37-تەتقىق ماقالىسى
شىمشوندەك يەھۋا خۇداغا تايىنىڭ
«ئەي، ئۇلۇغ ئىگەم يەھۋا، مېنى ئېسىڭگە ئالغىن،ئۆتۈنەي مېنى كۈچلەندۈرگىن».—ھاكىم. 16:28.
51-ناخشا يېپىش چىڭ يەھۋاغا!
بۇ ماقالىدە: a
1، 2. شىمشون توغرىسىدىكى ھېكايىنى ئۆگىنىش نېمە ئۈچۈن پايدىلىق؟
شىمشون دېگەن ئىسىمنى ئاڭلىغاندا، خىيالىڭىزغا كىم كېلىدۇ؟ بەلكىم، ئۇنىڭ نەقەدەر كۈچلۈك كىشى ئىكەنلىكى توغرۇلۇق ئويلايسىز. ئەمەلىيەتتىمۇ شۇنداق كۈچلۈك بىر كىشى بولغان. لېكىن، ئۇ بىر ناتوغرا قارار چىقىرىپ، ئېچىنارلىق ئاقىۋەتكە قالغان. بۇنىڭغا قارىماستىن، يەھۋا ئۇنىڭ ساداقەتمەنلىكىگە دىققەت قارىتىپ، بىزنىڭ پايدىمىز ئۈچۈن بۇ ۋەقەلەرنى ئۆز سۆزى بولغان مۇقەددەس كىتابقا يازدۇرغان.
2 يەھۋا ئۆزىنىڭ تاللىغان خەلقى ئىسرائىللارغا ياردەم بېرىش ئۈچۈن شىمشوننى قوللىنىپ، ئاجايىپ ئىشلارنى قىلغان. شىمشون ئۆلۈپ نەچچە يۈز يىللار ئۆتكەندە، يەھۋا ئەلچى پاۋلۇسنى شىمشوننىڭ ئىسىمىنى ئىمان-ئېتىقادى كۈچلۈك كىشىلەر قاتارىغا قوشۇپ يېزىشقا دەۋەت قىلغان (ئىبرانىي. 11:32–34). شىمشوننىڭ ئۈلگىسى بىزگە ئىلھام بېرىدۇ. ئۇ ھەتتا قىيىن ۋەزىيەتلەردىمۇ يەھۋاغا تايانغان. ھازىر ئۇنىڭ ئۈلگىسىدىن نېمىلەرنى ئۆگىنەلەيدىغانلىقىمىزنى ۋە قانداق ئىلھام ئالالايدىغانلىقىمىزنى كۆرۈپ باقايلى.
شىمشون يەھۋاغا تايانغان
3. يەھۋا شىمشونغا قانداق ۋەزىپە تاپشۇرغان؟
3 شىمشون تۇغۇلغاندا فىلىستىيەلىكلەر ئىسرائىل خەلقىنى بېسىۋېلىپ باشقۇرغان ۋە ئۇلارغا زۇلۇم قىلغان (ھاكىم. 13:1). فىلىستىيەلىكلەرنىڭ رەھىم-شەپقەتسىز باشقۇرۇشى ئاستىدا، ئىسرائىل خەلقى كۆپ قىيىنچىلىقلارنى باشتىن كەچۈرگەن. يەھۋا شىمشوننى، «ئىسرائىلنى فىلىستىيەلىكلەرنىڭ قولىدىن قۇتقۇزۇش ئۈچۈن باشچىلىق» قىلىشقا تاللىغان (ھاكىم. 13:5). بۇ ئىنتايىن قىيىن بىر ۋەزىپە بولۇپ، ئۇنى ئورۇنلاش ئۈچۈن شىمشون يەھۋا خۇداغا تايىنىشى كېرەك ئىدى.
شىمشون يەھۋاغا تايانغان ۋە ماسلىشىشقا تەييار بولغان. ئۇ يەھۋانىڭ ئىرادىسىنى ئورۇنلاش ئۈچۈن قولىدا بار نەرسىنى ئىشلەتكەن (4، 5-ئابزاسلىرىغا قاراڭ)
4. يەھۋا شىمشوننىڭ فىلىستىيەلىكلەردىن قۇتۇلۇشىغا قانداق ياردەم بەرگەن؟ (ھاكىملار 15:14–16)
4 ھازىر شىمشوننىڭ يەھۋاغا قانداق تايانغانلىقى ۋە يەھۋانىڭ ئۇنىڭغا قانداق ياردەم بەرگەنلىكىنى كۆرۈپ چىقايلى. بىر قېتىم فىلىستىيەلىكلەرنىڭ ئەسكەرلىرى شىمشوننى تۇتماقچى بولۇپ، يەھۇدا زېمىنىدىكى لېخا دېگەن جايغا كەلگەن. ئۇ يەردىكى ئىسرائىللار قورقۇپ، شىمشوننى دۈشمەنلەرگە تاپشۇرۇشنى قارار قىلغان. شىمشوننى ئۆز ئادەملىرى ئىككى قات ئارغامچا بىلەن باغلاپ، فىلىستىيەلىكلەرنىڭ قولىغا تاپشۇرغان (ھاكىم. 15:9–13). بىراق، «يەھۋانىڭ روھى شىمشوننى كۈچ-قۇۋۋەتكە» تولدۇرغان ۋە ئۇ قوللىرىدىكى ئارغامچىدىن بوشانغان. كېيىن، «ئۇ ئېشەكنىڭ يېڭى بىر ئېڭەك سۆڭىكىنى» قولىغا ئېلىپ، ئۇنىڭ بىلەن فىلىستىيەلىكلەرنىڭ 1000 ئەسكىرىنى قىرىۋەتكەن.—ھاكىملار 15:14–16-نى ئوقۇڭ.
5. شىمشون ئېشەكنىڭ ئېڭەك سۆڭىكىنى ئىشلىتىپ، يەھۋاغا تايانغانلىقىنى قانداق كۆرسەتكەن؟
5 شىمشون نېمە ئۈچۈن ئېشەك سۆڭىكىنى ئىشلەتكەن؟ بۇ ئادەتتىكى بىر قورال-ياراق ئەمەسقۇ؟! شەك-شۈبھىسىزكى، شىمشون شۇنى ئېنىق بىلگەنكى، ئۇنىڭ قانداق قورال-ياراق ئىشلەتكەنلىكى ئەمەس، يەھۋاغا تايانغانلىقى ئۇنى غەلىبىگە ئېرىشتۈرگەن. بۇ سادىق كىشى يەھۋانىڭ ئىرادىسىنى ئەمەلگە ئاشۇرۇش ئۈچۈن قولىدا بار بولغان نەرسىدىن پايدىلانغان ئىدى. ئېنىقكى، شىمشون يەھۋا خۇداغا تايانغاچ، شۇنچە كۆپ كىشىلەرنى جەڭدە يەڭگەن!
6. تەشكىلاتتىكى ۋەزىپىلەرنى ئورۇنلىغاندا، شىمشوندىن قانداق ئۈلگە ئالالايمىز؟
6 يەھۋا بىزگە ھەتتا ئىنتايىن قىيىن بولۇپ كۆرۈنگەن ۋەزىپىلەرنى ئورۇنلىشىمىز ئۈچۈن كۈچ بېرەلەيدۇ. ئۇ بۇنى بىزنى ھەيران قالدۇرىدىغان ئۇسۇلدا قىلالايدۇ. يەھۋا خۇدا شىمشونغا كۈچ-قۇۋۋەت بەرگەن، سىزمۇ يەھۋاغا تايانسىڭىز، ئۇنىڭ ئىرادىسىنى ئورۇنلىشىڭىز ئۈچۈن، ئۇ سىزگە ياردەم بېرىدۇ.—پەند. نە 16:3.
7. قايسى مىسال يەھۋادىن يول-يورۇق ئىزدەشنىڭ مۇھىملىقىنى كۆرسىتىدۇ؟
7 تەشكىلاتىمىزنىڭ قۇرۇلۇش ئىشلىرىغا قاتناشقان نۇرغۇن قېرىنداشلار ئۆزلىرىنىڭ يەھۋاغا تايانغانلىقىنى كۆرسەتكەن. بۇرۇن قېرىنداشلار كۆپىنچە يېڭى يىغىلىش زاللىرى ۋە باشقا بېنالارنى يېڭىدىن پىلانلاپ سالاتتى. لېكىن، ۋاقىت ئۆتۈپ، خۇدا خىزمەتچىلىرىنىڭ سانى كۆپەيگەچ، بەزى ئۆزگەرتىشلەرنى قىلىشقا توغرا كەلدى. مەسئۇلىيەتلىك بۇرادەرلەر يەھۋا خۇدانىڭ رەھبەرلىكىنى ئىزدەپ، مەسىلەن، بېنالارنى سېتىۋېلىش ۋە ئۇلارنى رېمونت قىلىشتەك يېڭى ئۇسۇللارنى قوللىنىشقا تىرىشتى. يېقىنقى يىللاردا، تەشكىلاتىمىزنىڭ دۇنيانىڭ جاي-جايلىرىدىكى ھەرتۈرلۈك قۇرۇلۇش ئىشلىرىغا قاتناشقان روبېرت مۇنداق دەيدۇ: «ئەڭ بېشىدا بەزىلىرىمىز ئۈچۈن بۇ ئۆزگەرتىشنى قوبۇل قىلىش قىيىن بولغان. بۇ بىز يېقىنقى يىللاردا قىلىۋاتقان ۋە كۆنۈپ كەتكەن ئىشلىرىمىزدىن كۆپ پەرق قىلاتتى. لېكىن، بۇرادەرلەر ماسلىشىشقا تەييار بولغان ۋە يەھۋانىڭ بۇ ئۆزگەرتىشلەرنى بەرىكەتلەۋاتقانلىقى ئېنىق ئىدى». بۇ يەھۋا ئۆز ئىرادىسىنى ئورۇنلاش ئۈچۈن ئۆزىنىڭ خەلقىنى يېتەكلەۋاتقانلىقىنىڭ بىر مىسالى خالاس. بەزىدە ھەممىمىز ئۆزىمىزدىن مۇنداق سوراپ كۆرسەك ياخشى بولىدۇ: «مەن يەھۋادىن يول-يورۇق ئىزدەۋاتىمەنمۇ ۋە ئەڭ ياخشى ئۇسۇلدا ئۇنىڭغا خىزمەت قىلىش ئۈچۈن ئۆزگەرتىشلەرگە ماسلىشىشقا تەييارمۇ؟»
شىمشون يەھۋا تەمىنلىگەننەرسىلەردىن پايدىلانغان
8. بىر كۈنى شىمشون بەك ئۇسساپ كەتكەندە، نېمە قىلغان؟
8 بەلكىم، سىز شىمشوننىڭ باشقىمۇ ھەيران قالارلىق ئىشلىرى توغرۇلۇق ئوقۇغانسىز. ئۇ ھېچقانداق قورال-ياراقسىز شىر بىلەن چېلىشقان ۋە ئاشكېلون شەھىرىدە 30 فىلىستىيەلىك ئەركەكلەرنى ئۆلتۈرگەن (ھاكىم. 14:5، 6، 19). شىمشون بۇ ئىشلارنى يەھۋانىڭ ياردىمىسىز قىلالمايدىغانلىقىنى بىلگەنىدى. بۇنى كېيىن يۈز بەرگەن ۋەقەدىن بىلىمىز. 1000 فىلىستىيەلىكنى ئۆلتۈرگەندىن كېيىن، شىمشون بەك ئۇسساپ كەتكەن. شۇ چاغدا ئۇ نېمە قىلغان؟ ئۆزىگە تايىنىپ، سۇ ئىزدەشنىڭ ئورنىغا، يەھۋادىن ياردەم سورىغان.—ھاكىم. 15:18.
9. يەھۋا شىمشوننىڭ يالۋۇرىشىغا قانداق جاۋاب بەرگەن؟ (ھاكىملار 15:19)
9 يەھۋا مۆجىزە كۆرستىپ، سۇ ئېقىپ چىقىۋاتقان بىر بۇلاقنى پەيدا قىلىپ، شىمشوننىڭ يالۋۇرىشىغا جاۋاب بەرگەن. بۇ يېڭى بۇلاقنىڭ سۈيىنى ئىچكەندىن كېيىن، شىمشون قايتا كۈچ-قۇۋۋەتكە تولۇپ، ئۇنىڭغا جان كىرىپ قالغان (ھاكىملار 15:19-نى ئوقۇڭ). قارىماققا، كېيىنرەك سامۇئىل پەيغەمبەر ھاكىملار كىتابىنى يازغاندا، بۇ يېڭى بۇلاق تېخى بار ئىدى. ئىسرائىللار بۇ بۇلاق سۈيىنى كۆرگەن چاغدا، ئەگەر ئۇلار يەھۋاغا تايانسا، ئۇ موھتاجلىقتا قالغان سادىق خىزمەتچىلىرىگە يار-يۆلەك بولىدىغانلىقىنى ئېسىگە ئالغان.
شىمشون يەھۋا تەمىنلەپ بەرگەن سۇنى ئىچكەندىن كېيىن، كۈچ-قۇۋۋەتكە تولغان.يەھۋا روھىي جەھەتتىن كۈچلۈك بولۇشىمىز ئۈچۈن تەمىنلەۋاتقان ھەممە نەرسىلەردىن تولۇق پايدىلىنىمىز (10-ئابزاسقا قاراڭ)
10. يەھۋانىڭ ياردىمىگە تايىنىش نېمىلەرنى ئۆز ئىچىگە ئالىدۇ؟ (رەسىمگە ھەم قاراڭ)
10 مەيلى قانداق تالانت ۋە قابىلىيەتكە ئىگە بولايلى ياكى يەھۋاغا خىزمەت قىلىشتا قانداق ئۇتۇققا ئېرىشەيلى، بىزمۇ يەھۋانىڭ ياردىمىگە موھتاج. پەقەت يەھۋاغا تايانساقلا، ھەقىقىي ئۇتۇققا ئېرىشىشنىڭ مۇمكىنلىكىنى كەمتەرلىك بىلەن ئېتىراپ قىلىشىمىز لازىم. شىمشون يەھۋا بەرگەن سۇنى ئىچكەندىن كېيىن قايتا كۈچ-قۇۋۋەتكە تولغان. خۇددى شىمشوندەك، بىزمۇ يەھۋاغا سادىق قېلىش ئۈچۈن ئۇنىڭ ياردىمىنى قوبۇل قىلىشىمىز كېرەك.—مەتتا 11:28.
11. يەھۋانىڭ ياردىمىنىڭ پايدىسىنى تولۇق كۆرۈش ئۈچۈن نېمە قىلالايمىز؟ مىسال كەلتۈرۈڭ.
11 روسىيەدە ئېغىر زىيانكەشلىككە ئۇچرىغان ئالېكسېي ئىسىملىك بۇرادەرنىڭ مىسالىنى كۆرۈپ چىقايلى. شۇنداق قىيىن ۋەزىيەتتە، ئۇنىڭ كۈچلۈك بولۇشىغا نېمە ياردەم بەرگەن؟ ئايالى بىلەن ئىككىسى دائىم روھىي ئىشلار بىلەن مەشغۇل بولغان. ئالېكسېي مۇنداق دەيدۇ: «مەن دائىم شەخسىي تەتقىق ئۆتكۈزۈشكە ۋە ھەر كۈنى مۇقەددەس كىتابنى ئوقۇشقا تىرىشىمەن. ھەر كۈنى ئەتىگەندە ئايالىم بىلەن كۈندىلىك ئايەتنى مۇھاكىمە قىلىپ، بىللە دۇئا قىلىمىز». ئۇنىڭ مىسالىدىن قانداق ساۋاق ئالىمىز؟ ئۆزىمىزگە تايىنىشنىڭ ئورنىغا، يەھۋاغا تايىنىشىمىز كېرەك. بۇنىڭ ئۈچۈن دائىم ئېتىقادىمىزنى كۈچلەندۈرىدىغان ئىشلار بىلەن مەشغۇل بولۇشىمىز لازىم. ھەر كۈنى مۇقەددەس كىتابنى ئوقۇش، دۇئا قىلىش، جامائەت ئىبادەت يىغىلىشلىرىغا ۋە ۋەز خىزمەتكە قاتنىشىش ئارقىلىق ئىمان-ئېتىقادىمىزنى كۈچلەندۈرەلەيمىز. شۇ چاغدىلا، يەھۋا ئۇنىڭغا خىزمەت قىلىش ئۈچۈن كۆرسەتكەن تىرىشچانلىقىمىزنى مول بەرىكەتلەيدۇ. ئۇ شىمشوننى كۈچلەندۈرگەندەك، بىزنىمۇ چوقۇم كۈچلەندۈرەلەيدۇ.
شىمشون يەھۋانىڭ ئىرادىسىنى ئورۇنلاشنى توختاتمىغان
12. شىمشون قانداق ناتوغرا قارار چىقارغان ۋە بۇنىڭ ئىلگىرىكى ۋەزىيەت بىلەن قانداق پەرقى بولغان؟
12 شىمشون بىزگە ئوخشاش نامۇكەممەل ئىنسان بولغان. شۇڭا، ئۇ بەزىدە ناتوغرا قارارلارنى چىقارغان. بىر قېتىم ئۇ چىقارغان قارار ئېچىنىشلىق ئاقىۋەت ئېلىپ كەلگەن. شىمشون بىر مەزگىل ھاكىم بولۇپ خىزمەت قىلغاندىن كېيىن، «سورېق جىلغىسىدا ياشايدىغان دىلەيلا ئىسىملىك بىر ئايالغا ئاشىق بولۇپ» قالغان (ھاكىم. 16:4). ئۇنىڭدىن ئاۋۋال، ئۇ فىلىستىيەلىك بىر ئايالغا ئۆيلەنمەكچى بولغان، ئەمما بۇ يەھۋانىڭ ئىرادىسى ئىدى. شۇ ئارقىلىق شىمشون فىلىستىيىلىكلەرگە قارشى چىقىش ئۈچۈن پۇرسەت ئىزدىگەن. كېيىنرەك، شىمشون فىلىستىيەلىكلەرنىڭ گازا شەھىرىدە بىر پاھىشە ئايالنىڭ ئۆيىدە تۇرغان. شۇ چاغدا، خۇدا ئۇنىڭغا كۈچ-قۇۋۋەت بېرىپ، شىمشون شەھەر دەرۋازىسىنى قۇمۇرۇپ تاشلاپ، شەھەرنى ھىمايىسىز قالدۇرغان (ھاكىم. 14:1–4؛ 16:1–3). لېكىن، دىلەيلا بىر ئىسرائىل ئايال بولغان بولۇشى مۇمكىن، شۇڭا شىمشوننىڭ بۇ ئايال بىلەن مۇناسىۋەت ئورنىتىشى فىلىستىيىلىكلەرگە قارشى ئۇرۇش قىلىش پۇرسىتىنى ئىزدەش بىلەن ھېچقانداق ئالاقىسى يوق ئىدى.
13. دىلەيلا شىمشوننى ئۆز ئالدام خالتىسىغا چۈشۈرۈش ئۈچۈن نېمە قىلغان؟
13 دىلەيلا فىلىستىيەلىكلەردىن كۆپ پۇل ئېلىپ، شىمشونغا ساتقۇنلۇق قىلغان. شىمشون دىلەيلانى شۇنچىلىك ياخشى كۆرۈپمۇ، ئۇنىڭ قارا نىيىتىنى بايقىمىغانمۇ؟ مەيلى قانداق بولۇشىدىن قەتئىينەزەر، دىلەيلا قايتا-قايتا شىمشونغا ئارام بەرمەي، ئۇنىڭ كۈچ-قۇۋۋىتىنىڭ سىرىنى بىلمەكچى بولغان. ئاخىرىدا شىمشون زېرىكىپ كېتىپ، ئۇنىڭغا ھەممىسىنى ئېيتىپ بەرگەن. ئېچىنارلىقى، شىمشون ناتوغرا قارار چىقىرىپ، ئۆز كۈچ-قۇۋۋىتىدىن ھەمدە خۇدانىڭ رازىللىقىدىن ۋاقتىنچە ئايرىلىپ قالغان ئىدى.—ھاكىم. 16:21–25.
14. شىمشون دىلەيلاغا ئىشىنىپ، قانداق ئېچىنىشلىق ئاقىۋەتكە قالغان؟
14 شىمشون يەھۋاغا ئەمەس، دىلەيلاغا ئىشەنگەن. شۇ سەۋەب، بۇ خاتا قارارىنىڭ ئېچىنىشلىق ئاقىۋىتىنى كۆرگەنىدى. فىلىستىيەلىكلەر ئۇنى تۇتۇۋېلىپ، كۆزلىرىنى ئويۇۋەتكەن. ئۇ گازا شەھىرىدىكى زىندانغا تاشلانغان ۋە ئۇ يەردىكى كىشىلەر ئۇنى تۈگمەن تېشىنى ئايلاندۇرۇشقا مەجبۇرلىغان. كېيىن، فىلىستىيەلىكلەر چوڭ بىر تەبرىكلەش مۇراسىمى ئۈچۈن جەم بولغاندا شىمشوننى ھاقارەتلىگەن. ئۇلار شىمشوننى تۇتۇۋالغىنى ئۈچۈن ساختا خۇداسى داگونغا قۇربانلىقلارنى كەلتۈرگەن. ئۇلار شىمشوننى زاڭلىق قىلىپ كۆڭۈل ئېچىش ئۈچۈن زىنداندىن چىقارغان.—ھاكىم. 16:21–25.
فىلىستىيەلىكلەر ئۈستىدىن چىقارغان ھۆكۈمىنى ئەمەلگە ئاشۇرۇش ئۈچۈن، يەھۋا شىمشونغا كۈچ بەرگەن (15-ئابزاسقا قاراڭ)
15. شىمشون قايتىدىن يەھۋاغا تايانغانلىقىنى قانداق كۆرسەتكەن؟ (ھاكىملار 16:28–30؛ مۇقاۋىدىكى رەسىمگە قاراڭ)
15 شىمشون چوڭ بىر خاتالىق ئۆتكۈزگەن، بىراق ئۇ داۋاملىق يەھۋاغا خىزمەت قىلغان. ئۇ يەھۋانىڭ ئىرادىسى بويىچە، فىلىستىيەلىكلەرنى يوق قىلىش ئۈچۈن پۇرسەت ئىزدىگەن (ھاكىملار 16:28–30-نى ئوقۇڭ). شىمشون يەھۋادىن: «فىلىستىيەلىكلەردىن ئىنتىقام ئېلىۋالاي»،— دەپ ئۆتكەن. ھەق خۇدا ئۇنىڭ ئۆتۈنۈشىگە جاۋاب بېرىپ، ئۇنىڭغا قايتىدىن ئالاھىدە كۈچ بەرگەن. نەتىجىدە، شىمشون ئىلگىرىكىدىنمۇ كۆپرەك فىلىستىيەلىكلەرنى ئوڭۇشلۇق ئولتۈرگەنىدى.
16. شىمشوننىڭ خاتالىقىدىن قانداق ساۋاق ئالالايمىز؟
16 شىمشون ئۆز خاتالىقى سەۋەبلىك، ئېچىنىشلىق ئاقىۋەتنى باشتىن كەچۈرگەن بولسىمۇ، يەھۋانىڭ ئىرادىسىنى ئەمەلگە ئاشۇرۇشنى توختاتمىغان. ھەتتا بىزمۇ خاتالىق ئۆتكۈزۈپ قويساق، بىزگە نەسىھەت بېرىپ تۈزەتسە ياكى ۋەزىپىمىزدىن ئايرىلساق، يەھۋاغا خىزمەت قىلىشنى توختاتماسلىقىمىز كېرەك. ئۇنتۇماڭكى، يەھۋا ھەرقاچان بىزنى كەچۈرۈشكە تەييار (زەبۇر 103:8–10). شىمشوننىڭ ئۈلگىسىدىن ئۆگەنگىنىمىزدەك، خۇدا خاتالىقلىرىمىزغا قارىماي، ئۇنىڭ ئىرادىسىنى ئورۇنلىشىمىز ئۈچۈن بىزگە كۈچ بېرەلەيدۇ.
شىمشون ئۆز خاتالىقى ئۈچۈن قاتتىق ئازابلانغان بولسىمۇ، خۇدا خىزمەت قىلىشنى توختاتمىغان. بىزمۇ شۇنداق قىلىشىمىز كېرەك (17، 18-ئابزاسلىرىغا قاراڭ)
17، 18. مايكىلنىڭ ئۈلگىسى سىزگە قانداق ئىلھام-مەدەت بەردى؟ (رەسىمگە ھەم قاراڭ)
17 مايكىل ئىسىملىك ياش بۇرادەرنىڭ مىسالىنى كۆرۈپ باقايلى. ئۇ روھىي ئىشلار بىلەن ئىنتايىن ئالدىراش ئۆتۈپ، ياردەمچى خىزمەتچى ۋە پىدائىي ۋەز ئېيتقۇچى بولۇپ خىزمەت قىلغان. ئەپسۇسكى، ئۇ بىر خاتالىق ئۆتكۈزۈپ، جامائەتتىكى ۋەزىپىلىرىدىن ئايرىلىپ قالغان. مايكل مۇنداق دەيدۇ: «مۇشۇ ۋاقىتقىچە، مەن يەھۋاغا قىزغىن خىزمەت قىلىۋاتاتتىم. ئەمدى بىر دەقىقىدە ئالدىمدا بىر تام پەيدا بولۇپ، ھېچنەرسە قىلالمايدىغاندەك ھېس قىلدىم. ئەلۋەتتە، يەھۋا مېنى ھېچقاچان تاشلاپ كەتمەيدىغانلىقىنى بىلەتتىم. لېكىن، ئۇنىڭ بىلەن بولغان مۇناسىۋىتىم ئەمدى ھېچقاچان بۇرۇنقىدەك بولالمايدۇ ۋە جامائەتتە ئىلگىرىكىدەك قىزغىن خىزمەت قىلالمايمەن دەپ ئەنسىرىدىم».
18 كىشنى خۇشال قىلارلىق يېرى، مايكىل بەل قۇيۋەتمىگەن. ئۇ مۇنداق دەيدۇ: «مەن پۈتۈن دىققىتىمنى يەھۋا بىلەن بولغان مۇناسىۋىتىمنى ئەسلىگە كەلتۈرۈشكە قاراتتىم. ئۇنىڭغا ئىچ باغرىمنى تۆكۈپ، دۇئا قىلدىم، شەخسىي تەتقىق ئۆگىنىشى ئۆتكۈزدۈم ۋە ئۆگەنگەنلىرىم ئۈستىدىن چوڭقۇر ئويلاندىم». ۋاقىت ئۆتۈپ، مايكىل جامائەتتىكى ۋەزىپىلىرىگە قايتا ئېرىشكەن. ھازىر ئۇ ئاقساقال ۋە پىدائىي ۋەز ئېيتقۇچى بولۇپ خىزمەت قىلىۋاتىدۇ. ئۇ يەنە مۇنداق دەيدۇ: «قېرىنداشلار ماڭا كۆپ ياردەم بەرگەن. بولۇپمۇ، ئاقساقاللار يەھۋانىڭ مېنى تېخىغىچە ياخشى كۆرىدىغانلىقىغا ئىشەندۈرگەن. ھازىر قايتىدىن جامائەتتە پاك ۋىجدان بىلەن خىزمەت قىلىۋاتىمەن. بۇ كەچۈرمىشتىن يەھۋانىڭ چىن يۈرەكتىن توۋا قىلغانلارنى كەچۈرىدىغانلىقىنى ئۆگەندىم». بىزمۇ خاتالىق ئۆتكۈزۈشىمىز مۇمكىن. لېكىن، خاتالىقىمىزنى تۈزىتىش ئۈچۈن قولىمىزدىن كېلىشىچە تىرىشساق ۋە داۋاملىق يەھۋاغا تايانساق، ئۇ بىزنى چوقۇم ئۆز ئىرادىسىنى ئورۇنلاش ئۈچۈن قوللىنىپ، بىزنى بەرىكەتلەيدۇ.—زەبۇر 86:5؛ پەند. نە 28:13.
19. شىمشوننىڭ مىسالى ئىمان-ئېتىقادىڭىزنى قانداق كۈچلەندۈردى؟
19 بۇ ماقالىدە، بىز شىمشوننىڭ ھاياتىدىكى بەزى ھەيران قالارلىق ۋەقەلەرنى كۆرۈپ چىقتۇق. ئۇ نامۇكەممەل بولغان ۋە دىلەيلا بىلەن خاتالىق ئۆتكۈزگەن، ئەمما شۇنىڭغا قارىماي، يەھۋاغا خىزمەت قىلىشنى توختاتمىغان. يەھۋا خۇدامۇ شىمشوندىن ئۈمىد ئۈزمىگەن. خۇدا شىمشوننى كۈچلەندۈرۈپ، ئۇنى يەنە بىر قېتىم ئۆز ئىرادىسىنى ئەمەلگە ئاشۇرۇشتا قوللانغان. يەھۋانىڭ نەزىرىدە شىمشوننىڭ ئېتىقادى كۈچلۈك ئىدى. شۇڭا، خۇدا ئۇنىڭ ئىسىمىنى، ئىبرانىيلارغا يېزىلغان خەت 11-بابتىكى سادىق خىزمەتچىلەر قاتارىدا يازدۇرغان. بولۇپمۇ، بىز ئاجىز بولغاندا، بىزنى كۈچلەندۈرۈشنى خالايدىغان كۆيۈمچان ئاتىمىزغا خىزمەت قىلىش كىشىگە زور ئىلھام-مەدەت بېرىدۇ! شۇنىڭ ئۈچۈن، بىزمۇ شىمشونغا ئوخشاش، يەھۋاغا: «مېنى ئېسىڭگە ئالغىن، ئۆتۈنەي، مېنى كۈچلەندۈرگىن»،— دەپ يالۋۇرايلى.—ھاكىم. 16:28.
152-ناخشا كۈچىمىز، ئۈمىدىمىز ۋە يار-يۆلىگىمىز
a شىمشون توغرۇلۇق مۇقەددەس كىتابتا يېزىلغان. نۇرغۇن كىشىلەر، ھەتتا مۇقەددەس يازمىلارنى ئانچە ياخشى بىلىپ كەتمەيدىغان كىشىلەرمۇ ئۇ ھەققىدە ئاڭلىغان. ئۇنىڭ ھېكايىسى درامىلار، ناخشىلار ۋە فىلىملەردە تەسۋىرلەنگەن. ئەمما، ئۇنىڭ ھاياتى ھەققىدىكى ئىش-ۋەقەلەر ئەپسانە-رىۋايەت ياكى چۆچەك ئەمەس. بىز كۈچلۈك ئىمان-ئېتىقادلىق كىشىدىن كۆپ نەرسىلەرنى ئۆگىنەلەيمىز.
