41-تەتقىق ماقالىسى
پېترۇسنىڭ ئىككى پارچە خېتىدىن نېمىلەرنى ئۆگىنەلەيمىز؟
«مەن يەنىلا ھەردائىم بۇ ئىشلار توغرۇلۇق ئەسكەرتىپ تۇرماقچىمەن».—2-پېتر. 1:12.
29-ناخشا ساداقەتمەنلىكنىساقلاپ يۈرۈش
بۇ ماقالىدە: a
1. پېترۇسنىڭ ئۆمرىنىڭ ئاخىرلىشىشىغا ئاز قالغان ۋاقىتتا، يەھۋا ئۇنى نېمە قىلىشقا دەۋەت قىلغان؟
ئەلچى پېترۇس پات يېقىندا ئۆزىنىڭ ئۆمرىنىڭ ئاخىرلىشىدىغانلىقىنى بىلگەن. ئۇ نەچچە ئون يىل ساداقەتمەنلىك بىلەن خىزمەت قىلىش جەريانىدا ئەيسا مەسىھكە ئەگىشىپ ماڭغان. ۋەز ئېيتىش ئۈچۈن يېڭى جايلارغا كۆچۈپ بارغان ۋە يېتەكچى كېڭەشنىڭ بىر ئەزاسى سۈپىتىدە خىزمەت قىلغان. ئۆمرىنىڭ ئاخىرلىشىشىغا ئاز قالغان ۋاقىتتا يەھۋا ئۇنىڭغا تېخىمۇ كۆپرەك ئىشنى تاپشۇرغان. مىلادى 62—64-يىللار ئارىسىدا، پېترۇس خۇدانىڭ كۆرسەتمىسى بىلەن ئىككى پارچە خەتنى يازغان. بۇلار مۇقەددەس كىتابتىكى پېترۇس يازغان بىرىنچى ۋە ئىككىنچى خەتلەر. پېترۇس ئۆلۈپ كەتكەندىن كېيىن، مۇشۇ خەتلەرنىڭ داۋاملىق ئېتىقادچى قېرىنداشلىرىغا ئىلھام بېرىشىنى ئۈمىد قىلغان.—2-پېتر. 1:12–15.
2. نېمە ئۈچۈن پېترۇسنىڭ خەتلىرى دەل ۋاقىتىدا يېزىلغان دېيىشكە بولىدۇ؟
2 ئېتىقادچى قېرىنداشلىرى تۈرلۈك سىناقلار تۈپەيلى ئازاب-ئوقۇبەتنى باشتىن كەچۈرگەن ۋاقىتتا، پېترۇس خۇدانىڭ روھىنىڭ ياردىمىدە ئاشۇ ئىككى پارچە خەتنى يازغان (1-پېتر. 1:6). شۇ چاغدا، رەزىل كىشىلەر جامائەتتە ساختا تەلىملەرنى يېيىشقا ئۇرۇنغان ۋە ئادەملەرنى ناپاك ئىشلارنى قىلىشقا ئازدۇرغان (2-پېتر. 2:1، 2، 14). ئۇنىڭدىن باشقا، يېرۇسالىمدا ياشايدىغان مەسىھ ئەگەشكۈچىلىرى ئۈچۈن كۆپ ئۆتمەي ھەممە نەرسىنىڭ ئاخىرى كېلەتتى، يەنى رىم ئەسكەرلىرى يېرۇسالىم شەھىرىنى ۋە شەھەردىكى ئىبادەتخانىنى يوق قىلاتتى (1-پېتر. 4:7). شەك-شۈبھىسىزكى، پېترۇسنىڭ خەتلىرى شۇ چاغدا مەسىھ ئەگەشكۈچىلىرىنىڭ سىناقلارغا قارىماي، خۇداغا سادىق بولۇپ قېلىشىغا ۋە كېلەچەكتە باشقا سىناقلارغا ئۆزىنى تەييارلىشىغا ياردەم بەرگەن b.
3. پېترۇسنىڭ يازغان خەتلىرىنى تەتقىق قىلىپ ئۆگىنىش نېمە ئۈچۈن پايدىلىق؟
3 گەرچە پېترۇس بىرىنچى ئەسىردە ياشىغان مەسىھ ئەگەشكۈچىلىرىگە شۇ خەتلەرنى يازغان بولسىمۇ، بىراق يەھۋا بۇ خەتلەرنى مۇقەددەس كىتابقا كىرگۈزگەن. شۇڭا، بىز ھازىر بۇ خەتلەردىن پايدىلىنالايمىز (رىملىقلار 15:4). بۈگۈنكى كۈندە، بۇ دۇنيا ناپاك ئىش-ھەرىكەتلەرنى تەشۋىق قىلىۋاتقاندا، بىز يەھۋاغا خىزمەت قىلىشىمىزنى قىيىنلاشتۇرىدىغان سىناقلارغا دۇچ كېلىمىز. ئۇنىڭدىن باشقا، ئۇزۇن ئۆتمەي يەھۇدىيلارنىڭ تۈزۈمىگە خاتىمە بېرىلگەن چاغدىكىدىنمۇ چوڭراق دەھشەتلىك بالايىئاپەتنى باشتىن كەچۈرىمىز. بىز پېترۇسنىڭ ئىككى پارچە خېتىدىن بەزى مۇھىم ئەسكەرتىشلەرنى تاپالايمىز. ئۇلار بىزنىڭ يەھۋانىڭ كۈنىنى ئۈمىد بىلەن كۈتۈشىمىزگە ۋە ئىنسانلاردىن قورقۇشنى يېڭىشىمىزگە ھەم چىن قەلبىمىزدىن بىر-بىرىمىزنى سۆيۈشنى ئۆگىنىشىمىزگە ياردەم بېرىدۇ. ئاشۇ ئەسكەرتىشلەردىن ئاقساقاللارمۇ جامائەتتىكى ئېتىقادچى قېرىنداشلىرىنىڭ ئىمان-ئېتىقادتا مەھكەم تۇرۇشىغا قانداق ياردەم بېرىشنى ئۆگىنەلەيدۇ.
ئۈمىد بىلەن كۈتۈڭ
4. 2-پېترۇس 3:3، 4-ئايەتلەردە يېزىلغاندەك، ئىمان-ئېتىقادىمىزنى نېمە تەۋرىتىپ قويۇشى مۇمكىن؟
4 ئەتراپىمىزدا مۇقەددەس كىتابتىكى بېشارەتلەرگە ئىشەنمەيدىغان ئادەملەر نۇرغۇن. بىز ئۇزۇن يىللاردىن بۇيان، بۇ دۇنيانىڭ ئاخىرلىشىشىنى ئۈمىد بىلەن كۈتكەچكە، نۇرغۇن قارشىلاشقۇچىلارنىڭ مەسخىرىسىگە ئۇچراپ كېلىۋاتىمىز. بەزى تەنقىد قىلغۇچىلار ھەتتا دۇنيانىڭ ئاخىرى مەڭگۈ كەلمەيدۇ دەيدۇ (2-پېترۇس 3:3، 4-نى ئوقۇڭ). ئەگەر بىز ۋەز قىلغاندا ئۇچرىتىدىغان ئۆي ئېگىسى، خىزمەتدىشىمىز ياكى ئۆز ئائىلىمىزدىكى بىرىدىن مۇشۇ سۆزلەرنى ئاڭلىساق، ئىمان-ئېتىقادىمىز تەۋرىنىپ قېلىشى مۇمكىن. شۇنداق ۋەزىيەتتە، ئەلچى پېترۇس بىزگە نېمە ياردەم بېرەلەيدىغانلىقىنى چۈشەندۈرگەن.
5. يەھۋانىڭ رەزىل دۇنيانى يوق قىلىش ۋاقتىنى چىداملىق بىلەن كۈتۈشكە نېمە ياردەم بېرىدۇ؟ (2-پېترۇس 3:8، 9)
5 بەزىلەر قارىماققا يەھۋا بۇ رەزىل دۇنيانى يوق قىلىدىغان ۋاقتىنى بەك كېچىكتۈرۈۋەتتى دەپ قارايدۇ. پېترۇسنىڭ يازغانلىرى بىزنىڭ توغرا كۆز قاراشنى ساقلىشىمىزغا ياردەم بېرەلەيدۇ. چۈنكى، ئۇلار بىزگە يەھۋانىڭ ۋاقىتقا بولغان كۆز قارىشى ئىنسانلارنىڭكىدىن پەرقلىق ئىكەنلىكىنى ئەسكەرتىدۇ (2-پېترۇس 3:8، 9-نى ئوقۇڭ). يەھۋا ئۈچۈن مىڭ يىل بىر كۈنگە ئوخشاش. ئۇ سەۋرچان، ھېچكىمنىڭ ھالاك بولۇشىنى خالىمايدۇ. ئۇ بەلگۈلىگەن كۈن كەلگەندە، بۇ رەزىل دۇنيانىڭ تۈزۈلمىسى يوق بولىدۇ. شۇڭا، ھازىر ۋاقىتنىڭ بارىدا، ۋاقتىمىزدىن ياخشى پايدىلىنىپ، ھەر مىللەت خەلقىگە گۇۋاھلىق بېرىش بىز ئۈچۈن ھەقىقەتەن زور شان-شەرەپ!
6. يەھۋانىڭ كۈنىنى تەقەززالىق بىلەن كۈتۈش ئۈچۈن نېمە قىلالايمىز؟ (2-پېترۇس 3:11، 12)
6 پېترۇس بىزنى يەھۋانىڭ كۈنىنى تەقەززالىق بىلەن كۈتۈشكە دەۋەت قىلغان (2-پېترۇس 3:11، 12-نى ئوقۇڭ). بۇنى قانداق قىلالايمىز؟ ئەگەر مۇمكىن بولسا، ھەر كۈنى يېڭى دۇنيادا ئېرىشىدىغان بەرىكەتلەر ھەققىدە چوڭقۇر ئويلىنىشىمىز كېرەك. ئۆزىڭىزنى ساپ ھاۋادىن نەپەس ئېلىۋاتقان، ساغلام يېمەك-ئىچمەكلەرنى يەۋاتقان، تىرىلگەن يېقىن كىشىلىرىڭىزنى قارشى ئېلىۋاتقان ۋە نەچچە ئەسىر ئىلگىرى ياشىغان ئادەملەرگە مۇقەددەس كىتابتىكى بېشارەتلەرنىڭ ئەمەلگە ئاشقانلىقىنى ئۆگىتىۋاتقانلىقىڭىزنى تەسەۋۋۇر قىلىپ كۆرۈڭ. شۇنداق چوڭقۇر ئويلىنىش سىزنى ئۈمىدۋار بولۇشىڭىزغا ۋە بۇ دۇنيا تۈزۈلمىسىنىڭ پات يېقىندا ئاخىرلىشىدىغانلىقىنى ئەستە تۇتۇشىڭىزغا ياردەم بېرىدۇ. بىز كېلەچەكتە نېمە ئىشلارنىڭ يۈز بېرىدىغانلىقىنى ئالدىن بىلگەچ، باشقىلارنىڭ ساختا تەلىملەر ئارقىلىق ئازدۇرۇشىغا ئەگىشىپ، ھەقىقەت يولىدىن چىقىپ كەتمەيمىز.—2-پېتر. 3:17.
ئىنسانلاردىن قورقۇشنى يېڭىش
7. ئىنسانلاردىن قورقۇش بىزگە قانداق تەسىر قىلىشى مۇمكىن؟
7 يەھۋانىڭ كۈنى ئىنتايىن يېقىن ئىكەنلىكىنى بىلگەچكە، مۇمكىنقەدەر تېخىمۇ كۆپرەك كىشىلەرگە خۇش خەۋەرنى ئېيتىشنى خالايمىز. شۇنداقتىمۇ، بەزىدە قورقۇپ سۆزلىمەسلىكىمىز مۇمكىن. نېمە ئۈچۈن؟ چۈنكى، بىز ئىنسانلار نېمە دەپ قالار، نېمە ئويلايدۇ دەپ ۋاقتىنچە ئەنسىرىشىمىز مۇمكىن. پېترۇسمۇ شۇنداق ۋەزىيەتنى باشتىن كەچۈرگەن. ئەيسا مەسىھ سوتلىنىپ سوراق قىلىنغان كېچىدە، پېترۇس ئۆزىنى ئەيسانىڭ شاگىرتلىرىدىن بىرى دەپ تونۇتۇشتىن قورقۇپ، ھەتتا ئۇنى تونۇيدىغانلىقىنى قايتا-قايتا ئىنكار قىلغان (مەتتا 26:69–75). بىراق، بۇ ئەلچى ئۆز قورقۇنچىنى يېڭىپ، كېيىنرەك ئىشەنچ بىلەن مۇشۇ سۆزلەرنى يازغان: «باشقىلار قورقىدىغان نەرسىلەردىن سىلەر قورقماڭلار ۋە غەم-تەشۋىش قىلماڭلار» (1-پېتر. 3:14). پېترۇسنىڭ سۆزلىرى بىزنى ئىنسانلاردىن قورقۇشنى يېڭەلەيدىغانلىمىزغا ئىشەندۈرىدۇ.
8. ئىنسانلاردىن قورقۇشنى يېڭىشىمىزگە نېمە ياردەم بېرەلەيدۇ؟ (1-پېترۇس 3:15)
8 ئىنسانلاردىن قورقۇشنى يېڭىشىمىزگە نېمە ياردەم بېرەلەيدۇ؟ پېترۇس بىزگە مۇنداق دېگەن: «قەلبىڭلاردا مەسىھكە مۇقەددەس ھەزرىتىمىز سۈپىتىدە ئورۇن بېرىڭلار» (1-پېترۇس 3:15-نى ئوقۇڭ). دېمەك، بىز ئەيسا مەسىھ پادىشاھىمىز ۋە ئۇنىڭ زور كۈچ-قۇدرىتى بارلىقىنى ئۆزىمىزگە ئەسكەرتەلەيمىز. ئەگەر باشقىلارغا خۇش خەۋەر ئېيتىش پۇرسىتى تۇغۇلغاندا، جىددىيلەشسىڭىز ياكى قورقۇش ھېس قىلسىڭىز، پادىشاھىمىزنى ئەسكە ئېلىڭ. ئۇنىڭ ئاسماندا سانسىزلىغان پەرىشتىلەر بىلەن بىرلىكتە ھۆكۈمرانلىق قىلىۋاتقانلىقىنى كۆز ئالدىڭىزغا كەلتۇرۇڭ. ئېسىڭىزدە بولسۇنكى، ئاسماندىكى ۋە يەردىكى ھوقۇق ئۇنىڭغا بېرىلگەن. بۇ دۇنيانىڭ تۈزۈلمىسى ئاخىرلاشقانغا قەدەر، ئەيسا بىز بىلەن بىللە بولىدۇ (مەتتا 28:18–20). پېترۇس بىزنى ئىمان-ئېتىقادىمىزنى قوغداشقا «دائىم تەييار» تۇرۇشقا دەۋەت قىلغان. سىز ئىش ئورنىدا، مەكتەپتە ياكى نارەسمىي ھالەتتە بىرىگە خۇش خەۋەر ئېيتىشنى خالامسىز؟ قاچان شۇنداق قىلالايدىغانلىقىڭىزنى ئويلىنىپ كۆرۈڭ. ئاندىن نېمە دېيىش كېرەكلىكىنى تەييارلاڭ. يەھۋادىن جاسارەت تىلەپ دۇئا قىلىڭ ۋە ئۇ ئىنساندىن قورقۇشنى يېڭىشىڭىزگە ياردەم بېرىدىغانلىقىغا ئىشىنىڭ.—ئەلچى. 4:29.
چىن قەلبىڭىزدىن سۆيۈڭ
پېترۇس پاۋلۇسنىڭ تۈزىتىشىنى قوبۇل قىلدى. پېترۇس يازغان ئىككى پارچە خەت بىزگەئېتىقادچى قېرىنداشلىرىمىزغا سۆيگۈ-مۇھەببەتنى قانداق كۆرسىتىشنى ئۆگىتىدۇ (9-ئابزاسقا قاراڭ)
9. پېترۇس سۆيگۈ-مۇھەببەتنى قايسى ۋاقىتتا نامايان قىلمىغان؟ (رەسىمگە ھەم قاراڭ)
9 پېترۇس سۆيگۈ-مۇھەببەتنى قانداق كۆرسىتىشنى ئۆگەنگەن ئىدى. ئۇ ھەزرىتى ئەيسا مۇنۇ سۆزلەرنى قىلغاندا، شۇ يەردە بولغان: «سىلەرگە يېڭى ئەمىر بېرىمەن: بىر-بىرىڭلارنى سۆيۈڭلار. مەن سىلەرنى سۆيگىنىمدەك، سىلەرمۇ بىر-بىرىڭلارنى سۆيۈڭلار» (يۇھاننا 13:34). شۇنداق بولۇشىغا قارىماي، پېترۇس كېيىنچە بېسىمغا دۇچ كەلگەندە يەھۇدىي ئەمەس قېرىنداشلىرى بىلەن بىر داستىخاندا تاماق يېيىشنى رەت قىلغان. ئەلچى پاۋلۇس پېترۇسنىڭ قىلغان ئىشىنى ساختىپەزلىك ياكى ئىككىيۈزلۈك دەپ ئاتىغان (گالاتىيا. 2:11–14). پېترۇس پاۋلۇسنىڭ تۈزىتىشىنى قوبۇل قىلغان ۋە ئۇنىڭدىن ساۋاق ئالغان ئىدى. ئۇ يازغان ھەر ئىككىلا خېتىدە قېرىنداشلىرىغا پەقەت ھېس-تۇيغۇ ئارقىلىقلا ئەمەس، ئەمەلىي ئىش-ھەرىكەت ئارقىلىق سۆيگۈ-مۇھەببەتنى نامايان قىلىش كېرەكلىكىنى تەكىتلىگەن.
10. ساختىپەزلىكتىن خالى سۆيگۈ-مۇھەببەتنى كۆرسىتىشنىڭ نەتىجىسى قانداق بولىدۇ؟ چۈشەندۈرۈڭ (1-پېترۇس 1:22).
10 پېترۇس بىزنى چوقۇم «ساختىپەزلىكتىن خالى سۆيگۈ-مۇھەببەتكە» چاقىرغان (1-پېترۇس 1:22-نى ئوقۇڭ). بۇنداق سۆيگۈ-مۇھەببەت ‹ھەقىقەتكە بويسۇنۇشنىڭ› نەتىجىسىدۇر. بۇ ھەقىقەت خۇدا ھەممىسىگە تەڭ قارايدۇ دېگەن تەلىمنى ئۆز ئىچىگە ئالىدۇ (ئەلچى. 10:34، 35). ئەگەر بىز جامائەتتە پەقەتلا بەزى قېرىنداشلارغا سۆيگۈ-مۇھەببەت كۆرسەتسەك، باشقىلارغا ئۇنداق قىلمىساق، ئۇنداقتا ئەيسانىڭ سۆيگۈ-مۇھەببەت ھەققىدىكى ئەمرىگە بويسۇنالمايمىز (يۇھاننا 13:23؛ 20:2). ئەلۋەتتە، خۇددى ئەيسا مەسىھكە ئوخشاش، بىزمۇ بىرلىرىنى باشقىلارغا قارىغاندا ئۆزىمىزگە تېخىمۇ يېقىن ھېس قىلىشىمىز مۇمكىن. ئەمما، ئەلچى پېترۇس بىزگە بارلىق قېرىنداشلىرىمىزنى چىن قەلبىمىزدىن سۆيۈشىمىز، يەنى بىر ئائىلە كىشىلەردەك سۆيگۈ-مۇھەببەت رىشتىسىنى ئورنىتىشقا تىرىشىشىمىز كېرەكلىكىنى ئەسكەرتكەن.—1-پېتر. 2:17.
11. قېرىنداشلارنى چىن قەلبىدىن سۆيۈش نېمىنى ئۆز ئىچىگە ئالىدۇ؟
11 پېترۇس بىر-بىرىمىزنى چىن قەلبىمىزدىن سۆيۈشكە ئۈندىگەن. چىن قەلبىمىزدىن بىر-بىرىمىزنى سۆيۈش، ھەتتا باشقىلارنى سۆيۈش ئاسان بولمىغان ۋەزىيەتتىمۇ يەنىلا پۈتۈن كۈچىمىز بىلەن ئۇنى سۆيۈشكە تىرىشىشنى كۆرسىتىدۇ. مەسىلەن، ئەگەر بىر قېرىندىشىمىز بىزنى خاپا قىلغان ياكى كۆڭلىمىزنى ئاغرىتقان بولسىچۇ؟ ناھايىتى تەبىئىيلا، بىز ئۇنىڭغا مېھىر-مۇھەببەت كۆرسىتىشنىڭ ئورنىغا، ئۇنىڭدىن ئۆچ ئالماقچى بولىمىز (يۇھاننا 18:10، 11). بىراق، پېترۇس ئۆچ ئېلىش خۇدانى خۇرسەن قىلمايدىغانلىقىنى ئەيسا مەسىھتىن ئۆگەنگەن (1-پېتر. 3:9). پېترۇس مۇنداق يازغان: «يامانلىققا يامانلىق، ھاقارەتكە ھاقارەت بىلەن جاۋاب قايتۇرماڭلار». ئېتىقادچى قېرىنداشلىرىڭىزنى چىن قەلبىڭىزدىن سۆيگەندىلا، سىزنىڭ كۆڭلىڭىزنى ئاغرىتىدىغانلارغا مېھىر-شەپقەت كۆرسىتەلەيسىز.
12. (1) باشقىلارنى چىن قەلبتىن سۆيۈشكە يەنە نېمە ياردەم بېرىدۇ؟ (2) «ئىناقلىقىمىزنى قەدىرلەيلى» ناملىق فىلىمدا كۆرسىتىلگەندەك، سىز قانداق مەقسەتكە قول يەتكۈزۈشنى خالايسىز؟
12 ئەلچى پېترۇس بىرىنچى خېتىنىڭ ئاخىرىدا يەنە بىر قېتىم قېرىنداشلارغا چىن قەلبىدىن مېھىر-مۇھەببەت كۆرسىتىش ھەققىدە سۆز قىلغان. بۇنداق سۆيگۈ بەزى گۇناھلارنى ئەمەس، بەلكى «كۆپلىگەن گۇناھلارنى ياپىدۇ» (1-پېتر. 4:8). بەلكىم، پېترۇس مۇشۇ جۈملىلەرنى يازغاندا، ئەيسا مەسىھنىڭ ئۇزۇن يىللار ئىلگىرى گۇناھنى كەچۈرۈش ھەققىدە ئېيتقان تەلىملىرىنى قايتا ئەسلىگەن بولۇشى مۇمكىن. ئاشۇ ۋاقىتتا، پېترۇس ئۆز قېرىندىشىنى 7 قېتىم كەچۈرۈم قىلىدىغانلىقىنى ئېيتقاندا، ئۇ ئۆزىنى كەڭ قورساق، كەچۈرۈمچان كىشى دەپ ئىشەنگەن بولۇشى مۇمكىن. ئەمما، ئەيسا مەسىھ پېترۇسقا ۋە بىزگە 77 قېتىمغىچە كەچۈرۈم قىلىشنى ئېيتىپ، كەچۈرۈمنىڭ چېكى يوقلىقىنى كۆرسەتكەن (مەتتا 18:21، 22). ئەگەر بۇ نەسىھەتنى ئەمەلىي ئىشلىتىش سىز ئۈچۈن قىيىن بولسا، غەم-ئەندىشە قىلماڭ. يەھۋانىڭ بارلىق نامۇكەممەل خىزمەتچىلىرى بەزىدە كەچۈرۈم قىلىشقا قىينالغان ئىدى. ھازىر سىز ئۈچۈن ئەڭ مۇھىم بولغىنى، پۈتۈن كۈچىڭىز بىلەن قېرىندىشىڭىزنى كەچۈرۈش ئۈچۈن تىرىشچانلىق كۆرسىتىش ۋە ئۇنىڭ بىلەن ئىناق-ئىتتىپاقلىقنى ئەسلىگە كەلتۈرۈش c.
ئاقساقاللار، خۇدانىڭ پادىسىدىنياخشى خەۋەر ئېلىڭلار
13. نېمە ئۈچۈن ئاقساقاللارنىڭ قېرىنداشلارنى ئىلھاملاندۇرۇش ئۈچۈن ۋاقىت چىقىرىشى قىيىن بولۇشى مۇمكىن؟
13 ئەيسا تىرىلگەندىن كېيىن پېترۇسقا مۇنداق دېگەن: «قويلىرىمغا پادىچى بولغىن» (يۇھاننا 21:16). مۇشۇ سۆزلەر چوقۇم پېترۇسنىڭ ئېسىدىن چىقمىغان. ئەگەر ئاقساقال بولسىڭىز، بۇ سۆزلەرنىڭ سىز ئۈچۈنمۇ ئېيتىلغانلىقىنى بىلىسىز. ئاقساقالنىڭ بۇ مۇھىم ۋەزىپىنى ئورۇنلاش ئۈچۈن ۋاقىت چىقىرىشى قىيىن بولۇشى مۇمكىن. ئاقساقاللار ئالدى بىلەن ئۆز ئائىلىسىنىڭ جىسمانىي ئېھتىياجلىرىغا، سۆيگۈ-مۇھەببەتنى ھېس قىلىپ ياشىشىغا كۆڭۈل بۆلۈشى ۋە ئۇلارنىڭ يەھۋاغا يېقىنلىشىشىغا ياردەم بېرىشى كېرەك. ئاقساقاللار ۋەز ئېيتىش خىزمىتىدە ھەم باشلامچىلىق قىلىشى لازىم. ئۇنىڭدىن باشقا، جامائەت يىغىلىشلىرى ۋە چوڭ يىغىلىشلاردىكى نۇتۇقلارنى ياخشى تەييارلاش ئۈچۈن ۋاقىت چىقىرىشى كېرەك. بەزىلىرىنىڭ دوختۇرخانا بىلەن ئالاقىلىشىش كومىتېتىدا ياكى يەرلىك لايىھە ۋە قۇرۇلۇش بۆلۈمىدە ۋەزىپىسى بار بولۇشى مۇمكىن. ئاقساقاللار ھەقىقەتەن ئالدىراش كىشىلەر.
كۆيۈمچان ئاقساقاللارنىڭ ئىشلىرى كۆپ بولسىمۇ، خۇدانىڭ پادىلىرىغا غەمخورلۇق قىلىش ئۈچۈن بار كۈچىنى چىقىرىدۇ (14، 15-ئابزاسلارغا قاراڭ)
14. ئاقساقاللارنى پادىلاردىن خەۋەر ئېلىشقا نېمە ئۈندەيدۇ؟ (1-پېترۇس 5:1–4)
14 پېترۇس ئاقساقاللارنى خۇدانىڭ پادىلىرىدىن خەۋەر ئېلىشقا ئۈندىگەن (1-پېترۇس 5:1–4-نى ئوقۇڭ). ئەگەر سىز ئاقساقال بولسىڭىز، قېرىنداشلارنى چىن قەلبتىن ياخشى كۆرىدىغانلىقىڭىزنى ۋە ئۇلارنىڭ ياخشى پادىچىسى بولۇشنى خالايدىغانلىقىڭىزنى بىلىمىز. بىراق، بەزىدە ئۆزىڭىزنى ئالدىراش ياكى ھېرىپ-چارچىغاندەك ھېس قىلىپ، بۇ ۋەزىپىنى ئورۇنلىماي قالىدىغانسىز. شۇنداق ۋەزىيەتتە، نېمە قىلالايسىز؟ غەم-ئەندىشىلىرىڭىزنى يەھۋاغا ئېيتىپ، ئىچ-باغرىڭىزنى تۆكۈپ بېرىڭ. پېترۇس مۇنداق دەپ يازغان:«كىمكى خىزمەت قىلسا، خۇدا بەرگەن كۈچكە تايىنىپ خىزمەت قىلسۇن» (1-پېتر. 4:11). ئېتىقادچى قېرىنداشلار بۇ دۇنيادا تولۇق ھەل قىلغىلى بولمايدىغان قىيىنچىلىقلارغا دۇچ كېلىشى مۇمكىن. ئەمما، شۇنى ئېسىڭىزدە تۇتۇڭكى، باش پادىچى ئەيسا مەسىھ ئۇلارغا سىزدىنمۇ ياخشىراق ياردەم بېرەلەيدۇ. ئۇ پەقەت بۈگۈنكى كۈندىلا ئەمەس، يېڭى دۇنيادا شۇنداق قىلالايدۇ. خۇدا ئاقساقاللاردىن قېرىنداشلارنى سۆيۈشنى، يەنى خۇدانىڭ پادىلىرىدىن خەۋەر ئېلىشنى ۋە ئۇلارغا ئۈلگە بولۇشنى كۈتىدۇ.
15. بىر ئاقساقال پادىغا قانداق غەمخورلۇق قىلغان؟ (رەسىمگە ھەم قاراڭ)
15 ئۇزۇن يىللار ئاقساقال بولۇپ خىزمەت قىلغان ۋىليام خۇدانىڭ پادىسىدىن خەۋەر ئېلىشنىڭ مۇھىملىقىنى چۈشىنىدۇ. يۇقۇملۇق تاجسىمان 19-ۋىرۇسى تارقىلىشقا باشلىغاندا، ئۇ ۋە باشقا ئاقساقاللار ھەر ھەپتىدە ئۆز گرۇپپىسىدىكى ھەر بىر قېرىنداش بىلەن ئايرىم-ئايرىم ئالاقىلىشىشنى قارار قىلغان. ئۇ بۇنداق قىلىشنىڭ سەۋەبىنى چۈشەندۈرۈپ مۇنداق دەيدۇ: «نۇرغۇن قېرىنداشلار يالغۇز ياشايتتى ۋە ئۇلار ناھايىتى تېزلا سەلبىي ئوي-پىكىردە بولۇپ قېلىشى مۇمكىن ئىدى». مەلۇم بىر ئېتىقادچى قېرىنداش قىيىنچىلىققا ئۇچرىغاندا، ۋىليام ئۇنىڭ سۆزلىرىنى كۆڭۈل قويۇپ ئاڭلاپ، ئۇنىڭ ئېھتىياجى ۋە غەم-ئەندىشىسىنى چۈشىنىشكە تىرىشقان. كېيىن، ئۇ شۇ قېرىنداشنىڭ ۋەزىيىتىگە ماس كېلىدىغان، ئۇنىڭغا ئىلھام-مەدەت بېرىدىغان فىلىملەر ياكى باشقا ماتېرىياللارنى تور بېكىتىمىزدىن ئىزدىگەن. ئۇ مۇنداق دەيدۇ: «خۇدانىڭ پادىسىدىن خەۋەر ئېلىش خىزمىتى ئىلگىرىكى ھەرقانداق ۋاقىتقا قارىغاندا، ھازىر تېخىمۇ مۇھىم! بىز كىشىلەرنىڭ يەھۋا توغرۇلۇق ئۆگىنىشىگە ياردەم بېرىش ئۈچۈن ئىنتايىن كۆپ تىرىشچانلىق كۆرسەتتۇق. بىز پادىلاردىن خەۋەر ئېلىش ئۈچۈنمۇ ئوخشاش تىرىشچانلىق كۆرسىتىپ، يەھۋانىڭ قويلىرىنىڭ ھەقىقەتتە قېلىشىغا ياردەم بېرىشىمىز كېرەك».
يەھۋانىڭ سىزنى تەربىيىلىشىنى تاماملىشىغا يول قويۇڭ
16. پېترۇسنىڭ خەتلىرىدىن ئۆگەنگەنلىرىمىزنى قانداق ۋەزىيەتلەردە قوللىنالايمىز؟
16 بىز پېترۇسنىڭ ئىككى خېتىدىكى پەقەت بىرقانچە مۇھىم نۇقتىلارنى مۇھاكىمە قىلدۇق. بەلكىم، ئۆزىڭىزنى قايسى تەرەپتىن تېخىمۇ ياخشىلاش لازىملىقىنى كۆرۈپ يەتكەنسىز. مەسىلەن، يېڭى دۇنيادا ئېرىشىدىغان بەرىكەتلەر ھەققىدە كۆپرەك ئويلىنىشنى خالامسىز؟ ئىشتا، مەكتەپتە ياكى باشقا نارەسمىي سورۇنلاردا گۇۋاھلىق بېرىش ئۈچۈن مەقسەت قويدىڭىزمۇ؟ ئېتىقادچى قېرىنداشلارغا چىن قەلبىڭىزدىن تېخىمۇ كۆپرەك سۆيگۈ-مۇھەببەت كۆرسىتىشنىڭ يوللىرىنى ئىزدەپ كۆرەلەمسىز؟ ئاقساقاللار، غەيرەت-جاسارەت بىلەن يەھۋانىڭ قويلىرىنى بېقىشنى چىن قەلبىڭلاردىن قەتئىي قارار قىلدىڭلارمۇ؟ ئۆزۈڭلارغا سەمىمىي بولۇپ، ئۆز-ئۆزۈڭلارنى تەكشۈرۈپ كۆرۈڭلار. مەلۇم ئاجىزلىقلار بارلىقى ئاشكارا بولۇشى مۇمكىن، ئەمما ئۈمىدسىزلەنمەڭلار. «ھەزرىتىمىز مېھرىبان» ۋە ئۇ سىلەرنىڭ تېخىمۇ ياخشىراق قىلالىشىڭلارغا ياردەم بېرىدۇ (1-پېتر. 2:3). پېترۇس بىزگە ئىلھام بېرىپ مۇنداق دېگەن: «خۇدا، … ئۆزى سىلەرنىڭ تەربىيىلىنىشىڭلارنى تاماملايدۇ. ئۇ سىلەرنى چىداملىق قىلىدۇ، سىلەرنى كۈچلەندۈرىدۇ، سىلەرنى تەۋرەنمەس مۇستەھكەم قىلىدۇ».—1-پېتر. 5:10.
17. ئەگەر قەيسەر بولۇپ، يەھۋانىڭ سىزنى تەربىيىلىشىگە يول قويسىڭىز، نەتىجىسى قانداق بولىدۇ؟
17 پېترۇس ئىلگىرى ئۆزىنى ئەيسا مەسىھ بىلەن بىللە بولۇشقا لايىق ئەمەس ھېس قىلغان ئىدى (لۇقا 5:8). لېكىن، ياراتقۇچى يەھۋا ۋە مەسىھ ئەيسا مېھىر-شەپقەت بىلەن داۋاملىق پېترۇسقا ياردەم بەرگەچ، پېترۇس بەل قويۇۋەتمەي، ساداقەتمەنلىك بىلەن مەسىھكە ئەگەشكەن. نەتىجىدە، پېترۇس «ھەزرىتىمىز ۋە قۇتقۇزغۇچىمىز ئەيسا مەسىھنىڭ مەڭگۈلۈك پادىشاھلىقىغا كىرىش بۈيۈك شان-شەرىپىگە ئىگە» بولغان ئىدى (2-پېتر. 1:11). نېمە دېگەن ئالاھىدە مۇكاپات! ئەگەر پېترۇسقا ئوخشاش قەيسەر بولۇپ، يەھۋانىڭ سىزنى تەربىيىلىشىگە يول قويسىڭىز، سىزمۇ مەڭگۈلۈك ھاياتلىق مۇكاپاتىغا ئېرىشىسىز. شۇنىڭ بىلەن، ‹ئىمان-ئېتىقادىڭىزنىڭ مەقسەت-مۇددىئاسىغا يېتىسىز، يەنى قۇتقۇزۇلۇشقا ئېرىشىسىز›.—1-پېتر. 1:9.
25-ناخشا ھەقىقىي شاگىرت بولۇشنىڭ بەلگىسى
a پېترۇسنىڭ خەتلىرىدىن بەزى تەجرىبە-ساۋاقلارنى ئۆگىنىمىز. شۇلار قىيىنچىلىقلارغا بەرداشلىق بېرەلىشىمىز ئۈچۈن بىزگە كۈچ بېرىدۇ. ئۇنىڭدىن باشقا، ئاقساقاللارنىڭ پادىچى بولۇش مەسئۇلىيىتىنى قانداق ئادا قىلىشنى چۈشىنىشىگە ياردەم بېرىدۇ.
b ئېھتىمال، مىلادى 66-يىلى، رىملىقلار بىرىنچى قېتىم يېرۇسالىمغا ھۇجۇم قىلىشتىن ئىلگىرى، پەلەستىندا ياشايدىغان مەسىھ ئەگەشكۈچىلىرى پېترۇسنىڭ ئىككى پارچە خېتىنى تاپشۇرۇۋالغان بولۇشى مۇمكىن.
c jw.org تور بېكىتىدىكى «ئىناقلىقىمىزنى قەدىرلەيلى» (باشقا تىل) ناملىق فىلىمنى كۆرۈڭ.
