18-تەتقىق ماقالىسى
جامائەت يىغىلىشلىرىدا بىر-بىرىڭلارغا ئىلھام بېرىڭلار
«بىر-بىرىمىز ھەققىدە ئويلىنايلى. . . . بىر-بىرىمىزگە ئىلھام بېرەيلى».—ئىبرانىي. 10:24، 25.
11-ناخشا يەھۋانىڭ كۆڭلىنى خۇش قىلىش
بۇ ماقالىدە a
1. نېمە ئۈچۈن ئىبادەت يىغىلىشلىرىدا قول كۆتۈرۈپ جاۋاب بېرىمىز؟
نېمە ئۈچۈن جامائەت يىغىلىشلىرىغا قاتنىشىمىز؟ ئۇنىڭ ئەڭ ئاساسىي سەۋەبى — يەھۋانى مەدھىيىلەش (زەبۇر 26:12؛ 111:1). يىغىلىشلارغا قاتنىشىش ئارقىلىق، بۇ قىيىن كۈنلەردە بىر-بىرىمىزنى ئىلھاملاندۇرىمىز (1-سالونىكا. 5:11). قولىمىزنى كۆتەرگەندە ۋە جاۋاب بەرگەندە، يەھۋانى مەدھىيىلەش ۋە قېرىنداشلارغا ئىلھام بېرىشكە ئۆز ھەسسىمىزنى قوشىمىز.
2. يىغىلىشلىرىمىزدا قول كۆتۈرۈپ، ئوي-پىكىرلىرىمىزنى بايان قىلىشنىڭ قانداق پۇرسىتى بار؟
2 ھەر ھەپتە ئىبادەت يىغىلىشلىرىمىزدا ئۆز ئوي-پىكىرلىرىمىزنى بايان قىلىش پۇرسىتىمىز بار. مەسىلەن، ھەپتە ئاخىرىدا «كۈزىتىش مۇنارى» تەتقىق ئۆگىنىشىدە شۇنداق قىلالايمىز. ھەپتە ئوتتۇرىسىدىكى يىغىلىشلاردا روھىي گۆھەرلەرنى ئىزدەش ياكى جامائەت مۇقەددەس كىتاب تەتقىقى ئۆگىنىشى قىسىمىدا ۋە باشقا مۇھاكىمە قىسىملىرىدا قول كۆتۈرۈپ، ئۆز ئوي-پىكرىڭىزنى بايان قىلالايسىز.
3. بىز قانداق قىيىنچىلىقلارغا دۇچ كېلىشىمىز مۇمكىن ۋە ئىبرانىيلار 10:24، 25-ئايەتلەر قانداق ياردەم بېرەلەيدۇ؟
3 ھەممىمىز يەھۋانى مەدھىيىلەشنى ۋە قېرىنداشلىرىمىزغا ئىلھام بېرىشنى خالايمىز. بىراق، بىز قول كۆتۈرۈپ، ئوي-پىكرىمىزنى ئېيتقاندا، دۇچ كېلىدىغان ئىككى قىيىنچىلىق بولۇشى مۇمكىن. ئوي-پىكرىمىزنى بايان قىلىشتىن ئەنسىرەپ قورقۇشىمىز مۇمكىن. ياكى بولمىسا، ئوي-پىكرىمىزنى بايان قىلىشنى خالايمىز، ئەمما ئۈمىد قىلغاندەك بىزدىن سورىماسلىقى مۇمكىن. شۇنداق ۋەزىيەتلەردە نېمە بىزگە ياردەم بېرىدۇ؟ بۇ سوئالغا ئەلچى پاۋلۇسنىڭ ئىبرانىيلار يازغان خېتىدىن جاۋاب تاپالايمىز. پاۋلۇس جامائەت يىغىلىشىدا بىر يەرگە جەم بولۇشنىڭ مۇھىملىقىنى تىلغا ئالغاندا، چوقۇم «بىر-بىرىمىزگە ئىلھام» بېرىشكە ئەھمىيەت بېرىشىمىزنىڭ زۆرۈرلىكىنى ئېيتقان (ئىبرانىيلار 10:24، 25-نى ئوقۇڭ). ئىمان-ئېتىقادىمىزنى كۆرسىتىدىغان ئاددىي جاۋابلارنى بەرگەندە، باشقىلارغا ئىلھام بېرەلەيدىغانلىقىمىزنى ئېسىمىزدە تۇتساق، ئۆزىمىزنى ئەركىنرەك تۇتۇپ، قول كۆتۈرۈپ جاۋاب بېرىشتىن قورقمايمىز. ئەگەر دائىم بىزدىن سورىمىسا، باشقىلارنىڭ جاۋاب بېرىش پۇرسىتىگە ئېرىشكىنىدىن خۇشال بولالايمىز.—1-پېتر. 3:8.
4. بۇ ماقالىدە قايسى ئۈچ نۇقتىنى مۇھاكىمە قىلىمىز؟
4 بۇ ماقالىدە ئالدى بىلەن، قول كۆتۈرۈپ جاۋاب بېرىدىغانلارنىڭ سانى ئاز بولغان كىچىك جامائەتتە، ئاندىن كېيىن نۇرغۇن قېرىنداشلار قول كۆتۈرۈپ جاۋاب بېرىشكە تەييار تۇرىدىغان چوڭ جامائەتتە بىر-بىرىمىزنى ئىلھاملاندۇرۇش ئۈچۈن نېمە قىلالايدىغانلىقىمىزنى كۆرىمىز. ئاخىرىدا، بەرگەن جاۋابلىرىمىز قانداق ئىلھام بېرەلەيدىغانلىقىنى مۇھاكىمە قىلىمىز.
كىچىك جامائەتتە ئۆزئارا ئىلھام بېرىش
5. جامائەت يىغىلىشلىرىدا قول كۆتۈرۈپ جاۋاب بېرىدىغانلار ئاز بولسا، بىر-بىرىمىزنى قانداق ئىلھاملاندۇرالايمىز؟
5 كىچىك بىر جامائەتتە ياكى توپتا ئادەتتە قول كۆتۈرۈپ جاۋاب بېرىدىغانلار ئانچە كۆپ بولمايدۇ. شۇڭا، رىياسەتچىلىك قىلىدىغان بۇرادەر نېمە قىلىشنى بىلمەي قالىدۇ. بەزى ۋاقىتلاردا، ئۇ بىرىنىڭ قول كۆتۈرۈشىنى ساقلاپ تۇرۇشى مۇمكىن. قارىماققا، بۇ ئىبادەت يىغىلىشى زېرىكىشلىك، ئىلھام بېرەلمەيدىغاندەك كۆرۈنىدۇ. شۇنداق ۋەزىيەتتە، نېمە قىلسىڭىز بولىدۇ؟ دائىم قولۇڭىزنى كۆتۈرۈشكە تەييار تۇرۇڭ. شۇنداق قىلسىڭىز، باشقىلارنىمۇ كۆپرەك قول كۆتۈرۈشكە دەۋەت قىلالىشىڭىز مۇمكىن.
6، 7. قول كۆتۈرۈپ جاۋاب بېرىشتىن قورقۇپ، جىددىيلىشىشنى ئازايتىش ئۈچۈن نېمە قىلساق بولىدۇ؟
6 ئەگەر قول كۆتۈرۈپ جاۋاب بېرىشتىن قورقۇپ، جىددىيلەشسىڭىز، نېمە قىلسىڭىز بولىدۇ؟ نۇرغۇن قېرىنداشلارمۇ سىزگە ئوخشاشلا ھېس-تۇيغۇدا بولىدۇ. بىراق، قېرىنداشلىرىڭىزنى كۆپرەك ئىلھاملاندۇرۇش ئۈچۈن، جاۋاب بەرگەندە قورقۇپ جىددىيلىشىشنى قانداق يېڭىش توغرۇلۇق ئويلىنىپ كۆرۈڭ. بۇنىڭ ئۈچۈن نېمىلەرنى قىلسىڭىز بولىدۇ؟
7 «كۈزىتىش مۇنارى» ژۇرنىلىنىڭ بۇرۇنقى سانلىرىنىڭ بىرىدىن، سىزگە ياردەم بېرىدىغان بەزى ئەمەلىي مەسلىھەتلەرنى تاپالىشىڭىز مۇمكىن b. مەسىلەن، ياخشى تەييارلىق قىلىڭ (پەند. نە 21:5). ئۆگىنىدىغان مەزمۇنلارنى ياخشىراق چۈشەنسىڭىز، قىزغىنلىق بىلەن قول كۆتۈرۈشكە ھەرقاچان تەييار بولالايسىز. شۇندىلا، جاۋاب بېرىش سىزگە قىيىن تۇيۇلمايدۇ (پەند. نە 15:23؛ 17:27). لېكىن، جاۋابلىرىڭىز قىسقا بولسۇن. شۇنداق بولغاندا، جىددىيلىشىپ قورقۇشمۇ ئاز بولىدۇ. بىر ياكى ئىككى جۈملە سۆز بىلەن جاۋاب بېرىشكە بولىدۇ. كۆپ ئوي-پىكىرنى ئۆز ئىچىگە ئالغان ئۇزۇن جاۋابلارغا قارىغاندا، قىسقا، مېغىزلىق جاۋابلارنى قېرىنداشلار ئاسانراق چۈشىنىدۇ. ئۆز سۆزلىرىڭىز بىلەن، قىسقا جاۋابلارنى بېرىش ئارقىلىق ياخشى تەييارلىق قىلغانلىقىڭىزنى ۋە ئۆگىنىدىغان مەزمۇنلارنى ئېنىق چۈشەنگەنلىكىڭىزنى كۆرسىتەلەيسىز.
8. يەھۋا قولىمىزدىن كېلىشىچە تىرىشچانلىق كۆرسەتكەنلىكىمىزگە قانداق قارايدۇ؟
8 مۇشۇ مەسلىھەتلەرنىڭ بەزىلىرىنى سىناپ كۆرگەندىن كېيىن، يەنىلا بىر ياكى ئىككى قېتىمدىن كۆپرەك جاۋاب بېرىشتىن ئەنسىرسىڭىزچۇ؟ شۇنىڭغا ئىشىنىڭكى، يەھۋا قولۇڭىزدىن كەلگەننى قىلغىنىڭىزنى قەدىرلەيدۇ (لۇقا 21:1–4). ئەڭ ياخشىسىنى بېرىش ھەرگىزمۇ قولۇڭىزدىن كەلمەيدىغان ئىشنى قىلىشىنى بىلدۈرمەيدۇ (فىلىپى. 4:5). ئۆزىڭىزنىڭ نېمە قىلالايدىغانلىقىنى ئېنىق كۆرۈپ يېتىپ، ئاندىن بىر مەقسەت قويۇڭ ۋە كۆڭۈل خاتىرجەملىكىڭىز ئۈچۈن دۇئا قىلىڭ. دەسلەپتە، قىسقا بىر جاۋاب بېرىش ئۈچۈن مەقسەت قويسىڭىز بولىدۇ.
چوڭ جامائەتتە ئۆزئارا ئىلھام بېرىش
9. چوڭ جامائەتتە قانداق قىيىنچىلىققا دۇچ كېلىشىمىز مۇمكىن؟
9 ئەگەر جامائىتىڭىزدە ۋەز ئېيتقۇچىلار كۆپ بولسا، باشقىچە بىر قىيىنچىلىققا دۇچ كېلىشىڭىز مۇمكىن. جاۋاب بېرىش ئۈچۈن قول كۆتەرگەن بولسىڭىزمۇ، باشقا كۆپلىگەن قېرىنداشلارمۇ قول كۆتەرگەچ، سىزدىن سورىماسلىقى مۇمكىن. مەسىلەن، دانىئېلا يىغىلىشلاردا ھەمىشە جاۋاب بېرىپ خۇشاللىق تاپاتتى c. ئۇ بۇنداق قىلىشنى ئىبادىتىنىڭ بىر قىسىمى، باشقىلارغا ئىلھام بېرىشنىڭ بىر يولى، مۇقەددەس كىتاب ھەقىقىتىنى قەلبىگە يېزىۋېلىشنىڭ بىر ئۇسۇلى دەپ قارىغان. بىراق، ئۇ تېخىمۇ چوڭراق جامائەتكە كۆچۈپ بارغان. جامائەتتە ئۇ ھەر دائىم قول كۆتەرسىمۇ، ئۇنىڭدىن ئارىلاپ-ئارىلاپ سورىغان. ھەتتا، بەزىدە پۈتۈن يىغىلىش داۋامىدا بىر قېتىممۇ جاۋاب بېرىش پۇرسىتىگە ئېرىشەلمىگەن. ئۇ ئۆز ھېس-تۇيغۇلىرىنى ئېيتىپ، مۇنداق دەيدۇ: «كۆڭلۈم بەك يېرىم بولدى. ئۆزۈمنى بىر ئىمتىيازدىن مەھرۇم بولغاندەك ھېس قىلدىم. قايتا-قايتا شۇنداق بولغاندا، قەستەن شۇنداق بولۇۋاتامدۇ ياكى ئۇنداق ئەمەسمۇ دەپ ئويلاشقا باشلىدىم».
10. قانداق قىلساق جاۋاب بېرىش پۇرسىتىمىز كۆپ بولىدۇ؟
10 سىزمۇ دانىئېلا ئوخشاش ھېس-تۇيغۇدا بولغانمۇ؟ ئەگەر شۇنداق بولسا، سىز قول كۆتۈرۈشتىن ۋاز كەچمەكچى ۋە يىغىلىشنى پەقەت ئاڭلاپلا ئولتۇرماقچى بولغان بولۇشىڭىز مۇمكىن. ئەمما، قول كۆتۈرۈپ جاۋاب بېرىشنى توختاتماڭ. ئۇنداق ۋەزىيەتتە نېمە قىلسىڭىز بولىدۇ؟ ھەر قېتىملىق يىغىلىش ئۈچۈن بىرقانچە جاۋابلارنى تەييارلاش سىزگە ياردەم بېرىشى مۇمكىن. جاۋاب بېرىشكە مۇھاكىمىنىڭ بېشىدا پۇرسىتىڭىز بولمىسا، ئوتتۇرىدا ياكى ئاخىرىدا بولىدۇ. «كۈزىتىش مۇنارى» تەتقىق ئۆگىنىشىگە تەييارلىق قىلغاندا، ھەر بىر ئابزاسنىڭ ماقالىنىڭ ئاساسىي ئايىتى بىلەن قانداق باغلىنىشى بارلىقىنى ئويلاڭ. ئەگەر شۇنداق قىلسىڭىز، مۇھاكىمە جەريانىدا ياخشى جاۋابلارنى بېرەلەيسىز. ئۇنىڭدىن باشقا، چۈشەندۈرۈش قىيىنراق بولغان چوڭقۇر ھەقىقەتلەر تىلغا ئېلىنغان ئابزاسلارغا جاۋاب بېرىشكە تەييارلىق قىلسىڭىز بولىدۇ (1-كورىنت. 2:10). بۇ مەسلىھەتلەرنى ئەمەلىي قوللانغان بولسىڭىزمۇ، بىرقانچە قېتىملىق يىغىلىشتىن كېيىن يەنىلا جاۋاب بېرىش پۇرسىتى يوقلىقىنى ھېس قىلسىڭىزچۇ؟ شۇنداق ئەھۋالدا، يىغىلىش باشلىنىشتىن بۇرۇن مۇھاكىمىگە يېتەكچىلىك قىلىدىغان بۇرادەرگە قايسى سوئالغا جاۋاب بېرىشنى خالايدىغانلىقىڭىزنى ئېيتسىڭىز بولىدۇ.
11. فىلىپىلىكلەر 2:4-ئايەت بىزنى نېمە قىلىشقا دەۋەت قىلىدۇ؟
11 فىلىپىلىكلەر 2:4-نى ئوقۇڭ. مۇقەددەس روھنىڭ ئىلھامى بىلەن، ئەلچى پاۋلۇس مەسىھ ئەگەشكۈچىلىرىنى باشقىلارنىڭ مەنپەئىتىنى كۆزلەشكە دەۋەت قىلغان. جامائەت يىغىلىشلىرى جەريانىدا بۇ نەسىھەت سۆزىنى قانداق قوللانساق بولىدۇ؟ شۇنى ئۇنتۇمايلى، باشقىلارمۇ بىزگە ئوخشاش قول كۆتۈرۈپ جاۋاب بېرىشنى خالايدۇ.
ئادەتتە سۆھبەتتە باشقىلارنىڭ سۆزلىشىگە يول قويغاندەك، جامائەت يىغىلىشىدا ھەم باشقىلارنىڭ جاۋاب بېرىشىگە يول قويۇڭ (12-ئابزاسقا قاراڭ)
12. يىغىلىشلاردا باشقىلارنى ئىلھاملاندۇرۇشنىڭ ئەڭ ياخشى يولى نېمە؟ (رەسىمگە ھەم قاراڭ)
12 مۇنداق ئويلاپ كۆرۈڭ: سىز دوستلىرىڭىز بىلەن سۆھبەتلەشكەندە، پەقەت ئۆزىڭىز كۆپ سۆزلەپ، باشقىلارغا ئازىراق سۆزلەش پۇرسىتىنى قالدۇرامسىز؟ ئەلۋەتتە، ئۇنداق قىلمايسىز. ئۇلارنىڭمۇ سۆھبىتىڭلاردا ئۆز سۆزلىرىنى قىلىشىغا يول بېرىسىز. خۇددى شۇنىڭدەك، جامائەت يىغىلىشلىرىدىمۇ كۆپرەك قېرىنداشلارنىڭمۇ جاۋابلارنى بېرىشىنى خالايمىز. ئېتىقادچى قېرىنداشلىرىمىزنى ئىلھاملاندۇرۇشنىڭ ئەڭ ياخشى ئۇسۇللىرىدىن بىرى — ئۇلارغا ئۆز ئىمان-ئېتىقادىنى ئىپادىلەشنىڭ پۇرسىتىنى بېرىش (1-كورىنت. 10:24). ھازىر بۇنى قانداق قىلالايدىغانلىقىمىزنى كۆرۈپ باقايلى.
13. كۆپرەك كىشىلەرنىڭ قول كۆتۈرۈپ، جاۋاب بېرىشىگە قانداق پۇرسەت بېرەلەيمىز؟
13 بىز قىلالايدىغان بىر ئىش — قىسقا جاۋاب بېرىش. شۇنداق قىلغاندا، كۆپرەك كىشىلەر جاۋاب بېرەلەيدۇ. ئاقساقاللار ۋە باشقا تەجرىبىلىك ۋەز ئېيتقۇچىلار ئۇنداق قىلىشتا ئۈلگە قالدۇرالايدۇ. ھەتتا، قىسقا جاۋاب بەرگەندىمۇ، بەك كۆپ مۇھىم نۇقتىلارنى سۆزلەشتىن ساقلىنىڭ. ئەگەر ئابزاستىكى ھەممە نەرسىنى سۆزلىسىڭىز، باشقىلارنىڭ بىر نەرسە دېيىشىگە ھېچنېمە قالمايدۇ. بۇ ئابزاستا ئىككى مەسلىھەت بېرىلگەن. بىرىنچىسى، قىسقا جاۋاب بېرىش. ئىككىنچىسى، بەك كۆپ نۇقتىلارنى سۆزلىمەسلىك. ئەگەر بۇ ئابزاسقا جاۋاب بېرىش ئۈچۈن سىزدىن بىرىنچى سورىسا، ئۇنداقتا، بۇ ئىككى مەسىھەتنىڭ پەقەت بىرىنىلا سۆزلەڭ.
قاچان يىغىلىشتا قول كۆتەرمەسلىكنى قارار قىلىشىمىز مۇمكىن؟ (14-ئابزاسقا قاراڭ) f
14. قانچە قېتىم قول كۆتۈرۈشنى قارار قىلىشىمىزغا نېمە ياردەم بېرەلەيدۇ؟ (رەسىمگە ھەم قاراڭ)
14 قانچە قېتىم قول كۆتۈرۈشنى قارار قىلغىنىڭىزدا، ۋەزىيەتكە قاراپ قارار چىقىرىڭ. ئەگەر باشقىلارنىڭ تېخى بىرەر قېتىممۇ جاۋاب بېرىش پۇرسىتى بولمىغان بولسا، ھەر دائىم قولىمىزنى كۆتۈرسەك، مۇھاكىمىگە يېتەكچىلىك قىلىدىغان بۇرادەرگە بېسىم قىلىپ قويۇشىمىز مۇمكىن. بۇ باشقىلارنى قول كۆتۈرۈشتىن توسۇپ قويالايدۇ.—ۋەز 3:7.
15. (1) ئەگەر بىزدىن سورىمىسا، قانداق ئىنكاس قايتۇرۇشىمىز كېرەك؟ (2) يېتەكچىلىك قىلىدىغانلار ھەر بىر كىشىگە ئېتىبار بېرىش ئۈچۈن نېمە قىلالايدۇ؟ (« مۇھاكىمىگە يېتەكچىلىك قىلسىڭىز» ناملىق رامكىغا قاراڭ)
15 يىغىلىشتا مۇھاكىمە ئۆتكۈزۈلگەندە، كۆپ قېرىنداشلار قول كۆتەرسە، ئۆزىمىز ئۈمىد قىلغاندەك، ھەر دائىم جاۋاب بېرىش پۇرسىتى بولماسلىقى مۇمكىن. بەزى ۋاقىتلاردا مۇھاكىمىگە يېتەكچىلىك قىلىدىغان بۇرادەر بىر قېتىممۇ سىزدىن سورىماسلىقى مۇمكىن. بەلكىم، بۇنداق ئەھۋال كىشىنى ئۈمىدسىزلەندۈرىدۇ. ئەمما، بىزدىن سورىمىغاندا، بۇنى كۆڭلىمىزگە ئالماسلىققا تىرىشىشىمىز لازىم.—ۋەز 7:9.
16. يىغىلىشتا جاۋاب بەرگەنلەرگە قانداق ئىلھام-مەدەت بېرەلىشىمىز مۇمكىن؟
16 ئەگەر ئۆزىڭىز ئۈمىد قىلغاندەك ھەر دائىم جاۋاب بېرەلمىسىڭىز، باشقىلارنىڭ بەرگەن جاۋابلىرىنى كۆڭۈل قويۇپ ئاڭلاپ، يىغىلىشتىن كېيىن ئۇلارنى جاۋابى ئۈچۈن ماختاپ مەدەت بېرىڭ. بەرگەن جاۋابلىرىڭىزغا ئوخشاش، ماختاشلىرىڭىزمۇ ئېتىقادچى قېرىنداشلارغا ئىلھام-مەدەت بېرەلەيدۇ (پەند. نە 10:21). ئۆزئارا ماختاش بىر-بىرىمىزنى ئىلھاملاندۇرۇشنىڭ يەنە بىر يولى.
ئىلھام بېرىشنىڭ يەنە باشقا يوللىرى
17. (1) ئاتا-ئانىلار بالىلىرىغا مۇۋاپىق جاۋابلارنى تەييارلىشىغا قانداق ياردەم بېرەلەيدۇ؟ (2) فىلىمگە ئاساسلانغاندا، جاۋابلارنى تەييارلاشنىڭ قايسى تۆت قەدەم باسقۇچى بار؟ (ئىزاھاتقا ھەم قاراڭ)
17 ئىبادەت يىغىلىشلىرىمىزدا بىر-بىرىمىزنى يەنە قانداق ئىلھاملاندۇرالايمىز؟ ئەگەر ئاتا-ئانا بولسىڭىز، بالىلىرىڭىزنىڭ يېشىغا ماس جاۋابلارنى تەييارلىشىغا ياردەم بېرىڭ (مەتتا 21:16). بەزى ۋاقىتلاردا، نىكاھ مەسىلىسى ياكى ئەدەپ-ئەخلاق قاتارلىق مۇھىم مەسىلىلەر مۇھاكىمە قىلىنىدۇ. بىراق، بالىلار جاۋاب بېرەلىگۈدەك بىر-ئىككى ئابزاس مەزمۇنلارمۇ بولۇشى مۇمكىن. ئۇنىڭدىن باشقا، بالىلار ھەر قېتىم قول كۆتەرگەندە، نېمە ئۈچۈن ئۇلاردىن سورىماي، باشقىلاردىن سورىغانلىقىنى چۈشەندۈرۈڭ. سەۋەبىنى چۈشەنسە، ئۇلار خاپا بولماسلىقنى ئۆگىنىدۇ.—1-تىموت. 6:18 d.
18. جاۋاب بەرگەندە، دىققەتنى ئۆزىمىزگە قارىتىشتىن قانداق ساقلىنالايمىز؟ (پەند. نە 27:2)
18 ھەممىمىز يەھۋاغا شان-شەرەپ كەلتۈرىدىغان ۋە قېرىنداشلىرىمىزنى ئىلھاملاندۇرىدىغان جاۋابلارنى تەييارلىيالايمىز (پەند. نە 25:11). بەزىدە قىسقىچە شەخسىي تەجرىبىلىرىمىزنى سۆزلەش بېرىشىمىز مۇمكىن، ئەمما ئۆزىمىز ھەققىدە كۆپ سۆزلەشتىن ساقلىنىشىمىز كېرەك (پەندى-نەسىھەت 27:2-نى ئوقۇڭ؛ 2-كورىنت. 10:18). ئەكسىنچە، دىققىتىمىزنى يەھۋا خۇدا، ئۇنىڭ سۆزى ۋە ئۇنىڭ خەلقىگە مەركەزلەشتۈرۈشكە تىرىشىشىمىز لازىم (ۋەھىي. 4:11). ئەلۋەتتە، بۇنداق قىلىشنىڭ مۇۋاپىق پەيتى بار، ئەگەر ئابزاسقا بېرىلگەن سوئال شەخسىي تەجرىبىلەرنى سۆزلەشكە دەۋەت قىلسا، شۇنداق قىلساق بولىدۇ. مەسىلەن، بۇ ماقالىدىكى كېيىنكى ئابزاس ئۆز تەجرىبىلىرىڭىزنى سۆزلەش ئۈچۈن پۇرسەت بېرىدۇ.
19. (1) يىغىلىشقا قاتناشقانلارنىڭ ھەممىسىنىڭ مەنپەئەتىنى كۆزلىسەك، نەتىجىسى قانداق بولىدۇ؟ (رىملىقلار 1:11، 12) (2) قول كۆتۈرۈپ جاۋاب بېرىش شان-شەرىپى ئۈچۈن شەخسەن ئۆز مىننەتدارلىقىڭىزنى قانداق بىلدۈرىسىز؟
19 قانداق جاۋاب بېرىش توغرىسىدا قاتتىق قائىدە-تۈزۈم بولمىسىمۇ، ھەممىمىز بىر-بىرىمىزگە ئىلھام-مەدەت بېرىش ئۈچۈن تىرىشىمىز. بەلكىم، بۇ بەزىدە كۆپرەك قول كۆتۈرۈپ جاۋاب بېرىشنى بىلدۈرىدۇ. ياكى ئۆزىمىزگە بېرىلگەن جاۋاب بېرىش پۇرسىتىگە رازى بولۇپ، باشقىلارنىڭمۇ بىزدەك پۇرسەتكە ئېرىشەلىگەنلىكى ئۈچۈن خۇشال بولۇشنى بىلدۈرىدۇ. جامائەت يىغىلىشلىرىدا باشقىلارنىڭ مەنپەئىتىنى كۆزلەش ئارقىلىق ھەممىمىز بىر-بىرىمىزگە ئىلھام بېرىشتىن خۇشاللىق تاپالايمىز.—رىملىقلار 1:11، 12-نى ئوقۇڭ.
20-ناخشا يىغىلىشلىرىمىزغا بەرىكەت بەر
a ئىبادەت يىغىلىشلىرىمىزدا قول كۆتۈرۈپ، ئۆز ئوي-پىكىرلىرىمىزنى بايان قىلساق، بىر-بىرىمىزگە ئىلھام بېرەلەيمىز. بىراق، بەزىلەر جاۋاب بېرىشتىن قورقىدۇ. بەزىلەر جاۋاب بېرىشنى ياخشى كۆرگەچ، ئۆزلىرىدىن كۆپرەك سوراشنى كۈتىدۇ. ھەر ئىككىلا ۋەزىيەتتە، ھەممىمىز ئىلھامغا ئېرىشىش ئۈچۈن بىر-بىرىمىز توغرۇلۇق ئويلايدىغانلىقىمىزنى قانداق كۆرسىتەلەيمىز؟ بىز قانداق قىلىپ قېرىنداشلىرىمىزنى بىر-بىرىنى سۆيۈشكە ۋە ياخشى ئىشلارنى قىلىشقا رىغبەتلەندۈرىدىغان جاۋابلارنى بېرەلەيمىز؟ بۇ ماقالىدە مۇشۇ سوئاللارغا جاۋاب تاپىمىز.
b «كۈزىتىش مۇنارى»، 2019-يىل، يانۋار سانى، 8–13-بەتلىرىگە ۋە «كۈزىتىش مۇنارى»، 2003-يىل، 1-سېنتەبىر سانى، 19–22-بەتلىرىگە قاراڭ.
c ئىسىم ئۆزگەرتىلگەن.
d jw.org توردا «يەھۋا خۇدا بىلەن دوست بولۇڭ. جاۋاب بېرىشكە تەييارلىنىڭ» ناملىق فىلىمنى كۆرۈڭ.
f سۈرەتتە: چوڭ جامائەتتە ئاللىقاچان جاۋاب بېرىپ، باشقىلارغىمۇ جاۋاب بېرىشكە پۇرسەت بېرىۋاتقان بۇرادەر
