4-تەتقىق ماقالىسى
51-ناخشا يېپىش چىڭ يەھۋاغا!
يەھۋا سىزنى سۆيىدۇ
«يەھۋا ھەقىقەتەن مېھىر-شەپقەتلىك ۋە رەھىمدىل خۇدادۇر». —ياقۇپ 5:11.
مەركىزى ئىدىيە
يەھۋانىڭ سۆيگۈ-مۇھەببىتى ئۇنىڭغا يېقىنلىشىشىمىزغا، ئۆزىمىزنى بىخەتەر ھېس قىلىشىمىزغا، غەمخورلۇققا ئېرىشىپ، قايتا كۈچ-قۇۋۋەتكە تولىشىمىزغا ياردەم بېرىدۇ؟
1. سىز يەھۋا خۇدانى كۆز ئالدىڭىزغا قانداق كەلتۈرىسىز؟
سىز يەھۋا زادى قانداقتۇ دەپ، ئۇنى تەسەۋۋۇر قىلىشقا تىرىشىپ باققانمۇ؟ دۇئا قىلغاندا، ئەقلىڭىزدە ئۇنىڭ قانداق ئوبرازى پەيدا بولىدۇ؟ گەرچە يەھۋا كۆزگە كۆرۈنمەيدىغان خۇدا بولسىمۇ، مۇقەددەس كىتاب ئۇنى ھەرخىل ئۇسۇللاردا تەسۋىرلەيدۇ. يەھۋانى «قۇياش ۋە قالقان» ياكى «دەم تارتىپ يۇتۇۋېتىدىغان ئوت» دەپ ئاتىغان (زەبۇر 84:11؛ ئىبرانىي. 12:29). ھەزەكىيال ۋەھىيدە، يەھۋانىڭ تەختى كۆك ياقۇت تاش، ئوتتا قىزارغان مېتال ۋە ھەسەن-ھۈسەنلەر چاچقان نۇرلار بىلەن قاپلانغانلىقى تەسۋىرلەنگەن (ھەزەك. 1:26–28). يەھۋا توغرىسىدىكى مۇنداق تەسۋىرلەر بىزنى ئەيمەندۈرىدۇ، ھەتتا قورقۇنچقا سېلىشى مۇمكىن.
2. بەزى ئادەملەرگە يەھۋا بىلەن دوست بولۇش نېمە ئۈچۈن قىيىن؟
2 خۇدا كۆزگە كۆرۈنمىگەچكە، ئۇ بىزنى سۆيىدىغانلىقىغا ئىشىنىش قىيىن بولۇشى مۇمكىن. بەزىلەر ھاياتىدا كۆپ قىيىنچىلىقلارغا يولۇققاچ، يەھۋانىڭ ئۇلارنى سۆيىدىغانلىقىغا ئىشىنەلمەيدۇ. بەلكىم، ئۇلارنىڭ سۆيگۈ-مۇھەببەت كۆرسىتىدىغان دادىسى بولمىغان. يەھۋا خۇدا شۇنداق ھېس-تۇيغۇلارنى ۋە ئۇلارنىڭ بىزگە قانداق تەسىر قىلغانلىقىنى ياخشى چۈشىنىدۇ. يەھۋا بىزگە ياردەم بېرىش ئۈچۈن، ئۆزىنىڭ ئېسىل پەزىلەتلىرىنى مۇقەددەس كىتابقا يازدۇرغان.
3. نېمە ئۈچۈن يەھۋانىڭ مۇھەببىتى توغرۇلۇق بىلىشىمىز كېرەك؟
3 ياراتقۇچى يەھۋانى بىر سۆز بىلەن تەسۋىرلىسەك، ئەڭ مۇۋاپىق سۆز مۇھەببەت (1-يۇھاننا 4:8). مۇقەددەس يازمىلاردا «خۇدا ئۆزى مۇھەببەتتۇر» دەپ يېزىلغان. يەھۋا ھەممە ئىشلارنى مۇھەببەت ئاساسىدا قىلىدۇ. يەھۋانىڭ مۇھەببىتى شۇنچە كۈچلۈككى، ئۇ ھەتتا ئۆزىنى سۆيمىگەن ئىنسانلارنى سۆيىدۇ (مەتتا 5:44، 45). بۇ ماقالىدە، يەھۋا خۇدا ۋە ئۇنىڭ سۆيگۈ-مۇھەببىتى توغرىسىدا مۇھاكىمە قىلىمىز. يەھۋانى كۆپرەك تونۇغانسېرى، ئۇنىڭغا بولغان سۆيگۈ-مۇھەببىتىمىز تېخىمۇ كۈچىيىدۇ.
يەھۋا خۇدا بىزنى قاتتىق سۆيىدۇ
4. يەھۋانىڭ مېھىر-شەپقىتى توغرۇلۇق ئويلىغاندا، قانداق ھېس-تۇيغۇدا بولىسىز؟ (رەسىمگە ھەم قاراڭ)
4 «يەھۋا ھەقىقەتەن مېھىر-شەپقەتلىك» (ياقۇپ 5:11). مۇقەددەس كىتابتا ئۇ ئۆزىنى مېھرىبان ئانا بىلەن سېلىشتۇرغان (يەشايا 66:12، 13). مېھرىبان ئانىنىڭ پەرزەنتىگە مېھرىنى بېرىپ، ئۆز قۇچىقىغا ئېلىپ، مۇلايىم ئاۋاز بىلەن سۆزلەۋاتقانلىقىنى كۆز ئالدىڭىزغا كەلتۈرۈڭ. ئەگەر بالا يىغلىسا ياكى قانداقتۇ بىر يېرى ئاغرىسا، ئانا چوقۇم ئۇنىڭغا ياردەم بېرىشكە ھەرقاچان تەييار. خۇددى شۇنىڭدەك، بىز ئازاب-ئوقۇبەت چەكسەك ياكى غەم-ئەندىشىلەرنى قىلساق، يەھۋا بىزگە سۆيگۈ-مۇھەببىتىنى كۆرسىتىشكە ھەردائىم تەييار. زەبۇر يازغۇچىسى مۇنداق يازغان: «غەم-ئەندىشىلىرىم كۆپەيگەندە زىيادە، سەن تەسەللى بېرىپ جېنىمنى ئارام تاپقۇزدۇڭ». —زەبۇر 94:19.
«ئانا ئۆز ئوغلىنى بەزلىگەندەك، مەن سېنى بەزلەيمەن» (4-ئابزاسقا قاراڭ)
5. يەھۋانىڭ مېھىر-مۇھەببىتىنى نېمە ئۈچۈن قەدىرلەيسىز؟
5 يەھۋا ساداقەتمەن خۇدا (زەبۇر 103:8). بىز خاتا ئىش قىلىپ قويساقمۇ، ئۇ بىزدىن ۋاز كەچمەيدۇ. ئىسرائىللار يەھۋانىڭ كۆڭلىنى قايتا-قايتا رەنجىتكەن، لېكىن ئۇلار توۋا قىلغاندا، ئۇ ئۇلارنى سادىق سۆيگۈ-مۇھەببىتىنى كۆرسىتىشتىن توختاپ قالمايدىغانلىقىغا ئىشەندۈرۈپ مۇنداق دېگەن: «سەن نەزىرىمدە قەدىر-قىممەتلىك بولغاچ، سېنى شان-شەرەپكە ئېرىشتۈردۈم، سېنى سۆيدۈم» (يەشايا 43:4، 5). خۇدانىڭ بىزگە سۆيگۈ-مۇھەببىتى ئۆزگەرمەيدۇ. بىز بۇنىڭغا مەڭگۈ ئىشەنسەك بولىدۇ. ھەتتا بىز ئېغىر خاتالىقلارنى ئۆتكۈزۈپ قويغان بولساقمۇ، يەھۋا خۇدا بىزنى تاشلىۋەتمەيدۇ. بىز توۋا قىلىپ، ئۇنىڭغا قايتىپ كەلسەك، ئۇ بىزنى بۇرۇنقىدەكلا سۆيىدۇ. چۈنكى ئۇ ۋەدە قىلغاندەك، بىزنى «زىيادە كەچۈرۈم قىلار» (يەشايا 55:7). مۇقەددەس كىتابتا: «يەھۋا ئۆزى جاننى ئارام تاپقۇزىدىغان كۈنلەرگە ئېرىشتۈرسۇن»،— دەپ يېزىلغان. —ئەلچى. 3:19.
6. زەكەرىيا 2:8-ئايەتتىن يەھۋا توغرۇلۇق نېمىنى بىلىمىز؟
6 زەكەرىيا 2:8-نى ئوقۇڭ. يەھۋا بىزنى سۆيگەچكە، ھېس-تۇيغۇلىرىمىزنى چۈشىنىدۇ ۋە بىزنى قوغداشقا ھەمىشە تەييار. بىز ئازابلانساق، ئۇمۇ ئازابلىنىدۇ. شۇڭا، بىز ئۇنىڭغا مۇنداق دەپ دۇئا قىلساق بولىدۇ: «مېنى كۆزۈڭنىڭ قارىچۇقىدەك قوغدىغىن». شۇنىڭغا ئىشىنىڭكى، يەھۋا دۇئايىڭىزغا جاۋاب بېرىدۇ (زەبۇر 17:8). كۆز — تېنىمىزنىڭ ئەڭ سەزگۈر ۋە نازۇك ئەزاسىدۇر. شۇڭا، يەھۋانىڭ بىزنى كۆز قارىچۇقى بىلەن سېلىشتۇرغىنى، ئەمەلىيەتتە بىزگە شۇنداق دېگىنىدۇر: «ئەي خەلقىم، كىمكى ساڭا زىيان يەتكۈزسە، ماڭا يەتكۈزگەن بولىدۇ، چۈنكى مەن ئۈچۈن سەن بەكمۇ قەدىر-قىممەتلىك».
7. نېمە ئۈچۈن يەھۋانىڭ سۆيگۈ-مۇھەببىتىگە بولغان ئىشەنچىمىزنى كۈچەيتىشىمىز لازىم؟
7 يەھۋا ئۆزىنىڭ بىزنى سۆيىدىغانلىقىغا ئىشىنىشىمىزنى خالايدۇ. لېكىن، ئۆتمۈشىمىز سەۋەبلىك، يەھۋانىڭ بىزنى سۆيىدىغانلىقىدىن گۇمان قىلىشىمىز مۇمكىن. لېكىن، ئۇ بۇنى چۈشىنىدۇ. ئۇنداقتا، يەھۋانىڭ سۆيگۈ-مۇھەببىتىگە بولغان ئىشەنچىمىزنى قانداق كۈچەيتەلەيمىز؟ يەھۋانىڭ ئۆز سۆيگۈ-مۇھەببىتىنى ھەزرىتى ئەيساغا، مەسىھ قىلىنغان ئېتىقادچىلارغا ۋە بىز ھەممىمىزگە قانداق كۆرسىتىپ كەلگەنلىكىنى تەتقىق قىلىش ئارقىلىق كۈچەيتەلەيمىز.
يەھۋا سۆيگۈ-مۇھەببىتىنى قانداق ئىپادىلەيدۇ؟
8. نېمە ئۈچۈن ئەيسا ئۆز ئاتىسىنىڭ ئۇنى سۆيىدىغانلىقىغا قەتئىي ئىشەنگەن؟
8 يەھۋا خۇدا بىلەن ئەيسا مەسىھ مىلياردلارچە يىللار بىللە بولغاچ، ئارىسىدا كۈچلۈك سۆيگۈ-مۇھەببەت رىشتىسى بارلىققا كەلگەنىدى. ئۇلارنىڭ بۇ رىشتىسى ئىنتايىن كۈچلۈك باغلانغاندۇر. مەتتا 17:5-ئايەتتە، يەھۋا ئەيسانى سۆيىدىغانلىقىنى ئېنىق تىلغان ئالغان. ئۇ پەقەت شۇنداق دېسە بولاتتى: ‹بۇ كىشىدىن ئىنتايىن خۇرسەنمەن›. ئەمما، ئۇ ئەيسانى قانچىلىك سۆيىدىغانلىقىنى چۈشىنىشىمىز ئۈچۈن «بۇ مېنىڭ سۆيۈملۈك ئوغلۇم» دېگەن. يەھۋا ھەزرىتى ئەيسادىن ۋە ئۇنىڭ قىلماقچى بولغان ئىشىدىن پەخىرلەنگەن (ئەفەس. 1:7). ئەيسا مەسىھ بولسا، ئاتىسىنىڭ ئۇنىڭغا بولغان سۆيگۈ-مۇھەببىتىدىن قىلچە گۇمانلانمىغان. ئەيسا ئۇنىڭ سۆيگۈسىنى سۆڭەكلىرىدىن ئۆتۈپ يىلىكلىرىغىچە ھېس قىلغانىدى. ئەيسا مەسىھ ئاتىسىنىڭ ئۇنى سۆيىدىغانلىقىغا ئىشىنىدىغانلىقىنى قايتا-قايتا تىلغا ئالغان. —يۇھاننا 3:35؛ 10:17؛ 17:24.
9. يەھۋانىڭ مەسىھ قىلىنغان ئېتىقادچىلارغا بولغان مېھىر-مۇھەببىتى قانداق تەسۋىرلەنگەن؟ (رىملىقلار 5:5)
9 يەھۋا يەنە مۇقەددەس روھ بىلەن مەسىھ قىلىنغانلارغا سۆيگۈ-مۇھەببىتىنى كۆرسىتىدۇ (رىملىقلار 5:5-نى ئوقۇڭ). بۇ ئايەتتىكى «تۆكۈلدى» دېگەن سۆزگە دىققەت قىلايلى. مۇقەددەس يازمىلارنىڭ بىر ئىزاھات لۇغىتىدە، بۇ سۆز «دەريانىڭ ئېقىن سۈيىدەك ئۈستىمىزگە كېلىدۇ» دەپ چۈشەندۈرۈلىدۇ. بۇ ئىپادىدىن، يەھۋانىڭ مەسىھ قىلىنغان ئېتىقادچىلارغا بولغان كۈچلۈك سۆيگۈ-مۇھەببىتىنى كۆرۈۋالالايمىز. بۇ ئېتىقادچىلار ھەم ئۆزلىرىنىڭ خۇدا تەرىپىدىن سۆيۈلگەنلىكىنى بىلىدۇ (يەھۇدا 1). ئەلچى يۇھاننا ئۇلارنىڭ ھېس-تۇيغۇلىرىنى ئىپادىلەپ، مۇنداق يازغان: «ئاسماندىكى ئاتىمىزنىڭ بىزنى نەقەدەر سۆيىدىغانلىقىغا قاراڭلار، مانا بىز خۇدانىڭ پەرزەنتلىرى دەپ ئاتالدۇق» (1-يۇھاننا 3:1). دېمەك، يەھۋا پەقەت مەسىھ قىلىنغان ئەيسانىڭ ئەگەشكۈچىلىرىنىلا سۆيەمدۇ؟ ياق، يەھۋا ھەر بىرىمىزنى سۆيىدىغانلىقىنى ئىسپاتلىغان.
10. يەھۋانىڭ بىزنى ياخشى كۆرىدىغانلىقىنىڭ ئەڭ چوڭ ئىسپاتى قانداق؟
10 يەھۋا بىزگە بولغان چەكسىز سۆيگۈ-مۇھەببىتىنى ئاجايىپ بىر يول، يەنى تۆلەم قۇربانلىقى بىلەن ئىپادىلىگەن (يۇھاننا 3:16؛ رىملىقلار 5:8). خۇدا سۆيۈملۈك ئوغلىنى بارلىق ئىنسانلار ئۈچۈن تۆلەم قۇربانلىقى بېرىشكە ئەۋەتكەن، شۇ ئارقىلىق گۇناھلىرىمىز كەچۈرۈلۈپ، يەھۋا بىلەن دوست بولۇش پۇرسىتىگە ئىگە بولدۇق (1-يۇھاننا 4:10). يەھۋا خۇدا بىلەن ئەيسا مەسىھ بىز ئۈچۈن شۇنچە چوڭ قۇربانلىق بەرگەنلىكى ھەققىدە ئويلانغانسېرى، ئۇلارنىڭ ھەر بىرىمىزنى قانچىلىك چوڭقۇر سۆيىدىغانلىقىنى تېخىمۇ ياخشىراق چۈشىنەلەيمىز (گالاتىيا. 2:20). يەھۋا پەقەت ئادىل قانۇنى تەلەپ قىلغانلىقى ئۈچۈنلا تۆلەم قۇربانلىقى بەرمىگەن. ئۇ بىزنى نەقەدەر سۆيىدىغانلىقىنى ئىپادىلەش ئۈچۈن، سوۋغات سۈپىتىدە ئۆزىنىڭ ئەڭ سۆيۈملۈك ئوغلى، ئەيسانى قۇربانلىققا بەرگەن. يەھۋا بىزگە ياردەم قىلىش ئۈچۈن ئوغلىنىڭ ئازاب-ئوقۇبەت چېكىپ ئۆلۈشىگە يول قويغان.
11. يەرەمىيا 31:3-ئايەتتىن نېمىنى ئۆگىنىمىز؟
11 كۆرگىنىمىزدەك، يەھۋا ئۆز قەلبىدىكى ھېس-تۇيغۇلىرىنى يوشۇرماي، سۆيگۈ-مۇھەببىتىنى ئوچۇق-ئاشكارا ئىپادىلىگەن (يەرەمىيا 31:3-نى ئوقۇڭ). يەھۋا بىزنى چىن قەلبىدىن سۆيگەچكە، بىزنى ئۆزىگە جەلپ قىلىپ كېلىۋاتىدۇ (تەكرار. قا 7:7، 8-نى سېلىشتۇرۇڭ). ھېچنەرسە ۋە ھېچكىم بىزنى ئۇنىڭ سۆيگۈ-مۇھەببىتىدىن ئايرىۋېتەلمەيدۇ (رىملىقلار 8:38، 39). بۇ سۆيگۈ-مۇھەببەت سىزگە نېمىلەرنى ھېس قىلدۇرىدۇ؟ زەبۇر 23-بابنى ئوقۇپ، يەھۋانىڭ پادىشاھ داۋۇتقا كۆرسەتكەن سۆيگۈ-مۇھەببىتى ئۇنىڭغا قانداق تەسىر قىلغانلىقى ۋە ھەر بىرىمىزگە قانداق تەسىر قىلالايدىغانلىقىنى كۆرۈپ باقايلى.
يەھۋانىڭ سۆيگۈسى سىزگە نېمىلەرنى ھېس قىلدۇرىدۇ؟
12. زەبۇر 23 بابتىن قانداق خۇلاسە چىقىرىشقا بولىدۇ؟
12 زەبۇر 23:1–6-نى ئوقۇڭ. داۋۇت زەبۇر 23-بابتا، يەھۋانىڭ سۆيگۈسى ۋە مېھىر-شەپقىتىگە قەتئىي ئىشەنچ باغلىغانلىقىنى ئىپادىلىگەن. داۋۇت پادىشاھ بۇ زەبۇرنى يازغاندا، ئۆزى بىلەن پادىچىسى يەھۋا ئارىسىدىكى كۈچلۈك رىشتىنى تەسۋىرلىگەن. داۋۇت پادىشاھ ئۆز خۇداسىغا تولۇق تايانغاچقا، ئۇنىڭ يول-يورۇغىغا بويسۇنغان. مۇشۇ يول-يورۇققا ئەگىشىپ، ئۆزىنى بىخەتەر ھېس قىلغان. داۋۇت ئۆمۈر بويى يەھۋانىڭ ئۆزىنى سۆيىدىغانلىقىنى بىلگەن. ئۇ نېمە ئۈچۈن شۇنچە كۈچلۈك ئىشەنچ باغلىيالىغان؟
13. داۋۇت يەھۋانىڭ ئۇنى سۆيىدىغانلىقىغا نېمە ئۈچۈن قەتئىي ئىشەنگەن؟
13 «ھېچ نەرسىگە مۇھتاجىم يوقتۇر». يەھۋا دائىم داۋۇتنىڭ تۈرلۈك ئېھتىياجلىرىنى تەمىنلەپ بەرگەچ، ئۇ ئۆزىنىڭ غەمخورلۇققا ئېرىشكەنلىكىنى ھېس قىلغان. ئۇنىڭدىن باشقا، داۋۇت يەھۋا بىلەن يېقىن دوست بولۇپ، ئۇنىڭ ئىلتىپاتىغا ئېرىشكەنلىكىدىن بەك خۇشال بولغان. شۇڭا، كېلەچەكتە بېشىغا قانداق كۈن كېلىشىدىن قەتئىينەزەر، يەھۋانىڭ ئۇنىڭغا غەمخورلۇق قىلىپ، بارلىق ئېھتىياجلىق نەرسىلەرنى تەمىنلەپ بېرىدىغانلىقىغا ئىشەنگەن. داۋۇت پادىشاھ يەھۋانىڭ سۆيگۈ-مۇھەببىتىگە كۈچلۈك ئىشەنچ باغلىغاچ، ئۇ بارچە غەم-تەشۋىشلەرنى يېڭىپ، كۆڭلى تىنچ-خاتىرجەم بولغان، بەخت-سائادەت ۋە قانائەت تاپقانلىقىنى ھېس قىلالىغان. —زەبۇر 16:11.
14. يەھۋا خۇدا بىزگە مېھىر-مۇھەببەتلىك غەمخورلۇقىنى قانداق كۆرسىتىدۇ؟
14 بولۇپمۇ بېشىمىزغا ئېغىر كۈن چۈشكەندە، يەھۋا خۇدا بىزگە ئالاھىدە كۆيۈنۈپ كۆڭۈل بۆلىدۇ. بەيتەلدە 20 يىل خىزمەت قىلغان كىلېر a ئىسىملىك قېرىندىشىمىزنىڭ مىسالىنى كۆرۈپ باقايلى. ئۇنىڭ ئائىلىسى ئارقا-ئارقىدىن ئېغىر قىيىنچىلىقلارغا دۇچ كەلگەندە، ئۇ ئۆزىنى ياردەمسىز قالغاندەك ھېس قىلغان. ئۇنىڭ دادىسى مېڭە قان تومۇرى يېرىلىش كېسىلىگە گىرىپتار بولغان، سىڭىللىرىدىن بىرى جامائەتتىن چىقىرىلغان. ئائىلىسىنىڭ كىچىك تىجارىتى ياخشى بولماي، ئۆيىدىن ھەم ئايرىلىپ قالغان. شۇنداق ۋەزىيەتتە، يەھۋا ئۇلارغا قانداق كۆيۈنگەن؟ كلېر مۇنداق دەيدۇ: «ياراتقۇچى يەھۋا ھەر كۈنى بىزنى ئېھتىياجلىق نەرسىلەر بىلەن تەمىنلىدى. ئۇ بىزگە مەن خىيالمۇ قىلىپ باقمىغان نەرسىلەرنى بەردى. بېشىمىزغا ئېغىر كۈنلەر كەلگەندە، يەھۋانىڭ مېھىر-شەپقەت كۆرسىتىپ، بىزگە قانداق غەمخورلۇق قىلغانلىقىنى دائىم ئەسلەيمەن. شۇ ئەسلىمىلەر ماڭا كۈچ-مەدەت بېرىپ، قىيىنچىلىقلاردا بەل قويۇۋەتمەي، خۇشاللىق بىلەن يەھۋاغا داۋاملىق خىزمەت قىلىشىمغا ياردەم بېرىدۇ».
15. داۋۇت كۈچ-قۇۋۋەتكە قانداق ئېرىشكەن؟ (رەسىمگە ھەم قاراڭ)
15 «ئۇ جېنىمنى راھەتلەندۈرەر». ھەرخىل قىيىنچىلىقلار ۋە سىناقلارغا دۇچ كەلگەچ، داۋۇتنىڭ بەزىدە كۆڭلى يېرىم بولۇپ، روھى چۈشكەن (زەبۇر 18:4–6). بىراق، يەھۋانىڭ سۆيگۈ-مۇھەببىتى ۋە غەمخورلۇقى بىلەن ئۇنىڭ جېنى راھەت تاپقان. يەھۋا ئۆزىنىڭ ھېرىپ چارچىغان دوستىنى «ياپيېشىل يايلاقلاردا» ياتقۇزۇپ، «ئارام ئالدۇرۇش ئۈچۈن تىنچ سۇلارنىڭ بويىغا» باشلىغان. نەتىجىدە، داۋۇت قايتا كۈچ-قۇۋۋەتكە تولۇپ، خۇشاللىق بىلەن يەھۋاغا خىزمەت قىلىشنى داۋاملاشتۇرغان. —زەبۇر 18:28–32.
گەرچە داۋۇتنىڭ كۆڭلى يېرىم بولسىمۇ، ئۇ يەھۋانىڭ مېھىر-مۇھەببىتىنى ۋە غەمخورلۇقىنى ھېس قىلىپ، جېنى ئارام تاپقان (15-ئابزاسقا قاراڭ)
16. يەھۋانىڭ مېھىر-مۇھەببىتى سىزنى قانداق مۇستەھكەملەيدۇ؟
16 بۈگۈنكى كۈندە ئوخشاشلا تۈرلۈك قىيىنچىلىقلار ۋە سىناقلارغا دۇچ كەلگەندە، «يەھۋانىڭ سادىق مۇھەببىتى سەۋەبلىك، بىز يوق بولۇپ كەتمىدۇق» (يەرەم. يىغ 3:22؛ كولوسى. 1:11). رېيچېلنىڭ مىسالىنى كۆرۈپ باقايلى. تاجسىمان ۋىرۇسى يۇقۇملۇق كېسىلى مەزگىلىدە، يولدىشى ئۇنى تاشلاپ كەتكەن ۋە يەھۋاغا خىزمەت قىلىشنى توختاتقان. بۇ رېيچېلغا قاتتىق زەربە بولغان. يەھۋا خۇدا رېيچېلغا قانداق غەمخورلۇق قىلغان؟ ئۇ مۇنداق دەيدۇ: «يەھۋا ماڭا ئۆز سۆيگۈ-مۇھەببىتىنى ھېس قىلدۇرۇش ئۈچۈن نۇرغۇن ئىشلارنى قىلدى. مەسىلەن، ئۇ دوستلىرىم ئارقىلىق مېنى قوللا-قۇۋۋەتلىدى، ئۇلار ماڭا ھەمراھ بولدى، تاماق پىشىرىپ ئېلىپ كەلدى، يېقىملىق سۆزلەرنى ۋە ئايەتلەرنى قىسقا ئۇچۇر ئارقىلىق ئەۋەتىپ ماڭا ئىلھام-مەدەت بەردى، ماڭا كۈلۈمسىرەپ، يەھۋانىڭ داۋاملىق ماڭا كۆڭۈل بۆلىدىغانلىقىنى ئېسىمگە سېلىپ تۇردى. خۇدانىڭ ماڭا سۆيگۈ-مۇھەببەتكە تولغان چوڭ بىر ئائىلىنى بەرگىنىگە داۋاملىق كۆپ رەھمەت ئېيتىمەن».
17. نېمە ئۈچۈن داۋۇت «خەۋپ-خەتەردىن» قورقمىغان؟
17 «خەۋپ-خەتەردىن قورقماسمەن ئەسلا، چۈنكى سەن يېنىمداسەن». داۋۇت ھاياتى ھەمىشە خەۋپ-خەتەر ئىچىدە قالغان، ئۇنى كۈچلۈك دۈشمەنلىرى ئۇنىڭغا ئۆلۈم تەھدىتى سالغان. لېكىن. يەھۋانىڭ سۆيگۈ-مۇھەببىتى ئۇنى بىخەتەر ۋە قوغدالغاندەك ھېس قىلدۇرغان. داۋۇت ھەرخىل ۋەزىيەتتە، ياراتقۇچىسى يەھۋانى ئۆزىنىڭ يېنىدا ھېس قىلالىغاچ، ئۇنىڭ كۆڭلى تىنچ-خاتىرجەم بولغان. شۇڭا، داۋۇت يەھۋانى مەدھىيىلەپ، مۇنداق ناخشا ئېيتقان:«ئۇ بارچە قورقۇنچتىن مېنى قۇتۇلدۇردى» (زەبۇر 34:4). داۋۇتنىڭ ھەقىقەتەن قورققان چاغلىرى بولغان. شۇنداقتىمۇ، يەھۋانىڭ سۆيگۈ-مۇھەببىتى ئۇنىڭ بارلىق قورقۇنچلارنى يېڭىشىغا ياردەم بەرگەن.
18. يەھۋانىڭ سۆيگۈ-مۇھەببىتىنىڭ ئىسپاتلىرى قورقۇنچنى يېڭىشىڭىزغا قانداق ياردەم بېرىدۇ؟
18 قورقۇنچلۇق ۋەزىيەتلەرگە چۈشۈپ قالغاندا، يەھۋانىڭ سۆيگۈ-مۇھەببىتىگە بولغان ئىشەنچىمىز بىزنى قانداق كۈچلەندۈرىدۇ؟ ، ئوغلى ئۆزىنى ئۆلتۈرۈۋالغاندىن كېيىن، سۇزى ئىسىملىك پىدائىي ۋەز ئېيتقۇچى بىلەن يولدىشى قاتتىق قايغۇ-ھەسرەت چەككەن. سۇزى ئۇلارنىڭ قانداق ھېس-تۇيغۇدا بولغانلىقى ھەققىدە مۇنداق دېگەن: «ئوغلۇمدىن ئايرىلغاندا، خۇددى ئاسمان دۈم كۆتۈرۈلۈپ چۈشكەندەك بولدى. ئۆزۈمنى ئىنتايىن مىسكىن ۋە بىچارە ھېس قىلدىم. بىراق يەھۋانىڭ مېھىر-شەپقىتى بىزنى بىخەتەر ۋە تىنچ-خاتىرجەم ھېس قىلدۇردى». يۇقىرىدا تىلغا ئېلىنغان رېيچېل مۇنداق دەيدۇ: «بىر كۈنى كەچتە قەلبىم شۇنچە قاتتىق ئازاب چەكتىم. يۈرىكىم قان يىغلاپ، كۆز ياشلىرىم توختىمىدى. مېنى غەم-تەشۋىش ۋە قورقۇنچ چىرمىۋالدى. يەھۋاغا قاتتىق ۋارقىراپ دۇئا قىلدىم. تۇيۇقسىزلا كۆڭلۈم ئالاھىدە بىر تىنچ-خاتىرجەملىككە تولدى. شۇ چاغدا، يەھۋا خۇددى بىر ئانا بوۋىقىنى بەزلىگەندەك، ماڭا تەسەللى بەرگەنلىكىنى ھېس قىلدىم. شۇنىڭ بىلەن ئۇخلاپ قاپتىمەن، مەن چاغنى ئەسلا ئۇنتۇپ قالمايمەن». ئېتىقادى سەۋەبىلىك، ئەسكەر بولۇشنى رەت قىلغان تاسوس ئىسىملىك ئاقساقال تۆت يىل تۈرمىگە تاشلانغان. ئۇ يەھۋا سۆيگۈ-مۇھەببىتى ۋە غەمخورلۇقىنى قانداق ھېس قىلغان؟ ئۇ مۇنداق دەيدۇ: «يەھۋا ئېھتىياجلىرىمنى مەن مۇھتاج بولغاندىنمۇ كۆپرەك تەمىنلەپ بەردى. بۇ مېنىڭ يەھۋاغا بولغان ئىشەنچىمنى كۈچەيتكەچ، ئۇنىڭغا پۈتۈنلەي ئىشىنىمەن. ئۇنىڭدىن باشقا، ياراتقۇچى يەھۋا ماڭا مۇقەددەس روھى ئارقىلىق شۇنداق ناچار شارائىتتا خۇشاللىقنى ساقلاپ قېلىشىمغا ياردەم بەرگەن. يەھۋاغا يېقىن بولغانسېرى، ئۇنىڭ ماڭا بولغان سۆيگۈ-مۇھەببىتىنى شۇنچە كۆپ ھېس قىلىدىغانلىقىمنى چۈشەندىم. شۇنىڭ بىلەن، تۈرمىدە بولغاندا، پىدائىي ۋەز ئېيتقۇچى بولۇپ خىزمەت قىلىشنى باشلىدىم».
مېھىر-شەپقەتلىك خۇدايىڭىزغا يېقىنلىشىڭ
19. (1) يەھۋانىڭ بىزنى سۆيىدىغانلىقىنى بىلىش دۇئالىرىمىزغا قانداق تەسىر قىلىدۇ؟ (2) يەھۋانىڭ مېھىر-مۇھەببىتى تەسۋىرلەنگەن قايسى ئايەت سىزگە ئالاھىدە تەسىر قىلدى؟ (« يەھۋانىڭ سۆيگۈ-مۇھەببىتى» تەسۋىرلەنگەن ئايەتلەر)
19 بىز كۆرۈپ چىققان مىساللار، «سۆيگۈ-مۇھەببەت»نىڭ خۇداسى، يەھۋا بىز بىلەن بىللە ئىكەنلىكىنى ئىسپاتلايدۇ (2-كورىنت. 13:11). ئۇ ھەر قايسىمىزغا شەخسەن كۆڭۈل بۆلىدۇ. ھازىر شۇنىڭغا ئىشىنىمىزكى، «يەھۋانىڭ سادىق مۇھەببىتى بىزنى قورشاۋغا ئالار» (زەبۇر 32:10). يەھۋانىڭ سۆيگۈ-مۇھەببىتى ھەققىدە قانچىلىك كۆپ چوڭقۇر ئويلانغانسېرى، ئۇ بىزگە ئىنتايىن كۆڭۈل بۆلىدىغانلىقىنى ۋە ئۇنىڭغا تېخىمۇ يېقىنلاشقانلىقىمىزنى كۆرۈپ يېتەلەيمىز. بىز ئۇنىڭغا ئىچ باغرىمىزنى تۆكۈپ، ئۇنىڭ مېھىر-مۇھەببىتىگە مۇھتاج ئىكەنلىكىمىزنى ئوچۇق ئېيتالايمىز. چۈنكى، ئۇ بىزنى چوقۇم چۈشىنىدىغانلىقى ۋە ياردەم بېرىشكە ھەرقاچان تەييار ئىكەنلىكىگە ئىشىنىمىز. —زەبۇر 145:18، 19.
20. يەھۋانىڭ سۆيگۈ-مۇھەببىتى ئۇنىڭغا يېقىنلىشىشقا قانداق ياردەم بېرىدۇ؟
20 يەھۋانىڭ سۆيگۈ-مۇھەببىتى خۇددى سوغوق كۈندە كۆيۈپ تۇرغان ئوتقا ئوخشاش، ئۆزىگە يېقىنلىشىشقا جەلپ قىلىدۇ. گەرچە ئۇنىڭ سۆيگۈ-مۇھەببىتى بەك كۈچلۈك بولسىمۇ، خۇددى ئانىنىڭ مېھىر-شەپقىتىگە ئوخشاش نازۇك. شۇڭا، ھاياتىڭىزنىڭ ھەر بىر ساھەسىدە يەھۋانىڭ سۆيگۈ-مۇھەببىتىنى ھېس قىلىش ھەقىقەتەن زور بەخت! شۇڭا، ئۇنىڭ مۇھەببىتىگە جاۋابەن، چىن قەلبىمىزدىن «مەن يەھۋانى سۆيىمەن» دەپ توۋلايلى. —زەبۇر 116:1.
قانداق جاۋاب بېرىسىز؟
-
يەھۋانىڭ سۆيگۈ-مۇھەببىتىنى قانداق تەسۋىرلەپ بېرىسىز؟
-
يەھۋا سىزنى ئىنتايىن ياخشى كۆرىدىغانلىقىغا سىزنى نېمە ئىشەندۈرىدۇ؟
-
يەھۋانىڭ مېھىر-مۇھەببىتى توغرۇلۇق ئويلىغاندا، قانداق ھېس-تۇيغۇدا بولىسىز؟
18-ناخشا خۇدانىڭ چىن مۇھەببىتى
a بەزى ئىسىملار ئۆزگەرتىلگەن.
