بۇ ئىنتايىن ياخشى قارار! ئەتىسى تىلنى تىزگىنلەشنىڭ مۇھىملىقى توغرۇلۇق ئوقۇيسىز (ياقۇپ 3:1–12). سىز بەزىدە ئويلانماي سۆزلەپ قويىدىغانلىقىڭىزنى چۈشىنىپ، ئەمدى باشقىلارنى ئىلھاملاندۇرىدىغان گەپ-سۆزلەرنى قىلىشقا بەل باغلايسىز. ئۆگۈنلىكى بۇ دۇنيانى دوست تۇتماسلىق توغرۇلۇق ئوقۇيسىز (ياقۇپ 4:4–12). شۇنىڭ بىلەن، نېمىنى ئوقۇش، نېمىنى كۆرۈش ۋە ئاڭلاشقا دىققەت قىلىشىڭىزنىڭ زۆرۈرلىكىنى كۆرۈپ يېتىسىز. تۆتىنچى كۈنىگە كەلگەندە، بەلكىم ئۆزىڭىزنى نۇرغۇن تەرەپلەردىن ئۆزگەرتىشىڭىز كېرەكلىكىنى كۆرۈپ، ئۆزىڭىزنى ئۆزگەرتىشنى قىيىن ھېس قىلىپ، روھىڭىز چۈشۈپ كېتىدۇ.
12. مۇقەددەس كىتابنى ئوقۇغاندا، بەزى ئۆزگىرىشلەرنى قىلىشىڭىز كېرەكلىكىنى كۆرۈپ يەتسىڭىز، نېمە ئۈچۈن كۆڭلۈڭىز يېرىم بولۇپ، روھىڭىز چۈشۈپ كەتمەسلىكى كېرەك؟ (ئىزاھاتقا قاراڭ).
12 ئۆزگەرتىشكە تېگىشلىك نۇرغۇن تەرەپلىرىڭىز بارلىقىنى ئىكەنلىكىنى كۆرۈپ يەتسىڭىز، كۆڭلۈڭىز يېرىم بولۇپ، روھىڭىز چۈشمىسۇن. ئەكسىنچە، شۇنى كۆرۈپ يېتەلىگىنىڭىز، كەمتەر ۋە سەمىمىي ئادەم ئىكەنلىكىڭىزنى كۆرسىتىدۇ. كەمتەر ۋە ئۆز-ئۆزىگە سەمىمىي بولغان كىشىلەر مۇقەددەس كىتابنى ئۆزىنى قايسى تەرەپتىن ئۆزگەرتىشى كېرەكلىكىنى كۆرۈپ يېتىش ئۈچۈن ئوقۇيدۇ a. يەنە شۇ ئېسىڭىزدە بولسۇنكى، «يېڭى تەبىئەتنى» كىيىش ئۈچۈن ۋاقىت ۋە كۈچ چىقىرىشىمىز لازىم (كولوسى. 3:10 سېلىشتۇرۇڭ). ئۇنداقتا، خۇدانىڭ سۆزىنى ئەمەلىي ئىجرا قىلغۇچى بولۇشىڭىزغا نېمە ياردەم بېرەلەيدۇ؟
13. ئەمەلىيەتكە ئۇيغۇن مەقسەتلەرنى قويۇش ئۈچۈن نېمە قىلسىڭىز بولىدۇ؟ (رەسىمگە ھەم قاراڭ).
13 ئوقۇغانلىرىڭىزنىڭ ھاياتىڭىزدا قوللىنىش ئۈچۈن ئەمەلىيەتكە ئۇيغۇن مەقسەتلەرنى قويۇڭ (پەند. نە 11:2). مۇنداق سىناپ كۆرۈڭ: ئاۋۋال قايسى تەرەپلەردە ئۆزگەرتىشلەرنى قىلىشنى خالايدىغانلىقىڭىزنى تىزىملاپ چىقىڭ. ئاندىن بىر ياكى ئىككىسىنى ئەمەلىي قوللىنىشقا تىرىشىڭ. قالغانلىرى بولسا كېيىنگە قالدۇرۇپ قويۇڭ. ئۇنداقتا، قايسىسىنى ئاۋۋال باشلاشنى ئويلاۋاتىسىز؟
مۇقەددەس كىتابتىن ئوقۇغانلىرىڭىزنىڭ ھەممىسىنى بىرلا قېتىمدا ئەمەس، بەلكى بىر ياكى ئىككىسىنى تاللاپ، ئەمەلىي قوللىنىش ئۈچۈن پىلان تۈزۈپ قويۇڭ (13، 14-ئابزاسلارغا قاراڭ)
14. قانداق مەقسەتلەرگە يېتىشنى ئاۋۋال باشلىسىڭىز بولىدۇ؟
14 ئاۋۋال، سىزگە قىيىن كەلمەيدىغان ياكى ئەڭ زۆرۈر دەپ قارىغان بىرىدىن باشلاڭ. ئېنىق بىر پىلان ياكى مەقسەتنى يېزىپ قويغاندىن كېيىن، تەشكىلاتىمىزنىڭ نەشىرى ماتېرىياللىرى ئاساسىدا ئىزدىنىپ كۆرۈڭ. مەسىلەن، «كۈزىتىش مۇنارى ماتېرىياللار كۆرسەتكۈچى» ياكى «يەھۋا گۇۋاھچىلىرى نەشىرى ماتېرىياللىرىنىڭ ئىزدىنىش كۆرسەتكۈچىسى» قاتارلىق ئىزدىنىش قوراللارنى ئىشلەتسىڭىز بولىدۇ. كۆزلىگەن مەقسىتىڭىزگە يېتىش ئۈچۈن، يەھۋاغا دۇئا قىلىپ، ئۇنىڭدىن ئارزۇ-ئىستىكىڭىزنى كۈچەيتىشنى ۋە كۈچ-قۇۋۋەت بېرىشنى ئۆتۈنۈڭ (فىلىپى. 2:13). ئاندىن ئۆگەنگەنلىرىڭىزنى ئەمەلىيەتتە قوللىنىشقا تىرىشىڭ. بىر مەقسەتكە يەتكەندە، باشقا مەقسەتلىرىڭىزگە يېتىش ئارزۇ-ئىستىڭىز ھەم كۈچىيىدۇ. بۇنىڭدىن باشقا، مەلۇم بىر مىجەز-خۇلقىڭىزنى ئۆزگەرتسىڭىز، ھاياتىڭىزدا باشقا تەرەپلەردە ئۆزگىرىشلەرنى قىلىش ئاسانراق بولىدۇ.
خۇدانىڭ سۆزىنىڭ سىزگە تەسىر قىلىشغا يول بېرىڭ
15. يەھۋانىڭ خىزمەتچىلىرى بىلەن مۇقەددەس كىتابنى ئوقۇۋاتقان باشقا كىشىلەر ئارىسىدا قانداق پەرق بار؟ (1-سالونىكالىقلار 2:13)
15 بەزى ئادەملەر مۇقەددەس كىتابنى تولۇق ئوقۇپ چىققانلىقىنى ئېيتىدۇ. لېكىن، ئۇلار راستىنلا مۇقەددەس كىتابتىكى ھەقىقەتلەرگە ئىشىنەمدۇ؟ مۇقەددەس كىتابتىن ئوقۇغانلىرىنى، ھاياتىدا ئەمەلىي ئىشلىتىپ، زۆرۈر ئۆزگەرتىشلەرنى قىلىشقا تىرىشامدۇ؟ بەك ئەپسۇس، كۆپىنچىلىرى ئۇنداق قىلمايدۇ. ئەمما، يەھۋا خۇدانىڭ خەلقى ئۇلاردىن پەرقلىق! بىرىنچى ئەسىردىكى ئەيسانىڭ ئەگەشكۈچىلىرىگە ئوخشاش بىزمۇ مۇقەددەس كىتابنى «خۇدانىڭ سۆزى» دەپ قوبۇل قىلىمىز. ئۇنىڭدىن باشقا، خۇدانىڭ سۆزىدىكى مەسلىھەتلەرنى ئەمەلىي تۇرمۇشىمىزدا قوللىنىشقا قولىمىزدىن كېلىشىچە تىرىشىمىز.—1-سالونىكالىقلار 2:13-نى ئوقۇڭ.
16. خۇدانىڭ سۆزىنى ئەمەلىي ئىجرا قىلغۇچى بولۇشىمىزغا نېمە ياردەم بېرەلەيدۇ؟
16 خۇدا سۆزنى ئوقۇپ، ئۇنىڭدا يېزىلغانلارنى ئەمەلىي ئىجرا قىلىش دائىم ئاسان بولمايدۇ. بەزىدە ئۇنى ئوقۇشقا ۋاقىت تاپالماي قالىمىز، بەزىدە ئالدىراپ-سالدىراپ ئوقۇپ، چوڭقۇر ئويلىنىشقا ۋاقىت چىقارماي قالىمىز. يەنە كۆپ تەرەپلەردىن ئۆزگىرىش كېرەكلىكىنى ئويلىغاندا، روھىمىز چۈشۈپ كېتىشى مۇمكىن. قانداق قىيىنچىلىقلارغا دۇچ كەلمەيلى، يەھۋا خۇدانىڭ ياردىمى بىلەن چوقۇم ھەممىسىنى يېڭەلەيمىز. شۇڭا، خۇدانىڭ ياردىمىنى قوبۇل قىلىپ، ئۇنتۇغاق ئاڭلاپ قويغۇچى ئەمەس، سۆزنى ئەمەلىي ئىجرا قىلغۇچى بولايلى. بىز مۇنداق قىلىش ئۈچۈن تىرىشساق، چوقۇم خۇدانىڭ سۆزىنى قانچە كۆپ ئوقۇغانسېرى، ئۆزىمىزنى شۇنچە خۇشال-خۇرام ۋە كۆڭلىمىز ھەقىقىي قانائەت تاپقاندەك ھېس قىلىمىز.— ياقۇپ 1:25.
37-ناخشا مۇقەددەس كىتاب خۇدانىڭ ئىلھامى بىلەن يېزىلغان
a jw.org تور بېكىتىدە «تەڭتۇشلىرىڭىزنىڭ ئوي-پىكىرى — مۇقەددەس كىتابنى ئوقۇش» دېگەن فىلىمنى كۆرۈڭ.
