15-تەتقىق ماقالىسى
ئەيسانىڭ مۆجىزىلىرىدىن نېمىلەرنى ئۆگىنەلەيمىز؟
«ئەيسا يۇرتلارنى ئارىلاپ ياخشىلىق قىلىپ، . . . كىشىلەرنى ساقايتتى».—ئەلچى. 10:38.
5-ناخشا مەسىھ ئۈلگىمىز
بۇ ماقالىدە a
1. ئەيسا بىرىنچى مۆجىزىنى كۆرسەتكەن ۋەقەنى تەسۋىرلەپ بېرىڭ.
مىلادى 29-يىلنىڭ ئاخىرىدا، ئەيسا ۋەز خىزمىتىنى باشلىغان ۋاقىتتا يۈز بەرگەن بىر ئىشنى تەسەۋۋۇر قىلىپ كۆرۈڭ. ئەيسانىڭ يۇرتى ناسىرەنىڭ شىمالىدىكى كانا يېزىسىدا، ئەيسا، ئانىسى مەريەم ۋە بەزى شاگىرتلىرى توي زىياپىتىگە تەكلىپ قىلىنغان. مەريەم بۇ ئائىلىنىڭ دوستى بولۇپ، قارىماققا مېھمانلارنى قارشى ئېلىشقا ياردەملەشكەن. ئەمما، توي زىياپىتىدە مېھمانلارغا بېرىدىغان ئۈزۈم شارابى تۈگەپ كېتىپ، شۇ ئائىلە ۋە تويى بولغان بىر جۈپ مېھمانلارنىڭ ئالدىدا خىجىل بولۇپ قالىدىغان بىر ۋەزىيەتكە دۇچ كەلگەن b. بەلكىم، مېھمانلارنىڭ سانى ئۆزلىرى پەرەز قىلغاندىن كۆپ بولۇپ كەتكەن بولۇشى مۇمكىن. مەريەم دەرھال ئوغلىغا ئۇلارنىڭ شارابلىرى تۈگەپ قالغانلىقىنى ئېيتقان (يۇھاننا 2:1–3). ئەيسا نېمە قىلغان؟ ئۇ كىشىنى ھەيران قالدۇرىدىغان بىر مۆجىزىنى كۆرسىتىپ، سۇنى ئېسىل شارابقا ئايلاندۇرغان.—يۇھاننا 2:9، 10.
2، 3. (1) ئەيسا ئۆزىنىڭ مۆجىزە كۆرسىتىش كۈچىنى قانداق ئىشلەتكەن؟ (2) ئەيسانىڭ مۆجىزىلىرى ھەققىدە ئويلانساق، نېمىلەرنى ئۆگىنەلەيمىز؟
2 ئەيسا ۋەز خىزمىتى جەريانىدا نۇرغۇنلىغان مۆجىزىلەرنى كۆرسەتكەن c. ئۇ مۆجىزە كۆرسىتىپ، نەچچە ئون مىڭلىغان كىشىلەرگە ياردەم بەرگەن. مەسىلەن، ئىككى قېتىم كىشىلەرنىڭ قورسىقىنى تويغۇزغان ئىدى. ئۇ بىرىنچى قېتىمدا 5000 كىشىنى، ئىككىنچى قېتىمدا 4000 كىشىنى، ئاياللار ۋە بالىلارنى قوشقاندا، جەمئىي 27000 مىڭدىن كۆپرەك ئادەمنى تويغۇزغان بولۇشى مۇمكىن (مەتتا 14:15–21؛ 15:32–38). ئاشۇ ھەر ئىككىلا پەيتتە، ئەيسا يەنە نۇرغۇن كېسەللەرنى ساقايتقان (مەتتا 14:14؛ 15:30، 31). ئۇ ساقايتقان ۋە قورسىقىنى تويغۇزغان كىشىلەرنىڭ قانچىلىك ھەيران قالغانلىقىنى تەسەۋۋۇر قىلىپ كۆرۈڭ.
3 ئەيسانىڭ مۆجىزىلىرىنىڭ بۈگۈنكى كۈندە بىز ئۈچۈن ئىنتايىن مۇھىم ئەھمىيىتى بار. بۇ ماقالىدە، ئاشۇ مۆجىزىلەرنىڭ ئىمان-ئېتىقادىمىزنى قانداق كۈچەيتىدىغانلىقىنى كۆرۈپ چىقىمىز. ئاندىن كېيىن، ئەيسانىڭ مۆجىزە كۆرسەتكەندە، كەمتەر ۋە كۆيۈمچان بولغانلىقىنى قانداق ئۈلگە قىلالايدىغانلىقىمىزنى كۆرىمىز.
يەھۋا خۇدا ۋە ئەيسا مەسىھ ھەققىدە ئۆگىنەلەيمىز
4. ئەيسانىڭ مۆجىزىلىرى بىزگە كىم ھەققىدە ئىمان-ئېتىقادنى كۈچەيتىدىغان ھەقىقەتلەرنى ئۆگىتىدۇ؟
4 ئەيسانىڭ مۆجىزىلىرى بىزگە پەقەت ئۇ ھەققىدىلا ئەمەس، بەلكى ئاتىسى ھەققىدىمۇ ئىمان-ئېتىقادنى كۈچەيتىدىغان ھەقىقەتلەرنى ئۆگىتىدۇ. سەۋەبى، ئەيسا مەسىھ كۆرسەتكەن ئاشۇ مۆجىزىلەرنىڭ ھەقىقىي مەنبەسى يەھۋا خۇدا. ئەلچىلەر 10:38-ئايەت بىزگە مۇنداق دەيدۇ: «خۇدا ناسىرەلىك ئەيسانى مۇقەددەس روھى ۋە كۈچ-قۇدرىتى بىلەن مەسىھ قىلىپ تەيىنلىدى ۋە ئەيسا يۇرتلارنى ئارىلاپ ياخشىلىق قىلىپ، ئىبلىسنىڭ زۇلۇمىدا ئېزىلگەن بارچە كىشىلەرنى ساقايتتى، چۈنكى خۇدا ئۇنىڭغا يار ئىدى». شۇنىمۇ ئەستە ساقلاڭكى، ئەيسا ئېيتقان ۋە قىلغان بارلىق ئىشلىرىدا ئاتىسىنىڭ ئوي-پىكىرى ۋە ھېس-تۇيغۇلىرىنى مۇكەممەل ئەكس ئەتتۈرگەن (يۇھاننا 14:9). ئەيسانىڭ مۆجىزىلىرىدىن قايسى ئۈچ نەرسىنى ئۆگىنەلەيدىغانلىقىمىزنى كۆرۈپ باقايلى.
5. ئەيسانى مۆجىزىلەرنى كۆرسىتىشكە نېمە دەۋەت قىلغان؟ (مەتتا 20:30–34)
5 بىرىنچى، ئەيسا ۋە ئۇنىڭ ئاتىسىنىڭ بىزگە بولغان سۆيگۈ-مۇھەببىتى چوڭقۇر. ئەيسا يەر يۈزىدە بولغاندا، مۆجىزە كۆرسىتىش كۈچىنى ئىشلىتىپ، كىشىلەرنىڭ ئازاب-ئوقۇبەتلىرىنى ئازايتىش ئارقىلىق، ئۇلارغا بولغان چوڭقۇر سۆيگۈ-مۇھەببىتىنى كۆرسەتكەن. بىر قېتىم، ئىككى قارغۇ كىشى ئۇنىڭدىن ياردەم سورىغان (مەتتا 20:30–34-نى ئوقۇڭ). دىققەت قىلسىڭىز، ئەيسا ئۇلارغا ئىچ ئاغرىتىپ، ئۇلارنى ساقايتقان. مۇشۇ يەردە ئىشلىتىلگەن گرېك تىلىدىكى پېئىل ئادەمنىڭ ئىچىدىن كۈچلۈك ھېسداشلىق قىلىپ، رەھىم-شەپقەت كۆرسەتكەنلىكىنى بىلدۈرىدۇ. شۇنداق كۈچلۈك ئىچ ئاغرىتىش ھېس-تۇيغۇسى ئەيسانى كىشىلەرگە مېھىر-مۇھەببەت كۆرسىتىشكە دەۋەت قىلغاچ، ئۇ ئاچ قالغانلارنى تويغۇزغان ۋە ماخاۋ كېسىلى بولغان بىر كىشىنى ساقايتقان (مەتتا 15:32؛ ماركۇس 1:41). بىز شۇنىڭغا ئىشىنەلەيمىزكى، رەھىم-شەپقەتلىك خۇدا يەھۋا ۋە ئۇنىڭ ئوغلىنىڭ بىزگە بولغان سۆيگۈ-مۇھەببىتى چوڭقۇر ۋە ئۇلار ئازاب-ئوقۇبەتلىرىمىزنى كۆرگەندە ئازابلىنىدۇ (لۇقا 1:78؛ 1-پېتر. 5:7). ئۇلار ئىنسانىيەت چېكىۋاتقان ئازاب-ئوقۇبەت ۋە نالە-پەريادنى يوق قىلىشنى چوقۇم تەقەززالىق بىلەن كۈتىۋاتىدۇ.
6. خۇدا ئەيساغا قانداق كۈچ-قۇدرەتنى بەرگەن؟
6 ئىككىنچى، خۇدا ئىنسانىيەتنىڭ بارلىق قىيىنچىلىقلىرىنى ھەل قىلىش ئۈچۈن ئەيساغا كۈچ بەرگەن. ھەرزىتى ئەيسا ئۆز مۆجىزىلىرى ئارقىلىق بىز يېڭەلمەيدىغان قىيىنچىلىقلارنى يېڭەلەيدىغانلىقىنى نامايان قىلغان. مەسىلەن، ئۇ بىزنى ئىنسانىيەتنىڭ قىيىنچىلىقلىرى، يەنى مىراس ئالغان گۇناھ ۋە ئۇنىڭ تەسىرىدىن، كېسەللىكتىن ۋە ئۆلۈمدىن پۈتۈنلەي ئازاد قىلىش كۈچ-قۇدرىتىگە ئىگە (مەتتا 9:1–6؛ رىملىقلار 5:12، 18، 19). ئۇنىڭ كۆرسەتكەن مۆجىزىلىرى «ھەر خىل» كېسەللىكلەرنى داۋالىيالايدىغانلىقى، ھەتتا ئۆلگەنلەرنى تىرىلدۈرەلەيدىغانلىقىنى ئىسپاتلىغان (مەتتا 4:23؛ يۇھاننا 11:43، 44). ئۇنىڭدىن باشقا، ئۇنىڭ شىددەتلىك بوران-چاپقۇنلارنى تىزگىنلەش ۋە ئادەملەرنى يامان روھلاردىن قۇتقۇزۇش كۈچى بار (ماركۇس 4:37–39؛ لۇقا 8:2). يەھۋانىڭ بۇنداق كۈچ-قۇدرەتنى ئۆز ئوغلىغا بەرگەنلىكىنى بىلىش ھەقىقەتەن كىشىنىڭ كۆڭلىنى خاتىرجەم قىلىدۇ.
7، 8. (1) ئەيسانىڭ مۆجىزىلىرى سەۋەبلىك، نېمىگە ئىشەنچ قىلالايمىز؟ (2) كەلگۈسى يېڭى دۇنيادا قانداق مۆجىزىنى كۆرۈشنى تەقەززالىق بىلەن كۈتۈۋاتىسىز؟
7 ئۈچىنچى، خۇدا پادىشاھلىقى كېلەچەكتە ۋەدە قىلغان گۈزەل ئىشلارنى چوقۇم ئەمەلگە ئاشۇرىدۇ. ئەيسا مەسىھ يەر يۈزىدە ياشىغاندا كۆرسەتكەن مۆجىزىلەر، ئۇنىڭ كېلەچەكتە ئاسماندىكى خۇدا پادىشاھلىقىنىڭ پادىشاھى سۈپىتىدە تېخىمۇ ئۇلۇغراق ئىشلارنى قىلىدىغانلىقىنى ئۆگىتىدۇ. مەسىھنىڭ ھۆكۈمرانلىقى ئاستىدا پات-ئارىدا قانداق ئىشلارنى باشتىن ئۆتكۈزىدىغانلىقىمىز ھەققىدە ئويلىنىپ كۆرەيلى. مۇكەممەل ساغلاملىقتىن بەھرىمەن بولىمىز، چۈنكى ئۇ ئىنسانىيەتنى ئازاب-ئوقۇبەتكە دۇچار قىلغان ھەر خىل كېسەللىكلەرنى ۋە تەندىكى ئاجىزلىقلارنى يوق قىلىدۇ (يەشايا 33:24؛ 35:5، 6؛ ۋەھىي. 21:3، 4). بىز ھەرگىزمۇ ئاچارچىلىق ياكى تۈرلۈك دەھشەتلىك تەبئىي ئاپەتلەرنىڭ زىيانكەشلىكىگە ئۇچرىمايمىز (يەشايا 25:6؛ ماركۇس 4:41). «قەبرىلەردە» ياتقان يېقىن كىشىلىرىمىزنىڭ تىرىلىپ تۇرغاندا، ئۇلار بىلەن قايتا جەم بولۇپ، شاد-خۇراملىققا چۆمىمىز (يۇھاننا 5:28، 29). سىز كېلەچەكتىكى يېڭى دۇنيادا قانداق مۆجىزىلەرنى كۆرۈشنى تەشنالىق بىلەن كۈتۈۋاتىسىز؟
8 ئەيسا مۆجىزە كۆرسەتكەندە، ئىچ ئاغرىتىپ ھېسداشلىق ۋە كەمتەرلىكنى كۆرسەتكەن. بۇ بىز ئۈلگە قىلىشقا تېگىشلىك پەزىلەتلەر. ھازىر ئىككى مۆجىزە ھەققىدە مۇھاكىمە قىلىپ باقايلى. ئاۋۋال كانا يېزىسىدىكى توي زىياپىتى ھەققىدىكى ۋەقەدىن باشلايلى.
كەمتەر بولۇشنى ئۆگىنىش
9. ئەيسا توي زىياپىتىدە نېمە قىلغان؟ (يۇھاننا 2:6–10)
9 يۇھاننا 2:6–10-نى ئوقۇڭ. زىياپەتتە شاراب تۈگىگەندە، ئەيسانىڭ بىر ئىش قىلىش مەجبۇرىيىتى بارمۇ ئىدى؟ ياق. مۇقەددەس يازمىلاردا مەسىھنىڭ مۆجىزە ئارقىلىق شاراب پەيدا قىلىش توغرىسىدا ھېچقانداق بېشارەت يوق. ئەمما، ئۆزىڭىزنىڭ توي زىياپىتىدە ئىچىملىكلەر تۈگەپ كەتسە، قانداق ھېس-تۇيغۇدا بولىدىغانلىقىڭىزنى تەسەۋۋۇر قىلىپ كۆرۈڭ. ئەيسا مەسىھ شۇ ئائىلىگە، بولۇپمۇ يېڭىدىن توي قىلغان قىز-يىگىتكە ھېسداشلىق قىلغان بولۇشى مۇمكىن ۋە ئۇلارنى كىشىلەرنىڭ ئالدىدا خىجىل بولۇشتىن ساقلاپ قالماقچى بولغان. شۇڭا، ئۇ باشتا تىلغا ئېلىنغان مۆجىزىنى كۆرسەتكەن. ئۇ 390 لىتىر سۇنى ئەڭ ئېسىل شارابقا ئايلاندۇرغان. ئۇ شۇنداق مەردلىك بىلەن شاراب تەمىنلەپ بەرگەن. شۇنداق بولغاندا، بەلكىم شۇ ياش جۈپ شارابنى كەلگۈسىدە ئىشلىتەلەيتتى ياكى ئۇنى سېتىپ، ئۆز ئائىلىسىنىڭ ئىقتىسادى شارائىتىنى ياخشىلىيالايتتى. بۇ يېڭى توي قىلغان قىز-يىگىت چوقۇم ئۇنىڭدىن ئىنتايىن مىننەتدار بولغان!
ئەيسانى ئۈلگە قىلىپ، ئۆزىمىزنىڭ ئۇتۇقلىرى بىلەن ماختىنىشتىن يىراق تۇرايلى (10، 11-ئابزاسلارغا قاراڭ) e
10. يۇھاننا 2-بابتا، قانداق مۇھىم بەزى تەپسىلاتلار بار؟ (رەسىمگە ھەم قاراڭ)
10 يۇھاننا 2-بابتىكى، ئۈزۈندىدىكى بەزى مۇھىم تەپسىلاتلار ھەققىدە ئويلىنىپ كۆرەيلى. دىققەت قىلغان بولسىڭىز، ئەيسا تاش قاچىلارغا ئۆزى سۇ تولدۇرغانمۇ؟ باشقىلارنىڭ دىققىتىنى ئۆزىگە تارتىشنىڭ ئورنىغا، ئۇ خىزمەتچىلەرگە سۇ تولدۇرۇشقا بۇيرىغان (6، 7-ئايەتلەر). سۇنى شارابقا ئايلاندۇرغاندىن كېيىن، ئەيسا ئۆزى شارابنى ئېلىپ، زىياپەتكە رىياسەتچىلىك قىلغۇچىغا ئېلىپ بارمىغان. ئەكسىنچە، ئۇ خىزمەتچىلەرگە شۇنداق قىلىشنى ئېيتقان (8-ئايەت). ئۇ جەزمەن بىر قەدەھكە شاراب ئېلىپ، مېھمانلارنىڭ ئالدىدا ئېگىز كۆتىرىپ: «مەن ياسىغان بۇ شارابنىڭ تەمىنى تېتىپ بېقىڭلار!»— دەپ ماختانمىغان.
11. ئەيسانىڭ مۆجىزىسىدىن نېمىلەرنى ئۆگىنەلەيمىز؟
11 ئەيسا مەسىھنىڭ سۇنى شارابقا ئايلاندۇرۇش مۆجىزىسىدىن نېمىلەرنى ئۆگىنەلەيمىز؟ كەمتەرلىك ھەققىدە ئۆگىنەلەيمىز. ئۇ ئۆز مۆجىزىسى بىلەن ماختانمىغان. ئەمەلىيەتتە، ئۇ ھېچقاچان ئۆزى قىلغان ھېچبىر ئىشى ئۈچۈن ماختىنىپ باققان ئەمەس. ئەكسىچە، ئۇ كەمتەرلىك بىلەن قايتا-قايتا بارلىق شان-شەرەپ ۋە ماختاشلارنى ئۆز ئاتىسىغا بەرگەن (يۇھاننا 5:19، 30؛ 8:28). ئەگەر ئەيسانى ئۈلگە قىلىپ، ئۆزىمىزنى كەمتەر تۇتساق، ئۆزىمىزنىڭ قىلغان ھەرقانداق ئىشىدىن ماختانمايمىز. مەيلى يەھۋاغا قانداق خىزمەت قىلىشىمىزدىن قەتئىينەزەر، ئۆزىمىز ھەققىدە ئەمەس، بەلكى ئۇ بىزنى ئېرىشتۈرگەن خىزمەت قىلىش ئىمتىيازى بىلەن ماختىنايلى (يەرەم. 9:23، 24). بىز خۇداغا لايىق شان-شەرەپنى، ئۇنىڭغا بېرىشىمىز كېرەك. ئەسلىدە، يەھۋانىڭ ياردىمىسىز ھېچبىر ئىشنى ئوڭۇشلۇق قىلالمايمىز.—1-كورىنت. 1:26–31.
12. ئەيسانى ئۈلگە قىلىشنىڭ يەنە بىر يولى قايسى؟ مىسال كەلتۈرۈڭ.
12 ئەيسانىڭ كەمتەرلىكىنى ئۈلگە قىلىشنىڭ يەنە بىر يولنى كۆرۈپ باقايلى. مۇنداق بىر ۋەزىيەتنى تەسەۋۋۇر قىلىپ بېقىڭ. بىر ئاقساقال ياش ياردەمچى خىزمەتچىنىڭ تۇنجى ئاممىۋىي نۇتۇقىنى تەييارلىشىغا ياردەم بېرىشكە كۆپ ۋاقىت چىقارغان. نەتىجىدە، ياش يىگىت كىشىنى خۇشال قىلىدىغان نۇتۇقنى سۆزلەپ، جامائەتنى سۆيۈندۈرگەن. يىغىلىشتىن كېيىن، بىرى ئاشۇ ئاقساقالنىڭ قېشىغا كېلىپ: «بۇ ياش بۇرادەر شۇنداق ياخشى بىر نۇتۇق سۆزلىدى. شۇنداق ئەمەسمۇ؟»— دەپ ئېيتتى. ئاقساقال: «شۇنداق، مەن ئۇنىڭ نۇتۇق تەييارلىشى ئۈچۈن نۇرغۇن ۋاقتىمنى سەرپ قىلىپ ياردەم بەردىم»،— دەمدۇ؟ ياكى ئۇ كەمتەرلىك بىلەن: «شۇنداق. ھەقىقەتەن، ياخشى نۇتۇق سۆزلىدى. مەن ئۇنىڭدىن پەخىرلىنىمەن!»— دەمدۇ؟ كەمتەر بولساق، باشقىلارغا قىلغان ياخشىلىقىمىزنى تىلغا ئېلىپ، ماختىنىشىمىزنىڭ ھاجىتى يوق. يەھۋانىڭ قىلىۋاتقان ئىشىمىزنى كۆرىدىغانلىقىنى ۋە ئۇنى قەدىرلەيدىغانلىقىنى بىلىپ، بۇنىڭدىن قانائەت ھېس قىلىمىز (مەتتا 6:2–4-نى سېلىشتۇرۇڭ؛ ئىبرانىي. 13:16). شۇنىڭغا ئىشىنىمىزكى، كەمتەرلىك بىلەن ئەيسانى ئۈلگە قىلساق، يەھۋانىڭ كۆڭلىنى خۇرسەن قىلىمىز.—1-پېتر. 5:6.
ئىچ ئاغرىتىپ، ھېسداشلىق قىلىشنى ئۆگىنىش
13. ئەيسا نائىن دېگەن شەھەرگە يېقىن جايدا نېمىنى كۆرگەن ۋە ئۇ نېمە قىلدى؟ (لۇقا 7:11–15)
13 لۇقا 7:11–15-نى ئوقۇڭ. ئەيسانىڭ ۋەز خىزمىتى يېرىم بولغاندا، يۈز بەرگەن بىر ۋەقەنى تەسەۋۋۇر قىلىپ كۆرۈڭ. ئۇ نائىن شەھىرىگە بارغان ئىدى. بۇ شەھەر جەلىلىيە ئۆلكىسىدىكى شۇنەم دېگەن شەھەردىن يىراق ئەمەس ئىدى. شۇ شەھەردە شۇنىڭدىن تەخمىنەن 900 يىل ئىلگىرى ئېلىشا پەيغەمبەر بىر ئايالنىڭ ئوغلىنى تىرىلدۈرگەن ئىدى (2-پادىشاھ. 4:32–37). ئەيسا شەھەر دەرۋازىسىغا يېقىنلاشقاندا، دەپنە مۇراسىمى بىلەن شەھەردىن چىقىۋاتقان كىشىلەرنى كۆرگەن. بۇ كىشىنىڭ ئىچىنى ئىنتايىن ئېچىشتۈرىدىغان بىر كۆرۈنۈش ئىدى. چۈنكى، تۇل ئايال يالغۇز بالىسىدىن ئايرىلىپ قالغان. بىراق، يىغا-زار قىلىۋاتقان ئانا يالغۇز ئەمەس ئىدى. ئۇنىڭ بىلەن شەھەردىن زور بىر توپ خالايىق چىقىۋاتاتتى. ئەيسا ئۇ بىر توپ كىشىلەرنى توختىتىپ، ئاشۇ قايغۇغا چۆمگەن ئانا ئۈچۈن ئاجايىپ بىر ئىشنى قىلغان، يەنى ئۇنىڭ ئوغلىنى ئۆلۈمدىن تىرىلدۈرگەن. بۇ مۇقەددەس كىتابتا ئېنىق خاتىرىلەنگەن تىرىلدۈرۈش ھەققىدىكى 3 ئۈزۈندىنىڭ بىرى.
ئەيسانى ئۈلگە قىلىپ، تەشەببۇسكارلىق بىلەن قايغۇ-ھەسرەت چېكىۋاتقانلارغا ھېسداشلىق قىلايلى (14–16-ئابزاسلارغا قاراڭ)
14. لۇقا 7-بابتا، قانداق بەزى مۇھىم تەپسىلاتلار تىلغا ئېلىنغان؟ (رەسىمگە ھەم قاراڭ)
14 لۇقا 7-بابتىكى بەزى مۇھىم تەپسىلاتلارنى مۇھاكىمە قىلىپ باقايلى. دىققەت قىلغان بولسىڭىز، ئەيسا قايغۇ-ھەسرەتكە تولغان ئانىنى كۆرۈپ، ئاندىن ئۇنىڭغا ئىچ ئاغرىتقانمۇ؟ (13-ئايەت) بەلكىم، ئاشۇ ئايالنىڭ ئوغلىنىڭ جىنازىسىغا يېقىن مېڭىپ، يىغا-زار قىلىۋاتقانلىقىنى كۆرگەن ئەيسا ئۇنىڭغا ئىچ ئاغرىپ ھېسداشلىق قىلغان. ئۇ پەقەت ئۇنىڭغا ئىچ ئاغرىتىپلا قالماي، ئۆز ھېسداشلىقىنىمۇ كۆرسەتكەن. مۇلايىملىق بىلەن، شۇ ئانىنىڭ كۆڭلىنى تىنچلاندۇرۇش ئۈچۈن: «يىغلىماڭ!»— دېگەن بولۇشى مۇمكىن. ئاندىن كېيىن، ئۇ ئۇنىڭغا ياردەم بېرىدىغان ئەمەلىي بىر ئىشنى قىلىپ، ئوغلىنى تىرىلدۈرۈپ، ئانىسىغا تاپشۇرغان.—14، 15-ئايەتلەر.
15. ئەيسانىڭ مۆجىزىسىدىن نېمىلەرنى ئۆگىنەلەيمىز؟
15 ئەيسانىڭ تۇل ئايالنىڭ ئوغلىنى تىرىلدۈرۈش مۆجىزىسىدىن نېمىلەرنى ئۆگىنەلەيمىز؟ قايغۇ-ھەسرەت چەككەنلەرگە ئىچ ئاغرىتىپ، ھېسداشلىق كۆرسىتىشنى ئۆگىنەلەيمىز. بىز ئەلۋەتتە ئەيساغا ئوخشاش ئۆلۈكلەرنى تىرىلدۈرەلمەيمىز. بىراق، ئۇنىڭ قىلغىنىغا ئوخشاش، بىزمۇ كۈزىتىش ئارقىلىق يېقىنىدىن ئايرىلىپ قالغان، قايغۇ-ھەسرەت چېكىۋاتقان كىشىلەرگە ھېسداشلىق قىلىشنى ئۆگىنەلەيمىز. تەشەببۇسكارلىق بىلەن قولىمىزدىن كېلىشىچە تەسەللى سۆزلىرىنى ياكى باشقا ئىشلارنى قىلىش ئارقىلىق، ئۇلارغا ياردەم ۋە ئىلھام بېرەلەيمىز d (پەند. نە 17:17؛ 2-كورىنت. 1:3، 4؛ 1-پېتر. 3:8). ھەتتا، ئاددىي سۆز-جۈملىلەر ۋە كىچىك ئىما-ئىشارەتلەرمۇ ئىلھام ۋە تەسەللى بېرەلەيدۇ.
16. بۇ سەھنىلەشتۈرۈلگەن رەسىمدە، يېقىندا قىزىدىن ئايرىلىپ قالغان بىر ئانىنىڭ باشتىن ئۆتكۈزگەنلىرى تەسۋىرلەنگەن. بۇنىڭدىن نېمىنى ئۆگىنەلەيمىز؟
16 بىر مىسالنى كۆرۈپ باقايلى. بىرنەچچە يىل ئىلگىرى، جامائەت يىغىلىشىدا ناخشا ئېيتىۋاتقاندا، بىر قېرىنداش قارشى تەرەپتە يىغلاۋاتقان بىر ئانىنى بايقىغان. بۇ ناخشىدا قايتا تىرىلىش ئۈمىدى تىلغا ئېلىنغان ۋە ئاشۇ ئانا يېقىندىلا كىچىك قىزىدىن ئايرىلىپ قالغان ئىدى. بۇنى بىلگەن قېرىنداش دەرھال ئۇنىڭ قېشىغا بېرىپ، ئۇنى قۇچاقلاپ، ناخشىنى بىرلىكتە ئېيتىپ تۈگەتكەن. ئاشۇ ئانا كېيىن ئەسلەپ مۇنداق دەيدۇ: «قېرىنداشلارنىڭ سۆيگۈ-مۇھەببەتكە تولغانلىقىنى ھېس قىلدىم». ئۇ ئۆزىنىڭ جامائەت يىغىلىشىغا كەلگەنلىكىدىن ئىنتايىن مىننەتدار بولغان. ئۇ يەنە مۇنداق دېگەن: «دەل بۇ يەردە، يەنى ئىبادەت يىغىلىشىدا، بىز ياردەمگە ئېرىشەلەيمىز». شۇنىڭغا ئىشىنەلەيمىزكى، يەھۋا روھىي ئېزىلگەنلەرگە قىلغان ئاددىي ئىشلىرىمىز ئارقىلىق كۆرسەتكەن ھېسداشلىقىمىزغا دىققەت قىلىدۇ ۋە ئۇنى قەدىرلەيدۇ.—زەبۇر 34:18.
ئەيسانىڭ مۆجىزىلىرىنى تەتقىق قىلىپ ئۆگىنىش ئېتىقادىمىزنى كۈچەيتىدۇ
17. بۇ ماقالىدە نېمىلەرنى ئۆگەندۇق؟
17 مۇقەددەس كىتابتىكى ئەيسانىڭ مۆجىزىلىرى تىلغا ئېلىنغان ئۈزۈندىلەرنى تەتقىق قىلىپ ئۆگەنگىنىمىزدە، ئىمان-ئېتىقادىمىزنى كۈچەيتەلەيمىز. ئاشۇ ئۈزۈندىلەر يەھۋا خۇدا ۋە ئەيسا مەسىھنىڭ سىزگە بولغان چوڭقۇر سۆيگۈسىنى، ئەيسانىڭ ئىنسانىيەتنىڭ بارلىق قىيىنچىلىقلىرىنى ھەل قىلىش كۈچ-قۇدرىتى بارلىقىنى، ۋەدە قىلىنغان پادىشاھلىقنىڭ پات-يېقىندا بىزگە بەرىكەتلەرنى ئېلىپ كېلىدىغانلىقىنى ئۆگىتىدۇ. ئۈزۈندىلەرنى تەھلىل قىلغىنىمىزدا، ئەيسانىڭ پەزىلەتلىرىنى قانداق ئۈلگە قىلالايدىغانلىقىمىز ھەققىدە ئويلىنىمىز. ئۇنداقتا، ئەيسانىڭ باشقا مۆجىزىلىرى ھەققىدە شەخسىي تەتقىق ئۆگىنىش ياكى ئائىلىۋى ئىبادەتتە چوڭقۇر مۇلاھىزە قىلىش پىلانىنى تۈزۈپ، شۇ بويىچە تەتقىق قىلىپ ئۆگىنىڭ. شۇنداق قىلغىنىڭىزدا، بەزى مۇھىم ھەقىقەتلەرنى ئۆگىنەلەيسىز ۋە ئۆگەنگەنلىرىڭىزنى باشقىلار بىلەن ئورتاقلىشىپ، ئىمان-ئېتىقادنى كۈچەيتىدىغان سۆھبەتلەردە بولالايسىز.—رىملىقلار 1:11، 12.
18. كېيىنكى ماقالىدە، نېمە ھەققىدە مۇھاكىمە قىلىمىز؟
18 ۋەز خىزمىتى ئاخىرلىشىپ قالغاندا، ئەيسا ئۈچىنچى قېتىم، يەنى مۇقەددەس كىتابتا ئېلىنغان ئەڭ ئاخىرقى قېتىملىق تىرىلدۈرۈلۈش مۆجىزىسىنى كۆرسەتكەن. ئەمما، بۇ باشقىلىرىغا قارىغاندا، ئالاھىدە ئىدى. يەنى، ئۇ ئۆزىنىڭ يېقىن دوستىنى، ئادەتتىن تاشقىرى ئالاھىدە بىر ۋەزىيەتتە ئۆلۈمدىن تىرىلدۈرگەن. بۇ تىرىلدۈرۈش مۆجىزىسىدىن نېمىلەرنى ئۆگىنەلەيمىز؟ تىرىلىش ئۈمىدىگە بولغان ئىشەنچىمىزنى قانداق كۈچەيتەلەيمىز؟ كېيىنكى ماقالىدە، بۇ سوئال ئۈستىدە مۇھاكىمە قىلىمىز.
148-ناخشا يېگانە ئوغلۇڭنى بەردىڭ
a ئەيسا قاتتىق بوران-چاپقۇننى تىنچلاندۇرۇپ، كېسەللەرنى ساقايتقان ۋە ئۆلۈكلەرنى تىرىلدۈرگەن. ئۇنىڭ مۆجىزىلىرى ھەققىدە ئوقۇش كىشىنى ھاياجانلاندۇرىدۇ. مۇقەددەس كىتابتا يېزىلغان ئاشۇ مۆجىزىلەر ھەققىدىكى ئۈزۈندىلەر كۆڭلىمىزنى خۇشال قىلىش ئۈچۈن ئەمەس، بەلكى بىزگە تەلىم بېرىش ئۈچۈن يېزىپ قالدۇرۇلغان. بۇ ئۈزۈندىلەرنى مۇھاكىمە قىلغىنىمىزدا، يەھۋا خۇدا ۋە ئەيسا مەسىھ ھەققىدە ئىمان-ئېتىقادىمىزنى كۈچەيتىدىغان ھەقىقەتلەرنى ئۆگىنەلەيمىز ۋە يېتىلدۈرۈشىمىز زۆرۈر بولغان خۇدا ياقتۇرىدىغان پەزىلەتلەرنى تونۇپ يېتەلەيمىز.
b بىر مۇقەددەس كىتابنى تەتقىق قىلىدىغان ئالىم چۈشەندۈرۈپ مۇنداق دېگەن: «شەرق مەدەنىيىتىدە، مېھماندوستلۇق مۇقەددەس بىر ۋەزىپە دەپ قارالغان. ساھىپخان مېھمانلارنىڭ ئالدىغا مول زىياپەت ھازىرلاپ، ئۇلارنى يەپ-ئىچىپ، ھەتتا ئېشىپ قالغىچە تەمىنلىشى كېرەك ئىدى. بولۇپمۇ، توي زىياپەت داستىخىنىنى باياشات تەييارلاش كېرەك ئىدى».
c مۇقەددەس كىتابتا ئەيسانىڭ 30 دىن كۆپرەك مۆجىزە كۆرسەتكەنلىكى ئېنىق تىلغا ئېلىنغان. ئۇنىڭدىن باشقا، ئۇ يەنە نۇرغۇن مۆجىزىلەرنى كۆرسەتكەن. بىراق، مۇقەددەس كىتابتىكى ئۈزۈندىلەردە ھەر بىرى ئايرىم-ئايرىم تىلغا ئېلىنمىغان. بىر قېتىم، ئۇنىڭ يېنىغا پۈتۈن شەھەردىكى كىشىلەر كەلگەن ۋە ئۇ نۇرغۇن كىشىلەرنى ساقايتقان ئىدى.—ماركۇس 1:32–34.
d قايغۇ-ھەسرەت چەككەنلەرگە تەسەللى بېرىش ئۈچۈن نېمە دېيەلەيدىغان ياكى قىلالايدىغانلىقىمىزنى ئۆگىنىشكە ياردەم بېرىدىغان بەزى مەسلىھەتلەرنى بىلىۋېلىش ئۈچۈن «كۈزىتىش مۇنارى»، 2010-يىل، 1-نويابىر سانىدىكى «ئەيساغا ئوخشاش ئازاب-ئوقۇبەت چەككەنلەرگە تەسەللى بېرىڭ» ناملىق ماقالىنى ئوقۇڭ.
e سۈرەتتە: ئەيسا ئارقا تەرەپتە تۇرغاندا، يېڭى تويى بولغان قىز-يىگىت ئۇلارنىڭ مېھمانلىرى ئېسىل شارابتىن ھۇزۇر ئېلىۋاتىدۇ.
