3-تەتقىق ماقالىسى
18-ناخشا خۇدانىڭ چىن مۇھەببىتى
باشقا ئېغىر كۈن كەلگەندە، يەھۋا سىزگە ياردەم بېرىدۇ
«[يەھۋا] سىلەرنى تىنچ-ئامان كۈنلەرگە ئېرىشتۈرىدۇ». —يەشايا 33:6.
مەركىزى ئىدىيە
بېشىمىزغا كۈن چۈشكەندە يەھۋانىڭ ياردىمىگە ئېرىشىش ئۈچۈن نېمە قىلالايمىز؟
1، 2. يەھۋانىڭ سادىق خىزمەتچىلىرى قانداق قىيىنچىلىقلارغا دۇچ كېلىشى مۇمكىن؟
كۈتمىگەن ئىش-ۋەقەلەر بىر كېچىدە ھاياتىمىزنى پۈتۈنلەي ئۆزگەرتىشى مۇمكىن. مەسىلەن، لۇئىس a ئىسىملىك بۇرادەر ئىنتايىن ئاز ئۇچرايدىغان بىر خىل راك كېسىلى بىلەن ئاغرىغانىدى. دوختۇر ئۇنىڭغا بىرنەچچە ئايدىن كېيىن ئۆلۈپ كېتىدىغانلىقىنى ئېيتقان. مونىكا ۋە يولدىشى قىزغىن روھىي ئىش-پائالىيەتلەرگە قاتناشقان. بىراق، بىر كۈنى مونىكا ئاقساقال بولغان ھەمراھىنىڭ ئۇزۇن يىللاردىن بۇيان يوشۇرۇن گۇناھ قىلىپ كېلىۋاتقانلىقىنى بايقاپ قالغان. تۇرمۇشقا چىقمىغان ئولىۋىيا ئىسىملىك قېرىنداش قاتتىق بوران-چاپقۇن يېقىنلاپ كەلگەچ، ئۆيىنى تاشلاپ، بىخەتەر جايغا قېچىشقا مەجبۇر بولغان. ئۇ قايتىپ كەلگەندە، ئۆيى پۈتۈنلەي ۋەيران بولغانىدى. بۇ ئېتىقادداشلارنىڭ ھاياتى بىر دەقىقىدە ئاستىن-ئۈستۈن بولۇپ كەتكەن. سىزنىڭ بېشىڭىزغا شۇنىڭدەك ئىشلار كەلگەنمۇ؟ سىزمۇ ھاياتىڭىزنى ئاستىن-ئۈستۈن قىلىۋېتىدىغان ئىش-ۋەقەگە يولۇققانمۇ؟
2 يەھۋانىڭ سادىق خىزمەتچىلىرىمۇ ھەممە ئادەملەرگە ئوخشاش، ھاياتتا تۈرلۈك قىيىنچىلىقلارغا دۇچ كېلىدۇ. بۇنىڭدىن باشقا، بىز خۇدانىڭ خەلقى سۈپىتىدە، دۈشمەنلەرنىڭ قارشىلىقى ۋە زىيانكەشلىكىگە ئۇچرايمىز. گەرچە ياراتقۇچىمىز يەھۋا بىزنى شۇ قىيىنچىلىقلاردىن ھىمايە قىلمىسىمۇ، بىزگە ياردەم بېرىدىغانلىقىنى ۋەدە قىلغان (يەشايا 41:10). ئۇنىڭ ياردىمى بىلەن، مەيلى قانداق قىيىن سىناقلارغا دۇچ كەلمەيلى، خۇشاللىقىمىزنى يىتتۈرۈپ قويماي، توغرا قارارلارنى چىقىرالايمىز ۋە يەھۋاغا سادىق بولۇپ قالالايمىز. بۇ ماقالىدە، بېشىمىزغا ئېغىر كۈنلەر كەلگەندە، يەھۋا بىزگە قايسى تۆت يول بىلەن ياردەم بېرىدىغانلىقىنى كۆرىمىز. يەنە يەھۋانىڭ ياردىمىگە ئېرىشىش ئۈچۈن نېمىلەرنى قىلىشىمىز لازىملىقىنى كۆرىمىز.
يەھۋا سىزگە خاتىرجەملىك بېرىدۇ
3. بېشىمىزغا كۈن چۈشكەندە، بىز ئۈچۈن نېمە قىلىش قىيىن بولۇشى مۇمكىن؟
3 قىيىنچىلىق. بېشىمىزغا كۈن چۈشكەندە، توغرا ئوي-پىكىر يۈرگۈزۈش ۋە قارار چىقىرىش قىيىن بولۇشى مۇمكىن. چۈنكى، شۇنداق ۋاقىتلاردا كۆزۈمىزدىن ياش قۇرىماي، ئىچىمىز دەرد-ئەلەمگە تولىدۇ. كۆپ غەم-ئەندىشىلەرنى قىلىپ، ئېغىر يۈكنى يۈدۈپ يۈرگەندەك ھېس قىلىمىز. ماقالىنىڭ بېشىدا تىلغا ئېلىنغان ئىككى قېرىنداش قانداق ھېس-تۇيغۇدا بولغانلىقىنى ئېيتىپ بەرگەن. ئولىۋىيا مۇنداق دەيدۇ: «بوران-چاپقۇن ئۆيۈمنى ۋەيران قىلغاندا، ئۆزۈمنى يىتتۈرۈپ قويدۇم، يەلكەمگە تاغنى ئارتىپ قويغاندەك ھېس قىلدىم». مونىكا ھەمراھىنىڭ ۋاپاسىزلىقى توغرۇلۇق مۇنداق دەيدۇ: «شۇنچىلىك ئۈمىدسىزلەندىمكى، ھېس-تۇيغۇلىرىمنى سۆز بىلەن ئىپادىلەش مۇمكىن ئەمەس. بۇ يۈرىكىمنى پىچاق تىققاندەك زېدە قىلدى. ئەمدى قانداق ھايات كەچۈرىمەن دەپ ئويلىدىم. بۇنداق كۈننىڭ بېشىمغا كەلگىنىگە ئىشىنەلمىدىم». شۇنداق قاتتىق ئازاب چەككىنىمىزدە، يەھۋا بىزگە قانداق ياردەم بېرىدۇ؟
4. فىلىپىلىكلەر 4:6، 7-ئايەتلەرگە ئاساسلانغاندا، يەھۋا بىزگە نېمىنى ۋەدە قىلىدۇ؟
4 يەھۋا بىزگە قانداق ياردەم بېرىدۇ؟ ئۇ كۆڭلىمىزنى تىنچ-خاتىرجەم قىلىدىغانلىقىنى ۋەدە قىلغان. مۇقەددەس كىتابتا ئۇنى «خۇدانىڭ تىنچلىقى» دەپ ئاتىغان (فىلىپىلىكلەر 4:6، 7-نى ئوقۇڭ). يەھۋا بىلەن يېقىن دوست مۇناسىۋەتتە بولغاچقا، بىز شۇنداق تىنچلىقنى ھېس قىلىمىز. خۇدانىڭ تىنچلىقى بولسا «ھەرقانداق ئوي-پىكىردىن ئۈستۈن»، يەنى بىز تەسەۋۋۇر قىلالىغاندىنمۇ ئېشىپ چۈشىدىغان تىنچ-خاتىرجەملىكتۇر. يەھۋاغا چىن قەلبىڭىزدىن دۇئا قىلغاندىن كېيىن، ئۆزىڭىزنى ئىنتايىن تىنچ-خاتىرجەم ھېس قىلغان چاغلىرىڭىز بولغانمۇ؟ ئاشۇ ھېس-تۇيغۇ دەل «خۇدانىڭ تىنچلىقى».
5. تەڭرىنىڭ تېچلىقى يۈرىكىمىز ۋە ئەقلىمىزنى قانداق ساقلايدۇ؟
5 بۇ ئايەتلەردە، خۇدانىڭ تىنچلىقى «سىلەرنىڭ قەلبىڭلارنى ۋە ئۆي-پىكىرىڭلارنى … قوغدايدۇ» دەپ يېزىلغان. «قوغدايدۇ» دېگەن بۇ سۆز، گرېك تىلىدىكى ئەسلى تېكىستتا شەھەرنى دۈشمەنلەرنىڭ ھۇجۇملىرىدىن قوغداش ئۈچۈن قاراۋۇللۇق قىلىدىغان ئەسكەرلەرنى تەسۋىرلەشتە ئىشلىتىلگەن. خەلق شەھەر دەرۋازىلىرىدا قاراۋۇللارنىڭ تۇرىدىغانلىقىنى بىلگەچكە، ھېچنېمىدىن غەم قىلماي، تىنچ-خاتىرجەم ئۇخلىغان ئىدى. شۇنىڭغا ئوخشاش، خۇدانىڭ تىنچلىقى قەلبىمىزنى ۋە ئوي-پىكىرىمىزنى قوغدىغاندا، بىز تىنچ-خاتىرجەملىكنى ھېس قىلىپ، ئۆزىمىزنى بىخەتەر سېزىمىز (زەبۇر 4:8). گەرچە قىيىنچىلىقلىرىمىز دەرھال ھەل بولمىسىمۇ، بىز ھانناغا ئوخشاش ئۆزىمىزنى تىنچ-خاتىرجەم ھېس قىلالايمىز (1-سام. 1:16–18). كۆڭلىمىز خاتىرجەم بولسا، ئويلىنىپ ياخشى قارارلارنى چىقىرىش ئاسانراق بولىدۇ.
«خۇدانىڭ تىنچلىقى» قەلبىمىزنى ۋە ئوي-پىكىرلىرىمىزنى قوغداۋاتقانلىقىنى ھېس قىلغۇچە قايتا-قايتا دۇئا قىلىڭ (4–6-ئابزاسلارغا قاراڭ)
6. خۇدانىڭ تىنچلىقىنى ھېس قىلىش ئۈچۈن نېمە قىلالايمىز؟ (رەسىمگە ھەم قاراڭ)
6 بىز نېمە قىلىشىمىز كېرەك؟ ئۆزىڭىزنى ئاۋارىچىلىققا ئۇچرىغاندەك ھېس قىلغاندا، قاراۋۇلنى چاقىرىڭ، يەنى خۇدادىن ئۆزىڭىزنى قوغداشنى ئۆتۈنۈڭ. قايتا-قايتا تاكى خۇدانىڭ تىنچلىقىنى ھېس قىلغۇچە دۇئا قىلىڭ (لۇقا 11:9؛ 1-سالونىكا. 5:17). ماقالىنىڭ بېشىدا تىلغا ئېلىنغان لۇئىس پەقەت بىرنەچچە ئاي ھايات كەچۈرەلەيدىغانلىقىنى بىلگەندە، ئۇ ئايالى ئاننا بىلەن ۋەزىيەتتە نېمە قىلغان؟ ئۇ مۇنداق دەيدۇ: «بۇنداق قىيىن ۋەزىيەتتە، داۋالىنىش ۋە باشقا مەسىلىلەردە قارارلارنى چىقىرىش ئىنتايىن قىيىن ئىكەن. بىراق، پەقەت دۇئانىڭ ياردىمى بىلەن كۆڭلىمىز ئارام تاپتى». لۇئىس ۋە ئايالى ئاننا، قايتا-قايتا قاتتىق دۇئا قىلىپ، يەھۋا خۇدادىن تىنچ-خاتىرجەملىك ۋە توغرا قارارلارنى چىقىرىش ئۈچۈن دانالىق سورىغان. شۇنداق قىلىپ، ئۇلار يەھۋانىڭ ياردىمىگە ئېرىشكەن. ئەگەر سىزمۇ قىيىن كۈنگە قالسىڭىز، قايتا-قايتا دۇئا قىلىڭ. شۇ چاغدىلا يەھۋانىڭ تىنچلىقى قەلبىڭىزنى ۋە ئوي-پىكىرىڭىزنى قوغدايدۇ. —رىملىقلار 12:12.
يەھۋا تەڭپۇڭلۇقنى ساقلىشىڭىزغا ياردەم بېرىدۇ
7. بىز ئېغىر سىناققا دۇچ كەلگەندە، نېمىلەرنى ھېس قىلىشىمىز مۇمكىن؟
7 قىيىنچىلىق. بېشىمىزغا كۈن چۈشكەندە، ھېس-تۇيغۇلىرىمىز، ئوي-پىكىرىمىز ۋە قايتۇرىدىغان ئىنكاسىمىز ئادەتتىكى چاغلاردىن كۆپ پەرقلىق بولۇشى مۇمكىن. خۇددى بوران-چاپقۇندا قالغان كېمە ئارقا-ئارقىدىن كېلىۋاتقان كۈچلۈك دېڭىز دولقۇنىدا ھەر تەرەپكە چايقالغاندەك، بىزنىڭ ھېس-تۇيغۇلىرىمىزمۇ شۇنداق بولىدۇ. لۇئىس ۋاپات بولغاندىن كېيىن، ئايالى ئاننانىڭ ھېس-تۇيغۇلىرىدا ھەم شۇنداق داۋالغۇشلار بولغانىدى. ئۇ مۇنداق دەيدۇ: «بەزىدە كۆڭلۈم قاتتىق يېرىم بولغاندا، ئۆزۈم ئىنتايىن بىچارە سېزەتتىم، بەزىدە ئۇنىڭ ئۆلۈپ كەتكىنىگە قاتتىق ئاچچىقىم كېلەتتى». ئاننا ئۆزىنى بەك يالغۇز ھېس قىلغان ۋە بۇرۇن يولدىشى قارارلارنى قىلىدىغان ئىشلار ئەمدى ئۆزىگە قالغاچ، كۆڭلى پاراكەندە بولغان. شۇنداق ھېس-تۇيغۇلىرىمىزدا ئېگىز-پەس داۋالغۇشلار بولغاندا، يەھۋا بىزگە قانداق ياردەم بېرىدۇ؟
8. يەشايا 33:6-ئايەتتە يېزىلغاندەك، يەھۋا بىزگە قانداق كاپالەت بېرىدۇ؟
8 يەھۋا بىزگە قانداق ياردەم بېرىدۇ؟ يەھۋا بىزنى تەڭپۇڭلۇقنى ساقلىشىمىزغا ياردەم بېرىدىغانلىقىغا ئىشەندۈرىدۇ (يەشايا 33:6-نى ئوقۇڭ). كېمە دېڭىزدا بوران-چاپقۇنغا ئۇچرىغاندا، ھەر تەرەپكە قاتتىق چايقىلىشقا باشلايدۇ. شۇنداق ۋەزىيەتكە دۇچ كەلگەندە، كېمە ئۆرۈلۈپ كەتمەسلىكى ئۈچۈن ئادەتتە كېمىنىڭ ئىككى تەرىپىنىڭ سۇغا چۆكۈپ تۇرغان قىسىمىغا ئالاھىدە پالاقلار ئورنىتىلغان بولىدۇ. مۇشۇ پالاقلارنىڭ ياردىمى بىلەن كېمە بەك قاتتىق چايقالمايدۇ ۋە يولۇچىلار تېخىمۇ بىخەتەر ۋە تىنچ-ئامان سەپەر قىلالايدۇ. ئەمما، كېمىنىڭ چايقىلىشىنى ئازايتىدىغان پالاقلار، پەقەت كېمە ئالدىغا ئىلگىرىلەپ ماڭغاندىلا، ئەڭ ياخشى ياردەم بېرەلەيدۇ. دەل شۇنىڭدەك، باشقا ئېغىر كۈنلەر كەلگەن چاغلاردا، يەھۋاغا سادىق بىلەن خىزمەت قىلىشنى داۋاملاشتۇرساق، ئۇ بىزنىڭ تەڭپۇڭلۇقنى ساقلىشىمىزغا ياردەم بېرىدۇ.
ئىزدىنىش قوراللىرىدىن پايدىلىنىپ، ھېس-تۇيغىڭىزنى تەڭپۇڭلاشتۇرالايسىز (8، 9-ئابزاسلارغا قاراڭ)
9. تەتقىق قىلىش قوراللىرىمىز تەڭپۇڭلۇقنى ساقلىشىمىزغا قانداق ياردەم بېرىدۇ؟ (رەسىمگە ھەم قاراڭ)
9 نېمە قىلىشىمىز كېرەك؟ ھېس-تۇيغۇلىرىڭىزدا ئېگىز-پەس داۋالغۇشلار بولغاندا، داۋاملىق روھىي ئىش-پائالىيەتلەر بىلەن مەشغۇل بولۇش ئۈچۈن كۈچ چىقىرىڭ. بەلكىم، ئىلگىرىكىدەك كۆپرەك خىزمەت قىلالماي قېلىۋاتقان بولۇشىڭىز مۇمكىن. بىراق، شۇنى ئېسىڭىزدە تۇتۇڭكى: يەھۋا سىزنىڭ قولۇڭىزدىن كەلمەيدىغان ئىشنى قىلىشىڭىزنى كۈتمەيدۇ (لۇقا 21:1–4-نى سېلىشتۇرۇڭ). ئۇنىڭدىن باشقا، شەخسىي تەتقىق ئۆگىنىشى ئۆتكۈزۈپ، چوڭقۇر ئويلىنىشقا ۋاقىت چىقىرىڭ. يەھۋا خۇدا ئۆز تەشكىلاتى ئارقىلىق تەڭپۇڭلۇقنى ساقلىشىڭىزغا ياردەم بېرىدىغان ھەر تۈرلۈك ماقالىلەر ۋە فىلىملەرنى تەمىنلەپ بەرگەن. «JW Library» پروگراممىسىدىن، «كۈزىتىش مۇنارى ماتېرىياللار كۆرسەتكۈچى» ۋە «يەھۋا گۇۋاھچىلىرىنىڭ يول كۆرسەتكۈچىسى»دىن ئۆزىڭىزگە كېرەك مەلۇماتنى تاپالايسىز. يۇقىرىدا تىلغا ئېلىنغان قېرىندىشىمىز مونىكا، ئازابلىق ھېس-تۇيغۇلىرى بوران-چاپقۇنغا ئوخشاش كۈچىيىشكە باشلىغاندا، دەرھال مۇشۇ ئىزدىنىش قوراللىرىدىن پايدىلانغان. مەسىلەن، ئۇ دەسلەپ «ئاچچىقلىنىش»، كېيىن «ئاسىيلىق» ياكى «ۋاپادارلىق» دېگەنلەرنى يېزىپ، شۇ توغرۇلۇق ئىزدەنگەن. كېيىن، شۇ تاپقان مەلۇماتلارنى جېنى ئارام تاپقۇچە داۋاملىق ئوقۇغان. ئۇ مۇنداق دەيدۇ: «ئوقۇشقا باشلىغاندا، كۆڭلۈم قاتتىق بىئارام بولۇپ، غەم-تەشۋىش قىلاتتىم. بىراق، كۆڭۈل قويۇپ ئوقۇغاندىن كېيىن، يەھۋا مېنى باغرىغا باسقانلىقىنى ھېس قىلدىم. يەھۋا مېنىڭ بارچە ھېس-تۇيغۇلىرىمنى چۈشۈنۈپلا قالماي، ماڭا ياردەم قولىنى سۇنۇپ كەلگەنلىكىنى ھەم كۆرۈپ يەتتىم». يەھۋا مۇشۇ ئۇسۇلدا، ئۆزىڭىزنى تىنچ-خاتىرجەم ھېس قىلغۇچە، تەڭپۇڭلۇقنى ساقلىشىڭىزغا ياردەم بېرەلەيدۇ. —زەبۇر 119:143، 144.
يەھۋا سىزنى قوللاپ-قۇۋۋەتلەيدۇ
10. قەلبىمىز ئېغىر زەربىگە ئۇچرىغاندىن كېيىن، ئۆزىمىزنى قانداق ھېس قىلىشىمىز مۇمكىن؟
10 قىيىنچىلىق. قەلبىمىز قاتتىق زەربىگە ئۇچرىغاندىن كېيىن، ئۇزۇنغىچە بىر مەزگىل جىسمانىي ۋە ھېسسىي جەھەتتىن ئۆزىمىزنى ئاجىز ھېس قىلىشىمىز مۇمكىن. بەلكىم، ئۆزىمىزنى خۇددى ئىلگىرى تېز يۈگۈرگەن، ھازىر يارىلانغاچ، ئاقساپ مېڭىۋاتقان تەنھەرىكەتچىدەك ھېس قىلىمىز. ئۆز ۋاقتىدا بىزمۇ ئاسانلا قىلىپ يۈرگەن ئىشلار ھازىر ئېغىر يۈكتەك بىلىنىشى ياكى خۇشاللىق بىلەن قىزىقىپ قىلغان ئىشلارنى ھازىر قىلىشقا قىلچىمۇ ئارزۇ-ئىستىكىمىز قالمىغان بولۇشى مۇمكىن. ئىلياس پەيغەمبەرگە ئوخشاش، بەلكىم بىز ئورنىمىزدىن تۇرماي، پەقەت ئۇخلاپ يېتىشنى خالايمىز (1-پادىشاھ. 19:5–7). شۇنداق ئۆزىمىزنى ئاجىز ھېس قىلغاندا، يەھۋا بىزگە قانداق ياردەم بېرىدۇ؟
11. يەھۋا بىزگە يەنە قانداق ياردەم بېرىدۇ؟ (زەبۇر 94:18).
11 يەھۋا بىزگە قانداق ياردەم بېرىدۇ؟ ئۇ بىزنى قوللاپ-قۇۋۋەتلەيدىغانلىقىنى ۋەدە قىلىدۇ (زەبۇر 94:18-نى ئوقۇڭ). يارىلانغان تەنھەرىكەتچى بىرىنىڭ ياردىمىگە مۇھتاج بولغاندەك، بىزمۇ داۋاملىق يەھۋا خۇداغا خىزمەت قىلىش ئۈچۈن، ياردەمگە مۇھتاج بولىمىز. شۇنداق پەيتلەردە، يەھۋا بىزگە مۇنداق كاپالەت بېرىدۇ: «مەن يەھۋا سېنىڭ خۇدايىڭ، ئوڭ قولۇڭدىن تۇتۇپ، ساڭا ئېيتىمەنكى: ‹قورقمىغىن، مەن ساڭا ياردەم بېرىمەن›» (يەشايا 41:13). داۋۇت پادىشاھ شۇنداق ياردەمگە ئېرىشكەن. ئۇنىڭ بېشىغا قىيىن كۈنلەر كەلگەندە، دۈشمەنلەر ھۇجۇم قىلغاندا، ئۇ يەھۋاغا: «ئوڭ قولۇڭ بىلەن مېنى قوللاپ-قۇۋۋەتلەيسەن»،— دېگەن (زەبۇر 18:35). ئۇنداقتا، يەھۋا بىزنى ھازىر قانداق قوللاپ-قۇۋۋەتلەيدۇ؟
ئائىلىڭىزدىكىلەر، دوستلىرىڭىز ۋە ئاقساقاللارنىڭ ياردىمىنى قوبۇل قىلىڭ (11–13-ئابزاسلارغا قاراڭ)
12. بىز ئۆزىمىزنى ئاجىز ھېس قىلغاندا يەھۋا خۇدا بىزگە كىم ئارقىلىق ياردەم بېرىدۇ؟
12 يەھۋا باشقىلارنى بىزگە ياردەم بېرىشكە دەۋەت قىلىش ئارقىلىق بىزنى قوللاپ-قۇۋۋەتلەيدۇ. بىر كۈنى داۋۇت قىيىن ئەھۋالغا چۈشۈپ، ئۆزىنى ئاجىز ھېس قىلغان. شۇ چاغدا، دوستى يوناتان داۋۇتنى يوقلاپ بېرىپ، ئۇنى قوللاپ-قۇۋۋەتلىگەن ۋە ئىلھام-مەدەت بېرىدىغان سۆزلەرنى قىلغان (1-سام. 23:16، 17). شۇنىڭغا ئوخشاش، يەھۋا ئىلياس پەيغەمبەرنى قوللاپ-قۇۋۋەتلەش ۋە ئەمەلىي ياردەم بېرىش ئۈچۈن ئېلىشانى ئەۋەتكەن (1-پادىشاھ. 19:16، 21؛ 2-پادىشاھ. 2:2). بۈگۈنكى كۈندە يەھۋا ئائىلىمىز، دوستلىرىمىز ۋە ئاقساقاللار ئارقىلىق بىزنى قوللاپ-قۇۋۋەتلەيدۇ. بىراق، قاتتىق ئازابلانغان چاغلىرىمىزدا، ھېچكىم بىلەن كۆرۈشنى خالىماي، يالغۇز قېلىشنى خالىشىمىز مۇمكىن. بۇنداق ھېس-تۇيغۇدا بولۇش تەبىئىي ئەھۋال. بىراق، شۇنداق ۋەزىيەتتە، يەھۋانىڭ قوللاپ-قۇۋۋەتلىشىگە ئېرىشىش ئۈچۈن نېمە قىلساق بولىدۇ؟
13. يەھۋانىڭ ياردىمىگە ئېرىشىش ئۈچۈن بىز نېمە قىلىشىمىز كېرەك؟ (رەسىمگە ھەم قاراڭ)
13 نېمە قىلىشىمىز كېرەك؟ قىيىن بولسىمۇ، باشقىلاردىن ئۆزىڭىزنى ئېلىپ قېچىش خاھىشىغا قارشى تۇرۇش ئۈچۈن تىرىشىڭ. چۈنكى، ئۇزۇن ۋاقىت يالغۇز قالساق ۋە ئۆزىمىزنى باشقىلاردىن ئېلىپ قاچساق، پەقەت ئۆزىمىزنى ۋە قىيىنچىلىقلىرىمىزنى ئويلاپ، نەتىجىدە توغرا قارار چىقىرالماي قالىمىز (پەند. نە 18:1). ئەلۋەتتە، بولۇپمۇ بېشىمىزغا ئېغىر كۈن چۈشكەندە، ئۆزىمىزنى بىر ئاز تىنچلاندۇرۇش ئۈچۈن يالغۇز قالىدىغان ۋاقىت كېرەك. بىراق، ئۇزۇنغىچە ئۆزىمىزنى باشقىلاردىن قاچۇرۇپ يۈرسەك، يەھۋانىڭ بىزگە بېرىۋاتقان ياردىمىنى رەت قىلىپ يۈرگەندەك بولۇپ قالىمىز. ئۇنداقتا، مەيلى قانداق قىيىنچىلىق بېشىڭىزغا كەلگەن بولسۇن، ئائىلىڭىز، دوستلىرىڭىز ۋە ئاقساقاللارنىڭ ياردىمىنى قوبۇل قىلىڭ. شۇنى ئۇنتۇماڭكى، يەھۋا دەل شۇلارنى ئىشلىتىپ، سىزنى قوللاپ-قۇۋۋەتلەۋاتىدۇ. —پەند. نە 17:17؛ يەشايا 32:1، 2.
يەھۋا خۇدا كۆڭلىڭىزنى ياسايدۇ
14. بىز قانداق قورقۇنچلۇق ۋەزىيەتلەرگە دۇچ كېلىشىمىز مۇمكىن؟
14 قىيىنچىلىق. بەزىدە بىزنى قورقۇنچ چىرمىۋالغاندەك ھېس-تۇيغۇدا بولۇشىمىز مۇمكىن. قەدىمقى زاماندا خۇدانىڭ بەزى سادىق خىزمەتچىلىرىمۇ دۈشمەنلەرنىڭ ھۇجۇمى ياكى باشقىلارنىڭ بېسىمى سەۋەبلىك، قاتتىق غەم-ئەندىشە قىلغانلىقى ۋە قورققانلىقىنى ئېيتقان (زەبۇر 18:4؛ 55:1، 5). بىزمۇ مەكتەپتە، ئىشتا، ئۆيۈمىزدە ياكى ھۆكۈمەتنىڭ قارشىلىقلىرى دۇچ كېلىشىمىز مۇمكىن. ياكى بولمىسا، داۋالاش خەتەرلىك بولىدىغان ۋەزىيەتكە دۇچ كېلىپ، ئۆلۈپ كېتىشتىن قورقۇشىمىز مۇمكىن. بۇنداق ۋەزىيەتلەردە، بەلكىم ئۆزىمىزنى ياردەمسىز قالغان بىچارە بالىدەك ھېس قىلىمىز. ئۇنداقتا، يەھۋا بۇنداق ۋەزىيەتلەردە بىزگە قانداق ياردەم بېرىدۇ؟
15. زەبۇر 94:19-ئايەت بىزنى نېمىگە ئىشەندۈرىدۇ؟
15 يەھۋا بىزگە قانداق ياردەم بېرىدۇ؟ يەھۋا بىزگە تەسەللى بېرىپ، كۆڭلىمىزنى ياسايدۇ (زەبۇر 94:19-نى ئوقۇڭ). زەبۇرنىڭ بۇ بابىنى ئوقۇغاندا، كۆز ئالدىمىزغا گۈلدۈرماما ئاۋازىدىن قورقۇپ، ئۇخلىيالمىغان كىچىك قىزچاق كۆز ئالدىمىزغا كېلىشى مۇمكىن. دادىسى قىزىنىڭ قېشىغا كېرىپ، ئۇنى قۇچاقلاپ، ئۇخلاپ قالغىچە قېشىدا ئولتۇرىدۇ. گۈلدۈرماما تېخى توختىمىغان بولسىمۇ، قىز دادىسىنىڭ قۇچىغىدا ئۆزىنى بىخەتەر ۋە خاتىرجەم ھېس قىلىدۇ. بىزمۇ قورقۇنچلۇق سىناقلارغا دۇچ كەلگەندە، ئاسماندىكى ئاتىمىزنىڭ بىزنى باغرىغا بېسىپ، كۆڭلىمىزنى تەسەللى تاپقۇزۇپ، قورقۇنچلۇق ھېس-تۇيغۇلىرىمىز يوقالغىچە يېنىمىزدا تۇرۇشىغا مۇھتاج بولىمىز. ئۇنداقتا، يەھۋانىڭ تەسەللىسىگە ئېرىشىش ئۈچۈن بىز نېمە قىلالايمىز؟
ئاسماندىكى ئاتىڭىز سىزگە تەسەللى بەرسۇن. مۇقەددەس كىتاب (15، 16-ئابزاسلارغا قاراڭ)
16. يەھۋادىن تەسەللىگە ئېرىشىش ئۈچۈن نېمە قىلالايمىز؟ (رەسىمگە ھەم قاراڭ)
16 نېمە قىلىشىمىز كېرەك؟ دائىم دۇئا قىلىپ، خۇدانىڭ سۆزىنى ئوقۇش ئارقىلىق يەھۋا بىلەن بىللە ۋاقىت ئۆتكۈزۈڭ (زەبۇر 77:1، 12–14). بۇنى ئادەتكە ئايلاندۇرسىڭىز، ئۆزىڭىزنى ئېغىر بېسىم ئاستىدا قالغاندەك ھېس قىلغاندا، دەرھال دۇئا قىلىپ، يەھۋادىن ياردەم سورايسىز. سىزنى قورقۇتقان ياكى غەم-ئەندىشىگە سالغان بارچە نەرسىلەر توغرۇلۇق يەھۋاغا ئوچۇق ئېيتىڭ؛ كېيىن، ئۇنىڭ سۆزى بولغان مۇقەددەس كىتابنى ئوقۇپ، سىزگە نېمە دەيدىغانلىقىنى ئاڭلاڭ؛ شۇ ئارقىلىق ئۇنىڭ تەسەللىسىگە ئېرىشىسىز (زەبۇر 119:28). قورقۇنچ ھېس قىلغان چاغلاردا، مۇقەددەس كىتابتىكى مەلۇم ئۈزۈندىلەر سىزگە تەسەللى بېرىپ، كۆڭلىڭىزنى كۆتۈرەلەيدۇ. مەسىلەن، ئايۇپ، زەبۇر، پەندى-نەسىھەت كىتابلىرىدىكى ئايەتلەر ۋە مەتتا كىتابى 6-بابتىكى ئەيسانىڭ سۆزلىرىنى ئوقۇڭ. سىز يەھۋاغا دۇئا قىلىپ، ئۇنىڭ سۆزىنى تەتقىق قىلىپ ئوقۇڭ، شۇندا ئۇنىڭ تەسەللىسىگە ئېرىشىسىز.
17. بىز نېمىگە قەتئىي ئىشەنسەك بولىدۇ؟
17 شۇنىڭغا ئىشىنىمىزكى، بېشىمىزغا ئېغىر كۈنلەر كەلگەندە، يەھۋا چوقۇم يېنىمىزدا بولىدۇ. ئۇ بىزنى ئەسلا يالغۇز تاشلاپ قويمايدۇ (زەبۇر 23:4؛ 94:14). ئۇ بىزنى قوغدايدىغانلىقى، تەڭپۇڭلۇقنى ساقلىشىمىزغا ياردەم بېرىدىغانلىقى، قوللاپ-قۇۋۋەتلەيدىغانلىقى ۋە تەسەللى بېرىدىغانلىقى ھەققىدە ۋەدە قىلىدۇ. يەشايا 26:3-ئايەتتە، يەھۋا توغرۇلۇق مۇنداق سۆزلەر يېزىلغان: «ساڭا تولۇق تايانغانلارنى سەن ھىمايە قىلىسەن؛ ئۇلارغا پۈتمەس-تۈگىمەس تىنچ-خاتىرجەملىك بېرىسەن، چۈنكى ئۇلار ساڭا ئىشەنچ باغلىغان». شۇنداق ئىكەن، يەھۋاغا تايىنىڭ ۋە ئۇنىڭ ياردىمىنى قوبۇل قىلىڭ. بۇنىڭ بىلەن، ئېغىر سىناقلار بېشىمىزغا كەلگەن كۈنلەردە، قايتا كۈچ-قۇۋۋەتكە ئېرىشىسىز.
قانداق جاۋاب بېرىسىز؟
-
بولۇپمۇ قانداق ۋەزىيەتلەردە، بىز يەھۋانىڭ ياردىمىگە مۇھتاج بولىمىز؟
-
بېشىمىزغا ئېغىر كۈنلەرگە كەلگەندە، يەھۋا قايسى تۆت يول بىلەن بىزگە ياردەم قىلىدۇ؟
-
يەھۋانىڭ ياردىمىگە ئېرىشىش ئۈچۈن نېمە قىلساق بولىدۇ؟
2-ناخشا تەشەككۈر يەھۋا!
a بەزى ئىسىملار ئۆزگەرتىلگەن.
