38-تەتقىق ماقالىسى
ياشلار، قانداق ھايات كەچۈرۈشنى خالايسىلەر؟
«پەرق ئېتىش قابىلىيىتى سېنى قوغدار».—پەند. نە 2:11.
11-ناخشا يەھۋانىڭ كۆڭلىنىخۇش قىلايلى
بۇ ماقالىدە: a
1. يەھوئاش، ئۇززىيا ۋە يوشىيا قانداق قىيىن ۋەزىيەتكە دۇچ كەلگەن؟
سىز بالىلىق ياكى ئۆسمۈرلۈك چېغىڭىزدا، كىچىك بولۇشىڭىزغا قارىماي، خۇدانىڭ ئۆز خەلقىنى باشقۇرۇشقا سىزنى پادىشاھ قىلىپ تاللىغانلىقىنى كۆز ئالدىڭىزغا كەلتۈرۈپ بېقىڭ. ئۆز كۈچىڭىزنى ياكى ھوقۇقىڭىزنى قانداق قوللىنىسىز؟ مۇقەددەس كىتابتا يەھۇدانىڭ پادىشاھى بولغان بىرنەچچە ياشلار توغرۇلۇق يېزىلغان. مەسىلەن، يەھوئاش 7 يېشىدا، ئۇززىيا 16 يېشىدا ۋە يوشىيا 8 يېشىدا پادىشاھ بولۇپ تەيىنلەنگەن. بۇ چوقۇم ئىنتايىن قىيىن ۋەزىپە بولغان. لېكىن، يەھۋا ۋە باشقىلارنىڭ ياردىمىدە، ئۇلار قىيىنچىلىقلارنى يېڭىپ، نۇرغۇن ياخشى ئىشلارنى قىلالىغان.
2. نېمە ئۈچۈن يەھوئاش، ئۇززىيا ۋە يوشىيانىڭ مىساللىرى بىز ئۈچۈن پايدىلىق؟
2 بىز پادىشاھ ياكى خانىش بولمىساقمۇ، مۇقەددەس كىتابتا تىلغا ئېلىنغان بۇ ئۈچ ياشنىڭ مىسالىدىن كۆپ نەرسىلەرنى ئۆگىنەلەيمىز. ئۇلار ياخشى قارارلارنى چىقارغان، لېكىن يامان قارارلارنىمۇ چىقارغان. ھازىر ئۇلارنىڭ مىساللىرىنى كۆرۈپ چىقىپ، ياخشى دوستلارنى تاللاش، كەمتەرلىكنى ساقلاش ۋە دائىم يەھۋانىڭ ئىرادىسى ھەققىدە ئىزدىنىشنىڭ مۇھىملىقىنى كۆرىمىز.
ياخشى دوستلارنى تاللاڭ
ياخشى دوستلارغا قۇلاق سېلىش ئارقىلىق يەھوئاشتىن ئۈلگە ئالالايمىز (3، 7-ئابزاسقا قاراڭ) c
3. يەھوئاش پادىشاھ باش روھانىي يەھوياداھنىڭ نەسىھەتلىرىگە قانداق ئىنكاس قايتۇرغان؟
3 يەھوئاشقا ئوخشاش دانا قارارلارنى چىقىرىڭ. ياش چېغىدا يەھوئاش پادىشاھ دانا قارارلارنى چىقارغان. ئۇنىڭ ئاتىسى بولمىغان، بىراق ئۇ سادىق باش روھانىي يەھوياداھقا قۇلاق سالغان. باش روھانىي يەھوئاشقا ئۆز ئوغلىغا قارىغاندەك قاراپ، ئۇنىڭغا نەسىھەتلەرنى بەرگەن. يەھوئاش بولسا ئۇنىڭ ئۈلگىسىگە قاراپ، پاك ئىبادەتنى تىكلەشكە ۋە خەلقنىڭ يەھۋاغا خىزمەت قىلىشىغا ياردەم بەرگەن. ئۇ ھەتتا يەھۋانىڭ ئىبادەتخانىسىنىڭ رېمونت قىلىش ئىشلىرىنى ئورۇنلاشتۇرغان.—2-تارىخ. 24:1، 2، 4، 13، 14.
4. يەھۋانىڭ كۆرسەتمىلىرىگە قۇلاق سېلىشنىڭ قانداق پايدىسىنى كۆرىمىز؟ (پەندى-نەسىھەت 2:1، 10–12)
4 ئەگەر ئاتا-ئانىڭىز ياكى باشقا بىرى سىزنى يەھۋا خۇدانى سۆيۈشكە ۋە ئۇنىڭ ئۆلچەملىرى بويىچە ياشاشقا ئۆگەتكەن بولسا، بۇ ئىنتايىن قىممەت-باھالىق بىر سوۋغات (پەندى-نەسىھەت 2:1، 10–12-نى ئوقۇڭ). ئاتا-ئانىلار بالىلىرىنى ھەرتۈرلۈك ئۇسۇلدا تەربىيىلەيدۇ. كاتىيا ئىسىملىك قېرىنداشنىڭ دادىسى ئۇنىڭ توغرا قارارلارنى چىقىرىشىغا قانداق ياردەم بەرگەنلىكىنى قاراپ چىقايلى. ھەر كۈنى مەكتەپكە بارغان يولدا دادىسى ئۇنىڭ بىلەن كۈندىلىك ئايەت توغرۇلۇق سۆزلىشەتتى. كاتىيا مۇنداق دەيدۇ: «بۇ مۇھاكىمىلەر شۇ كۈنى پەيدا بولغان قىيىنچىلىقلارغا قارشى تۇرۇشۇمغا ياردەم بېرەتتى». بىراق، ئاتا-ئانىڭىزنىڭ مۇقەددەس كىتابقا ئاساسلانغان قائىدە-تۈزۈملىرى ئەركىنلىكىڭىزنى چەكلىگەندەك ھېس قىلسىڭىزچۇ؟ بۇ قائىدە-تۈزۈملەرنى قوبۇل قىلىشىڭىزغا نېمە ياردەم بېرەلەيدۇ؟ ئاناستاسىيا ئىسىملىك قېرىندىشىمىز ئاتا-ئانىسىنىڭ بەزى قائىدىلەرنى نېمە ئۈچۈن ئورنىتىدىغانلىقىنى چۈشەندۈرۈپ بېرىش ئۈچۈن ۋاقىت چىقارغانلىقىنى ئېيتىپ بەرگەن. ئۇ مۇنداق دەيدۇ: «بۇ قائىدىلەر مېنى چەكلىمەي، ئەكسىچە ئاتا-ئانام مېنى ياخشى كۆرىدىغانلىقىنى ۋە قوغدىماقچى بولغانلىقىنى چۈشىنىشىمگە ياردەم بەردى».
5. ئىش-ھەرىكەتلىرىڭىز ئاتا-ئانىڭىزغا ۋە يەھۋا خۇداغا قانداق تەسىر قىلىدۇ؟ (پەندى-نەسىھەت 22:6؛ 23:15، 24، 25)
5 ئاتا-ئانىڭىزنىڭ مۇقەددەس كىتابقا ئاساسلانغان نەسىھەت-سۆزلىرىگە قۇلاق سالسىڭىز، ئۇلار خۇشال بولىدۇ. ئەڭ مۇھىمى، سىز يەھۋانىڭ كۆڭلىنى خۇرسەن قىلىپ، ئۇنىڭ بىلەن مەڭگۈ دوست بولالايسىز (پەندى-نەسىھەت 22:6؛ 23:15، 24، 25-نى ئوقۇڭ). شۇڭا، ياش يەھوئاشنى ئۈلگە قىلىشىڭىز ئۈچۈن نۇرغۇن ياخشى سەۋەبلەر بار.
6. يەھوئاش كىمنىڭ نەسىھىتىگە قۇلاق سېلىشنى باشلىغان ۋە بۇنىڭ ئاقىۋىتى قانداق بولغان؟ (2-تارىخنامە 24:17، 18)
6 يەھوئاشنىڭ يامان قارارلىرىدىن ساۋاق ئېلىڭ. يەھوياداھ ئۆلگەندىن كېيىن، يەھوئاشنىڭ دوستلىرى ئۇنى يامان ئىشلارنى قىلىشقا دەۋەت قىلغان. ئۇ يەھۋاغا قۇلاق سېلىشنىڭ ئورنىغا، يەھۋانى ياخشى كۆرمەيدىغان يەھۇدانىڭ ئەمىرلىرىگە قۇلاق سېلىشنى تاللىغانىدى (2-تارىخنامە 24:17، 18-نى ئوقۇڭ). يەھوئاش ئۇنى توغرا يولدىن ئازدۇرغان ئاشۇ يامان كىشىلەردىن يىراق تۇرۇشى كېرەكتى، شۇنداق ئەمەسمۇ؟ (پەند. نە 1:10) بىراق، ئۇ شۇنداق قىلىشنىڭ ئورنىغا، ئۇلارنىڭ يامان مەسلىھەتلىرىگە قۇلاق سالغان. ھەتتا ئۆزىنىڭ بىر نەۋرە تۇغقىنى بولغان زەكەرىيا پەيغەمبەرنىڭ نەسىھىتىگە قۇلاق سېلىشنىڭ ئورنىغا، ئۇنى ئۆلتۈرۈشكە بۇيرىغان (2-تارىخ. 24:20، 21؛ مەتتا 23:35). بۇ نېمە دېگەن رەھىمسىز ۋە ئەقىلسىز قارار،— ھە! يەھوئاش ھاياتىنى ياخشى باشلىغان ئىدى. لېكىن، كېيىن يەھۋاغا قارشى چىقىپ، ئۇنىڭ پەيغەمبىرىنى ئۆلتۈرگەن. ئاخىرىدا، يەھوئاشنىڭ خىزمەتچىلىرى ئۇنى ئۆلتۈرگەن (2-تارىخ. 24:22–25). ئەگەر يەھوئاش يەھۋاغا ۋە ئۇنى ياخشى كۆرىدىغان كىشىلەرگە داۋاملىق قۇلاق سالغان بولسا، ھاياتى تامامەن باشقىچە بولاتتى. بۇ ۋەزىيەتتىن قانداق ساۋاق ئالالايسىز؟
7. قانداق كىشىلەر بىلەن دوست بولۇشىمىز كېرەك؟ (رەسىمگە ھەم قاراڭ)
7 يەھوئاشنىڭ يامان قارارىدىن ئالالايدىغان بىر ساۋاق — بىز يەھۋانى سۆيىدىغان ۋە ئۇنى خۇرسەن قىلىشنى خالايدىغان كىشىلەر بىلەن دوست بولۇشىمىز كېرەك. چۈنكى، ئۇلار بىزگە ياخشى تەسىر قىلىدۇ. پەقەت تەڭتۇشلىرىڭىز بىلەنلا دوست بولماڭ. ئۇنتۇماڭكى، يەھوئاش دوستى يەھوياداھتىن خېلىلا كىچىك ئىدى. دوستلارنى تاللىغان چاغدا، ئۆزىڭىزدىن مۇنداق دەپ سوراپ كۆرۈڭ: «دوستلىرىم يەھۋاغا بولغان ئىمان-ئېتىقادىمنى كۈچەيتىشكە ياردەم بېرەمدۇ؟ ئۇلار مېنى خۇدانىڭ ئۆلچەملىرى بويىچە ياشاشقا ئۈندەمدۇ؟ ئۇلار مۇقەددەس كىتابتىكى ھەقىقەتلەر توغرۇلۇق سۆزلىشەمدۇ؟ خۇدانىڭ ئەخلاقىي ئۆلچەملىرىنى ھۆرمەتلەيدىغانلىقىنى كۆرسىتەمدۇ؟ ئۇلار پەقەت قۇلۇقۇمغا خۇش ياقىدىغان نەرسىلەرنى دەمدۇ ياكى كېرەك بولغاندا ماڭا نەسىھەت بېرەمدۇ؟» (پەند. نە 27:5، 6، 17) ئەسلىدە دوستلىرىڭىز يەھۋانى سۆيمىسە، ئۇنداق دوستلارنىڭ ھېچقانداق كېرىكى يوق. دوستلىرىڭىز يەھۋانى سۆيسە، ئۇلاردىن ئايرىلماڭ. چۈنكى، شۇنداق دوستلار سىزگە ياخشى تەسىر قىلالايدۇ.—پەند. نە 13:20.
8. ئىجتىمائىي تورلارنى ئىشلىتىدىغان بولساق، نېمە توغرۇلۇق ئويلىنىشىمىز كېرەك؟
8 ئىجتىمائىي تورلار ئارقىلىق دوستلىرىمىز ۋە ئائىلە ئەزالىرىمىز بىلەن ئالاقە قىلىشنىڭ قۇلايلىق يولى. لېكىن، كۆپ ئادەملەر ئۇلاردىن پايدىلىنىپ، باشقىلارغا ياخشى تەسىرات قالدۇرۇش ئۈچۈن ئۆزلىرىنىڭ نېمە قىلغانلىقى ياكى نېمە سېتىۋالغانلىقى تەسۋىرلەنگەن سۈرەتلەرنى ئىجتىمائىي تورغا چىقىرىپ قويىدۇ. ئىجتىمائىي ئالاقە تورىنى ئىشلەتسىڭىز، ئۆزىڭىزدىن مۇنداق دەپ سوراپ كۆرۈڭ: «مەن باشقىلارغا ياخشى تەسىرات قالدۇرۇشنى خالايمەنمۇ؟ مەقسىتىم باشقىلارغا ئىلھام-مەدەت بېرىشمۇ ياكى ئۆزۈمنى كۆز-كۆز قىلىشمۇ؟ ئىجتىمائىي تورلاردىكى كىشىلەرنىڭ ئوي-پىكىرىم، سۆزلىرىم ۋە ئىش-ھەرىكەتلىرىمگە يامان تەسىر قىلىشىغا يول قويىمەنمۇ؟» يېتەكچى كېڭەشنىڭ ئەزاسى بولۇپ خىزمەت قىلغان نېيتان نورر شۇنداق بىر مەسلىھەت بەرگەن: «ھەممە ئادەملەرنىڭ كۆڭلىنى خۇشال قىلىشقا تىرىشماڭ، چۈنكى ئاخىرىدا ھېچكىمنى خۇشال قىلالمايسىز. يەھۋانىڭ كۆڭلىنى خۇرسەن قىلىشقا تىرىشىڭ، شۇ چاغدا ئۇنى سۆيىدىغان كىشىلەرنىڭ ھەممىسىنى خۇشال قىلالايسىز».
كەمتەر بولۇپقېلىشنىڭ مۇھىملىقى
9. يەھۋا خۇدا ئۇززىيانىڭ نېمە قىلىشىغا ياردەم بەرگەن؟ (2-تارىخنامە 26:1–5)
9 ئۇززىياغا ئوخشاش ياخشى قارارلارنى چىقىرىڭ. پادىشاھ ئۇززىيا ياش ۋاقتىدا كەمتەر ئىدى. ئۇ ھەق خۇدادىن ئەيمىنىشنى ئۆگەنگەن. ئۇززىيا 68 يىل ياشىغان ۋە ھاياتىنىڭ كۆپىنچە قىسىمىنى يەھۋا بەرىكەتلىگەن (2-تارىخنامە 26:1–5-نى ئوقۇڭ). ئۇززىيا ئۆزى دۈشمەنلەشكەن نۇرغۇن يات خەلقلەرنى مەغلۇپ قىلغان ۋە يېرۇسالىم ياخشى قوغداش ئۈچۈن تىرىشقان (2-تارىخ. 26:6–15). شەك-شۈبھىسىزكى، ئۇززىيا ئىنتايىن خۇشال بولغان، چۈنكى يەھۋا خۇدا ھەممىشە ئۇنىڭغا ياردەم بەرگەن ئىدى.—ۋەز 3:12، 13.
10. ئۇززىيا بىلەن نېمە بولغان؟
10 ئۇززىيانىڭ يامان قارارلىرىدىن ساۋاق ئېلىڭ. ئۇززىيا باشقىلارغا نېمە قىلىشنى بۇيرۇق قىلىپ ئۆگىنىپ قالغانىدى. شۇڭا، ئۇ بەلكىم نېمە قىلىشنى خالىسام، شۇنى قىلىمەن دەپ ئويلىغان. بىر كۈنى ئۇززىيا پادىشاھ ئىبادەتخانىغا كىرىپ، ئۆز بېشىمچىلىق قىلىپ، قۇربانگاھتا خۇشپۇراقنى كۆيدۈرمەكچى بولغان. لېكىن، پادىشاھلارنىڭ شۇنداق قىلىشىغا رۇخسەت قىلىنمىغان ئىدى (2-تارىخ. 26:16–18). باش روھانىي ئازارىيا ئۇنى توختاتماقچى بولغاندا، ئۇززىيا قاتتىق ئاچچىقلانغان. بەك ئەپسۇس، ئۇ بۇرۇنقىدەك ساداقەتمەنلىكىنى ساقلىمىغاچ، يەھۋا ئۇنى ماخاۋ كېسىلى بىلەن جازالىغان (2-تارىخ. 26:19–21). ئۇ كەمتەرلىكىنى ساقلاپ قالغان بولسا، ھاياتى تامامەن باشقىچە بولاتتى.
قىلغان ئىشلىرىمىز ئۈچۈن ماختىنىشنىڭ ئورنىغا يەھۋاخۇداغا مىننەتدارلىق بىلدۈرۈشىمىز كېرەك (11-ئابزاسقا قاراڭ) d
11. كەمتەر بولۇپ قېلىشىمىزغا نېمە ياردەم بېرىدۇ؟ (رەسىمگە ھەم قاراڭ)
11 ئۇززىيا پادىشاھلىقى كۈچەيگەن چاغدا، يەھۋانىڭ قىلغان بارچە ياخشىلىقىنى ئۇنتۇپ قالغانىدى. بۇنىڭدىن قانداق ساۋاق ئالالايمىز؟ شۇنى ئۇنتۇمايلىكى، ئېرىشكەن بەرىكەتلىرىمىز ۋە ۋەزىپىلىرىمىز يەھۋادىن كەلگەن. ئۆز ئۇتۇقلىرىمىز بىلەن ماختىنىشنىڭ ئورنىغا، قىلالىغان ئىشلىرىمىز ئۈچۈن ھەممە شان-شەرەپنى يەھۋاغا بېرىشىمىز لازىم b (1-كورىنت. 4:7). ئۆزىمىزنىڭ نامۇكەممەل ۋە بەزىدە تۈزىتىشكە موھتاج بولىدىغانلىقىمىزنى كەمتەرلىك بىلەن ئېتىراپ قىلىشىمىز كېرەك. 60 ياشلىق بۇرادىرىمىز مۇنداق دەيدۇ: «باشقىلار خاتالىقلىرىمنى تۈزەتكەندە، تېزلا خاپا بولماسلىق ياكى كۆڭلۈمنى يېرىم قىلماسلىقنى ئۆگەندىم. بەزىدە ئويلىمايلا، بەزىبىر خاتالىقنى ئۆتكۈزۈپ قويسام، باشقىلار مېنى تۈزىتىدۇ. شۇ چاغدا، ئۆزۈمنى ئۆزگەرتىپ، داۋاملىق قولۇمدىن كېلىشىچە يەھۋاغا خىزمەت قىلىشقا تىرىشىمەن». ھەقىقەتەن، يەھۋادىن ئەيمىنىپ، كەمتەرلىكنى ساقلىساق، ھەقىقىي خۇشال-خۇرام تۇرمۇشقا ئېرىشىمىز.—پەند. نە 22:4.
يەھۋاغا يېقىنلىشىشنىداۋاملاشتۇرۇڭ
12. يوشىيا ئۆسمۈر چېغىدا قانداق قىلىپ يەھۋا خۇداغا يېقىنلاشقان؟ (2-تارىخنامە 34:1–3)
12 يوشىياغا ئوخشاش، ياخشى قارارلارنى چىقىرىڭ. پادىشاھ يوشىيا يەھۋاغا يېقىنلىشىشقا باشلىغاندا، تېخى ئۆسمۈر ئىدى. ئۇ يەھۋانى تونۇپ، ئۇنىڭ ئىرادىسىنى ئورۇنلاشنى خالىغان. لېكىن، ياش پادىشاھنىڭ ھاياتى ئاسان بولمىغان. خەلق ساختا ئىلاھلارغا ئىبادەت قىلغاندا، ئۇ پاك ئىبادەت تەرەپتە چىڭ تۇرۇشى كېرەكتى ۋە بۇ ئۇنىڭ قولىدىن كەلگەن ئىدى! تېخى 20 ياشقا كىرمىگەن پادىشاھ يوشىيا خەلق ئارىسىدىكى ساختا ئىبادەتنى يوق قىلىشنى باشلىغان.—2-تارىخنامە 34:1–3-نى ئوقۇڭ.
13. يەھۋاغا ئۆزىڭىزنى بېغىشلىغاندىن كېيىن، ھاياتىڭىز قانداق ئۆزگىرىدۇ؟
13 ياش بولسىڭىزمۇ، يوشىياغا ئوخشاش داۋاملىق يەھۋاغا يېقىنلىشىڭ ۋە ئۇنىڭ ئېسىل پەزىلەتلىرى ھەققىدە ئۆگىنىڭ. شۇنداق قىلسىڭىز، پۈتۈن ھاياتىڭىزنى خۇداغا بېغىشلاش ئارزۇ-ئىستىكىڭىز كۈچىيىدۇ. ئۆزىڭىزنى بېغىشلاش ھاياتىڭىزغا قانداق تەسىر قىلىدۇ؟ 14 يېشىدا سۇغا چۆمۈلدۈرۈلۈشتىن ئۆتكەن ليۇك ئىسىملىك بۇرادەر مۇنداق دەيدۇ: «ئەمدى مەن يەھۋاغا خىزمەت قىلىشنى ھاياتىمدا بىرىنچى ئورۇنغا قويۇپ، ئۇنىڭ كۆڭلىنى خۇرسەن قىلىشقا تىرىشىمەن» (ماركۇس 12:30). سىزمۇ شۇنداق قىلىشقا تىرىشسىڭىز، مول بەرىكەتلەرگە ئېرىشىسىز!
14. يوشىيانى ئۈلگە قىلغان بەزى قېرىنداشلارنىڭ مىساللىرىنى كەلتۈرۈڭ.
14 خۇدانىڭ ياش خىزمەتچىسى سۈپىتىدە قانداق قىيىنچىلىقلارغا دۇچ كېلىشىڭىز مۇمكىن؟ 12 يېشىدا سۇغا چۆمۈلدۈرۈلۈشتىن ئۆتكەن يوھان ئىسىملىك بۇرادەر سىنىپداشلىرىنىڭ ئۇنىڭغا بېسىم قىلىپ، ئېلېكترونلۇق تاماكىنى چېكىشكە مەجبۇرلىغانلىقىنى ئېيتىپ بەرگەن. ئۇنىڭ بۇ بېسىمغا قارشى تۇرۇشىغا نېمە ياردەم بەرگەن؟ يوھان تاماكا چېكىش سالامەتلىكىگە ۋە ياراتقۇچى يەھۋا بىلەن بولغان مۇناسىۋىتىگە زىيانلىق ئىكەنلىكىنى ئۆز-ئۆزىگە ئەسكەرتىپ تۇرغان. 14 يېشىدا چۆمۈلدۈرۈلۈشتىن ئۆتكەن رييچېل مەكتەپتىكى سىناقلارغا قارشى تۇرۇشىغا نېمە ياردەم بەرگەنلىكىنى چۈشەندۈرۈپ، مۇنداق دېگەن: «مەن دائىم مۇقەددەس كىتاب ۋە يەھۋانى ئېسىمگە سالىدىغان ئىشلارنى ئىزدەشكە تىرىشىمەن. مەسىلەن، تارىخ دەرسى مۇقەددەس كىتابتىكى ۋەقەلەر ياكى پەيغەمبەرلىك سۆزلىرىنى ئېسىمگە سېلىشى مۇمكىن. ياكى بىرى بىلەن پاراڭلاشقاندا، ئۇنىڭغا كۆرسىتىپ بېرىش ئۈچۈن ياخشى بىر ئايەت توغرۇلۇق ئويلايمەن». بەلكىم، پادىشاھ يوشىيا دۇچ كەلگەن قىيىنچىلىقلاردىن پەرقلىق قىيىنچىلىقلارغا دۇچ كېلىدىغانسىز. لېكىن، ئۇنىڭدىن ئۈلگە ئېلىپ، دانا ۋە سادىق بولالايسىز. ھازىر ياش چېغىڭىزدا قىيىنچىلىقلارغا بەرداشلىق بەرسىڭىز، بۇ سىزنى كېلەچەكتە دۇچ كېلىدىغان قىيىنچىلىقلارغا تەييارلايدۇ.
15. يوشىيا پادىشاھنىڭ يەھۋاغا سادىق بولۇپ قېلىشىغا نېمە ياردەم بەرگەن؟ (2-تارىخنامە 34:14، 18–21)
15 يوشىيا پادىشاھ 26 ياشقا كىرگەندە، ئىبادەتخانىنى رېمونت قىلىش ئىشلىرىنى باشلىغان. شۇ چاغدا، مۇسا پەيغەمبەر ئارقىلىق بېرىلگەن قانۇن كىتابى تېپىلغان ئىدى. يوشىيا قانۇندىكى سۆزلەرنى ئاڭلىغاندا، بۇ ئۇنى دەرھال ھەرىكەت قىلىشقا ئۈندىگەن (2-تارىخنامە 34:14، 18–21-نى ئوقۇڭ). سىزمۇ مۇقەددەس كىتابنى دائىم ئوقۇشنى خالامسىز؟ بەلكىم، ھازىر شۇنداق قىلىشقا تىرىشىۋاتقانسىز. ئۆزىڭىزگە ياردەم بېرەلەيدىغان ئايەتلەرنى بەلگە سېلىپ قويۇشنى ياخشى كۆرەمسىز؟ ئىلگىرى تىلغا ئېلىنغان ليۇك ئۆزى ياقتۇرغان ئوي-پىكىرلەرنى يېزىپ قويىدۇ. سىزمۇ ئۆزىڭىزگە ياردەم بېرىدىغان ئايەتلەرنى ياكى ئوي-پىكىرلەرنى ئېسىڭىزگە سېلىۋېلىش ئۈچۈن يېزىپ قويالامسىز؟ مۇقەددەس كىتابنى ياخشى بىلىپ، ئۇنى ياخشى كۆرگەنسېرى، خۇداغا خىزمەت قىلىش ئارزۇ-ئىستىكىڭىز كۈچىيىدۇ. خۇدانىڭ سۆزى پادىشاھ يوشىيانى توغرا ئىشلارنى قىلىشقا دەۋەت قىلغاندەك، سىزنىمۇ توغرا ئىشلارنى قىلىشقا دەۋەت قىلىدۇ.
16. يوشىيا نېمە ئۈچۈن چوڭ خاتالىق قىلغان ۋە بىز بۇنىڭدىن قانداق ساۋاق ئالىمىز؟
16 يوشىيانىڭ يامان قارارىدىن ساۋاق ئېلىڭ. يوشىيا تەخمىنەن 39 ياشتا بولغاندا، چوڭ بىر خاتالىق ئۆتكۈزۈپ، ھاياتىدىن ئايرىلغان. ئۇ يەھۋادىن يول-يورۇق سوراشنىڭ ئورنىغا، ئۆزىگە ئىشەنگەن (2-تارىخ. 35:20–25). بۇ ھەممىمىز ئۈچۈن مۇھىم بىر ساۋاق. مەيلى قانچە ياشتا بولايلى ياكى قانچە ئۇزۇن يىل ھەقىقەتتە بولايلى، ئۇنىڭغا قارىماستىن، داۋاملىق يەھۋادىن يول-يورۇق ئىزدىشىمىز لازىم. يول-يورۇق ئۈچۈن دائىم دۇئا قىلىشىمىز، مۇقەددەس كىتابنى تەتقىق قىلىپ ئۆگىنىشىمىز ۋە روھىي جەھەتتىن يېتىلگەن قېرىنداشلاردىن مەسلىھەت سورىشىمىز كېرەك. شۇنداق قىلساق، ئۆزىمىزنى تېخىمۇ خۇشال-خۇرام ھېس قىلىپ، چوڭ خاتالىقلارنى ئازىراق ئۆتكۈزۈپ قويىمىز.—ياقۇپ 1:25.
ياشلار، سىلەر بەختلىكھايات كەچۈرەلەيسىلەر
17. يەھۇدانىڭ ئۈچ پادىشاھىدىن قانداق ساۋاق ئالالايمىز؟
17 ياشلىقتا ئاجايىپ ئىشلارنى قىلىشنىڭ پۇرسىتى كۆپ. يەھوئاش، ئۇززىيا ۋە يوشىيانىڭ مىساللىرى ياشلارنىڭ دانا قارار چىقىرىپ، يەھۋانىڭ كۆڭلىنى سۆيۈندۈرەلەيدىغانلىقىنى كۆرسىتىدۇ. دەرۋەقە، كۆرۈپ چىققىنىمىزدەك، بۇ ياشلار خاتالىقلارنى ئۆتكۈزۈپ، يامان ئاقىۋەتكە قالغان. لېكىن، سىز ئۇلارنىڭ ياخشى تەرەپلىرىدىن ئۈلگە ئېلىپ، ئۇلارغا ئوخشاش خاتالىقلارنى ئۆتكۈزۈشتىن ساقلانسىڭىز، شاد-خۇرام ھايات كەچۈرەلەيسىز.
ياش داۋۇت يەھۋاغا يېقىنلىشىش ئۈچۈن ھەرىكەت قىلغان. ئۇ خۇدانى خۇشال قىلىپ، بەختلىك ھايات كەچۈرگەن (18-ئابزاسقا قاراڭ)
18. ھاياتىڭىز بەختلىك بولالايدىغانلىقىنى مۇقەددەس كىتابتىكى قانداق مىساللار كۆرسىتىدۇ؟ (رەسىمگە ھەم قاراڭ)
18 مۇقەددەس كىتابتا يەھۋاغا يېقىنلىشىشىپ، ئۇنىڭ رازىلىقىغا ئېرىشىپ، خۇشال-خۇرام ھايات كەچۈرگەن كىشىلەرنىڭ نۇرغۇن مىساللىرى بار. ئۇلاردىن بىرى داۋۇت پادىشاھ. ئۇ ياش ۋاقتىدا، خۇدا تەرەپتە تۇرۇپ، كېيىن سادىق پادىشاھ بولغان. ئەلۋەتتە، ئۇ بەزى خاتالىقلارنى ئۆتكۈزگەن، لېكىن بۇنىڭغا قارىماستىن، خۇدا ئۇنى ساداقەتمەن كىشى دەپ قارىغان (1-پادىشاھ. 3:6؛ 9:4، 5؛ 14:8). داۋۇتنىڭ ھاياتى ۋە سادىق خىزمىتى توغرۇلۇق ئوقۇپ، ئىلھام-مەدەت ئالالايسىز. ئۇنىڭدىن باشقا، ماركۇس ياكى تىموتىينىڭ مىساللىرىنى ئۆگەنسىڭىز بولىدۇ. ئۇلار ياش چېغىدىن باشلاپ يەھۋاغا خىزمەت قىلغان ۋە خۇدانىڭ رازىلىقىغا ئېرىشىپ، خۇشال-خۇرام ھايات كەچۈرگەن.
19. ھاياتىڭىز قانداق بولۇشى مۇمكىن؟
19 كېلەچەكتە خۇشال-خۇرام ھايات كەچۈرۈشىمىز، ھازىرنىڭ ئۆزىدە قانداق ھايات كەچۈرۈۋاتقانلىقىمىز بىلەن زىچ باغلىنىشلىق. سىز ئۆز-ئۆزىڭىزگە ئەمەس، يەھۋاغا تايانسىڭىز، ئۇ سىزگە يول-يورۇق بېرىدۇ (پەند. نە 20:24) سىز خۇشال-خۇرام ۋە مول بەرىكەتلەرگە تولغان ھاياتقا ئېرىشەلەيسىز. ئېسىڭىزدە بولسۇنكى، يەھۋا ئۇنىڭ ئۈچۈن قىلىۋاتقان بارچە ئىشلىرىڭىزنى قەدىرلەيدۇ. ھاياتىڭىزنى ئاسماندىكى مېھىر-مۇھەببەتلىك ئاتىڭىزغا بېغىشلاشتىن ئارتۇقراق ياخشى ئىش بارمۇ؟
24-ناخشا كۆزۈڭ بولسۇن مۇكاپاتتا!
a ياشلار، يەھۋا سىلەرنىڭ ئۇنىڭ بىلەن بولغان دوستلۇقۇڭلار سىناققا دۇچ كېلىدىغانلىقىنى بىلىدۇ. ئاسماندىكى ئاتىڭىزنىڭ كۆڭلىنى خۇرسەن قىلىدىغان دانا قارارلارنى قانداق چىقىرالايسىز؟ ھازىر يەھۇدانىڭ پادىشاھلىرى بولغان ئۈچ ياشنىڭ مىساللىرىنى كۆرۈپ چىقايلى. ئۇلارنىڭ مىساللىرىدىن نېمىلەرنى ئۆگىنەلەيدىغانلىقىڭىزغادىققەت قىلىڭ.
b «ئىجتىمائىي تورلاردا چولپان بولۇش شۇنچە مۇھىممۇ؟» (باشقا تىلدا) ناملىق ماقالىدىكى «ساختا كەمتەرلىكنى كۆرسىتىشتىن ئېھتىيات قىلىڭ» (باشقا تىل) دېگەن رامكىغا قاراڭ.
